ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ
ກະຊວງການເງິນ ເລກທີ:05666/ກພສ
ກົມພາສີ ນະຄອນຫຼວງວຽງຈັນ,ວັນທີ 27 SEP 2018
ແຈ້ງການ
ເຖິງ: ບັນດາພະແນກອ້ອມຂ້າງກົມພາສີ, ກອງຄຸ້ມຄອງກົມພາສີ, ກອງກວດກາພາສີປະຈຳແຂວງ ແລະ ດ່ານພາສີຊາຍແດນ ໃນຂອບເຂດທົ່ວປະເທດ.
ເລື່ອງ: ການຈັດຕັ້ງປະຕິບັດເກັບຄ່າທຳນຽມພາຫະນະຜ່ານແດນ ແລະ ພາຫະນະເຂົ້າ-ອອກ ສປປ ລາວ ຕາມລັດຖະບັນຍັດຂອງປະທານປະເທດ ສະບັບເລກທີ 003/ປປທ, ລົງວັນທີ 26 ທັນວາ 2012.
- ອີງຕາມ ກົດໝາຍວ່າດ້ວຍພາສີສະບັບເລກທີ 04/ສພຊ,ລົງວັນທີ 20 ທັນວາ 2011 ແລະ ສະບັບປັບປຸງບາງມາດຕາ ສະບັບເລກທີ 57/ສພຊ, ລົງວັນທີ 24 ທັນວາ 2014;
- ອີງຕາມ ລັດຖະບັນຍັດຂອງປະທານປະເທດ ສະບັບເລກທີ 003/ປປທ, ລົງວັນທີ 26 ທັນວາ 2012 ວ່າດ້ວຍ ຄ່າທຳນຽມ ແລະ ຄ່າບໍລິການ;
- ອີງຕາມ ບົດແນະນຳຂອງກະຊວງການເງິນ ສະບັບເລກທີ 1225/ກງ, ລົງວັນທີ 23 ເມສາ 2015;
- ອີງຕາມ ບົດລາຍງານຂອງພະແນກຈັດຕັ້ງ, ບໍລິຫານ ແລະ ການເງິນ ສະບັບເລກທີ 00718/ຈບງ, ລົງວັນທີ 07 ກັນຍາ 2018.
ເພື່ອຮັບປະກັນໃນການຈັດຕັ້ງປະຕິບັດ ກ່ຽວກັບການຈັດເກັບຄ່າທຳນຽມພາຫະນະຜ່ານແດນ ແລະ ພາຫະນະເຂົ້າ-ອອກ ສປປ ລາວ ຕາມລັດຖະບັນຍັດຂອງປະທານປະເທດ ສະບັບເລກທີ 003/ປປທ, ລົງວັນທີ 26 ທັນວາ 2012 ໃຫ້ຖືກຕ້ອງສອດຄ່ອງກັບບົດແນະນຳຂອງກະຊວງການເງິນ ສະບັບເລກທີ 1225/ກງ, ລົງວັນທີ 23 ເມສາ 2015 ແລະ ມີຄວາມເປັນເອກະພາບ ໃນຂອບເຂດທົ່ວປະເທດ.
ຫົວໜ້າກົມພາສີ ອອກແຈ້ງການແນະນຳ ດັ່ງນີ້:
1. ການຈັດຕັ້ງປະຕິບັດຕາມລັດຖະບັນຍັດຂອງປະທານປະເທດ ສະບັບເລກທີ 003/ປປທ, ລົງວັນທີ 26 ທັນວາ 2012 (ສະບັບປັບປຸງ) ກ່ຽວກັບການເກັບຄ່າທໍານຽມປະເພດພາຫະນະ ແມ່ນໄດ້ແຍກການຈັດເກັບເປັນ 02 ປະເພດຄື: ລົດຜ່ານແດນ ແລະ ລົດເຂົ້າ-ອອກ ສປປ ລາວ ດັ່ງລາຍລະອຽດລຸ່ມນີ້:
- ລົດຜ່ານແດນ ສປປປ ລາວ ປະເພດຕ່າງໆ ຈັດເກັບຕາມມາດຕາ 21 ຂໍ້ V, 5.1
|
ລ/ດ |
ປະເພດພາຫະນະ |
ກີບ/ຄັ້ງ |
|
01 |
ລົດເກັງ,ລົດຈິບ,ລົດກະບະ |
25.000 |
|
02 |
ລົດໂດຍສານຂະໜາດນ້ອຍ 7 ບ່ອນນັ່ງລົງມາ |
50.000 |
|
03 |
ລົດໂດຍສານຂະໜາດກາງ 8-35 ບ່ອນນັ່ງ |
80.000 |
|
04 |
ລົດໂດຍສານຂະໜາດໃຫຍ່ ຫຼາຍກວ່າ 35 ບ່ອນນັ່ງ |
150.000 |
|
05 |
ລົດບັນທຸກ 6 ລໍ້ |
50.000 |
|
06 |
ລົດບັນທຸກ 10-12 ລໍ້ |
80.000 |
|
07 |
ລົດບັນທຸກ 18 ລໍ້ ຫຼື ລົດລາກ |
165.000 |
- ລົດເຂົ້າ-ອອກ ສປປ ລາວຈັດເກັບຕາມມາດຕາ 21 ຂໍ້ V, 5.2
|
ລ/ດ |
ປະເພດພາຫະນະ |
ກີບ/ຄັ້ງ |
|
01 |
ລົດເກັງ,ລົດຈິບ,ລົດກະບະ |
25.000 |
|
02 |
ລົດໂດຍສານຂະໜາດນ້ອຍ 7 ບ່ອນນັ່ງລົງມາ |
40.000 |
|
03 |
ລົດໂດຍສານຂະໜາດກາງ 8-35 ບ່ອນນັ່ງ |
50.000 |
|
04 |
ລົດໂດຍສານຂະໜາດໃຫຍ່ ຫຼາຍກວ່າ 35 ບ່ອນນັ່ງ |
80.000 |
|
05 |
ລົດບັນທຸກ 6 ລໍ້ |
50.000 |
|
06 |
ລົດບັນທຸກ 10-12 ລໍ້ |
80.000 |
|
07 |
ລົດບັນທຸກ 18 ລໍ້ ຫຼື ລົດລາກ |
120.000 |
2. ມອບໃຫ້ກອງຄຸ້ມຄອງພາສີ I-VII ຊີ້ນຳດ່ານພາສີຊາຍແດນທີ່ຂຶ້ນກັບເອົາໃຈໃສ່ຈັດເກັບ ແລະ ມອບລາຍຮັບຈາກຄ່າທຳນຽມດັ່ງກ່າວເຂົ້າບັນຊີງົບປະມານແຫ່ງຊາດເປັນແຕ່ລະມື້ ໂດຍຜ່ານຄັງເງິນປະຈຳດ່ານ ແລະ ສະຫຼຸບລາຍງານກ່ຽວກັບການຈັດຕັ້ງປະຕິບັດເປັນແຕ່ລະເດືອນ, ງວດ ແລະ ປີ ແລ້ວສົ່ງໃຫ້ກົມພາສີ ບໍ່ໃຫ້ກາຍວັນທີ 15 ຂອງທຸກໆເດືອນ.
3. ມອບໃຫ້ພະແນກຈັດຕັ້ງ, ບໍລິຫານ ແລະ ການເງິນ ສົມທົບກັບ ກອງຄຸ້ມຄອງພາສີ I-VII ເພື່ອເຜີຍແຜ່ແຈ້ງການແນະນຳສະບັບນີ້ໃຫ້ສັງຄົມຮັບຊາບ ແລະ ແຈກຢາຍປີ້ຄ່າທໍານຽມຕ່າງໆໃຫ້ບັນດາດ່ານພາສີຊາຍແດນໃນຂອບເຂດທົ່ວປະເທດເພື່ອຈັດຕັ້ງປະຕິບັດ.
4. ການຈັດເກັບຄ່າທໍານຽມລົດຜ່ານແດນ ແລະ ລົດເຂົ້າ-ອອກ ສປປ ລາວ ອັດຕາໃໝ່ ຕາມມາດຕາ 21 ຂໍ້ V, 5.1 ແລະ 5.2 ຕາມລັດຖະບັນຍັດຂອງປະທານປະເທດ ສະບັບເລກທີ 003/ປປທ, ລົງວັນທີ 26 ທັນວາ 2012 ໃຫ້ເລີ່ມຈັດຕັ້ງປະຕິບັດແຕ່ວັນທີ 01 ຕຸລາ 2018 ເປັນຕົ້ນໄປ.
5. ໃນການຈັດຕັ້ງປະຕິບັດຕົວຈິງ ຫາກພົບຂໍ້ຫຍຸ້ງຍາກໃຫ້ລາຍງານກົມພາສີ ເພື່ອຊອກຫາວິທີແກ້ໄຂຕາມກົດໝາຍ ແລະ ລະບຽບການ.
ດັງນັ້ນ, ຈຶ່ງແຈ້ງມາຍັງທ່ານເພື່ອຊາບ ແລະ ພ້ອມກັນຈັດຕັ້ງປະຕິບັດຍ່າງເຂັ້ມງວດ.
ຮັກສາການຫົວໜ້າກົມພາສີ
ບຸນປະເສີດ ສີກຸນລະບຸດ
| # | ຫົວຂໍ້ | ດາວໂຫຼດ |
|---|---|---|
| 1 | ແຈ້ງການ ກ່ຽວກັບ ການຈັດຕັ້ງປະຕິບັດເກັບຄ່າທຳນຽມພາຫະນະຜ່ານແດນ ແລະ ພາຫະນະເຂົ້າ-ອອກ ສປປ ລາວ ເລກທີ 05666/ກພສ, ລົງວັນທີ 27 ກັນຍາ 2018 |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.