ຂໍ້ຕົກລົງ ວ່າດ້ວຍ ການຄຸ້ມຄອງ ແລະ ນຳໃຊ້ເຄື່ອງບັນທຶກການຂາຍສິນຄ້າ ແລະ ບໍລິການ ເລກທີ 1179/ກງ, ລົງວັນທີ 20 ເມສາ 2017

ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ

ກະຊວງການເງິນ ເລກທີ 1179/ກງ
ນະຄອນຫຼວງວຽງຈັນ, ວັນທີ 20 ພຶດສະພາ 2017

ຂໍ້ຕົກລົງ

ວ່າດ້ວຍການຄຸ້ມຄອງ ແລະ ນໍາໃຊ້ ເຄື່ອງບັນທຶກການຂາຍສິນຄ້າ ແລະ ບໍລິການ

ອີງຕາມ ກົດໝາຍວ່າດ້ວຍສ່ວຍສາອາກອນ(ສະບັບປັງປຸງ) ເລກທີ 70/ສພຊ, ລົງວັນທີ 15 ທັນວາ 2015;
ອີງຕາມ ກົດໝາຍວ່າດ້ວຍອາກອນມູນຄ່າເພີ່ມ(ສະບັບປັງປຸງ) ເລກທີ 52/ສພຊ, ລົງວັນທີ 23 ກໍລະກົດ 2014;
ອີງຕາມ ແຈ້ງການຂອງກະຊວງການເງິນ ສະບັບເລກທີ 2835/ກງ, ລົງວັນທີ 30 ສິງຫາ 2016 ວ່າດ້ວຍການນໍາໃຊ້ເຄື່ອງມືທັນສະໄໝ ເພື່ອບັນທຶກລາຍການສະໜອງສິນຄ້າ ແລະ ການບໍລິການ ແລະ ການເຊື່ອມຕໍ່ຂໍ້ມູນທາງເອເລັກໂຕຣນິກ ເພື່ອຄຸ້ມຄອງວຽກງານສ່ວຍສາອາກອນ.

ຮອງນາຍົກລັດຖະມົນຕີ, ລັດຖະມົນຕີກະຊວງການເງິນອອກຂໍ້ຕົກລົງ

ໝວດທີ 1
ບົດບັນຍັດທົ່ວໄປ

ມາດຕາ 1 ຈຸດປະສົງ

ຂໍ້ຕົກລົງສະບັບນີ້ກໍານົດຫຼັກການ, ລະບຽບການ, ວິທີການ ແລະ ມາດຕະການກ່ຽວກັບການຄຸ້ມຄອງ ແລະ ນໍາໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການ ເພື່ອແນໃສ່ຊຸກຍູ້, ສົ່ງເສີມການນໍາໃຊ້ເຄື່ອງມືບັນທັນສະໄໝ ເຂົ້າໃນການຄຸ້ມຄອງການດໍາເນີນທຸລະກິດໃຫ້ຫຼາຍຂຶ້ນ, ພ້ອມທັງ ຮັບປະກັນໃຫ້ການບັນທຶກຂໍ້ມູນການເຄື່ອນໄຫວໄດ້ຢ່າງຄົບຖ້ວນ ແລະ ທັນການ, ສາມາດເຊື່ອມຕໍ່ເຂົ້າກັບການບໍລິຫານຂໍ້ມູນຂ່າວສານສ່ວຍສາອາກອນດ້ວຍລະບົບເອເລັກໂຕຣນິກ, ເຮັດໃຫ້ການຈັດກັບລາຍຮັບສ່ວຍສາອາກອນເຂົ້າງົບປະມານມີຄວາມໂປ່ງໃສ, ຖືກຕ້ອງ ແລະ ທ່ວງທັນຕາມກໍານົດເວລາ.

ມາດຕາ 2 ອະທິບາຍຄໍາສັບ

ບັນດາຄໍາສັບຕ່າງໆທີ່ນໍາໃຊ້ໃນຂໍ້ຕົກລົງສະບັບນີ້ ມີຄວາມໝາຍ ດັ່ງນີ້:

ເຄື່ອງບັນທຶກເງິນສົດ (CRM) ໝາຍເຖິງເຄື່ອງຈັກທີ່ມີໜ່ວຍຄວາມຈໍາເພື່ອນໍາໃຊ້ໃນການບັນທຶກການຂາຍສິນຄ້າ ແລະ ການບໍລິການ ໂດຍມີການຕິດຕັ້ງໂປຣກຣາມສໍາເລັດຮູບກັບເຄື່ອງມາຈາກໂຮງງານຜະລິດ ແລະ ຖືກອອກແບບມາໃຫ້ສະເພາະກັບເງື່ອນໄຂຄວາມຕ້ອງການຂອງຜູ້ນໍາໃຊ້;
ເຄື່ອງບັນທຶກຢູ່ຈຸດຂາຍ (POS) ໝາຍເຖິງຄອມພິວເຕີທີ່ປະຕິບັດງານດ້ວຍໂປຣກຣາມບັນທຶກຂໍ້ມູນການຂາຍ ເຊິ່ງເປັນລະບົບໂປຣກຣາມທີ່ເຮັດໜ້າທີ່ຄ້າຍຄືກັບເຄື່ອງບັນທຶກເງິນສົດ ແຕ່ສາມາດໃຊ້ການໄດ້ສະຫຼັບສັບຊ້ອນຫຼາຍກ່ວາເປັນຕົ້ນ ການບັນທຶກລາຍການຂາຍສິນຄ້າ ແລະ ການບໍລິການ, ການຕິຕາມການສັ່ງຊື້, ການສະສາງບັດສິນເຊື່ອ ຫຼື ບັດເຕີມເງິນ, ການຄຸ້ມຄອງລະບົບບັນຊີສາງ ແລະ ການເຊື່ອມໂຍງເຂົ້າກັບລະບົບເຄືອຂ່າຍອື່ນ;
ເຄື່ອງບັນທຶກການຂາຍສິນຄ້າ ແລະ ການບໍລິການ ໝາຍເຖິງເຄື່ອງບັນທຶກເງິນສົດ (CRM), ເຄື່ອງບັນທຶກຢູ່ຈຸດຂາຍ (POS) ລະບົບບັນຊີຄອມພີມເຕີ (CAS) ແລະ ລະບົບຊຸດຄໍາສັ່ງຄຸ້ມຄອງສະເພາະ;
ເຄື່ອງບັນທຶກເງິນສົດ ຫຼື ເຄື່ອງບັນທຶກຢູ່ຈຸດຂາຍທີ່ຕັ້ງດ່ຽວ (Stand-Alone CRM/POS machine) ໝາຍເຖີງເຄື່ອງດັ່ງກ່າວທີ່ໄດ້ຕັ້ງຢູ່ໜ່ວຍດຽວຢ່າງເອກະລາດ ແລະ ບໍ່ໄດ້ເຊື່ອມຕໍ່ກັບລະບົບ ຫຼື ເຄື່ອງຈັກອື່ນໆ.
ການບັນທຶກການຂາຍສິຄ້າ ແລະ ການບໍລິການ ໝາຍເຖິງ ການປ້ອນຂໍ້ມູນກ່ຽວກັບຂາຍສິນຄ້າ ແລະ ການບໍລິການເຂົ້າໃນລະບົບໂປຣກຣາມ ທີ່ຕິດຕັ້ງຢູ່ກັບເຄື່ອງ ແລະ ເກັບຮັກສາໄວ້ໃນເຄື່ອງດັ່ງກ່າວ ຫຼື ໜ່ວຍຖານຂໍ້ມູນແມ່ (Server) ຫຼື ລະບົບເຊີເວີເມກ (Cloud Server) ໂດຍການປ້ອນຂໍ້ມູນຜ່ານຄີບອດ (Keyboard), ໜ້າຈໍສໍາພັດ,ໂທລະສັບໜ້າຈໍສໍາພັດ, ແທບເລດ (Tablet), ເຄື່ອງສະແກນບາໂຄດ ຫຼື ອຸປະກອນອື່ນໆທີ່ເຮັດໜ້າທີ່ປ້ອນຂໍ້ມູນ;
ການເຊື່ອມຕໍ່ຂໍ້ມູນການຂາຍສິນຄ້າ ແລະ ບໍລິການ ໝາຍເຖິງການສົ່ງຂໍ້ມູນແບບອັດຕະໂນມັດຜ່ານເຄື່ອງມືເອເລັກໂຕຣນິກເຖິງຖານຂໍ້ມູນຂອງກົມສ່ວຍສາອາກອນ ຫຼື ລະບົບການບໍລິຫານຂໍ້ມູນຂ່ານສານສ່ວຍສາອາກອນ;
“ລະບົບການບໍລິຫານຂໍ້ມູນຂ່າວສານສ່ວຍສາອາກອນດ້ວຍລະບົບເອເລັກໂຕຣນິກ” ໝາຍເຖິງການຄຸ້ມຄອງ, ຕິດຕາມກວດກາ ຫົວໜ່ວນທຸລະກິດ ທີ່ເປັນບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ເປັນຖານອາກອນ ໃນແຕ່ລະໄລຍະ ດ້ວຍເຄື່ອງມືທັນສະໄໝ ເພື່ອເປັນພື້ນຖານຄິດໄລ່ລາຍຮັບສ່ວຍອາກອນໃຫ້ຖືກຕ້ອງ, ຄົບຖ້ວນ ແລະ ທັນເວລາ;
ການໝາຍອາກອນ ໝາຍເຖິງ ສິ່ງພີມຕ່າງໆ ຂອງຂະແໜງສ່ວຍສາອາກອນ ເຊີ່ງນໍາໃຊ້ເພື່ອຕີໃສ່ຊິ້ນສ່ວນ ຫຼື ອຸປະກອນສໍາຄັນ ຂອງເຄື່ອງຕາມທີ່ກໍານົດໄວ້ຢູ່ໃນເຄື່ອງມືການນໍາໃຊ້ເຄື່ອງແຕ່ລະຊະນິດ ຊຶ່ງກົມສ່ວຍສາອາກອນເປັນຜູ້ອອກແບບ ແລະ ຈັດພີມ ຕາມລະບຽບການ;
ເລກປະຈໍາຕົວເຄື່ອງ (Machine Identification Number) ໝາຍເຖິງ ເລກໝາຍທີ່ຂະແໜງສ່ວຍສາອາກອນໄດກໍານົດອອກໃຫ້ ເພື່ອຕິດໃສ່ເຄື່ອງ ແລະ ອຸປະກອນທີ່ກ່ຽວຂ້ອງ;
ເລກລະຫັດປະຈໍາເຄື່ອງ ( Identification Serial Number ) ໝາຍເຖິງເລກໝາຍທີ່ຜະລິດກໍານົດໃຫ້ກັບ ແຕ່ລະເຄື່ອງ;
ຜູ້ສະໜອງເຄື່ອງບັນທຶກສິນຄ້າ ແລະ ບໍລິການ ໝາຍເຖິງ ຜູ້ຜະລິດ, ຜູ້ນໍາເຂົ້າ, ຜູ້ຈໍາໜ່າຍ ເຄື່ອງ, ຜູ້ໃຫ້ການບໍລິການຕິດຕັ້ງ, ບຳລຸງຮັກສາ ແລະ ສ້ອມແປງ ທີ່ພົວພັນໂດຍກົງກັບການນໍາໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການ;
ຜູ້ພັດທະນາ ຫຼື ຜູ້ສະໜອງໂປຣກຣາມ ໝາຍເຖິງ ບຸກຄົນ, ນິຕິບຸກຄົນ ທີ່ຂຽນໂປຣກຣາມ (Software) ໃຫ້ຜູ້ຊົມໃຊ້ສະເພາະ ຫຼື ຂຽນໂປຣກຣາມສໍາເລັດຮູບເພື່ອວາງຂາຍຕາມທ້ອງຕະຫຼາດ;

ມາດຕາ 3 ຂອບເຂດນໍາໃຊ້

ຂໍ້ຕົກລົງສະບັບນີ້ ນໍາໃຊ້ກັບບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ໄດ້ນໍາໃຊ້ເຄື່ອງບັນທຶກການຂາຍສິນຄ້າ ແລະ ບໍລິການ, ຜູ້ສະໜອງເຄື່ອງ ແລະ ຜູ້ພັດທະນາໂປຣກຣາມທີ່ນໍາໃຊກັບເຄື່ອງດັ່ງກ່າວ ແລະ ຂະແໜງສ່ວຍສາອາກອນແຕ່ລະຂັ້ນ ທີ່ເຮັດໜ້າທີ່ຄຸ້ມຄອງ ແລະ ນໍາໃຊ້ຂອບເຂດ ສປປ ລາວ.

ໝວດທີ 2
ປະເພດເຄື່ອງບັນທຶກການຂາຍສິນຄ້າ ແລະ ການບໍລິການ

ມາດຕາ 4 ປະເພດເຄື່ອງບັນທຶກການຂາຍສິນຄ້າ ແລະການບໍລິການ

ເຄື່ອງບັນທຶກການຂາຍສິນຄ້າ ແລະ ການບໍລິການ ທີ່ກໍານົດໃນຂໍຕົກລົງສະບັບນີ້ ປະກອບມີ ເຄື່ອງບັນທຶກຢູ່ ຈຸດຂາຍ (POS), ລະບົບບັນຊີຄອມພິວເຕີ (CAS) ລະບົບຊຸດຄໍາສັ່ງຄຸ້ມຄອງສະເພາະ, ເຄື່ອງບັນທຶກເງິນສົດ (CRM) ແລະ ເຄື່ອງຈັກອື່ນໆ ສໍາລັບພີມໃບເກັບເງິນ, ໃບຮັບເງິນ ແລະ ເອກະສານລາຍງານອື່ນໆ ຕາມລະບຽບການ.

ຄຸນລັກສະນະທົ່ວໄປຂອງເຄື່ອງບັນທຶກການຂາຍສິນຄ້າ ແລະ ການບໍລິການ

ເຄື່ອງບັນທຶກເງິນສົດ (CRM) ຕ້ອງເກັບສະສົມຂໍ້ມູນການຂາຍຕັ້ງແຕ່ຕົ້ນ ໂດຍບໍ່ໃຫ້ຕັ້ງຄ່າຄືນໃໝ່ໂດຍລຳພັງ, ກໍລະນີ ໜ່ວຍຄວາມຈໍາໃກ້ຈະເຕັມ ຕ້ອງໄດ້ແຈ້ງຕໍ່ຂະແໜງສ່ວຍສານອາກອນກ່ອນ 30 ວັນ ເພື່ອພິຈາລະນາອະນຸຍາດຕັ້ງຄ່າຄືນໃໝ່;
ເຄື່ອງບັນທຶກເງິນສົດ (CRM) ຕ້ອງມີລະບົບການນັບຈໍານວນຄັ້ງທີ່ໄດ້ຕັ້ງຄ່າຄືນໃໝ່, ເຄື່ອງບັນທຶກຢູ່ຈຸດຂາຍ (POS) ແລະ ເຄື່ອງຈັກອື່ນໆ ທີ່ຄ້າຍຄືກັນ ຕ້ອງບັນທຶກເລກທີການອອກໃບເກັບເງິນຢ່າງຕໍ່ເນື່ອງຕາມລຳດັບ ແຕ່ນ້ອຍຫາໃຫຍ່ ແລະ ບໍ່ໃຫ້ຊ້ຳກັນ;
ບໍ່ສາມາດດັດແປງ, ແກ້ໄຂ ໃຫ້ໄປຕາມຈຸດປະສົງໃດໜຶ່ງທີ່ບໍ່ຖືກຕ້ອງ ເຊັ່ນ: ດັດແປງໃຫ້ເປັນການນໍາໃຊ້ໃນຮູບແບບຝຶກອົບຮົມ, ທົດລອງນໍາໃຊ້;
ຕ້ອງສາມາດເຂົ້າເບິ່ງຂໍ້ມູນການຂາຍປະຈໍາວັນ ແລະ ຂໍ້ມູນສະສົມທີ່ເກັບຮັກສາໄວ້ຢູ່ໃນເຄື່ອງ ຫຼື ຢູ່ຖານຂໍ້ມູນແມ່ (Central Server);
ຕ້ອງມີໜ່ວຍຄວາມຈໍາຖາວອນ, ລະບົບກູ້ຂໍ້ມູນ ແລະ ສໍາຮອງຂໍ້ມູນ;
ຕ້ອງສາມາດເກັບຮັກສາຂໍ້ມູນກ່ຽວກັບການຂາຍ, ສ່ວນຫຼຸດ, ສົ່ງຄືນ ແລະ ອື່ນໆ;
ຕ້ອງສາມາດສະແດງໃຫ້ເຫັນລາຍການຂາຍຖືກ ອມພ, ຖືກຍົກເວັ້ນ ແລະ ອັດຕາສ່ວນສ່ວນຮ້ອຍ ໂດຍແຍກອອກຈາກກັນຍ່າງຈະແຈ້ງ;
ຕ້ອງສາມາດສ້າງເອກະສານລາຍງານການຂາຍ ຫຼື ເອກະສານລາຍງານລາຍຮັບຕາມລະບຽບການການກໍານົດ;

ເງື່ອນໄຂສະເພາະສໍາລັບເຄື່ອງບັນທຶກການຂາຍສິນຄ້າ ແລະ ການບໍລິການ
1. ເງື່ອນໄຂສໍາລັບເຄື່ອງບັນທຶກຢູ່ຈຸດຂາຍ (POS)

ເຄື່ອງບັນທຶກຢູ່ຈຸດຂາຍ (POS) ປະກອບມີ: ໜ້າຈໍ, ເຄື່ອງພີມຕິດມານໍາເຄື່ອງ ຫຼື ແຍກ, ຄີບອດ (key board) ແລະ/ຫຼື ອຸປະກອນສະແກນບາໂຄດ (Barcode Scanner) ແລະ ໂປຣກຣາມການຂາຍ (POS) ແລ່ນໃນລະບົບປະຕິບັດການຂອງມັນເອງ ເຊິ່ງເປັນຄອມພິວເຕີຕັ້ງດ່ຽວ (ປ້ອນຂໍ້ມູນຢູ່ຈຸດດຽວ) ແລະ ຄອມພິວເຕີທີ່ຕິດຕັ້ງລະບົບເຄືອຂ່າຍ (ສາມາດປ້ອນຂໍ້ມູນຢູ່ຫຼາຍຈຸດ) ໂດຍເຊື່ອມໂຍງເຂົ້າກັນດ້ວຍລະບົບໂປຣກຣາມ.

ຄຸນລັກສະນະພື້ນຖານຂອງເຄື່ອງບັນທຶກຢູ່ຈຸດຂາຍ (POS) ມີດັ່ງນີ້;

ສາມາດປ້ອນຂໍ້ມູນ ແລະ ສັ່ງພີມອອກຈາກທາງເຄື່ອງພີມ (Printer) ເປັນພາສາລາວໄດ້;
ຕ້ອງມີລະບົບປະຕິບັດງານຮອງຮັບລະບົບ POS ໄດ້ເຊັ່ນ Window XP, Window 7 ຫຼື ສູງກ່ວາ ແລະ Android;
ສາມາດພີມໃບເກັບເງິນຮູບແບບຕ່າງໆ ແລະ ໃບລາຍງານລາຍຮັບຕາມລະບຽບກົດໝາຍກໍານົດໄວ້;
ຕ້ອງມີບ່ອນເຊື່ອມຕໍ່ສໍາລັບອຸປະກອນທີ່ນໍາໃຊ້ຫົວຕໍ່ USB (USB Port) ຢ່າງໜ້ອຍ 2 ຈຸດຂື້ນໄປ;
ການເຊື່ອມຕໍ່ລະຫວ່າງຄອມພີວເຕີທີ່ນໍາໃຊ້ໂປຣກຣາມ POS, ເຄື່ອງພີມ ແລະ ອຸປະກອນອື່ນໆ ແມ່ນອະນຸຍາດໃຫ້ໄດ້ແຕ່ສາຍຕໍ່ ແບບ Parallel, ແບບ Serial ແລະ USB;
ຄອມພີວເຕີ, ເຄື່ອງພີມ ແລະ ອຸປະກອນອື່ນໆ ຕ້ອງມີເລກລະຫັດເຄື່ອງ (Identical Serial Number);
ສາມາດເຊື່ອມຕໍ່ເຂົ້າກັບລະບົບການບໍລິຫານຂໍ້ມູນຂ່າວສານສ່ວຍສາອາກອນໄດ້. ກໍລະນີຄອມພີວເຕີນໍາໃຊ້ລະບົບປະຕິບັດງານຜ່ານເຄື່ອຂ່າຍທີ່ນໍາໃຊ້ຢູ່ຫຼາຍຈຸດ, ບໍລິຫານລະບົບ (Administrator) ຕ້ອງອຳນວຍຄວາມສະດວກໃນການຕິດຕັ້ງໂປຣກຣາມ ການເຊື່ອມຕໍ່ເຂົ້າໃນລະບົບບໍລິຫານຂໍ້ມູນຂ່າວສານສ່ວຍສາອາກອນ;
ກໍລະນີ ເຄື່ອງບັນທຶກຢູ່ຈຸດຂາຍທີ່ໄດ້ເຊື່ອມໂຍງເຂົ້າກັບຖານຂໍ້ມູນແມ່ (Central Server) ຕ້ອງຮັບປະກັນໃຫ້ຂໍ້ມູນ ການຂາຍທີ່ບັນທຶກຢູ່ແຕ່ລະຈຸດຖືກໂອນໄປຖານຂໍ້ມູນດັ່ງກ່າວຢ່າງອັດຕະໂນມັດ ພ້ວມທັງເກັບຮັກສາໄວ້ຕາມກໍານົດເວລາທີ່ລະບຽບກົດໝາຍກໍານົດໄວ້.
1. ເຄື່ອງບັນທຶກເງິນສົດ (Cash Register Machine)

ເຄື່ອງບັນທຶກເງິນສົດ ປະກອບມີ: ລີ້ນຊັກເກັບເງິນ, ໜ້າຈໍສະແດງຜົນ, ເຄື່ອງພີມ ແລະ ໂປຣກຣາມພື້ນຖານທີ່ຜູ້ຜະລິດ ຫຼື ຜູ້ສະໜອງໄດ້ຕິດຕັ້ງໄວ້ກັບຕົວເຄື່ອງ; ເຄື່ອງດັ່ງກ່າວສາມາດບັນທຶກລາຍການສິນຄ້າ, ລາຄາ ແລະ ມີຊຸດຄໍາສັ່ງເພື່ອຄິດໄລ່ລາຄາລວມ, ຈໍານວນເງິນອາກອນມູນຄ່າເພີ່ມ, ສັ່ງພີມໃບເກັບເງິນ ແລະ ສ້າງລາຍງານການຂາຍເປັນແຕ່ລະໄລຍະໄດ້.

ຄຸນລັກສະນະພື້ນຖານ ຂອງເຄື່ອງບັນທຶກເງິນສົດຢ່າງໜ້ອຍ ຕ້ອງມີດັ່ງນີ້:

ສາມາດປ້ອນຂໍ້ມູນເປັນພາສາລາວ ແລະ ສັ່ງພີມເປັນພາສາລາວໄດ້;
ສາມາດພີມໃບເກັບເງິນ ຕາມລະບຽບການກໍານົດ;
ມີໜ່ວຍຄວາມຈໍາພາຍໃນທີ່ສາມາດເກັບຂໍ້ມູນການຂາຍໄດ້ຢ່າງໜ້ອຍ 4G ຂື້ນໄປ;
ສາມາດຄິດໄລ່ລາຄາລວມ ແລະ ແຍກໃຫ້ເຫັນອາກອນມູນຄ່າເພີ່ມ;
ສາມາດສ້າງເອກະສານລາຍງານຕ່າງໆ ຕາມລະບຽບການກໍານົດ;
ສາມາດບັນທຶກລາຍການສິນຄ້າ ຫຼື ການບໍລິການຢ່າງໜ້ອຍ 100 ຊະນິດຂື້ນໄປ;
ສາມາດເຊື່ອມຕໍ່ເຂົ້າກັບລະບົບການບໍລິຫານຂໍ້ມູນຂ່າວສານ ສ່ວຍສາອາກອນ;
1. ເຄື່ອງຈັກອື່ນໆ

ເຄື່ອງຈັກອື່ນໆ ແມ່ນເຄື່ອງຈັກເອເລັກໂຕຣນິກ ທີ່ສາມາດບັນທຶກການຂາຍສິຄ້າ ແລະ ການບໍລິການ, ນໍາໃຊ້ໃນການເຮັດທຸລະກໍາທາງດ້ານການເງິນ ເຊັ່ນ; ເຄື່ອງຮູດບັດວີຊ່າ, ບັດສິນເຊື່ອ, ບັດເຕີມເງິນ, ເຄື່ອງພີມໃບເກັບເງິນແບບເຄື່ອງທີ່, ເຄື່ອງບັນຊາໜ້າຈໍສໍາພັດ (Smart Tab) ແລະ ອຸປະກອນອື່ນໆຕາມທີ່ກົດໝາຍອະນຸຍາດ ເຊີ່ງຄຸນລັກສະນະພື້ນຖານຂອງເຄື່ອງແຕ່ລະຊະນິກກໍ່ຈະແຕກຕ່າງກັນໄປ ຕາມການກໍານົດໃນແຕ່ລະໄລຍະ.

ໝວດທີ 3
ເງື່ອນໄຂ ແລະ ຂັ້ນຕອນການສະເໜີໃບຢັ້ງຢືນຮັບຮອງ ມາດຕະຖານເຄື່ອງບັນທຶກການຂາຍສິນຄ້າ ແລະ ການບໍລິການ

ມາດຕາ 5 ເງື່ອນໄຂການສະເໜີຜູ້ສະໜອງເຄື່ອງບັນທຶກການຂາຍສິນຄ້າ ແລະ ການບໍລິການ

ບຸກຄົນ, ນິຕິບຸກຄົນ ທີ່ຕ້ອງການດໍາເນີນທຸລະກິດສະໜອງເຄື່ອງບັນທຶກເງິນສົດ ແລະ ເຄື່ອງບັນທຶກຢູ່ຈຸດຂາຍ ຕ້ອງມີເງື່ອນໄຂ ດັ່ງຕໍ່ໄປນີ້:

1. ໃບທະບຽນວິສາຫະກິດ ແລະ/ຫຼື ເອກະສານຢັ້ງຢືນທີ່ຢູ່ຕາມກົດໝາຍ;

2. ໃບທະບຽນອາກອນ ຫຼື ໃບຢັ້ງຢືນເລກປະຈໍາຕົວຜູ້ເສຍອາກອນ;

3. ໃບຢັ້ງຢືນການປະຕິບັດພັນທະຂອງສົກປີຜ່ານມາ (ສໍາລັບຫົວໜ່ວຍທຸລະກິດທີ່ເຄື່ອນໄຫວແລ້ວ).

ມາດຕາ 6 ເອກະສານ ແລະ ຂັ້ນຕອນການຂໍໃບຢັ້ງຢືນຮັບຮອງມາດຕະຖານເຄື່ອງບັນທຶກການຂາຍສິນຄ້າ ແລະ ການບໍລິການ

ກ. ເອກະສານປະກອນໃນການຂໍໃບຢັ້ງຢືນຮັບຮອງມາດຕະຖານ ມີດັ່ງນີ້:

1. ໃບຄໍາຮ້ອງ (ຂຽນ ຫຼື ພີມຂໍ້ຄວາມໃສ່ຕາມແບບພີມທີ່ກົມສ່ວຍສາອາກອນກໍານົດ);

2. ຄູ່ມືການນໍາໃຊ້ເຄື່ອງ ແລະ ອຸປະກອນຕ່າງໆທີ່ຈະສະເໜີຮັບຮອງມາດຕະຖານ;

3. ໃບຢັ້ງຢືນໂປຣກຣາມບັນຊີ (ຖ້າເຄື່ອງບັນທຶກຢູ່ຈຸດຂາຍເຊື່ອມຕໍ່ກັບໂປຣກຣາມບັນຊີ);

4. ໃບລາຍງານຫຍໍ້ກ່ຽວກັບຄຸນລັກສະນະຂອງເຄື່ອງ ແລະ ອຸປະກອນ;

5. ແບບຕົວຢ່າງ ໃບເກັບເງິນ, ບົດສະຫຼຸບປະຈໍາວັນ ແລະ ເອກະສານລາຍງານຮັບປະຈໍາເດືອນ;

ຂ. ຂັ້ນຕອນ ພິຈາລະນາອອກໃບຢັ້ງຢືນຮັບຮອງມາດຕະຖານ

ການອອກໃບຢັ້ງຢືນຮັບຮອງມາດຕະຖານ ມີຂັ້ນຕອນຈັດຕັ້ງປະຕິບັດ ດັ່ງນີ້:

1. ຜູ້ດໍາເນີນທຸລະກິດຍື່ນສໍານວນຄໍາຮ້ອງເຖິງກົມສ່ວຍສາອາກອນ;

2. ກົມສ່ວຍສາອາກອນກວດກາຄວາມຖືກຕ້ອງຂອງສໍານວນຄໍາຮ້ອງ;

3. ຖ້າເອກະສານບໍ່ຖືກຕ້ອງ ຫຼື ບໍ່ຄົບຖ້ວນຈະໄດ້ສົ່ງກັບພາຍໃນກໍານົດ 2 ວັນລັດຖະການ;

ຖ້າເອກະສານຖືກຕ້ອງ ແລະ ຄົບຖ້ວນ ຈະໄດ້ອອກແຈ້ງການເຊີນໃຫ້ຜູ້ດໍາເນີນທຸລະກິດເຂົ້າມານໍາສະເໜີກ່ຽວກັບລະບົບການເຮັດວຽກຂອງເຄື່ອງ ຫຼືໂປຣກຣາມ;

5. ຄະນະກໍາມະການຮັບຮອງມາດຕະຖານທີ່ຖືກແຕ່ງຕັ້ງຈາກ ທ່ານ ລັດຖະມົນຕີກະຊວງການເງິນ ຈະໄດ້ຮັບຟັງການສະເໜີກ່ຽວກັບການນ້ຳໃຊ້ໂປຣກຣາມ ແລະ ການເຮັດວຽກຂອງເຄື່ອງຈາກຜູ້ດໍາເນີນທຸລະກິດ ຫຼື ເຈົ້າຂອງໂປຣກຣາມ;

6. ຄະນະກໍາມະການດໍາເນີນການພິຈາລະນາການອອກໃບຢັ້ງຢືນຮັບຮອງມາດຕະຖານ. ຖ້າວ່າເງື່ອນໄຂຕ່າງໆທີ່ກໍານົດຂ້າງເທິງນັ້ນຄົບຖ້ວນ, ກົມສ່ວຍສາອາກອນຈະອອກໃບຢັ້ງຢືນຮັບຮອງມາດຕະຖານພາຍໃນກໍານົດ 5 ວັນລັດຖະການ. ກໍລະນີ ເງື່ອນໄຂ່ບໍ່ຄົບຖ້ວນ ກົມສ່ວຍສາອາກອນຈະອອກແຈ້ງການໃຫ້ຜູ້ນໍາເນີນທຸລະກິດຊາບກ່ຽວກັບບັນຫາທີ່ບໍ່ທັນຄົບຖ້ວນຕາມເງື່ອນໄຂດັ່ງກ່າວນັ້ນ ພາຍໃນກໍານົດ 2 ວັນລັດຖະການ.

ໝວດທີ 4
ເງື່ອນໄຂ ແລະ ຂັ້ນຕອນການອະນຸຍາດ, ເງື່ອນໄຂ ແລະ ກວດກາເຄື່ອງບັນທຶກການຂາຍສິນຄ້າ ແລະ ການບໍລິການ

ມາດຕາ 7 ເງື່ອນໄຂການນໍາໃຊ້ເຄື່ອງບັນທຶກການຂາຍສິນຄ້າ ແລະ ບໍລິການ

ບຸກຄົນ, ນິຕິບຸກຄົນ ແລະ ການຈັດຕັ້ງຕ່າງ ທີ່ຕ້ອງການນໍາໃຊ້ເຄື່ອງບັນທຶກການຂາຍສິນຄ້າ ແລະ ບໍລິການ ຕ້ອງປະຕິບັດເງື່ອນໄຂ ດັ່ງຕໍ່ໄປນີ້;

1. ໄດ້ສ້າງຕັ້ງວິສາຫະກິດ ຕາມລະບຽບກົດໝາຍຂອງ ສປປ ລາວ ຊື່ງມີເອກະສານຢັ້ງຢືນຢ່າງຖືກຕ້ອງເຊັ່ນ: ມີເບີທະບຽນວິສາຫະກິດ, ໃບທະບຽນສໍາປະທານ, ໃບອະນຸຍາດລົງທຶນ ແລະ ອື່ນໆ ຕາມທີ່ກົດໝາຍກໍານົດໄວ້;

2. ມີເບີທະບຽນອາກອນ ຫຼື ໃບຢັ້ງຢືນເລກປະຈໍາຕົວຜູ້ເສຍອາກອນ ຢ່າງຖືກຕ້ອງຕາມລະບຽນການ;

3. ມີໃບອະນຸຍາດຮັບຮອງມາດຕະຖານ ໂດຍອອກໃຫ້ໂດຍກົມສ່ວຍສາອາກອນ;

4. ສັນຍາຜູກພັນກ່ຽວກັບໂປຣກຣາມ, ເຄື່ອງບັນທຶກການຂາຍສິນຄ້າ ແລະ ການບໍລິການ ລະຫວ່າງຜູ້ສະໜອງ ແລະ ຜູ້ນໍາໃຊ້;

5. ມີເບີຢັ້ງຢືນການປະຕິບັດພັນທະຂອງສົກປີຜ່ານມາ (ສໍາລັບຫົວໜ່ວຍທຸລະກິດທີ່ເຄື່ຶອນໄຫວແລ້ວ).

ມາດຕາ 8 ຂັ້ນຕອນການຂໍອະນຸຍາດການນໍາໃຊ້ ແລະ ກວດກາເຄື່ອງບັນທຶກການຂາຍສິນຄ້າ ແລະ ການບໍລິການ

ກ. ເອກະສານປະກອບໃນການຂໍອະນຸຍາດໃຊ້ເຄື່ອງ ມີດັ່ງນີ້:

1. ໃບຄໍາຮ້ອງຂໍອະນຸຍາດນໍາໃຊ້ (ຂຽນ ຫຼື ພີມຂໍ້ຄວາມໃສ່ ຕາມແບບພີມຕາມທີ່ກົມສ່ວຍສາອາກອນກໍານົດ);

2. ເຄື່ອງມືການນໍາໃຊ້ເຄື່ຶອງບັນທຶກການຂາຍສິນຄ້າ ແລະ ການບໍລິການ ແລະ ອຸປະກອນຕ່າງໆ;

3. ໃບລາຍງານກ່ຽວກັບເຄື່ອງ: ປະເພດ, ຊະນິດ, ຍີ່ຫໍ້, ຮຸ່ນ, ເລກລະຫັດປະຈໍາເຄື່ອງ ແລະ ຄຸນລັກສະນະອື່ນໆ;

4. ແຜ່ນວາດການຕິດຕັ້ງເຄື່ອງ ແລະ ການເຊື່ອມຕໍ່ເຄື່ອງເຂົ້າກັບອຸປະກອນອື່ນໆ (ຖ້າມີ) ແລະ ການເຊື່ອມຕໍ່ກັບລະບົບການບໍລິຫານຂໍ້ມູນຂ່າວສານສ່ວຍສາອາກອນດ້ວຍລະບົບເອເລັກໂຕຣນິກ;

5. ແຜນວາດຂັ້ນຕອນການບັນທຶກລາຍການຂາຍສິນຄ້າ ແລະ ການບໍລິການ;

6. ແບບຕົວຢ່າງໃບເກັບເງິນນ ແລະ ເອກະສານລາຍງານລາຍຮັບ.

ຂ. ຂັ້ນຕອນ ພິຈາລະນາອອກໃບອະນຸຍາດນໍາໃຊ້ ແລະ ກວດກາເຄື່ອງບັນທຶກການຂາຍສິນຄ້າ ແລະ ການບໍລິການ

ການອອກອະນຸຍາດນໍາໃຊ້ ມີຂັ້ນຕອນ ດັ່ງນີ:

1. ຜູ້ດໍາເນີນທຸລະກິດຍື່ນສໍານວນຄໍາຮ້ອງ ເຖິງຂະແໜງສ່ວຍສາອາກອນບ່ອນທີ່ຕົນຂື້ນກັບ;

2. ຖ້າເອກະສານບໍ່ຖືກຕ້ອງ ຫຼື ບໍ່ຄົບຖ້ວນ ຈະໄດ້ສົ່ງກັບພາຍໃນກໍານົດ 2 ວັນລັດຖະການ;

3. ຖ້າເອກະສານຖືກຕ້ອງ ແລະ ຄົບຖ້ວນ ຂະແໜງສ່ວຍສາອາກອນຂັ້ນກ່ຽວຂ້ອງຈະພິຈາລະນາການອອກອະນຸຍາດພາຍໃນກໍານົດ 5 ວັນລັດຖະການ;

4. ຂະແໜງການສ່ວຍສາອາກອນຂັ້ນກ່ຽວຂ້ອງກວດກາເນື້ອໃນລາຍລະອຽດຂອງສໍານວນຄໍາຮ້ອງ ເປັນຕົ້ນ ຄຸນລັກສະນະຂອງເຄື່ອງ, ກວດກາແບບໃບເກັບເງິນນ, ແບບພີມເອກະສານລາຍງານການຂາຍ ແລະ ເອກະສານທີ່ກ່ຽວຂ້ອງອື່ນໆ;

5. ຂະແໜງສ່ວຍສາອາກອນທີ່ກ່ຽວຂ້ອງ ອອກໃບອະນຸຍາດນໍາໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການ ແລະ ໃບເກັບເງິນນດ້ວຍເຄື່ອງພີມດັ່ງກ່າວ (ໃບອະນຸຍາດມີອາຍຸນໍາໃຊ້ 1 ປີ ເຊີ່ງກໍານົດຕາມປີສາກົນ);

6. ຜູ້ສະໜອງເຄື່ອງດໍາເນີນການຕິດຕັ້ງ ແລະ ທົດລອງນໍາໃຊ້, ຫຼັງຈາກນັ້ນໃຫ້ສົ່ງຜົນລາຍງານໃຫ້ຂະແໜງ ສ່ວຍສາອາກອນ ບ່ອນທີ່ຜູ້ນໍາໃຊ້ຂື້ນກັບ ພາຍໃນ 24 ຊົ່ວໂມງ;

7. ຂະແໜງສ່ວຍສາອາກອນ ລົງຕິດກາໝາຍອາກອນ ແລະ ເຊື່ອມຕໍ່ກັບລະບົບການບໍລິຫານຂໍ້ມູນຂ່າວສານສ່ວຍສາອາກອນ ດ້ວຍລະບົບເອເລັກໂຕຣນິກ;

8. ຜູ້ດໍາເນີນທຸລະກິດ ອອກແຈ້ງການກ່ຽວກັບການນໍາໃຊ້ໃບເກັບເງິນນສະເພາະ ອອກທາງສື່ມວນຊົນ, ລົງທາງເວັບໄຊທ໌ ຂອງກົມສ່ວຍສາອາກອນ ກະຊວງການເງິນນ, ຕິດແບບຢ່າງໃບເກັບເງິນນໄວັບ່ອນເປີດເຜີຍ ແລະ ຂໍ້ຂື້ນທະບຽນການນໍາໃຊ້ໃບເກັບເງິນນ ຕາມລະບຽບການ.

ໝວດທີ 5
ການປ່ຽນແປງສະຖານທີ່ ແລະ ການຢຸດເຊົາ ການນໍາໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການ

ມາດຕາ 9 ການປ່ຽນແປງສະຖານທີ່ນໍາໃຊ້ເຄື່ອງບັນທຶກການຂາຍສິນຄ້າ ແລະການບໍລິການ

ຜູ້ນໍາໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການ ທີ່ຕ້ອງການຍົກຍ້າຍບ່ອນນໍາໃຊ້ເຄື່ອງ ຈາກສະຖານທີ່ໜຶ່ງໄປອີກສະຖານທີ່ອື່ນທີ່ເປັນຂອງວິສາຫະກິດດຽວກັນ ຕ້ອງໄດ້ແຈ້ງໃຫ້ຂະແໜງສ່ວຍສາອາກອນ ບ່ອນທີ່ຕົນໄດ້ຮັບໃບອະນຸຍາດ ຮັບຊາບລ່ວງໜ້າກ່ອນ ພາຍໃນກໍານົດເວລາ 5 ວັນ ເພື່ອງລົງກວດກາ ແລະ ອອກເອກະສານຢັ້ງຢືນ. ຈາກນັ້ນ ຈື່ງສະເໜີຕໍ່ຂະແໜງສ່ວຍສາອາກອນ ບ່ອນທີ່ຕົນຈະນໍາໃຊ້ເຄື່ອງເພື່ອຮັບອະນຸຍາດ ຕາມລະບຽບການ.

ກໍລະນີມີຈຸດປະສົງນໍາໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການ ແບບເຄື່ອນທີ່ເຊັ່ນ ການຂາຍສິນຄ້າ ແລະ ການບໍລິການຢູ່ເທດສະການ ຫຼື ງານບຸນປະເພນີ, ການໂຄສະນາຂາຍສິນຄ້າ ແລະ ອື່ນໆ ຕ້ອງໄດ້ຂໍອະນຸຍາດນໍາໃຊ້ເປັນອັນສະເພາະຕ່າງຫາກ ຕາມລະບຽບການ.

ມາດຕາ 10 ການຢຸດເຊົານໍາໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການ

ຜູ້ນໍາໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການ ທີ່ຕ້ອງການຢຸດເຊົາການນໍາໃຊ້ຊົ່ຄາວ ຫຼື ເປັນການຖາວອນ ຕ້ອງສະເໜີຫາຂະແໜງສ່ວຍສາອາກອນບ່ອນທີ່ຕົນຂື້ນກັບ ເພື່ອລົງກວດກາ, ເກັບກໍາຂໍ້ມູນທີ່ເກັບຮັກສາຢູ່ໃນເຄື່ອງ ຫຼື ຢູ່ຖານຂໍ້ມູນແມ່ ແລະ ອອກໃບຢັ້ງຢືນການຖອດຖອນເຄື່ອງດັ່ງກ່າວອອກຈາກການນໍາໃຊ້.

ກໍລະນີ ຕ້ອງການເອົາເຄື່ອງທີ່ຖືກຖອດຖອນອອກໄປນັ້ນ ໄປນໍາໃຊ້ຢູ່ຫົວໜ່ວຍທຸລະກິດອື່ນ, ຜູ້ນໍາໃຊ້ລາຍໃໝ່ຕ້ອງໄດ້ສະເໜີຫາຂະແໜງສ່ວຍສາອາກອນບ່ອນທີ່ຕົນຂື້ນກັບເພື່ອຂໍອະນຸຍາດນໍາໃຊ້ ຕາມລະບຽບການ.

ໝວດທີ 6
ການແບ່ງຂັ້ນຄຸ້ມຄອງ ການນໍາໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການ

ມາດຕາ 11 ການແບ່ງຂັ້ນອອກໃບອະນຸຍາດ, ຕິດກາໝາຍອາກອນ ແລະ ເຊື່ອມຕໍ່ເຂົ້າກັບລະບົບການບໍລິຫານຂໍ້ມູນຂ່າວສານສ່ວຍສາອາກອນດ້ວຍລະບົບເອເລັກໂຕຣນິກ

ກ. ການອອກໃບອະນຸຍາດນໍາໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການ

1. ກົມສ່ວຍສາອາກອນ ອອກໃບອະນຸຍາດນໍາໃຊ້, ໃຫ້ຫົວໜ່ວຍທຸລະກິດ ທີ່ຢູ່ພາຍໃຕ້ການຄຸ້ມຄອງ ຂອງກົມສ່ວຍສາອາກອນ;

2. ພະແນກສ່ວຍສາອາກອນປະຈໍາແຂວງ, ນະຄອນຫຼວງວຽງຈັນ ອອກໃບອະນຸຍາດໃຫ້ຫົວໜ່ວຍທຸລະກິດທີ່ຢູ່ພາຍໃຕ້ການຄຸ້ມຄອງຂອງແຂວງ, ນະຄອນຫຼວງວຽງຈັນ ແລະ ບັນດາເມືອງທີ່ຂື້ນກັບຕົນ.

ຂ. ການແບ່ງຂັ້ນຕິດກາໝາຍອາກອນ

1. ກົມສ່ວຍສາອາກອນຕີກາໝາຍອາກອນໃຫ້ຫົວໜ່ວຍທຸລະກິດ ຢູ່ພາຍໃຕ້ການຄຸ້ມຄອງຂອງກົມສ່ວຍສາອາກອນ;

2. ສ່ວຍສາອາກອນປະຈໍາແຂວງ, ນະຄອນຫຼວງວຽງຈັນ ຕິດກາໝາຍອາກອນໃຫ້ຫົວໜ່ວຍທຸລະກິດທີ່ຂື້ນກັບຕົນ;

3. ສ່ວຍສາອາກອນປະຈໍາເມືອງ ຕິດກາໝາຍອາກອນໃຫ້ຫົວໜ່ວຍທຸລະກິດທີ່ຂື້ນກັບຕົນ;

ຄ. ການເຊື່ອມຕໍ່ເຂົ້າກັບລະບົບການບໍລິຫານຂໍ້ມູນຂ່າວສານສ່ວຍສາອາກອນ

ການເຊື່ອມຕໍ່ເຂົ້າກັບລະບົບການບໍລິຫານຂໍ້ມູນຂ່າວສານສ່ວຍສາອາກອນ ດ້ວຍລະບົບເອເລັກໂຕຣນິກ ແມ່ນກົມສ່ວຍສາອາກອນເປັນຜູ້ຈັດຕັ້ງປະຕິບັດ ໃນຂອບເຂດທົ່ວປະເທດ.

ມາດຕາ 12 ການແບ່ງຂັ້ນດໍາເນີນການກວດກາການນໍາໃຊ້ ເຄື່ອງບັນທຶກການຂາຍສິນຄ້າ ແລະ ການບໍລິການ

1. ກົມສ່ວຍສາອາກອນມີສິດກວດກາການຄຸ້ມຄອງ ແລະ ນໍາໃຊ້ເຄື່ອງບັນທຶກການຂາຍສິຄ້າ ແລະ ການບໍລິການ ໃນຂອບເຂດທົ່ວປະເທດ;

2. ສ່ວຍສາອາກອນປະຈໍາແຂວງ, ນະຄອນຫຼວງວຽງຈັນ ມີສິດກວດກາການຄຸ້ມຄອງ ແລະ ນໍາໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການໃນຂັ້ນຂອງຕົວເອງຄຸ້ມຄອງ ແລະ ເມືອງທີ່ຂື້ນກັບ;

3. ສ່ວຍສາອາກອນປະຈໍາເມືອງ ມີສິດກວດກາການຄຸ້ມຄອງ ແລະ ນໍາໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການຢູ່ໃນເມືອງຂອງຕົນ.

ໝວດທີ 7
ຄວາມຮັບຜິດຊອບຂອງພາກສ່ວນຕ່າງໆ ກ່ຽວກັບການຄຸ້ມຄອງ ແລະ ນໍາໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການ

ມາດຕາ 13 ຄວາມຮັບຜິດຊອບຂອງຜູ້ສະໜອງໂປຣກຣາມ ແລະ ເຄື່ອງບັນທຶກການຂາຍສິນຄ້າ ແລະ ການບໍລິການ

ບຸກຄົນ, ນິຕິບຸກຄົນທີ່ດໍາເນີນທຸລະກິດກ່ຽວກັບການສະໜອງເຄື່ອງຈັກ, ອຸປະກອນ, ໂປຣກຣາມ, ການຕິດຕັ້ງ, ບຳລຸງຮັກສາ ແລະ ສ້ອມແປງເຄື່ອງບັນທຶກການຂາຍສິນຄ້າ ແລະ ບໍລິການ ໃຫ້ແກ່ຜູ້ນໍາໃຊ້ຕ້ອງ:

1. ໄດ້ຮັບການອະນຸຍາດດໍາເນີນທຸລະກິດ ຢ່າງຖືກຕ້ອງ, ມີໃບທະບຽນວິສາຫະກິດ ແລະ ເລກປະຈໍາຕົວເສຍອາກອນ;

2. ຈັດຕັ້ງການບັນທຶກບັນຊີ, ນໍາໃຊ້ໃບເກັບເງິນນ, ດໍາເນີນການແຈ້ງເສຍອາກອນຢ່າງປົກກະຕິ ແລະ ປະຕິບັດລະບຽບການຕ່າງໆຂອງລັດວາງອອກ ຢ່ງຖືກຕ້ອງ ແລະ ເຂັ້ມງວດ;

3. ມອບສໍາເນົາຄູ່ມືການນໍາໃຊ້ໂປຣກຣາມ, ປື້ມຄູ່ມືການນໍາໃຊ້ເຄື່ອງ ແລະ ອຸປະກອນຕ່າງໆ ໃຫ້ກົມສ່ວຍສາອາກອນ;

4. ມີສັນຍາຜູກພັນກັບຜູ້ນໍາໃຊ້ເຄື່ອງ ໂດຍມີການລະບຸກ່ຽວກັບ ການເເນະນໍາ, ຝຶກອົບຮົມ, ການປັງປຸງແກ້ໄຂໂປຣກຣາມ, ການເປີດເຜີຍຂໍ້ມູນໃຫ້ກົມສ່ວຍສາອາກອນ ແລະ ດ້ານອື່ນໆ ທີ່ໄດ້ຕົກລົງກັນໃນເວລາຊື້-ຂາຍ;

5. ດໍາເນີນການປັບປຸງແກ້ໄຂໂປຣກຣາມໃຫ້ຖືກຕ້ອງຕາມມາດຕະຖານທີ່ກະຊວງການເງິນນກໍານົດ;

6. ມີໃບຢັ້ງຢືນຮັບຮອງມາດຕະຖານຈາກກົມສ່ວຍສາອາກອນ ຈຶ່ງສາມາດຕິດຕັ້ງໂປຣກຣາມໃຫ້ຜູ້ນໍາໃຊ້. ກໍລະນີ ບໍ່ແມ່ນຜູ້ພັດທະນາໂປຣກຣາມໂດຍກົງ, ຜູ້ເປັນຕົວແທນຈໍາໜ່າຍ ຫຼື ຜູ້ທີ່ໄດ້ຮັບມອບສິດ ສາມາດສະເໜີຂໍໃບຢັ້ງຢືນແທນໄດ້;

7. ອໍານວຍຄວາມສະດວກໃນການເຊື່ອມຕໍ່ເຄື່ອງບັນທຶກການຂາຍສິນຄ້າ ແລະ ບໍລິການຂອງລູກຄ້າ ເຂົ້າກັບລະບົບການບໍລິຫານຂໍ້ມູນມູນຂ່າວສານສ່ວຍສາອາກອນ. ຜູ້ສະໜອງ, ຜູ້ພັດທະນາໂປຣກຣາມ ຫຼື ຜູ້ທີ່ໄດ້ຮັບມອບສິດ (ຢູ່ພາຍໃນ ຫຼື ຕ່າງປະເທດ) ຕ້ອງສະໜອງພາບສະແດງໂຄງສ້າງລະບົບຖານຂໍ້ມູນ ຫຼື ການໃຫ້ຂໍ້ມູນຂອງລະບົບ (System flow) , ຂະບວນການເຮັດວຽກຂອງເຄື່ອຂາຍ (Process flow), ລະບົບການອອກໃບເກັບເງິນນ ແລະ ເລກລະຫັດປະຈໍາເຄື່ອງ (ຖ້າເປັນຄອມພິວເຕີ ແມ່ນເອົາທັງສອງ Hard disk ແລະ CPU) ເມື່ອມີການສະເໜີຢ່າງເປັນທາງການ;

8. ລາຍງານໃຫ້ແກ່ຂະແໜງສ່ວຍສາອາກອນບ່ອນທີ່ຕົນຂື້ນກັບ ຢ່າງທັນການເມື່ອພົບເຫັນກາໝາຍອາກອນຖືກຈີກຂາດ, ຖືກທຳລາຍ ແລະ ຂໍ້ມູນຖືກດັດແກ້ ຫຼື ຜິດປົກກະຕິ ຈາກສະພາບເດີມ;

9. ປະຕິບັດລະບຽບກົດໝາຍອື່ນໆທີ່ກ່ຽວຂ້ອງ ຢ່າງເຂັ້ມງວດ.

ມາດຕາ 14 ຄວາມຮັບຜິດຊອບ ຂອງຜູ້ນໍາໃຊ້ເຄື່ອງບັນທຶກການຂາຍສິນຄ້ານ ແລະ ການບໍລິການ

ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ໄດ້ຮັບອະນຸຍາດໃຫ້ນໍາໃຊ້ຕ້ອງ:

1. ຕິດໃບອະນຸຍາດນໍາໃຊ້ ໄວ້ຢູ່ບ່ອນເປີດເຜີຍ ໃນສະຖານທີ່ດໍາເນີນທຸລະກິດ ຊື່ງສາມາດເຮັດໃຫ້ບຸກຄົນເຫັນໄດ້ຢ່າງຈະແຈ້ງ ແລະ ຊັດເຈນ;

2. ມີສັນຍາຜູກພັນກັບຜູ້ສະໜອງ ໂດຍມີການລະບຸກ່ຽວກັບການແນະນໍາ, ຝຶກອົບຮົມ, ການປັງປຸງແກ້ໄຂແກ້ໄຂໂປຣກຣາມ, ການເປີດເຜີຍຂໍ້ມູນໃຫ້ກົມສ່ວຍສາອາກອນ ແລະ ດ້ານອື່ນໆ ທີ່ໄດ້ຕົກລົງກັນໃນເວລາຊື້-ຂາຍ;

3. ປະສານສົມທົບກັບຜູ້ສະໜອງ ເພື່ອອຳນວຍຄວາມສະດວກໃຫ້ແກ່ເຈົ້າໜ້າທີ່ສ່ວຍສາອາກອນ ຕິດກາໝາຍອາກອນ ໃສ່ອຸປະກອນຂອງເຄື່ອງ ຕາມທີ່ກໍານົດໄວ້ ໃນຄູ່ມືການນໍາໃຊ້ ຂອງເຄື່ອງແຕ່ລະຊະນິດ; ໃນກໍລະນີ ພົບເຫັນກາໝາຍອາກອນຖືກຈີກຂາດ ຫຼື ບໍ່ສາມາດອ່ານຂໍ້ຄວາມໄດ້ຢ່າງຊັດເຈນ ຕ້ອງໄດ້ສະເໜີຫາຂະແໜງສ່ວຍສາອາກອນບ່ອນທີ່ຕົນຂື້ນກັບຮັບຊາບ ພາຍໃນ 48 ຊົ່ວໂມງ;

4. ສະໜອງຂໍ້ມູນທີ່ເກັບຮັກສາໄວ້ຢູ່ໃນເຄື່ອງ ຫຼື ອຸປະກອນສະເພາະ ຫຼື ຖານຂໍ້ມູນແມ່ (central server), ອຳນວຍຄວາມສະດວກໃນການເຂົ້າຫາລະບົບຖານຂໍ້ມູນ ໃນເວລາມີການຮ້ອງຂໍຢ່າງເປັນທາງການ;

5. ບັນທຶກຂໍ້ມູນການຂາຍສິນຄ້າ ແລະ ການບໍລິການ, ພ້ອມທັງອອກເບີເກັບເງິນທີ່ຖືກຕ້ອງ ທຸກຄັ້ງ ເມື່ອມີການຂາຍສິນຄ້າ ແລະ ບໍລິການ;

6. ສະຫຼຸບລາຍຮັບໃນແຕ່ລະວັນ ຊ້າສຸດບໍ່ໃຫ້ກາຍເວລາ 24 ໂມງ 00 ນາທີ ຂອງມື້ເຮັດວຽກ;

7. ສະຫຼຸບລາຍຮັບປະຈໍາເດືອນຊ້າສຸດບໍ່ໃຫ້ກາຍ 24 ໂມງ 00 ນາທີ ຂອງມື້ເຮັດວຽກໃນທ້າຍເດືອນ ແລະ ສົ່ງບົດລາຍງານດັ່ງກ່າວໃຫ້ຂະແໜງສ່ວຍສາອາກອນບ່ອນທີ່ຕົນຂື້ນກັບ ກ່ອນວັນທີ່ 15 ຂອງເດືອນຖັດໄປ;

8. ແຈ້ງເສຍ ແລະ ສໍາລະອາກອນປະເພດຕ່າງໆໃຫ້ຖືກຕ້ອງ, ຄົບຖ້ວນ ແລະ ທ່ວງທັນເວລາ ຕາມທີ່ກໍານົດໄວ້;

9. ແຈ້ງໃຫ້ຜູ້ສະໜອງເຄື່ອງ ຮັບຊາບພາຍໃນ 1 ຊົ່ວໂມງ ຖ້າເກີດມີຄວາມຂັດຂ້ອງທາງດ້ານເຕັກນິກ ຫຼື ຄວາມບໍ່ຖືກຕ້ອງຂອງການໃຊ້ງານຊຸດຄໍາສັ່ງ;

10. ລາຍງານຢ່າງເປັນລາຍລັກອັກສອນ ໃຫ້ຂະແໜງສ່ວຍສາອາກອນ ບ່ອນທີ່ຕົນຂື້ນກັບຮັບຊາບ ພາຍໃບ 24 ຊົ່ວໂມງ ໃນເວລາດໍາເນີນບຳລຸງຮັກສາ, ສ້ອມແປງ, ປ່ຽນຖ່າຍ, ຖອດຖອນ ຫຼື ຢຸດຕິການໃຊ້ງານເຄື່ອງ ຫຼື ອຸປະກອນຕ່າງໆ; ຖ້າມີການຂາຍສິນຄ້າ ແລະ ການບໍລິການໃນໄລຍະດັ່ງກ່າວ ຕ້ອງໄດ້ອອກໃບເກັບເງິນທີ່ຂຽນດ້ວຍມື ແລະ ບັນທຶກບັນຊີຕາມລະບຽບການ;

11. ສະເໜີຫາຂະແໜງສ່ວຍສາອາກອນບ່ອນທີ່ຕົນຂື້ນກັບ ໃນກໍລະນີ ຕ້ອງຍົກຍ້າຍ ຫຼື ປ່ຽນແປງສະຖານທີ່ນໍາໃຊ້ເຄື່ອງ ຫຼື ອຸປະກອນຕ່າງໆ;

12. ສະເໜີຫາຂະແໜງສ່ວຍສາອາກອນ ຂັ້ນສູງກ່ວາ ເມື່ອເຫັນວ່າຕົນເອງບໍ່ໄດ້ຮັບຄວາມເປັນທຳຈາກການປະຕິບັດ ຂອງເຈົ້າໜ້າທີ່ສ່ວຍສາອາກອນ ໃນເວລາພິຈາລະນາການອອກໃບອະນຸຍາດ ຫຼື ການດໍາເນີນການກວດກາການນໍາໃຊ້;

13. ເຫັນດີປະຕິບັດມາດຕະການຢ່າງເຂັ້ມງວດ ໃນກໍລະນີ ມີການກະທຳຜິດ ຫຼື ລະເມີດຂໍ້ກໍານົດ ແລະ ບົດບັນຍັດ ທີ່ໄດ້ລະບຸໄວ້ຢູ່ໃນຂໍ້ຕົກລົງສະບັບນີ້.

ໝວດທີ 8
ຂໍ້ຫ້າມສໍາລັບພະນັກງານຂອງລັດ ແລະ ຜູ້ດໍາເນີນທຸລະກິດ

ມາດຕາ 15 ຂໍ້ຫ້າມສໍາລັບພະນັກງານສ່ວຍສາອາກອນ ແລະ ເຈົ້າໜ້າທີ່ຂອງລັດ

ໃນເວລາດໍາເນີນການພິຈາລະນາການອອກໃບຢັ້ງຢືນຮັບຮອງມາດຕະຖານ, ໃບອະນຸຍາດນໍາໃຊ້ເຄື່ອງ ແລະ ເວລາລົງກວດກາການນໍາໃຊ້, ຫ້າມພະນັກງານສ່ວຍສາອາກອນ ແລະ ເຈົ້າໜ້າທີ່ຂອງລັດກະທຳການ ດັ່ງຕໍ່ໄປນີ້:

1. ກົດໜ່ວງ, ຖ່ວງດຶງເອກະສານ ແລະ ຮຽກຮ້ອງເອົາຄ່າຕອບແທນ;

2. ສວຍໃຊ້ຕຳແໜ່ງ ແລະ ໜ້າທີ່ຮັບຜິດຊອບຮັບເອົາສິນບົນ;

3. ສົມຮູ້ຮ່ວມຄິດກັບຜູ້ນໍາໃຊ້ເຄື່ອງບັນທຶກການຂາຍສິນຄ້າ ແລະ ບໍລິການ ປິດບັງ, ເຊື່ອງອຳ ແລະ ຫຼົບຫຼີກການປະຕິບັດພັນທະຕໍ່ລັດ;

4. ເປີດເຜີຍຂໍ້ມູນ ຫຼື ນໍາໃຊ້ລະຫັດຜ່ານເຂົ້າຫາຖານຂໍ້ມູນຂອງຜູ້ນໍາໃຊ້ ໃນທາງທີ່ຜິດກົດໝາຍ;

5. ເມີນເສີຍ, ປະລະໜ້າທີ່ ແລະ ບໍ່ເຂັ້ມງວດຕໍ່ການປະຕິບັດລະບຽບກົດໝາຍວາງອອກ;

6. ແນະນໍາ, ອະທິບາຍ ແລະ ເຕັກເຕື້ອນຜູ້ດໍາເນີນທຸລະກິດ ໃນທາງທີ່ຜິດລະບຽບກົດໝາຍ;

7. ກະທໍາການອື່ນໆ ທີ່ເປັນການລະເມີດລະບຽບກົດໝາຍ.

ມາດຕາ 16 ຂໍ້ຫ້າມສໍາລັບຜູ້ນໍາໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການ

ຫ້າມຜູ້ດໍາເນີນທຸລະກິດ ຫຼື ຜູ້ນໍາໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການກະທຳການ ດັ່ງຕໍ່ໄປນີ້:

1. ນໍາໃຊ້ເຄື່ອງ ໂດຍບໍ່ໄດ້ຮັບການອະນຸຍາດຈາກຂະແໜງສວຍສາອາກອນບ່ອນທີ່ຕົນຂື້ນກັບ;

2. ຕິດຕັ້ງໂປຣກຣາມຈາກຜູ້ສະໜອງພາຍໃນ ຫຼື ຕ່າງປະເທດ ທີ່ບໍ່ມີໃບຢັ້ງຢືນຮັບຮອງມາດຕະຖານ ຈາກກົມສ່ວຍສາອາກອນ ກະຊວງການເງິນ;

3. ຍື່ນໃບສະເໜີຂໍຕໍ່ໃບອະນຸຍາດນໍາໃຊ້ເຄື່ອງຊັກຊ້າ;

4. ເອົາໃບອະນຸຍາດນໍາໃຊ້ໃຫ້ຜູ້ອື່ນນໍາໃຊ້;

5. ບໍ່ສະໜອງຂໍ້ມູນການຊື້-ຂາຍຕົວຈິງທີ່ເກັບຮັກສາໄວ້ຢູ່ໃນເຄື່ອງ;

6. ຂັດຂວາງການປະຕິບັດໜ້າທີ່ ຫຼື ກະທຳການທີ່ມີລັກສະນະບໍ່ໃຫ້ການຮ່ວມມືກັບເຈົ້າໜ້າທີ່ສ່ວຍສາອາກອນໃນເວລາດໍາເນີນການກວດກາ ແລະ ເກັບກໍາຂໍ້ມູນ;

7. ປະຕິເສດ ຫຼື ບໍ່ອຳນວຍຄວາມສະດວກໃຫ້ແກ່ເຈົ້າໜ້າທີ່ສ່ວຍສາອາກອນ ເຂົ້າຫາລະບົບຖານຂໍ້ມູນທີ່ເກັບຮັກສາໄວ້ຢູ່ໃນເຄື່ອງ ຫຼື ອຸປະກອນສະເພະ ຫຼື ຖານຂໍ້ມູນແມ່ ໃນເວລາມີການຮ້ອງຂໍເປັນທາງການ;

8. ຢຸດເຊົາ ຫຼື ຍົກຍ້າຍສະຖານທີ່ຕິດຕັ້ງເຄື່ອງ ແລະ ອຸປະກອນ ໂດຍບໍ່ໄດ້ຮັບອະນຸຍາດຈາກຂະແໜງສ່ວຍສາອາກອນບ່ອນທີ່ຕົນຂື້ນກັບ;

9. ບັນທຶກຂໍ້ມູນຊັກຊ້າ ຫຼື ບັນທຶກບໍ່ຖືກຕ້ອງ ຕາມຂໍ້ມູນການຊື້-ຂາຍຕົວຈິງ;

10. ບໍ່ອອກໃບເກັບເງິນໃນເວລາຂາຍສິນຄ້າ ແລະ ການບໍລິການ ຫຼື ປອມແປງໃບເກັບເງິນ;

11. ບໍ່ສ້າງໃບລາຍງານລາຍຮັບປະຈໍາວັນ ແລະ ປະຈໍາເດືອນຕາມກໍານົດເວລາ;

12. ສົ່ງໃບລາຍງານການຂາຍສິນຄ້າ ແລະ ການບໍລິການປະຈໍາເດືອນບໍ່ທັນກໍານົດເວລາກໍານົດໄວ້;

13. ເອົາເຄື່ອງບັນທຶກການຂາຍສິນຄ້າ ແລະ ການບໍລິການ ທີ່ໄດ້ເຊື່ອມຕໍ່ກັບລະບົບການບໍລິຫານຂໍ້ມູນຂ່າວສານສ່ວຍສາອາກອນແລ້ວ ໄປນໍາໃຊ້ເພື່ອບັນທຶກການຂາຍສິນຄ້າ ແລະ ການບໍລິການແບບເຄື່ອງທີ່;

14. ກະທໍາການໃນລັກສະນະ ທີ່ເປັນການລະເມີດຂໍ້ຕົກລົງສະບັບນີ້.

ໝວດທີ 9
ນະໂຍບາຍຕໍ່ຜູ້ມີຜົນງານ ແລະ ມາດຕະການຕໍ່ຜູ້ລະເມີດ

ມາດຕາ 17 ນະໂຍບາຍຕໍ່ຜູ້ມີຜົນງານ

ບຸກຄົນ, ນິຕິບຸກຄົນ ແລະ ການຈັດຕັ້ງຕ່າງໆ ທີ່ໄດ້ປະກອບສ່ວນເຂົ້າໃນການຈັດຕັ້ງປະຕິບັດຂໍ້ຕົກລົງສະບັບນີ້ໄດ້ດີ ຈະໄດ້:

1. ຮັບການພິຈາລະນາ ຄົ້ນຄ້ວາຕໍ່ໃບອະນຸຍາດ ແລະ ຄວາມສະດວກດ້ານຕ່າງໆ ໃນການດໍາເນີນທຸລະກິດ ຕາມລະບຽບກົດໝາຍລະບົບໄວ້;

2. ຮັບການອະນຸຍາດໃຫ້ລົງເປັນລາຍຈ່າຍດ້ານສ່ວຍສາອາກອນ ສໍາລັບຄ່າໃຊ້ຈ່າຍໃນການຕິດຕັ້ງ, ບຳລຸງຮັກສາ ແລະ ສ້ອມແປງເຄື່ອງບັນທຶກການຂາຍສິນຄ້າ ແລະ ການບໍລິການ;

3. ຮັບການຍ້ອງຍໍ, ຊົມເຊີຍ ແລະ ຜົນປະໂຫຍດດ້ານຕ່າງໆ ຕອບແທນຈາກລັດຖະບານ ຕາມລະບຽບການກໍານົດໄວ້ ແລ ຕາມຄວາມເໝາະສົມ ໃນແຕ່ລະໄລຍະ.

ມາດຕາ 18 ມາດຕະການຕໍ່ຜູ້ລະເມີດ

ກ. ສໍາລັບພະນັກງານສ່ວຍສາອາກອນ ແລະ ເຈົ້າໜ້າທີ່ຂອງລັດ

ຖ້າພະນັກງານ ແລະ ເຈົ້າໜ້າທີ່ຂອງລັດກະທຳການລະເມີດຂໍ້ຕົກລົງສະບັບນີ້ ແມ່ນປະຕິບັດຕາມກົດໝາຍວ່າດ້ວຍພະນັກງານ-ລັດຖະກອນ ແລະ ນິຕິກໍາກ່ຽວຂ້ອງ ທີ່ວ່າງອອກໃນແຕ່ລະໄລຍະ ຢ່າງເຂັ້ມງວດ.

ຂ. ສໍາລັບຜູ້ສະໜອງ ແລະ ຜູ້ນໍາໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການ

ຖ້າຜູ້ສະໜອງ ແລະ ຜູ້ນໍາໃຊ້ ລະເມີດຂໍ້ກໍານົດ ແລະ ບົດບັນຍັດທີ່ລະບຸໄວ້ຢູ່ໃນຂໍ້ຕົກລົງສະບັບນີ້ ແມ່ນຈະຖືກປະຕິບັດຕາມມາດຕະການ ຕາມແຕ່ລະກໍລະນີ ດັ່ງນີ້:

1. ກໍລະນີ ຕິດຕັ້ງໂປຣກຣາມ ຫຼື ຈໍາໜ່າຍເຄື່ອງບັນທຶກການຂາຍສິນຄ້າ ແລະ ການບໍລິການ ໂດຍບໍ່ມີການຢັ້ງຢືນຮັບຮອງມາດຕະຖານຈາກກົມສ່ວຍສາອາກອນ ຈະຖືກປັບໃໝ 10.000.000 ກີບ/ເຄື່ອງ, ພ້ວມດຽວກັນນັ້ນ ກໍ່ຈະໄດ້ເຮັດບົດບັນທຶກ ຫຼື ແຈ້ງການໃຫ້ມາຂໍອະນຸຍາດອອກໃບຢັ້ງຢືນດັ່ງກ່າວ ຕາມລະບຽບການ.

2. ກໍລະນີ ນໍາໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການ ໂດຍບໍ່ໄດ້ຮັບໃບອະນຸຍາດ, ຖ້າກວດການເຫັນ:

ຄັ້ງທີ່ໜຶ່ງ ຖືກສຶກສາອົບຮົມ ແລະ ສ້າງບົດບັນທຶກໃຫ້ມາຂໍອະນຸຍາດນໍາໃຊ້ ຕາມລະບຽບການ;
ຄັ້ງທີ່ສອງ ຖືກປັບໃໝ 10.000.000 ກີບ.

ໃນເມື່ອ ບໍ່ຕໍ່ໃບອະນຸຍາດ ຖືກປັບໃໝ 1.000.000 ກີບ ໃນເວລາກໍານົດການກວດການ ແລະ ຈະຖືກປັບໃໝ 100% ຂອງຄ່າທຳນຽມການອອກໃບອະນຸຍາດ.

3. ກໍລະນີ ລະເມີດລະບຽບການນໍາໃຊ້ ທີ່ໄດ້ກໍານົດໄວ້ຢູ່ໃນຂໍ້ຕົກລົງສະບັບນີ້ ເປັນຕົ້ນ ບໍ່ບັນທຶກລາຍການຂາຍລົງເຄື່ອງ, ບັນທຶກບໍ່ຄົບຖ້ວນ (ບໍ່ຖືກກັບຕົວຈິງ), ບັນທຶກບໍ່ຖືກເວລາ (ຊັກຊ້າ), ບໍ່ອອກໃບເກັບເງິນ, ອອກໃບເກັບເງິນບໍ່ຖືກເວລາ, ບໍ່ສ້າງໃບລາຍງານລາຍຮັບປະຈໍາວັນ ຫຼື ປະຈໍາເດືອນ, ຈີກກາໝາຍອາກອນອອກ, ຢຸດເຊົາ ຫຼື ຍົກຍ້າຍສະຖານທີ່ໂດຍບໍ່ໄດ້ຮັບອະນຸຍາດ, ໃຫ້ຜູ້ອື່ນນໍາໃຊ້ໃບອະນຸຍາດ, ຖອດຫົວເຊື່ອມຕໍ່, ໃຊ້ຊຸດຄໍາສັ່ງເພື່ອສະກັດກັ້ນ ຫຼື ກີດຂວາງການເຊື່ອມຕໍ່ລະບົບບໍລິຫານຂໍ້ມູນຂ່າວສານສ່ວຍສາອາກອນ, ຖ້າກວດກາເຫັນການກະທຳໃດໜຶ່ງ (ຊ້ຳກັນ) :

ຄັ້ງທີໜຶ່ງ ຖືກສຶກສາອົບຮົມ ແລະ ປັບໃໝ 1.000.000 ກີບ;
ຄັ້ງທີສອງ ຖືກປັບໃໝ 5.000.000 ກີບ;
ຄັ້ງທີສາມຂື້ນໄປ ຖືກປັບໃໝ 10.000.000 ກີບ ແລະ ແຈ້ງອອກທາງສື່ມວນຊົນ.

4. ກໍລະນີ ແກ່ຍາວເວລາໃນການສະໜອງຂໍ້ມູນການຂາຍສິນຄ້າ ແລະ ການບໍລິການ ໃຫ້ແກ່ຂະແໜງສ່ວຍສາອາກອນ ເມື່ອມີການຮ້ອງຂໍ, ບໍ່ສະໜອງລະຫັດຜ່ານ ຫຼື ບໍ່ອຳນວຍຄວາມສະດວກໃຫ້ເບິ່ງຂໍ້ມູນທີ່ໄດ້ເກັບຮັກສາໄວ້ຢູ່ໃນເຄື່ອງ ຫຼື ຢູ່ຖານຂໍ້ມູນແມ່, ບໍ່ມາຂໍໃບຢັ້ງຢືນຮັບຮອງຕາມມາດຕະຖານນໍາກົມສ່ວຍສາອາກອນ ພາຍຫຼັງທີ່ໄດ້ມີບົດບັນທຶກ ຫຼື ແຈ້ງການເປັນລາຍລັກອັກສອນແລ້ວ, ບໍ່ຊຳລະເງິນຄ່າປັບໃໝຕາມຂໍ້ທີ 1 ຫາຂໍ້ທີ 3 ຂ້າງເທິງ, ບໍ່ອຳນວຍຄວາມສະດວກໃນການເຊື່ອມຕໍ່ລະບົບບໍລິຫານຂໍ້ມູນຂ່າວສານສ່ວຍສາອາກອນ ແລະ ພຶດຕິກໍາອື່ນໆທີ່ມີລັກສະນະບ່າຍບ່ຽງ ຫຼື ບໍ່ໃຫ້ການຮ່ວມມືກັບເຈົ້າໜ້າທີສ່ວຍສາອາກອນ ຈະຖືກປະຕິບັດຕາມຂັ້ນຕອນ ດັ່ງນີ້:

ຂັ້ນຕອນທີໜຶ່ງ ຖືກສຶກສາອົບຮົມ ແລະ ສ້າງບົດບັນທຶກເປັນລາຍລັກອັກສອນ;
ຂັ້ນຕອນທີສອງ ສ້າງບົນບັນທຶກ ແລະ ອອກແຈ້ງການກ່າວເຕືອນກ່ຽວກັບການຈະນໍາໃຊ້ມາດຕະການຢ່າງເຂັ້ມງວດ ແລະ ເປັນຕົ້ນ ສະເໜີພາກສ່ວນກ່ຽວຂ້ອງເພື່ອບໍ່ອຳນວຍຄວາມສະດວກໃນການດໍາເນີນທຸລະກິດ, ການຈະຖອນໃບອະນຸຍາດດໍາເນີນທຸລະກິດເປັນການຊົ່ວຄາວ ແລະ ມາດຕະການອື່ນໆ ຕາມລະບຽບກົດໝາຍກໍານົດໄວ້;
ຂັ້ນຕອນທີສາມ ສະເໜີພາກສ່ວນກ່ຽວຂ້ອງຖອນໃບອະນຸຍາດດໍາເນີນທຸລະກິດ, ໃບທະບຽນວິສາຫະກິດ, ໃບອະນຸຍາດສໍາປະທານ ແລະ ປະກອບສໍານວນເອກະສານສົ່ງໃຫ້ແກ່ເຈົ້າໜ້າທີ່ສໍາຫຼວດ, ໄອຍະການປະຊາຊົນ ເພື່ອດໍາເນີນຄະດີ ຕາມລະບຽບກົດໝາຍ.

5. ກໍລະນີ ການລະເມີດ ຫຼື ການກະທຳຜິດທີ່ກ່າວມາຂ້າງເທິງນັ້ນ ຫາກພົວພັນກັບການນໍາໃຊ້ໃບເກັບເງິນ ຫຼື ການແຈ້ງເສີຍອາກອນປະເພດຕ່າງໆແມ່ນຈະຖືກປະຕິບັດມາດຕະການຕ່າງໆຕາມດໍາລັດວ່າດ້ວຍໃບເກັບເງິນນ ກົດໝາຍວ່າດ້ວຍອາກອນມູນຄ່າເພື່ມ, ກົດໝາຍວ່າດ້ວຍສ່ວຍສາອາກອນ ແລະ ນິຕິກໍາອື່ນໆ ທີ່ກ່ຽວຂ້ອງຕື່ມອີກ;

6. ກໍລະນີ ເຄື່ອງບັນທຶກເງິນນສົດ ແລະ ເຄື່ອງບັນທຶກຢູ່ຈຸດຂາຍທີ່ບໍ່ໄດ້ມາດຕະຖານຕາມທີ່ໄດ້ກໍານົດຢູ່ມາດຕາ 4 ຂ້າງເທິງນັ້ນ ແມ່ນຫ້າມຜະລິດ, ນໍາເຂົ້າ ແລະ ຈໍາໜ່າຍໃນທ້ອງຕະຫຼາດເດັດຂາດ, ຖ້າມີການກວດກາພົບເຫັນ ແມ່ນຈະໄດ້ຖືກຮິບເປັນຂອງລັດ.

ໝວດທີ 10
ບົດບັນຍັດສຸດທ້າຍ

ມາດຕາ 19 ການຈັດຕັ້ງປະຕິບັດ

ມອບໃຫ້ກົມສ່ວຍສາອາກອນ ສົມທົບກັບບັນດາກົມທີ່ກ່ຽວຂ້ອງ ແລະ ອົງການປົກຄອງທ້ອງຖີ່ນ ເພຶ່ອຈັດຕັ້ງໂຄສະນາ, ເຜີຍແຜ່, ແນະນໍາ ແລະ ປະຕິບັດຂໍ້ຕົກລົງສະບັບນີ້ໃຫ້ໄດ້ຮັບຜົນດີ; ອອກແຈ້ງການໃຫ້ຜູ້ດໍາເນີນທຸລະກິດ, ພະນັກງານຂອງລັດ ແຕ່ລະຂັ້ນ ຕະຫຼອດຮອດປະຊາຊົນທົ່ວໄປ ໃຫ້ຮັບຮູ້, ເຂົ້າໃຈ ແລະ ຈັດຕັ້ງປະຕິບັດໃຫ້ຖືກຕ້ອງ.

ກໍລະນີ ເຄື່ອງບັນທຶກເງິນນສົດທີ່ບໍ່ໄດ້ມາດຕະຖານຕາມມາດຕາ 4 ຂ້າງເທິງ ເຊິ່ງໄດ້ຊື້ເຂົ້າມາ ຫຼື ໄດ້ນໍາໃຊ້ ກ່ອນມືຂໍ້ຕົກລົງສະບັບນີ້ປະກາດໃຊ້ ແມ່ນໃຫ້ຜູ້ດໍາເນີນທຸລະກິດສະເໜີຫາຂະແໜງສ່ວຍສາອາກອນລົງກວດກາຕົວຈິງ ແລະ ພິຈາລະນາອອກໃບອະນຸຍາດນໍາໃຊ້ສະເພາະ. ສໍາລັບເຄື່ອງບັນທຶກຢູ່ຈຸດຂາຍຕັ້ງດ່ຽວ ຫຼື ມີການເຊື່ອມໂຍງເຂົ້າກັບລະບົບໂປຣກຣາມບັນຊີ ເຊິ່ງບໍ່ໄດ້ມາດຕະຖານຕາມທີ່ກໍານົດໄວ້ ແມ່ນໃຫ້ເວລາປັບປຸງແກ້ໄຂໃຫ້ສໍາເລັດ ພາຍໃນກໍານົດ 3 ເດືອນ, ຖ້າກາຍກໍານົດດັ່ງກ່າວ ຕ້ອງໄດ້ລາຍງານ ຢ່າງເປັນລາຍລັກອັກສອນ ໃຫ້ຂະແໜງສ່ວຍສາອາກອນບ່ອນທີ່ຕົນຂື້ນກັບຮັບຊາບ ຢ່າງທັນການ.

ມາດຕາ 20 ຜົນສັກສິດ

ຂໍ້ຕົກລົງສະບັບນີ້ ມີຜົນສັກສິດ ນັບແຕ່ມື້ໄດ້ລົງລາຍເຊັນເປັນຕົ້ນໄປ ແລະ ຈັດຕັ້ງປະຕິບັດ ພາຍຫຼັງໄດ້ພີມລົງໃນຈົດໝາຍເຫດທາງລັດຖະການ ສິບຫ້າ ວັນ.

ຮອງນາຍົກລັດຖະມົນຕີ,

ລັດຖະມົນຕີກະຊວງການເງິນ

ສົມດີ ດວງດີ

#	ຫົວຂໍ້	ດາວໂຫຼດ
1	ຂໍ້ຕົກລົງ ວ່າດ້ວຍ ການຄຸ້ມຄອງ ແລະ ນຳໃຊ້ເຄື່ອງບັນທຶກການຂາຍສິນຄ້າ ແລະ ບໍລິການ ເລກທີ 1179/ກງ, ລົງວັນທີ 20 ເມສາ 2017	PDF

ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.

ຂໍ້​ຕົກລົງ

ວ່າ​ດ້ວຍ​ການ​ຄຸ້ມ​ຄອງ​ ແລະ​ ນໍາ​ໃຊ້ ​ເຄື່ອງ​ບັນທຶກ​ການ​ຂາຍ​ສິນຄ້າ ​ແລະ ບໍລິການ

Your opinion matters!

ຂອບໃຈ ສຳລັບຄຳຄິດເຫັນຂອງທ່ານ.

ຂໍ້ຕົກລົງ

ວ່າດ້ວຍການຄຸ້ມຄອງ ແລະ ນໍາໃຊ້ ເຄື່ອງບັນທຶກການຂາຍສິນຄ້າ ແລະ ບໍລິການ