ເຂດການຄ້າເສລີ
ສິດທິພິເສດດ້ານການຄ້າທີ່ ສປປ ລາວ ໄດ້ຮັບພາຍໃຕ້ສັນຍາການຄ້າເສລີທີ່ສຳຄັນຕໍ່ ສປປ ລາວແມ່ນສັນຍາການຄ້າດ້ານສິນຄ້າອາຊຽນ (ATIGA). ສປປ ລາວ ຍັງໄດ້ລົງນາມສັນຍາການຄ້າເສລີກັບຄູ່ເຈລະຈາຂອງອາຊຽນ ຄື: ກຸ່ມປະເທດອົດສະຕາລີ-ນິວຊີແລນ, ຈີນ, ອິນເດຍ, ຍີ່ປຸ່ນ ແລະ ສ. ເກົາຫຼີ. ພ້ອມນີ້ ລາວຍັງເປັນພາຄີເຂດການຄ້າເສລີອື່ນໆ ທີ່ມີການໃຫ້ສິດທິພິເສດແກ່ກັນ ແລະກັນ ຄື: ສັນຍາການຄ້າລາວ-ຫວຽດນາມ ແລະສັນຍາການຄ້າອາຊີ-ປາຊີຟິກ.
ສປປ ລາວ ສົ່ງອອກໄປຍັງຕະຫຼາດອາຊຽນ ໂດຍໄດ້ຮັບສິດທິພິເສດຈັດລຽງຕາມລຳດັບຄູ່ຄ້າສໍາຄັນ ຄື: ໄທ ໃນມູນຄ່າ 623 ລ້ານໂດລາອາເມລິກາ ໃນປີ 2012, ຖັດມາແມ່ນຫວຽດນາມ ແລະສິງກະໂປ ໃນມູນຄ່າ 69 ລ້ານໂດລາອາເມລິກາ ແລະ 44 ລ້ານໂດລາອາເມລິກາ, ຕາມລໍາດັບ. ນອກນີ້ ຍັງມີການສົ່ງອອກໄປ ມາເລເຊຍ ແລະອິນໂດເນເຊຍ ແຕ່ການນໍາໃຊ້ສິດທິພິເສດບໍ່ເກີນ 2 ລ້ານໂດລາອາເມລິກາໃນແຕ່ລະປະເທດ. ການສົ່ງອອກຈາກລາວໄປຍັງປະເທດຄູ່ເຈລະຈາຂອງອາຊຽນມີເຊັ່ນ ຈີນ, ຍີ່ປຸ່ນ ແລະ ສ. ເກົາຫຼີ ໂດຍສິນຄ້າທີ່ສົ່ງອອກ ລວມມີ ສິນຄ້າກະສິກໍາ, ເຄື່ອງຕັດຫຍິບ, ເຄື່ອງຫັດຖະກໍາ ແລະເຄື່ອງປ່າຂອງດົງ. ຕະຫຼາດສົ່ງອອກອື່ນ ທີ່ເປັນຄູ່ເຈລະຈາຂອງອາຊຽນ ຍັງມີອີນເດຍ ແລະກຸ່ມປະເທດອົດສະຕາລີ-ນິວຊີແລນ.
ສັນຍາການຄ້າດ້ານສິນຄ້າອາຊຽນ (ATIGA)
ສປປ ລາວ ໄດ້ຮັບສິດທິພິເສດດ້ານການຄ້າ ໂດຍການຍົກເວັ້ນ ຫຼື ຫຼຸດຜ່ອນອັດຕາພາສີພາຍໃຕ້ສັນຍາການຄ້າດ້ານສິນຄ້າອາຊຽນຈາກ 9 ປະເທດສະມາຊິກອື່ນຂອງອາຊຽນໄດ້ແກ່ ປະເທດບຣູໄນ, ກຳປູເຈຍ, ອິນໂດເນເຊຍ, ມາເລເຊຍ, ມຽນມາ, ຟິລິປິນ, ສິງກະໂປ, ໄທ ແລະຫວຽດນາມ. ສິນຄ້າທີ່ສົ່ງອອກຈາກລາວໄປຍັງສະມາຊິກອາຊຽນອື່ນ ໄດ້ຮັບການຫຼຸດຜ່ອນອັດຕາພາສີ 0% ສໍາລັບສິນຄ້າກະສິກຳ ແລະອຸດສາຫະກໍາສ່ວນໃຫຍ່ ນັບແຕ່ປີ 2010 ເປັນຕົ້ນມາ, ຍົກເວັ້ນສິນຄ້າໃນບັນຊີຍົກເວັ້ນຖາວອນ ພ້ອມທັງສິນຄ້າທີ່ມີຄວາມກະທົບໄວຈຳນວນໜຶ່ງ ໄປຍັງຕະຫຼາດອາຊຽນໃໝ່ (ກຳປູເຈຍ, ມຽນມາ ແລະຫວຽດນາມ) ທີ່ຈະຫຼຸດອັດຕາພາສີເປັນ 0% ທັງໝົດພາຍໃນປີ 2018.
ເອກະສານທີ່ນຳໃຊ້ເພື່ອຂໍຮັບສິດທິພິເສດໃນຂອບນີ້ ແມ່ນໃບຢັ້ງຢືນແຫຼ່ງກໍາເນີດສິນຄ້າ Form D.
ສັນຍາການຄ້າເສລີອາຊຽນ-ອົດສະຕາລີ-ນິວຊີແລນ (AANZFTA)
ສປປ ລາວ ໄດ້ຮັບການຍົກເວັ້ນ ຫຼື ຫຼຸດຜ່ອນອັດຕາພາສີໃນຂອບສັນຍາການຄ້າເສລີອາຊຽນກັບອົດສະຕາລີ ແລະນິວຊີແລນ ຈາກ 11 ປະເທດ ໄດ້ແກ່: ປະເທດອົດສະຕຣາລີ, ບຣູໄນ, ກຳປູເຈຍ, ອິນໂດເນເຊຍ, ມາເລເຊຍ, ມຽນມາ, ນິວຊີແລນ, ຟິລິປິນ, ສິງກະໂປ, ໄທ ແລະຫວຽດນາມ.
ເອກະສານທີ່ນຳໃຊ້ເພື່ອຂໍຮັບສິດທິພິເສດໃນຂອບນີ້ ແມ່ນໃບຢັ້ງຢືນແຫຼ່ງກໍາເນີດສິນຄ້າ Form AANZ.
ດາວໂຫຼດ: ແບບຟອມຂໍໃບຢັ້ງຢືນແຫຼ່ງກໍາເນີດສິນຄ້າພາຍໃຕ້ຂອບສັນຍາການຄ້າເສລີອາຊຽນ-ອົດສະຕາລີ-ນິວຊີແລນ
ສັນຍາການຄ້າເສລີອາຊຽນ-ຈີນ (ACFTA)
ສປປ ລາວ ໄດ້ຮັບສິດທິພິເສດດ້ານການຄ້າ ໂດຍການຍົກເວັ້ນ ຫຼື ຫຼຸດຜ່ອນອັດຕາພາສີໃນຂອບສັນຍາການຄ້າເສລີອາຊຽນ-ຈີນ ຈາກ 10 ປະເທດໄດ້ແກ່: ສະມາຊິກອາຊຽນ 9 ປະເທດ ແລະ ຈີນ.
ເອກະສານທີ່ນຳໃຊ້ເພື່ອຂໍຮັບສິດທິພິເສດໃນຂອບນີ້ ແມ່ນໃບຢັ້ງຢືນແຫຼ່ງກໍາເນີດສິນຄ້າ Form E.
ສັນຍາການຄ້າເສລີອາຊຽນ-ອິນເດຍ (AIFTA)
ສປປ ລາວ ໄດ້ຮັບສິດທິພິເສດດ້ານການຄ້າ ໂດຍການຍົກເວັ້ນ ຫຼື ຫຼຸດຜ່ອນອັດຕາພາສີໃນຂອບສັນຍາການຄ້າເສລີອາຊຽນ-ອິນເດຍຈາກ 10 ປະເທດ ຄື ສະມາຊິກອາຊຽນ 9 ປະເທດ ແລະ ອິນເດຍ.
ເອກະສານທີ່ນຳໃຊ້ເພື່ອຂໍຮັບສິດທິພິເສດໃນຂອບນີ້ ແມ່ນໃບຢັ້ງຢືນແຫຼ່ງກໍາເນີດສິນຄ້າ Form AI.
ສັນຍາການຄ້າເສລີອາຊຽນ-ຍີ່ປຸ່ນ (AJFTA)
ສປປ ລາວ ໄດ້ຮັບສິດທິພິເສດດ້ານການຄ້າ ໂດຍການຍົກເວັ້ນ ຫຼື ຫຼຸດຜ່ອນອັດຕາພາສີໃນຂອບສັນຍາການຄ້າເສລີອາຊຽນ-ຍີ່ປຸ່ນຈາກ 10 ປະເທດ ລວມທັງສະມາຊິກອາຊຽນ ແລະຍີ່ປຸ່ນ.
ເອກະສານທີ່ນຳໃຊ້ເພື່ອຂໍຮັບສິດທິພິເສດໃນຂອບນີ້ ແມ່ນໃບຢັ້ງຢືນແຫຼ່ງກໍາເນີດສິນຄ້າ Form AJ.
ສັນຍາການຄ້າເສລີອາຊຽນ-ເກົາຫຼີ (AKFTA)
ສປປ ລາວ ໄດ້ຮັບສິດທິພິເສດດ້ານການຄ້າ ໂດຍການຍົກເວັ້ນ ຫຼື ຫຼຸດຜ່ອນອັດຕາພາສີໃນກອບສັນຍາການຄ້າເສລີອາຊຽນ-ເກົາຫຼີຈາກ 10 ປະເທດ ຄື: ອາຊຽນ 9 ປະເທດ ແລະ ສ. ເກົາຫຼີ.
ເອກະສານທີ່ນຳໃຊ້ເພື່ອຂໍຮັບສິດທິພິເສດໃນຂອບນີ້ ແມ່ນໃບຢັ້ງຢືນແຫຼ່ງກໍາເນີດສິນຄ້າ Form AK.
ສັນຍາການຄ້າອາຊີ-ປາຊີຟິກ (APTA)
ສປປ ລາວ ໄດ້ຮັບສິດທິພິເສດດ້ານການຄ້າໂດຍການຍົກເວັ້ນ ຫຼື ຫຼຸດຜ່ອນອັດຕາພາສີໃນຂອບສັນຍາການຄ້າອາຊີ-ປາຊີຟິກຈາກ 5 ປະເທດ ໄດ້ແກ່: ປະເທດບັງກະລາເດັດ, ຈີນ, ອິນເດຍ, ສ. ເກົາຫຼີ ແລະສີລັງກາ.
ເອກະສານທີ່ນຳໃຊ້ເພື່ອຂໍຮັບສິດທິພິເສດໃນຂອບນີ້ ແມ່ນໃບຢັ້ງຢືນແຫຼ່ງກໍາເນີດສິນຄ້າ Form APTA.
ສັນຍາການຄ້າເສລີອາຊຽນ-ຮົງກົງ, ສປ ຈີນ (AHKFTA)
ສປປ ລາວ ໄດ້ຮັບສິດທິພິເສດດ້ານການຄ້າ ໂດຍການຍົກເວັ້ນ ຫຼື ຫຼຸດຜ່ອນອັດຕາພາສີໃນຂອບສັນຍາການຄ້າເສລີອາຊຽນ-ຮົງກົງ, ສປ ຈີນ ຈາກ 10 ປະເທດ ລວມທັງສະມາຊິກອາຊຽນ ແລະ ຮົງກົງ, ສປ ຈີນ.
ເອກະສານທີ່ນຳໃຊ້ເພື່ອຂໍຮັບສິດທິພິເສດໃນຂອບນີ້ ແມ່ນໃບຢັ້ງຢືນແຫຼ່ງກໍາເນີດສິນຄ້າ Form AHK.
ຂໍ້ຕົກລົງໃນການໃຫ້ບູລິມະສິດອັດຕາພາສີນຳເຂົ້າ ລະຫວ່າງ ສປປ ລາວ ແລະ ສສ ຫວຽດນາມ
ນອກເໜືອຈາກໃນຂອບອາຊຽນແລ້ວ, ສປປ ລາວ ຍັງໄດ້ຮັບສິດທິພິເສດດ້ານອັດຕາພາສີໃນຂໍ້ຕົກລົງໃນການໃຫ້ບູລິມະສິດອັດຕາພາສີນຳເຂົ້າ ລະຫວ່າງ ສປປ ລາວ ແລະ ສສ ຫວຽດນາມ ສຳລັບສິນຄ້າ 32 ລາຍການທີ່ສົ່ງອອກຈາກລາວໄປຫວຽດນາມໄດ້ຮັບການຫຼຸດຜ່ອນອັດຕາພາສີ 50% ຈາກອັດຕາທີ່ໄດ້ຫຼຸດໃນຂອບອາຊຽນ, ສ່ວນລາຍການອື່ນໆ ແມ່ນອັດຕາພາສີເປັນ 0% ທັງໝົດ (ຍົກເວັ້ນ 155 ລາຍການທີ່ນອນໃນບັນຊີຍົກເວັ້ນຖາວອນຂອງຫວຽດນາມ).
ເອກະສານທີ່ນຳໃຊ້ເພື່ອຂໍຮັບສິດທິພິເສດໃນຂອບນີ້ ແມ່ນໃບຢັ້ງຢືນແຫຼ່ງກໍາເນີດສິນຄ້າ Form S.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.