ໃນລະຫວ່າງວັນທີ 28 - 29ມິຖຸນາ 2018 ທີ່ກະຊວງອຸດສາຫະກຳ ແລະ ການຄ້າ, ກົມການນໍາເຂົ້າ ແລະ ສົ່ງອອກ ໄດ້ຈັດກອງປະຊຸມປຶກສາຫາລື ກ່ຽວກັບ ວຽກງານການຢັ້ງຢືນແຫຼ່ງກໍາເນີດສິນຄ້າ ໃຫ້ແກ່ເຈົ້າໜ້າທີ່ອອກ ແລະ ຄຸ້ມຄອງໃບຢັ້ງຢືນແຫຼ່ງກໍາເນີດສິນຄ້າໃນຂອບເຂດທົ່ວປະເທດ ໂດຍການເປັນປະທານຂອງ ທ່ານ ສຸລິຍົນ ພິລາວົງ, ຫົວໜ້າກົມການນຳເຂົ້າ ແລະ ສົ່ງອອກ. ໂດຍມີຜູ້ເຂົ້າຮ່ວມທັງໝົດ 60 ທ່ານມາຈາກພະແນກອຸດສາຫະກໍາ ແລະ ການຄ້ານະຄອນຫຼວງວຽງຈັນ ແລະ ແຂວງ, ສະພາການຄ້າ ແລະ ອຸດສາຫະກໍາແຫ່ງຊາດແຂວງ ແລະ ເຂດເສດຖະກິດພິເສດ.
ຈຸດປະສົງຂອງກອງປະຊຸມປຶກສາຫາລືໃນຄັ້ງນີ້ແມ່ນເພື່ອຕິດຕາມກວດກາ ແລະ ປະເມີນການຈັດຕັ້ງປະຕິບັດວຽກງານຄຸ້ມຄອງລະບຽບແຫຼ່ງກໍາເນີດສິນຄ້າຂອງ ສປປ ລາວ. ພາຍຫຼັງທີ່ກະຊວງອຸດສາຫະກໍາ ແລະ ການຄ້າໄດ້ມອບສິດໃຫ້ພະແນກອຸດສາຫະກໍາ ແລະ ການຄ້ານະຄອນຫຼວງວຽງຈັນ ແລະ ແຂວງ, ສະພາການຄ້າ ແລະ ອຸດສາຫະກໍາແຫ່ງຊາດ ແລະ ແຂວງ ແລະ ເຂດເສດຖະກິດພິເສດ ທັງໝົດ 36 ຫ້ອງການ ສາມາດອອກ ແລະ ຄຸ້ມຄອງໃບຢັ້ງຢືນແຫຼ່ງກໍາເນີດທີ່ໄດ້ຮັບສິດທິພິເສດທາງດ້ານການຄ້າຈຳນວນໜຶ່ງ ນັບແຕ່ປີ 2012 ເປັນຕົ້ນມາ.
ກອງປະຊຸມຈະໄດ້ດຳເນີນເປັນເວລາ 02 ວັນ ຊຶ່ງຈະມີລັກສະນະວິຊາການ ແລະ ລົງເລິກບັນຫາທີ່ພົບພໍ້ໃນເວລາປະຕິບັດຕົວຈິງ ໂດຍມີການທົບທວນຄືນສະພາບການຈັດຕັ້ງປະຕິບັດບັນດານິຕິກໍາທີ່ກ່ຽວຂ້ອງກັບການຄຸ້ມຄອງແຫຼ່ງກໍາເນີດສິນຄ້າ ຂອງ ສປປ ລາວ. ກອງປະຊຸມຂອງພວກເຮົາຈະເນັ້ນໃສ່ບັນຫາການເກັບກໍາ, ສະຫຼຸບ ແລະ ລາຍງານສະຖິຕິການສົ່ງອອກພາຍໃຕ້ສິດທິພິເສດທາງດ້ານການຄ້າ ແລະ ການເກັບກໍາ ແລະ ສັງລວມຂໍ້ມູນຂອງບໍລິສັດທີ່ນໍາໃຊ້ໃບຢັ້ງຢືນແຫຼ່ງກໍາເນີດສິນຄ້າ (Company Profile). ເນື່ອງຈາກວ່າ ວຽກງານສັງລວມສະຖິຕິຂໍ້ມູນຂ່າວສານແມ່ນໜຶ່ງໃນວຽກງານທີ່ສໍາຄັນແຕ່ພວກເຮົາຍັງເຮັດບໍ່ທັນໄດ້ດີເທົ່າທີ່ຄວນ ໂດຍສະເພາະ ພາຍຫຼັງທີ່ໄດ້ມອບສິດໃຫ້ບັນດາຫ້ອງການຕ່າງໆຄຸ້ມຄອງ. ສະນັ້ນ, ກໍ່ຕ້ອງໄດ້ທົບທວນຄືນບັນຫາຂໍ້ຄົງຄ້າງ ເພື່ອໃຫ້ມີການປັບປຸງແກ້ໄຂໃຫ້ດີຂຶ້ນ. ນອກຈາກນັ້ນ, ກໍ່ຍັງມີການປຶກສາວຽກງານທີ່ຕິດພັນກັບການນໍາເຂົ້າ ແລະ ສົ່ງອອກ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.