ໃນປະຈຸບັນ ກະຊວງສາທາລະນະສຸກ ແມ່ນສຸມໃສ່ການເຝົ້າລະວັງພະຍາດ ອັກເສບປອດຮຸນແຮງ ຈາກເຊື້ອພະຍາດ ໂຄວິດ-19 ຢ່າງເຂັ້ມງວດ. ສໍາລັບການນໍາໃຊ້ເຕັກນິກການກວດ ທີ່ໃຊ້ເຄື່ອງທົດສອບແບບໄວ (Rapid Test) ແມ່ນເຕັກນິກການກວດວິເຄາະທີ່ມີຄວາມວ່ອງໄວ, ລາຄາຖືກ ແລະ ສາມາດເຂົ້າເຖິງໄດ້ທຸກສະຖານທີ ໂດຍສະເພາະບ່ອນຫ່າງໄກຊອກຫລີກ.
ອີງຕາມ ຄໍາສັ່ງນໍາຍົກລັດຖະມົນຕີ ແມ່ນຫ້າມບຸກຄົນ, ນິຕິບຸກຄົນ, ບັນດາສະຖານທີ່ບໍລິການສາທາລະນະສຸກ ແຕ່ລະຂັ້ນ ທັງພາກລັດ ແລະ ເອກະຊົນ ນໍາເຂົ້າ, ຈໍລະຈອນຈໍາໜ່າຍ ແລະ ນໍາໃຊ້ເຄື່ອງທົດສອບແບບໄວ (Rapid Test) ເພື່ອວິເຄາະຊອກຫາການຕິດເຊື້ອພະຍາດອັກເສບປອດຮຸນແຮງ ຈາກເຊື້ອຈຸລະໂລກ ໂກໂຣນາ ສາຍພັນໃໝ່ ຫລື COVID-19, ເລກທີ 0246/ສທ, ລົງວັນທີ 03 ມີນາ 2020. ຖ້າລະເມີດຄໍາສັ່ງສະບັບດັ່ງກ່າວ ແມ່ນຈະຖືກກ່າວເຕືອນ ແລະ ລົງໂທດຕາມລະບຽບກົດໝາຍ.
ເນື່ອງຈາກວ່າ ການນໍາໃຊ້ເຄື່ອງກວດປະເພດນີ້ ຍັງບໍ່ສາມາດຮັບປະກັນເຖິງຄວາມຖືກຕ້ອງ ຂອງການບົ່ງມະຕິພະຍາດ ເຊີ່ງການກວດເຊື້ອພະຍາດຊະນິດດັ່ງກ່າວຕ້ອງໃຊ້ເວລາ ແລະ ໄປຕາມຂັ້ນຕອນຈິ່ງສາມາດກວດພົບເຫັນເຊື້ອພະຍາດ ໃນກໍລະນີໃຊ້ເວລາໃນການກວດສັ້ນເກີນໄປ ອາດມີຄວາມສ່ຽງເຮັດໃຫ້ຜົນກວດເກີດການອອກຜົນທີ່ຜິດພາດ ແລະ ຄາດເຄື່ອນ. ສະນັ້ນ, ຮຽກຮ້ອງໃຫ້ທຸກພາກສ່ວນເອົາໃຈໃສ່ ປະຕິບັດຕາມການແນະນໍາມາດຕະການປ້ອງກັນພະຍາດ ໃນແຕ່ລະໄລຍະຂອງກະຊວງສາທລະນະສຸກ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.