ໃນລະຫວ່າງວັນທີ 22-24 ຕຸລາ 2019 ທີ່ ໂຮງແຮມ ເອຣາວັນ ຣີເວີໄຊ໌ ນະຄອນປາກເຊ, ແຂວງຈຳປາສັກ ກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມຝຶກອົບຮົມເພື່ອສ້າງເປັນຄູຝຶກໃນການຈັດຕັ້ງປະຕິບັດລະບົບການອອກໃບຢັ້ງຢືນແຫຼ່ງກຳເນີດສິນຄ້າຜ່ານທາງລະບົບເອເລັກໂຕຣນິກ (Electronic Certificate of Origin Issuing System: e-CO) ແລະ ເຜີຍແຜ່ວຽກງານການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງຂອງອາຊຽນ ໃຫ້ແກ່ຫ້ອງການຄຸ້ມຄອງ ແລະ ອອກໃບຢັ້ງຢືນແຫຼ່ງກຳເນີດສິນຄ້າ ສຳລັບ 8 ແຂວງພາກກາງ ແລະ ພາກໃຕ້ຂອງ ສປປ ລາວ ເຊິ່ງໃຫ້ກຽດເປັນປະທານຮ່ວມໂດຍ ທ່ານ ສຸລິຍົນທ່ານ ສຸລິຍົນ ພິລາວົງ ຫົວໜ້າກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ ແລະ ທ່ານ ສົມບັດ ແສນພັນຊ່ອງ ຫົວໜ້າພະແນກອຸດສາຫະກຳ ແລະ ການຄ້າ ແຂວງຈຳປາສັກ. ຊຶ່ງມີຜູ້ເຂົ້າຮ່ວມທັງໝົດຈຳນວນ 69 ທ່ານ. ກອງປະຊຸມດັ່ງກ່າວຈັດຂຶ້ນໂດຍໄດ້ຮັບການສະໜັບສະໜູນດ້ານງົບປະມານຈາກ ໂຄງການ GIZ Related.
ໂດຍອີງຕາມຄຳສັ່ງຂອງນາຍົກລັດຖະມົນຕີ ວ່າດ້ວຍການປັບປຸງບັນດາລະບຽບການ ແລະ ກົນໄກປະສານງານໃນການດຳເນີນທຸລະກິດ ຢູ່ ສປປ ລາວ, ສະບັບເລກທີ 02/ນຍ, ລົງວັນທີ 01 ກຸມພາ 2018 ທີ່ພັກດັນໃຫ້ທຸກພາກສ່ວນຕ້ອງປະຕິຮູບການດຳເນີນເອກະສານໃຫ້ມີຄວາມກະທັດຮັດ, ວ່ອງໄວ ແລະ ອຳນວຍຄວາມສະດວກໃຫ້ແກ່ພາກທຸລະກິດ. ດັ່ງນັ້ນ, ກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ ໄດ້ພັດທະນາລະບົບ e-CO ຂຶ້ນ ເພື່ອເປັນການອຳນວຍຄວາມສະດວກໃຫ້ແກ່ຜູ້ປະກອບການ ໃນການຫຼຸດຜ່ອນເວລາ, ຂັ້ນຕອນ ແລະ ຄ່າໃຊ້ຈ່າຍ. ພ້ອມກັນນັ້ນ, ລະບົບດັ່ງກ່າວຍັງຈະຊ່ວຍແກ້ໄຂບັນຫາການເກັບກຳສະຖິຕິຂອງພາກລັດອີກດ້ວຍ.
ລະບົບ e-CO ເປັນລະບົບທີ່ອຳນວຍຄວາມຄວາມສະດວກໃຫ້ແກ່ຜູ້ປະກອບການໃນການຂໍໃບຢັ້ງຢືນແຫຼ່ງກຳເນີດສິນຄ້າ (Certificate of Origin: CO), ຊຶ່ງຜູ້ປະກອບການສາມາດຍື່ນເອກະສານປະກອບຂໍ CO ຜ່ານທາງລະບົບດັ່ງກ່າວ ແລະ ສາມາດຮັບເອກະສານທີ່ຫ້ອງການເຈົ້າໜ້າທີ່ອອກ CO ພາຍໃນ 01 ວັນລັດຖະການ. ເມື່ອທຽບໃສ່ການຂໍອອກ CO ແບບປົກກະຕິແລ້ວ ຖືວ່າມີຄວາມວ່ອງໄວກວ່າຫຼາຍ, ເພາະຜູ້ປະກອບການຕ້ອງມາຍື່ນ ແລະ ຮັບເອກະສານນຳຫ້ອງການເຈົ້າໜ້າທີ່ອອກ CO ພາຍໃນ 02 ວັນລັດຖະການ. ຈຶ່ງສາມາດເວົ້າໄດ້ວ່າ ລະບົບ e-CO ສາມາດເຮັດໄດ້ເກືອບທຸກໜ້າວຽກໃນການອອກ CO ເຊັ່ນ: ການຕື່ມລາຍລະອຽດລົງໃນແບບຟອມ, ການອັບໂຫຼດເອກະສານປະກອບ ແລະ ການດັດແກ້ຂໍ້ມູນຕ່າງໆຜ່ານລະບົບ. ນອກຈາກນັ້ນ, ຜູ້ປະກອບການສາມາດຕິດຕາມສະຖານະຂອງເອກະສານຂອງຕົນເອງໄດ້ຕະຫຼອດເວລາ ແລະ ຍັງເປັນຖານຂໍ້ມູນທີ່ເປັນປະໂຫຍດໃຫ້ທັງເຈົ້າໜ້າທີ່ ແລະ ຜູ້ປະກອບການ ໂດຍສະເພາະແມ່ນສະຖິຕິການສົ່ງອອກ. ຊຶ່ງຂໍ້ມູນທຸກຢ່າງທີ່ໄດ້ບັນທຶກລົງໃນລະບົບ ແມ່ນຈະຖືກເກັບຮັກສາໄວ້ເປັນຢ່າງດີ ແລະ ສາມາດເຂົ້າເບິ່ງໄດ້ທຸກເວລາທີ່ຕ້ອງການ.
ການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງພາຍໃຕ້ໂຄງການທົດລອງທີ II ຂອງອາຊຽນ ແມ່ນການຈັດຕັ້ງປະຕິບັດການຢັ້ງຢືນແຫຼ່ງກຳເນີດສິນຄ້າຂອງຜູ້ຜະລິດ ແລະ ສົ່ງອອກດ້ວຍຕົນເອງ ໂດຍອີງໃສ່ລະບຽບການ ແລະ ອາຍຸຂອງໂຄງການທີ່ໄດ້ກຳນົດໄວ້. ໝາຍຄວາມວ່າ ຜູ້ໄດ້ຮັບສິດໃນການອອກໃບຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ຈະສາມາດອອກໃບ Invoice Declaration ດ້ວຍຕົນເອງ ແທນໃບຢັ້ງຢືນແຫຼ່ງກຳເນີດສິນຄ້າ Form D ທີ່ອອກໂດຍຫ້ອງການເຈົ້າໜ້າທີ່ອອກ CO. ຈຸດປະສົງຂອງການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງແມ່ນ ເພື່ອການອຳນວຍຄວາມສະດວກໃນການນຳເຂົ້າ ແລະ ສົ່ງອອກສິນຄ້າໃນບັນດາປະເທດອາຊຽນດ້ວຍກັນ, ເພື່ອສົ່ງເສີມການເຄື່ອນຍ້າຍສິນຄ້າຢູ່ພາກພື້ນ, ພ້ອມທັງເປັນການຫຼຸດຜ່ອນຕົ້ນທຶນ ແລະ ເວລາຂອງຜູ້ປະກອບການ. ປະຈຸບັນໂຄງການດັ່ງກ່າວມີຈຳນວນ 05 ປະເທດເຂົ້າຮ່ວມຄື: ສປປ ລາວ, ອິນໂດເນເຊຍ, ຟີລິບປິນ, ໄທ ແລະ ສສ ຫວຽດນາມ.
ໃນການຝຶກອົບຮົມຄັ້ງນີ້ຈະໄດ້ເນັ້ນໃຫ້ນັກສຳມະນາກອນຮູ້ຂັ້ນຕອນຕ່າງໆໃນການອອກ CO ຜ່ານທາງລະບົບ e-CO ແລະ ການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງຂອງອາຊຽນ. ພາຍຫຼັງທີ່ສຳເລັດກອງປະຊຸມຝຶກອົບຮົມໃນຄັ້ງນີ້ ບັນດານັກສຳມະນາກອນກໍ່ຈະໄດ້ນຳເອົາເນື້ອໃນບົດຮຽນທີ່ຖອດຖອນໄດ້ ນຳໄປເຜີຍແຜ່ ແລະ ຝຶກໃຫ້ແກ່ເຈົ້າໜ້າທີ່ ແລະ ຜູ້ປະກອບການພາຍໃນແຂວງຂອງຕົນ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.