ດັດສະນີໝາຍສະດວກໃນການເຮັດທຸລະກິດປະກອບດ້ວຍ 10 ໝວດຕົວຊີ້ວັດ ລະອຽດມີຄື:
- ການເລີ່ມຕົ້ນທຸລະກິດ;
- ການຂໍໃບອະນຸຍາດປຸກສ້າງ;
- ການເອົາໄຟຟ້າເຂົ້າ;
- ການຈົດລະບຽນຊັບສິນ;
- ການເຂົ້າເຖິງສິນເຊື່ອ;
- ການປົກປ້ອງຜູ້ລົງທຶນ ຫຼື ຜູ້ຖືຮຸ້ນລາຍນ້ອຍ;
- ການມອບອາກອນ;
- ການຄ້າຂ້າມແດນ;
- ການປະຕິບັດສັນຍາ;
- ການແກ້ໄຂການລົ້ມລະລາຍ.
ໃນບັນດາ 10 ໝວດຕົວຊີ້ວັດ ຍັງບັນຈຸຫຼາຍຕົວຊີ້ວັດຍ່ອຍທີ່ຖືກປັບໃຫ້ເປັນມາດຕະຖານເອກະພາບ ພາຍໃຕ້ເງື່ອນໄຂສະເພາະຂອງແຕ່ລະໝວດຕົວຊີ້ວັດ, ອີງຕາມທະນາຄານໂລກບາງຄັ້ງເພີ່ນເອີ້ນວ່າ: “ກໍລະນີສົມມຸດມາດຕະຖານ” ເຊິ່ງກໍລະນີສົມມູດມຸດເຫຼົ່ານັ້ນ ແມ່ນຖືກກໍານົດມາຢ່າງໜັກແໜ້ນ ເພື່ອໃຫ້ສາມາດສົມທຽບກັນໄດ້ຢ່າງເປັນທໍາ ແລະ ໂປ່ງໃສທົ່ວ 190 ທີ່ຖືກລວມເຂົ້າໃນການປະເມີນດັດສະນີໝາຍຄວາມສະດວກໃນການເຮັດທຸລະກິດ.
- ຄະແນນໝວດຕົວຊີ້ວັດຂອງການເອົາໄຟຟ້າເຂົ້າ ແມ່ນມາຈາກ 04 ຕົວຊີ້ວັດ ຄື: ຈໍານວນຂັ້ນຕອນ, ເວລາ (ໄລຍະເວລາທີ່ໃຊ້ຕັ້ງແຕ່ເລີ່ມຕົ້ນຂັ້ນຕອນທໍາອິດ ຈົນຮອດເວລາຕິດຕັ້ງໄຟຟ້າ ແລະ ຕິດຕັ້ງໄຟໃຫ້ຕຶກອາ ຄານຂອງວິສາຫະກິດທີ່ເອົາໄຟຟ້າເຂົ້າ), ຄ່າໃຊ້ຈ່າຍ (ກໍານົດເປັນສ່ວນຮ້ອຍຂອງລາຍຮັບຕໍ່ຫົວຄົນພາຍໃນປະເທດ), ຄວາມເຊື່ອຖືໃນການຈ່າຍໄຟຟ້າ ແລະ ຄວາມໂປ່ງໃສຂອງຄ່າໄຟຟ້າ. ປີ 2018 ຂັ້ນຕອນ ແລະ ເວລາພາຍໃຕ້ໝວດຕົວຊີ້ວັດດັ່ງກ່າວ ໃຊ້ເວລາທັງໝົດ 134 ວັນ ລາຍລະອຽດມີດັ່ງລຸ່ມນີ້:
- ສົ່ງຄໍາຮ້ອງຂໍໄຟຟ້າເຂົ້າ ໃຫ້ບໍລິສັດໄຟຟ້າ ແລະ ລໍຖ້າຜົນການປະເມີນລາຄາ ແລະ ການກໍານົດເຕັກນິກເຄື່ອງອຸປະກອນທີ່ຕ້ອງໃຊ້;
- ບໍລິສັດໄຟຟ້າລົງກວດກາສະໜາມ ເພື່ອກໍານົດເຕັກນິກລະອຽດ;
- ລໍຖ້າການສ້າງ ແລະ ຮັບຮອງແບບເຕັກນິກລະອຽດ ແລະ ແຜນຕິດຕັ້ງ;
- ລໍຖ້າໃຫ້ຜູ້ຮັບເໝົາວຽກໄຟຟ້າເຮັດວຽກພາຍນອກສໍາເລັດ;
- ລໍຖ້າການຈົດທະບຽນໝໍ້ນັບໄຟ ຫຼື ກົງເຕີໄຟ ທີ່ບໍລິສັດໄຟຟ້າ;
- ບໍລິສັດໄຟຟ້າລົງກວດກາຄັ້ງສຸດທ້າຍ ແລ້ວສັບໄຟຟ້າໃຫ້.
- ຕົວຊີ້ວັດຍ່ອຍຂອງໝວດຕົວຊີ້ວັດການເລີ່ມຕົ້ນທຸລະກິດຖືກກໍານົດດ້ວຍສອງຕົວປ່ຽນ ຄື: ເວລາ (ຈໍານວນມື້ທີ່ເຮັດສໍາເລັດທຸກຂັ້ນຕອນ ປີ 2018 ແມ່ນ 67 ມື້) ແລະ ຂັ້ນຕອນ (ປີ 2018 ປະກອບມີ 8 ຂັ້ນຕອນ ) ທີ່ກ່ຽວຂ້ອງ ໃນການເລີ່ມຕົ້ນທຸລະກິດຢູ່ ສປປ ລາວ (ອີງຕາມ ກໍລະນີສົມມຸດມາດຕະຖານທີ່ນໍາໃຊ້ໂດຍທະນາຄານໂລກ) ລາຍລະອຽດມີດັ່ງລຸ່ມນີ້:
- ຄໍາຮ້ອງຈອງຊື່ວິສາຫະກິດ ແລະ ໃບຢັ້ງຢືນການຈົດທະບຽນວິສາຫະກິດ (ໃນຂັ້ນຕອນນີ້ ຕ້ອງການເອກະສານປະກອບທັງໝົດ 6 ປະເພດ);
- ການຈົດທະບຽນລະບຽບຂອງບໍລິສັດ ຫຼື ວິສາຫະກິດ;
- ຂໍໃບຢັ້ງຢືນທະບຽນອາກອນ (ຂັ້ນຕອນນີ້ ຕ້ອງປະກອບເອກະສານປະກອບ 12 ຊຸດ);
- ຂໍອະນຸມັດປ້າຍວິສາຫະກິດ ຫຼື ປ້າຍບໍລິສັດ ຈາກກະຊວງຖະແຫຼ່ງຂ່າວ ແລະ ວັດທະນະທໍາ ແລະ ການທ້ອງທ່ຽວ;
- ຂວັດກາຈໍ້າບໍລິສັດ;
- ຈົດທະບຽນກາຈໍ້າບໍລິສັດກັບກະຊວງປ້ອງກັນຄວາມສະຫງົບ;
- ຈົດທະບຽນຜູ້ອອກແຮງງານເພື່ອເຂົ້າລະບົບປະກັນສັງຄົມ;
- ຈົດທະບຽນມອບ ອາກອນມູນຄ່າເພີ່ມ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.