ແຈ້ງການເພີ່ມເຕີມວ່າດ້ວຍການກໍານົດເລກລະຫັດເງື່ອນໄຂໃນການຊໍາລະສະສາງ ຄ່າພາສີ-ອາກອນ ແລະ ພັນທະອື່ນໆ ຂອງສິນຄ້າເຂດເສດຖະກິດສະເພາະນິຄົມອຸດສະຫະກໍາ ສະບັບເລກທີ 04151/ກພສ, ລົງວັນທີ 06 ສິງຫາ 2018

ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ

ກະຊວງການເງິນ
ກົມພາສີ

ເລກທີ 04151/ກພສ

ນະຄອນຫຼວງວຽງຈັນ, ວັນທີ 06 ສິງຫາ 2018

ວ່າດ້ວຍການກຳນົດເລກລະຫັດເງື່ອນໄຂໃນການຊຳລະສະສາງ ຄ່າພາສີ-ອາກອນ ແລະ ພັນທະອື່ນໆ ຂອງສິນຄ້າເຂດເສດຖະກິດສະເພາະ ນິຄົມອຸດສາຫະກຳ

ອີງຕາມ ກົດໝາຍວ່າດ້ວຍພາສີ, ສະບັບເລກທີ: 04/ສພຊ, ລົງວັນທີ: 20 ທັນວາ 2011;
ອີງຕາມ ຂໍ້ຕົກລົງຂອງນາຍົກລັດຖະມົນຕີ, ສະບັບເລກທີ: 73/ນຍ, ລົງວັນທີ: 28 ກັນຍາ 2015, ວ່າດ້ວຍນະໂຍບາຍສົ່ງເສີມເພີ່ມເຕີມ ຂອງການລົງທຶນຢູ່ເຂດເສດຖະກິດສະເພາະ ບຶງທາດຫຼວງ ແລະ ຂພສ ໃນຂອບເຂດທົ່ວປະເທດ;
ອີງຕາມ ຂໍ້ຕົກລົງຂອງກະຊວງການເງິນ, ສະບັບເລກທີ: 2276/ກງ, ລົງວັນທີ: 12 ກໍລະກົດ 2016, ວ່າດ້ວຍການຍົກເວັ້ນອາກອນມູນຄ່າເພີ່ມໃຫ້ແກ່ ບໍລິສັດອິນຊີທອງມໍເຕີ້ ຂາອອກ-ຂາເຂົ້າ ຈຳກັດຜູ້ດຽວ;
ອີງຕາມ ຂໍ້ຕົກລົງຂອງກົມພາສີ, ສະບັບເລກທີ: 00172/ກພສ, ລົງວັນທີ: 16 ຕຸລາ 2013, ວ່າດ້ວຍການນຳໃຊ້ເລກລະຫັດລະບອບໃບແຈ້ງພາສີເປັນລາຍລະອຽດ.

ຫົວໜ້າກົມພາສີ ອອກແຈ້ງການເພີ່ມເຕີມ:

ເພື່ອເປັນການເພີ່ມເງື່ອນໄຂການຊຳລະຄ່າພາສີ-ອາກອນ ແລະ ພັນທະອື່ນໆ ຂອງຂໍ້ຕົກລົງຂອງກົມພາສີ, ສະບັບເລກທີ: 00172/ກພສ, ລົງວັນທີ: 16 ຕຸລາ 2013 ໃນມາດຕາ ທີ 4 ວ່າດ້ວຍການກຳນົດ ລະຫັດ 3 ຕົວເລກສຸດທ້າຍ ຂອງການຊຳລະແຕ່ລະເງື່ອນໄຂ ໃນຫ້ອງທີ 37 ຂອງໃບແຈ້ງພາສີເປັນລາຍລະອຽດ ແມ່ນຈັດຕັ້ງປະຕິບັດດັ່ງລາຍລະອຽດລຸ່ມນີ້:

ລະຫັດ 441: ຍົກເວັ້ນຄ່າພາສີ, ຍົກເວັ້ນອາກອນມູນຄ່າເພີ່ມ ແລະ ເສຍພັນທະອື່ນໆ ຕາມລະບຽບການ ສຳລັບສິນຄ້າ, ເຄື່ອງຂອງ ທີ່ນຳເຂົ້າເພື່ອຜະລິດ ແລ້ວສົ່ງອອກຕ່າງປະເທດ ຢູ່ເຂດເສດຖະກິດພິເສດ ແລະ ສະເພາະ;
ລະຫັດ 442: ຍົກເວັ້ນຄ່າພາສີ, ເສຍອາກອນມູນຄ່າເພີ່ມ ໃນອັດຕາ 5% ແລະ ພັນທະອື່ນໆ ຕາມລະບຽບການ ສຳລັບສິນຄ້າ, ເຄື່ອງຂອງ ທີ່ນຳເຂົ້າ ແລະ ຜະລິດຢູ່ເຂດເສດຖະກິດພິເສດ ແລະ ສະເພາະ;
ລະຫັດ 443: ເສຍພາສີຕາມອັດຕາຫຼຸດຜ່ອນ ຕາມກອບສິດທິພິເສດຕ່າງໆ, ຍົກເວັ້ນອາກອນມູນຄ່າເພີ່ມ ແລະ ເສຍພັນທະອື່ນໆ ຕາມລະບຽບການ.

ມອບໃຫ້ບັນດາພາສີສາກົນ ເອົາໃຈໃສ່ກວດກາການແຈ້ງພາສີເປັນລາຍລະອຽດ ໃນການນຳໃຊ້ລະບອບໃບແຈ້ງພາສີ ໂດຍສະເພາະແມ່ນເງື່ອນໄຂໃນການຊຳລະສະສາງ ໃຫ້ຖືກຕ້ອງຕາມລະບຽບການ.
ແຈ້ງການສະບັບນີ້ ແມ່ນມີຜົນສັກສິດນັບແຕ່ວັນລົງລາຍເຊັນເປັນຕົ້ນໄປ.

ດັ່ງນັ້ນ, ຈຶ່ງແຈ້ງມາເພື່ອຊາບ ແລະ ພ້ອມກັນຈັດຕັ້ງປະຕິບັດ ຢ່າງເຂັ້ມງວດ.

ຮັກສາການຫົວໜ້າກົມພາສີ

ບຸນປະເສີດ ສີກຸນລະບຸດ

#	ຫົວຂໍ້	ດາວໂຫຼດ
1	Notification on the Determination of Code on Customs Duty-Taxes Payment and other obligations of Goods in Specific Economic Zones and Industrial Area No.04151/CD, dated August 2018	PDF
2	ແຈ້ງການເພີ່ມເຕີມວ່າດ້ວຍການກໍານົດເລກລະຫັດເງື່ອນໄຂໃນການຊໍາລະສະສາງ ຄ່າພາສີ-ອາກອນ ແລະ ພັນທະອື່ນໆ ຂອງສິນຄ້າເຂດເສດຖະກິດສະເພາະນິຄົມອຸດສະຫະກໍາ ສະບັບເລກທີ 04151/ກພສ, ລົງວັນທີ 06 ສິງຫາ 2018	PDF

ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.

ຂອບໃຈ ສຳລັບຄຳຄິດເຫັນຂອງທ່ານ.