ສັນຍາເຂດການຄ້າເສລີ ອາຊຽນ - ຮົງກົງ, ສປ ຈີນ (The ASEAN – Hong Kong, China Free Trade Area: AHKFTA) ແມ່ນສັນຍາການຄ້າເສລີທີ່ໃຫ້ສິດທິພິເສດດ້ານການຄ້າຂອງປະເທດສະມາຊິກທີ່ເຂົ້າຮ່ວມ, ຊຶ່ງປະກອບມີ 10 ປະເທດອາຊຽນ ແລະ ຮົງກົງ, ສປ ຈີນ. ກ່ອນສັນຍາ AHKFTA ຈະຖືກລົງນາມນັ້ນແມ່ນ ໃຊ້ເວລາໃນການເຈລະຈາເປັນເວລາ 03 ປີ ໂດຍມີກອງປະຊຸມທັງໝົດ 09 ຄັ້ງດ້ວຍກັນ. ຈົນມາເຖິງກອງປະຊຸມຄັ້ງທີ 09, ຊຶ່ງເປັນກອງປະຊຸມຮອບສຸດທ້າຍກ່ອນການຈັດຕັ້ງປະຕິບັດລະບຽບແຫຼ່ງກຳເນີດສິນຄ້າ (Rule of Origin: ROO), ຂັ້ນຕອນການອອກໃບຢັ້ງຢືນແຫຼ່ງກຳເນີດສິນຄ້າ (Operational Certification Procedures: OCP), ຟອມ AHK ແລະ ລະບຽບສະເພາະຜະລິດຕະພັນ (Product Specific Rule: PSR) ພາຍໃຕ້ສັນຍາເຂດການຄ້າເສລີ AHKFTA. ຫຼັງຈາກນັ້ນ, ສປປ ລາວ ໄດ້ອອກຂໍ້ຕົກລົງ ວ່າດ້ວຍການປະກາດໃຊ້ລະບຽບແຫຼ່ງກຳເນີດສິນຄ້າພາຍໃຕ້ສັນຍາເຂດການຄ້າເສລີ ອາຊຽນ - ຮົງກົງ, ສປ ຈີນ ສະບັບເລກທີ 0644/ອຄ.ກຂອ, ລົງວັນທີ 11 ມິຖຸນາ 2019.
ນອກຈາກຈະມີການປະກາດໃຊ້ລະບຽບໃໝ່ໃນຂອບສັນຍາເຂດການຄ້າເສລີ AHKFTA ແລ້ວ, ສັນຍາເຂດການຄ້າເສລີອາຊຽນ - ສປ ຈີນ (ASEAN - China Free Trade Agreement: ACFTA) ທີ່ລົງນາມໃນປີ 2004, ຊຶ່ງປະກອບມີ 10 ປະເທດອາຊຽນ ແລະ ສປ ຈີນ ກໍ່ໄດ້ມີການທົບທວນຄືນເຫັນວ່າ ບາງເນື້ອໃນຍັງບໍ່ທັນສອດຄ່ອງກັບສະພາບການຂະຫຍາຍຕົວທາງດ້ານເສດຖະກິດຂອງບັນດາປະເທດໃນພາກພື້ນ. ສະນັ້ນ, ໃນປີ 2015 ໄດ້ເລີ່ມມີກອງປະຊຸມປຶກສາຫາລືເພື່ອປັບປຸງອະນຸສັນຍາສັນຍາການຄ້າໃນຂອບສັນຍາວ່າດ້ວຍການຮ່ວມມືເສດຖະກິດຮອບດ້ານ ເປັນຕົ້ນແມ່ນ ລະບຽບ ROO, OCP, ຟອມ E ແລະ PSR (HS 2017). ພາຍຫຼັງທີ່ສຳເລັດແລ້ວຈຶ່ງໄດ້ອອກຂໍ້ຕົກລົງ ວ່າດ້ວຍການນໍາໃຊ້ລະບຽບແຫຼ່ງກຳເນີດສິນຄ້າຕາມອະນຸສັນຍາສະບັບປັບປຸງພາຍໃຕ້ເຂດການຄ້າເສລີ ອາຊຽນ - ສປ ຈີນ ສະບັບເລກທີ 0636/ອຄ.ກຂອ, 10 ມິຖຸນາ 2019 ເພື່ອປະກາດນຳໃຊ້ລະ ບຽບແຫຼ່ງກຳເນີດສິນຄ້າໃນ ACFTA ໃນວັນທີ 01 ສິງຫາ 2019.
ສຳລັບສັນຍາການຄ້າສິນຄ້າຂອງອາຊຽນ (ASEAN Trade in Goods Agreement: ATIGA) ແມ່ນສັນຍາການຄ້າເສລີທີ່ໃຫ້ສິດທິພິເສດດ້ານການຄ້າຂອງປະເທດສະມາຊິກທີ່ເຂົ້າຮ່ວມ, ຊຶ່ງປະກອບມີ 10 ປະເທດອາຊຽນ. ສປປ ລາວ ເລີ່ມຈັດຕັ້ງປະຕິບັດແຕ່ປີ 2001 ເປັນຕົ້ນມາ ແລະ ສັນຍານີ້ກໍ່ໄດ້ຮັບການປັບປຸງໃນແຕ່ລະໄລຍະ ພໍມາຮອດຕົ້ນປີ 2019 ກໍ່ໄດ້ສຳເລັດການໂອນຖ່າຍຈາກ PSR (HS 2012) ມາເປັນລະບຽບ PSR (HS 2017). ສະນັ້ນ, ຈຶ່ງໄດ້ອອກຂໍ້ຕົກລົງ ວ່າດ້ວຍການປະກາດໃຊ້ລະບຽບສະເພາະຜະລິດຕະພັນ ຕາມສາລະບານອັດຕາພາສີເອກະພາບອາຊຽນປີ 2017 (PSR HS 2017) ຕາມການປັບປຸງຂອງສັນຍາການຄ້າສິນຄ້າຂອງອາຊຽນ ຫຼື (ATIGA) ສະບັບເລກທີ 0600/ອຄ,ກຂອ, ລົງວັນທີ 03 ມິຖຸນາ 2019;
ສຳລັບລາຍລະອຽດຂໍ້ຕົກລົງທີ່ກ່າວມາຂ້າງເທິງ ແລະ ຂໍ້ມູນຕ່າງໆ ກ່ຽວກັບ ສິດທິພິເສດທາງການຄ້າ ສາມາດດາວໂຫຼດໄດ້ທີ່ເວັບໄຊທ໌ www.laotradeportal.gov.la ຫຼື ໂທ 021 450255.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.