ກອງປະຊຸມເຜີຍແຜ່ ພາລະບົດບາດ, ສິດ ແລະ ໜ້າທີ່ຂອງການສ້າງຕັ້ງຄະນະກຳມະການອຳນວຍຄວາມສະດວກທາງດ້ານການຄ້າ ຂັ້ນແຂວງ/ນະຄອນຫຼວງຈະໄດ້ຈັດຂື້ນວັນທີ 27-28 ສິງຫາ 2018, ທີ່ ຫ້ອງປະຊຸມຂອງຫ້ອງວ່າການແຂວງຫຼວງນ້ຳທາ, ເຊິ່ງຈະຈັດໂດຍກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ. ກອງປະຊຸມດັ່ງກ່າວນີ້ຈະໄດ້ຮັບກຽດເປັນປະທານໂດຍ ທ່ານ ປອ. ແກ້ວມໍລະກົດ ສິດລາກອນ, ຮອງຫົວໜ້າກົມການນຳເຂົ້າ ແລະ ສົ່ງອອກ ເຊິ່ງຈະໄດ້ເຜີຍແຜ່ ພາລະບົດບາດ, ສິດ ແລະ ໜ້າທີ່ຂອງການສ້າງຕັ້ງຄະນະກຳມະການອຳນວຍຄວາມສະດວກທາງດ້ານການຄ້າ ຂັ້ນແຂວງ/ນະຄອນຫຼວງ ເປັນຕົ້ນແມ່ນ:
- ຄວາມໝາຍຄວາມສຳຄັນຂອງວຽກງານອຳນວຍຄວາມສະດວກທາງດ້ານການຄ້າ
- ສະຫຼຸບຕີລາຄາຄືນບັນຫາ ແລະ ສິ່ງທ້າທາຍການຈັດຕັ້ງແຜນດຳເນີນງານວຽກງານອຳນວຍຄວາມສະດວກທາງດ້ານການຄ້າ ປີ 2017-2022 ໃນໄລຍະ 01 ປີຜ່ານມາ
- ສະພາບລວມໃນປະຈຸບັນຂອງວຽກງານອຳນວຍຄວາມສະດວກທາງດ້ານການຄ້າ
- ວິໄສທັດ ແລະ ມາດຕະການຍຸດທະສາດ ແຜນດຳເນີນງານວຽກງານອຳນວຍຄວາມສະດວກທາງດ້ານການຄ້າ ປີ 2017-2022
- ເຜີຍແຜ່ຂໍ້ຕົກລົງ ຄະນະກຳມະການຊີ້ນຳລວມວຽກງານອຳນວຍຄວາມສະດວກທາງດ້ານການຄ້າ ສະບັບເລກທີ 48/ນຍ, ລົງວັນທີ 26/07/2018.
ນອກນີ້ ກໍຈະໄດ້ເຜີຍແຜ່ ແລະ ແນະນຳ ການຈັດຕັ້ງປະຕິບັດຄະນະກຳມະການຊີ້ນຳລວມວຽກງານອຳນວຍຄວາມສະດວກທາງດ້ານການຄ້າຂັ້ນແຂວງ ແລະ ນະຄອນຫຼວງ. ກອງປະຊຸມດັ່ງກ່າວ ກໍຍັງຈະເປັນເວທີໃນການປຶກສາຫາລື ແລະ ສະເໜີບັນຫາຕ່າງໆ ທີ່ຕິດພັນກັບການນຳເຂົ້າ ແລະ ສົ່ງອອກ ທີ່ຂະແໜງການກ່ຽວຂ້ອງຄຸ້ມຄອງອີກດ້ວຍ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.