ສະພາບລວມ
ລັດຖະບານສະວິດເຊີແລນ ໄດ້ໃຫ້ສິດທິພິເສດດ້ານການຄ້າແກ່ບັນດາປະເທດກໍາລັງພັດທະນາ 117 ປະເທດ ແລະ ປະເທດດ້ອຍພັດທະນາ (LDCs) 49 ປະເທດ, ຊຶ່ງ ສປປ ລາວ ກໍ່ເປັນ ຫນຶ່ງໃນປະເທດ ທີ່ດ້ອຍພັດທະນາທີ່ໄດ້ຮັບສິດທິພິເສດທາງດ້ານການຄ້າຈາກ ສະວິດເຊີແລນ.
ລາຍການສິນຄ້າທີ່ສະວິດເຊີແລນໃຫ້ສິດທິພິເສດທາງການຄ້ານັ້ນແມ່ນ ໄດ້ແຍກຕາມກຸ່ມປະເທດທີ່ ໄດ້ຮັບສິດ ເຊັ່ນ : ສໍາລັບປະເທດກໍາລັງພັດທະນາ ສິນຄ້າກະສິກໍາ ແລະ ອຸດສາຫະກໍາ ສ່ວນໃຫຍ່ແມ່ນໄດ້ຮັບການຍົກເວັ້ນອັດຕາພາສີນຳເຂົ້າ, ຍົກເວັ້ນສິນຄ້າເຄື່ອງຕັດຫຍິບ ແລະ ເຄື່ອງນຸ່ງຫົ່ມແມ່ນ ໄດ້ຮັບການຫຼຸດອັດຕາພາສີນຳເຂົ້າພຽງ 50% ຈາກອັດຕາພາສີປົກກະຕິ. ສຳລັບປະເທດດ້ອຍພັດທະນາແມ່ນໄດ້ຮັບການຍົກເວັ້ນພາສີນຳເຂົ້າສິນຄ້າທຸກລາຍການ ແລະ ບໍ່ມີການກໍານົດໂກຕ້ານໍາເຂົ້າ ຊຶ່ງໃນນັ້ນໄດ້ລວມເອົາທັງສິນຄ້າກະສິກໍາ ແລະ ອຸດສາຫະກໍາ. (ລາຍລະອຽດກົດເບິ່ງທີ່ນີ້)
ລະບຽບແຫຼ່ງກຳເນີດສິນຄ້າ (Rules of Origin : ROO)
ເພື່ອຈະນຳໃຊ້ສິດທິພິເສດດ້ານການຄ້າຂອງສະວິດເຊີແລນ, ຜູ້ສົ່ງອອກຕ້ອງປະຕິບັດຕາມເງື່ອນໄຂແຫຼ່ງກຳເນີດສິນຄ້າ ເພື່ອໃຫ້ແນ່ໃຈວ່າສິນຄ້າທີ່ສົ່ງອອກນັ້ນໄດ້ຕາມເງື່ອນໄຂທີ່ໄດ້ຮັບສິດທິພິເສດດ້ານການຄ້າ ຫຼື ບໍ່? ພ້ອມກັນນັ້ນຜູ້ສົ່ງອອກຕ້ອງມີໃບຢັ້ງຢືນແຫຼ່ງກຳເນີດສິນຄ້າຟອມ A.
ຫຼັກການໃນການກຳນົດແຫຼ່ງກຳເນີດສິນຄ້າໃຫ້ປະຕິບັດຕາມເງື່ອນໄຂດັ່ງນີ້:
1. ສິນຄ້າທີ່ໄດ້ມາໂດຍນຳໃຊ້ວັດຖຸດິບພາຍໃນປະເທດທັງໝົດ (Wholly Obtained Goods) ແມ່ນຖືວ່າໄດ້ຮັບແຫຼ່ງກຳເນີດໂດຍອັດຕະໂນມັດ ແລະ ສາມາດຂໍສິດທິພິເສດໃນການຍົກເວັ້ນອັດຕາພາສີຂາເຂົ້າ.
2. ສິນຄ້າທີ່ໄດ້ມາຈາກການນໍາເຂົ້າວັດຖຸດິບ ຊຶ່ງຈະຕ້ອງຜ່ານຂະບວນການປ່ຽນແປງສະ ພາບ ຫຼື ຂະບວນການຜະລິດຢ່າງຫຼວງຫຼາຍ (Sufficient process)
3. ກົດການປ່ຽນລະຫັດເຄົ້າພາສີ 4 ໂຕເລກ (CTH) ຊຶ່ງໝາຍຄວາມວ່າຜະລິດຕະພັນ ໃໝ່ທີ່ຜະລິດໄດ້ຕ້ອງມີເລກລະຫັດພາສີທີ່ ແຕກຕ່າງຈາກເລກ ລະຫັດພາສີຂອງວັດຖຸດິບທີ່ນໍາເຂົ້າມາ
4. ນຳໃຊ້ກົດການສະສົມມູນຄ່າເພີ້ມ (RVC) ໝາຍຄວາມວ່າວັດຖຸດິບທີນຳເຂົ້າມາຜະລິດຕ້ອງມີສັດສ່ວນການນໍາເຂົ້າບໍ່ເກີນ ທີ່ກໍານົດຂອງລາຄາໂຮງງານຂອງສິນຄ້າສໍາເລັດຮູບ. (ຍົກເວັ້ນ 4 ລາຍການສິນຄ້າທີ່ກ່າວມາຂ້າງເທິງນັ້ນຈຳຕ້ອງຜ່ານຂະບວນການສະເພາະທີ່ໄດ້ກຳນົດໄວ້)
ການສະສົມແຫຼ່ງກໍາເນີດ
ສຳລັບສິນຄ້າທີ່ມີການນຳວັດຖຸດິບຈາກປະເທດອື່ນມາຜະລິດ, ສະວິດເຊີແລນອະນຸຍາດໃຫ້ປະເທດ ຜູ້ສົ່ງອອກນໍາໃຊ້ວັດຖຸດິບທີ່ມີແຫຼ່ງກໍາເນີດຈາກປະເທດອື່ນເຂົ້າໃນຂະບວນການຜະລິດ ໂດຍນຳໃຊ້ກົດການສະສົມມູນຄ່າເພີ້ມ (RVC) ຊຶ່ງມີລາຍລະອຽດດັ່ງນີ້ :
ກ. ວັດຖຸທີ່ມີແຫຼ່ງກໍາເນີດໃນປະເທດສະວິດເຊີແລນ, ນອກແວ ຫຼື ສະຫະພາບເອີຣົບໃຫ້ຖື ວ່າເປັນວັດຖຸດິບຈາກປະເທດຜູ້ໄດ້ຮັບສິດທິພິເສດທາງການຄ້າ ຊຶ່ງເປັນຜູ້ຜະລິດຕາມກົດການນໍາໃຊ້ວັດຖຸ ດິບຂອງປະເທດຜູ້ໃຫ້ສິດ GSP (Doner Country Contant Rule) ໂດຍວັດຖຸດິບດັ່ງກ່າວຈະຕ້ອງມີ ເອກະສານຮັບຮອງແຫລ່ງກໍາເນີດສິນຄ້າ ER1 ຈາກສະວິດເຊີແລນ, ນອກແວ ຫຼື ສະຫະພາບເອີຣົບ ແນບມານຳ.
ຂ. ວັດຖຸດິບທີ່ມີແຫຼ່ງກໍາເນີດຈາກປະເທດໃດໜຶ່ງຂອງສະມາຊິກອາຊຽນ (ຍົກເວັ້ນສິງກະໂປ ແລະ ບຣູໄນ) ແມ່ນວັດຖຸດິບຂອງປະເທດຜູ້ໄດ້ຮັບສິດທິພິເສດທາງການຄ້າຕາມກົດການສະສົມແຫຼ່ງກໍາເນີດສິນ ຄ້າ (Cumulation Rule) ໂດຍວັດຖຸດິບດັ່ງກ່າວຈະຕ້ອງມີໃບຮັບຮອງແຫລ່ງກໍາເນີດສິນຄ້າ ຟອມ A Cumulation ຫຼື Invoice Declaration ຈາກປະເທດຕົ້ນກໍາເນີດແນບນໍາວັດຖຸດິບດັ່ງກ່າວມາດ້ວຍ.
ເງື່ອນໄຂການຂົນສົ່ງ
ສຳລັບເງື່ອນໄຂການຂົນສົ່ງນັ້ນປະເທດສະວິດເຊີແລນ ໄດ້ກຳນົດເອົາກົດການຂົນສົ່ງໂດຍກົງ (Direct Consigment) ຊຶ່ງໝາຍຄວາມວ່າສິນຄ້ານັ້ນຕ້ອງຂົນສົ່ງໂດຍກົງຈາກປະເທດທີ່ໄດ້ຮັບສິດທິພິເສດທາງດ້ານການຄ້າຫາສະວິດເຊີແລນໂດຍກົງໂດຍບໍ່ຜ່ານປະເທດທີ 3. ເຖິງແນວໃດກໍ່ຕາມໃນກໍລະນີມີຄວາມຈຳເປັນຕ້ອງຂົນສົ່ງຜ່ານປະເທດທີ 3 ເນື່ອງຈາກການຄ່ຽນຖ່າຍສິນຄ້າ, ເຫດຜົນດ້ານພູມສາດ ແມ່ນສາມາດໂຍະຍານໄດ້ ແຕ່ທຸກການເຄື່ອນໄຫວແມ່ນຕ້ອງຢູ່ໃນການຄວບຄຸມຂອງເຈົ້າໜ້າທີ່ໆກ່ຽວຂ້ອງ ຂອງປະເທດທີ 3.
ຂອບເຂດການນຳໃຊ້.
ລະບົບສິດທິພິເສດນີ້ ບໍ່ນຳໃຊ້ກັບສິນຄ້າທີ່ສົ່ງຈາກບຸກຄົນຫາບຸກຄົນ ແລະ ບໍ່ມີຈຸດປະສົງທາງດ້ານການຄ້າ ແລະ ມີມູນຄ່າບໍ່ເກີນ 900 CHF ຫຼື ປະມານ 986.40 ໂດລາສະຫະລັດ.
ເອກະສານປະກອບ
ໃບຢັ້ງຢືນແຫຼ່ງກຳເນີດສິນຄ້າ (ຟອມ A) ສາມາດພົວພັນເອົາໄດ້ທີ່ ກົມການນຳເຂົ້າ ແລະສົ່ງອອກ ຫຼື ພະແນກອຸດສາຫະກຳ ແລະ ການຄ້າແຂວງ, ນະຄອນຫຼວງ ແລະ ເຂດເສດຖະກິດພິເສດ ແລະ ສະເພາະ, ໂດຍຕ້ອງປະກອບເອກະສານໃຫ້ຄົບຖ້ວນດັ່ງນີ້:
1). ໃບສະເໜີ
2). ໃບຢັ້ງຢືນແຫຼ່ງກຳເນີດສິນຄ້າທີ່ພິມແລ້ວ
3). ໃບແຈ້ງລາຄາ ແລະ ຫຸ້ມຫໍ່
4). ໃບແຈ້ງພາສີເປັນລາຍລະອຽດ
5). ສຳເນົາໃບຂົນສົ່ງ
6). ໃບບິນຊື້ຂາຍພາຍໃນ (ກໍລະນີມີການເກັບຊື້)
7). ໃບຄິດໄລ່ຕົ້ນທືນການຜະລິດ ຫຼື ໃບຂັ້ນຕອນການຜະລິດສິນຄ້າ (ກໍລະນີນຳເຂົ້າວັດຖຸດິບ)
ສໍາລັບສິນຄ້າທີ່ສົ່ງອອກມີມູນຄ່າບໍ່ເກີນ 10,300 CHF ຫຼື ປະມານ 11,890 ໂດລາ, ຜູ້ສົ່ງອອກບໍ່ຈຳເປັນຕ້ອງໃຊ້ຟອມ A ໂດຍສາມາດຢັ້ງຢືນແຫຼ່ງກໍາເນີດດ້ວຍຕົນເອງໄດ້ ທີ່ຮຽກວ່າ Invoice Declaration.
ສະຫຼຸບແລ້ວ: ເພື່ອໃຫ້ໄດ້ສິດທິພິເສດໃນການສົ່ງອອກໄປສະວິດເຊີແລນ ຜູ້ສົ່ງອອກລາວ ຕ້ອງປະຕິບັດເງື່ອນໄຂແຫຼ່ງກຳເນີດ ດັ່ງນີ້: 1) ສິນຄ້າມີແຫຼ່ງກຳເນີດຈາກ ສປປ ລາວ 100% ເຊັ່ນ: ສິນຄ້າກະສິກຳ ແລະ ແຮ່ທາດ; ຫຼື 2) ຖ້າມີການນຳເຂົ້າວັດຖຸດິບ, ສີ້ນສ່ວນ ຫຼື ຜະລິດຕະພັນ ທີ່ມີແຫຼ່ງກຳເນີດນອກ ສປປ ລາວ (ຈາກສະມາຊິກອາຊຽນ, ສະຫະພາບເອີຣົບ ຫຼື ແຫຼ່ງອື່ນໆ) ຕ້ອງປະຕິບັດໄດ້ເງື່ອນໄຂການແປຮູບຢ່າງຫຼວງຫຼາຍ ຫຼື ຕາມເງືອນໄຂສະເພາະທີ່ໄດ້ກຳນົດໄວ້ຕາມລະບຽບການຂອງປະເທດສະວິດເຊີແລນ.
ຂໍ້ມູນເພີ່ມຕື່ມ:
ທ່ານສາມາດສອບຖາມກ່ຽວກັບລະບົບສິດທິພິເສດທາງການຄ້າ ແລະ ເງື່ອນໄຂແຫຼ່ງກຳເນີດສິນ ຄ້າ ໃນການສົ່ງອອກໄປປະເທດສະວິດເຊີແລນໄດ້ທີ່:
ພະແນກ ຄຸ້ມຄອງແຫຼ່ງກຳເນີດສິນຄ້າ, ກົມການນຳເຂົ້າ ແລະສົ່ງອອກ, ກະຊວງອຸດສາຫະກຳ ແລະການຄ້າ:
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.