ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ
ກະຊວງການເງິນ ເລກທີ: 1462. /ກງ
ນະຄອນຫຼວງວຽງຈັນ, ວັນທີ: 17 ພຶດສະພາ 2019.
ຂໍ້ຕົກລົງ
ວ່າດ້ວຍການຢຸດຕິດຳເນີນການນຳເຂົ້າເພື່ອສົ່ງອອກຕໍ່ (ສິນຄ້າປະເພດພາຫະນະ) ໄປປະເທດທີສາມ
- ອິງຕາມ ດຳລັດວ່າດ້ວຍການຈັດຕັ້ງ ແລະ ເຄື່ອນໄຫວຂອງກະຊວງການເງິນ ສະບັບເລກທີ 144/ນຍ, ລົງວັນທີ 08 ພຶດສະພາ 2017;
- ອິງຕາມ ແຈ້ງການຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 358/ຫສນຍ.ກຄສ, ລົງວັນທີ 13 ມີນາ 2018 ກ່ຽວກັບທິດຊີ້ນຳກ່ຽວກັບການຂໍອະນຸຍາດນຳເຂົ້າພາຫະນະເພື່ອສົ່ງອອກໄປປະເທດທີ່ສາມ;
- ອິງຕາມ ບົດແນະນຳຂອງກະຊວງການເງິນ ສະບັບເລກທີ 1409 /ກງ, ລົງວັນທີ 10 ພຶດສະພາ 2018 ວ່າດ້ວຍການຄຸ້ມຄອງການນຳເຂົ້າເພື່ອສົ່ງອອກຕໍ່ສິນຄ້າປະເພດພາຫະນະ;
- ອິງຕາມ ບົດລາຍງານຂອງກົມພາສີ ສະບັບເລກທີ 0326/ກພສ, ລົງວັນທີ 30 ເມສາ 2019.
ລັດຖະມົນຕີກະຊວງການເງິນ ຕົກລົງ:
ມາດຕາ 1: ເຫັນດີລົບລ້າງ ບົດແນະນຳຂອງກະຊວງການເງິນ ສະບັບເລກທີ1409/ກງ, ລົງວັນທີ 10/05/2018 ວ່າດ້ວຍການຄຸ້ມຄອງການນຳເຂົ້າເພື່ອສົ່ງອອກຕໍ່ສິນຄ້າປະເພດພາຫະນະ;
ມາດຕາ 2: ໃຫ້ບັນດາບໍລິສັດທີ່ດຳເນີນການນຳເຂົ້າເພື່ອສົ່ງອອກ (ຕໍ່ສິນຄ້າປະເພດພາຫະນະ ຄື: ບໍລິສັດ ໂຕໂຢຕ້າລາວທານີ ຈຳກັດ, ບໍລິສັດ ລາວໂຕໂຢຕ້າບໍລິການ ຈຳກັດ, ບໍລິສັດ ໂຕໂຢຕ້າຈຳປາ ຈຳກັດ ແລະ ບໍລິສັດ ລາວອິນເຕີເຊັນໂນໂລຈິສຕິກ ຈຳກັດຜູ້ດຽວ ແລະ ອື່ນໆ) ຢຸດຕິການດຳເນີນການນຳເຂົ້າເພື່ອສົ່ງຕໍ່ສິນຄ້າປະເພດພາຫະນະ ໄປປະເທດທີ່ສາມ ເລີ່ມແຕ່ມື້ລົງລາຍເຊັນຂໍ້ຕົກລົງສະບັບນີ້ເປັນຕົ້ນໄປ;
ມາດຕາ 3: ມອບໃຫ້ກົມພາສີ ສະຫຼຸບສັງລວມການຈັດຕັ້ງປະຕິບັດໃນໄລຍະທີ່ຜ່ານມາ ເພື່ອລາຍງານລັດຖະບານຮັບຊາບຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 358/ກງ ລົງວັນທີ 13 ມີນາ 2018ທີ່ໄດ້ກຳນົດລາຍລະອຽດໃນຂໍ້ທີ່ 4;
ມາດຕາ 4: ມອບໃຫ້ກົມພາສີ, ກົມສ່ວຍສາອາກອນ, ຂະແໜງການທີ່ກ່ຽວຂ້ອງຈົ່ງຮັບຮູ້, ໃຫ້ການຮ່ວມມື ແລະ ພ້ອມກັນຈັດຕັ້ງປະຕິບັດຂໍ້ຕົກລົງສະບັບນີ້ຢ່າງເຂັ້ມງວດ;
ມາດຕາ 5: ຕົກລົງສະບັບນີ້ ມີຜົນສັກສິດນັບແຕ່ມື້ລົງລາຍເຊັນເປັນຕົ້ນໄປ.
ລັດຖະມົນຕີກະຊວງການເງິນ
ສົມດີ ດວງດີ
| # | ຫົວຂໍ້ | ດາວໂຫຼດ |
|---|---|---|
| 1 | ຂໍ້ຕົກລົງ ວ່າດ້ວຍ ການຢຸດຕິດຳເນີນການນຳເຂົ້າເພື່ອສົ່ງອອກຕໍ່ (ສິນຄ້າປະເພດພາຫະນະ) ໄປປະເທດທີ່ສາມ ເລກທີ 1462/ກງ, ລົງວັນທີ 17 ພຶດສະພາ 2019 |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.