ອີງຕາມແຫຼ່ງຂ່າວຈາກເວັບໄຊ https://vnexpress.net/ ໃຫ້ຮູ້ວ່າ ມູນຄ່າການນໍາເຂົ້າ ແລະ ສົ່ງອອກສິນຄ້າ ຂອງ ສສ ຫວຽດນາມ ໃນ 6 ເດືອນຕົ້ນປີ ບັນລຸໄດ້ຫຼາຍກວ່າ 240 ຕື້ໂດລາສະຫະລັດ ແຕ່ຍັງຫຼຸດລົງເລັກນ້ອຍ 1.4%. ໃນນັ້ນ, ມູນຄ່າການສົ່ງອອກບັນລຸໄດ້ເກືອບເຖິງ 122.8 ຕື້ໂດລາສະຫະລັດ (ເພີ່ມຂື້ນ 0.2%) ໃນຂະນະທີ່ການນຳເຂົ້າ ມີມູນຄ່າປະມານ 117.3 ຕື້ໂດລາ (ຫຼຸດລົງ 2.9%). ຄວາມດຸ່ນດ່ຽງທາງການຄ້າຂອງຫວຽດນາມເກີນດຸນການຄ້າ 5.46 ຕື້ໂດລາສະຫະລັດ ເຊິ່ງສູງກວ່າປີ 2019 ໃນໄລຍະດຽວກັນ ປະມານ 3,76 ຕື້ໂດລາສະຫະລັດ.
ອີງຕາມສະຖິຕິກົມພາສີຂອງຫວຽດນາມ ໃຫ້ຮູ້ວ່າ ບັນດາວິສາຫະກິດການລົງທຶນຂອງຕ່າງປະເທດປະຕິບັດໄດ້ 145.38 ຕື້ໂດລາສະຫະລັດ ກວມເອົາ 60% ຂອງມູນຄ່າການນໍາເຂົ້າ ແລະ ສົ່ງອອກສິນຄ້າທັງໝົດ. ແຕ່ວ່າ ຕົວເລກດັ່ງກ່າວຫຼຸດລົງ 5.5% ຫຼື ເທົ່າກັບ 8.43 ຕື້ໂດລາສະຫະລັດ ຖ້າທຽບໃສ່ໄລຍະດຽວກັນຂອງປີຜ່ານມາ ຖືວ່າການນໍາເຂົ້າ ແລະ ສົ່ງອອກສິນຄ້າຂອງບັນດາວິສາຫະກິດລົງທຶນຂອງຕ່າງປະເທດລ້ວນແຕ່ຫຼຸດລົງເລັກນ້ອຍ ຍ້ອນໄດ້ຮັບຜົນກະທົບຈາກການລະບາດຂອງ ໂຄວິດ-19.
ການຄ້າຂາຍກັບບັນດາປະເທດອາຊີແມ່ນ ຍັງຢູ່ໃນລະດັບດີ ແລະ ບັນລຸໄດ້ອັດຕາສ່ວນສູງສຸດເຖິງ 65.2% ທີ່ມີມູນຄ່າປະມານ 153.2 ຕື້ໂດລາສະຫະລັດ. ໃນນັ້ນ, ການສົ່ງອອກ ບັນລຸໄດ້ 60.77 ຕື້ໂດລາສະຫະລັດ (ຫຼຸດລົງ 1.3%) ແລະ ການນຳເຂົ້າ ບັນລຸໄດ້ 92.48 ຕື້ໂດລາສະຫະລັດ (ຫຼຸດລົງ 4.1%).
ການຄ້າກັບປະເທດອາເມລິກາ ໃນການສົ່ງອອກເພີ້ມຂື້ນ 14.6% ເມື່ອທຽບໃສ່ໄລຍະດຽວກັນຂອງປີ ຜ່ານມາ. ໃນທາງກັບກັນການນໍາເຂົ້າ ຈາກປະເທດອາເມລິກາ ແມ່ນເພີ່ມຂື້ນພຽງແຕ່ 2%. ໂດຍລວມ ໄລຍະ 2 ໄຕມາດທຳອິດຂອງປີນີ້ ມີມູນຄ່າການຄ້າລະຫວ່າງສອງປະເທດ ແມ່ນບັນລຸໄດ້ປະມານ 38.5 ຕື້ໂດລາສະຫະລັດ.
ໃນຂະນະດຽວກັນ, ມູນຄ່າ ການນຳເຂົ້າ ແລະ ສົ່ງອອກ ລະຫວ່າງຫວຽດນາມ ແລະ ບັນດາປະເທດເອີຣົບ ບັນລຸໄດ້ ປະມານ 29.93 ຕື້ໂດລາສະຫະລັດ (ຫຼຸດລົງ 5.8%), ອາຟຣິກາບັນລຸ 3.05 ຕື້ໂດລາສະຫະລັດ (ຫຼຸດລົງ 4.7%) ທຽບໃສ່ໄລຍະດຽວກັນຂອງ ປີ 2019.
ໃນທ້າຍເດືອນມິຖຸນານີ້, ຄາດຄະແນ່ສິນຄ້າສົ່ງອອກທີ່ສາມາດສ້າງມູນຄ່າສູງກ່ວາ 1 ຕື້ໂດລາສະຫະລັດ ແມ່ນ: ຄອມພີວເຕີ້, ຜະລິດຕະພັນເອເລັກໂຕຣນິກ ແລະ ຊີ້ນສ່ວນອຸປະກອນຕ່າງໆ (ເພີ່ມຂຶ້ນ 3.95 ຕື້ໂດລາສະຫະລັດ) ແລະ ເຄື່ອງຈັກ, ອຸປະກອນ ແລະ ອາໄຫຼ່ ( ເພີ່ມຂຶ້ນ 2.18 ຕື້ USD). ສ່ວນສິນຄ້າສົ່ງອອກທີ່ຫຼຸດລົງຫຼາຍກວ່າ 1 ຕື້ໂດລາສະຫະລັດ ແມ່ນ: ກ້ອງຖ່າຍຮູບ, ກ້ອງວີດີໂອ ແລະ ຊີ້ນສ່ວນປະກອບຕ່າງໆ (ຫຼຸດລົງ 1.07 ຕື້ໂດລາສະຫະລັດ) ແລະ ໂທລະສັບມືຖື ແລະ ຊີ້ນສ່ວນປະກອບ (ຫຼຸດລົງ 1.54 ຕື້ USD).
ແຫຼ່ງຂໍ້ມູນ: https://vnexpress.net/viet-nam-xuat-sieu-gan-5-5-ty-usd-nua-dau-nam-4133250.html
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.