ສະພາບລວມ
ສ. ເກົາຫຼີ ໃຫ້ສິດທິພິເສດທາງການຄ້າແບບທົ່ວໄປ ໂດຍການຍົກເວັ້ນພາສີ ແລະບໍ່ກຳນົດໂກຕ້າແກ່ສິນຄ້າສົ່ງອອກຈາກປະເທດດ້ອຍພັດທະນາ ລວມທັງ ສປປ ລາວ ຊຶ່ງໄດ້ລິເລີ່ມ ໃນປີ 2008 ທີ່ເປັນຜົນສືບເນື່ອງມາຈາກມະຕິຂອງກອງປະຊຸມລະດັບລັດຖະມົນຕີຂອງອົງການການຄ້າໂລກ ທີ່ຮົງກົງໃນປີ 2005 ໂດຍປະເທດກຳລັງພັດທະນາທີ່ມີຄວາມສະໝັກໃຈ ສາມາດໃຫ້ສິດທິພິເສດໂດຍການຍົກເວັ້ນພາສີ ແລະບໍ່ກຳນົດໂກຕາ ແກ່ປະເທດດ້ອຍພັດທະນາ. ລະບົບສິດທິພິເສດດັ່ງກ່າວໄດ້ຮັບການປັບປຸງຈາກຂໍ້ລິເລີ່ມຂອງ ສ. ເກົາຫຼີເອງໃນປີ 2000.
ສ. ເກົາຫລີ ເປັນປະເທດນຳເຂົ້າອັນດັບ 8 ຂອງໂລກ ໃນປີ 2012 ໂດຍມີມູນຄ່ານຳເຂົ້າທັງໝົດແມ່ນ 519.6 ຕື້ໂດລາສະຫະລັດ ຫຼືກວມເອົາ 2.9% ຂອງການນຳເຂົ້າທົ່ວໂລກ. ສປປ ລາວ ຖືກຈັດຢູ່ໃນອັນດັບທີ 124 ຂອງຕະຫຼາດນໍາເຂົ້າສໍາລັບ ສ.ເກົາຫລີ. ສິນຄ້າຫຼັກທີ່ ສປປ ລາວ ສົ່ງອອກໄປ ສ. ເກົາຫລີ ມີມູນຄ່າ 11.3 ລ້ານໂດລາສະຫະລັດ ໃນປີ 2012 ຊຶ່ງປະກອບດ້ວຍ: ທອງ, ໄມ້ ແລະຜະລິດຕະພັນໄມ້, ເຄື່ອງນຸ່ງຫົ່ມ, ກາເຟ ແລະຊາ, ຢາສູບ, ເຄື່ອງດື່ມປະເພດເຫຼົ້າ, ໜັງສັດ ແລະອື່ນໆ. (ລາຍລະອຽດກົດເບິ່ງທີ່ນີ້)
ລະບົບສິດທິພິເສດ
ສິນຄ້າຈາກ ສປປ ລາວ ທີ່ໄດ້ເງື່ອນໄຂລະບຽບແຫຼ່ງກຳເນີດສິນຄ້າ ສາມາດສົ່ງອອກໄປ ສ. ເກົາຫຼີ ໂດຍໄດ້ຮັບການຍົກເວັ້ນພາສີ ແລະ ບໍ່ມີການກຳນົດໂກຕາ ຊຶ່ງກວມເອົາ 85% ຂອງຈຳນວນລາຍການສິນຄ້າທັງໝົດຂອງ ສ. ເກົາຫຼີ ໃນປີ 2008 ແລະຄາດວ່າຈະເພີ່ມຂື້ນເປັນ 95% ໃນທ້າຍປີ 2012 ນີ້.
ສິດທິພິເສດດັ່ງກ່າວ ຈັດຕັ້ງປະຕິບັດກັບ ທັງສິນຄ້າກະສິກຳ ແລະອຸດສາຫະກຳ ຊຶ່ງໄດ້ລະບຸລາຍການສິນຄ້າລະອຽດໃນບັນຊີລາຍການສິນຄ້າ (ຄັດຕິດມານີ້). ສຳລັບສິນຄ້າກະສິກຳ ປະກອບດ້ວຍ: ໝວດ 1 (ສັດມີຊີວິດ), ໝວດ 3 (ປາ ແລະຜະລິດຕະພັນປາ), ໝວດ 5 (ໜັງ ແລະຂົນສັດ) ຈົນເຖີງ ໝວດ 24 (ຢາສູບ ແລະ ຜະລິດ). ສິນຄ້າອຸດສາຫະກຳ ປະກອບດ້ວຍ: ໝວດ 25 (ເກືອ,ມາດ,ດິນ ແລະ ຫີນ; ວັດຖຸຈຳພວກ TLASTER, ປູນຂາວ ແລະ ຊີເມັນ) ຫາ ໝວດ 97 (ເຄື່ອງສິນລະປະກຳ, ເຄື່ອງປະສົມ ຫຼື ວັດຖຸບູຮານ ). ເຖິງຢ່າງໃດກໍຕາມ ສິນຄ້າບາງປະເພດ ເຊັ່ນ: ເຄື່ອງນຸ່ງຫົ່ມ, ສິນຄ້າກະສິກຳ ແລະປະມົງ ບາງລາຍການ ແມ່ນຍັງບໍ່ທັນໄດ້ຮັບສິດທິພິເສດ ແຕ່ສາມາດເສຍພາສີໃນອັດຕາປົກກະຕິຂອງ ສ. ເກົາຫຼີ.
ນອກຈາກລະບົບສິດທິພິເສດແບບທົ່ວໄປແລ້ວ, ສິນຄ້າສົ່ງອອກຈາກລາວ ໄປ ສ. ເກົາຫຼີ ຍັງສາມາດໄດ້ຮັບສິດທິພິເສດພາຍໃຕ້ສັນຍາການຄ້າເສລີ ອາຊຽນ-ສ. ເກົາຫຼີ ແລະພາຍໃຕ້ສັນຍາການຄ້າອາຊີ-ປາຊີຟິກ (APTA) ໄດ້ອີກ ຊຶ່ງຈະໄດ້ມີການນໍາສະເໜີຂໍ້ມູນຕ່າງຫາກ.
ລະບຽບແຫຼ່ງກຳເນີດສິນຄ້າ (Rules of Origin: ROO)
ສິນຄ້າຈາກ ສປປ ລາວ ທີ່ຈະຂໍສິດທິພິເສດທາງການຄ້າ ເພື່ອສົ່ງອອກໄປຍັງຕະຫຼາດ ສ. ເກົາຫຼີ ນອກຈາກສິນຄ້າທີ່ບັນຈຸໃນບັນຊີທີ່ ສ. ເກົາຫຼີ ໃຫ້ສິນທິພິເສດແລ້ວຍັງຕ້ອງປະຕິບັດຕາມເງື່ອນໄຂແຫຼ່ງກຳເນີດສິນຄ້າ ດັ່ງນີ້:
· ເປັນສິນຄ້າທີ່ໄດ້ມາ ຫຼືຜະລິດ ໂດຍນຳໃຊ້ວັດຖຸດິບຈາກພາຍໃນທັງໝົດ (Wholly Obtained or Produced: WO) ໂດຍພື້ນຖານແລ້ວແມ່ນສິນຄ້າກະສິກຳ (ພືດ, ສັດ), ຜະລິດຕະພັນກະ ສິກຳແປຮູບ ແລະແຮ່ທາດ ໆລໆ.
· ເປັນສິນຄ້າທີ່ປຸງແຕ່ງ ຫຼືຜະລິດຂັ້ນສຸດທ້າຍຢູຸ່ ສປປ ລາວ ໂດຍວັດຖຸດິບທີ່ນຳເຂົ້າ ມີອັດຕາສ່ວນບໍ່ເກີນ 50% ຂອງລາຄາຂາຍສິນຄ້າຮອດທ່າເຮືອ (FOB).
ໃນກໍລະນີທີ່ມີການນຳເຂົ້າວັດຖຸດິບຈາກ ສ. ເກົາຫຼີ ມາປຸງແຕ່ງ ຫຼືຜະລິດ ຖືວ່າສາມາດຫັກອອກຈາກມູນຄ່າວັດຖຸດິບທີ່ນຳເຂົ້າຈາກຕ່າງປະເທດ (ຫຼື ຖືໄດ້ວ່າແມ່ນວັດຖຸດິບຂອງ ສປປ ລາວ ເອງ).
ເອກະສານປະກອບ
ເພື່ອໄດ້ຮັບສິດທິພິເສດໃນການສົ່ງອອກໄປຕະຫຼາດ ສ. ເກົາຫຼີ ແມ່ນນຳໃຊ້ໃບຢັ້ງຢືນແຫຼ່ງກຳເນີດສິນຄ້າຟອມ CO Korea ທີ່ອອກໂດຍສະພາການຄ້າ ແລະອຸດສາຫະກຳແຫ່ງຊາດ ຫຼືຂັ້ນແຂວງ ແລະນະຄອນຫຼວງ ຊຶ່ງມີເອກະສານປະກອບໃນການຂໍໃບຢັ້ງຢືນແຫຼ່ງກຳເນີດສິນຄ້າ ມີດັ່ງນີ້:
1). ໃບສະເໜີ
2). ໃບຢັ້ງຢືນແຫຼ່ງກຳເນີດສິນຄ້າທີ່ພິມແລ້ວ
3). ໃບແຈ້ງລາຄາ ແລະ ຫຸ້ມຫໍ່
4). ໃບແຈ້ງພາສີເປັນລາຍລະອຽດ
5). ສຳເນົາໃບຂົນສົ່ງ
6). ໃບບິນຊື້ຂາຍພາຍໃນ (ກໍລະນີມີການເກັບຊື້)
7). ໃບຄິດໄລ່ຕົ້ນທືນການຜະລິດ ຫຼື ໃບຂັ້ນຕອນການຜະລິດສິນຄ້າ (ກໍລະນີນຳເຂົ້າວັດຖຸດິບ)
ເງື່ອນໄຂດ້ານການຂົນສົ່ງ
ໜຶ່ງໃນເງື່ອນໄຂຂອງການໄດ້ສິດທິພິເສດ ແມ່ນສິນຄ້າທີ່ສົ່ງອອກຕ້ອງໄດ້ຮັບການຂົນສົ່ງໂດຍກົງຈາກ ສປປ ລາວ ໄປຍັງ ສ. ເກົາຫຼີ ແຕ່ກໍມີຂໍ້ໂຍະຍານ 2 ກໍລະນີ ຄື:
· ຈຳເປັນຕ້ອງຂົນສົ່ງຜ່ານປະເທດທີສາມ ຍ້ອນເຫດຜົນທາງດ້ານພູມສາດ (ເຊັ່ນ ສປປ ລາວ ບໍ່ມີຊາຍແດນຕິດກັບທະເລ), ເພື່ອການຂົນສົ່ງຜ່ານ ຫຼືເພື່ອຈຸດປະສົງໃນການເກັບຮັກສາສິນຄ້າຊົ່ວຄາວ ແຕ່ຕ້ອງໄດ້ຢູ່ພາຍໃຕ້ການຄວບຄຸມຂອງເຈົ້າໜ້າທີ່ພາສີ.
· ສິນຄ້າສົ່ງອອກໄປປະເທດທີ່ສາມເພື່ອຈຸດປະສົງໃນການວາງສະແດງ ແລ້ວສົ່ງອອກຕ່ໍໄປຍັງ ສ. ເກົາຫຼີ.
ຂໍ້ມູນເພີ່ມຕື່ມ:
ທ່ານສາມາດສອບຖາມຂໍ້ມູນກ່ຽວກັບລະບົບສິດທິພິເສດທາງການຄ້າ ແລະເງື່ອນໄຂແຫຼ່ງກຳເນີດສິນຄ້າ ໃນການສົ່ງອອກໄປຍັງປະເທດຕ່າງໆ ໄດ້ຈາກ:
- ພະແນກຄຸ້ມຄອງແຫຼ່ງກຳເນີດສິນຄ້າ, ກົມການນຳເຂົ້າ ແລະສົ່ງອອກ, ກະຊວງອຸດສາຫະກຳ ແລະການຄ້າ:
ເວັບໄຊ້: http://www.laotradeportal.gov.la ໂທ/ແຟກ: 021-450255, email: [email protected]
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.