ຂົນສົ່ງຜ່ານ
ຖ້າທ່ານມີຈຸດປະສົງຂົນສົ່ງສິນຄ້າ ຈາກດ່ານສາກົນໜຶ່ງໄປອີກປະເທດໜຶ່ງ ໂດຍຜ່ານດິນແດນຂອງ ສປປ ລາວ ທ່ານຕ້ອງແຈ້ງສິນຄ້ານັ້ນໃຫ້ດ່ານພາສີຮັບຮູ້ ໂດຍປະຕິບັດຕາມ ລະບຽບການຂົນສົ່ງຜ່ານ.
ໃບແຈ້ງການນໍາເຂົ້າພາຍໃຕ້ລະບອບຂົນສົ່ງຜ່່ານ ຕ້ອງໄດ້ສົ່ງໃຫ້ດ່ານພາສີໃນເວລາສິນຄ້າມາຮອດຊາຍແດນລາວ. ເອກະສານຕໍ່ໄປນີ້ຕ້ອງໄດ້ຄັດຕິດມານໍາໃບແຈ້ງສິນຄ້າ:
- ໃບຮຽກເກັບເງິນທາງການຄ້າ ຫຼື ສັນຍາຊື້-ຂາຍ;
- ໃບສົ່ງສິນຄ້າທາງທະເລ ຫຼື ໃບສົ່ງສິນຄ້າທາງອາກາດ;
- ລາຍການຫຸ້ມຫໍ່.
ສິນຄ້າຂົນສົ່ງຜ່ານແມ່ນບໍ່ໄດ້ເສຍພາສີ ແຕ່ຜູ້ແຈ້ງຕ້ອງໄດ້ສະໜອງສິ່ງຄໍ້າປະກັນ ໃນຮູບແບບເປັນໃບເຊັກ ຫຼື ໜັງສືຄໍ້າປະກັນທີ່ອອກໃຫ້ໂດຍທະນາຄານ ຫຼື ສະຖາບັນການເງິນ ໃນມູນຄ່າທີ່ເທົ່າກັບມູນຄ່າພາສີ ຫຼື ພັນທະ ອື່ນໆ.
ສິນຄ້າທີ່ຂົນສົ່ງຜ່ານ ຕ້ອງໄປຕາມເສັ້ນທາງທີ່ດ່ານພາສີກຳນົດໃຫ້.
ເມື່ອມາຮອດດ່ານຊາຍແດນຂາອອກ ໃບແຈ້ງການສົ່ງອອກພາຍໃຕ້ລະບອບການຂົນສົ່ງຜ່ານ ຕ້ອງໄດ້ສົ່ງໃຫ້ດ່ານພາສີ.
ຖ້າທຸກສິ່ງຢ່າງຮຽບຮ້ອຍດີ, ດ່ານພາສີຈະອະນຸຍາດໃຫ້ສິນຄ້າອອກຈາກດິນແດນ ສປປ ລາວໄດ້ ແລະ ໜັງສືຄໍ້າປະກັນກໍຈະໝົດກຳນົດ. ຖ້າການຄໍ້າປະກັນແມ່ນເປັນໃບເຊັກ ມັນກໍ່ຈະຖືກສົ່ງຄືນຫາຜູ້ແຈ້ງສິນຄ້າ.
ສຳລັບເງື່ອນໄຂ, ຂັ້ນຕອນ ແລະ ເອກະສານປະກອບ ການເຄື່ອນຍ້າຍສິນຄ້າຄຸ້ມຄອງຜ່ານແດນ ຢູ່ ສປປ ລາວ ແມ່ນໄດ້ກໍານົດໄວ້ໃນ ຂໍ້ຕົກລົງ ວ່າດ້ວຍ ການເຄື່ອນຍ້າຍສິນຄ້າຄຸ້ມຄອງຜ່ານແດນ ສປປ ລາວ, ສະບັບເລກທີ 1238/ອຄ.ກຂອ, ລົງວັນທີ 23 ມິຖຸນາ 2015.
ການນຳສິນຄ້າເຂົ້າ ເພື່ອສົ່ງອອກ
ສຳລັບທ່ານທີ່ຕ້ອງການນຳສິນຄ້າເຂົ້າ ເພື່ອສົ່ງອອກ ແມ່ນຕ້ອງໄດ້ມີເງື່ອນໄຂ ຕາມທີ່ໄດ້ກຳນົດໄວ້ໃນ ບົດແນະນຳ ວ່າດ້ວຍ ລະບຽບການຄຸ້ມຄອງສິນຄ້ານຳເຂົ້າເພື່ອສົ່ງອອກ ສະບັບເລກທີ 00274/ກພສ, ລົງວັນທີ 14 ຕຸລາ 2015 ຂອງກົມພາສີ, ກະຊວງການເງິນ ຄື:
- ຕ້ອງມີທະບຽນວິສາຫະກິດທີ່ສອດຄ່ອງຕາມການອະນຸຍາດຂອງຂະແໜງກ່ຽວຂ້ອງ, ຮູບແບບປະເພດ ທຸລະກິດ ຂະແໜງວິຊາຊີບກ່ຽວກັບການຄ້າຂາເຂົ້າ-ຂາອອກ, ການບໍລິການຂົນສົ່ງສິນຄ້າ ຫຼື ຂະແໜງວິຊາຊີບທຸລະກິດ ກ່ຽວກັບກຸ່ມໝວດສິນຄ້າທີ່ສະເໜີຂໍເຮັດສັນຍາ;
- ມີປະຫວັດການເຄື່ອນໄຫວທີ່ຖືກຕ້ອງ, ມີຖານະການເງິນ ແລະ ການປະຕິບັດພັນທະໃຫ້ລັດ ຢ່າງຄົບຖ້ວນ;
- ມີລະບົບສາງເກັບມ້ຽນສິນຄ້າທີ່ມີຄວາມປອດໄພ, ມີພາຫະນະຂົນສົ່ງທີ່ໄດ້ມາດຕະຖານ, ບໍ່ມີຄະດີທາງພາສີ ແລະ ອື່ນໆ.
ສິນຄ້າ, ເຄື່ອງຂອງທີ່ສາມາດນຳເຂົ້າ ເພື່ອສົ່ງອອກ ຕ້ອງເປັນສິນຄ້າທີ່ມີແຫຼ່ງກຳເນີດ, ມີລະຫັດສິນຄ້າທີ່ຖືກຕ້ອງ, ມີສັນຍາ, ມີສັນຍາຕາມລາຄາຊື້-ຂາຍຕົວຈິງ, ບໍ່ແມ່ນສິນຄ້າເກືອດຫ້າມ, ບໍ່ແມ່ນສິນຄ້າລະເມີດຊັບສິນທາງປັນຍາ ແລະ ສຳລັບ ປະເພດສັດຕ້ອງແມ່ນສັດທີ່ບໍ່ນອນໃນບັນຊີຂອງ ສົນທິສັນຍາ ວ່າດ້ວຍການຄ້າຂາຍຊະນິດພັນສັດປ່າ ແລະ ພືດປ່າ ທີ່ໃກ້ຈະສູນພັນລະຫວ່າງປະເທດ (CITES).
ສຳລັບເງື່ອນໄຂ, ຂັ້ນຕອນ ແລະ ເອກະສານປະກອບ ການນຳເຂົ້າເພື່ອສົ່ງອອກ ແລະ ສົ່ງອອກຊົ່ວຄາວສິນຄ້າຄຸ້ມຄອງ ຢູ່ ສປປ ລາວ ແມ່ນໄດ້ກໍານົດໄວ້ໃນ ຂໍ້ຕົກລົງ ວ່າດ້ວຍ ການນຳເຂົ້າເພື່ອສົ່ງອອກຕໍ່ ແລະ ການສົ່ງອອກຊົ່ວຄາວສິນຄ້າຄຸ້ມຄອງ, ສະບັບເລກທີ 1237/ອຄ.ກຂອ, ລົງວັນທີ 23 ມິຖຸນາ 2015.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.