ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ
ກະຊວງອຸດສາຫະກໍາ ແລະ ການຄ້າ ເລກທີ 0623 /ອຄ.ກຂອ
ນະຄອນຫຼວງວຽງຈັນ, ວັນທີ 05 ມິຖຸນາ 2019
ຂໍ້ຕົກລົງ
ວ່າດ້ວຍສິດທາງການຄ້າຂອງຜູ້ຄ້າຕ່າງປະເທດ
- ອີງຕາມດຳລັດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງອຸດສາຫະກຳ ແລະ ການຄ້າ, ສະບັບເລກທີ 230/ນຍ, ລົງວັນທີ 24 ກໍລະກົດ 2017.
- ອີງຕາມດຳລັດ ວ່າດ້ວຍການນຳເຂົ້າ ແລະ ການສົ່ງອອກສິນຄ້າ, ສະບັບເລກທີ 114/ລບ, ລົງວັນທີ 06 ເມສາ 2011.
- ອີງຕາມການສະເໜີຂອງກົມການນຳເຂົ້າ ແລະ ສົ່ງອອກ ສະບັບເລກທີ 2349/ກຂອ.ສລ, ລົງວັນທີ 27 ພຶດສະພາ 2019.
ລັດຖະມົນຕີ ກະຊວງອຸດສາຫະກຳ ແລະ ການຄ້າ ອອກຂໍ້ຕົກລົງ:
ໝວດທີ I
ບົດບັນຍັດທົ່ວໄປ
ມາດຕາ 1 ຈຸດປະສົງ
ຂໍ້ຕົກລົງສະບັບນີ້ ກຳນົດຫຼັກການ, ລະບຽບການ ແລະ ມາດຕະການ ກ່ຽວກັບການນຳເຂົ້າ ແລະ ສົ່ງອອກສິນຄ້າຂອງຜູ້ຄ້າຕ່າງປະເທດ ເພື່ອເປີດກວ້າງ ແລະ ສ້າງເງື່ອນໄຂເອື້ອອຳນວຍໃຫ້ແກ່ການນໍາເຂົ້າ ແລະ ການສົ່ງອອກສິນຄ້າ ແນໃສ່ຊຸກຍູ້ສົ່ງເສີມການຄ້າ ແລະ ການຜະລິດພາຍໃນ ໃຫ້ມີຄວາມເຂັ້ມແຂງ ສາມາດເຊື່ອມໂຍງເສດຖະກິດພາກພື້ນ ແລະ ສາກົນ ປະກອບສ່ວນແກ່ການພັດທະນາເສດຖະກິດ-ສັງຄົມຂອງຊາດ.
ມາດຕາ 2 ສິດທາງການຄ້າຂອງຜູ້ຄ້າຕ່າງປະເທດ
ສິດທາງການຄ້າຂອງຜູ້ຄ້າຕ່າງປະເທດ ແມ່ນ ສິດໃນການນຳເຂົ້າ ແລະ ສົ່ງອອກສິນຄ້າ ຂອງຜູ້ຄ້າຕ່າງ ປະເທດ ທີ່ບໍ່ໄດ້ຂຶ້ນທະບຽນວິສາຫະກິດ ຢູ່ ສປປ ລາວ ຕາມເງື່ອນໄຂທີ່ກຳນົດໄວ້ໃນຂໍ້ຕົກລົງສະບັບນີ້.
ມາດຕາ 3 ການອະທິບາຍຄຳສັບ
ຄຳສັບທີ່ນຳໃຊ້ໃນຂໍ້ຕົກລົງສະບັບນີ້ ມີຄວາມໝາຍດັ່ງນີ້:
- ຜູ້ຄ້າຕ່າງປະເທດ (Foreign Traders) ໝາຍເຖິງ ບຸກຄົນ ຫຼື ນິຕິບຸກຄົນ ທີ່ເຄື່ອນໄຫວທຸລະກິດຢູ່ຕ່າງປະເທດ ຊຶ່ງບໍ່ໄດ້ຂຶ້ນທະບຽນວິສາຫະກິດ ຢູ່ ສປປ ລາວ.
- ຜູ້ຄ້າພາຍໃນ (Domestic Traders) ໝາຍເຖິງ ບຸກຄົນ ຫຼື ນິຕິບຸກຄົນ ລວມທັງຄົນລາວ ແລະ ຄົນຕ່າງປະເທດ ທີ່ເຄື່ອນໄຫວທຸລະກິດ ແລະ ມີສິດຈຳໜ່າຍສິນຄ້າ ຢູ່ ສປປ ລາວ.
- ໃບຢັ້ງຢືນສິດທາງການຄ້າ ໝາຍເຖິງ ເອກະສານຢັ້ງຢືນສິດໃນການເຄື່ອນໄຫວທາງການຄ້າຂອງຜູ້ຄ້າຕ່າງປະເທດ.
ມາດຕາ 4 ຂອບເຂດການນຳໃຊ້
ຂໍ້ຕົກລົງສະບັບນີ້ ນໍາໃຊ້ສໍາລັບຜູ້ຄ້າຕ່າງປະເທດ ທີ່ໄດ້ຮັບການຢັ້ງຢືນສິດທາງການຄ້າ ຢູ່ ສປປ ລາວ.
ໝວດທີ II
ການອອກໃບຢັ້ງຢືນສິດທາງການຄ້າຂອງຜູ້ຄ້າຕ່າງປະເທດ
ມາດຕາ 5 ການອອກໃບຢັ້ງຢືນສິດທາງການຄ້າຂອງຜູ້ຄ້າຕ່າງປະເທດ
ການອອກໃບຢັ້ງຢືນສິດທາງການຄ້າ ແມ່ນ ການໃຫ້ສິດແກ່ຜູ້ຄ້າຕ່າງປະເທດ ດຳເນີນການນຳເຂົ້າ ແລະ ສົ່ງອອກສິນຄ້າ ໂດຍສອດຄ່ອງກັບກົດໝາຍ ແລະ ລະບຽບການກ່ຽວຂ້ອງ ຂອງ ສປປ ລາວ.
ມາດຕາ 6 ເງື່ອນໄຂການອອກໃບຢັ້ງຢືນສິດທາງການຄ້າຂອງຜູ້ຄ້າຕ່າງປະເທດ
ການອອກໃບຢັ້ງຢືນສິດທາງການຄ້າຂອງຜູ້ຄ້າຕ່າງປະເທດ ຕ້ອງມີເງື່ອນໄຂ ດັ່ງນີ້:
- ບຸກຄົນ ຫຼື ນິຕິບຸກຄົນ ທີ່ເຄື່ອນໄຫວທຸລະກິດ ໂດຍສອດຄ່ອງກັບກົດໝາຍຂອງປະເທດຜູ້ຄ້າຕ່າງປະເທດ;
- ບໍ່ເຄີຍມີປະຫວັດການກະທຳຜິດ ຫຼື ບໍ່ຢູ່ໃນຂັ້ນຕອນການດຳເນີນຄະດີໃດໜຶ່ງ ທີ່ຕິດພັນກັບການຄ້າ ແລະ ການເງິນ;
- ເປັນຜູ້ຄ້າຕ່າງປະເທດ ຈາກບັນດາປະເທດສະມາຊິກຂອງອົງການການຄ້າໂລກ.
ມາດຕາ 7 ເອກະສານປະກອບສະເໜີຂໍໃບຢັ້ງຢືນສິດທາງການຄ້າຂອງຜູ້ຄ້າຕ່າງປະເທດ
ການຂໍໃບຢັ້ງຢືນສິດທາງການຄ້າຂອງຜູ້ຄ້າຕ່າງປະເທດ ຕ້ອງປະກອບເອກະສານ ດັ່ງນີ້:
- ໜັງສະເໜີ ຕາມແບບພິມທີ່ກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ ກໍານົດໄວ້ (ແບບພິມ 1);
- ສຳເນົາໜັງສືຜ່ານແດນ (Passport) ຫຼື ໃບທະບຽນວິສາຫະກິດ ຂອງຜູ້ຄ້າຕ່າງປະເທດຢູ່ປະເທດຂອງຜູ້ກ່ຽວ;
- ເອກະສານຢັ້ງຢືນທີ່ຢູ່ ຫຼື ທີ່ຕັ້ງຂອງວິສາຫະກິດຢູ່ປະເທດຂອງຜູ້ຄ້າຕ່າງປະເທດ;
- ໃບແຈ້ງໂທດ ຫຼື ເອກະສານຢັ້ງຢືນປະຫວັດທີ່ບໍ່ເຄີຍມີການກະທຳຜິດໃດໜຶ່ງ;
- ໃບມອບສິດ ໃນກໍລະນີຜູ້ຄ້າຕ່າງປະເທດບໍ່ສາມາດຍື່ນເອກະສານໄດ້ດ້ວຍຕົນເອງ.
ເອກະສານປະກອບສະເໜີຂໍໃບຢັ້ງຢືນສິດທາງການຄ້າຂອງຜູ້ຄ້າຕ່າງປະເທດ ຕ້ອງໄດ້ປະກອບ ມີ ສະບັບ ພາສາລາວ ແລະ ພາສາອັງກິດ ໂດຍຜ່ານການຢັ້ງຢືນຈາກສະຖານທູດ, ຫ້ອງການຜູ້ຕາງໜ້າ ສປປ ລາວ ຢູ່ປະເທດຜູ້ຄ້າຕ່າງປະເທດ ຫຼື ສະຖານທູດ, ຫ້ອງການຜູ້ຕາງໜ້າຂອງປະເທດຜູ້ຄ້າຕ່າງປະເທດ ປະຈຳຢູ່ ສປປ ລາວ.
ມາດຕາ 8 ຂັ້ນຕອນການສະເໜີຂໍໃບຢັ້ງຢືນສິດທາງການຄ້າ
ຜູ້ຄ້າຕ່າງປະເທດທີ່ມີຈຸດປະສົງຂໍໃບຢັ້ງຢືນສິດທາງການຄ້າ ຕ້ອງປະກອບເອກະສານຕາມທີ່ໄດ້ກຳນົດ ໄວ້ໃນມາດຕາ 7 ຂອງຂໍ້ຕົກລົງສະບັບນີ້ ສະເໜີຕໍ່ກົມການນໍາເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ.
ມາດຕາ 9 ການພິຈາລະນາອອກໃບຢັ້ງຢືນສິດທາງການຄ້າ
ພາຍຫຼັງທີ່ໄດ້ຮັບເອກະສານຄົບຖ້ວນ ແລະ ຖືກຕ້ອງຕາມທີ່ໄດ້ກຳນົດໄວ້ໃນມາດຕາ 7 ຂອງຂໍ້ຕົກລົງສະບັບນີ້, ກົມການນຳເຂົ້າ ແລະ ສົ່ງອອກ ຕ້ອງກວດກາເນື້ອໃນເອກະສານ ແລະ ອອກໃບຢັ້ງຢືນສິດທາງການຄ້າໃຫ້ຜູ້ຄ້າຕ່າງປະເທດ ຢ່າງຊ້າບໍ່ໃຫ້ເກີນ ຊາວວັນ ລັດຖະການ ນັບແຕ່ມື້ຮັບເອກະສານເປັນຕົ້ນໄປ.
ໃນກໍລະນີບໍ່ສາມາດອອກໃບຢັ້ງຢືນສິດທາງການຄ້າໃຫ້ແກ່ຜູ້ຄ້າຕ່າງປະເທດ ຕ້ອງແຈ້ງເຫດຜົນຢ່າງເປັນລາຍລັກອັກສອນ ພາຍໃນ ສິບຫ້າວັນ ລັດຖະການ ນັບແຕ່ວັນຮັບເອກະສານເປັນຕົ້ນໄປ.
ມາດຕາ 10 ການດັດແກ້ເນື້ອໃນ, ການຕໍ່ອາຍຸ ແລະ ການອອກໃບຢັ້ງຢືນສິດທາງການຄ້າຂອງຜູ້ຄ້າຕ່າງປະເທດຄືນໃໝ່
ໃບຢັ້ງຢືນສິດທາງການຄ້າຂອງຜູ້ຄ້າຕ່າງປະເທດ ມີອາຍຸການນຳໃຊ້ ສາມປີ ແລະ ສາມາດຕໍ່ໄດ້.
ຜູ້ຄ້າຕ່າງປະເທດທີ່ໄດ້ຮັບໃບຢັ້ງຢືນສິດທາງການຄ້າ ຫາກຕ້ອງການດັດແກ້ເນື້ອໃນ, ຕໍ່ອາຍຸ ຫຼື ອອກໃບຢັ້ງຢືນສິດທາງດ້ານການຄ້າຄືນໃໝ່ ຕ້ອງຍື່ນໃບສະເໜີ ແລະ ເອກະສານປະກອບຕາມແບບພິມທີ່ກຳນົດໄວ້ (ແບບພິມ 2) ຕໍ່ກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ ເພື່ອພິຈາລະນາອອກໃບຢັ້ງຢືນສິດທາງການຄ້າໃໝ່.
ສຳລັບອາຍຸການນຳໃຊ້ຂອງໃບຢັ້ງຢືນສິດທາງການຄ້າສະບັບໃໝ່ ແມ່ນ ໃຫ້ຖືເອົາຕາມອາຍຸທີ່ຍັງເຫຼືອໃນໃບຢັ້ງຢືນສິດທາງການຄ້າສະບັບເກົ່າ.
ມາດຕາ 11 ການຍົກເລີກ ຫຼື ລົບລ້າງໃບຢັ້ງຢືນສິດທາງການຄ້າຂອງຜູ້ຄ້າຕ່າງປະເທດ
ໃບຢັ້ງຢືນສິດທາງການຄ້າຂອງຜູ້ຄ້າຕ່າງປະເທດ ຈະຖືກຍົກເລີກ ຫຼື ລົບລ້າງ ໃນກໍລະນີດັ່ງນີ້:
- ຜູ້ຄ້າຕ່າງປະເທດບໍ່ປະຕິບັດຕາມມາດຕາ 15 ຂອງຂໍ້ຕົກລົງສະບັບນີ້;
- ຜູ້ຄ້າຕ່າງປະເທດ ສະເໜີຍົກເລີກ ຫລື ລົບລ້າງໃບຢັ້ງຢືນຂອງຕົນເອງ ກ່ອນມື້ໝົດອາຍຸ;
- ໃບຢັ້ງຢືນສິດທາງການຄ້າໝົດອາຍຸ ແລະ ບໍ່ໄດ້ຮັບການຕໍ່ອາຍຸ.
ໝວດທີ III
ການນໍາເຂົ້າ ແລະ ສົ່ງອອກສິນຄ້າ ຂອງຜູ້ຄ້າຕ່າງປະເທດ
ມາດຕາ 12 ເງື່ອນໄຂການນໍາເຂົ້າ ແລະ ສົ່ງອອກສິນຄ້າຂອງຜູ້ຄ້າຕ່າງປະເທດ
ການນຳເຂົ້າ ແລະ ສົ່ງອອກສິນຄ້າ ຂອງຜູ້ຄ້າຕ່າງປະເທດ ຕ້ອງມີເງື່ອນໄຂດັ່ງລຸ່ມນີ້:
- ມີໃບຢັ້ງຢືນສິດທາງການຄ້າຂອງຜູ້ຄ້າຕ່າງປະເທດ;
- ນຳເຂົ້າ ແລະ ສົ່ງອອກສິນຄ້າແຕ່ລະຄັ້ງ ຕ້ອງຜ່ານດ່ານພາສີສາກົນ;
- ວາງເງິນຄ້ຳປະກັນ ຕາມກົດໝາຍ ແລະ ລະບຽບການທີ່ກ່ຽວຂ້ອງຂອງພາສີ.
ມາດຕາ 13 ຂັ້ນຕອນການນຳເຂົ້າ ແລະ ສົ່ງອອກສິນຄ້າຂອງຜູ້ຄ້າຕ່າງປະເທດ
ການນຳເຂົ້າ ແລະ ສົ່ງອອກສິນຄ້າຂອງຜູ້ຄ້າຕ່າງປະເທດ ຕ້ອງປະຕິບັດຕາມຂັ້ນຕອນ ທີ່ກຳນົດໄວ້ໃນກົດໝາຍ ແລະ ລະບຽບການ ຂອງ ສປປ ລາວ ດັ່ງນີ້:
- ການນຳເຂົ້າ ຫຼື ສົ່ງອອກສິນຄ້າທົ່ວໄປ ແມ່ນ ສາມາດດຳເນີນຂະບວນການແຈ້ງພາສີຢູ່ດ່ານໄດ້ເລີຍ.
- ການນຳເຂົ້າ ຫຼື ສົ່ງອອກສິນຄ້າຄຸ້ມຄອງ ຜູ້ຄ້າຕ່າງປະເທດຕ້ອງໄດ້ຂໍອະນຸຍາດຈາກຂະແໜງການກ່ຽວຂ້ອງກ່ອນດຳເນີນການແຈ້ງພາສີຢູ່ດ່ານ;
- ການນຳເຂົ້າ ຫຼື ສົ່ງອອກສິນຄ້າ ທີ່ຮຽກຮ້ອງໃຫ້ມີການຢັ້ງຢືນ ດ້ານມາດຕະການສຸຂານາໄມ ແລະ ສຸຂານາໄມພືດ ຫຼື ລະບຽບການທາງດ້ານເຕັກນິກ ແມ່ນໃຫ້ພົວພັນນຳຂະແໜງການກ່ຽວຂ້ອງ;
ໝວດທີ IV
ສິດ ແລະ ພັນທະຂອງຜູ້ຄ້າຕ່າງປະເທດທີ່ໄດ້ຮັບການຢັ້ງຢືນສິດທາງການຄ້າ
ມາດຕາ 14 ສິດຂອງຜູ້ຄ້າຕ່າງປະເທດທີ່ໄດ້ຮັບການຢັ້ງຢືນສິດທາງການຄ້າ
ຜູ້ຄ້າຕ່າງປະເທດທີ່ໄດ້ຮັບການຢັ້ງຢືນສິດທາງການຄ້າ ມີສິດດັ່ງນີ້:
- ນຳເຂົ້າ ແລະ ສົ່ງອອກສິນຄ້າ ຕາມທີ່ກຳນົດໃນໃບຢັ້ງຢືນສິດທາງການຄ້າ;
- ສະເໜີໂຈະຊົ່ວຄາວ, ຕໍ່ອາຍຸ, ດັດແກ້ເນື້ອໃນ, ຍົກເລີກ ຫຼື ລົບລ້າງໃບຢັ້ງຢືນສິດທາງການຄ້າ;
- ຊື້-ຂາຍນຳຜູ້ຄ້າພາຍໃນເທົ່ານັ້ນ ສຳລັບສິນຄ້ານຳເຂົ້າ ແລະ ສົ່ງອອກ.
ມາດຕາ 15 ພັນທະຂອງຜູ້ຄ້າຕ່າງປະເທດທີ່ໄດ້ຮັບການຢັ້ງຢືນສິດທາງການຄ້າ
ຜູ້ຄ້າຕ່າງປະເທດທີ່ໄດ້ຮັບການຢັ້ງຢືນສິດທາງການຄ້າ ມີພັນທະດັ່ງນີ້:
- ແຈ້ງເສຍພາສີ, ອາກອນ ແລະ ພັນທະອື່ນໆ ຕາມທີ່ກຳນົດໄວ້ໃນກົດໝາຍ ແລະ ລະບຽບການ;
- ເກັບຮັກສາເອກະສານທຸກໆຄັ້ງທີ່ມີການນຳເຂົ້າ ແລະ ສົ່ງອອກສິນຄ້າຕົວຈິງ ພາຍໃນກຳນົດເວລາ ສາມປີ ນັບແຕ່ວັນລົງວັນທີໃນໃບແຈ້ງພາສີເປັນລາຍລະອຽດ ຫຼື ນັບແຕ່ວັນໄດ້ເອົາສິນຄ້າອອກຈາກສາງ ຫຼື ດ່ານພາສີເປັນຕົ້ນໄປ;
- ລາຍງານການນຳເຂົ້າ ແລະ ສົ່ງອອກສິນຄ້າ ປະຈຳເດືອນ, ງວດ, ແລະ ປີ ໃຫ້ກົມການນຳເຂົ້າ ແລະ ສົ່ງອອກ ແລະ ຂະແໜງການອື່ນທີ່ກ່ຽວຂ້ອງ;
- ແຈ້ງໃຫ້ກົມການນຳເຂົ້າ ແລະ ສົ່ງອອກ ແລະ ຂະແໜງການທີ່ກ່ຽວຂ້ອງຊາບ ໃນກໍລະນີທີ່ມີການໂຈະຊົ່ວຄາວ, ຕໍ່ອາຍຸ, ດັດແກ້ເນື້ອໃນ, ຍົກເລີກ ຫຼື ລົບລ້າງໃບຢັ້ງຢືນສິດທາງການຄ້າ;
- ປະຕິບັດພັນທະອື່ນໆ ຕາມກົດໝາຍ ແລະ ລະບຽບການ ຂອງ ສປປ ລາວ.
ໝວດທີ V
ຂໍ້ຫ້າມ
ມາດຕາ 16 ຂໍ້ຫ້າມສໍາລັບຜູ້ຄ້າຕ່າງປະເທດທີ່ໄດ້ຮັບການຢັ້ງຢືນສິດທາງການຄ້າ
ຫ້າມຜູ້ຄ້າຕ່າງປະເທດທີ່ໄດ້ຮັບການຢັ້ງຢືນສິດທາງການຄ້າ ມີພຶດຕິກຳດັ່ງນີ້:
- ນຳເຂົ້າ ຫຼື ສົ່ງອອກສິນຄ້າ ໂດຍບໍ່ມີໃບຢັ້ງຢືນສິດທາງດ້ານການຄ້າ;
- ນຳເຂົ້າ ຫຼື ສົ່ງອອກສິນຄ້າ ບໍ່ຖືກຕ້ອງຕາມຂັ້ນຕອນທີ່ກຳນົດໄວ້ໃນກົດໝາຍ ແລະ ລະບຽບການ ທີ່ກ່ຽວຂ້ອງ;
- ເອົາໃບຢັ້ງຢືນສິດທາງດ້ານການຄ້າຂອງຕົນ ໃຫ້ບຸກຄົນອື່ນນຳໃຊ້;
- ເກັບຊື້ ຫຼື ຂາຍສິນຄ້ານຳປະຊາຊົນລາວໂດຍກົງ ຫລື ຜູ້ຄ້າພາຍໃນທີ່ບໍ່ໄດ້ຮັບສິດຈໍາໜ່າຍສິນຄ້າ;
- ມີພຶດຕິກຳອື່ນ ທີ່ເປັນການລະເມີດຕໍ່ກົດໝາຍ ແລະ ລະບຽບການ ຂອງ ສປປ ລາວ.
ມາດຕາ 17 ຂໍ້ຫ້າມສໍາລັບເຈົ້າໜ້າທີ່ ແລະ ພະນັກງານ
ຫ້າມພະນັກງານລັດຖະກອນ ມີພຶດຕິກຳ ດັ່ງນີ້:
- ກົດໜ່ວງຖ່ວງດຶງ ຫຼື ແກ່ຍາວເວລາໃນການພິຈາລະນາອອກໃບຢັ້ງຢືນສິດທາງການຄ້າ;
- ຂັດຂວາງການນຳເຂົ້າ ແລະ ການສົ່ງອອກສິນຄ້າຂອງຜູ້ຄ້າຕ່າງປະເທດທີ່ໄດ້ຮັບການຢັ້ງຢືນສິດທາງການຄ້າ;
- ສວຍໃຊ້ອຳນາດ, ຕຳແໜ່ງ ຫຼື ໜ້າທີ່ ເພື່ອຮຽກຮ້ອງເອົາຜົນປະໂຫຍດ;
- ປະລະໜ້າທີ່, ຂາດຄວາມຮັບຜິດຊອບ ແລະ ບິດເບືອນຄວາມຈິງ;
- ປອມແປງເອກະສານ ຫຼື ນຳໃຊ້ເອກະສານປອມແປງ;
- ປິດບັງ, ປົກປ້ອງ ແລະ ໃຫ້ຄວາມຮ່ວມມືແກ່ຜູ້ກະທຳຄວາມຜິດ;
- ເປີດເຜີຍຄວາມລັບທຸລະກິດໂດຍບໍ່ໄດ້ຮັບອະນຸຍາດຈາກຜູ້ຄ້າຕ່າງປະເທດທີ່ກ່ຽວຂ້ອງ;
- ມີພຶດຕິກຳອື່ນທີ່ເປັນການລະເມີດກົດໝາຍ ແລະ ລະບຽບການ.
ໝວດທີ VI
ອົງການຄຸ້ມຄອງວຽກງານສິດທາງການຄ້າຂອງຜູ້ຄ້າຕ່າງປະເທດ
ມາດຕາ 18 ອົງການຄຸ້ມຄອງວຽກງານສິດທາງການຄ້າຂອງຜູ້ຄ້າຕ່າງປະເທດ
ກະຊວງອຸດສາຫະກຳ ແລະ ການຄ້າ ຄຸ້ມຄອງວຽກງານສິດທາງການຄ້າຂອງຜູ້ຄ້າຕ່າງປະເທດ ຢ່າງ ລວມສູນ ແລະ ເປັນເອກະພາບໃນຂອບເຂດທົ່ວປະເທດ ໂດຍມອບໃຫ້ກົມການນໍາເຂົ້າ ແລະ ສົ່ງອອກ ປະສານສົມທົບກັບພາກສ່ວນກ່ຽວຂ້ອງຈັດຕັ້ງປະຕິບັດ ຂໍ້ຕົກລົງສະບັບນີ້.
ມາດຕາ 19 ສິດ ແລະ ໜ້າທີ່ ຂອງກົມການນໍາເຂົ້າ ແລະ ສົ່ງອອກ
ກົມການນໍາເຂົ້າ ແລະ ສົ່ງອອກ ມີສິດ ແລະ ໜ້າທີ່ ດັ່ງນີ້:
- ຄົ້ນຄ້ວາ, ສ້າງນະໂຍບາຍ, ກົດໝາຍ ແລະ ລະບຽບການ ກ່ຽວກັບການນໍາເຂົ້າ ແລະ ສົ່ງອອກສິນຄ້າ ຂອງຜູ້ຄ້າຕ່າງປະເທດ ເພື່ອນໍາສະເໜີຂັ້ນເທິງພິຈາລະນາ;
- ໂຄສະນາ, ເຜີຍແຜ່, ແນະນຳການຈັດຕັ້ງປະຕິບັດຂໍ້ຕົກລົງສະບັບນີ້ ແລະ ລະບຽບການອື່ນທີ່ກ່ຽວຂ້ອງໃຫ້ສັງຄົມຢ່າງທົ່ວເຖິງ;
- ພິຈາລະນາການອອກ, ຕໍ່ອາຍຸ ແລະ ດັດແກ້ເນື້ອໃນໃບຢັ້ງຢືນສິດທາງການຄ້າ;
- ສັ່ງໂຈະ, ຍົກເລີກ, ລົບລ້າງ, ຕໍ່ອາຍຸ ຫຼື ຢຸດເຊົາ ການເຄື່ອນໄຫວນໍາເຂົ້າ ແລະ ສົ່ງອອກສິນຄ້າ ຂອງຜູ້ຄ້າຕ່າງປະເທດ, ອອກຄືນໃໝ່ ແລະ ດັດແກ້ເນື້ອໃນຂອງໃບຢັ້ງຢືນສິດທາງການຄ້າ;
- ເຜີຍແຜ່ໃຫ້ມວນຊົນຮັບຊາບ ໂດຍຜ່ານສື່ຕ່າງໆ ຂອງ ສປປ ລາວ ຫຼັງຈາກອອກອະນຸຍາດ, ໂຈະຊົ່ວຄາວ ຫຼື ລົບລ້າງໃບຢັ້ງຢືນສິດທາງການຄ້າ;
- ຄຸ້ມຄອງ ແລະ ຕິດຕາມ, ກວດກາການເຄື່ອນໄຫວການນຳເຂົ້າ ແລະ ສົ່ງອອກສິນຄ້າຂອງຜູ້ຄ້າຕ່າງປະເທດທີ່ໄດ້ຮັບສິດທາງດ້ານການຄ້າ;
- ສະຫຼຸບ ແລະ ລາຍງານການເຄື່ອນໄຫວນຳເຂົ້າ ແລະ ສົ່ງອອກສິນຄ້າຂອງຜູ້ຄ້າຕ່າງປະເທດ ເພື່ອລາຍງານໃຫ້ຄະນະນຳກະຊວງຮັບຊາບ ປະຈຳງວດ ແລະ ປະຈຳປີ;
- ປະຕິບັດໜ້າທີ່ອື່ນໆ ຕາມທີ່ໄດ້ກຳນົດໄວ້ຢູ່ໃນກົດໝາຍ ແລະ ລະບຽບການ.
ໝວດທີ VII
ນະໂຍບາຍຕໍ່ຜູ້ມີຜົນງານ ແລະ ມາດຕະການຕໍ່ຜູ້ລະເມີດ
ມາດຕາ 20 ນະໂຍບາຍຕໍ່ຜູ້ມີຜົນງານ
ຜູ້ຄ້າຕ່າງປະເທດທີ່ໄດ້ຮັບການຢັ້ງຢືນ, ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ມີຜົນງານດີເດັ່ນໃນການຈັດຕັ້ງປະຕິບັດຂໍ້ຕົກລົງສະບັບນີ້ ຈະໄດ້ຮັບການຍ້ອງຍໍຊົມເຊີຍ ຫຼື ນະໂຍບາຍອື່ນຕາມກົດໝາຍ ແລະ ລະບຽບການ.
ມາດຕາ 21 ມາດຕະການຕໍ່ຜູ້ລະເມີດ
ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ລະເມີດຂໍ້ຕົກລົງສະບັບນີ້ ຈະຖືກປະຕິບັດມາດຕະການກ່າວຕັກເຕືອນ, ສຶກສາອົບຮົມ, ລົງວິໄນ, ປັບໃໝ, ໃຊ້ຄ່າເສຍຫາຍທາງແພ່ງ ຫຼື ລົງໂທດທາງອາຍາ ຕາມແຕ່ລະກໍລະນີ ເບົາ ຫຼື ໜັກ.
ໝວດທີ VIII
ບົດບັນຍັດສຸດທ້າຍ
ມາດຕາ 22 ການຈັດຕັ້ງປະຕິບັດ
ມອບໃຫ້ ກົມການນຳເຂົ້າ ແລະ ສົ່ງອອກ, ກະຊວງອຸດສາຫະກໍາ ແລະ ການຄ້າ ເປັນເຈົ້າການປະສານສົມທົບກັບພາກສ່ວນກ່ຽວຂ້ອງ ໃນການຈັດຕັ້ງປະຕິບັດຂໍ້ຕົກລົງສະບັບນີ້ຢ່າງເຂັ້ມງວດ ແລະ ໃຫ້ມີປະສິດທິຜົນສູງ.
ມາດຕາ 23 ຜົນສັກສິດ
ຂໍ້ຕົກລົງສະບັບນີ້ ມີຜົນສັກສິດນັບແຕ່ວັນລົງລາຍເຊັນ ແລະ ພາຍຫຼັງໄດ້ພິມລົງໃນຈົດໝາຍເຫດທາງລັດຖະການ ສິບຫ້າວັນ.
ລັດຖະມົນຕີ
ນ. ເຂັມມະນີ ພົນເສນາ
| # | ຫົວຂໍ້ | ດາວໂຫຼດ |
|---|---|---|
| 1 | Decision on the Trading Rights No.0623/MOIC.DIMEX, dated 05 June 2019 |  PDF |
| 2 | ຂໍ້ຕົກລົງ ວ່າດ້ວຍສິດທາງການຄ້າຂອງຜູ້ຄ້າຕ່າງປະເທດ ເລກທີ 0623/ອຄ.ກຂອ, ລົງວັນທີ 05 ມິຖຸນາ 2019 |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.