ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ
ສະພາແຫ່ງຊາດ ເລກທີ 01/ສພຊ
ນະຄອນຫຼວງວຽງຈັນ, ວັນທີ 04 ພະຈິກ 2016
ກົດໝາຍ
ວ່າດ້ວຍ ສື່ມວນຊົນ (ສະບັບປັບປຸງ)
ພາກທີ I
ບົດບັນຍັດທົ່ວໄປ
ມາດຕາ 1 (ປັບປຸງ) ຈຸດປະສົງ
ກົດໝາຍສະບັບນີ້ ກໍານົດ ຫຼັກການ,ລະບຽບການ ແລະ ມາດຕະການ ກ່ຽວກັບການຈັດຕັ້ງ, ການເຄື່ອນໄຫວ, ການພັດທະນາ, ການຄຸ້ມຄອງ, ການກວດສື່ມວນຊົນ ເພື່ອເສີມຂະຫຍາຍບົດບາດ, ຍົກສູງຄຸນນະພາບຂອງສື່ມວນຊົນໃຫ້ກ້ວາໜ້າແລະທັນສະໄໝ, ເສີມຂະຫຍາຍປະຊາທິປະໄຕ ແລະ ສິດເປັນເຈົ້າປະເທດຊາດຂອງປະຊາຊົນລາວບັນດາເຜົ່າ ແນໃສ່ຮັບປະກັນການປະຕິບັດເສລີພາບດ້ານສື່ມວນຊົນຂອງຜົນລະເມືອງລາວ, ສາມາດເຊື່ອມໂຍງກັບພາກພື້ນ ແລະ ສາກົນ, ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ.
ມາດຕາ 2 ສື່ມວນຊົນ
ສື່ມວນຊົນ ແມ່ນ ເທວີຖະແຫຼງຂ່າວທີ່ປະກອບດ້ວຍ ສື່ສິ່ງພິມ, ສື່ເອເລັກໂຕຣນິກ ແລະ ຜະລິດຕະພັນສື່ມວນຊົນ, ມີພາລະບົດບາດເປັນກະບອກສຽງຂອງອົງການຈັດຕັ້ງ ພັກ, ລັດ ແລະ ສັງຄົມ ໃນການໂຄສະນາ,ສຶກສາອົບຮົມ ແນວທາງຂອງພັກ, ກົດໝາຍ ແລະ ລະບຽບການຂອງລັດ, ປຸກລະດົມນ້ຳໃຈຮັກຊາດ, ເຜີຍແຜ່ຂໍ້ມູນຂ່າວສານທາງດ້ານ ການເມືອງ, ເສດຖະກິດ-ສັງຄົມ, ວິດທະຍາສາດ, ເຕັກໂນໂລຊີ, ສາລະຄວາມຮູ້, ສາລະບັນເທິງໃຫ້ແກ່ສັງຄົມ, ປະກອບສ່ວນຕ້ານປາກົດການຫຍໍ້ທໍ້ໃນສັງຄົມ ແລະ ຖ້ອຍທຳນອງທີ່ບິດເບືອນຄວາມຈິງ.
ມາດຕາ 3 (ປັບປຸງ)ການອະທິບານຄຳສັບ
ຄຳສັບທີ່ນຳໃຊ້ໃນກົດໝາຍສະບັບນີ້ ມີຄວາມໝາຍດັ່ງນີ້:
- ພາຫະນະສື່ມວນຊົນ ໝາຍເຖິງ ສື່ສິ່ງພິມ, ສື່ເອເລັກໂຕຣນິກ ລວມທັງພະລິດຕະພັນສື່ມວນຊົນ
- ພະລິດຕະພັນສື່ມວນຊົນ ໝາຍເຖິງ ໜັງສືພິມ,ໃບຂ່ານສານ, ຈົດໝາຍເຫດ, ວາລະສານ, ລາຍການວິທະຍຸ, ລາຍການໂທລະພາບ, ລາຍການໂທລະໂຄງ, ອິນຕີເນັດ, ເວັບໄຊ, ກະແຊັດ, ຊີດີ໌, ວີຊີດີ, ດີວີດີ ແລະ ອື່ນໆ;
- ອຸປະກອນສື່ເອເລັກໂຕຣນິກ ໝາຍເຖິງ ອຸປະກອນ ການຜະລິດສື່ເອເລັກໂຕຣນິກ, ສົ່ງເຄື່ອງ ແລະ ເຄື່ອງຮັບສັນຍານເອເລັກໂຕຣນິກ ທາງພາກພື້ນດິນ, ສາຍ, ດາວທຽມ;
- ຄື້ນຄວາມຖີ່ ໝາຍເຖິງ ຄວາມຖີ່ວິທະຍຸເພື່ອການສົ່ງ, ຮັບ ແລະ ການກະຈາຍຂອງສື່ເອເລັກໂຕຣນິກ ທາງສາຍ, ທາງພາກພື້ນດິນ, ທາງດາວທຽມ ຕາມການແບ່ງປັນຂອງອົງການໂທລະຄົມສາກົນ;
- ບັນນາທິການ ໝາຍເຖິງ ຜູ້ກວດແກ້, ກວດຜ່ານເນື້ອໃນ ແລະ ຮູບແບບຂອງ ບົດ, ຂ່າວ ແລະ ລາຍການຂອງສື່ມວນຊົນຕ່າງໆ;
- ນັກຂ່າວ ໝາຍເຖິງ ບຸກຄະລາກອນຂອງອົງການສື່ມວນຊົນທີ່ເຮັດໜ້າທີ່ຊອກເກັບກໍາຂໍ້ມູນ ຂ່າວຢູ່ພາຍໃນ ແລະ ຕ່າງປະເທດ ແລ້ວແຕ່ງເປັນບົດ, ຂ່າວ ແລະ ລາຍການສະໜອງໃຫ້ແກ່ພາຫະນະສື່ມວນຊົນ;
- ຫາງສຽງສັງຄົມ ໝາຍເຖິງ ຄວາມເຫັນຂອງສາທາລະນະຊົນ ຕໍ່ເຫດການ ຫຼື ປະກົດການທີ່ບໍ່ທັນໄດ້ຢັ້ງຢືນ ຫຼື ບໍ່ໄດ້ພິສູດ ຢ່າງເປັນທາງການ;
- ອິນເຕີເນັດ ໝາຍເຖິງ ລະບົບເຄືອຂ່າຍຄອມພິວເຕີ ຊຶ່ງສາມາດສົ່ງຂໍ້ມູນ ຂ່າວສານຫາກັນ ຫຼື ສື່ສານທາງເອເລັກໂຕຣນິກ ດ້ວຍການສົ່ງສັນຍານສຽງ ແລະ ພາບຫາກັນທາງສາຍ ຫຼື ທາງອາກາດ; ຂໍ້ມູນ ຂ່າວສານທີ່ສ້າງຂຶ້ນສາມາດຝາກໄວ້ໃນຖານຂໍ້ມູນ;
- ເວັບໄຊ ໝາຍເຖິງ ໜ້າຂໍ້ມູນ ຂ່າວສານ ກ່ຽວກັບເນື້ອໃນສະເພາະໃດໜຶ່ງທີ່ເປັນຕົວໜັງສືດ, ຮູບພາບ, ແສງ, ສີ, ສຽງ ທີ່ສ້າງຂຶ້ນດ້ວຍບຸກຄົນ, ອົງການຈັດຕັ້ງຕ່າງໆຢູ່ພາຍໃນ ແລະ ຕ່າງປະເທດ ຊຶ່ງສ້າງຂຶ້ນເປັນໜຶ່ງໜ້າ ຫຼື ຫຼາຍໜ້າເວັບ ສົ່ງສັນຍານຜ່ານລະບົບເຄືອຂ່າຍອິນເຕີເນັດ ແລະ ສາມາດເຂົ້າເຖິງໄດ້ທາງຄອມພິວເຕີ, ໂທລະພາບດີຈີຕອນ, ໂທລະສັບມືຖື ແລະ ອຸປະກອນສື່ສານອື່ນ ດ້ວຍລະຫັດຊື່ທາງອິນເຕີເນັດ;
- ການຈໍາໜ່າຍເປັນໄລຍະ ໝາຍເຖິງ ການຈໍາໜ່າຍເປັນລາຍຕອນ, ລາຍວັນ, ລາຍອາທິດ, ລາຍເດືອນ, ລາຍໄຕມາດ ແລະ ອື່ນໆ;
- ສື່ແບບໃໝ່ ໝາຍເຖິງ ພາຫະນະໂຄສະນາປະເພດໜຶ່ງຂອງສື່ເອເລັກໂຕຣນິກທີ່ສາມາດສື່ສານໄດ້ສອງລວງ ດ້ວຍການນໍາໃຊ້ເຕັກໂນໂລຊີສື່ສານທັນສະໄໝ ໃນການສົ່ງຂໍ້ມູນ ຂ່າວສານເປັນຕົວອັກສອນ, ພາບ ແລະ ສຽງ ຜ່ານລະບົບເຄືອຂ່າຍອິນເຕີເນັດ ເຊັ່ນ ເຟສບຸກ, ຢູທູບ, ທະວິດເຕີ, ບະລອກ ແລະ ອື່ນໆ;
- ສື່ສັງຄົມອອນລາຍ ໝາຍເຖິງ ສື່ແບບໃໝ່ປະເພດໜຶ່ງ ທີ່ບຸກຄົນ, ນິຕິບຸກຄົນ ແລະ ການຈັດຕັ້ງ ໃຊ້ສື່ສານກັນຜ່ານລະບົບເຄືອຂ່າຍອິນເຕີເນັດ ເພື່ອເຜີຍແຜ່ຂໍ້ມູນ ຂ່າວສານສູ່ສາທາລະນະດ້ວຍການນໍາໃຊ້ອຸປະກອນຄອມພິວເຕີ ແລະ ອຸປະກອນສື່ສານອື່ນ.
ມາດຕາ 4 (ປັບປຸງ) ນະໂຍບາຍຂອງລັດກ່ຽວກັບວຽກງານສື່ມວນຊົນ
ລັດສົ່ງເສີມ ແລະ ພັດທະນາວຽກງານສື່ມວນຊົນຂອງລັດ ໃຫ້ມີການຂະຫຍາຍຕົວຢ່າງກວ້າງຂວາງ, ມີຄວາມເຂັ້ມແຂງ ແລະ ມີຄຸນນະພາບ ດ້ວຍການປະກອບບຸກຄະລາກອນ, ສະໜອງງົບປະມານ, ພາຫະນະ, ອຸປະກອນເຕັກນິກ, ເຕັກໂນໂລຊີ ທີ່ທັນສະໄໝ.
ລັດ ສົ່ງເສີມ, ຊຸກຍູ້ ໃຫ້ອົງການສື່ມວນຊົນທຸກພາກສ່ວນເປັນເຈົ້າການ ສ້າງຄວາມເຂັ້ມແຂງດ້ານວິຊາການ, ກຸ້ມຕົນເອງດ້ານການເງິນ ແລະ ອໍານວຍຄວາມສະດວກໃຫ້ແກ່ ການຜະລິດ, ການກະຈາຍ ແລະ ການຈໍາໜ່າຍຜະລິດຕະພັນສື່ມວນຊົນ ທີ່ຖືກຕ້ອງຕາມກົດໝາຍ.
ລັດ ຊຸກຍູ້ ແລະ ເປີດກວ້າງໃຫ້ບຸກຄົນ, ນິຕິບຸກຄົນ ແລະ ການຈັດຕັ້ງ ທັງພາຍໃນ ແລະ ຕ່າງປະເທດມີສ່ວນຮ່ວມ ແລະ ລົງທຶນ ເຂົ້າໃນການພັດທະນາວຽກງານສື່ມວນຊົນ ຕາມກົດໝາຍ ແລະ ລະບຽບການ.
ມາດຕາ 5 (ໃໝ່) ຫຼັກການເຄື່ອນໄຫວວຽກງານສື່ມວນຊົນ
ການເຄື່ອນໄຫວວຽກງານສື່ມວນຊົນ ໃຫ້ປະຕິບັດຕາມຫຼັກການດັ່ງນີ້:
- ຮັບປະກັນການເປັນກະບອກສຽງຂອງການຈັດຕັ້ງ ພັກ, ລັດ ແລະ ສັງຄົມ ໂດຍສອດຄ່ອງກັບແນວທາງນະໂຍບາຍ, ກົດໝາຍ ແລະ ລະບຽບການ.
- ຮັບປະກັນລັກສະນະຂອງສື່ມວນຊົນ.
- ຮັບປະກັນໃຫ້ພົນລະເມືອງລາວ ໄດ້ປະຕິບັດສິດເສລີພາບ ແລະ ພັນທະຂອງຕົນດ້ານສື່ມວນຊົນ, ປົກປ້ອງຜູ້ສະໜອງຂໍ້ມູນ ຂ່າວສານ, ປະກອບຄໍາເຫັນ, ສະແດງທັດສະນະຕໍານິຕິຊົມ ທີ່ບໍ່ຂັດກັບກົດໝາຍ ແລະ ລະບຽບການ.
ມາດຕາ 6 (ໃໝ່) ການປົກປ້ອງ
ບຸກຄົນ, ນິຕິບຸກຄົນ ແລະ ການຈັດຕັ້ງ ລວມທັງບຸກຄະລາກອນສື່ມວນຊົນ, ຜູ້ລາຍງານ, ຜູ້ໃຫ້ຂໍ້ມູນ, ຜູ້ຊ່ຽວຊານ ແລະ ຜູ້ເຂົ້າຮ່ວມອື່ນ ທີ່ເຄື່ອນໄຫວກ່ຽວກັບວຽກງານສື່ສານມວນຊົນ ໄດ້ຮັບການປົກປ້ອງ ຕາມກົດໝາຍ ຈາກການແກ້ແຄ້ນ, ຂົ່ມຂູ່ຕໍ່ຊີວິດ, ສຸຂະພາບ, ອິດສະລະພາບ, ກຽດສັກສີ, ຊື່ສຽງ ຊັບສິນ ຂອງຕົນ.
ມາດຕາ 7 (ໃໝ່) ຂອບເຂດການນໍາໃຊ້ກົດໝາຍ
ກົດໝາຍສະບັບນີ້ ນໍາໃຊ້ສໍາລັບ ບຸກຄົນ, ນິຕິບຸກຄົນ ແລະ ການຈັດຕັ້ງ ທັງພາຍໃນ ແລະ ຕ່າງປະເທດທີ່ເຄື່ອນໄຫວວຽກງານສື່ມວນຊົນຢູ່ດິນແດນຂອງ ສປປ ລາວ.
ມາດຕາ 8 (ປັບປຸງ) ການຮ່ວມມືສາກົນ
ລັດ ສົ່ງເສີມ ການພົວພັນຮ່ວມມືດ້ານສື່ມວນຊົນກັບຕ່າງປະເທດ, ພາກພື້ນ ແລະ ສາກົນ ດ້ວຍການຊຸກຍູ້ການເຄື່ອນໄຫວດ້ານວິຊາການ, ການແລະປ່ຽນບົດຮຽນ, ຂໍ້ມູນ ຂ່າວສານ, ວິທະຍາສາດ, ເຕັກໂນໂລຊີ, ການຝຶກອົບຮົມ, ສໍາມະນາ, ການຍົກລະດັບຄວາມຮູ້ດ້ານວິຊາການ ເພື່ອເຮັດໃຫ້ວຽກງານສື່ມວນຊົນ ມີຄຸນນະພາບ ແລະ ທັນສະໄໝ ບົນພື້ນຖານການເຄົາລົບ ເອກະລາດ, ອໍານາດອະທິປະໄຕ ເຊິ່ງກັນ ແລະ ກັນ, ຕ່າງຝ່າຍຕ່າໄດ້ຮັບຜົນປະໂຫຍດ, ປະຕິບັດສັນຍາສາກົນ ແລະ ສົນທິສັນຍາ ທີ່ ສປປ ລາວ ເປັນພາຄີ.
ພາກທີ II
ສິດເສລີພາບຂອງພົນລະເມືອງລາວ ດ້ານສື່ມວນຊົນ
ມາດຕາ 9 (ປັບປຸງ) ສິດເສລີພາບຂອງພົນລະເມືອງລາວດ້ານສື່ມວນຊົນ
ພົນລະເມືອງລາວ ມີສິດເສລີພາບດ້ານສື່ມວນຊົນ ໂດຍສະແດງອອກດ້ວຍການປະກອບຄໍາເຫັນ, ໃຫ້ທັດສະນະ ແລະ ສາມາດເຂົ້າເຖິງ ຂໍ້ມູນ ຂ່າວສານ ທັງພາຍໃນ ແລະ ຕ່າງປະເທດ ກ່ຽວກັບສະພາບການ, ສາລະຄວາມຮູ້, ສາລະບັນເທີງ ແລະ ບັນຫາອື່ນ ທີ່ບໍ່ຂັດກັບກົດໝາຍ ແລະ ລະບຽບການ ເຊິ່ງເປັນປະໂຫຍດໃຫ້ແກ່ປະເທດຊາດ ແລະ ປະຊາຊົນລາວບັນດາເພົາ.
ມາດຕາ 10 (ປັບປຸງ) ສິດເສລີພາບຂອງພົນລະເມືອງລາວ ໃນການປະກອບຄໍາເຫັນ
ພົນລະເມືອງລາວ ມີສິດເສລີພາບໃນການປະກອບຄໍາເຫັນຜ່ານສື່ມວນຊົນ ກ່ຽວກັບ:
- ການສ້າງ ແລະ ຈັດຕັ້ງປະຕິບັດ ແນວທາງນະໂຍບາຍຂອງພັກ, ລັດຖະທໍາມະນູນ, ກົດໝາຍ ແລະ ລະບຽບການຂອງລັດ, ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ;
- ທັດສະນະຕໍ່ສະພາບການພາຍໃນ ແລະ ຕ່າງປະເທດ;
- ການຕໍານິຕິຊົມແບບສ້າງສັນຕໍ່ ບຸກຄົນ,ນິຕິບຸກຄົນ ແລະ ການຈັດຕ້ງ.
ມາດຕາ 11 ສິດເສລີພາບຂອງພົນລະເມືອງລາວ ກ່ຽວກັບຂໍ້ມູນ ຂ່າວສານ
ພົນລະເມືອງລາວ ມີສິດເສລີພາບ ກ່ຽວກັບຂໍ້ມູນ ຂ່າວສານຜານສື່ມວນຊົນ ດັ່ງນີ້:
- ເຂົ້າເຖິງ ແລະ ໄດ້ຮັບຂໍ້ມູນ ຂ່າວສານ ກ່ຽວກັບສະພາບການພາຍໃນ ແລະ ຕ່າງປະເທດ, ສາລະຄວາມຮູ້, ສາລະບັນເທີງ ແລະ ອື່ນໆ;
- ສະໜອງຂໍ້ມູນ ຂ່າວສານໃຫ້ສື່ມວນຊົນຢ່າງຖືກຕ້ອງ, ຊັດເຈນ, ທັນການ ແລະ ຮັບຜິດຊອບຕໍ່ໜ້າກົດໝາຍ ກ່ຽວກັບເນື້ອໃນຂໍ້ມູນ ຂ່າວສານນັ້ນ.
ມາດຕາ 12 (ປັບປຸງ) ການນໍາໃຊ້ສິດເສລີພາບຂອງພົນລະເມືອງລາວ
ພົນລະເມືອງລາວ ນໍາໃຊ້ສິດເສລີພາບຂອງຕົນຜ່ານສືາມວນຊົນ ດ້ວຍການລົງທຶນ ຫຼື ກະຈາຍຂາວ, ບົດ, ຄໍາເຫັນ, ຄໍາສໍາພາດ, ກະຈາຍສຽງ, ກະຈາຍພາບ, ຕອບຂໍ້ສະເໜີ, ຂໍ້ຂ້ອງໃຈຂອງຕົນໂດຍສື່ມວນຊົນເອງ ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ກ່ຽວຂ້ອງຕາມກົດໝາຍ ແລະ ລະບຽບການໃນກໍລະນີທີ່ບໍ່ສາມາດລົງພິມກະຈາຍ ຫຼື ຕອບໄດ້ນັ້ນ ສື່ມວນຊົນຕ້ອງແຈ້ງເຫດຜົນໃຫ້ພົນລະເມືອງຮັບຊາບຢ່າງເປັນທາງການ.
ພາກທີ III
ປະເພດ ແລະ ລັກສະນະຂອງສື່ມວນຊົນ
ໝວດທີ 1
ປະເພດຂອງສື່ມວນຊົນ
ມາດຕາ 13 (ປັບປຸງ) ປະເພດຂອງສື່ມວນຊົນ
ສື່ມວນຊົນ ມີ ສອງ ປະເພດຄື:
- ສື່ສິ່ງພິມ;
- ສື່ເອເລັກໂຕຣນິກ;
ສື່ມວນຊົນທັງສອງປະເພດນີ້ ສາມາດເຜີຍແຜ່ເປັນພາສາລາວ, ບັນດາຊົນເຜົາ ຫຼື ພາສາຕ່າງປະເທດ.
ມາດຕາ 14 ສື່ສິ່ງພິມ
ສື່ສິ່ງພິມ ແມ່ນ ພາຫະນະໂຄສະນາ ທີ່ເປັນແຜ່ນເຈ້ຍ ຊຶ່ງບັນຈຸຂໍ້ມູນ ຂ່າວສານດ້ວຍ ຕົວໜັງສື ຫຼື ຮູບພາບໂດຍມີຊື່ສະເພາະ.
ສື່ສິ່ງພິມອາດຈໍາໜ່າຍເປັນ ລາຍວັນ ຫຼື ເປັນໄລຍະ ເຊິ່ງປະກອບດ້ວຍ ໜັງສືພິມ, ໃບຂ່າວສານ, ຈົດໝາຍເຫດ.
ມາດຕາ 15 (ປັບປຸງ) ສື່ເອເລັກໂຕນິກ
ສື່ເອເລັກໂຕຣນິກ ແມ່ນ ພາຫະນະໂຄສະນາດ້ວຍການສ້າງເປັນລາຍການ ວະທະຍຸ, ໂທລະພາບ, ໂທລະໂຄ່ງ ແລະ ສື່ແບບໃໝ່ ຫຼື ລາຍການອິນເຕີເນັດປະເພດຕ່າງໆ ຊຶ່ງກະຈາຍອອກຜ່ານເຄື່ອງສົ່ງທາງສາຍ, ທາງອາກາດ ຫຼື ຄື້ນຄວາມຖີ່.
ໝວດທີ 2
ລັກສະນະຂອງສື່ມວນຊົນ
ມາດຕາ 16 ລັກສະນະຂອງສື່ມວນຊົນ
ສື່ມວນຊົນມີລັກສະນະຕົ້ນຕໍ ດັ່ງນີ້:
- ລັກສະນະຕົວຈິງ;
- ລັກສະນະສຶກສາອົບຮົມ;
- ລັກສະນະແນະນຳ;
- ລັກສະນະຕໍ່ສູ້.
ມາດຕາ 17 ລັກສະນະຕົວຈິງ
ເນື້ອໃນ ແລະ ຮູບການ ຂອງສື່ມວນຊົນທຸກປະເພດ ຕ້ອງພາວະວິໄສ, ຖືກຕ້ອງຕາມຄວາມເປັນຈິງ, ຊັດເຈນ, ວ່ອງໄວທັນການ ແລະ ສອດຄ່ອງກັບສິດຜົນປະໂຫຍດຂອງຊາດ ແລະ ປະຊາຊົນ.
ມາດຕາ 18 ລັກສະນະສຶກສາອົບຮົມ
ເນື້ອໃນ ແລະ ຮູບການ ຂອງສື່ມວນຊົນທຸກປະເພດ ຕ້ອງແນໃສ່ສຶກສາອົບຮົບ, ໂຄສະນາ, ເຜີຍແຜ່ແນວທາງນະໂຍບາຍຂອງພັກ, ກົດໝາຍ ແລະ ລະບຽບການຂອງລັດ, ຄວາມຮູ້ດ້ານຕ່າງໆ, ສົ່ງເສີມວຽກດີຄົນເດັ່ນ, ປຸກລະດົມນ້ຳໃຈຮັກຊາດ,ເຕົ້າໂຮມຄວາມສາມັກຄີເປັນປຶກແຜ່ນຂອງທົ່ວປວງຊົນ, ເສີມຂະຫຍາຍມູນເຊື້ອອັນດີງາມຂອງຊາດ ໃນການປົກປັກຮັກສາ ແລະ ສ້າງສາພັດທະນາປະເທດຊາດ.
ມາດຕາ 19 (ປັບປຸງ) ລັກສະນະແນະນຳ
ເນື້ອໃນ ແລະ ຮູບການ ຂອງສື່ມວນຊົນທຸກປະເພດ ຕັ້ງແນໃສ່ປຸກລະດົມ ແລະ ແນະນຳມະຫາຊົນຈັດຕັ້ງປະຕິບັດແນວທາງນະໂຍບາຍຂອງພັກ, ກົດໝາຍຂອງລັດ, ແຜນພັດທະນາເສດຖະກິດ-ສັງຄົມ ພ້ອມທັງອະທິບາຍ, ໃຫ້ຄວາມກະຈ່າງແຈ້ງຢ່າງຖືກຕ້ອງຕໍ່ຫາງສຽງສັງຄົມ.
ມາດຕາ 20 (ປັບປຸງ) ລັກສະນະຕໍ່ສູ້
ເນື້ອໃນ ແລະ ຮູບການ ຂອງສື່ມວນຊົນທຸກປະເພດ ຕ້ອງປົກປ້ອງຄວາມຖືກຕ້ອງຂອງແນວທາງນະໂຍບາຍຂອງພັກ, ກົດໝາຍ ແລະ ລະບຽບການຂອງລັດ, ຕຳນິວິຈານ ການລະເມີດກົດໝາຍ ແລະ ລະບຽບການ, ປາກົດການຫຍໍ້ທໍ້ໃນສັງຄົມ ແລະ ຕອບໂຕ້ຢ່າງທັນການຕໍ່ຖ້ອຍທຳນອງທີ່ບິດເບື້ອນ, ໃສ່ຮ້າຍປ້າຍສີ ທີ່ສ້າງຄວາມເສື່ອມເສີຍຕໍ່ກຽດສັກສີ, ຜົນປະໂຫຍດຂອງຊາດ ແລະ ປະຊາຊົນ.
ພາກທີ IV
ການຈັດຕັ້ງ ແລະ ການເຄື່ອນໄຫວສື່ມວນຊົນ
ໝວດທີ 1
ການຈັດຕັ້ງ ຂອງສື່ມວນຊົນ
ມາດຕາ 21 ການຈັດຕັ້ງ
ການຈັດຕັ້ງຂອງສື່ມວນຊົນ ປະກອບດ້ວຍ:
- ອົງການເຈົ້າຂອງສື່ມວນຊົນ;
- ອົງການສື່ມວນຊົນ;
- ສະມາຄົມນັກຂ່າວ ແຫ່ງ ສປປ ລາວ.
ມາດຕາ 22 (ປັບປຸງ) ອົງການເຈົ້າຂອງສື່ມວນຊົນ
ອົງການເຈົ້າຂອງສື່ມວນຊົນ ແມ່ນອົງການ ຈັດຕັ້ງພັກ , ລັດ, ແນວລາວສ້າງຊາດ, ອົງການຈັດຕັ້ງມະຫາຊົນ, ອົງການຈັດຕັ້ງສັງຄົມ, ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ໄດ້ຮັບອະນຸຍາດໃຫ້ສ້າງຕັ້ງອົງການສື່ມວນຊົນ ແລະ ດຳເນີນວງກງານສື່ມວນຊົນ ຕາມກົດໝາຍ ແລະ ລະບຽບການໂດຍມີຫົວໜ້າ ແລະ ຮອງຫົວໜ້າຂອງອົງການເຈົ້າຂອງສື່ມວນຊົນ ຊື່ງແມ່ນຫົວໜ້າອົງການ ຫຼື ຜູ້ທີ່ໄດ້ຮັບການແຕ່ງຕັ້ງ ໃຫ້ຊີ້ນຳ ແລະ ຄຸ້ມຄອງອົງການສື່ມວນຊົນດັ່ງກ່າວ.
ມາດຕາ 23 (ປັບປຸງ) ສິດ ແລະ ໜ້າທີ່ຂອງອົງການເຈົ້າຂອງສື່ມວນຊົນ
ອົງການເຈົ້າຂອງສື່ມວນຊົນ ມີສິດຕົ້ນຕໍ ດັ່ງນີ້:
- ສະເໜີສ້າງຕັ້ງ ແລະ ຍຸບເລີກ ອົງການສື່ມວນຊົນຂອງຕົນ;
- ຕົກລົງທິດທາງ, ແຜນການ ແລະ ການເຄື່ອນໄຫວຂອງອົງການສື່ມວນຊົນຂອງຕົນ;
- ແຕ່ງຕັ້ງ ຫຼື ປົກຕຳແໜ່ງ ຫົວໜ້າ ຫຼື ຮອງຫົວໜ້າອົງການສື່ມວນຊົນຂອງຕົນ ຕາມລະບຽບການ;
- ຕິດຕາມ, ກວດກາເຄື່ອນໄຫວຂອງອົງການສື່ມວນຊົນຂອງຕົນ;
- ເຂົ້າຮ່ວມກອງປະຊຸມ ກ່ຽວກັບວຽກງານສື່ມວນຊົນຢູ່ພາຍໃນ ແລະ ຕ່າງປະເທດ ຕາມການມອບໝາຍ;
- ພົວພັນ ແລະ ຮ່ວມມືສາກົນ ດ້ານສື່ມວນຊົນ ຕາມກົດໝາຍ ແລະ ລະບຽບການ.
ອົງການເຈົ້າຂອງສື່ມວນຊົນມີ ໜ້າທີ່ຕົ້ນຕໍ ດັ່ງນີ້:
- ກໍານົດທິດທາງ ຈຸດປະສົງ, ເປົ້າໝາຍຮັບໃຊ້, ຂອບເຂດການພິມ ແລະ ຈຳໜ່າຍສື່ສີ່ງພິມ ຫຼື ຄວາມແຮງຂອງເຄື່ອງສົ່ງ, ຄື້ນຄວາມຖີ່, ເວລາຈາຍ, ຂອບເຂດການກະຈາຍພາບ, ສຽງແລະພາສາ;
- ຈັດຕັ້ງກົງຈັກຊ່ວຍວຽກ, ສ້າງບຸກຄະລາກອນ ແລະ ຊື້ນຳ, ຄຸ້ມຄອງ, ກວດກາການປະຕິບັດອຸດົມການ, ຈຸດປະສົງ,ພາລະບົດບາດ, ສິດ, ໜ້າທີ່,ທິດທາງ, ແຜນການແລະການເຄື່ອນໄຫວຂອງອົງການສື່ມວນຊົນຂອງຕນ;
- ສ້າງເງື່ອນໄຂ ແລະ ອຳນວຍຄວາມສະດວກ ໃຫ້ແກ່ການເຄື່ອນໄຫວຂອງອົງການສື່ມວນຊົນຂອງຕົນ
- ຮັບຜິດຊອບຕໍ່ກົດໝາຍ ຕາມພາລະບົດບາດ, ສິດ ແລະ ໜ້າທີ່ຂອງຕົນ ໃນວຽກງານສື່ມວນຊົນ, ຮັບຜິດຊອບແກ້ໄຂ ການຕຳນິຕິຊົມ,ກ່າວຟ້ອງຕໍ່ອົງການສື່ມວນຊົນ ແລະ ບຸກຄະລາກອນສື່ມວນຊົນ ທີ່ຢູ່ພາຍໃຕ້ການຄຸ້ມຄອງຂອງຕົນ.
ມາດຕາ 24 ອົງການສື່ມວນຊົນ
ອົງການສື່ມວນຊົນ ແມ່ນ ການຈັດຕັ້ງໜຶ່ງຂອງອົງການເຈົ້າຂອງສື່ມວນຊົນ ທີ່ເຄື່ອນໄຫວວຽກດ້ານສື່ມວນຊົນປະເພດໃດໜຶ່ງ ຕາມທີ່ໄດ້ກໍານົດໄວ້ໃນມາດຕາ 13 ຂອງກົດໝາຍສະບັບນີ້.
ມາດຕາ 25 (ປັບປຸງ) ສິດ ແລະ ໜ້າທີ່ຂອງອົງການສື່ມວນຊົນ
ອົງການສື່ມວນຊົນ ມີສິດຕົ້ນຕໍ ດັ່ງນີ້:
- ເຜີຍຂໍ້ມູນ ຂ່າວສານຢ່າງຖືກຕ້ອງກັບຄວາມເປັນຈິງ ກ່ຽວກັບສະພາບການພາຍໃນ ແລະ ຕ່າງປະເທດທີ່ມີປະໂຫຍດຕໍ່ຊາດ ແລະ ປະຊາຊົນ.
- ຕຳນິຕິຊົມແບບສ້າງສັນຕໍ່ການກະທຳທີ່ເປັນການລະເມີດກົດໝາຍ ແລະ ລະບຽບການ, ປາກົດການຫຍໍ້ທໍ໊ໃນສັງຄົມ ເຊັ່ນ ການສໍ້ລາດບັງຫຼວງ, ຢາເສບຕິດ;
- ຕອບໂຕ້ທຸກຖ້ອຍທຳນອງໂຄສະນາໃສ່ຮ້າຍປ້າຍສີ, ບິດເບື້ອນຄວາມຈີ ທີ່ສ້າງຄວາມເສື່ອມເສຍໃຫ້ແກ່ຜົນປະໂຫຍດຂອງຊາດ ແລະ ປະຊາຊົນ;
- ພັດທະນາຕົນໃຫ້ມີຄວາມເຂັ້ມແຂງ, ກ້າວໜ້າ ແລະ ທັນສະໄໝ;
- ພິຈາລະນາເນື້ອໃນ, ຮູບການຂອງຜະລິດຕະພັນສື່ມວນຊົນຂອງຕົນ;
- ສະເໜີ, ປະກອບຄຳເຫັນຕໍ່ຂັ້ນເທິງ ກ່ຽວກັບການເຄື່ອນໄຫວວຽກງານສື່ມວນຊົນຂອງຕົນ;
- ໄດ້ຮັບການປົກປ້ອງຈາກກົດມາຍ ໃນການເຄື່ອນໄຫວວຽກງານທີ່ຖືກຕ້ອງຂອງຕົນ;
- ສ້າງບັນຍາກາດ,ຄວາມເບີດບານມ່ວນຊື່ນ ໃຫ້ແກ່ສັງຄົມ;
- ເຂົ້າຮ່ວມກອງປະຊຸມກ່ຽວກັບວຽກງານສື່ມວນຊົນຢູ່ພາຍໃນ ແລະ ຕ່າງປະເທດ ຕາມການມອບໝາຍ;
- ພົວພັນ ແລະ ຮ່ວມມືກັບສາກົນ ຕາມການເຫັນດີຂອງອົງການເຈົ້າຂອງສື່ມວນຊົນ ແລະ ຕາມກົດໝາຍ ແລະ ລະບຽບການ.
ອົງການສື່ມວນຊົນມີໜ້າທີ່ຕົ້ນຕໍ ດັ່ງນີ້:
- ໂຄສະນາ, ເຜີຍແຜ່, ປົກປ້ອງແນວທາງ, ແຜນນະໂຍບາຍ, ນະໂຍບາຍ, ກົດໝາຍ ແລະ ລະບຽບການ,ປະກອບສ່ວນຮັກສາສະຖຽນລະພາບທາງດ້ານການເມື້ອງ, ເສດຖະກິດ ແລະ ສັງຄົມ, ປົກປັກຮັກສາ ແລະ ເສີມຂະຫຍາຍມູນເຊື້ອຮັກຊາດ, ຄວາມສາມັກຄີເປັນປຶກແຜນຂອງວົງຂະນະຍາດແຫ່ງຊາດ;
- ຜະລິດ ແລະ ເຜີຍແຜ່ ຂໍ້ມູນ ຂ່າວສານທາງດ້ານວິທະຍາສາດ ເຕັກນິກ, ເຕັກໂນໂລຊີ,ໃຫ້ສາລະຄວາມຮູ້, ສາລະບັນເທີງ, ສົ່ງເສີມການສຶກສາ ເພື່ອຍົກລະດັບຄວາມຮູ້ປະຊາຊົນ, ເສີມຂະຫຍາຍວັດທະນະທຳ, ຮີດຄອງປະເພນີອັນດີງານຂອງປະຊາຊົນລາວບັນດາເຜົ່າ, ສົ່ງເສີມບົດບາດຍິງ-ຊາຍ, ປົກປ້ອງສິດ ແລະ ຜົນປະ ໂຫຍດຂອງແມ່ຍິງ ແລະ ເດັກນ້ອຍ;
- ເຜີຍແຜ່ວຽກດີຄົນເດັ່ນ ແລະ ແນະນຳຫາງສຽງສັງຄົມ;
- ຮັກສາຄວາມຖືກຕ້ອງຂອງພາສາລາວ ແລະ ພາສາຊົນເຜົ່າຂອງ ສປປ ລາວ;
- ສົ່ງເສີມການພົວພັນ,ການຮ່ວມມື, ຄວາມເຂົ້າໃຈຊື່ງກັນ ແລະ ກັນ ລະຫວ່າງປະເທດເພື່ອນມິດ ແລະ ປະຊາຊາດ, ປະກອບສ່ວນເຂົ້າໃນພາລະກິດຕໍ່ສູ້ຂອງບັນດາປະຊາຊາດ ເພື່ອສັນຕິພາບ, ເອກະລາດແຫ່ງຊາດ, ປະຊາທິປະໄຕ ແລະ ຄວາມກ້າວໜ້າທາງສັງຄົມ;
- ດຳເນີດກິດຈະການ ການພິມ ແລະ ຈຳນ່າຍສື່ສິ່ງພີມ, ການກະຈາຍພາບ, ສຽງ ແລະ ພາສາ ຕາມທີ່ກໍານົດໄວ້ໃນໃບອະນຸຍາດສ້າງຕັ້ງ;
- ຄຸ້ມຄອງກົງຈັກຊ່ວຍວຽກ, ສ້າງບຸກຄະລາກອນ ແລະ ປະຕິບັດພາລະບົດບາດ, ສິດ, ໜ້າທີ່, , ທິດທາງ, ແຜນການເຄື່ອນໄຫວຂອງຕົນ, ລາຍງານຜົນການເຄື່ອງໄຫວວຽກງານໃຫ້ອົງການເຈົ້າຂອງສື່ມວນຊົນ ແລະ ອົງການຄຸ້ມຄອງສື່ມວນຊົນຢ່າງເປັນປົກກະຕິ;
- ຮັບປະກັນການປະຕິບັດເສລີພາບ ດ້ານສື່ມວນຊົນຂອງຜົນລະເມື້ອງລາວ;
- ຮັບຜິດຊອບຕໍ່ກົດໝາຍ ແລະ ຕໍ່ອົງການເຈົ້າຂອງສື່ມວນຊົນ ກ່ຽວກັບການເຄຶ່ອນໄຫວວຽກງານຂອງຕົນ.
ມາດຕາ 26 (ປັບປຸງ) ສະມາຄົມນັກຂ່າວ ແຫ່ງ ສປປ ລາວ
ສະມາຄົມນັກຂ່າວ ແຫ່ງ ສປປ ລາວ ແມ່ນ ອົງການຈັດຕັ້ງການເມື້ອງ, ສັງຄົມ, ວິຊາຊີບ ຂອງຜູ້ເຮັດວຽກງານດ້ານສື່ມວນຊົນ ຊື່ງຖືກສ້າງຕົ້ັ້ ແລະ ເຄື່ອງໄຫວຕາມກົດໝາຍ, ມີພາລະບົດບາດ, ສຶກສາອົບຮົມ, ເຕົ້າໂຮມຄວາມສາມັກຄີ ແລະ ປົກປ້ອງສິດຜົນປະໂຫຍດອັນຊອບທຳຂອງສະມາຊິກຕົນ ແລະ ຜູ້ເຮັດວຽກງານດ້ານສື່ມວນຊົນອື່ນ, ເຂົ້າຮ່ວມໃນການປະຕິບັດແນວທາງ ນະໂຍບາຍພັກ, ກົດໝາຍ ແລະ ລະບຽບການຂອງລັດ ແລະ ນະໂຍບາຍສື່ມວນຊົນ.
ມາດຕາ 27 (ໃໝ່) ສິດ ແລະ ໜ້າທີ່ຂອງສະມາຄົມນັກຂ່າວ ແຫ່ງ ສປປ ລາວ
ສະມາຄົມນັກຂ່າວແຫ່ງ ສປປ ລາວ ມີ ສິດ ແລະ ໜ້າທີ່ ດັ່ງນີ້:
- ເຂົ້າຮ່ວມສ້າງ, ປະຕິບັດ ແລະ ກວດກາການປະຕິບັດແນວທາງ ນະໂຍບາຍ ແລະ ກົດໝາຍ ກ່ຽວກັບວຽກງານຖະແຫຼງຂ່າວ ແລະ ສື່ມວນຊົນ;
- ກໍານົດ ແລະ ກວດກາການປະຕິບັດຈັນຍາບັນຂອງນັກຂ່າວ ແລະ ສົມທົບກັບອົງການຄຸ້ມຄອງສື່ມວນຊົນ, ເຜີຍແຜ່ ແລະ ກວດກາການປະຕິບັດກົດໝາຍ ແລະ ລະບຽບການກ່ຽວກັບສື່ມວນຊົນ;
- ສົມທົບກັບອົງການຈັດຕັ້ງຂອງ ພັກ, ລັດ, ອົງການຈັດຕັ້ງມະຫາຊົນ ແລະ ອົງການສື່ມວນຊົນເພື່ອບຳລຸງສ້າງດ້ານ ການເມື້ອງແນວຄິດ,ຄຸນສົມບັດ ແລະ ຄວາມສາມາດທາງດ້ານວິຊາຊີບ ໃຫ້ແກ່ນັກຂ່າວ ແລະ ບຸກຄະລາກອນສື່ມວນຊົນ;
- ສ້າງລາຍຮັບດ້ວຍການເກັບຄ່າສະມາຊິກ, ການຈັດກິດຈະກໍາ ແລະ ການໃຫ້ບໍລິການ ກ່ຽວກັບວຽກງານສື່ມວນຊົນ;
- ປົກປ້ອງສິດ ແລະ ຜົນປະໂຫຍດອັນຊອບທຳຂອງສະມາຊິກຕົນ ໃນການເຄື່ອນໄຫວວຽກງານສື່ມວນຊົນ;
- ປະຕິບັດນະໂຍບາຍຍ້ອງຍໍ ດ້ວຍຮູບການຕ່າງໆໃຫ້ແກ່ນັກຂ່າວ, ບຸກຂະລາກອນສື່ມວນຊົນອື່ນ ທີ່ມີຜົນງານດີເດັ່ນຕໍ່ປະເທດຊາດ, ສັງຄົມ ຫຼື ສາກົນ;
- ພົວພັນຮ່ວມມື ກັບສະມາຄົມນັກຂ່າວຂອງຕ່າງປະເທດ ໂດຍສອດຄ່ອງກັບກົດໝາຍ ແລະ ລະບຽບການຂອງ ສປປ ລາວ;
- ນຳໃຊ້ສິດ ແລະ ແຕິບັດໜ້າທີ່ອື່ນ ຕາມທີ່ໄດ້ກໍານົດໄວ້ໃນກົດໝາຍ ແລະ ລະບຽບການ.
ໝວດທີ 2
ບຸກຄະລາກອນຂອງສື່ມວນຊົນ
ມາດຕາ 28 (ໃໝ່) ບຸກຄະລາກອນ
ບຸກຄະລາກອນສື່ມວນຊົນ ປະກອບດ້ວຍ ຫົວໜ້າ ແລະ ຮອງຫົວໜ້າ ອົງການເຈົ້າຂອງສື່ມວນຊົນ,ຫົວໜ້າ ແລະ ຮອງຫົວໜ້າ ອົງການສື່ມວນຊົນ, ນັກຂ່າວ, ນັກວິຊາການດ້ານສື່ມວນຊົນ ແລະ ຜູ້ຮ່ວມງານ.
ມາດຕາ 29 (ໃໝ່) ເງື່ອນໄຂ ຫົວໜ້າ ແລະ ຮອງຫົວໜ້າ ອົງການເຈົ້າຂອງສື່ມວນຊົນ
ຫົວໜ້າ ແລະ ຮອງຫົວໜ້າ ອົງການເຈົ້າຂອງສື່ມວນຊົນ ມີເງື່ອນໄຂ ດັ່ງນີ້:
- ມີພູມລຳເນົາຖາວອນຢູ່ ສປປ ລາວ;
- ຖືສັນຊາດລາວ ແລະ ມີອາຍຸ ຊາວສາມປີຂື້ນໄປ;
- ມີປະກາສະນີຍະບັດໃນສາຂາວີຊາສະເພາະໃດໜຶ່ງ ໃນລະດັບການສຶກສາຊັ້ນສູງຂື້ນໄປ, ມີປະສົບການດ້ານສື່ມວນຊົນ, ມີຄວາມສາມາດຊີ້ນຳ, ຄຸ້ມຄອງ ແລະ ກວດກາອົງການສື່ມວນຊົນ;
- ມີຄຸນສົມບັດສິນທຳປະຕິວັດ, ຄຸນທາດການເມື້ອງໜັກແໜ້ນ ແລະ ມີຈັນຍາບັນຂ່າວ;
- ຮູ້ພາສາຕ່າງປະເທດໃດໜຶ່ງ;
- ມີສຸຂະພາບດີ;
- ບໍ່ເປັນຫົວໜ້າ ແລະ ຮອງຫົວໜ້າ ອົງການສື່ມວນຊົນ ທີ່ຂື້ນກັບຕົນ ຫຼື ອົງການສື່ມວນຊົນອື່ນ;
- ມີເງື່ອນໄຂອື່ນ ທີ່ອົງການເຈົ້າຂອງສື່ມວນຊົນເຫົນວ່າມີຄວາມຈຳເປັນ.
ມາດຕາ 30 (ໃໝ່) ສິດ ແລະ ໜ້າທີ່ຂອງຫົວໜ້າ ແລະ ຮອງຫົວໜ້າເຈົ້າຂອງສື່ມວນຊົນ
ຫົວໜ້າອົງການເຈົ້າຂອງສື່ມວນຊົນ ມີ ສິດ ແລະ ໜ້າທີ່ ດັ່ງນີ້:
- ຊີ້ນຳ,ຄຸ້ມຄອງ ແລະ ກວດກາ ການເຄື່ອນໄຫວຂອງອົງການສື່ມວນຊົນທີ່ຂື້ນກັບຕົນ;
- ມີຄວາມຮັບຜິດຊອບ ຕໍ່ອົງການເຈົ້າຂອງສື່ມວນຊົນ ແລະ ກະຊວງທະແຫຼງຂ່າວ,ວັດທະນະທຳ ແລະ ທ່ອງທ່ຽວ ກ່ຽວກັບການເຄື່ອນໄຫວຂອງອົງການສື່ມວນຊົນທີ່ຕົນຮັບຜິດຊອບ;
- ມີສິດ ແລະ ໜ້າທີ່ ໃນການແຕ່ງຕັ້ງ, ຍົກຍ້າຍ ຫຼື ປົດຕຳແໜ່ງ ຫົວໜ້າ ແລະ ຮອງຫົວໜ້າ ອົງການສື່ມວນຊົນ ໂດຍປະສານສົມທົບກັບອົງການຄຸ້ມຄອງສື່ມວນຊົນທີ່ກ່ຽວຂ້ອງ ຫຼື ເປັນຜູ້ສະເໜີໃຫ້ອົງການທີ່ມີສິດ ພິຈາລະນາຕາມລະບຽບການ;
- ນຳໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກໍານົດໄວ້ໃນກົດໝາຍ ແລະ ລະບຽບການ.
ຮອງຫົວໜ້າອົງການເຈົ້າຂອງສື່ມວນຊົນ ມີສິດ ແລະ ໜ້າທີ່ ດັ່ງນີ້:
- ຊ່ວຍຫົວໜ້າ ໃນວຽກງານໃດໜຶ່ງ ແລະ ຮັກສາການແທນໃນເວລາຫົວໜ້າບໍ່ຢູ່ ຕາມການມອບໝາຍຂອງຫົວໜ້າ;
- ນຳໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກໍານົດໄວ້ໃນກົດໝາຍ ແລະ ລະບຽບການ.
ມາດຕາ 31 (ປັບປຸງ) ຫົວໜ້າ ແລະ ຮອງຫົວໜ້າ ອົງການສື່ມວນຊົນ
ຫົວໜ້າ ແລະ ຮອງຫົວໜ້າ ອົງການສື່ສານມວນຊົນໄດ້ກໍານົດຊື່ເອີ້ນຕຳແໜ່ງ ດັ່ງນີ້:
- ສື່ສິ່ງພີມເອີ້ນວ່າ: ຫົວໜ້າບັນນາທິການໃຫຍ່ ແລະ ຮອງຫົວໜ້າບັນນາທິການໃຫຍ່;
- ສື່ເອເລັກໂຕຣນິກ ລວມທັງ ສຳນັກຂ່າວສານປະເທດລາວ ເອີນວ່າ: ຜູ້ອຳນວຍການໃຫຍ່ ແລະ ຮອງຜູ້ອຳນວຍການໃຫຍ່.
ການແຕ່ງຕັ້ງຸ ຍົກຍ້າຍ ຫຼື ປົດຕຳແໜ່ງ ຫົວໜ້າ ແລະ ຮອງຫົວໜ້າ ອົງການສື່ມວນຊົນ ແມ່ນ ເຈົ້າຂອງອົງການສື່ມວນຊົນເປັນຜູ້ຕົກລົງ ໂດຍປະສານສົມທົບກັບການຄຸ້ມຄອງສື່ມວນຊົນທີ່ກ່ຽວຂ້ອງ ຫຼື ເປັນຜູ້ສະເໜີໃຫ້ອົງການທີ່ມີສິດພິຈາລະນາ ຕາມລະບຽບການ.
ມາດຕາ 32 (ປັບປຸງ) ເງື່ອນໄຂ ຫົວໜ້າ ແລະ ຮອງຫົວໜ້າ ອົງການສື່ມວນຊົນ
ຫົວໜ້າ ແລະ ຮອງຫົວໜ້າ ອົງການສື່ມວນຊົນ ມີເງື່ອນໄຂ ດັ່ງນີ້:
- ມີພູມລຳເນົາຖາວອນຢູ ສປປ ລາວ;
- ຖຶສັນຊາດລາວ ແລະ ມີອາຍຸ ຊາວສາມປີຂື້ນໄປ;
- ມີປະກາສະນີຍະບັດໃນສາຂາວິຊາສະເພາະໃດໜຶ່ງ ໃນລະດັບການສຶກສາຊັ້ນສູງຂື້ນໄປ, ມີປະສົບການດ້ານສື່ມວນຊົນ, ມີຄວາມສາມາດບໍລິຫານຂອງອົງການສື່ມວນຊົນ;
- ມີຄຸນສົມບັດສິນທຳປະຕິບັດ, ຄຸນທາດການເມື້ອງໜັກແໜ້ນ ແລະ ມີຈັນຍາບັນນັກຂ່າວ;
- ຮູ້ພາສາຕ່າງປະເທດໃດໜຶ່ງ;
- ມີສຸຂະພາບດີ;
- ບໍ່ເປັນຫົວໜ້າ ຫຼື ຮອງຫົວໜ້າອົງການສື່ມວນຊົນອື່ນ;
- ມີເງື່ອນໄຂອື່ນ ທີ່ອົງການເຈົ້າຂອງສື່ມວນຊົນເຫັນວ່າມີຄວາມຈຳເປັນ.
ມາດຕາ 33 (ປັບປຸງ) ສິດ ແລະ ໜ້າທີ່ ຂອງຫົວໜ້າ ແລະ ຮອງຫົວໜ້າອົງການສື່ສານມວນຊົນ
ຫົວໜ້າອົງການສື່ສານມວນຊົນ ມີ ສິດ ແລະ ໜ້າທີ່ ດັ່ງນີ້:
- ຊີ້ນຳ ແລະ ຄຸ້ມຄອງການເຄື່ອນໄຫວຂອງອົງການສື່ມວນຊົນຂອງຕົນ;
- ພິຈາລະນາອະນຸຍາດ ແລະ ກວດກາ ການລົງຂ່າວ໌ບົດ ໃນສື່ສິ່ງພິມ, ລາຍການກະຈາຍສຽງ, ໂທລະພາບ, ເບໄຊ ແລະ ສື່ແບບໃໜ່;
- ຄຸ້ມຄອງ, ບຳລຸງສ້າງບຸກຂະລາກອນ, ຄຸ້ມຄອງຊັບສິນ ແລະພື້ນຖານວັດຖຸເຕັກນິກ;
- ມີຄວາມຮັບຜິດຊອບຕໍ່ອົງການເຈົ້າຂອງສື່ມວນຊົນ ກ່ຽວກັບເນື້ອໃນ ແລະ ການເຄື່ອນໄຫວ ຂອງອົງການສື່ມວນຊົນທີ່ຕົນຮັບຜິດຊອບ;
- ນຳໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກໍານົດໄວ້ໃນກົດໜາຍລະບຽບການ.
ຮອງຫົວໜ້າອົງການສື່ມວນຊົນ ມີ ສິດ ແລະ ໜ້າທີ່ ດັ່ງນີ້:
- ຊ່ວຍຫົວໜ້າໃນງານວຽວໃດໜຶ່ງ ແລະ ຮັກສາການແທນໃນເວລາຫົວໜ້າບໍ່ຢູ່ ຕາມການມອບໝາຍຂອງຫົວໜ້າ;
- ນຳໃຊ້ສິດ ແລະ ປະຕິດບັດໜ້າທີ່ອື່ນ ຕາມທີ່ໄດ້ກໍານົດໄວ້ໃນກົດໜາຍ ແລະ ລະບຽບການ.
ມາດຕາ 34 (ປັບປຸງ) ເງື່ອນໄຂນັກຂ່າວ
ນັກຂ່າວມີເງື່ອນໄຂ ດັ່ງນີ້:
- ມີພູມລຳເນົາຖາວອນຢູ່ ສປປ ລາວ;
- ຖຶສັນຊາດລາວ ແລະ ມີອາຍຸແຕ່ ສິບແປດປີ ຂື້ນໄປ;
- ມີຈັນຍາບັນຂອງນັກຂ່ານຢ່າງຄົບຖ້ວນ;
- ມີປະກາສະນີຍະບັດໃນສາຂາວິຊາສະເພາະໃດໜຶ່ງ ໃນລະດັບການສືກສາຊັ້ນກາງຂື້ນໄປ ຫຼື ມີໃບຢັ້ງຢືນ, ມີຄວາມຮູ້, ມີປະສົບການ ແລະ ມີພອນສະຫວັນດ້ານສື່ມວນຊົນ;
- ຮູ້ພາສາຕ່າງປະເທດໃດໜຶ່ງ;
- ມີສຸຂະພາບດີ;
ມາດຕາ 35 (ປັບປຸງ) ສິດ ແລະ ໜ້າທີ່ ຂອງນັກຂ່າວ
ນັກຂ່າວ ມີ ສິດຕົ້ນຕໍ ດັ່ງນີ້:
- ໄດ້ຮັບບັດນັກຂ່ານ, ສັງກັດ ແລະ ເຄື່ອນໄຫວຢູ່ໃນອົງການສື່ມວນຊົນໃດໜຶ່ງ;
- ປະຕິບັດວຽກງານດ້ານການຂ່ານຢູ່ພາຍໃນ ແລະ ຕ່າງປະເທດ ຕາມການມອບໝາຍ;
- ພົວພັນ, ຮ່ວມມືກັບຜູ້ຮ່ວມງານຢ່າງເປັນປົກກະຕິ, ຊອກຮູ້, ເກັບກໍາ ແລະ ຮັບຂໍ໊ມູນ ຂ່າວສານໃນວຽກງານສື່ມວນຊົນ ຕາມກົດໝາຍ ແລະ ລະບຽບ;
- ໃຊ້ບັດນັກຂ່າວ ເພື່ອສະເໜີຊອກຮູ້, ຮັບການສະໜອງ ແລະ ນຳໃຊ້ຂໍ້ມູນ ຂ່າວສານຈາກການຈັດຕັ້ງ ແລະ ບຸກຄົນ ເພື່ອວຽກງານສື່ມວນຊົນ;
- ວິເຄາະ, ວິໄຈ, ຂຽນຂ່າວ,ບົດ, ຖ່າຍທຳຮູບພາບຕ່າງໆ, ສ້າງຜະລິດຕະພັນສື່ມວນຊົນທີ່ສ້າງສັນ ແລະ ມີຄຸນປະໂຫຍດ, ໃສ່ນາມປາກກາເປັນຊື່ຕົນເອງ ຫຼື ແຝງ;
- ໄດ້ຮັບການບຳລຸງ, ຍົກລະດັບດ້ານການເມື້ອງ, ວິຊາສະເພາະດ້ານສື່ມວນຊົນ, ຮັບນາມມະຍົດເງີນອຸດໜູນ ຫຼື ນະໂຍບາຍອື່ນ;
- ໄດ້ຮັບບູລິມະສິດໃນການເຄື່ອນໄຫວວຽກງານດ້ານສື່ມວນຊົນ ຕາມກົດໝາຍ ແລະ ລະບຽບການ;
- ໄດ້ຮັບການປົກປ້ອງຈາກກົດໜາຍ ໃນການເຄື່ອນໄຫວປະຕິບັດໜ້າທີ່ວິຊາສະເພາະຂອງຕົນທີ່ຖືກຕ້ອງ.
ນັກຂ່າວ ມີ ໜ້າທີ່ຕົ້ນຕໍ ດັ່ງນີ້:
- ຊອກຮູ້,ເກັບກໍາຂໍ້ມູນ ຂ່າວສານ ເພື່ອຂຽນເປັນຂ່າວ,ບົດ ແລະ ລາຍການ, ໂຄສະນາເຜີຍແຜ່ຜ່ານສື່ມວນຊົນ;
- ຂຽນ ຂ່າວ, ບົດ ຢ່າງຖືກຕ້ອງ,ຊັດເຈນ ກ່ຽວກັບສະພາບການພາຍໃນ ແລະ ຕ່າງປະເທດ ໂດຍສອດຄ່ອງກັບສິດຜົນປະໂຫຍດຂອງຊາດ ແລະ ສ່ອງແສງເຖິງຄວາມມຸ່ງມາດປາສະໜາອັນຊອບທຳຂອງປະຊາຊົນ;
- ເຜີຍແຜ່, ປົກປ້ອງແນວທາງ, ນະໂຍບາຍ, ກົດໝາຍ ແລະ ລະບຽບການ; ຂຸດຄົ້ນ, ສົ່ງເສີມປັດໄຈທີ່ຕັ້ງໜ້າ, ຕໍ່ສູ້ຕ້ານບັນດາແນວຄິດ ແລະ ການກະທຳທີ່ລະເມີດກົດໝາຍ ແລະ ລະບຽບການ; ຕອບໂຕ້ຖ້ອຍທຳນອງບິດເບີ້ອນ ແລະ ໃສ່ຮ້າຍປ້າຍສີທີ່ສ້າງຄວາມເສື່ອມເສຍໃຫ້ແກ່ກຽດສັກສີ, ຜົນປະໂຫຍດຂອງຊາດແລະປະຊາຊົນ;
- ຄົ້ນຄ້ວາ, ຮ່ຳຮຽນ, ຝຶກຝົນຫຼໍ່ຫຼອມຕົນເອງ ເພື່ອຍົກລະດັບທາງດ້ານການເມື້ອງ, ຄຸນສົມບັດ, ຈັນຍາບັນ, ວິຊາສະເພາະ, ພາສາຕ່າງປະເທດ ແລະ ອື່ນໆ;
- ແກ້ຂ່າວ ແລະ ຂໍໂທດຜ່າສື່ມວນຊົນໃນກໍລະນີທີ່ຂຽນຂ່ານຜິດພາດ ຫຼື ບໍ່ມີມູນຄວາມຈິງ;
- ຮັບການຕຳນິຕິຊົມຈາກສັງຄົມ, ຮັບຜິດຊອບຕໍ່່ກົດໝາຍ ແລະ ຕໍ່ອົງການສື່ມວນຊົນ ກ່ຽວກັບເນື້ອໃນຂ່າວ, ບົດ ແລະ ການກະທຳທີ່ບໍ່ຖືກຕ້ອງຂອງຕົນ.
- ປະຕິບັດຈັນຍາບັນນັກຂ່າວ, ບໍ່ສວຍໃຊ້ໜ້າທີ່ນັກຂ່າວ ເພື່ອສວຍໂອກາດ ແລະ ລະເມີດກົດໝາຍ.
ມາດຕາ 36 ນັກວິຊາການດ້າສື່ມວນຊົນ
ນັກວິຊາການດ້ານສື່ມວນຊົນ ແມ່ນ ບຸກຄະລາກອນທີ່ປະຕິບັດງານໃນອົງການສື່ມວນຊົນ ຊື່ງມີນັກປະພັນ, ນັກກະວີ, ໂຄສົກ, ພິທີກອນ, ຜູ້ຈັດລາຍການ,ຜູ້ກໍາກັບນັກສະແດງ, ຜູ້ອອກແບບການພິມ, ນັກແຕ້ມ, ນັກປະດັບປະດາ, ນາຍຊ່າງເຕັກນິກ ແລະ ນັກວິຊາການອື່ນທີ່ຮັບໃຊ້ການສ້າງຜະລິດຕະພັນສື່ມວນຊົນປະເພດຕ່າງໆ.
ສິດ ແລະ ໜ້າທີ່ ຂອງນັກວິຊາການດ້າສື່ມວນຊົນ ຂອງແຕ່ລະອົງການສື່ມວນຊົນ ໄດ້ກໍານົດໄວ້ໃນລະບຽບການຕາງຫາກ.
ມາດຕາ 37 (ປັບປຸງ) ຜູ້ຮ່ວມງານ
ຜູ້ຮ່ວມງານ ແມ່ນ ຜູ້ທີ່ມີອາຊີບເປັນນັກຂ່າວ ແຕ່ເປັນຜູ້ຂຽນຂ່າວ, ບົດ, ຖ່າຍພາບ, ຜະລິດລາຍການສະໜອງໃຫ້ອົງການສື່ມວນຊົນ ໂດຍໄດ້ຮັບຄ່າແຮງງານ ແລະ ນະໂຍບາຍອື່ນ ຈາກອົງການສື່ມວນຊົນ ຕາມລະບຽບການ.
ສິດ ແລະ ໜ້າທີ່ຂອງຜູ້ຮ່ວມງານ ໄດ້ກໍານົດໄວ້ໃນລະບຽບການຕາງຫາກ.
ມາດຕາ 38 (ໃໝ່) ບັດນັກຂ່າວ
ບັດນັກຂ່າວ ແມ່ນ ເອກະສານຢັ້ງຢື້ນການເປັນນັກຂ່າວ ຊື່ງລັດຖະມົນຕີ ກະຊວງທະຫຼງຂ່າວ, ວັດທະນະທຳ ແລະ ທ່ອງທ່ຽວ ອອກໃຫ້ ແລະ ມີອາຍຸ ຫ້າປີ.
ບັດນັກຂ່າວ ສາມາດປະຕິບັດໃນກໍລະນີ ດັ່ງນີ້:
- ເປົ້າໝາຍຮັບບັດນັກຂ່າວ
ເປົ້າໝາຍຮັບບັດນັກຂ່າວ ແມ່ນ ບຸກຄະລາກອນສື່ມວນຊົນ ຕາມທີ່ໄດ້ກໍານົດໄວ້ໃນມາດຕາ 28 ຂອງກົດໝາຍສະບັບນີ້,ພະນັກງານສະມາຄົມນັກຂ່າວ ແລະ ພະນັກງານຄຸ້ມຄອງວຽກງານສື່ມວນຊົນ.
- ການມອບບັດນັກຂ່າວ ມີກໍລະ ນີດັ່ງນີ້:
- ບຸກຄະລາກອນສື່ມວນຊົນ, ພະນັກງານສະມາຄົມນັກຂ່າວ ແລະ ພະນັກງານຄຸ້ມຄອງວຽກງານສື່ມວນຊົນ ທີ່ມີເງື່ອນໄຂ, ມາດຕະຖານຄົບຖ້ວນ, ມີການເຄື່ອນໄຫວວຽກງານສື່ມວນຊົນຢ່າງໜ້ອຍ ສາມປີ ແລະ ໄດ້ຮັບການສະເໜີຈາກອົງການສື່ມວນຊົນທີ່ຕົນສັງກັດ.
- ຜູ້ໄດ້ຮັບບັດນັກຂ່າວຖືກຍົກຍ້າຍໄປປະຈຳການຢູ່ອົງການອື່ນ ທີ່ຍັງເປັນເປົ້າໝາຍຖຶບັດນັກຂ່າວນັ້ນ ຈະຕ້ອງສະເໜີຂໍປ່ຽນບັດນັກຂ່າວໃໝ່ໃຫ້ສອດຄ່ອງກັບການຈັດຕັ້ງໃໝ່;
- ກໍລະນີບັດເສຍ, ຂາດ, ໃຊ້ການບໍ່ໄດ້, ເຈົ້າຂອງບັດນັກຂ່າວ ຕ້ອງເຮັດໃບສະເໜີ ພ້ອມຕິດຄັດບັດເກົ່າ ແລະ ໃບຢັ້ງຢື້ນທີ່ຢູ່ ເພື່ອຂໍບັດນັກຂ່າວໃໝ່ ໂດຍຜ່ານການຢັ້ງຢື້ນຂອງຫົວໜ້າອົງການສື່ມວນຊົນ ຫຼື ການຈັດຕັ້ງ ທີ່ຕົນສັງກັດ.
- ຜູ້ທີ່ຖືກຖອດບັດທາງວິໄນ ແຕ່ໄດ້ປັບປຸງ, ປ່ຽນແປງ ຕົນເອງ ເຄົາລົບຈັນຍາບັນ, ກົດໝາຍ ແລະ ລະບຽບການ ແລະ ໄດ້ຮັບການສະເໝີຈາກອົງການສື່ມວນຊົນທີ່ກ່ຽວຂ້ອງ.
- ການຖອນບັດນັກຂ່າວ ມີກໍລະນີ ດັ່ງນີ້:
- ຖືກຍົກຍ້າຍໄປປະຈຳການຢູ່ອົງການອື່ນທີ່ບໍ່ ແມ່ນ ກົດໝາຍຖຶບັດນັກຂ່າວ ຫຼື ບໍ່ໄດ້ເຄື່ອນໄຫວວຽກງານສື່ມວນຊົນ;
- ເຮັດວຽກໃນອົງການສື່ມວນຊົນທີ່ຖືກຖອນໃບອະນຸຍາດເຄຶ່ອນໄຫວສື່ມວນຊົນ;
- ລະເມີດຈັນຍາບັນນັກຂ່າວ ຫຼືສວຍໃຊ້ບັດໃນທາງຜິດກົດໝາຍ;
- ຖືກລົງວິໄນຂັ້ນໂຈະວຽກ, ຖືກກ່າວຟ້ອງ ຫຼື ຖືກສານຕັດສິນລົງໂທດ;
- ຢຸດວຽກ;
ພາຍໃນເວລາ ສິບຫ້າວັນ ທີ່ມີຄຳສັ່ງຖອນບັດ, ຫົວໜ້າອົງການສື່ມວນຊົນ ຕ້ອງແຈ້ງໃຫ້ຜູ້ຖຶບັດນັກຂ່າວຊາບເປັນລາຍລັກອັກສອນ ເພື່ອສົ່ງບັດໃຫ້ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ.
ໝວດທີ 3
ການສ້າງຕັ້ງອົງການສື່ມວນຊົນ
ມາດຕາ 39 (ປັບປຸງ) ເງື່ອນໄຂການສ້າງຕັ້ງອົງການສື່ມວນຊົນ
ການສ້າງຕັ້ງອົງການສື່ມວນຊົນ ມີເງື່ອນໄຂ ດັ່ງນີ້:
ມາດຕາ 40 (ໃໝ່) ການພິຈາລະນາອະນຸຍາດການສະເໜີສ້າງຕັ້ງສື່ມວນຊົນ
ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ມີຈຸດປະສົງສ້າງຕັ້ງອົງການສື່ມວນຊົນ ຕ້ອງຢື່ນຄຳຮ້ອງ ແລະ ບົດວິພາກ ຕໍ່ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ ເພື່ອພິຈາລະນາ ແລະ ອະນຸຍາດໃ້ຫ້ເຄື່ອນໄຫວວຽກງານສື່ມວນຊົນ. ພາຍໃນກໍານົດເວລາ ເກົ້າສິບວັນ ຫຼັງຈາກໄດ້ຮັບຄຳຮ້ອງ ກະຊວງທະແຫຼງຂ່າວ, ວັດທະນະທຳ ແລະ ທ່ອງທ່ຽວ ຕ້ອງພິຈາລະນາອອກໃບອະນຸຍາດ, ໃນກໍລະນີບໍ່ອະນຸຍາດ ຕ້ອງແຈ້ງເຫດຜົນເປັນລາຍລັກອັກສອນໃຫ້ຜູ້ຮ້ອງຂໍ.
ພາຍຫຼັງໄດ້ຮັບອະນຸຍາດເຄື່ອນໄຫວວຽກງານສື່ມວນຊົນ, ອົງການເຈົ້າຂອງສື່ມວນຊົນ ຕ້ອງສ້າງຕັ້ງອົງການສື່ມວນຊົນຂອງຕົນ ແລ້ວລາຍງານຕໍ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ພ້ວມທັງແຈ້ງຜ່ານສື່ມວນຊົນ.
ມາດຕາ 41 (ໃໝ່) ການປ່ຽນແປງຂໍ໊ມູນໃນໃບອະນຸຍາດເຄື່ອນໄຫວວຽກງານສື່ມວນຊົນ
ອົງການສື່ມວນຊົນ ທີ່ມີຈຸດປະສົງເພີ່ມເຕີມ ຫຼື ປ່ຽນແປງຂໍ້ມູນໃນໃບອະນຸຍາດເຄື່ອງໄຫວວຽກງານສື່ສານມວນຊົນຂອງຕົນ ໃຫ້ສະເໜີຕໍ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເພື່ອພິຈາລະນາ.
ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຈ້ງຕອບເປັນລາຍລັກອັກສອນ ພາຍໃນກໍານົດເວລາ ສາມສິບວັນ ນັບແຕ່ວັນໄດ້ຮັບຄຳຮ້ອງ ເປັນຕົ້ນໄປ.
ມາດຕາ 42 (ໃໝ່) ການໂຈະ, ການຖອນ ຫຼື ການຍຸດເຊົາການເຄື່ອນໄຫວວຽກງານສື່ມວນຊົນ
ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ສາມາດໂຈະການເຄື່ອນໄຫວ ຫຼື ຖອນໃບອະນຸຍາດເຄື່ອນໄຫວວຽກງານສື່ມວນຊົນ ຖ້າວ່າອົງການສື່ມວນຊົນທີ່ກ່ຽວຂ້ອງ ບໍ່ເຄື່ອນໄຫວວຽກງານສື່ມວນຊົນ ຫຼື ເຄື່ອນໄຫວຕາມຈຸດປະສົງ, ເນື້ອໃນ ແລະ ຮູບແບບທີ່ໄດ້ອະນຸຍາດ ຫຼື ບໍ່ມີຜະລິດຕະພັນສື່ມວນຊົນອອກສູ່ສັງຄົມພາຍໃນກໍານົດເວລາ ສາມເດື້ອນ ສຳລັບສື່ສິ່ງພີມ ແລະ ເວັບໄຊ; ເກົ້າເດື່ອນ ສຳລັບວິທະຍຸກະຈາຍສຽງ, ໂທລະພາບນັບແຕ່ວັນ ໄດ້ຮັບອະນຸຍາດ ເປັນຕົ້ນໄປ.
ໃນກໍລະນີ ທີ່ອົງການເຈົ້າຂອງສື່ມວນຊົນ ມີຈຸດເປະສົງຢຸດເຊົາ ການເຄື່ອນໄຫວວຽກງານສື່ມວນຊົນຂອງຕົນ ຕ້ອງແຈ້ງເປັນລາຍລັກອັກສອນຢ່າງຊ້າ ສາມສິບວັນ ຕໍ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເພື່ອຖອນໃບອະນຸຍາດເຄື່ອນໄຫວວຽກງານສື່ມວນຊົນ ແລະ ອອກແຈ້ງການສື່ມວນຊົນ.
ຖ້າຫາກມີຈຸດປະສົງຂໍອະນຸຍາດຄືນໃໝ່ ອົງການເຈົ້າຂອງສື່ມວນຊົນທີ່ຖືກຖອນໃບອະນຸຍາດນັ້ນ ຕ້ອງຢື່ນຄຳຮ້ອງຕໍ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເພື່ອພິຈາລະນາ.
ມາຕາ 43 ການສ້າງຕັ້ງສຳນັກງານຜູ້ຕ່າງໜ້າອົງການສື່ມວນຊົນ
ລັດຖະບານ ເປັນຜູ້ອະນຸຍາດການສ້າງຕັ້ງສຳນັກງານຜູ້ຕາງໜ້າອົງການສື່ມວນຊົນລາວ ປະຈຳຢູ່ຕ່າງປະເທດ ແລະ ໃຫ້ອົງການສື່ມວນຊົນຕ່າງປະເທດເຂົ້າມາປະຈຳ ຫຼື ສ້າງຕັ້ງສຳນັກງານຜູ້ຕາງໜ້າຂອງອົງການສື່ມວນຊົນຢູ່ຕ່າງປະເທດຢູ່ ສປປ ລາວ. ນັກຂ່າວ, ນັກວິຊາການດ້ານສື່ມວນຊົນ ແລະ ຄະນະຮັບຜິດຊອບອົງການສື່ມວນຊົນຕ່າງປະເທດ ທີ່ມາເຄື່ອນໄຫວຢູ່ ສປປ ລາວ ຕ້ອງປະຕິບັດຕາມກົດໝາຍ ແລະ ລະບຽບການ ຂອງ ສປປ ລາວ.
ສຳລັບການສ້າງຕັ້ງ ແລະ ເຄື່ອນໄຫວ ຂອງຜູ້ຕາງໜ້າຂອງອົງການສື່ມວນຊົນຂອງພາຍໃນ ແລະ ຕ່າງປະເທດ ໄດ້ກໍານົດໄວ້ໃນລະບຽບການຕາງຫາກ.
ໝວດທີ 4
ກິດຈະການສື່ມວນຊົນ
ມາດຕາ 44 ກິດຈະການສື່ມວນຊົນ
ກິດຈະການສື່ມວນຊົນ ມີ ດັ່ງນີ້:
- ການຊອກຮູ້,ເກັບກໍາຊໍ້ມູນ ຂ່າວສານ;
- ການໄດ້ຮັບການສະໜອງຂໍ້ມູນ ຂ່າວສານຈາກສັງຄົມ;
- ການເຜີຍແຜ່ບົດ, ຂ່າວ ແລະ ແຈ້ງການຕ່າງ;
- ການໃຫ້ຕຳຕອບ;
- ການແກ້ຂ່າວ;
- ການບໍລິການ;
- ການບັນເທິງ.
ມາດຕາ 45 ການຊອກຮູ້, ເກັບກໍາຂໍ້ມູນ ຂ່າວສານ
ສື່ມວນຊົນ ຕ້ອງເຄື່ອນໄຫວຊອກຮູ້, ເກັບກໍາຂໍ້ມູນ ຂ່າວສານຢ່າງກ້ວາງຂວາງ, ຄົບຖ້ວນ, ຊັດເຈນ,ວ່ອງໄວ ແລະ ທັນການ ເພື່ອຄົ້ນຄ້ວາ, ແຕ່ງເປັນບົດ, ຂ່າວ, ລາຍການ ແລະ ແຈ້ງການຕ່າງໆ.
ມາດຕາ 46 (ປັບປຸງ) ການໄດ້ຮັບການສະໜອງຂໍ້ມູນ ຂ່າວສານຈາກສັງຄົມ
ສື່ມວນຊົນ ມີສິດຮັບຂໍ້ມູນ ຂ່າວສານຈາກ ບຸກຄົນ, ນິຕິບຸກຄົນ ແລະ ການຈັດຕັ້ງ ເພື່ອພິຈາລະນາອອກຂ່າວຕາມຄວາມເໝາະສົມ.
ບຸກຄົນ, ນິຕິບຸກຄົນ ແລະ ການຈັດຕັ້ງ ຕ້ອງປະກອບສ່ວນໃນການສະໜອງ ແລະ ມີຄວາມຮັບຜິດຊອບຕໍ່ໜ້າກົດໝາຍ ກ່ຽວກັບເນື້ອໃນຂໍ້ມູນ ຂ່າວສານທີ່ຕົນໄດ້ສະໜອງໃຫ້ສື່ມວນຊົນ ຜ່ານສື່ສັງຄົມອອນລາຍ, ກອງປະຊຸມຖະແຫຼງຂ່າວ, ການສຳພາດ ແລະ ຮູບແບບອື່ນ. ອົງການສື່ມວນຊົນ ຕ້ອງໄດ້ນຳໃຊ້ເນື້ອໃນຂໍ້ມູນທີ່ສະໜອງໃຫ້ນັ້ນ ຢ່າງຖືກຕ້ອງ ແລະ ຕ້ອງແຈ້ງແຫຼ່ງ ແລະ ທີ່ມາຂອງຂໍ້ມູນນັ້ນ.
ໃນກໍລະນີທີ່ໄດ້ຮັບຂໍ້ມູນ ຂ່າວສານ ກ່ຽວກັບປານກົດການຫຍໍ້ທໍ້ໃນສັງຄົມ, ການລະເມີດກົດໝາຍ ແລະ ລະບຽບການສື່ມວນຊົນ ກໍ່ສາມາດແຈ້ງໃຫ້ ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ກ່ຽວຂ້ອງຊາບ ເພື່ອພິຈາລະນາ.
ສຳລັບຂ່າວກ່ຽວກັບຄະດີ ທີ່ພວມສື່ສວນ-ສອບສວນ ຫຼື ຄະດີທີ່ຍັງບໍ່ທັນຕັດສິນນັ້ນ ອົງການທີ່ດຳເນີນຄະດີ ມີສິດສະຫງວນຄວາມລັບກ່ຽວກັບ ຂໍ້ມູນ ຂ່າວສານ ຕໍ່ສື່ມວນຊົນ, ແຕ່ສື່ມວນຊົນ ກໍມີສິດອອກຂ່າວຕາມແຫຼງຂ່າວທີ່ໜ້າເຊື່ອຖຶໄດ້ ແລະ ເປັນປະໂຫຍດໃຫ້ແກ່ສັງຄົມ ດ້ວຍຄວາມຮັບຜິດຊອບຂອງຕົນ ຕໍ່ໜ້າກົດໝາຍເວັ້ນແຕ່ມີຄຳສັ່ງໂຈະ ຫຼື ຫ້າມການອອກຂ່າວຈາກອົງການທີ່ກ່ຽວຂ້ອງ.
ສື່ມວນຊົນ ຈະບໍ່ເປີດເຜີຍ ຊື່ ແລະ ຮູບພາບຂອງຜູ້ສະໜອງ ຂໍ້ມູນ ຂ່າວສານ ຖ້າເຫັນວ່າ ມີຜົນເສຍຫາຍຕໍ່ຜູ້ສະໜອງ ຂໍ້ມູນ ຂ່າວສານ, ສະມາຊິກຄອບຄົວ ແລະ ການຈັດຕັ້ງນັ້ນ ເວັ້ນເສຍແຕ່ຈະສະໜອງໃຫ້ຕາມການສະເໜີ ຂອງອົງການສືບສວນ-ສອບສວນ ຫຼືອົງການໄອຍະການປະຊາຊົນ ຫຼື ສານປະຊາຊົນ.
ມາດຕາ 47 ການເຜີຍແຜ່ ບົດ, ຂ່າວ, ລາຍການ ແລະ ແຈ້ງການ
ເມື່ອສື່ມວນຊົນໄດ້ເກັບກໍາຂໍ້ມູນ ຂ່າວສານ ຫຼື ຮັບຂໍ້ມູນ ຂ່າວສານ ຈາກສັງຄົມແລ້ວ ຕ້ອງຄົ້າຄ້ວາພິຈາລະນາຢ່າງຖີ່ຖ້ວນ ຖ້າເຫັນວ່າເປັນຜົນປະໂຫຍດໃຫ້ແກ່ປະເທດຊາດ ແລະ ສັງຄົມ ຈື່ງແຕ່ງເປັນບົດ, ຂ່າວ, ແຈ້ງການ ແລະ ລາຍການຕ່າງໆ ເພື່ອເຜີຍແຜ່ໃຫ້ສັງຄົມຮັບຮູ້ຢ່າງທົ່ວເຖິງ ແລະ ທັນເວລາຜ່ານພາຫະນະຂອງຕົນ.
ມາດຕາ 48 (ປັບປຸງ) ການໃຫ້ຄຳຕອບ
ສື່ມວນຊົນມີສິດສະເໜີໃຫ້ ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ກ່ຽວຂ້ອງຕອບບັນຫາທີ່ຜົນລະເມືອງລາວ ຫຼື ອົງການຈັດຕັ້ງຕ່າງໆຂໍ້ຄວາມກະຈ່າງແຈ້ງ, ເມື່ອງບຸກຄົນ, ນິຕິບຸກຄົນ ຫຼື ການຈັດຕັ້ງ ໄດ້ຮັບຄຳສະເໜີດັ່ງກ່າວ ຕ້ອງຕອບພາຍໃນ ສິບຫ້າວັນ ພາຍຫຼັງໄດ້ຮັບຄຳສະເໜີ ແລະ ມີຄວາມຮັບຜິດຊອບຕໍ່ຄຳຕອບຂອງຕົນ.
ຖ້າຫາກບໍ່ໄດ້ຮັບຄຳຕອບຈາກ ບຸກຄົນ, ນິຕິບຸກຄົນ ຫຼື ການຈັດຕັ້ງ, ອົງການສື່ມວນຊົນ ມີສິດສົ່ງຄຳເຫັນ, ຄວາມຂັດຂ້ອງຂອງ ບຸກຄົນ, ນິຕິບຸກຄົນ ແລະ ການຈັດຕັ້ງ ດັ່ງກ່າວ ເຖິງການຈັດຕັ້ງຂັ້ນເທິງ ທີ່ມີສິດອຳນາດແກ້ໄຂ ຫຼື ນຳບັນຫານັ້ນ ລົງເຜີຍແຜ່ໃສ່ສື່ມວນຊົນ.
ບຸກຄົນ, ນິຕິບຸກຄົນ ຫຼື ການຈັດຕັ້ງຕ່າງໆ ມີສິດສະເໜີໃຫ້ສື່ມວນຊົນຊື້ແຈ້ງ ກ່ຽວກັບຂ່າວທີ່ໄດ້ເຜີຍແຜ່ອອກໄປ ທີ່ຍັງບໍ່ຈະແຈ້ງນັ້ນ ແລະ ຕ້ອງໃຫ້ຄຳຕອບຢ່າງວ່ອງໄວ.
ອົງການຈັດຕັ້ງ ພັກ, ລັດ, ແນວລາວສ້າງຊາດ, ມະຫາຊົນ ແລະ ສັງຄົມ ສາມາດແຕ່ງຕັ້ງພະນັກງານປະຊາສຳພັນ ເພື່ອປະຕິບັດໜ້າທີ່ ແຈ້ງຂ່າວ ແລະ ສະໜອງຂໍ້ມູນ ຂ່າວສານ ທີ່ກ່ຽວຂ້ອງກັບວຽກງານຂອງຕົນ ໃຫ້ສັງຄົມໂດຍຜ່ານໜັງສືມວນຊົນ ຕາມສະພາບການຮຽກຮ້ອງ, ໃນກໍລະນີມີໄພພິບັດ ຫຼື ວິກິດການດ້ານຕ່າງໆ ຕ້ອງແຈ້ງຂ່າວຢ່າງລຽນຕິດ ເພື່ອນຳພາຫາງສຽງສັງຄົມ.
ມາດຕາ 49 (ປັບປຸງ) ການແກ້ຂ່າວ
ບຸກຄົນ, ນິຕິບຸກຄົນ ຫຼື ການຈັດຕັ້ງ ມີສິດສະເໜີໃຫ້ສື່ມວນຊົນແກ້ຂ່າວ ທີ່ອອກບໍ່ຖືກຕ້ອງ ຕາມຄວາມຈິງ.
ອົງການສື່ມວນຊົນທີ່ອອກຂ່າວບໍ່ຖືກຕ້ອງຕາມຄວາມຈິງ, ຂາດຫຼັກຖານ, ແຕະຕ້ອງເຖິງບົດບາດ, ກຽດສັກສີຂອງ ບຸກຄົນ, ນິຕິບຸກຄົນ ຫຼື ການຈັດຕັ້ງນັ້ນ ຕ້ອງໄດ້ແກ້ຂ່າວ ແລະ ຂໍໂທດ ຜ່ານສື່ມວນຊົນ ຕາມກົດໝາຍ ແລະ ລະບຽບການ.
ໃນກໍລະນີທີ່ອົງການສື່ມວນຊົນບໍ່ແກ້ຂ່າວ ຫຼື ໄດ້ແກ້ຂ່າວບໍ່ເໝາະສົມ, ບຸກຄົນ, ນິຕິບຸກຄົນ ຫຼື ການຈັດຕັ້ງທີ່ກ່ຽວຂ້ອງ ມີສິດສະເໜີບົດຊີ້ແຈງຕໍ່ອົງການຄຸ້ມຄອງສື່ມວນຊົນ ຫຼື ຮ້ອງຟ້ອງຕໍ່ສານປະຊາຊົນ ເມື່ອເຫັນວ່າມີຄວາມເສຍຫາຍເກີດຂື້ນ.
ອົງການສື່ມວນຊົນ ຕ້ອງເຜີຍແຜ່ບົດຊີ້ແຈ້ງຂອງ ບຸກຄົນ, ນິຕິບຸກຄົນ ແລະ ການຈັດຕັ້ງ, ໃນກໍລະນີບໍ່ເຫັນດີຕໍ່ບົດຊີ້ແຈງດັ່ງກ່າວອົງການສື່ມວນຊົນ ມີສິດສະແດງທັດສະນະຂອງຕົນຜ່ານສື່ມວນຊົນ. ອົງການສື່ມວນຊົນ ຈະບໍ່ເຜີຍແຜ່ບົດຊີ້ແຈງຂອງ ບຸກຄົນ, ນິຕິບຸກຄົນ ແລະ ການຈັດຕັ້ງ ຫາກເຫັນວ່າຂັດກັບກົດໝາຍ, ພ້ວມດຽວກັນນັ້ນ ກໍ່ແຈ້ງຕອບເຫດຜົນໃຫ້ຜູ້ກ່ຽວຂ້ອງຊາບເປັນລາຍລັກອັກສອນ.
ມາດຕາ 50 (ປັບປຸງ)ການບໍລິການ
ການບໍລິການຂອງສື່ມວນຊົນ ແມ່ນ ການທີ່ສື່ມວນຊົນໂຄລະນາສິນຄ້າ ຫຼື ບໍລິການທາງສື່ສິ່ງພີມ ແລະ ສື່ເອເລັກໂຕຣນິກຜ່າຍລະບົບສາຍ, ເຄື່ອງສົ່ງພາກພື້ນດິນ, ດາວທຽມ ຫຼື ເຄືອຂ່າຍອິນເຕີເນັດໃຫ້ລູກຄ້າ ໂດຍເກັບຄ່າບໍລິການ.
ສື່ມວນຊົນທຸກປະເພດ ສາມາດໂຄສະນາສິນຄ້າ ຫຼື ບໍລິການປະເພດຕ່າງໆ ໃຫ້ລູກຄ້າແຕ່ຕ້ອງໄດ້ຮັບອະນຸຍາດຈາກອົງການຄຸ້ມຄອງສື່ມວນຊົນທີ່ກ່ຽວຂ້ອງ.
ເນື້ອໃນໂຄສະນາສິນຄ້າ ຫຼື ການບໍລິການ ຜ່ານສື່ມວນຊົນທຸກປະເພດ ຕ້ອງໃຫ້ຖືກກັບຄວາມເປັນຈິງ, ບໍ່ເວົ້າໂຍກ, ເວົ້າເກີນຄຸນນະພາບຂອງສິນຄ້າ ຫຼື ຂອງການບໍລິການນັ້ນ ແລະ ຕ້ອງໄດ້ຮັບອະນຸຍາດ ເພື່ອໂຄສະນາ ດຜີຍແຜ່ ຈາກອົງການຄຸ້ມຄອງວຽກງານທີ່ກ່ຽວຂ້ອງ.
ການໂຄສະນາສິນຄ້າ ຫຼື ບໍລິການໃຫ້ລູກຄ້າຜ່ານສື່ມວນຊົນ ລວມທັງການເກັບຄ່າບໍລິການນັ້ນໄດ້ກໍານົດໄວ້ໃນລະບຽບການຕ່າງຫາກ.
ມາດຕາ 51 ການບັນເທິງ
ການບັນເທິງເປັນວຽກງານໜຶ່ງຂອງສື່ມວນຊົນ ເພື່ອສ້າງບັນຍາກາດ, ຄວາມເບີກບານມ່ວນຊື່ ໃຫ້ແກ່ສັງຄົມ ທັງເປັນການໂຄສະນາ, ສຶກສາອົບຮົມ, ແນະນຳ, ປຸກລະດົມຜົນລະເມືອງໃຫ້ມີຄວາມຕື່ນຕົວເປັນເຈົ້າການເຂົ້າຮ່ວມໃນການປົກປັກຮັກສາ ແລະ ພັດທະນາປະເທດຊາດ.
ການບັນເທິງທີ່ນຳອອກເຜີຍແຜ່ຜ່ານສື່ມວນຊົນນັ້ນ ປະກອບດ້ວຍ ການສະແດງສິນລະປະ ວັນນະຄະດີ, ການຮ້ອງເພງ, ການຂັບ, ການລຳ, ການບັນເລງສຽງດົນຕີ, ການສະແດງລະຄອນ, ການກິລາ-ກາຍຍະກໍາ, ວັນນະກໍາ ແລະ ອື່ນໆ ທີ່ສອດຄ່ອງກັບແນວທາງ ນະໂຍບາຍຂອງພັກ, ກົດໝາຍ ແລະ ລະບຽບການຂອງລັດ, ຮີດຄອງ, ວັດທະນະທຳປະເພນີອັນດີງາມຂອງຊາດ, ຂອງຊົນເຜົ່າ ແລະ ສາມາດເຊື່ອມໂມງກັບ ພາກພື້ນ ແລະ ສາກົນ.
ໝວດທີ 5
ການເຄື່ອນໄຫວວຽກງານສື່ມວນຊົນ
ມາດຕາ 52 (ໃໝ່) ຂໍ້ມູນຕົ້ນຕໍຕ້ອງບັນທຶກໃນຜະລິດຕະພັນສື່ມວນຊົນ
ຂໍ້ມູນຕົ້ນຕໍທີ່ຕ້ອງບັນທຶກໃນຜະລິດຕະພັນສື່ມວນຊົນ ມີ ດັ່ງນີ້:
- ຢູ່ໜ້າທຳອິດຂອງສື່ສິ່ງພິມ ຕ້ອງມີຊື່ຂອງຜະລິດຕະພັນໜັງສືພິມ, ຊື່ອົງການສື່ມວນຊົນ, ສື່ອົງການເຈົ້າຂອງສື່ມວນຊົນ ຂຍນໃສ່ກ້ອງຊື່ອົງການສື່ມວນຊົນ, ໝາຍເລກສະບັບສຳລັບສື່ສິ່ງພິມ; ຢູ່ດ້ານລຸ່ມຂອງໜ້າສຸດ ທ້າຍຂອງໜັງສຶພິມຕ້ອງມີ ວັນ, ເດືອນ, ປີ ອອກຈຳໜ່າຍ, ໄລຍະການຈຳໜ່າຍ; ທີ່ຢູ່ ສຳນັກງານ, ໂຮງພິມ; ຂະໜາດ, ຈຳນວນຂອງໜ້າ, ລາຄາຂອງສື່ສິ່ງພິມ;
- ສຳລັບວິທະຍຸກະຈາຍສຽງ ແລະ ໂທລະພາບໄລຍະທຳອິດ ໃຫ້ສະເໝີ ຊື່ອົງການສື່ມວນຊົນ, ຊື່ລາຍການດ້ວຍ ພາບ, ສຽງ ແລະ ດົນຕີປະກອບ; ໄລຍະກາງ ຕ້ອງມີການໝາຍຂອງສະຖານີ, ການໝາຍຂອງລາຍການສະເພາະໂທລະພາບ; ໄລຍະທ້າຍຂອງລາຍການ ໃຫ້ແຈ້ງລາຍຊື່ຄະນະຮັບຜິດຊອບການຜະລິດ ແລະ ຜູ້ຮ່ວມງານ, ໃຫ້ແຈ້ງທີ່ຕັ້ງສຳນັກງານ ແລະ ສູນຜະລິດ,ໝາຍເລກໂທລະສັບ, ໂທລະສານ, ອີເມວ, ລະຫັດຊື່ທາງອິນເຕີເນັດ ແລະ ອື່ນ;
- ຢູ່ໜ້າທຳອິດຂອງສື່ແບບໃໝ່ ຕ້ອງມີເລກທີ່ໃບອະນຸຍາດ, ວັນ, ເດື້ອນ, ປີ ອອກໃບອະນຸຍາດເຄື່ອນໄຫວວຽກງານສື່ມວນຊົນ, ທີ່ຢູ່ຂອງສຳນັກງານ, ໝາຍເລກໂທລະສັບ, ໂທລະສານ, ອີເມວ, ຊື່ ແລະ ນາມສະກຸນຂອງຫົວໜ້າອົງການສື່ມວນຊົນ, ລະຫັດຊື່ທາງອິນເຕີເນັດ ຫຼື ເວັບໄຊ.
ມາດຕາ 53 (ປັບປຸງ) ການພີມ ແລະ ຈຳໜ່າຍສື່ສິ່ງພິມ
ການພິມສື່ສິ່ງພິມລາວ ແມ່ນ ໃຫ້ພິມຢູ່ ສປປ ລາວ ເປັນຕົ້ນຕໍ, ສື່ສິ່ງພີມໃດທີ່ຈະສົ່ງໄປພີມ ຫຼື ຈຳໜ່າຍຢູ່ຕ່າງປະເທດ ຕ້ອງໄດ້ຮັບອະນຸຍາດຈາກອົງການຄຸ້ມຄອງສື່ມວນຊົນທີ່ກ່ຽວຂ້ອງ.
ອົງການສື່ມວນຊົນ ເປັນຜູ້ຈັດຕັ້ງການຈຳໜ່າຍສື່ສິ່ງພີມຂອງຕົນ ຫຼື ມອບສິດໃຫ້ແກ່ ບຸກຄົນ, ນິຕິບຸກຄົນ ຫຼື ການຈັດຕັ້ງ ໃດໜຶ່ງຮັບຜິດຊອບການບໍລິການຈຳໜ່າຍແທນກໍ່ໄດ້ ແຕ່ຕ້ອງຮັບປະກັນການຈຳໜ່າຍໃຫ້ເຖິງເປົ້າໝາຍ ແລະ ທັນຕາມເວລາທີ່ໄດ້ກໍານົດໄວ້.
ສື່ສິ່ງພີມ ທີ່ພີມຈຳນວນຖືກຕ້ອງຕາມກົດໝາຍ ສາມາດສົ່ງອອກໄປຕ່າງປະເທດ. ບຸກຄົນ, ນິຕິບຸກຄົນ ແລະ ການຈັດຕັ້ງ ທັງພາຍໃນ ແລະ ຕ່າງປະເທດ ທີ່ມີຈຸດປະສົງນຳເອົາສື່ສິ່ງພີມຕ່າງປະເທດເຂົ້າມາພີມ, ຈຳໜ່າຍຢູ່ ສປປ ລາວ ຕ້ອງຂໍອະນຸຍາດຈາກອົງການຄຸ້ມຄອງສື່ມວນຊົນທີ່ກ່ຽວຂ້ອງ.
ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ນຳເຂົ້າ-ສົ່ງອອກ ສື່ສິ່ງພີມ ຕ້ອງກວດກາເນື້ອໃນ ກ່ອນຈະແຈກຢາຍ ແລະ ຮັບຜິດຊອບຕໍ່ເນື້ອໃນສື່ສິ່ງພີມທີ່ຕົນນຳເຂົ້າ.
ຜູ້ຈຳໜ່າຍສື່ສິ່ງພີມທີ່ຖືກຫ້າມຈຳໜ່າຍ ຕ້ອງເກັບຄືນເພື່ອທຳລາຍ ພ້ອມທັງຮັບຜິດຊອບຄ່າໃຊ້ຈ່າຍຕ່າງໆ.
ມາດຕາ 54 (ປັບປຸງ) ການເພີ່ມໜ້າພີມຂອງສື່ສິ່ງພີມ
ອົງການສື່ມວນຊົນ ທີ່ຕ້ອງການພິມ ແລະ ຈຳໜ່າຍສື່ສີ່ງພິມເພື່ມ, ເພີ່ມຈຳນວນໜ້າ, ພີມສະບັບສອດໃນ ຫຼື ຊ້ອນທ້າຍ, ພິມເພື່ອໃບຂ່າວພິເສດ ສາມາດເຮັດໄດ້ຕາມສິດ ແລະ ໜ້າທີ່ຂອງຕົນ ແຕ່ຕ້ອງທຳລາຍງານໃຫ້ອົງການຄຸ້ມຄອງສື່ມວນຊົນທີ່ກ່ຽວຂ້ອງ ສິບຫ້າວັນ ກ່ອນການຈັດຕັ້ງປະຕິບັດ.
ມາດຕາ 55 (ປັບປຸງ) ການເພີ່ມລາຍການວິທະຍຸກະຈາຍສຽງ ແລະ ໂທລະພາບ
ສະຖານີວິຖະຍຸກະຈາຍສຽງ ແລະ ໂທລະພາບ ທີ່ມີຄວາມຕ້ອງການເພີ່ມລາຍການໃດໜຶ່ງນັ້ນ ຕ້ອງລາຍງານໃຫ້ອົງການຄຸ້ມຄອງສື່ມວນຊົນທີ່ກ່ຽວຂ້ອງ ສາມສິບວັນ ກ່ອນການຈັດຕັ້ງປະຕິບັດ.
ມາດຕາ 56 (ປປັບປຸງ) ລາຍການກະຈາຍສຽງ ແລະ ພາບ
ລາຍການກະຈາຍ ສຽງ ແລະ ພາບ ຂອງສື່ມວນຊົນລາວ ຕ້ອງຜະລິດ ແລະ ອອກອາກາດຈາກຕິນແດດ ສປປ ລາວ, ໃນກໍລະນີມີຈຸດປະສົງກະຈາຍລາຍການເຫຼົ່ານັ້ນຢູ່ຕ່າງປະເທດ ຕ້ອງໄດ້ຮັບອະນຸຍາດຈາກອົງການຄຸ້ມຄອງສື່ມວນຊົນທີ່ກ່ຽວຂ້ອງ.
ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ມີຈຸດປະສົງເອົາລາຍງານການກະຈາຍສຽງ ແລະ ພາບຂອງຕ່າງປະເທດອອກອາກາດຢູ່ ສປປ ລາວ ຜ່ານລະບົບໂທລະພາບໃຊ້ສາຍ ແລະ ບໍ່ໃຊ້ສາຍ ຕ້ອງໄດ້ຮັບອະນຸຍາດຈາກລັດຖະບານ ແຫ່ງ ສປປ ລາວ.
ມາດຕາ 57 (ໃໝ່) ການບໍລິການສົ່ງສັນຍານ ແລະ ກະຈາຍຄື້ນຄວາມຖີ່
ການບໍລິການສົ່ງສັນຍານ ແລະ ກະຈາຍຄຶ້ນຄວາມຖີ່ໃຫ້ວິທະຍຸກະຈາຍສຽງ, ໂທລະພາບຕ້ອງຮັບປະກັນຄຸນນະພາບດ້ານເຕັກນິກ ໃຫ້ຖືກຕ້ອງ, ຄົບຖ້ວນ ໂດຍການອະນຸຍາດຈາກຂະແໜງການທີ່ກ່ຽວຂ້ອງ.
ການບໍລິການສົ່ງສັນຍານ ແລະ ກະຈາຍຄື້ນຄວາມຖີ່ວິທະຍຸກະຈາຍສຽງ, ໂທລະພາບ ຊຶ່ງຮັບໃຊ້ໜ້າທີ່ການເມືອງຂອງຊາດ ແລະ ຂອງທ້ອງຖິ່ນນັ້ນ ຕ້ອງໃຫ້ຄົບຖ້ວນ, ຮັບປະກັນເວລາ ແລະ ກວມເອົາເຂດເປົ້າໝາຍເຊັ່ນ ເຂດຊົນເຜົາ, ທຸກຍາກ, ຫ່າງໄກສອກຫຼີກ, ພູດອຍ ແລະ ເຂດຊາຍແດນ.
ມາດຕາ 58 (ໃໝ່) ການປ້ອງກັນເນື້ອໃນລາຍການ ວິທະຍຸກະຈາຍສຽງ, ໂທລະພາບ, ໂທລະໂຄ່ງ ແລະ ເວັບໄຊ
ວິທະຍຸກະຈາຍສຽງ, ໂທລະພາບ, ໂທລະໂຄ່ງ ແລະ ເວັບໄຊ ມີສິດນໍາໃຊ້ມາດຕະການດ້ານເຕັກໂນໂລຊີເພື່ອປ້ອງກັນເນື້ອໃນລາຍການວິທະຍຸກະຈາຍສຽງ, ໂທລະພາບ, ໂທລະໂຄ່ງ ແລະ ເນື້ອໃນເວັບໄຊຂອງຕົນ.
ມາດຕາ 59 (ປັບປຸງ) ການສ້າງ ແລະ ການນໍາໃຊ້ສື່ຜ່ານອິນເຕີເນັດ
ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ມີຈຸດປະສົງສ້າງເວັບໄຊຂອງຕົນ ຕ້ອງປະຕິບັດຕາມກົດໝາຍ ແລະ ລະບຽບການທີ່ກ່ຽວຂ້ອງ. ຂໍ້ມູນຂ່າວສານທີ່ລົງໃນເວັບໄຊ ຕ້ອງໃຫ້ຖືກຕ້ອງຕາມຕົ້ນສະບັບ, ແຈ້ງແຫຼ່ງຂ່າວ, ບົ່ງຊື່ຂອງຜູ້ຂຽນ, ຊື່ຂອງອົງການສື່ມວນຊົນ, ເວລາລົງຂໍ້ມູນ ແລະ ເວລາສົ່ງຂໍ້ມູນ ຂ່າວສານດັ່ງກ່າວ.
ການນໍາໃຊ້, ການບໍລິການສື່ຜ່ານອິນເຕີເນັດ ຕ້ອງໄດ້ປະສານສົມທົບ ແລະ ໄດ້ຮັບອະນຸຍາດຈາກອົງການທີ່ກ່ຽວຂ້ອງ ພ້ອມທັງປະຕິບັດຕາມກົດໝາຍ ແລະ ລະບຽບຢ່າງເຂັ້ມງວດ.
ເນື້ອໃນຂອງຂໍ້ມູນ ຂ່າວສານທີ່ເອົາລົງໃນເຄື່ອຂ່າຍອິນເຕີເນັດ ຕ້ອງບໍ່ລະເມີດຂໍ້ຫ້າມ ຊຶ່ງກໍານົດໄວ້ໃນມາດຕາ 66 ຂອງກົດໝາຍສະບັບນີ້ ແລະ ບົດບັນຍັດຂອງກົດໝາຍອື່ນທີ່ກ່ຽວຂ້ອງ ແລະ ສາມາດຖືເປັນຫຼັກຖານ ແລະ ມີຜົນທາງດ້ານກົດໝາຍ.
ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ສ້າງເວັບໄຊ ຕ້ອງມີລະບົບຄຸ້ມຄອງຂໍ້ມູນ ຂ່າວສານ, ມີຄວາມຮັບຜິດຊອບຕິດຕາມກວດກາ ແລະ ເປັນເຈົ້າການລຶບຂໍ້ມູນ ຂ່າວສານທີ່ລະເມີດຂໍ້ຫ້າມກ
ມາດຕາ 60 (ໃໝ່) ການນໍາໃຊ້ສື່ສັງຄົມອອນລາຍຂອງອົງການສື່ມວນຊົນ
ການນໍາໃຊ້ສື່ສັງຄົມອອນລາຍຂອງອົງການສື່ມວນຊົນ ໃຫ້ປະຕິບັດດັ່ງນີ້:
- ເຄົາລົບຈັນຍາບັນນັກຂ່າວ;
- ຕ້ອງລົງທະບຽນສ່ວນຕົວບຸກຄະລາກອນສື່ມວນຊົນ ຫຼື ອົງການສື່ມວນຊົນນໍາອົງການຄຸ້ມຄອງສື່ມວນຊົນ ຢ່າງຖືກຕ້ອງຕາມກົດໝາຍ ແລະ ລະບຽບການ;
- ມີກາໝາຍສັນຍາລັກຂອງເວັບໄຊ ຫຼື ໜ້າເວັບ;
- ເຄົາລົບ ແລະ ຮັບຮູ້ຂໍ້ມູຸນ ຂ່າວສານທີ່ຜະລິດໂດຍບຸກຄົນອື່ນໃນສື່ສັງຄົມອອນລາຍ, ຖ້າຕ້ອງກນນໍາໃຊ້ ຂໍ້ຄວາມ, ຮູບພາບ ແລະ ສຽງຕ່າງໆ ຕ້ອງກວດສອບ ແລະ ຂໍອະນູຍາດຈາກຜູ້ຜະລີດ ແລະ ອ້າງອີງແຫຼ່ງທີ່ມາຂອງຂໍ້ມູນ ຂ່າວສານ;
- ຂໍອະນຸຍາດ ຈາກຄະນະຈັດຕັ້ງປະຊຸມກ່ອນເຜີຍແຜ່ຂໍ້ມູນ ຂ່າວສານຂອງກອງປະຊຸມນັ້ນ;
- ຕ້ອງຈໍາແນກ ຂ່າວ ແລະ ຄວາມເຫັນອອກຈາກກັນໃຫ້ຊັດເຈນ;
- ຕ້ອງດໍາເນີນການແກ້ຄວາມຜິດໂດຍທັນທີ ແລະ ສະແດງຄໍາຂໍໂທດ ແລະ ໃຫ້ຜູ້ເສຍຫາຍມີໂອກາດຊີ້ແຈງ ຖ້າມີຄວາມຜິດພາດ ດ້ານການສະເໜີຂໍ້ມູນ ຂ່າວສານ ທີ່ກໍ່ໃຫ້ເກີດຄວາມເສຍຫາຍຕໍ່ ບຸກຄົນ, ນິຕິບຸກຄົນ ຫຼື ການຈັດຕັ້ງ;
- ສະເໜີຂໍ້ມູນ ຂ່າວສານ ທີ່ບໍ່ລະເມີດຂໍ້ຫ້າມຂອງກົດໝາຍ ແລະ ລະບຽບການຂອງ ສປປ ລາວ;
- ເຄົາລົບສັນຍາສາກົນ ແລະ ສົນທິສັນຍາທີ່ ສປປ ລາວ ເປັນພາຄີ.
ມາດຕາ 61 (ປັບປຸງ) ການສໍາເນົາຜະລິດຕະພັນສື່ມວນຊົນ
ຜະລິດຕະພັນສື່ມວນຊົນທຸກປະເພດ ໄດ້ຮັບການສະຫງວນລິຂະສິດ, ສໍາເນົາ ແລະ ເກັບຮັກສາໄວ້ ຢ່າງນ້ອຍ ຊາວຫ້າປີ.
ຜະລິດຕະພັນສື່ສິ່ງພິມ ຈໍານວນ ຫ້າ ສະບັບ ໃຫ້ມອບແກ່ອົງການຄຸ້ມຄອງສື່ມວນຊົນ ແລະ ຫໍສະມຸດແຫ່ງຊາດ. ສໍາລັບຜະລິດຕະພັນສື່ເອເລັກໂຕຣນິກນັ້ນ ຕ້ອງມອບສໍາເນົາຜະລິດຕະພັນທີ່ເລືອກເຟັ້ນຂອງຕົນ ເປັນຕົ້ນ ເຫດການປະຫວັດສາດສໍາຄັນຂອງຊາດ ເພື່ອເກັບຮັກສາໄວ້ໃນສູນສໍາເນົາຂອງຕົນ ແລະ ມອບໃຫ້ສູນສໍາເນົາຮູບເງົາ ແລະ ວີດີໂອແຫ່ງຊາດເກັບຮັກສາ.
ຜະລິດຕະພັນສື່ມວນຊົນ ທຸກຜະເພດຂອງອົງການສື່ມວນຊົນ ຂັ້ນທ້ອງຖິ່ນ ແມ່ນ ອົງການຄຸ້ມຄອງສື່ມວນຊົນທີ່ກ່ຽວຂ້ອງເປັນຜູ້ ສໍາເນົາ ແລະ ເກັບຮັກສາໃນສູນສໍາເນົາຂອງຕົນຢ່າງເປັນລະບົບ.
ມາດຕາ 62 (ໃໝ່) ລິຂະສິດໃນສື່ມວນຊົນ
ສິດໃນລິຂະສິດ ກ່ຽວກັບການນໍາໃຊ້, ການພິມ ແລະ ການເຜີຍແຜ່ຜະລິດຕະພັນສື່ມວນຊົນ ໃຫ້ປະຕິບັດຕາມກົດໝາຍວ່າດ້ວຍ ຊັບສິນທາງປັນຍາ ແລະ ກົດໝາຍອື່ນ ທີ່ກ່ຽວຂ້ອງ.
ມາດຕາ 63 (ປັບປຸງ) ການຈັດກອງປະຊຸມຖະແຫຼງຂ່າວ
ບຸກຄົນ, ນິຕິບຸກຄົນ ຫຼື ການຈັດຕ້ອງ ທີ່ມີຈຸດປະສົງຈັດກອງປະຊຸມຖະແຫຼງຂ່າວ ເພື່ອແຈ້ງຂ່າວ, ອະທິບາຍ, ຕອບຄໍາຖາມ ກ່ຽວກັບພາລະບົດບາດ, ສິດ, ໜ້າທີ່ ຫຼື ຜົນປະໂຫຍດຂອງຕົນນັ້ນ ຕ້ອງໄດ້ຮັບອະນຸຍາດຈາກອົງການຄຸ້ມຄອງສື່ມວນຊົນ ພາຍຫຼັງທີ່ໄດ້ຮັບຄໍາເຫັນດີຈາກອົງການທີ່ກ່ຽວຂ້ອງ.
ອົງການສື່ມວນຊົນຕ່າງປະເທດ, ສໍ່ານັກງານການທູດຕ່າງປະເທດ ແລະ ອົງການຈັດຕັ້ງສາກົນຢູ່ ສປປ ລາວ ທີ່ມີຈຸດປະສົງຈັດກອງປະຊຸມຖະແຫຼງຂ່າວ ການປະຕິບັດຕາມກົດໝາຍ ແລະ ລະບຽບການ ກ່ຽວກັບການເຄື່ອນໄຫວວຽກງານສື່ມວນຊົນ.
ມາດຕາ 64 (ໃໝ່) ການຮ່ວມມືພາຍໃນ
ອົງການສື່ມວນຊົນ ສາມາດຮ່ວມມືກັບ ບຸກຄົນ, ນິຕິບຸກຄົນ, ການຈັດຕັ້ງ ຫຼື ສື່ມວນຊົນອື່ນ ເພື່ອພັດທະນາວຽກງານສື່ມວນຊົນ ເປັນຕົ້ນ ການຄົ້ນຄ້ວາວິໄຈວິທະຍາສາດ, ການແລກປ່ຽນຜະລິດຕະພັນ, ການຜະລິດ ແລະ ການລົງທຶນຮ່ວມກັນທ ໂດຍຜ່ານການຕົກລົງຂອງກະຊວງຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວທີ່ສອດຄອງກັບກົດໝາຍ ແລະ ລະບຽບການ.
ມາດຕາ 65 (ໃໝ່) ການເຄື່ອນໄຫວຂອງສື່ມວນຊົນຕ່າງປະເທດ, ສໍານັກງານການທູດຕ່າງປະເທດ ແລະ ອົງການຈັດຕັ້ງສາກົນ
ການເຄື່ອໄຫວຂອງສື່ມວນຊົນຕ່າງປະເທດ, ສໍານັກງານການທູດຕ່າງປະເທດ ແລະ ອົງການຈັດຕັ້ງສາກົນທາງດ້ານສື່ມວນຊົນ ຢູ່ ສປປ ລາວ ໃຫ້ປະຕະບັດຕາມກົດໝາຍ ແລະ ລະບຽບການທີ່ກ່ຽວຂ້ອງຂອງ ສປປ ລາວ.
ພາກທີ V
ຂໍ້ຫ້າມ
ມາດຕາ 66 (ປັບປຸງ) ຂໍ້ຫ້າມສໍາລັບອົງການສື່ມວນຊົນ
ຫ້າມອົງການສື່ມວນຊົນ ມີພຶດຕິກໍາ ດັ່ງນີ້:
- ຍຸຍົງສົ່ງເສີມການກະທໍາທີ່ເປັນການສ້າງຄວາມເຊື່ອມເສຍໃຫ້ແກ່ຜົນປະໂຫຍດຂອງຊາດ ແລະ ປະຊາຊົນ;
- ເປີດເຜີຍຄວາມລັບຂອງຊາດ, ຄວາມລັບທາງລັດຖະການ, ບຸກຄົນ, ນິຕິບຸກຄົນ ຫຼື ການຈັດຕັ້ງ;
- ແບ່ງແຍກຄວາມສາມັກຄີ, ສ້າງຄວາມອາຄາດບາດໝາງລະຫວ່າງປະຊາຊົນລາວບັນດາເຜົ່າ, ສາສະໜາ ແລະ ຄວາມສາມັກຄີລະຫວ່າງຊາດ;
- ສົ່ງເສີ່ມການໃຊ້ຄວາມຮຸນແຮງ ແລະ ການໂຄສະນາຮັບໃຊ້ສົງຄາມຮຸກຮານທຸກປະເທດ;
- ອອກຂ່າວບິດເບືອນຄວາມຈິງ, ແຕະຕ້ອງເຖິງກຽດສັກສີຂອງ ບຸກຄົນ, ນິຕິບຸກຄົນ ຫຼື ການຈັກຕັ້ງ;
- ໂຄສະນາຍຸຍົງສົ່ງເສີ່ມການກໍ່ອາຊະຍາກໍາ ແລະ ອະບາຍຍະມຸກ ເຊັ່ນ ການເສບສິ່ງເສບຕິດ, ການຫຼິ້ນການພະນັນ, ການເປັນນັກເລງອັນຕະພານ, ການທໍາສິ່ງລາມົກອານາຈານ, ແບບແຜນດໍາລົງຊີວິດເປື່ອຍເຍື່ອຍດ ລ້າຫຼັງ.
- ໂຄສະນາ, ເຜີຍແຜ່ສິ່ງມຶນເມົາເກີນຂອບເຂດ, ການເຊື່ອຖືງົມງວຍ, ການກະທໍາທີ່ຂັດກັບຮີດຄອງປະເພນີວັດທະນະທໍາອັນດີງາມຂອງຊາດ, ພາບ, ສຽງ ແລະ ການກະທໍາ ທີ່ກະທົບຕໍ່ຊີວິດ ແມ່ ແລະ ເດັກ ແລະ ສິ່ງຫຍໍ້ທໍ້ອື່ນໆ;
- ເຜີຍແຜ່ຂ່າວ, ບົດ ແລະ ລາຍການ ທີ່ມີຄໍາສັ່ງຫ້າມ ຫຼື ຖືກຍຶດໄວ້ແລ້ວ;
- ພິມ, ກະຈາຍຂໍ້ມູນ ຂ່າວສານ, ຜະລິດຕະພັນສື່ມວນຊົນທຸກປະເພດທີ່ຖືກອົງການຄຸ້ມຄອງສື່ມວນຊົນຍຶດ ຫ້າມເຜີຍແຜ່;
- ຂົ່ມຂູ່, ລວງລະເມີດແກ່ສັກສີ ຂອງບັນນາທິການ, ນັກຂ່າວ, ບຸກຄະລາກອນສື່ມວນຊົນ, ທໍາລາຍອຸປະກອນສື່ມວນຊົນ, ຂັດຂວາງການປະຕິບັດວຽກງານວິຊາສະເພາະຂອງນັກຂ່າວຕາມກົດໝາຍ;
- ມີພຶດຕິກໍາອື່ນ ທີ່ເປັນການລະເມີດກົດໝາຍ ແລະ ລະບຽບການ,
ມາດຕາ 67 (ປັບປຸງ) ຂໍ້ຫ້າມສໍາລັບ ບຸກຄະລາກອນສື່ມວນຊົນ
ຫ້າມບຸກຄະລາກອນສື່ມວນຊົນ ມີ ພຶດຕິກໍາ ດັ່ງນີ້:
- ສວຍໃຊ້ຕໍາແໜ່ງ, ໜ້າທີ່, ສິດອໍານາດ ເພື່ອຫາຜົນປະໂຫຍດສ່ວນຕົວ, ຄອບຄົວ ຫຼື ຍາດຕິພີ່ນ້ອງ;
- ປະຕິບັດສິດ, ໜ້າທີ່ສື່ມວນຊົນເກີນຂອບເຂດຂອງຂໍ້ຕົກລົງ ຫຼື ລະເມີດກົດໝາຍ ແລະ ລະບຽບການຂອງສື່ມວນຊົນ;
- ສ້າງຂໍ້ມູນ ຂ່າວສານທຸກປະເພດທີ່ຂັດກັບຈັນຍາບັນຂອງນັກຂ່າວລາວ;
- ໃຊ້ພາສາຊອດກະຈາ ແລະ ຄວາມຫຍາບຊ້າ;
- ນຸ່ງຖື ແລະ ແຕ່ງກາຍບໍ່ສຸພາບໃນເວລາອອກອາກາດທາງໂທລະພາບ;
- ລະເມີດຂໍ້ຫ້າມສໍາລັບອົງການສື່ມວນຊົນຕາມທີ່ໄດ້ກໍານົດໄວ້ໃນມາດຕາ 66 ຂອງກົດໝາຍສະບັບນີ້;
- ມີພຶດຕິກໍາອື່ນ ທີ່ເປັນການລະເມີດກົດໝາຍ ແລະ ລະບຽບການ.
ມາດຕາ 68 (ປັບປຸງ) ຂໍ້ຫ້າມສໍາລັບ ບຸກຄົນ, ນິຕິບຸກຄົນ ແລະ ການຈັດຕັ້ງອື່ນ
ຫ້າມ ບຸກຄົນ, ນິຕິບຸກຄົນ ແລະ ການຈັດຕັ້ງອື່ນ ມີພຶດຕິກໍາດັ່ງນີ້:
- ຂັດຂວາງການເຄື່ອນໄຫວຂອງນັກຂ່າວ ແລະ ແຊກແຊງເນື້ອໃນຂອງຂ່າວ, ບົດ ແລະ ລາຍການທີ່ຖືກຕ້ອງ ຕາມກົດໝາຍ ແລະ ລະບຽບການ;
- ຂັດຂວາງການຜະລິດ ແລະ ການເຜີຍແຜ່ຜະລິດຕະພັນສື່ມວນຊົນທຸກປະເພດທີ່ຖືກຕ້ອງຕາມກົດໝາຍ ແລະ ລະບຽບການ;
- ຜະລິດ, ນໍາເຂົ້າ, ສົ່ງອອກ ແລະ ເຜີຍແຜ່ຜະລິດຕະພັນສື່ມວນຊົນ ໂດຍບໍ່ໄດ້ຮັບອະນຸຍາດ;
- ໃຫ້ສິນບົນແກ່ນັກຂ່າວ ຫຼື ອົງການສື່ມວນຊົນເພື່ອອອກຂ່າວ, ບົດ ຕາມຈິດໃຈຂອງຕົນ;
- ໃຊ້ຄວາມຮຸນແຮງ, ບັງຄັບ,ໃສ່ຮ້າຍປ້າຍສີ, ໝິ່ນປະໝາດ, ຮ້າຍດ່າ, ໃຊ້ຄວາມຫຍາບຊ້າ, ນາບຂູ່ ຫຼື ທໍາຮ້າຍບຸກຄະລາກອນສື່ມວນຊົນ, ຜູ້ໃຫ້ຂໍ້ມູນ ຫຼື ບຸກຄົນທີ່ກ່ຽວຂ້ອງກັບການໃຫ້ຂ່າວ;
- ມີພຶດຕິກໍາອື່ນ ທີ່ເປັນການລະເມີດກົດໝາຍ ແລະ ລະບຽບການ.
ພາກທີ VI
ການຄຸ້ມຄອງ ແລະ ການກວດກາສື່ມວນຊົນ
ໝວດທີ 1
ການຄຸ້ມຄອງ
ມາດຕາ 69 (ປັບປຸງ) ອົງການຄຸ້ມຄອງສື່ມວນຊົນ
ລັດຖະບານ ຄຸ້ມຄອງສື່ມວນຊົນຢ່າງລວມສູນ ແລະ ເປັນເອກະພາບໃນຂອບເຂດທົ່ວປະເທດ ໂດຍມອບໃຫ້ກະຊວງຖະແຫຼງຂ່າວ, ວັດຖະນະທໍາ ແລະ ທ່ອງທ່ຽວ ຮັບຜິດຊອບໂດຍກົງ ແລະ ເປັນເຈົ້າການປະສານສົມທົບກັບບັນດາກະຊວງ, ຂະແໜງການອື່ນ ແລະ ອົງການປົກຄອງທ້ອງຖິ່ນທີ່ກ່ຽວຂ້ອງ.
ອົງການຄຸ້ມຄອງສື່ມວນຊົນ ປະກອບດ້ວຍ:
- ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ;
- ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງ, ນະຄອນຫຼວງ;
- ຫ້ອງການຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວ ເມືອງ, ເທດສະບານ, ນະຄອນ.
ມາດຕາ 70 (ປັບປຸງ) ສິດ ແລະ ໜ້າທີ່ ຂອງກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ
ໃນການຄຸ້ມຄອງສື່ມວນຊົນ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ມີ ສິດ ແລະ ໜ້າທີ່ດັ່ງນີ້:
- ຄົ້ນຄວ້າ ແລະ ສະເໜີທາງກົດໝາຍ, ນະໂຍບາຍ, ແຜນຍຸດທະສາດ, ແຜນງານ, ແຜນການພັດທະນາວຽກງານຖະແຫຼງຂ່າວ ແລະ ຊື່ມວນຊົນຕໍ່ລັດຖະບານ ເພື່ອພິຈາລະນາ, ຕົກລົງ ແລ້ວຈັດຕັ້ງປະຕິບັດ;
- ໂຄສະນາ, ເຜີຍແຜ່ກົດໝາຍ ແລະ ລະບຽບການກ່ຽວກັບສື່ມວນຊົນ;
- ຈັດຕັ້ງ, ຄຸ້ມຄອງ ແລະ ຊີ້ນໍາການເຄື່ອນໄຫວຂອງອົງການສື່ມວນຊົນໃນຂອບເຂດທົ່ວປະເທດ;
- ສ້າງ, ບໍາລຸງ, ຍົກລະດັບໃຫ້ແກ່ພະນັກງານສື່ມວນຊົນທາງດ້ານການເມືອງ, ວິຊາສະເພາະ ແລະ ຈັນຍາບັນ;
- ຄົ້ນຄວ້າ, ກໍານົດມາດຕະຖານເຕັກນິກ ແລະ ນໍາໃຊ້ວິທະຍາສາດ, ເຕັກໂນໂລຊີທີ່ກ້າວໜ້າ, ທັນສະໄໝໃນຂົງເຂດສື່ມວນຊົນ;
- ຄົ້ນຄ້ວາ, ພິຈາລະນາ, ອະນຸຍາດ, ໂຈະ ແລະ ຖອນໃບອະນຸຍາດເຄື່ອນໄຫວວຽກງານສື່ມວນຊົນທີ່ຢູ່ໃນຄວາມຮັບຜິດຊອບຂອງຕົນ;
- ອະນຸຍາດ ແລະ ຍົກເລີກ ການຖ່າຍທອດສົດ, ການນໍາໃຊ້ຊ່ອງໂທລະພາບ, ການນໍາເຂົ້າ-ສົ່ງອອກ ຜະລິດຕະພັນສື່ມວນຊົນທຸກຊະນິດ ຕາມຄວາມຮັບຜິດຊອບຂອງຕົນ ແລະ ຈັດສັນຄື້ນຄວາມຖີ່;
- ອະນຸຍາດນໍາເຂົ້າ, ສົ່ງອອກ ແລະ ຄຸ້ມຄອງ ອຸປະກອນສື່ເອເລັກໂຕຣນິກ;
- ຄຸ້ມຄອງສື່ສິ່ງພິມ, ສື່ເອເລັກໂຕຣນິກ ແລະ ການສໍາເນົາຜະລິດຕະພັນສື່ມວນຊົນໃນຂອບເຂດທີ່ຕົນຮັບຜິດຊອບ;
- ປະຕິບັດນະໂຍບາຍ ແລະ ມາດຕະການຕ່າງໆ ຕໍ່ອົງການສື່ມວນຊົນ ແລະ ບຸກຄະລາກອນຂອງສື່ມວນຊົນທີ່ຕົນຮັບຜິດຊອບ;
- ສະກັດກັ້ນ, ແກ້ໄຂຄໍາສະເໜີ ແລະ ການເຄື່ອນໄຫວຂອງສື່ມວນຊົນທີ່ຂັດກັບກົດໝາຍ ແລະ ລະບຽບການ ຕາມພາລະບົດບາດຂອງຕົນ;
- ປະສານສົມທົບກັບຂະແໜງການອື່ນທີ່ກ່ຽວຂ້ອງ ແລະ ອົງການປົກຄອງ ແຂວງ, ນະຄອນຫຼວງ ໃນການຄຸ້ມຄອງການເຄື່ອນໄຫວຂອງສື່ມວນຊົນ ລວມທັງສື່ມວນຊົນລາວທີ່ພົວພັນກັບຕ່າງປະເທດ ແລະ ຄຸ້ມຄອງການເຄື່ອນໄຫວຂອງສື່ມວນຊົນຕາງປະເທດຢູ່ ສປປ ລາວ.
- ຕິດຕາມ ແລະ ສັງລວມຜົນການໂຄສະນາ, ຖະແຫຼງຂ່າວຂອງສື່ມວນຊົນໃນແຕ່ລະໄລຍະ, ສັງລວມວິໄຈຂ່າວຂອງສື່ມວນຊົນຕ່າງປະເທດກ່ຽວກັບ ສປປ ລາວ ເພື່ອເປັນຂໍ້ມູນ ແລະ ລາຍງານຕໍ່ລັດຖະບານຢ່າງເປັນປົກກະຕິ;
- ກວດກາ, ວິເຄາະ ແລະ ຄົ້ນຄ້ວາຂໍ້ມູນ ຂ່າວສານ ທີ່ເຜີຍແຜ່ລົງໃນສື່ແບບໃໝ່, ຖະແຫຼງຂ່າວຢ່າງເປັນທາງການ ເພື່ອຊີ້ແຈງຂໍ້ມູນ ຂ່າວສານທີ່ບໍ່ຖືກຕ້ອງ ແລະ ປະສານສົມທົບກັບຂະແໜງການທີ່ກ່ຍວຂ້ອງເພື່ອແຈ້ງຂໍ້ມູນ ຂ່າວສານທີ່ມີຄວາມສ່ຽງຕໍ່ຄວາມໝັ້ນຄົງຂອງຊາດ ແລະ ຄວາມເປັນລະບຽບຮຽບຮ້ອຍຂອງສັງຄົມ;
- ພົວພົນ ແລະ ຮ່ວມມືກັບສາກົນທາງດ້ານສື່ມວນຊົນຕາມການມອບໝາຍ;
- ນໍາໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກໍານົດໄວ້ໃນກົດໝາຍ ແລະ ລະບຽບການ.
ມາດຕາ 71 (ປັງປຸງ) ສິດ ແລະ ໜ້າທີ່ຂອງພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງ,ນະຄອນຫຼວງ
ໃນການຄຸ້ມຄອງສື່ມວນຊົນ ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງ, ນະຄອນຫຼວງ ມີສິດ ແລະ ໜ້າທີ່ ດັ່ງນີ້:
- ຄົ້ນຄວ້າ, ເຜີຍແຜ່ ແລະ ຈັດຕັ້ງປະຕິບັດ ນະໂຍບາຍ, ແຜນງານ, ແຜນການ, ກົດໝາຍ ແລະ ລະບຽບການ, ຄໍາສັ່ງ, ຄໍາແນະນໍາ, ແຈ້ງການກ່ຽວກັບສື່ມວນຊົນ;
- ຄົ້ນຄ້ວາ ແລະ ຕົກລົງທິດທາງ, ແຜນການໂຄສະນາໃຫ້ແກ່ສື່ມວນຊົນຂອງຕົນໃນແຕ່ລະໄລຍະ;
- ຄົ້ນຄ້ວາ ແລະ ສະເໜີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ພິຈາລະນາ ສ້າງຕັ້ງ ແລະ ຖອນໃບອະນຸຍາດເຄື່ອນໄຫວວຽກງານສື່ມວນຊົນທີ່ຂຶ້ນກັບຕົນ ໂດຍຜ່ານອົງການປົກຄອງ ແຂວງ, ນະຄອນຫຼວງ;
- ຄຸ້ມຄອງ ແລະ ຊີ້ນໍາການເຄື່ອນໄຫວຂອງສື່ມວນຊົນທີ່ຕົນຮັບຜິດຊອບ;
- ຄົ້ນຄ້ວາ, ສະເໜີແຜນການ ສ້າງ ແລະ ຍົກລະດັບ ບຸກຄະລາກອນສື່ມວນຊົນທີ່ຕົນຮັບຜິດຊອບ ຕໍ່ອົງການປົກຄອງ ແຂວງ, ນະຄອນຫຼວງ ແລະ ຂະແໜງການທີ່ກ່ຽວຂ້ອງ;
- ຂຶ້ນແຜນຄຸ້ມຄອງ,ປັບປຸງ ແລະ ຂະຫຍາຍວຽກງານສື່ມວນຊົນ ເພື່ອຮັບໃຊ້ໜ້າທີ່ການເມືອງ ແລະ ການບໍລິການປະຊາຊົນລາວບັນດາເຜົ່າຢູ່ພາຍໃນ ແຂວງ, ນະຄອນຫຼວງ ໃຫ້ວ່ອງໄວ, ແຫຼມຄົມ ແລະ ມີປະສິດຜົນ;
- ຄຸ້ມຄອງການເຄື່ອນໄຫວຂອງນັກຂ່າວພາຍໃນ ແລະ ຕ່າງປະເທດ ທີ່ເຄື່ອນໄຫວເກັບກໍາຂ່າວຢູ່ພາຍໃນ ແຂວງ, ນະຄອນຫຼວງ ຕາມກົດໝາຍ ແລະ ລະບຽບການ;
- ຄຸ້ມຄອງພາຫະນະສື່ມວນຊົນ ແລະ ການນໍາເຂົ້າ-ສົ່ງອອກ ອຸປະກອນສື່ເອເລັກໂຕຣນິກ ແລະ ຜະລິດຕະພັນສື່ມວນຊົນທຸກຊະນິດ ຕາມຄວາມຮັບຜິດຊອບຂອງຕົນ ແລະ ລະບຽບການ;
- ແນະນຳ, ປຸກລະດົມ, ຊຸກຍູ້, ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ກ່ຽວຂ້ອງເພື່ອເກັບກໍາຂ່າວ ແລະສະໜອງຂ່າວ ໃຫ້ແກ່ສື່ມວນຊົນ;
- ແກ້ໄຂຄຳສະເໜີ, ປະຕິບັດນະໂຍບາຍ ແລະ ມາດຕະການຕ່າງໆ ຕໍ່ອົງການສື່ມວນຊົນ ແລະ ບຸກຄະລາກອນຂອງສື່ມວນຊົນທີ່ຕົນຮັບຜິດຊອບ;
- ຕິຕາມ, ສະຫຼຸບ, ສັງລວມສະທິຕິ ແລະ ປະເມີນຜົນວຽກງານສື່ມວນຊົນ ແລ້ວລາຍງານໃຫ້ເຈົ້າແຂວງ, ເຈົ້ານະຄອນຫຼວງ ແລະ ກະຊວງຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວ ຢ່າງເປັນປົກກະຕິ;
- ຕິດຕາມ ກວດກາ, ວິເຄາະຂໍ້ມູນ ຂ່າວສານ ທີ່ເຜີຍແຜ່ລົງໃນສື່ແບບໃໝ່, ຖະແຫຼງຂ່າວຢ່າງເປັນທາງການເພື່ອຊີ້ແຈງຂໍ້ມູນ ຂ່າວສານທີ່ບໍ່ຖືກຕ້ອງ ແລະ ມີຜົນກະທົບຕໍ່ແຂວງ, ນະຄອນຫຼວງ ແລະ ປະສານສົມທົບກັບ ຂະແໜງການທີ່ກ່ຽວຂ້ອງ ເພື່ອຊີ້ແຈງຂໍ້ມູນ ຂ່າວສານ ທີ່ມີຄວາມສ່ຽງຕໍ່ຄວາມໝັ້ນຄົງ ແລະ ຄວາມເປັນລະບຽບຮຽບຮ້ອຍຂອງສັງຄົມພາຍໃນ ແຂວງ, ນະຄອນຫຼວງ;
- ພົວພັນຮ່ວມມືດ້ານສື່ມວນຊົນກັບຕ່າງປະເທດ ຕາມການມອບໝາຍຂອງອົງການທີ່ມີສິດອໍານາດ;
- ນໍາໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກໍານົດໄວ້ໃນກົດໝາຍ ແລະ ລະບຽບການ;
ມາດຕາ 72 (ປັບປຸງ) ສິດ ແລະ ໜ້າທີ່ຂອງຫ້ອງການຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວ ເມືອງ, ເທດສະບານ, ນະຄອນ
ໃນການຄຸ້ມຄອງສື່ມວນຊົນ ຫ້ອງການຖະແຫຼງຂ່າວ, ວັດຖະນະທໍາ ແລະ ທ່ອງທ່ຽວ ເມືອງ, ເທດສະບານ, ນະຄອນ ມີສິດ ແລະ ໜ້າທີ່ ດັ່ງນີ້:
- ເຜີຍແຜ່ ແລະ ຈັດຕັ້ງປະຕິບັດກົດໝາຍ ແລະ ລະບຽບການ, ຄໍາສັ່ງ, ຄໍາແນະນໍາ, ແຈ້ງການກ່ຽວກັບສື່ມວນຊົນຢູ່ພາຍໃນຕົວເມືອງ, ເທດສະບານ, ນະຄອນຂອງຕົນ;
- ແນະນໍາ, ປຸກລະດົມ, ຊຸກຍູ້ການຈັດຕັ້ງຮາກຖານຢູ່ພາຍໃນຕົວເມືອງ, ເທດສະບານ, ນະຄອນ ຂອງຕົນ ເພື່ອເກັບກໍາຂ່າວ ແລະ ສະໜອງໃຫ້ແກ່ສື່ມວນຊົນ;
- ຄົ້ນຄ້ວາ ແລະ ສະເໜີ ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງ, ນະຄອນຫຼວງ ເພື່ອຂໍອະນຸຍາດ ແລະ ຖອນໃບອະນຸຍາດເຄື່ອນໄຫວວຽກງານສື່ມວນຊົນທີ່ຂຶ້ນກັບຕົນ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ;
- ຄຸ້ມຄອງພາຫະນະສື່ມວນຊົນທີ່ເຄື່ອນໄຫວຢູ່ ເມືອງ, ເທດສະບານ, ນະຄອນ ຂອງຕົນໃຫ້ຖືກຕ້ອງຕາມກົດໝາຍ ແລະ ລະບຽບການ;
- ຄົ້ນຄ້ວາ, ສະເໜີແຜນການ ສ້າງ ແລະ ຍົກລະດັບ ບຸກຄະລາກອນສື່ມວນຊົນທີ່ຕົນຮັບຜິດຊອບ ຕໍ່ອົງການປົກຄອງເມືອງ, ເທດສະບານ, ນະຄອນ ແລະ ຂະແໜງການທີ່ກ່ຽວຂ້ອງ;
- ຄຸ້ມຄອງການເຄື່ອນໄຫວຂອງນັກຂ່າວພາຍໃນ ແລະ ຕ່າງປະເທດທີ່ເຄື່ອນໄຫວເກັບກໍາຂ່າວຢູ່ພາຍໃນເມືອງ, ເທດສະບານ, ນະຄອນ ຂອງຕົນ;
- ຄຸ້ມຄອງພາຫະນະສື່ມວນຊົນ ແລະ ການນໍາເຂົ້າ-ສົ່ງອອກ ອຸປະກອນສື່ເອເລັກໂຕຣນິກ ແລະ ຜະລິດຕະພັນສື່ມວນຊົນທຸກຊະນິດ ຕາມຄວາມຮັບຜິດຊອບຂອງຕົນ ແລະ ລະບຽບການ;
- ຕິດຕາມ, ສະຫຼຸບ, ສັງລວມສະຖິຕິ ແລະ ປະເມີນຜົນວຽກງານສື່ມວນຊົນ ແລ້ວລາຍງານໃຫ້ ເຈົ້າເມືອງ, ຫົວໜ້າເທດສະບານ, ເຈົ້ານະຄອນ ແລະ ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງ, ນະຄອນຫຼວງ ຢ່າງເປັນປົກກະຕິ;
- ກວດກາ, ວິເຄາະຂໍ້ມູນ ຂ່າວສານ ທີ່ເຜີຍແຜ່ລົງໃນສື່ແບບໃໝ່, ຖະແຫຼງຂ່າວຢ່າງເປັນທາງການ ເພື່ອຊີ້ແຈງຂໍ້ມູນ ຂ່າວສານທີ່ມີຜົນກະທົບຕໍ່ ເມືອງ, ເທດສະບານ, ນະຄອນ ແລະ ປະສານສົມທົບກັບຂະແໜງການທີ່ກ່ຽວຂ້ອງ ເພື່ອແຈ້ງຂໍມູນ ຂ່າວສານ ທີ່ມີຄວາມສ່ຽງຕໍ່ຄວາມໝັ້ນຄົງ ແລະ ຄວາມເປັນລະບຽບຮຽບຮ້ອຍຂອງສັງຄົມພາຍໃນ ເມືອງ, ເທດສະບານ, ນະຄອນ;
- ນໍາໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກໍານົດໄວ້ໃນກົດໝາຍ ແລະ ລະບຽບການ.
ມາດຕາ 73 (ປັບປຸງ) ສິດ ແລະ ໜ້າທີ່ຂອງຂະແໜງການ ແລະ ພາກສ່ວນອື່ນ
ທຸກ ຂະແໜງການ, ອົງການ ແລະ ພາກສ່ວນອື່ນທີ່ກ່ຍວຂ້ອງ ມີສິດ ໜ້າທີ່ ປະສານສົມທົບກັບຂະແໜງການຖະແຫຼງຂ່າວວັດທະນະທໍາ ແລະ ທ່ອງທ່ຽວ ໃນການຄຸ້ມຄອງ, ສົ່ງເສີມ ແລະ ພັດທະນາວຽກງານສື່ມວນຊົນ ຕາມພາລະບົດບາດຂອງຕົນ.
ໝວດທີ 2
ການກວດກາ
ມາດຕາ 74 (ປັບປຸງ) ອົງການກວດກາສື່ມວນຊົນ
ອົງການກວດກາສື່ມວນຊົນປະກອບດ້ວຍ:
- ການກວດກາພາຍໃນ ຊຶ່ງແມ່ນອົງການດຽວກັນກັບອົງການຄຸ້ມຄອງສື່ມວນຊົນ ຕາມທີ່ໄດ້ກໍານົດໄວ້ໃນມາດຕາ 69 ຂອງກົດໝາຍສະບັບນີ້;
- ອົງການກວດກາພາຍນອກ ຊຶ່ງແມ່ນສະພາແຫ່ງຊາດ, ອົງການກວດສອບແຫ່ງລັດ, ອົງການກວດກາລັດຖະບານ ແລະ ຕ້ານການສໍ້ລາດບັງຫຼວງ, ແນວລາວສ້າງຊາດ, ອົງການຈັດຕັ້ງມະຫາຊົນ, ຄະນະສະເພາະກິດ, ສະພາປະຊາຊົນຂັ້ນແຂວງ ແລະ ພາກສ່ວນອື່ນທີ່ກ່ຽວຂ້ອງ;
ມາດຕາ 75 (ປັບປຸງ) ສິດ ແລະ ໜ້າທີ່ຂອງອົງການຄຸ້ມຄອງສື່ມວນຊົນໃນການກວດກາ
ອົງການຄຸ້ມຄອງສື່ມວນຊົນມີສິດ ແລະ ໜ້າທີ່ ໃນການກວດກາວຍກຂອງຕົນດັ່ງນີ້:
- ກວດກາການຈັດຕັ້ງປະຕິບັດກົດໝາຍ ແລະ ລະບຽບການ ກ່ຽວກັບສື່ມວນຊົນ;
- ກວດກາການເຄື່ອນໄຫວວຽກງານຂອງອົງການສື່ມວນຊົນ ຕາມຂອບເຂດຄວາມຮັບຜິດຊອບຂອງຕົນ;
- ອອກຄໍາສັ່ງ, ຄໍາແນະນໍາ, ແຈ້ງການໃຫ້ອົງການສື່ມວນຊົນທີ່ຂຶ້ນກັບຕົນ ເພື່ອປັບປຸງ, ປ່ຽນແປງ ຫຼື ຢຸດເຊົາການເຄື່ອນໄຫວວຽກງານສື່ມວນຊົນທີ່ເຮັດວ່າບໍ່ສອດຄ່ອງກັບກົດໝາຍ ແລະ ລະບຽບການ;
- ສະເໜີໃຫ້ການຈັດຕັ້ງທີ່ກ່ຽວຂ້ອງອອກຄໍາສັ່ງ, ແນະນໍາ ຫຼື ແຈ້ງການໃຫ້ປັບປຸງ, ປ່ຽນແປງ ຫຼື ໃຫ້ຢຸດເຊົາການເຄື່ອນໄຫວວຽກງານສື່ມວນຊົນ ຖ້າເຫັນວ່າບໍ່ຖືກຕ້ອງກັບກົດໝາຍ ແລະ ລະບຽບການ ຫຼື ມີການລະເມີດຂໍ້ຫ້າມ ຕາມແຕ່ກໍລະນີທີ່ໄດ້ກໍານົດໄວ້ໃນ ມາດຕາ 66, 67 ແລະ 68 ຂອງກົດໝາຍສະບັບນີ້;
- ພົວພັນປະສານສົມທົບກັບພາກສ່ວນອື່ນ ທີ່ກ່ຽວຂ້ອງຢູ່ ສູນກາງ ແລະ ທ້ອງຖິ່ນ ໃນການປະຕິບັດວຽກງານກວດກາຂອງຕົນ;
- ສະຫຼຸບ ແລະ ລາຍງານຜົນຂອງການປະຕິບັດວຽກງານກວດກາແຕ່ລະໄລຍະ ແລະ ໃຫ້ຂັ້ນເທິງຂອງຕົນຢ່າງເປັນປົກກະຕິ;
- ນໍາໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກໍານົດໄວ້ໃນກົດໝາຍ ແລະ ລະບຽບການ.
ມາດຕາ 76 (ປັບປຸງ) ເນື້ອໃນການກວດກາ
ການກວດກາສື່ມວນຊົນ ມີ ເນື້ອໃນຕົ້ນຕໍ ດັ່ງນີ້:
- ການກວດກາ ສ້າງ ແລະ ປະຕິບັດແຜນການ, ໂຄງການຂອງອົງການສື່ສານມວນຊົນແຕ່ລະໄລຍະ;
- ກວດກາເນື້ອໃນການອອກຂ່າວ, ບົດ ແລະ ລາຍການຜ່ານສື່ສິ່ງພິມ ແລະ ສື່ເອເລັກໂຕຣນິກ;
- ກວດກາການສ້າງ, ບໍາລຸງ, ນໍາໃຊ້ ແລະ ປະຕິບັດນະໂຍບາຍຕໍ່ບຸກຄະລາກອນຂອງສື່ມວນຊົນ;
- ກວດກາການປະກອບ ແລະ ການນໍາໃຊ້ພື້ນຖານວັດຖຸ, ພາຫະນະ, ອຸປະກອນ ແລະ ງົບປະມານຂອງສື່ມວນຊົນ;
- ກວດກາການປະຕິບັດກົດໝາຍ ແລະ ລະບຽບການຂອງສື່ມວນຊົນ;
ມາດຕາ 77 (ປັບປຸງ) ຮູບການກວດກາ
ການກວດກາສື່ມວນຊົນ ດໍາເນີນການດ້ວຍສາມຮູບການດັ່ງນີ້:
- ການກວດກາຕາມລະບົບປົກກະຕິ;
- ການກວດກາໂດຍມີການແຈ້ງໃຫ້ຮູ້ລວງໜ້າ;
- ການກວດກາແບບກະທັນຫັນ;
ການກວດກາຕາມລະບົບປົກກະຕິ ແມ່ນ ການກວດກາທີ່ໄດ້ດໍາເນີນໄປຕາມແຜນການຢ່າງເປັນປະຈໍາ ແລະ ມີກໍານົດເວລາອັນແນ່ນອນ;
ການກວດກາໂດຍມີການແຈ້ງໃຫ້ຮູ້ລວງໜ້າ ແມ່ນ ການກວດກາຕາມຄໍາສັ່ງ, ຂໍ້ຕົກລົງດ ຄໍາແນະນໍາ, ແຈ້ງການ ຂອງອົງການຄຸ້ມຄອງສື່ມວນຊົນ, ອົງການທີ່ກ່ຽວຂ້ອງຂອງລັດ ແລະ ຄໍາສະເໜີຂອງພົນລະເມືອງ ໂດຍແຈ້ງໃຫ້ເປົ້າໝາຍຮູ້ກ່ອນລວງໜ້າ.
ການກວດກາແບບກະທັນຫັນ ແມ່ນ ການກວດກາຢ່າງຮີບດ່ວນ ໂດຍບໍ່ໄດ້ແຈ້ງໃຫ້ເປົ້າໝາຍຮູ້ກ່ອນລວງໜ້າ.
ໃນການດໍາເນີນການກວດກາສື່ມວນຊົນແຕ່ລະຮູບການເຈົ້າໜ້າທີ່ກວດກາ ຕ້ອງປະຕິບັດສິດ ແລະ ໜ້າທີ່ໃຫ້ຖືກຕ້ອງ ຕາມກົດໝາຍ ແລະ ລະບຽບການຢ່າງເຂັ້ມງວດ.
ມາດຕາ 78 (ໃໝ່) ເປົ້າໝາຍການກວດກາ
ເປົ້າໝາຍຂອງການກວດກາ ແມ່ນ ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ຂຶ້ນກັບຄວາມຮັບຜິດຊອບຂອງອົງການຄຸ້ມຄອງສື່ມວນຊົນ, ອົງການຈັດຕັ້ງອື່ນຂອງລັດ, ອົງການຈັດຕັ້ງມະຫາຊົນ.
ພາກທີ VII
ວັນ, ງົບປະມານ, ເຄື່ອງໝາຍ ແລະ ຕາປະທັບຂອງສື່ມວນຊົນ
ມາດຕາ 79 ວັນສື່ມວນຊົນແຫ່ງຊາດ
ວັນທີ 13 ສິ່ງຫາ ແມ່ນ ວັນສື່ມວນຊົນແຫ່ງຊາດ, ສໍາລັບສື່ມວນຊົນແຕ່ລະປະເພດ ກໍມີວັນສະເພາະຂອງຕົນເພື່ອສະເຫຼີມສະຫຼອງ ແລະ ຫວນຄືນເຖິງມູນເຊື້ອ, ຜົນງານ, ບົດຮຽນເພື່ອປັບປຸງ, ພັດທະນາວຽກງານສື່ມວນຊົນໃຫ້ດີຂຶ້ນ.
ມາດຕາ 80 (ປັບປຸງ) ງົບປະມານຂອງອົງການສື່ມວນຊົນ
ອົງການສື່ມວນຊົນຂອງລັດ ມີງົບປະມານ ຊຶ່ງໄດ້ມາຈາກງົບປະມານຂອງລັດ, ລາຍຮັບຈາກການບໍລິການ, ການປະກອບສ່ວນຂອງສັງຄົມ.
ອົງການສື່ມວນຊົນຂອງພາກສ່ວນອື່ນ ມີງົບປະມານເປັນຂອງຕົນ ແລະ ສາມາດສ້າງກອງທຶນ ເພື່ອພັດທະນາສື່ມວນຊົນ ດ້ວຍການຈັດກິດຈະກໍາ ຫຼື ໃຫ້ການບໍລິການ ຢ່າງຖືກຕ້ອງ ແລະ ສອດຄ່ອງກັບກົດໝາຍ ແລະ ລະບຽບການ.
ການຄຸ້ມຄອງ, ການນໍາໃຊ້ງົບປະມານ ແລະ ກອງທຶນດັ່ງກ່າວ ໃຫ້ປະຕິບັດຕາມກົດໝາຍ ແລະ ລະບຽບການທີ່ກ່ຽວຂ້ອງ.
ມາດຕາ 81 ເຄື່ອງໝາຍ ແລະ ຕາປະທັບຂອງສື່ມວນຊົນ
ສື່ມວນຊົນແຕ່ລະປະເພດມີ ເຄື່ອງໝາຍ ແລະ ຕາປະທັບເປັນຂອງຕົນ ເພື່ອນໍາໃຊ້ເຂົ້າໃນການເຄື່ອນໄຫວວຽກງານທາງລັດຖະການ, ຊຶ່ງກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ເປັນຜູ້ວາງອອກ.
ພາກທີ VIII
ນະໂຍບາຍຕໍ່ຜູ້ມີຜົນງານ ແລະ ມາດຕະການຕໍ່ຜູ້ລະເມີດ
ມາດຕາ 82 ນະໂຍບາຍຕໍ່ຜູ້ມີຜົນງານ
ບຸກຄົນ ນິຕິບຸກຄົນ ຫຼື ການຈັດຕັ້ງ ທີ່ມີຜົນງານດີເດັ່ນ ໃນການປະກອບສ່ວນເຂົ້າໃນວຽກງານສື່ມວນຊົນຈະໄດ້ຮັບການຍ້ອງຍໍເຊັ່ນ ຫຼຽນໄຊ, ຫຼຽນກາ, ໃບຍ້ອງຍໍ, ນາມມະຍົດ ແລະ ນະໂຍບາຍອື່ນຕາມລະບຽບການ.
ມາດຕາ 83 ມາດຕະການຕໍ່ຜູ້ລະເມີດ
ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ລະເມີດກົດໝາຍ ແລະ ລະບຽບການ ກ່ຽວກັບວຽກງານສື່ມວນຊົນລວມທັງຂໍຫ້າມຕາມທີ່ໄດກໍານົດໄວ້ໃນມາດຕາ 66,67 ແລະ 68 ຂອງກົດໝາຍສະບັບນີ້ ຈະຖືກປະຕິບັດມາດຕະການ ຄື ສຶກສາອົບຮົມ, ກ່າວເຕືອນ, ປັບໄໝ, ໂຈະການເຄື່ອນໄຫວຊົ່ວຄາວ, ຖອນ ໃບອະນຸຍາດເຄື່ອນໄຫວວຽກງານສື່ມວນຊົນ, ບັດນັກຂ່າວ, ບັດນັກວິຊາການດ້ານສື່ມວນຊົນ, ໃຊ້ແທນຄ່າເສຍຫາຍທາງແພ່ງ ຫຼື ລົງໂທດທາງອາຍາ ຕາມແຕ່ລະກໍລະນີເບົາ ຫຼື ໜັກ.
ພາກທີ IX
ບົດບັນຍັດສຸດທ້າຍ
ມາດຕາ 84 ການຈັດຕັ້ງປະຕິບັດ
ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ເປັນຜູ້ຈັດຕັ້ງປະຕິບັດກົດໝາຍສະບັບນີ້.
ມາດຕາ 85 (ປັບປຸງ) ຜົນສັກສິດ
ກົດໝາຍສະບັບນີ້ ມີຜົນສັກສິດນັບແຕ່ວັນ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ອອກລັດຖະດໍາລັດປະກາດໃຊ້ ແລະ ພາຍຫຼັງໄດ້ລົງໃນຈົດໝາຍເຫດທາງລັດຖະການ ສິບຫ້າວັນ.
ກົດໝາຍສະບັບນີ້ ປ່ຽນແທນກົດໝາຍວ່າດ້ວຍ ສື່ມວນຊົນ ສະບັບເລກທີ 01\ສພຊ, ວັນທີ 25 ກໍລະກົດ 2008.
ຂໍ້ກໍານົດ, ບົດບັນຍັດໃດ ທີ່ຂັດກັບກົດໝາຍສະບັບນີ້ ລ້ວນແຕ່ຖືກຍົກເລີກ.
ປະທານສະພາແຫ່ງຊາດ
ປານີ ຢາທໍ່ຕູ້
| # | ຫົວຂໍ້ | ດາວໂຫຼດ |
|---|---|---|
| 1 | ກົດໝາຍ ວ່າດ້ວຍ ສື່ມວນຊົນ (ສະບັບປັບປຸງ) ເລກທີ 01/ສພຊ, ລົງວັນທີ 04 ພະຈິກ 2016 |  PDF |
| # | ຊື່ | ປະເພດ | ອົງກອນ | ລາຍລະອຽດ | ກົດໝາຍ | ສຶ້ນສຸດ | ໃຊ້ກັບ |
|---|---|---|---|---|---|---|---|
| 1 | ຕ້ອງໄດ້ຮັບອະນຸຍາດນຳເຂົ້າສື່ສິ່ງພິມ | ຕ້ອງມີໃບອະນຸຍາດ | ກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ | ສື່ສິ່ງພິມ ຕ້ອງໄດ້ຮັບອະນຸຍາດນຳເຂົ້າຈາກ ກົມສື່ມວນຊົນ, ກະຊວງ ຖວທ | ກົດໝາຍ ວ່າດ້ວຍ ສື່ມວນຊົນ (ສະບັບປັບປຸງ) ເລກທີ 01/ສພຊ, ລົງວັນທີ 04 ພະຈິກ 2016 | 9999-12-31 | ALL |
| 2 | ຕ້ອງໄດ້ຮັບອະນຸຍາດສົ່ງອອກສື່ສິ່ງພິມ | ຕ້ອງມີໃບອະນຸຍາດ | ກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ | ສື່ສິ່ງພິມ ຕ້ອງໄດ້ຮັບອະນຸຍາດສົ່ງອອກຈາກ ກົມສື່ມວນຊົນ, ກະຊວງ ຖວທ | ກົດໝາຍ ວ່າດ້ວຍ ສື່ມວນຊົນ (ສະບັບປັບປຸງ) ເລກທີ 01/ສພຊ, ລົງວັນທີ 04 ພະຈິກ 2016 | 9999-12-31 | ALL |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.