ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ
ກະຊວງການເງິນ
ຫ້ອງການກະຊວງ ເລກທີ 1556/ຫກ.ກງ
ນະຄອນຫລວງວຽງຈັນ, ວັນທີ 08 ກໍລະກົດ 2009
ແຈ້ງການ
ເຖິງ: ບັນດາທ່ານຜູ້ອໍານວຍການບໍລິສັດນໍ້າມັນເຊື້ອໄຟ ແລະ ໂຄງການຕ່າງໆ.
ເລື່ອງ: ການຈັດຕັ້ງປະຕິບັດ ແລະ ຄຸ້ມຄອງນໍ້າມັນຍົກເວັ້ນທີ່ນໍາເຂົ້າມາຮັບໃຊ້ໂຄງການຕ່າງໆໃນທົ່ວປະເທດ.
- ອີງຕາມກົດໝາຍວ່າດ້ວຍພາສີ ສະບັບເລກທີ 05/ສພຊ, ລົງວັນທີ 20.5.2005.
- ອີງຕາມບົດແນະນຳຂອງລັດຖະມົນຕີ ວ່າການກະຊວງການເງິນ ສະບັບເລກທີ 491/ກງ, ລົງວັນທີ 12.3.2009.
- ອີງຕາມແຈ້ງການຂອງກົມພາສີ ສະບັບເລກທີ 1539/ກພສ, ລົງວັນທີ 8.6.2009 ວ່າດ້ວຍການຮັບຮອງເອົາເປັນສາງນ້ຳມັນພິເສດ ແລະ ລະບຽບການ ຄຸ້ມຄອງການນຳເຂົ້ານ້ຳມັນເຊື້ອໄຟຍົກເວັ້ນພາສີ, ຊ່ວຍເຫຼືອລ້າ ຫຼື ກູ້ຢືມຂອງບັນດາໂຄງການຕ່າງໆ.
ເພື່ອຮັບປະກັນການຄຸ້ມຄອງນໍ້າມັນຍົກເວັ້ນ ທີ່ນໍາເຂົ້າມາຮັບໃຊ້ໂຄງການຕ່າງໆ ຕາມການອະນຸຍາດຂອງລັດຖະບານ ນໍາໃຊ້ໃຫ້ຖືກເປົ້າໝາຍ ແລະ ເພີ່ມມາດຕະການໃຫ້ການຄຸ້ມຄອງ ແນໃສ່ຈຳກັດບັນດາຊ່ອງວ່າງທີ່ອາດຈະພາໃຫ້ມີການສວຍໃຊ້ນ້ຳມັນຍົກເວັ້ນລັກລອບຈຳໜ່າຍຂາຍພາຍໃນ.
ກະຊວງການເງິນຂໍຖືເປັນກຽດແຈ້ງການມາຍັງບັນດາທ່ານຜູ້ອໍານວຍການບໍລິສັດນໍາເຂົ້ານໍ້າມັນເຊື້ອໄຟ ແລະ ໂຄງການຕ່າງໆທີ່ໄດ້ຮັບນະໂຍບາຍ ຍົກເວັ້ນຄ່າພາສີ-ອາກອນ ສຳລັບນ້ຳມັນເຊື້ອໄຟນຳເຂົ້າມາຮັບໃຊ້ໂຄງການຊາບຢ່າງທົ່ວເຖິງກັນວ່າ:
- ເລີ່ມແຕ່ວັນທີ 15.7.2009 ເປັນຕົ້ນໄປການນໍາເຂົ້ານໍ້າມັນຍົກເວັ້ນ ເພື່ອມາຮັບໃຊ້ໂຄງການຕ່າງໆໃນທົ່ວປະເທດຕ້ອງໄດ້ໃສ່ສານສີຕາມທາງການໄດ້ກໍານົດໄວ້ ຄື: ນ້ຳມັນກາຊວນເປັນສີຟ້າ ແລະ
- ນ້ຳມັນແອັດຊັງທຸກຊະນິດເປັນສີມ້ວງ. ການໃສ່ສານສີນ້ຳມັນຍົກເວັ້ນແມ່ນກຳນົດເປັນຫລັກການດັ່ງນີ້ຄື:
- ການນໍາເຂົ້າຜ່ານດ່ານຂົວມິດຕະພາບ I, ນະຄອນຫລວງວຽງຈັນ, ຕ້ອງໄດ້ເກັບມ້ຽນຢູ່ສາງນ້ຳມັນພິເສດ ແລະ ປະສົມສານສີໃສ່ນ້ຳມັນ ກ່ອນຈະຈ່າຍໃຫ້ແກ່ ໂຄງການ. ໃນກໍລະນີບໍລິສັດນຳເຂົ້ານ້ຳມັນເຊື້ອໄຟ ຫາກມີສັນຍາກັບໂຄງການ ແລະ ໄດ້ຮັບອະນຸຍາດຈາກລັດຖະການພາສີທຳການຂົນສົ່ງນ້ຳມັນຍົກເວັ້ນ ຈາກດ່ານພາສີບ່ອນນຳເຂົ້າໄປຫາໂຄງການກໍ່ສ້າງ ໂດຍບໍ່ເກັບມ້ຽນຢູ່ສາງນ້ຳມັນພິເສດ, ນ້ຳມັນຍົກເວັ້ນດັ່ງກ່າວຕ້ອງໄດ້ໃສ່ສານສີກ່ອນການນຳເຂົ້າ.
- ການນໍາເຂົ້າຜ່ານດ່ານພາສີຢູ່ແຂວງອື່ນໆ ທີ່ບໍ່ມີການສ້າງຕັ້ງສາງນໍ້າມັນພິເສດ, ແມ່ນໃຫ້ປະສົມສານສີໃສ່ນ້ຳມັນຍົກເວັ້ນ ທີ່ສາງເກັບມ້ຽນຂອງບໍລິສັດ. ໃນກໍລະນີຫາກມີການຂົນສົ່ງນ້ຳມັນຍົກເວັ້ນ ຈາກດ່ານພາສີບ່ອນນຳເຂົ້າ ໄປຫາໂຄງການກໍ່ສ້າງໂດຍກົງ ຕ້ອງໄດ້ໃສ່ສານສີກ່ອນການນຳເຂົ້າ.
- ປະຈຸບັນບໍລິສັດອິນຊີໂລຈິສຕິກຈໍາກັດ ໄດ້ສ້າງຕັ້ງສາງນໍ້າມັນພິເສດ ທີ່ນະຄອນຫລວງວຽງຈັນ ເພື່ອບໍລິການສາງເກັບມ້ຽນນ້ຳມັນຍົກເວັ້ນ, ແຕ່ບໍ່ໝາຍວ່າ ຈຳກັດພຽງຜູ້ດຽວ, ໃນກໍລະນີຫາກມີນິຕິບຸກຄົນອື່ນຂໍອະນຸຍາດລົງທຶນສ້າງຕັ້ງ ຈາກຂະແໜງການກ່ຽວຂ້ອງຢ່າງຖືກຕ້ອງ ກະຊວງການເງິນ ຈະຄົ້ນຄ້ວາຕາມລະບຽບກົດໝາຍກຳນົດໄວ້.
- ການຈັດຕັ້ງຜັນຂະຫຍາຍລະບຽບ ການຄຸ້ມຄອງນໍ້າມັນຍົກເວັ້ນ ມອບໃຫ້ກົມພາສີເປັນຜູ້ຈັດຕັ້ງປະຕິບັດຢ່າງເຂັ້ມງວດ.
- ໃນການຈັດຕັ້ງປະຕິບັດຕົວຈິງ ຫາກພົບເຫັນບັນຫາຫຍຸ້ງຍາກໃຫ້ສັງລວມລາຍງານ ຄະນະນໍາກະຊວງການເງິນ ເພື່ອມີທິດທາງນຳໃນການແກ້ໄຂ.
- ແຈ້ງການສະບັບນີ້ມີຜົນສັກສິດນັບແຕ່ມື້ລົງລາຍເຊັນເປັນຕົ້ນໄປ.
ດັ່ງນັ້ນ, ຈຶ່ງແຈ້ງມາຍັງບັນດາທ່ານເພື່ອຊາບ ແລະ ຈັດຕັ້ງປະຕິບັດຢ່າງເຂັ້ມງວດ.
ຫົວໜ້າຫ້ອງການກະຊວງການເງິນ
ສີແພງ ພົນສາມາດ
PDF
PDFກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.