ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ
ແຈ້ງການ
ເຖິງ: ບຸກຄົນ, ນິຕິບຸກຄົນ ແລະ ອົງການຈັດຕັ້ງຕ່າງໆ.
ເລື່ອງ: ເປີດນຳໃຊ້ລະບົບຂໍ້ມູນຂ່າວສານຄຸ້ມຄອງລາຍຮັບສ່ວຍສາອາກອນ (ລະບົບໃໝ່).
- ອິງຕາມຂໍ້ຕົກລົງສະບັບເລກທີ 2929/ກງ ລົງວັນທີ 31/08/2017 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຫ້ອງການກະຊວງການເງິນ;
ຫ້ອງການ ກະຊວງການເງິນ ຂໍຖືເປັນກຽດແຈ້ງມາຍັງທ່ານ ກ່ຽວກັບການເປີດນຳໃຊ້ລະບົບຂໍ້ມູນຂ່າວສານຄຸ້ມຄອງເກັບລາຍຮັບສ່ວຍສາອາກອນ “TaxRIS” (ລະບົບໃໝ່) ຂອງກົມສ່ວຍສາອາກອນ, ລາຍລະອຽດດັ່ງລຸ່ມນີ້:
1. ເລີ່ມແຕ່ວັນທີ 15/10/2018 ເປັນຕົ້ນໄປ ແມ່ນ ຈະອອກເລກປະຈຳຕົວຜູ້ເສຍອາກອນພ້ອມກັບໃບທະບຽນວິສາຫະກິດ ໃນເວລາທີ່ວິສາຫະກິດຂໍສ້າງຕັ້ງວິສາຫະກິດໃໜ່ຈາກພາກສ່ວນ ທະບຽນ ແລະ ຄຸ້ມຄອງວິສາຫະກິດ ຂອງກະຊວງ ອຸດສາຫະກຳ ແລະ ການຄ້າ ໃນຂອບເຂດທົ່ວປະເທດ, ບ່ອນທີ ພາກສ່ວນ ທະບຽນ ແລະ ຄຸ້ມຄອງວິສາຫະກິດນຳໃຊ້ລະບົບຄຸ້ມຄອງທະບຽນວິສາຫະກິດ ແລະ ມີການເຊື່ອມຕໍ່ສົ່ງຂໍ້ມູນກັຍລະບົບ “TaxRIS”;
2. ພາຍຫຼັງວິສາຫະກິດໄດ້ຮັບໃບທະບຽນວິສາຫະກິດທີ່ມີເລກປະຈຳຕົວຜູ້ເສຍອາກອນແລ້ວ ແມ່ນ ສາມາດດຳເນີນທຸລະກິດໄດ້ຖືກຕ້ອງຕາມລະບຽບກົດໝາຍ ແລະ ພາຍໃນ 90 ວັນ ນັບແຕ່ມື້ອອກໃບທະບຽນວິສາຫະກິດ ແມ່ນ ໃຫ້ວິສາຫະກິດດັ່ງກ່າວເຂົ້າມາພົວພັນນຳລັດຖະການສ່ວນສ່ວຍສາອາກອນ ເພື່ອປະກອບຂໍ້ມູນການແຈ້ງມອບອາກອນໃຫ້ຖືກຕ້ອງຄົບຖ້ວນຕາມລະບຽບ ແລະ ກົດໜາຍທີ່ກ່ຽວຂ້ອງ. ຖ້າວິສາຫະກິດໃດບໍ່ພົວພັນຫາລັດຖະການສ່ວຍສາອາກອນຕາມກຳນົດດັ່ງກ່າວ, ຖືວ່າວິສາຫະກິດດັ່ງກ່າວບໍ່ເຄື່ອນໄຫວ ແລະ ຈະຖືກປະຕິບັດຕາມ ມາດຕາ 22 ຂອງກົດໜາຍວ່າດ້ວຍວິສາຫະກິດ;
3. ສຳລັບວິສາຫະກິດທີ່ມີໃບທະບຽນວິສາຫະກິດອອກກ່ອນວັນທີ 15/10/2018, ວິສາຫະກິດທີ່ອອກໃບທະບຽນວິສາຫະກິດຢູ່ກັບພາກສ່ວນທະບຽນ ແລະ ຄຸ້ມຄອງວິສາຫະກິດ ທີ່ບໍ່ມີການເຊື່ອມຕໍ່ກັບລະບົບ TaxRIS ບໍ່ສາມາດອອກເລກປະຈຳຕົວຜູ້ເສຍອາກອນພ້ອມກັບໃບທະບຽນວິສາຫະກິດ, ວິສາຫະກິດທີ່ຂໍອານຸຍາດດຳເນີນທຸລະກິດຜ່ານຂະແໜງການອື່ນໆ ນອກຈາກຂະແໜງການຄ້າ ແລະ ຜູ້ເສຍອາກອນທີບໍ່ ແມ່ນ ວິສາຫະກິດ ເປັນຕົ້ນ: ບຸກຄົນທົ່ວໄປ, ອົງການຈັດຕັ້ງຕ່າງໆ ແມ່ນ ໃຫ້ຂໍເລກປະຈຳຕົວຜູ້ເສຍອາກອນຢູ່ຫ້ອງການສ່ວຍສາອາກອນບ່ອນທີ່ຕົນຂຶ້ນກັບ ຫຼຶ ສາມາດຂໍເລກປະຈຳຕົວຜູ້ເສຍອາກອນດ້ວຍຕົນເອງ ຜ່ານເວັບໄຊທ໌ (taxservice.mof.gov.la);
4.ວັນທີ 5/10/2018, ກົມສ່ວຍສາອາກອນຍ້າຍຈຸດບໍລິການຜູ້ເສຍອາກອນໄປຢູ່ສູນບໍລິການຊົ່ວຄາວ ທີ່ຕັ້ງຢູ່ບ້ານໂພນໄຊ, ເມືອງໄຊເສດຖາ, ນະຄອນຫຼວງວຽງຈັນ ດ້ານຫຼັງກະຊວງການເງິນ ຫຼຶ ດ້ານຫຼັງບໍລິສັດສະຕາຣໂທລະຄົມ;
5.ວັນທີ 5/11/2018, ເລີ່ມແຈ້ງມອບອາກອນໃນລະບົບໃໝ່ຕາມຮູບແບບການແຈ້ງອາກອນແບບໃໝ່ ແລະ ຜູ້ເສຍອາກອນສາມາດແຈ້ງມອບອາກອນດ້ວຍຕົນຜ່ານເວັບໄຊທ໌ (taxservice.mog.gov.la).
ດັ່ງນັ້ນ,ຈຶ່ງແຈ້ງມາຍັງທ່ານ ແລະ ປະຕິບັດຕາມດ້ວຍ.
ຫົວໜ້າຫ້ອງການ
ສົມບູນ ອິນທະປັດຖາ
| # | ຫົວຂໍ້ | ດາວໂຫຼດ |
|---|---|---|
| 1 | ແຈ້ງການວ່າດ້ວຍການເປີດນໍາໃຊ້ລະບົບຂໍ້ມູນຂ່າວສານຄຸ້ມຄອງລາຍຮັບສ່ວຍສາອາກອນ. ສະບັບເລກທີ 2865/ຫກງ, ລົງວັນທີ 22 ຕຸລາ 2018 |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.