ໃນວັນທີ 8 ມັງກອນ 2020 ທີ່ຜ່ານມາ ກົມປູກຝັງ, ກະຊວງກະສິກໍາ ແລະ ປ່າໄມ້ ໄດ້ຈັດກອງປະຊຸມຂື້ນຢູ່ໂຮງແຮມແຄມງືມ, ແຂວງວຽງຈັນ ເພື່ອເຜີຍແຜ່ດໍາລັດວ່າດ້ວຍແນວພັນພືດ ສະບັບເລກທີ 238/ລບ, ລົງວັນທີ 18 ພຶດສະພາ 2020 ໃຫ້ກຽດເປັນປະທານໂດຍ ທ່ານ ສົມຫວັງ ພັນທະວົງ, ຮອງຫົວໜ້າກົມປູກຝັງ ແລະ ມີຜູ້ເຂົ້າຮ່ວມຈາກພາກສ່ວນກ່ຽວຂ້ອງ ລວມທັງໝົດ 20 ທ່ານ.
ທ່ານ ຮອງຫົວໜ້າກົມ ໃຫ້ຮູ້ວ່າ: ແນວພັນພືດ ແມ່ນເມັດພັນພືດ ຫຼື ສ່ວນຂະຫຍາຍພັນພືດ ຂອງກຸ່ມພືດ ທີ່ມີກໍາມະພັນ, ລັກສະນະທາງພຶກສາສາາດທີ່ຄືກັນ ຫຼື ຄ້າຍຄືກັນ ແລະ ມີຄຸນລັກສະນະສະເພາະຕົວ, ມີຄວາມສະໝໍ່າສະເໝີ, ມີຄວາມຄົງຕົວທາງດ້ານກາຍະພາບ ແລະ ມີຄວາມແຕກຕ່າງກັນຈາກກຸ່ມອື່ນ ຊຶ່ງປະກອບດ້ວຍ ແນວພັນພືດພື້ນເມືອງ, ແນວພັນພືດທ້ອງຖິ່ນ ແລະ ແນວພັນພືດປັບປຸງ.
ນອກຈາກດິນ, ພູມີອາກາດ ແລະ ເຕັກນິກແລ້ວ ແນວພັນພືດມີຄວາມສໍາຄັນຫຼາຍໃນອຸດສາຫະກໍາການປູກຝັງ.ແນວພັນທີ່ດີ ແລະ ແຂງແຮງ ສາມາດທົນຕໍ່ການປ່ຽນແປງຂອງດິນຟ້າອາກາດ ແລະ ການທໍາລາຍຂອງສັດຕູພືດ ຊຶ່ງສາມາດເພີ້ມປະສິດຕິພາບໃນການຜະລິດສູງ ຫຼື ເວົ້າອິກແບບໜຶ່ງ ແນວພັນທີ່ດີສາມາດໃຫ້ຜົນຜະລີດເພີ່ມ 20-25% ຂອງແນວພັນປົກກະຕິ. ສະນັ້ນການຜະລິດ, ການນໍາເຂົ້າແນວພັນພືດ ຮຽກຮ້ອງໃຫ້ມີມາດຕະການຄຸ້ມຄອງຢ່າງເຂັມງວດ ຕາມມາດຕະຖານຄຸນນະພາບທີ່ຂະແໜງກະສິກໍາ ແລະ ປ່າໄມ້ ກໍານົດ ຫຼື ປະຕິບັດຕາມດໍາລັດ 238/ລບ
ດັ່ງນັ້ນ ບຸກຄົນ, ນິຕິບຸກຄົນ ຫຼື ການຈັດຕັ້ງມີຈຸດປະສົງດໍາເນີນທຸລະກິດເມັດພັນພືດ ຕ້ອງຍື່ນຄໍາຮ້ອງຂໍອະນຸຍາດດໍາເນີນທຸລະກິດ ກ່ຽວກັບການຜະລິດເມັດພັນພືດ, ການຈໍາໜ່າຍ, ການນໍາເຂົ້າ, ສົ່ງອອກ, ສົ່ງອອກຕໍ່, ແລະ ສົ່ງຜ່ານ ເມັດພັນພືດ ນໍາຂະແໜງກະສິກໍາ ແລະ ປ່າໄມ້.
ເງື່ອນໄຂການດໍາເນີນທຸລະກິດເມັດພັນພືດ
- ມີເນື້ອທີ່, ທຶນ, ສໍານັກງານ, ໂຮງງານປຸງແຕ່ງເມັດພັນພືດ, ສາງເກັບຮັກສາ, ຫ້ອງວິໄຈ, ເຄື່ອງມື, ອຸປະກອນ ແລະ ພາຫະນະຮັບໃຊ້ທີ່ເໝາະສົມ.
- ມີລະບົບການບໍລິຫານ, ມີບຸກຄະລະກອນທີ່ມີຄວາມຮູ້ດ້ານແນວພັນພືດ, ປ້ອງກັນພືດ, ທຸລະກິດເມັດພັນພືດ.
- ເງື່ອນໄຂອື່ນ ທີ່ອົງການຄຸ້ມຄອງວຽກງານແນວພັນພືດເຫັນວ່າຈໍາເປັນ.
ການປະກອບເອກະສານຂໍອະນຸຍາດດໍາເນີນທຸລະກິດ
- ໃບຄໍາຮ້ອງຂໍໃບອະນຸຍາດຕາມແບບພິມທີ່ກົມປູກຝັງກໍານົດ
- ສໍາເນົາບັດປະຈໍາຕົວ ຫຼື ສໍາມະໂນຄົວ, ໃບມອບສິດຂອງຜູ້ຕາງໜ້າ ໃນກໍລະນີໃຫ້ຜູ້ອື່ນມາແລ່ນເອກະສານໃຫ້
- ສໍາເນົາໃບທະບຽນວິສາຫະກິດ ຫຼື ສໍາເນົາໃບອະນຸຍາດລົງທຶນ
- ບົດວິພາກເສດຖະກິດ-ເຕັກນິກ ຫຼື ບົດສະເໜີແຜນການ ຫຼື ໂຄງການ
ເອກະສານອື່ນທີ່ຈໍາເປັນຕາມການຮຽກຮ້ອງຂອງຂະແໜງການກະສິກໍາ ແລະ ປ່າໄມ້
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.