ສິດທິ​ພິ​ເສດ​​​ແບບ​ໃຫ້​ຝ່າຍ​ດຽວ

ລະບົບສິດທິ​ພິ​ເສດ​ແບບ​ໃຫ້​ຝ່າຍ​ດຽວ ທີ່​ເປັນ​ທີ່​ຮູ້ຈັກ​ດີ ​ແມ່ນ​ສິດທິ​ພິ​ເສດ​ແບບ​ທົ່ວ​ໄປ (GSP) ​ໂດຍ​ປະ​ເທດ​ພັດທະນາ​ແລ້ວ​ ໃຫ້ການ​ຍົກ​ເວັ້ນ ຫຼື​ຫຼຸດຜ່ອນ​ອັດຕາ​ພາສີ​ແກ່​ສິນຄ້າທີ່​ນຳ​ເຂົ້າ​ຈາກປະ​ເທດກໍ​າ ລັງ​ພັດທະນາ ​ແລະ​ດ້ອຍ​ພັດທະນາ. ສປປ ລາວ ​ໄດ້​ຮັບ​ສິດທິ​ພິ​ເສດພາຍ​ໃຕ້​ລະບົບ​ສິດທິ​ພິ​ເສດ​​ແບບທົ່ວ​ໄປ ຈາກ​ທັງ​ໝົດ 38 ປະ​ເທດ ຄື: ອົດ​ສະ​ຕາ​ລີ, ​ກາ​ນາ​ດາ, ສະຫະພາບ​ເອີຣົບ (28 ປ​ະ​ເທດ)[1], ຍີ່ປຸ່ນ, ນິວຊີ​ແລນ, ນໍ​ເວ,​ ຣັດເຊຍ, ສະ​ວິດ​ເຊີ​ແລນ ​ແລະ​ຕ໊ວກກີ.​ ເນື່ອງຈາກ ເບ​ລາຣຸສ ​ແລະ​ກາ​ຊັກ​ສະຖານ ໄດ້ເຂົ້າຮ່ວມສະຫະພາບພາສີກັບຣັດເຊຍ ດັ່ງນັ້ນ ຈຶ່ງຖືວ່າທັງສອງປະເທດ ກໍໃຫ້ສິດທິພິເສດແບບທົ່ວໄປ ເຊັ່ນກັນ. ປະຈຸບັນ, ສປປ ລາວ ​ຍັງ​ບໍ່​ທັນ​ໄດ້​ສິດທິ​ພິ​ເສດ​ດ້ານ​ການ​ຄ້າ ​ຈາກສະຫະລັດ​ອາ​ເມ​ລິ​ກາ​ເທື່ອ ​ແຕ່ກະຊວງ​ອຸດສາຫະກຳ ​ແລະ​ການ​ຄ້າ ​ກຳລັງດຳ​ເນີນ​ການ​ເພື່ອ​ຂໍ​ສິດທິພິ​ເສດ​ດັ່ງກ່າວ.

ເອກະສານທີ່ນຳໃຊ້ເປັນບ່ອນອີງໃນການຂໍຮັບສິດພິເສດ​ແບບ​ທົ່ວ​ໄປ ແມ່ນໃບຢັ້ງຢືນແຫຼ່ງກຳເນີດສິນຄ້າ Form A.

ນອກນີ້ ສປປ ລາວ ຍັງໄດ້ຮັບສິດທິພິເສດແບບໃຫ້ຝ່າຍດຽວ ຈາກປະເທດກຳລັງພັດທະນາ ລວມທັງອານາເຂດພາສີເອກະລາດ ເຊັ່ນ:

ອິນເດຍ

ອິນເດຍ​ໃຫ້​ສິດທິ​ພິ​ເສດ​ດ້ານ​ການ​ຄ້າ ພາຍໃຕ້ລະບົບສິດພິເສດສຳລັບປະເທດດ້ອຍພັດທະນາ (Duty Free Tariff Preference: DFTP) ສໍາ​ລັບ​ສິນຄ້າຈຳນວນ 4,898 ລາຍການ ​ໂດຍກວມເອົາ 94% ຂອງຈຳນວນລາຍການສິນຄ້າທັງໝົດຂອງອິນເດຍ.

ເອກະສານທີ່ນຳໃຊ້ເປັນບ່ອນອີງໃນການຂໍຮັບທິສິດພິເສດ ແມ່ນໃບຢັ້ງຢືນແຫຼ່ງກຳເນີດສິນຄ້າ Form DFTP.

ສປ ຈີນ

ສປປ ລາວ ໄດ້ຮັບສິດທິພິເສດດ້ານການຄ້າ​ໂດຍ​ການ​ຍົກ​ເວັ້ນພາສີ​ຂາ​ເຂົ້າຈາກ ສປ ຈີນ ພາຍໃຕ້ລະບົບສິດທິພິເສດ China Special and Preferential Tariff Treatment for CLM (ຫຼື SPT) ສໍາລັບ​ສິນຄ້າຈຳນວນ 459 ລາຍການ.

ເອກະສານທີ່ນຳໃຊ້ເປັນບ່ອນອີງໃນການຂໍຮັບສິດທິພິເສດ ແມ່ນໃບຢັ້ງຢືນແຫຼ່ງກຳເນີດສິນຄ້າ Form SPT.

ສ. ເກົາຫຼີ

ສປປ ລາວ ໄດ້ຮັບສິດທິພິເສດດ້ານການຄ້າ ຈາກ ສ. ເກົາຫຼີ ພາຍໃຕ້ລະບົບສິດທິພິເສດທີ່​ໃຫ້ແກ່ປະເທດດ້ອຍພັດທະນາ (Korea Preferential Tariff for Least-Developed Countries) ຊຶ່ງ​ກວມ​ເອົາ 85% ຂອງລາຍການສິນຄ້າທັງໝົດ ໂດຍການຍົກເວັ້ນອັດຕາພາສີ ແລະ ບໍ່ຈຳມີ​ການກັດໂກຕາ.

ເອກະສານທີ່ນຳໃຊ້ເປັນບ່ອນອີງໃນການຂໍຮັບສິດທິພິເສດ ແມ່ນໃບຢັ້ງຢືນແຫຼ່ງກຳເນີດສິນຄ້າ Form CO Korea.

ຈີນໄຕ້ຫວັນ

ສປປ ລາວ ໄດ້ຮັບສິດທິພິເສດດ້ານການຄ້າຈາກຈີນໄຕ້ຫວັນ ພາຍໃຕ້ລະບົບສິດທິພິເສດດ້ານການຄ້າແກ່ປະເທດດ້ອຍພັດທະນາ ສໍາລັບ​ສິນຄ້າຈຳນວນ 125 ລາຍການ ທີ່ມີອັດຕາພາສີ 0% ແລະ ບໍ່ມີ​ການຈຳກັດໂກຕາ.

ເອກະສານທີ່ນຳໃຊ້ເປັນບ່ອນອີງໃນການຂໍຮັບສິດທິພິເສດ ມີພຽງ​ແຕ່​ນຳ​ໃຊ້ໃບຢັ້ງຢືນແຫຼ່ງກຳເນີດສິນຄ້າທົ່ວ​ໄປ​ທີ່​​ເອີ້ນ​ວ່າ Form CO White ກໍ​ພຽງພໍ​ແລ້ວ.

 

 

[1] ສະມາຊິກ​ຂອງ​ສະຫະພາບ​ເອີຣົບ (ອີ​ຢູ) ປະກອບດ້ວຍ: ​​ໂອ​ຕຣີສ (1995), ​ແບນ​ຊິກ (1952), ບຸນ​ກາຣີ (2007), ​ໂຄຣ​ເອຊີ (2013), ​ໄຊ​ປຣັສ (2004), ສາທາລະນະ​ລັດ​ເຊັກ (2004), ​ເດນ​ມາກ(1973), ​ແອັດສະ​ໂຕນີ (2004), ​​ແຟງ​ລັງ (1995), ຝຣັ່ງ (1952), ​ເຢຍລະ​ມັນ (1952), ​ເກຣັກ (1981), ຮົງ​ກາ​ຣີ (2004), ອຽກລັງ (1973), ອີ​ຕາລີ (1952), ລັດ​ວີ (2004), ລີ​ທົວ​ນີ (2004), ລຸກ​ຊຳ​ບວກ (1952), ມົວ​ຕາ (2004), ​ເນ​ເທີ​ແລນ (1952), ​ໂປ​​​ໂລ​ຍ (2004), ປ໊ອກຕຸຍ​ການ (1986), ​ໂຣມານີ (2007), ສະ​ໂລ​ວັກ (2004), ສະ​ໂລ​ເວນີ (2004),​ ​ແອັດ​ສະປາຍ (1986), ສະວີ​ເດັນ (1995), ​ແລະ​ອັງກິດ (1973). ຕົວ​ເລກ​ໃນ​ວົງ​ເລັບ​ແມ່ນ​ປີ​ທີ່​ເຂົ້າ​ເປັນສະມາ​ຊິກ.

 

ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.