ຄະນະຊີ້ນຳການປະມູນຂາຍໄມ້ຢຶດຂັ້ນແຂວງ ແຂວງຄຳມ່ວນ ແຈ້ງເຖິງ ສະພາການຄ້າ ແລະ ອຸດສາຫະກຳແຫ່ງຊາດ, ສະພາການຄ້າ ແລະ ອຸດສາຫະກຳປະຈຳແຂວງຄຳມ່ວນ, ສະມາຄົມໂຮງງານປຸງແຕ່ງໄມ້ ແລະ ເຟີນິເຈີ້ໄມ້ສຳເລັດຮູບທົ່ວປະເທດ, ຜູ້ອຳນວຍການ ໂຮງງານປຸງແຕ່ງໄມ້ ແລະ ເຟີນິເຈີ້ໄມ້ສຳເລັດຮູບ ທົ່ວປະເທດ ເພື່ອເຂົ້າຮ່ວມປະມູນຊື້ໄມ້ຢຶດຂອງແຂວງຄຳມ່ວນ ຈຳນວນທັງໝົດ 1,521,196 ແມັດກ້ອນ, ນ້ຳໜັກ 70,033 ກິໂລ.
ສຳລັບເງື່ອນໄຂ ຂອງຜູ້ເຂົ້າຮ່ວມການປະມູນມີດັ່ງນີ້:
- ຕ້ອງເປັນໂຮງງານອຸດສາຫະກຳປຸງແຕ່ງໄມ້ ທີ່ໄດ້ຜ່ານການດັດສົມຕາມມາດຕະຖານອາຄານໂຮງງານ ຕາມຂໍ້ຕົກລົງ ສະບັບເລກທີ 0719/ອຄ, ລົງວັນທີ 03 ເມສາ 2009 ແລະ ເປັນສະມາຊິກ ຂອງສະມາຄົມອຸດສາຫະກຳປຸງແຕ່ງໄມ້ແຫ່ງຊາດ ຫຼື ແຂວງຄຳມ່ວນ.
- ມີໃບທະບຽນວິສາຫະກິດ, ໃບທະບຽນອາກອນ, ໃບອະນຸຍາດດຳເນີນກິດຈະການດ້ານທຸລະກິດໄມ້ ແລະ ໃບອະນຸຍາດອື່ນໆ ຖືກຕ້ອງຕາມລະບຽບຫຼັກການ ແລະ ຕ້ອງເປັນໂຮງງານໄມ້ ທີ່ບໍ່ເຄີຍກະທຳຜິດດ້ານທຸລະກິດໄມ້, ບໍ່ມີໜີ້ສິນຄ້າງຊຳລະຄ່າພັນທະໄມ້ກັບພາກລັດ.
- ວ່າດ້ວຍຖານະການເງິນຂອງໂຮງງານໄມ້ ເພື່ອເຂົ້າຮ່ວມການປະມູນຊື້ໄມ້ໄມ້ຍຶດ ຕ້ອງເປັນແຊັກເງິນສົດ ທີ່ຂຽນເນື້ອໃນກ່ຽວກັບການປະມູນຊື້ໄມ້ຍຶດທີ່ໄດ້ກຳນົດໄວ້ (ລາຄາຊື້ສະເໜີໄມ້ຍຶດຂອງໂຮງງານ) ໂດຍໄດ້ຮັບການເຊັັນຢັ້ງຢືນຈາກທະນາຄານກ່ຽວຂ້ອງ ວ່າມີມູນຄ່າເງິນແທ້ຈິງ ແລະ ສາມາດຖອນເງິນໄດ້ທັນທີ.
ໃນການເຂົ້າຮ່ວມການປະມູນຊື້ໄມ້ ຜູ້ເຂົ້າປະມູນຕ້ອງສົ່ງຊອງປະມູນມາຍັງຄະນະກຳມະການປະມູນຊື້ຂາຍໄມ້ຂັ້ນແຂວງ ຈຳນວນ 02 ຊອງ ຄື: ຊອງເງື່ອນໄຂຂອງໂຮງງານທີ່ເຂົ້າຮ່ວມປະມູນ (ເອກະສານຕ່າງໆຂອງໂຮງງານໄມ້) ແລະ ຊອງໃສ່ລາຄາປະມູນຊື້ໄມ້ຂອງທາງໂຮງງານ.
ຜູ້ທີ່ມີເງື່ອນໄຂ ສາມາດຕິດຕໍ່ຊື້ຊອງປະມູນໄດ້ທີ່ ພະແນກອຸດສາຫະກຳ ແລະ ການຄ້າ ແຂວງຄຳມ່ວນ (ຂະແໜງການຄຸ້ມຄອງການນຳເຂົ້າ ແລະ ສົ່ງອອກ) ຫຼື ຂັ້ນສູນກາງ ທີ່ ກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ, ໂທ 021 412 008 ຫຼື ໂທ 5549 9071 ໃນລາຄາຊອງລະ 1,000,000 ກີບ,ເລິ່ມແຕ່ວັນທີ 20 ເມສາ - 04 ພຶດສະພາ 2017. ເປີດຊອງປະມູນໄມ້ ເວລາ 9:30 ຂອງວັນທີ 05 ພຶດສະພາ 2017 ທີ່ ພະແນກອຸດສາຫະກຳ ແລະ ການຄ້າແຂວງຄຳມ່ວນ.
ເບິ່ງແຈ້ງການລະອຽດ ແລະ ບັນຊີໄມ້: ກົດທີ່ນີ້
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.