ກົມການນໍາເຂົ້າ ແລະ ສົ່ງອອກ, ກະຊວງອຸດສາຫະກໍາ ແລະ ການຄ້າ ໄດ້ສຳເລັດການສັງລວມສະຖິຕິການນຳເຂົ້າ - ສົ່ງອອກ ພາຍໃຕ້ສິດທິພິເສດທາງການຄ້າ ປະຈໍາປີ 2018. ໃນນັ້ນ, ການນຳເຂົ້າ ແລະ ສົ່ງອອກ ພາຍໃຕ້ສິດທິພິເສດທາງການຄ້າ ແບ່ງອອກເປັນ 02 ຮູບແບບດ້ວຍກັນຄື: ແບບຝ່າຍດຽວ (ລະບົບສິດທິພິເສດທົ່ວໄປ ຫຼື Generalized System of Preferences: GSP) ແລະ ແບບຕອບແທນກັນ ຫຼື ຕ່າງຝ່າຍຕ່າງໄດ້ຮັບຜົນປະໂຫຍດ (ສັນຍາການຄ້າເສລີ ຫຼື Free Trade Agreement: FTA).
ໃນປີ 2018 ເມື່ອສົມທຽບການສົ່ງອອກພາຍໃຕ້ສິດທິພິເສດທາງການຄ້າແບບຝ່າຍດຽວ (GSP) ແລະ ແບບຕອບແທນກັນ (FTA) ເຫັນວ່າ ການນຳໃຊ້ສິດທິພິເສດແບບຝ່າຍດຽວມີມູນຄ່າພຽງ 278,60 ລ້ານ ໂດລາສະຫະລັດ. ໂດຍສ່ວນໃຫຍ່ແມ່ນ ການສົ່ງອອກໄປ ບັນດາປະເທດໃນສະຫະພາບເອີຣົບ, ຊຶ່ງປະຈຸບັນມີພຽງ 68 ບໍລິສັດ ທີ່ນຳໃຊ້ GSP ຈຶ່ງເຮັດໃຫ້ປະລິມານການສົ່ງອອກໜ້ອຍຖ້າທຽບໃສ່ຂອບ FTA. ໃນຂະນະດຽວກັນ ການສົ່ງອອກພາຍໃຕ້ FTA ສາມາດປະຕິບັດໄດ້ 1,03 ຕື້ ໂດລາສະຫະລັດ ກວມເອົາອັດຕາສ່ວນຫຼາຍກວ່າການສົ່ງອອກພາຍໃຕ້ສິດທິພິເສດທາງການຄ້າສູງເຖິງ 78.77%. ສາເຫດທີ່ພາໃຫ້ການສົ່ງອອກໃນຂອບ FTA ຫຼາຍຍ້ອນສິນຄ້າທີ່ສົ່ງອອກສ່ວນໃຫຍ່ເປັນສິນຄ້າທ່າແຮງຂອງ ສປປ ລາວ ແລະ ໃນຂອບ FTA ນີ້ກໍ່ມີຫຼາຍຂອບສັນຍາ ເຊັ່ນ: ສັນຍາການຄ້າດ້ານສິນຄ້າຂອງອາຊຽນ/ສັນຍາການຄ້າເສລີອາຊຽນ (ATIGA ຫຼື ຟອມ D), ສັນຍາການຄ້າເສລີ ອາຊຽນ - ສປ ຈີນ (ຟອມ E), ສັນຍາການຄ້າເສລີ ອາຊຽນ - ອິນເດຍ (ຟອມ AI), ສັນຍາການຄ້າເສລີອາຊຽນ - ສ.ເກົາຫຼີ (ຟອມ AK), ສັນຍາວ່າດ້ວຍຄູ່ຮ່ວມມືດ້ານເສດຖະກິດຮອບດ້ານ ອາຊຽນ-ຢີ່ປຸ່ນ (ຟອມ AJ) ແລະ ສັນຍາການຄ້າເສລີ ອາຊຽນ-ອົດສະຕາລີ-ນິວຊີແລນ (ຟອມ AANZ).
ບັນດາປະເທດທີ່ ສປປ ລາວ ສົ່ງອອກພາຍໃຕ້ສິດທິພິເສດທາງການຄ້າພາຍໃນປີນີ້ມີທັງໝົດ 37 ປະເທດ,ໃນນັ້ນ ປະເທດທີ່ມີການສົ່ງອອກໄປຫຼາຍກວ່າໝູ່ແມ່ນ ໄທ, ສສ ຫວຽດນາມ ແລະ ສປ ຈີນ; ມີມູນຄ່າປະມານ 425,86 ລ້ານ ໂດລາສະຫະລັດ, 332,85 ລ້ານ ໂດລາສະຫະລັດ ແລະ 250,95 ລ້ານ ໂດລາສະຫະລັດ ຕາມລຳດັບ. ກຸ່ມສິນຄ້າທີ່ສົ່ງອອກຫຼາຍກວ່າໝູ່ 03 ອັນດັບຕົ້ນແມ່ນ ກຸ່ມສິນຄ້າອຸດສາຫະກຳ ມີມູນຄ່າປະມານ 637,56 ລ້ານໂດລາສະຫະລັດ, ຮອງລົງມາແມ່ນ ກຸ່ມສິນຄ້າພືດກະສິກຳ ມີມູນຄ່າປະມານ 406,94 ລ້ານໂດລາສະຫະລັດ ແລະ ກຸ່ມສິນຄ້າຜະລິດຕະພັນແຮ່ທາດ ມີມູນຄ່າປະມານ 89,50 ລ້ານໂດລາສະຫະລັດ.
ສ່ວນປະເທດທີ່ ສປປ ລາວ ນໍາເຂົ້າພາຍໃຕ້ສິດທິພິເສດທາງການຄ້າມີທັງໝົດ 39 ປະເທດ, ໃນນັ້ນ ປະເທດທີ່ສປປ ລາວ ມີການນຳເຂົ້າຫຼາຍກວ່າໝູ່ແມ່ນ ໄທ, ສປ ຈີນ, ແລະ ສສ.ຫວຽດນາມ; ມີມູນຄ່າການນຳເຂົ້າປະມານ 329,04 ລ້ານ ໂດລາສະຫະລັດ, 79,58 ລ້ານ ໂດລາສະຫະລັດ ແລະ 76,39 ລ້ານ ໂດລາສະຫະລັດ ຕາມລຳດັບ. ສຳລັບສາມກຸ່ມສິນຄ້າທີ່ມີມູນຄ່າການນຳເຂົ້າຫຼາຍກວ່າໝູ່ແມ່ນ ກຸ່ມສິນຄ້າພາຫະນະ, ຊິ້ນສ່ວນ ແລະ ອາໄຫຼ່ ມີມູນຄ່າ 369,16 ລ້ານໂດລາສະຫະລັດ, ກຸ່ມສິນຄ້າເຄື່ອງກໍ່ສ້າງ ມີມູນຄ່າ 85,41 ລ້ານໂດລາສະຫະລັດ ແລະ ກຸ່ມສິນຄ້າເຄື່ອງນຸ່ງຫົ່ມເຄື່ອງໃຊ້ສອຍປະຈຳວັນ ມີມູນຄ່າ 64,14 ລ້ານໂດລາສະຫະລັດ.
ແຫຼ່ງຂໍ້ມູນ: ສະຖິຕິການນຳເຂົ້າ-ສົ່ງອອກ ພາຍໃຕ້ສິດທິພິເສດທາງດ້ານການຄ້າ ສປປ ລາວ ປະຈຳປີ 2018 ຂອງ ພະແນກຄຸ້ມຄອງແຫຼ່ງກຳເນີດສິນຄ້າ, ກົມການນຳເຂົ້າ ແລະ ສົ່ງອອກ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.