ສະພາບລວມ
ບົນພື້ນຖານຄວາມສາມັກຄີມິດຕະພາບລະຫວ່າງລາວ - ຫວຽດນາມ, ສອງລັດຖະບານລາວ - ຫວຽດນາມ ໄດ້ລົງນາມໃນສັນຍາການຄ້າ ( ສະບັບປັບປຸງ ) ທີ່ ນະຄອນຫລວງວຽງຈັນ ຄັ້ງວັນທີ 03/03/2015; ພ້ອມກັນນັ້ນນັບແຕ່ປີ 1996 ສອງລັດຖະບານ ລາວ - ຫວຽດນາມໄດ້ເສີມຂະຫຍາຍການພົວພັນດ້ານຕ່າງໆຢ່າງຮອບດ້ານ ຊຶ່ງສະແດງອອກຈາກການສົ່ງອອກ ລະຫວ່າງ ສອງປະເທດ ນັບມື້ນັບເພີ່ມຂຶ້ນ.
ນອກນັ້ນນັບແຕ່ປີ 2005 ເປັນຕົ້ນມາ ກະຊວງອຸດສາຫະກຳແລະການຄ້າສອງປະເທດ ໄດ້ລົງນາມຮັບເອົາລາຍການສິນຄ້າ ທີ່ໄດ້ຮັບການຫຼຸດຜ່ອນອັດຕາພາສີ 50% ແລະ 0%. ບົນພື້ນຖານການຫຼຸດຜ່ອນອັດຕາພາສີຂາເຂົ້າໃຫ້ແກ່ກັນ ແລະ ກັນ, ໄດ້ສົ່ງຜົນໃຫ້ມູນຄ່າການຄ້າລະຫວ່າງສອງປະເທດນັບມື້ນັບຫຼາຍຂື້ນ.
ລະບົບ ສິດທິພິເສດ
ການໃຫ້ບູລິມະສິດອັດຕາພາສີນຳເຂົ້າ ກວມເອົາລາຍການສິນຄ້າສົ່ງອອກຈາກ ສປປ ລາວ ໄປຫວຽດນາມ ເປັນສ່ວນໃຫຍ່ ຊຶ່ງລວມມີ ໝໍ້ຫຸງເຂົ້າໄຟຟ້າ, ພັດລົມ, ເຄື່ອງປັ່ນໝາກໄມ້, ສີ້ນສ່ວນອາໄຫຼ່ລົດຈັກ, ເບຍລາວ, ໃບຢາສູບ, ກາເຟ, ເຂົ້າສານ, ສາລີ, ແລະ ແຮ່ທາດ.
ພາຍໃຕ້ຂໍ້ຕົກລົງດັ່ງກ່າວ ທຸກລາຍການສິນຄ້າທີ່ມີແຫຼ່ງກຳເນີດຈາກ ສປປ ລາວ ຈະໄດ້ຮັບການຍົກເວັ້ນພາສີນຳເຂົ້າຈາກຫວຽດນາມ, ນອກຈາກລາຍການສິນຄ້າທີ່ນອນໃນບັນຊີສິນຄ້າ ທີ່ໄດ້ຮັບການຫຼຸດຜ່ອນອັດຕາພາສີນຳເຂົ້າ 50% ຈາກອັດຕາທີ່ຫວຽດນາມ ໃຫ້ໃນຂອບການຄ້າເສລີອາຊຽນ ຊຶ່ງມີທັງໝົດ 27 ລາຍການ (ລະຫັດພາສີ (HS) 10 ຕົວເລກ), ແລະ ລາຍການສິນຄ້າທີ່ນອນໃນ ບັນຊີສິນຄ້າຍົກເວັ້ນຖາວອນຂອງຫວຽດນາມ ຊຶ່ງມີທັງໝົດ 193 ລາຍການ (ລະຫັດພາສີ 10 ຕົວເລກ).
ສຳລັບສິນຄ້າກະທົບໄວເຊັ່ນ: ເຂົ້າກິນ ແລະ ໃບຢາສູບ, ສສ ຫວຽດນາມ ໄດ້ໃຫ້ໂກຕາຈຳນວນໜຶ່ງ ໃນການນຳເຂົ້າໂດຍບໍ່ເສຍພາສີ. ສຳລັບເຂົ້າກິນແມ່ນ ໄດ້ຮັບໂກຕາ 70,000 ໂຕນ ຕໍ່ ປີ ຊຶ່ງປະກອບມີ ເຂົ້າເປືອກ (ລະຫັດພາສີ: 1006.10.00.90), ເຂົ້າສານຫອມອື່ນໆ ທີ່ສີແລ້ວ ຫຼືຍັງບໍ່ທັນສີແລ້ວ, ທີ່ຂັດເງົາ ຫຼື ຍັງບໍ່ຂັດເງົາ (ລະຫັດພາສີ: 1006. 10.19.00), ເຂົ້າກ້ອງ (ລະຫັດພາສີ: 1006.20) ເຂົ້າຫອມໄທມະລິ (ລະຫັດພາສີ: 1006.20.10) ແລະ ເຂົ້າອື່ນໆ (ລະຫັດພາສີ: 1006.20.90).
ສ່ວນໃບຢາສູບແມ່ນໄດ້ຮັບໂກຕາ 3,000 ໂຕນຕໍ່ປີ. ການສົ່ງອອກສິນຄ້າເຫຼົ່ານີ້ຈາກ ສປປ ລາວ ໄປຫວຽດນາມຈະສາມາດໄດ້ຮັບການຍົກເວັ້ນພາສີນຳເຂົ້າ ຖ້າປະລິມານການສົ່ງອອກບໍ່ເກີນໂກຕາ ນຳເຂົ້າລວມຂອງຫວຽດນາມ.
ລະບຽບ ແຫຼ່ງກຳ ເນີ ດສິນຄ້າ (Rules of Origin: ROO)
ສິນຄ້າ ຈາກສປປລາວ ທີ່ຈະຂໍການຍົກເວັ້ນພາສີພາຍໃຕ້ລະບົບບູລິມະສິດອັດຕາພາສີນຳເຂົ້າແລະສົ່ງອອກລາວ - ຫວຽດນາມຕ້ອງປະຕິບັດຕາມເງື່ອນໄຂ ແຫຼ່ງກຳເນີດສິນຄ້າດັ່ງ ນີ້:
1. ເປັນສິນຄ້າທີ່ໄດ້ມາ ຫຼື ຜະລິດຂຶ້ນໂດຍນຳໃຊ້ວັດຖຸດິບ ຈາກພາຍ ໃນປະເທດ ທັງ ໝົດ (Wholly Obtained or Produced: WO) ໂດຍພື້ນຖານ ແລ້ວ ແມ່ນສິນຄ້າກະສິກຳ (ພືດ, ສັດ), ຜະລິດຕະພັນ ກະສິກຳແປຮູບ ແລະ ແຮ່ທາດ ແລະ ອື່ນໆ.
2. ສິນຄ້າທີ່ຜະລິດໂດຍການນຳໃຊ້ ວັດຖຸດິບນຳເຂົ້າຈະຕ້ອງປະຕິບັດຕາມເງື່ອນໄຂການແປຮູບຢ່າງພຽງພໍ (Substantial Transformation) ທີ່ ໄດ້ ກຳນົດສຳລັບສິນຄ້າ ແຕ່ລະລາຍການ ຄື:
1). ການປ່ຽນລະຫັດພາສີ (Change in Tariff Heading: CTH)ລະດັບ 4 ຕົວ ເລກ; ຫຼື
2). ການສ້າງມູນຄ່າເພີ່ມ (LVC 40%) ;ຫຼື
3). ການຜະລິດສິນຄ້າຕາມຂະບວນການສະເພາະ ເຊັ່ນ: ເຄື່ອງນຸ່ງຫົ່ມ, ຜະລິດຕະພັນເຄມີ, ເຄື່ອງໄຟຟ້າ ແລະ ອື່ນໆ.
ການຢັ້ງຢືນແຫຼ່ງກຳເນີດສິນຄ້າ
ສິນຄ້າທີ່ຈະໄດ້ຮັບສິດທິພິເສດຕ້ອງແມ່ນສິນຄ້າທີ່ຜະລິດໄດ້ຕາມເງື່ອນໄຂລະບຽບແຫຼ່ງກຳເນີດສິນຄ້າຢ່າງເຄັ່ງຄັດແລະມີໃບຢັ້ງຢືນແຫຼ່ງກຳເນີດສິນຄ້າເປັນເອກະສານອ້າງອີງ. ໃບຢັ້ງຢືນແຫຼ່ງກຳເນີດສິນຄ້າທີ່ນຳໃຊ້ເພື່ອຂໍການຍົກເວັ້ນຫຼືຫຼຸດຜ່ອນອັດຕາພາສີພາຍໃຕ້ລະບົບບູລິມະສິດອັດຕາພາສີນຳເຂົ້າແລະສົ່ງອອກລາວ - ຫວຽດນາມແມ່ນ Form S.
Form S ສາມາດພົວພັນເອົາໄດ້ຢູ່ ພະແນກອຸດສາຫະກຳ ແລະ ການຄ້າ ແຂວງ ແລະ ນະຄອນຫຼວງ ຫຼື ເຂດນິຄົມອຸດສາຫະກຳ ແລະ ການຄ້າ ວຽງຈັນ-ໂນນທອງ. ເອກະສານທີ່ຕ້ອງປະກອບເພື່ອຂໍໃບຢັ້ງຢືນແຫຼ່ງກຳເນີດສິນຄ້າ ປະກອບມີ:
1).ໃບສະເໜີ
2).ໃບຢັ້ງຢືນແຫຼ່ງກຳເນີດສິນຄ້າທີ່ພິມແລ້ວ
3).ໃບແຈ້ງລາຄາ ແລະ ຫຸ້ມຫໍ່
4).ໃບແຈ້ງພາສີເປັນລາຍລະອຽດ
5).ສຳເນົາໃບຂົນສົ່ງ
6).ໃບບິນຊື້ຂາຍພາຍໃນ (ກໍລະນີມີການເກັບຊື້)
7). ໃບຄິດໄລ່ຕົ້ນທືນການຜະລິດ ຫຼື ໃບຂັ້ນຕອນການຜະລິດສິນຄ້າ (ກໍລະນີນຳເຂົ້າວັດຖຸດິບ)
ເງື່ອນ ໄຂ ດ້ານ ການ ຈັດສົ່ງ
ການຈັດສົ່ງ ກໍ່ແມ່ນເງື່ອນໄຂໜຶ່ງທີ່ເອົາມາພິຈາລະນາຕັດສິນການໃຫ້ສິດທິພິເສດ. ຕາມຫຼັກການແລ້ວ, ສິນຄ້າຈະໄດ້ຮັບຍົກເວັ້ນ ຫຼື ຫຼຸດຜ່ອນອັດຕາພາສີ ກໍ່ຕໍ່ເມື່ອໄດ້ມີການຂົນສົ່ງໂດຍກົງຈາກປະເທດຜູ້ສົ່ງອອກ ຫາ ຫວຽດນາມ.
ກໍລະນີຂົນສົ່ງຜ່ານປະເທດທີສາມ, ສິນຄ້າກໍ່ຈະມີເງື່ອນໄຂໄດ້ຮັບສິດທິພິເສດເຊັ່ນດຽວກັນ ຖ້າຫາກວ່າ:
ກ. ການຂົນສົ່ງເນື່ອງຈາກເຫດຜົນທາງພູມິສາດຫຼືໂດຍການພິຈາລະນາທີ່ກ່ຽວກັບຂໍ້ກຳນົດຂອງການຂົນສົ່ງໂດຍສະເພາະ;
ຂ. ສິນຄ້າບໍ່ໄດ້ມີການດຳເນີນການໃດໆເພີ່ມເຕີມຢູ່ປະເທດທີສາມ ນອກເໜືອຈາກການຄ່ຽນຖ່າຍ ຫຼື ການຝາກສາງຊົ່ວຄາວເພື່ອຈຸດປະສົງດ້ານການຂົນສົ່ງ.
ຄ. ສິນຄ້າຢູ່ພາຍໃຕ້ການຄວບຄຸມດູແລຂອງເຈົ້າໜ້າທີ່ພາສີຂອງປະເທດທີສາມ.
ສະຫຼຸບແລ້ວ: ເພື່ອໃຫ້ໄດ້ສິດທິພິເສດ ໃນການສົ່ງອອກໄປຫວຽດນາມ ຜູ້ສົ່ງອອກ ລາວຕ້ອງປະຕິບັດເງື່ອນໄຂແຫຼ່ງກຳເນີດສິນຄ້າ ດັ່ງນີ້: 1) ສິນຄ້າ ມີແຫຼ່ງກຳເນີດຈາກ ສປປ ລາວ 100% ເຊັ່ນ: ສິນຄ້າກະສິກຳ ແລະ ແຮ່ ທາດ; ຫຼື 2) ຖ້າມີການນຳເຂົ້າວັດຖຸດິບທີ່ມີແຫຼ່ງກຳເນີດນອກ ສປປ ລາວຕ້ອງປະຕິບັດ ໄດ້ ເງື່ອນໄຂການແປຮູບຢ່າງພຽງພໍ. ນອກນັ້ນ, ຍັງຕ້ອງໄດ້ປະຕິບັດຕາມເງື່ອນໄຂການຈັດສົ່ງອີກດ້ວຍ.
ຂໍ້ ມູນ ເພີ່ມ ຕື່ມ:
ທ່ານສາມາດສອບຖາມ ກ່ຽວກັບ ລະບົບສິດທິພິເສດທາງການຄ້າ ແລະ ເງື່ອນໄຂແຫຼ່ງກຳເນີດສິນຄ້າໃນການສົ່ງອອກ ໄປຫວຽດນາມໄດ້ ທີ່ :
ພະແນກຄຸ້ມຄອງແຫຼ່ງກຳເນີດສິນຄ້າ, ກົມ ການ ນຳ ເຂົ້າ ແລະ ສົ່ງ ອອກ,
ກະ ຊວງ ອຸດສາຫະກຳ ແລະ ການ ຄ້າ:
ເວັບ ໄຊ້: http://www.laotradeportal.gov.la
ໂທ/ ແຟກ: 021-450255, email:[email protected]
ຫົວຂໍ້ທີ່ກ່ຽວຂ້ອງ:
ການຈັດຕັ້ງປະຕິບັດບູລິມະສິດສິນຄ້ານຳເຂົ້າ-ສົ່ງອອກ ລະຫວ່າງ ສປປ ລາວ ແລະ ສສ ຫວຽດນາມ 2016
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.