ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ
ກະຊວງການເງີນ
ກົມພາສີ
ເລກທີ 06980 /ກພສ
ນະຄອນຫຼວງວຽງຈັນ, ວັນທີ 03 ສິງຫາ 2023
ແຈ້ງການ
ເຖິງ: - ຫົວໜ້າພະແນກກົມພາສີ
- ຫົວໜ້າພາສີປະຈໍາແຂວງ, ນະຄອນຫຼວງວຽງຈັນ
- ຫົວໜ້າດ່ານພາສີຊາຍແດນ ໃນຂອບເຂດທົ່ວປະເທດ
- ອໍານວຍການ ບໍລິສັດບີແວັກ (ລາວ) ຈໍາກັດ
ເລື່ອງ: ການໂຈະການຈັດເກັບຄ່າບໍລິການແຈ້ງການຜ່ານລະບົບປະຕູດຽວ LNSW ຕາມແຈ້ງການຂອງກົມພາສີ ສະບັບເລກທີ 03633/ກງ, ລົງວັນທີ 02 ພຶດສະພາ 2023
- ອີງຕາມ ກົດໝາຍວ່າດ້ວຍພາສີ ສະບັບເລກທີ 81/ສພຊ, ລົງວັນທີ 29 ມິຖຸນາ 2020;
- ອີງຕາມ ລັດຖະບັນຍັດປະທານປະເທດ ວ່າດ້ວຍຄ່າທຳນຽມ ແລະ ຄ່າບໍລິການສະບັບເລກທີ 002/ປປທ, ລົງວັນທີ 17 ມິຖຸນາ 2021;
- ອີງຕາມຂໍ້ຕົກລົງຂອງກະຊວງການເງີນ ວ່າດ້ວຍການອະນຸມັດໃຫ້ປັບເນື້ອໃນຢູ່ໃນມາດຕາ 15.1 ຂອງສັນຍາໃນການຈັດເກັບຄ່າບໍລິການຂອງສັນຍາ ສະບັບລົງວັນທີ 28 ມັງກອນ 2013;
ເພື່ອຮັບປະກັນໃຫ້ການຈັດເກັບຄ່າບໍລິການແຈ້ງພາສີຜ່ານລະບົບປະຕູດຽວ (Lao National Single Window – LNSW) ສອດຄ່ອງກັບກົດໝາຍ ແລະ ລະບຽບການ.
ກົມພາສີ ອອກແຈ້ງການ ດັ່ງນີ້:
- ໃຫ້ໂຈະການຈັດເກັບຄ່າບໍລິການແຈ້ງພາສີຜ່ານລະບົບປະຕູດຽວ LNSW ຕາມແຈ້ງການຂອງກົມພາສີ ສະບັບເລກທີ 03633/ກພສ, ລົງວັນທີ 02 ພຶກສະພາ 2023 ແລະ ໃຫ້ຈັດເກັບຄ່າບໍລິການດັ່ງກ່າວ ຕາມອັດຕາທີ່ກຳນົດໄວ້ໃນ ຂໍ້ 3, ມາດຕາ 17 ຂອງລັດຖະບັນຍັດປະທານປະເທດ ວ່າດ້ວຍຄ່າທຳນຽມ ແລະ ຄ່າບໍລິການ ສະບັບເລກທີ 002/ປປທ, ລົງວັນທີ 17 ມິຖຸນາ 2021 ຢ່າງເຂັ້ມງວດ;
- ໃຫ້ພະແນກຈັດຕັ້ງ, ບໍລິຫານ ແລະ ການເງີນ ຄົ້ນຄວ້າ ແລະ ນຳສະເໜີກົມພາສີ ແຕ່ງຕັ້ງຄະນະຮັບຜິດຊອບເຈລະນາ ປັບປຸງສັນຍາສຳປະທານການພັດທະນາລະບົບການແຈ້ງພາສີປະຕູດຽວ ໃຫ້ສອດຄ່ອງຕາມທິດຊີ້ນຳຂອງກະຊວງການເງີນ;
- ໃຫ້ບໍລິສັດບີແວັກ (ລາວ) ຈຳກັດ ໃຫ້ຄວາມຮ່ວມມືໃນການກະກຽມ ເອກະສານສັນຍາ, ເອກະສານນິຕິກຳລວມທັງຂໍ້ມູນກ່ຽວຂ້ອງ ທີ່ເປັນບ່ອນອີງໃຫ້ແກ່ການຄົ້ນຄວ້າ ແລະ ເຂົ້າຮ່ວມເຮັດວຽກກັບຄະນະວິຊາການກົມພາສີ ເພື່ອປັບປຸງສັນຍາສຳປະທານການພັດທະນາລະບົບແຈ້ງພາສີປະຕູດຽວໃຫ້ສຳເລັດຕາມຄາດໝາຍ;
- ແຈ້ງການ ສະບັບນີ້ປ່ຽນແທນແຈ້ງການຂອງກົມພາສີ ສະບັບເລກທີ 03633/ກພສ, ລົງວັນທີ 02 ພຶດສະພາ 2023 ແລະ ມີຜົນນຳໃຊ້ນັບແຕ່ວັນລົງລາຍເຊັນເປັນຕົ້ນໄປ.
ດັ່ງນັ້ນ, ຈຶ່ງແຈ້ງມາເພື່ອຊາບ ແລະ ຈັດຕັ້ງປະຕິບັດຢ່າງເຂັ້ມງວດ
ຫົວໜ້າກົມ
ພູເຂົາຄໍາ ວັນນະວົງໄຊ
PDFກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.