ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ
ກະຊວງການເງິນ ເລກທີ 2526/ກງ
ນະຄອນຫຼວງວຽງຈັນ, ວັນທີ 28 ກັນຍາ 2020
ຄໍາແນະນໍາ
ວ່າດ້ວຍສະພາບໍລິຫານ ລັດວິສາຫະກິດ
- ອີງຕາມ ກົດໝາຍ ວ່າດ້ວຍວິສາຫະກິດ (ສະບັບປັບປຸງ) ສະບັບເລກທີ 46/ສພຊ, ລົງວັນທີ 26 ທັນວາ 2013;
- ອີງຕາມ ດໍາລັດ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງກະຊວງການເງິນ ສະບັບເລກທີ 144/ນຍ, ລົງວັນທີ 8 ພຶດສະພາ 2017;
- ອີງຕາມ ຄໍາແນະນໍາ ວ່າດ້ວຍການແຕ່ງຕັ້ງຜູ້ຕາງໜ້າຜູ້ຖືຮຸ້ນຂອງລັດ ແລະ ສະພາບໍລິຫານ ໃນວິສາຫະກິດລັດລົງທຶນ ສະບັບເລກທີ 2230/ກງ, ລົງວັນທີ 9 ກໍລະກົດ 2018;
- ອີງຕາມ ໜັງສືສະເໜີຂອງກົມຄຸ້ມຄອງວິສາຫະກິດລັດລົງທຶນ ແລະ ການປະກັນໄພ ກະຊວງການເງິນ ສະບັບເລກທີ 0982/ຄລປ, ລົງວັນທີ 22 ກັນຍາ 2020;
ລັດຖະມົນຕີກະຊວງການເງິນ ອອກຄໍາແນະນໍາ:
ມາດຕາ 1 ຈຸດປະສົງ
ຄໍາແນະນໍາສະບັບນີ້ຜັນຂະຫຍາຍ ແລະ ແນະນໍາການຈັດຕັ້ງປະຕິບັດ ພາກທີ VI ຂອງກົດໝາຍວ່າດ້ວຍວິສາຫະກິດ ສະບັບເລກທີ 46/ສພຊ, ລົງວັນທີ 26 ທັນວາ 2013 ແລະ ດໍາລັດວ່າດ້ວຍວິສາຫະກິດລັດລົງທຶນ ເພື່ອເຮັດໃຫ້ເນື້ອໃນຂອງກົດໝາຍ ແລະ ດໍາລັດດັ່ງກ່າວ ມີຄວາມລະອຽດ ຈະແຈ້ງຂຶ້ນຕື່ມ, ສ້າງຄວາມເຂົ້າໃຈ ຕໍ່ພາລະບົດບາດ, ສິດ, ໜ້າທີ່ ແລະ ຄວາມຮັບຜິດຊອບຂອງສະພາບໍລິຫານ ແລະ ຜູ້ຕາງໜ້າຂອງລັດ ທີ່ຖືຮຸ້ນໃນວິສາຫະກິດ; ຄໍາແນະນໍາສະບັບນີ້ ຍັງບໍ່ໄດ້ກໍານົດຫຼັກການແນະນໍາ ກ່ຽວກັບ ວິທີການຄັດເລືອກ, ການແຕ່ງຕັ້ງ ແລະ ແບບແຜນວິທີເຮັດວຽກຂອງສະພາບໍລິຫານລັດວິສາຫະກິດ ແລະ ຜູ້ຕາງໜ້າຂອງລັດທີ່ຖືຮຸ້ນໃນວິສາຫະກິດຮ່ວມທຶນກັບພາກສ່ວນອື່ນ ຊຶ່ງລັດຖືຮຸ້ນຫຼາຍກ່າວຫ້າສິບສ່ວນຮ້ອຍຂຶ້ນໄປ ເພື່ອເປັນແນວທາງໃນການຈັດຕັ້ງປະຕິບັດ ແລະ ການເຄື່ອນໄຫວວຽກງານຕົວຈິງ ແລະ ເປັນເອກະພາບ ໃນການນໍາພາ-ຊີ້ນໍາ, ຄຸ້ມຄອງວິສາຫະກິດຂອງລັດໃນຂອບເຂດທົ່ວປະເທດໃຫ້ມີປະສິດທິພາບ ແລະ ປະສິດທິຜົນ, ມີຄວາມເຂັ້ມແຂງ ແລະ ສາມາດແຂ່ງຂັນໄດ້ກັບພາກພື້ນ ແລະ ສາກົນ.
ມາດຕາ 2 ສະພາບໍລິຫານ
ສະພາບໍລິຫານລັດວິສາຫະກິດ ແມ່ນການຈັດຕັ້ງສູງສຸດຂອງລັດວິສາຫະກິດ ທີ່ລັດຖືຮຸ້ນຮ້ອຍສ່ວຍຮ້ອຍຊຶ່ງປະກອບດ້ວຍສະມາຊິກຕັ້ງແຕ່ ຫ້າ ຄົນຂຶ້ນໄປຕາມຂະໜາດ ແລະ ໂຄງສ້າງຂອງວິສາຫະກິດ. ໃນນັ້ນ, ປະກອບມີປະທານສະພາບໍລິຫານ, ຮອງປະທານສະພາບໍລິຫານ ແລະ ກໍາມະການສະພາບໍລິຫານຈໍານວນໜຶ່ງ ຊຶ່ງທັງເປັນບຸກຄົນທີ່ໄດ້ຖືກແຕ່ງຕັ້ງເປັນຕົວແທນ ສິດຜົນປະໂຫຍດຂອງລັດ ຫຼື ຜູ້ຖືຮຸ້ນ ໃນການນໍາພາ-ຊີ້ນໍາ ເພື່ອຄຸ້ມຄອງບໍລິຫານທຸລະກິດຂອງລັດວິສາຫະກິດ.
ໃນກໍລະນີຈໍາເປັນ ປະທານ ຫຼື ກໍາມະການສະພາບໍລິຫານຈໍານວນໜຶ່ງ ສາມາດປະຈໍາການຢູ່ວິສາຫະກິດຍຸດທະສາດກໍໄດ້.
ໃນຈໍານວນສະມາຊິກສະພາບໍລິຫານ ຄວນໃຫ້ມີສະມາຊິກທີ່ເປັນເພດຍິງໃຫ້ກວມ ສິບສ່ວນຮ້ອຍຂຶ້ນໄປຂອງຈໍານວນສະມາຊິກສະພາບໍລິຫານທັງໝົດ.
ມາດຕາ 3 ລັດວິສາຫະກິດ
ລັດວິສາຫະກິດ ຫຼື ວິສາຫະກິດຂອງລັດ ແມ່ນຫົວໜ່ວຍວິສາຫະກິດທີ່ລັດເປັນຜູ້ສ້າງຕັ້ງຂຶ້ນ ຫຼື ການຫັນວິສາຫະກິດ ຫຼື ການຊື້ຮຸ້ນໃນວິສາຫະກິດອື່ນມາເປັນຂອງລັດຕາມການຕົກລົງເປັນເອກະພາບ ຊຶ່ງລັດມີທຶນຫຼາຍກວ່າຫ້າສິບສ່ວນຮ້ອຍຂຶ້ນໄປ, ເນື່ອງຈາກວ່າເປັນອັດຕາສ່ວນທີ່ລັດມີອໍານາດໃນການຕັດສິນການຄຸ້ມຄອງຫົວໜ່ວຍທຸລະກິດ ທີ່ລັດມີການລົງທຶນ;
ໃນກໍລະນີ ທີ່ວິສາຫະກິດຂອງລັດຖືກສ້າງຕັ້ງ ແລະ ເຄື່ອນໄຫວທຸລະກິດພາຍໃຕ້ຫຼັກການຂອງຮູບແບບບໍລິສັດ ໃຫ້ເອີ້ນວ່າ ບໍລິສັດລັດ.
ມາດຕາ 4 ອະທິບາຍຄໍາສັບ
- ກອງປະຊຸມຜູ້ຖືຮຸ້ນ ແມ່ນການຈັດຕັ້ງສູງສຸດຂອງລັດວິສາຫະກິດ ທີ່ລັດຮ່ວມທຶນກັບພາກສ່ວນອື່ນ ຫຼື ພາກເອກະຊົນ (ລັດຖືຮຸ້ນຫຼາຍກວ່າຫ້າສິບສ່ວນຮ້ອຍ ແຕ່ບໍ່ຮອດຮ້ອຍສ່ວນຮ້ອຍ) ຊຶ່ງປະກອບມີຜູ້ຕາງໜ້າຜູ້ຖືຮຸ້ນຂອງລັດ ແລະ ຜູ້ຖືຮຸ້ນຈາກພາກສ່ວນອື່ນ. ກອງປະຊຸມຜູ້ຖືຮຸ້ນຂອງລັດວິສາຫະກິດ ທີ່ລັດຮ່ວມທຶນກັບພາກສ່ວນອື່ນ ປະກອບມີ ກອງປະຊຸມສາມັນ ແລະ ກອງປະຊຸມວິສາມັນ. ກອງປະຊຸມສາມັນເປີດຂຶ້ນຢ່າງໜ້ອຍ ໜຶ່ງຄັ້ງຕໍ່ປີຕາມກົດໝາຍ ແລະ ກົດລະບຽບຂອງວິສາຫະກິດ. ກອງປະຊຸມວິສາມັນສາມາດເປີດຂຶ້ນເວລາໃດກໍໄດ້ ໃນກໍລະນີມີຄວາມຈໍາເປັນ.
- ປະທານສະພາບໍລິຫານຂອງລັດວິສາຫະກິດ ແມ່ນບຸກຄົນທີ່ໄດ້ຮັບການແຕ່ງຕັ້ງ ຫຼື ປົດຕໍາແໜ່ງ ຈາກລັດຖະມົນຕີ ກະຊວງການເງິນບົນພື້ນຖານການສະເໜີຂອງຂະແໜງການທີ່ລັດວິສາຫະກິດຂຶ້ນກັບ,ໃຫ້ເປັນປະທານສະພາບໍລິຫານ ເພື່ອນໍາພາ-ຊີ້ນໍາວຽກງານຄຸ້ມຄອງການດໍາເນີນທຸລະກິດ ຂອງລັດວິສາຫະກິດຢ່າງໃກ້ຊິດ.
- ຮອງປະທານສະພາບໍລິຫານ ແມ່ນສະມາຊິກສະພາບໍລິຫານ. ໃນກໍລະນີຂອງລັດວິສາຫະກິດ ທີ່ລັດຖືຮຸ້ນຮ້ອຍສ່ວນຮ້ອຍ ແມ່ນລັດຖະມົນຕີກະຊວງການເງິນ ເປັນຜູ້ແຕ່ງຕັ້ງ ຫຼື ປົດຕໍາແໜ່ງ; ໃນກໍລະນີ ຂອງລັດວິສາຫະກິດ ທີ່ລັດຮ່ວມທຶນກັບພາກສ່ວນອື່ນ ບົນພື້ນຖານການເຫັນດີເປັນເອກະພາບຈາກຂະແໜງການກ່ຽວຂ້ອງ ແລະ ຜູ້ຖືຮຸ້ນຈາກພາກສ່ວນອື່ນ ແມ່ນພາກສ່ວນອື່ນເປັນຜູ້ແຕ່ງຕັ້ງ.
- ຜູ້ອໍານວຍການຂອງລັດວິສາຫະກິດ ແມ່ນບຸກຄົນທີ່ໄດ້ຮັບການມອບໝາຍຈາກສະພາບໍລິຫານໃຫ້ປະຕິບັດໜ້າທີ່ ທີ່ຄຸ້ມຄອງໂດຍກົງ, ຮັບຜິດຊອບລວມໃນການຄຸ້ມຄອງການດໍາເນີນທຸລະກິດປະຈໍາວັນຂອງລັດວິສາຫະກິດ, ມີໜ້າທີ່ຮັບຜິດຊອບໂດຍກົງ ຕໍ່ສະພາບໍລິຫານ ແລະ ໃນກໍລະນີຫາກມີຄວາມຈໍາເປັນ ຜູ້ອໍານວຍການອາດເປັນຮອງປະທານ ຫຼື ກໍາມະການສະພາບໍລິຫານຕາມການແຕ່ງຕັ້ງຂອງລັດຖະມົນຕີກະຊວງການເງິນກໍ່ໄດ້; ໃນກໍລະນີ ຂອງລັດວິສາຫະກິດ ທີ່ລັດຮ່ວມທຶນກັບພາກສ່ວນອື່ນ ຊຶ່ງລັດຖືຮຸ້ນເທົ່າກັນ ຫຼື ຫຼາຍກວ່າຫ້າສິບສ່ວນຮ້ອຍ ແມ່ນລັດຖະມົນຕີກະຊວງການເງິນ ເປັນຜູ້ແຕ່ງຕັ້ງບົນພື້ນຖານສະເໜີຊື່ ຈາກຂະແໜງການກ່ຽວຂ້ອງທີ່ຂໍສະເໜີສ້າງຕັ້ງລັດວິສາຫະກິດນັ້ນ ຫຼື ຕາມການຕົກລົງໃນສັນຍາຮ່ວມທຶນ ລະຫວ່າງ ພາກສ່ວນລັດ ແລະ ພາກສ່ວນອື່ນ ທີ່ເປັນສັນຍາຮ່ວມທຶນສ້າງຕັ້ງລັດວິສາຫະກິດນັ້ນ ແລະ ຫຼັງຈາກນັ້ນຜູ້ອໍານວຍການກໍຕ້ອງຖືກຮັບຮອງເປັນທາງການໃນກອງປະຊຸມຜູ້ຖືຮຸ້ນ ຕາມກົດໝາຍ ແລະ ລະບຽບການ; ໃນກໍລະນີວິສາຫະກິດປະສົມ (ລັດຖືຮຸ້ນໜ້ອຍກວ່າຫ້າສິບສ່ວນຮ້ອຍ) ແມ່ນພາກສ່ວນອື່ນ ຫຼື ພາກເອກະຊົນ ເປັນຜູ້ສະເໜີຊື່ຂອງຜູ້ອໍານວຍການ ເພື່ອໃຫ້ກອງປະຊຸມຜູ້ຖືຮຸ້ນພິຈາລະນາຮັບຮອງ ໂດຍຂຶ້ນກັບການຕົກລົງເປັນເອກະພາບຂອງກອງປະຊຸມຜູ້ຖືຮຸ້ນ.
- ກໍາມະການຂອງສະພາບໍລິຫານ ແມ່ນສະມາຊິກສະພາບໍລິຫານ ຊຶ່ງເປັນຕົວແທນຂອງຜູ້ຖືຮຸ້ນໂດຍເຮັດໜ້າທີ່ຊ່ວຍປະທານ ແລະ ຮອງປະທານໃນການຄຸ້ມຄອງ ແລະ ກວດກາການປະຕິບັດງານຂອງຄະນະອໍານວຍການລັດວິສາຫະກິດ.
- ກໍາມະການສະພາບໍລິຫານປະຈໍາການ ແມ່ນສະມາຊິກສະພາບໍລິຫານ ທີ່ຖືກແຕ່ງຕັ້ງໃຫ້ປະຈໍາການຢູ່ວິສາຫະກິດ ເພື່ອເປັນຫົວໜ້າຄະນະກໍາມະການໃດໜຶ່ງຂອງສະພາບໍລິຫານ ເພື່ອເຮັດໜ້າທີ່ປະຈໍາການ, ແຕ່ໂດຍທົ່ວໄປແລ້ວ ຈະມີແຕ່ຜູ້ອໍານວຍການເທົ່ານັ້ນ ທີ່ໄດ້ຖືກແຕ່ງຕັ້ງໃຫ້ເປັນກໍາມະການສະພາບໍລິຫານປະຈໍາການ ເພື່ອຕາງໜ້າໃຫ້ສະພາບໍລິຫານ ຫຼື ໃນບາງກໍລະນີ ອາດຈະແຕ່ງຕັ້ງຮອງອໍານວຍການບາງຄົນເປັນກໍາມະການສະພາບໍລິຫານປະຈໍາການເພີ່ມເຕີມອີກກໍໄດ້.
- ກໍາມະການສະພາບໍລິຫານບໍ່ປະຈໍາການ ແມ່ນສະມາຊິກສະພາບໍລິຫານທີ່ບໍ່ປະຈໍາການຢູ່ວິສາຫະກິດ. ກໍາມະການສະພາບໍລິຫານທີ່ບໍ່ປະຈໍາການອາດຈະເປັນກໍາມະການອິດສະຫຼະຈາກພາຍນອກ ຫຼື ອາດຈະເປັນພະນັກງານລັດຖະກອນ.
- ຄະນະອໍານວຍການ ປະກອບມີ ຜູ້ອໍານວຍການເປັນຫົວໜ້າຄະນະ ແລະ ມີຮອງຜູ້ອໍານວຍການຈໍານວນໜຶ່ງ. ຄະນະອໍານວຍການ ເປັນຕົວແທນທີ່ມາຈາກພາກລັດ ແລະ ຈາກພາກສ່ວນອື່ນ ຫຼື ຖືກວ່າຈ້າງ (ໃນກໍລະນີລັດວິສາຫະກິດ ທີ່ລັດຮ່ວມທຶນກັບພາກສ່ວນອື່ນ), ມີໜ້າທີ່ຮັບຜິດຊອບໃນການຄຸ້ມຄອງບໍລິຫານການເຄື່ອນໄຫວທຸລະກິດ ຂອງວິສາຫະກິດ.
ມາດຕາ 5 ໂຄງປະກອບການຈັດຕັ້ງຄຸ້ມຄອງລັດວິສາຫະກິດ ຂອງສະພາບໍລິຫານ
- ສໍາລັບລັດວິສາຫະກິດ ທີ່ລັດຖືຮຸ້ນຮ້ອຍສ່ວນຮ້ອຍມີໂຄງສ້າງການຈັດຕັ້ງຄຸ້ມຄອງສະພາບໍລິຫານ ດັ່ງນີ້:
- ສະພາບໍລິຫານ;
- ຄະນະອໍານວຍການ;
- ພະແນກການ/ຫ້ອງການ;
- ໜ່ວຍງານ, ຂະແໜງການ, ສູນ ຫຼື ພາກສ່ວນ.
- ສໍາລັບລັດວິສາຫະກິດ ທີ່ລັດຮ່ວມທຶນກັບພາກສ່ວນອື່ນ ທີ່ລັດຖືຮຸ້ນຫຼາຍກວ່າ ຫ້າສິບສ່ວນຮ້ອຍ ຫາ ເກົ້າສິບສ່ວນຮ້ອຍ ມີໂຄງສ້າງການຈັດຕັ້ງຄຸ້ມຄອງສະພາບໍລິຫານ ດັ່ງນີ້:
- ຜູ້ຖືຮຸ້ນ ແລະ ກອງປະຊຸມຜູ້ຖືຮຸ້ນ;
- ສະພາບໍລິຫານ;
- ຄະນະອໍານວຍການ;
- ພະແນກການ/ຫ້ອງການ;
- ໜ່ວຍງານ, ຂະແໜງການ, ສູນ ຫຼື ພາກສ່ວນ.
ມາດຕາ 6 ການຈັດແບ່ງຂະໜາດຂອງລັດວິສາຫະກິດ
ລັດວິສາຫະກິດຖືກຈັດແບ່ງເປັນ ສາມ ປະເພດຄື: ຂະໜາດນ້ອຍ, ຂະໜາດກາງ ແລະ ຂະໜາດໃຫຍ່. ສໍາລັບວິສາຫະກິດຂະໜາດນ້ອຍ ແລະ ກາງ ແມ່ນໃຫ້ຈັດແບ່ງຂະໜາດໂດຍອີງຕາມດໍາລັດວ່າດ້ວຍການຈັດແບ່ງຂະໜາດວິສາຫະກິດຂະໜາດນ້ອຍ ແລະ ກາງ ສະບັບເລກທີ 25/ລບ, ລົງວັນທີ 16 ມັງກອນ 2017.
ສໍາລັບລັດວິສາຫະກິດ ທີ່ມີຈໍານວນແຮງງານສະເລ່ຍໃນປີ, ມູນຄ່າຊັບສິນທັງໝົດ ແລະ ຍອດລາຍຮັບທຸລະກິດປະຈໍາປີ ເກີນລາຍຮັບຂອງວິສາຫະກິດຂະໜາດກາງ ແລ້ວ ແມ່ນໃຫ້ຈັດເປັນປະເພດລັດວິສາຫະກິດຂະໜາດໃຫຍ່.
ມາດຕາ 7 ຂອບເຂດການນໍາໃຊ້
ຄໍາແນະນໍາສະບັບນີ້ ແມ່ນນໍາໃຊ້ສໍາລັບສະພາບໍລິຫານຂອງລັດວິສາຫະກິດ,ບຸກຄົນ, ນິຕິບຸກຄົນ ແລະ ການຈັດຕັ້ງພາກລັດທີ່ພົວພັນກັບການຈັດຫາ, ການຄັດເລືອກ, ການແຕ່ງຕັ້ງ, ການຄຸ້ມຄອງ, ຕິດຕາມ, ກວດກາການເຄື່ອນໄຫວດໍາເນີນທຸລະກິດ ຂອງລັດວິສາຫະກິດ. ສໍາລັບສະພາບໍລິຫານ ຂອງລັດວິສາຫະກິດປະສົມ ທີ່ລັດຖືຮຸ້ນໜ້ອຍກວ່າ ຫ້າສິບສ່ວນຮ້ອຍລົງມາ ແມ່ນໃຫ້ປະຕິບັດຕາມກົດໝາຍວ່າດ້ວຍວິສາຫະກິດ ແລະ ກົດລະບຽບບໍລິສັດ; ສ່ວນລັດວິສາຫະກິດທີ່ເຄື່ອນໄຫວພາຍໃຕ້ຮູບແບບ ບໍລິສັດມະຫາຊົນ ນອກຈາກປະຕິບັດຕາມກົດໝາຍວ່າດ້ວຍວິສາຫະກິດແລ້ວ ແມ່ນໃຫ້ປະຕິບັດຕາມກົດໝາຍວ່າດ້ວຍຫຼັກຊັບ ສະບັບເລກທີ 21/ສພຊ, ລົງວັນທີ 10 ທັນວາ 2012 ແລະ ກົດລະບຽບທີ່ກ່ຽວຂ້ອງ.
ມາດຕາ 8 ພາລະບົດບາດຂອງສະພາບໍລິຫານ
- ຄົ້ນຄວ້າຍຸດທະສາດ, ທິດທາງ, ແຜນການ ໃນການບໍລິຫານຈັດການວິສາຫະກິດ ເພື່ອນໍາສະເໜີກອງປະຊຸມຜູ້ຖືຮຸ້ນ (ໃນກໍລະນີ ລັດວິສາຫະກິດທີ່ລັດຮ່ວມທຶນກັບພາກສ່ວນອື່ນ) ພິຈາລະນາ;
- ຕີລາຄາຜົນການດໍາເນີນທຸລະກິດ ຂອງວິສາຫະກິດ;
- ຮັບຜິດຊອບຕໍ່ປະສິດທິຜົນ ຂອງການນໍາໃຊ້ຊັບສິນ ແລະ ທຶນຮອນ ທີ່ລັດປະກອບໃຫ້;
- ຮັບຮອງການແຕ່ງຕັ້ງຜູ້ກວດສອບບັນຊີ ຈາກພາຍນອກ;
- ຕິດຕາມ ກວດກາ ການເຄື່ອນໄຫວວຽກງານ ຂອງຄະນະອໍານວຍການ;
- ເປັນຕົວແທນຄຸ້ນຄອງສິດຜົນປະໂຫຍດຂອງລັດ ຫຼື ຜູ້ຖືຮຸ້ນ ໃນການບໍລິຫານ, ຕິດຕາມ, ກວດກາ, ຄຸ້ມຄອງການດໍາເນີນງານ ພ້ອມທັງນໍາພາ-ຊີ້ນໍາ ແລະ ໃຫ້ຄໍາປຶກສາແກ່ຄະນະອໍານວຍການ ໃນການບໍລິຫານວຽກງານເພື່ອຮັບປະກັນໃຫ້ວິສາຫະກິດ ເຄື່ອນໄຫວຢ່າງຖືກຕ້ອງຕາມກົດໝາຍ, ໂປ່ງໃສ ແລະ ມີປະສິດທິຜົນ; ໃນກໍລະນີທີ່ຈໍາເປັນ ລັດຖະບານ ສາມາດມອບໝາຍໃຫ້ປະທານສະພາບໍລິຫານ ຫຼື ກໍາມະການສະພາບໍລິຫານບາງທ່ານໄປປະຈໍາການ ເພື່ອຊີ້ນໍາຢ່າງໃກ້ຊິດໃນການດໍາເນີນງານ ຂອງຄະນະອໍານວຍການ.
- ມີອໍານາດ ແລະ ສິດໃນການຕັດສິນບັນຫາໃນການດໍາເນີນງານເພື່ອບັນລຸຈຸດປະສົງ, ເປົ້າໝາຍການດໍາເນີນທຸລະກິດຂອງລັດວິສາຫະກິດທີ່ໄດ້ວາງໄວ້.
- ເປັນເອກະພາບກັບກະຊວງ, ຂະແໜງການ ທີ່ລັດວິສາຫະກິດຂຶ້ນກັບ ກ່ຽວກັບພາລະກິດ, ຈຸດປະສົງເປົ້າໝາຍ ແລະ ຍຸດທະສາດທາງທຸລະກິດ ເພື່ອຈັດຕັ້ງປະຕິບັດໃຫ້ມີປະສິດທິຜົນ.
ມາດຕາ 9 ຄວາມຮັບຜິດຊອບຂອງສະມາຊິກສະພາບໍລິຫານ
- ຮັບຜິດຊອບຮ່ວມກັບຄະນະອໍານວຍການ ຕໍ່ການນໍາໃຊ້ສິດ ແລະ ປະຕິບັດໜ້າທີ່ຕາມທີ່ໄດ້ກໍານົດໄວ້ໃນຄໍາແນະນໍາສະບັບນີ້, ລວມທັງສິດ ແລະ ໜ້າທີ່ອື່ນທີ່ໄດ້ຮັບມອບໝາຍ ເພື່ອຜົນປະໂຫຍດ ຂອງລັດວິສາຫະກິດ ກໍຄືຜົນປະໂຫຍດຂອງລັດ ແລະ ຜູ້ຖືຮຸ້ນ;
- ຮັບຜິດຊອບຕໍ່ໜ້າກົດໝາຍ ກ່ຽວກັບຜົນໄດ້ ແລະ ຜົນເສຍ ໃນການເຄື່ອນໄຫວດໍາເນີນທຸລະກິດຂອງວິສາຫະກິດ;
- ຮັບປະກັນການຈັດຕັ້ງປະຕິບັດວຽກງານ ໃຫ້ສອດຄ່ອງກົດໝາຍ ແລະ ລະບຽບການທີ່ກ່ຽວຂ້ອງ, ສະໜອງຂໍ້ມູນໃຫ້ສະມາຊິກສະພາບໍລິຫານໄດ້ຄົ້ນຄວ້າກ່ອນເປີດກອງປະຊຸມ;
- ຮັບຜິດຊອບຕໍ່ການປະກອບຄໍາເຫັນ, ການອອກມະຕິຕົກລົງຂອງສະພາບໍລິຫານ;
- ຮັບຜິດຊອບຕໍ່ ລັດຖະມົນຕີກະຊວງການເງິນ ຫຼື ຜູ້ຖືຮຸ້ນ ທີ່ແຕ່ງຕັ້ງສະມາຊິກສະພາບໍລິຫານນັ້ນ;
- ຮັບຜິດຊອບຕໍ່ການນໍາໃຊ້ສິດ ແລະ ປະຕິບັດໜ້າທີ່ອື່ນ ຕາມການມອບໝາຍ.
ມາດຕາ 10 ມາດຕະຖານ ແລະ ເງື່ອນໄຂ ຂອງສະມາຊິກສະພາບໍລິຫານ
- ເປັນບຸກຄົນທີ່ມີຄວາມຮູ້, ຄວາມສາມາດ ແລະ ມີປະສົບການໃນການຄຸ້ມຄອງບໍລິຫານທຸລະກິດ ຫຼື ມີປະສົບການໃນຂົງເຂດວຽກງານທີ່ກ່ຽວຂ້ອງ ຢ່າງໜ້ອຍ 3 ປີຂຶ້ນໄປ ແລະ ມີປະຫວັດການບໍລິຫານທີ່ດີ. ສໍາລັບ ປະທານສະພາບໍລິຫານ ຕ້ອງມີປະສົບການ ໃນການເປັນຜູ້ບໍລິຫານອົງກອນໃດໜຶ່ງຢ່າງໜ້ອຍ 3 ປີຂຶ້ນໄປ.
- ຕ້ອງມີວິຊາສະເພາະທີ່ຖືກຕ້ອງກັບ ການດໍາເນີນທຸລະກິດຂອງວິສາຫະກິດນັ້ນ ຫຼື ຕາມຕໍາແໜ່ງງານທີ່ຕ້ອງການໃນລະດັບປະລິນຍາຕີຂຶ້ນໄປ, ຕ້ອງມີຄວາມຮູ້ທາງດ້ານການບັນຊີ-ການເງິນ, ກົດໝາຍ, ການບໍລິຫານບຸກຄະລາກອນ, ການຕະຫຼາດ, ການລົງທຶນ ແລະ ມີຄວາມຮູ້ດ້ານພາສາອັງກິດໃນລະດັບດີ;
- ໄດ້ຮຽນຮູ້ຄໍາແນະນໍາ ວ່າດ້ວຍສະພາບໍລິຫານສະບັບນີ້ ຫຼື ຜ່ານຫຼັກສູດການຝຶກອົບຮົມກ່ຽວກັບການເປັນສະມາຊິກສະພາບໍລິຫານ ແລະ ຫຼັກການບໍລິຫານບໍລິສັດທີ່ດີພາຍໃນ ຫຼື ຕ່າງປະເທດ ດ້ວຍທຶນອຸປະຖໍາຂອງລັດວິສາຫະກິດ;
- ມີຄວາມສັດຊື່ບໍລິສຸດ, ມີຄຸນສົມບັດດີ, ມີວິໄສທັດ, ຄວາມຮອບຮູ້, ຄວາມພາກພຽນມຸ້ງໝັ້ນໃສ່ເປົ້າໝາຍ, ມີແນວຄິດສ້າງສັນ, ສົ່ງເສີມຄວາມກ້າວໜ້າ, ມີຈິດໃຈເປີດເຜີຍ-ກວ້າງຂວາງ, ມີຄວາມສາມາດໃນການແກ້ໄຂບັນຫາ, ມີທັກສະໃນການສື່ສານ ແລະ ທັກສະການເປັນຜູ້ນໍາ;
- ມີສຸຂະພາບແຂງແຮງ, ມີຄວາມຮັບຜິດຊອບສູງຕໍ່ໜ້າທີ່, ມີສະຕິຕໍ່ກົດໝາຍ ແລະ ລະບຽບການ;
- ສາມາດຕັດສິນບັນຫາໄດ້ຢ່າງພາວະວິໄສ ຕາມຂອບເຂດສິດ, ໜ້າທີ່ ແລະ ຄວາມຮັບຜິດຊອບຂອງຕົນ;
- ມີຈັນຍາບັນ, ຈັນຍາທໍາສູງ ໃນການປະຕິບັດໜ້າທີ່;
- ບໍ່ເຄີຍຕ້ອງໂທດ ຫຼື ຖືກລົງໂທດໃນຄະດີສໍ້ໂກງ, ຍັກຍອກຊັບສິນຂອງລັດ, ບຸກຄົນ ແລະ ນິຕິບຸກຄົນ, ບໍ່ແມ່ນບຸກຄົນທີ່ລົ້ມລະລາຍ ຫຼື ຖືກຫ້າມດໍາເນີນທຸລະກິດ;
- ພະນັກງານ ລັດຖະກອນ ທີ່ຈະຖືກແຕ່ງຕັ້ງໄປເປັນປະທານ, ຮອງປະທານ ແລະ ກໍາມະການ ສະພາບໍລິຫານ ຂອງລັດວິສາຫະກິດ ຕ້ອງມີຕໍາແໜ່ງລັດບໍລິຫານ ໂດຍອີງຕາມຂະໜາດຂອງລັດວິສາຫະກິດ ດັ່ງນີ້:
- ປະທານສະພາບໍລິຫານທຽບເທົ່າ ຕໍາແໜ່ງບໍລິຫານປະເພດ 3 ຂຶ້ນໄປ;
- ຮອງປະທານສະພາບໍລິຫານ ທຽບເທົ່າຕໍາແໜ່ງບໍລິຫານປະເພດ 4 ຂຶ້ນໄປ;
- ກໍາມະການສະພາບໍລິຫານ ທຽບເທົ່າຕໍາແໜ່ງບໍລິຫານປະເພດ 5 ຂຶ້ນໄປ.
ມາດຕາ 11 ກອງປະຊຸມສະພາບໍລິຫານ
ສະພາບໍລິຫານນໍາໃຊ້ສິດ ແລະ ໜ້າທີ່ຂອງຕົນໂດຍຜ່ານກອງປະຊຸມສະພາບໍລິຫານ. ຈໍານວນກອງປະຊຸມສະພາບໍລິຫານປະຈໍາປີຕ້ອງໄດ້ຖືກລະບຸໄວ້ໃນກົດລະບຽບພາຍໃນ ຂອງລັດວິສາຫະກິດ. ໂດຍທົ່ວໄປແລ້ວການຈັດກອງປະຊຸມສາມັນຂອງສະພາບໍລິຫານຕໍ່າສຸດ ແມ່ນບໍ່ໃຫ້ຫຼຸດ ສອງຄັ້ງຕໍ່ປີ. ສະພາບໍລິຫານຍັງສາມາດຮຽກກອງປະຊຸມສະໄໝວິສາມັນໃນກໍລະນີຫາກມີຄວາມຈໍາເປັນ ແລະ ຮີບດ່ວນໂດຍສະມາຊິກສະພາບໍລິຫານທັງໝົດ ຕ້ອງໄດ້ຮັບແຈ້ງການລ່ວງໜ້າກ່ອນ ເຈັດວັນ ທາງລັດຖະການ;
ສະພາບໍລິຫານມີມະຕິກອງປະຊຸມ ທີ່ມີຄວາມເຫັນດີເປັນເອກະພາບກັນດ້ວຍສຽງສ່ວນຫຼາຍ ແລະ ຄະແນນສຽງ ທີ່ມີຜົນສັກສິດນໍາໃຊ້ໄດ້ ກໍຕໍ່ເມື່ອມີສະມາຊິກສະພາບໍລິຫານເຂົ້າຮ່ວມກອງປະຊຸມຄົບອົງປະຊຸມ ແລະ ເປັນຜູ້ທີ່ມີສິດອອກສຽງສະເພາະແຕ່ອົງປະຊຸມ ຂອງສະມາຊິກສະພາບໍລິຫານ ທີ່ມີໜ້າຢູ່ກອງປະຊຸມເທົ່ານັ້ນ;
ກອງປະຊຸມຂອງສະພາບໍລິຫານ ຕ້ອງມີສະມາຊິກຫຼາຍກວ່າເຄິ່ງໜຶ່ງຂຶ້ນໄປ ຂອງຈໍານວນສະມາຊິກສະພາບໍລິຫານທັງໝົດ;
ນອກຈາກນີ້ ກອງປະຊຸມສະພາບໍລິຫານ ຈະມີຜົນສັກສິດນໍາໃຊ້ໄດ້ກໍຕໍ່ເມື່ອມີບົດບັນທຶກ ຫຼື ບົດລາຍງານກອງປະຊຸມ. ບົດບັນທຶກກອງປະຊຸມຂອງສະພາບໍລິຫານ ຕ້ອງເກັບຮັກສາໄວ້ໃນສໍານັກງານໃຫຍ່ ຂອງວິສາຫະກິດຊຶ່ງຜູ້ຖືຮຸ້ນສາມາດຕິດຕາມ ຫຼື ກວດສອບໄດ້;
ມະຕິກອງປະຊຸມ ສະພາບໍລິຫານ ຕ້ອງໄດ້ເຮັດການຈັດຕັ້ງປະຕິບັດຢ່າງເຂັ້ມງວດ, ຖ້າສະມາຊິກສະພາບໍລິຫານ ຫຼື ຄະນະອໍານວຍການຫາກລະເມີດ ຫຼື ບໍ່ປະຕິບັດຕາມ ຕ້ອງຮັບຜິດຊອບຕໍ່ຜົນເສຍຫານທີ່ເກີດຂຶ້ນທັງໝົດ;
ມະຕິກອງປະຊຸມ ທີ່ບໍ່ຖືກຕ້ອງ ແລະ ບໍ່ສອດຄ່ອງ ກັບທິດຊີ້ນໍາຂອງຜູ້ຖືຮຸ້ນກໍານົດ ຫຼືແນະນໍາໃຫ້ປະຕິບັດ ຄະນະສະພາບໍລິຫານຕ້ອງຮັບຜິດຊອບຮ່ວມກັນຕໍ່ຜົນໄດ້ຜົນເສຍ, ຍົກເວັ້ນຜູ້ທີ່ໄດ້ຄັດຄ້ານຫາກມີຄໍາເຫັນທີ່ຖືກຕ້ອງ ແລະ ສອດຄ່ອງກັບຄໍາຊີ້ແນະດັ່ງກ່າວ ຂອງຜູ້ຖືຮຸ້ນ.
ມາດຕາ 12 ໜ້າທີ່ຂອງສະພາບໍລິຫານ
ກ. ການຊີ້ນໍາ, ຕິດຕາມວຽກບໍລິຫານງານຂອງຄະນະອໍານວຍການ:
- ຊີ້ນໍາລວມ, ທົບທວນ ແລະ ແນະນໍາໃນການກໍານົດທິດທາງ, ແຜນຍຸດທະສາດ, ນະໂຍບາຍ, ແຜນດໍາເນີນງານ, ແຜນງົບປະມານ ແລະ ແຜນດໍາເນີນທຸລະກິດປະຈໍາປີ, ແຜນກນປັບປຸງການຈັດຕັ້ງ, ບຸກຄະລາກອນຫຼັກແຫຼ່ງ;
- ກໍານົດຈຸດປະສົງ ການດໍາເນີນງານຂອງວິສາຫະກິດ ແລະ ຄະນະອໍານວຍການ ພ້ອມທັງຕິດຕາມ, ກວດກາຜົນການປະຕິບັດງານ;
- ຄວບຄຸມການໃຊ້ຈ່າຍເງິນທຶນ ຫຼື ການລົງທຶນ, ການຖືກໍາມະສິດຂອງຊັບສິນ ແລະ ປັບປຸງໂຄງສ້າງ ຫຼື ການຂາຍກິດຈະການ;
- ລາຍງານ ຂໍທິດຊີ້ນໍາຈາກຂະແໜງການຂອງລັດ, ຜູ້ຖືຮຸ້ນ ທີ່ແຕ່ງຕັ້ງຕົນໄປປະຕິບັດໜ້າທີ່ໃນສະພາບໍລິຫານ ຂອງລັດວິສາຫະກິດ.
ຂ. ການປະຕິບັດຫຼັກການບໍລິຫານບໍລິສັດທີ່ດີ (Corporate Governance)
- ຕິດຕາມ, ກວດກາປະສິດທິພາບຂອງການປະຕິບັດວຽກງານຕາມຫຼັກການບໍລິຫານບໍລັດທີ່ດີ ແລະ ປັບປ່ຽນຕາມສະພາບຄວາມປັນຈິງຢ່າງເໝາະສົມ;
- ຕິດຕາມ, ກວດກາ ແລະ ແກ້ໄຂບັນຫາຜົນປະໂຫຍດແອບແຝງທີ່ອາດມີພາຍໃນຄະນະອໍານວຍການ, ສະມາຊິກສະພາບໍລິຫານ ແລະ ຜູ້ຖືຮຸ້ນ ເພື່ອຮັບປະກັນຄວາມສາມັກຄີ;
- ປະເມີນຜົນງານປະຈໍາປີກ່ຽວກັບການປະຕິບັດວຽກງານຂອງສະພາບໍລິຫານ;
- ສົ່ງເສີມວັດທະນະທໍາຂອງອົງກອນ ດ້ວຍການປູກຈິດສໍານຶກໃຫ້ພະນັກງານປະຕິບັດໜ້າທີ່ບົນພື້ນຖານຈັນຍາບັນ, ຈັນຍາທໍາ ແລະ ການບໍລິຫານບໍລິສັດທີ່ດີ (Corporate Governance), ມີຄວາມື່ສັດ ແລະ ໂປ່ງໃສ.
ຄ. ການຄຸ້ມຄອງທາງດ້ານການເງິນ ແລະ ການດໍາເນີນງານ
- ຮັບປະກັນໃຫ້ລັດວິສາຫະກິດມີລະບົບການບໍລິຫານຄຸ້ມຄອງທີ່ເໝາະສົມ ໂດຍສະເພາະແມ່ນ ການຄຸ້ມຄອງທາງດ້ານການເງິນ, ການບໍລິຫານຈັດການຄວາມສ່ຽງ ແລະ ການປະຕິບັດຕາມກົດໝາຍ ແລະ ລະບຽບຫຼັກການ ທີ່ກ່ຽວຂ້ອງ;
- ທົບທວນ ແລະ ຮັບຮອງເອົາຜັງບັນຊີ, ລະບົບການຖືບັນຊີ, ການເງິນ ແລະ ບົດລາຍງານການເງິນປະຈໍາໄຕມາດ, ປະຈໍາປີຂອງລັດວິສາຫະກິດ;
ງ. ຄ່າຕອບແທນຂອງສະພາບໍລິຫານ
ຮັບປະກັນໃຫ້ການກໍານົດນະໂຍບາຍ ແລະ ຄ່າຕອບແທນການດໍເນີນງານຂອງສະພາບໍລິຫານ ເບ້ຍປະຊຸມ ຫຼື ເງິນອຸດໜູນອື່ນໆ) ທີ່ເໝາະສົມ, ບໍ່ກະທົບ ແລະ ສອດຄ່ອງກັບຜົນປະໂຫຍດໃນໄລຍະຍາວ ຂອງລັດວິສາຫະກິດ ແລະ ຜູ້ຖືຮຸ້ນຂອງລັດວິສາຫະກິດ;
ຈ. ການຈັດຫາ, ຄັດເລືອກ ແລະ ກໍ່ສ້າງຜູ້ບໍລິຫານສືດທອດ
- ຄັດເລືອກ, ຕິດຕາມ, ກວດກາ ແລະ ສັບຊ້ອນ ຜູ້ບໍລິຫານທີ່ມີຕໍາແໜ່ງສໍາຄັນເພື່ອປ່ຽນແທນ;
- ປະສານງານ ກັບ ພາກລັດ ກ່ຽວກັບການຮັບສະໝັກ, ການຄັດເລືອກ ແລະ ການແຕ່ງຕັ້ງສະມາຊິກສະພາບໍລິຫານ ແລະ ຄະນະອໍານວຍການ;
- ປະສານສົມທົບກັບກະຊວງການເງິນ (ຫຼື ຜູ້ຖືຮຸ້ນ) ໃນການຈັດຫາ, ການຄັດເລືອກສະມາຊິກໃໝ່ຂອງສະພາບໍລິຫານຢ່າງຖືກຕ້ອງຕາມຂັ້ນຕອນ ແລະ ມາດຕະຖານ ເງື່ອນໄຂທີ່ໄດ້ກໍານົດ;
- ກໍານົດວາງແຜນການກໍ່ສ້າງຜູ້ບໍລິຫານການສືດທອດ ແລະ ພະນັກງານຫຼັກແຫຼ່ງ;
- ຮັບປະກັນໃຫ້ການປະສານສົມທົບກັບກະຊວງການເງິນ (ຫຼື ຜູ້ຖືຮຸ້ນ) ຢ່າງເປັນປົກກະຕິ;
- ນໍາໃຊ້ສິດ ເພື່ອປະຕິບັດໜ້າທີ່ອື່ນ ຕາມການມອບໝາຍຂອງລັດ ຫຼືກອງປະຊຸມຜູ້ຖືຮຸ້ນ ແລະ ກົດລະບຽບຂອງວິສາກິດ.
ມາດຕາ 13 ໜ້າທີ່ຂອງປະທານສະພາບໍລິຫານ
- ນໍາພາ-ຊີ້ນໍາການດໍາເນີນງານຂອງສະພາບໍລິຫານ;
- ຊີ້ແນະ ແລະ ໃຫ້ຄໍາປຶກສາ ແກ່ຜູ້ອໍານວຍການ;
- ຮັບປະກັນໃຫ້ສະມາຊິກສະພາບໍລິຫານມີມາດຕະຖານທາງດ້ານຄວາມຊື່ສັດ, ຄວາມທ່ຽງທໍາ ແລະ ປະຕິບັດຫຼັກການລິຫານບໍລິສັດທີ່ດີ (Corporate Governance);
- ສະເໜີຕໍ່ກະຊວງການເງິນ (ຫຼື ກອງປະຊຸມຜູ້ຮຸ້ນ) ເພື່ອຈັດຝຶກອົບຮົມ ໃຫ້ສະມາຊິກສະພາບໍລິຫານມີຄວາມຮູ້ພື້ນຖານທີ່ຈໍາເປັນກ່ຽວກັບວຽກງານການເງິນບການບັນຊີ;
- ສະເໜີແຕ່ງຕັ້ງ ຄະນະກໍາມະການດ້ານຕ່າງໆ ທີ່ຈໍາປັນຂອງສະພາບໍລິຫານ;
- ຮັບປະກັນໃຫ້ມາຊິກສະພາບໍລິຫານໄດ້ຖືກປະເມີນຜົນຢ່າງໜ້ອຍໜຶ່ງຄັ້ງຕໍ່ປີ;
- ກໍານົດວາລະ ສໍາລັບກອງປະຊຸມ ແລະ ການມີສ່ວນຮ່ວມໃນກາປຶກສາຫາລືໃນກອງປຊຸມຂອງສະພາບໍລິຫານ;
- ເປັນປະທານກອປະຊຸມສະພາບໍລິຫານ ແລະ ໃນກໍລະນີຂອງລັດວິສາຫະກິດທີ່ລັດຮ່ວມທຶນກັບ ພາກສ່ວນອື່ນ ແມ່ນອາດຖືກເລືອກເປັນທັງປະທານກອງປະຊຸມຜູ້ຖືຮຸ້ນ, ຊີ້ນໍາການດໍາເນີນກອງປະຊຸມໃຫ້ມີປະສິດທິພາບ, ຈັດສັນເວລາປະຊຸມຢ່າງພຽງພໍໃນການຄົ້ນຄວ້າ ພິຈາລະນາບັນຫາສໍາຄັນຢ່າງຮອບຄອບພ້ອມທັງມີສ່ວນຮ່ວມໃນການປຶກສາຫາລືໃນທີ່ປະຊຸມ, ດໍາເນີນກອງປະຊຸມຕາມລະບຽບວາລະທີ່ໄດ້ກໍານົດ ແລະ ຕາມກົດລະບຽບຂອງລັດວິສາຫະກິດ;
- ໃນກໍລະນີຂອງປະທານສະພາບໍຫານທີ່ປະຈໍາການ ແມ່ນຈະໄດ້ຖືກແຕ່ງຕັ້ງເປັນລຂາຄະນະພັກຮາກຖານ ຫຼື ໜ່ວຍພັກ ຂອງລັດວິສາຫະກິດ ທີ່ຂຶ້ນກັບອົງຄະນະພັກຂອງຂະແໜງການກ່ຽວຂ້ອງ ທີ່ວິສາຫະກິດຂຶ້ນກັບ ແລະ ໄດ້ຮັບນະໂຍບາຍດ້ານຕ່າງໆ ຕາມກດລະບຽບຂອງພັກ ແລະ ຂອງລັດວິສາຫະກິດ;
- ມີສິດ ແລະ ໜ້າທີ່ພິຈາລະນາຮັບຮອງເອົາການສະເໜີແຕ່ງຕັ້ງ ຫຼື ປົດຕໍາແໜ່ງຜູ້ອໍານວຍການຂອງລັດວິສາຫະກິດ ຕາມການຄົ້ນຄວ້າ ຂອງກະຊວງານເງິນ.
ມາດາ 14 ຄະນະກໍາມະການພາຍໃນຂອສະພາບໍລິຫານ
ສະພາບໍລິຫານຂອງລັດວິສາຫະກິດ ຂະໜາດກາງ ແລະ ໃຫຍ່ທີ່ມີເງື່ອນໄຂຄົບຖ້ວນ ຕ້ອງສ້າງຕັ້ງຄະນະກໍາມະການເພື່ອຊ່ວຍລົງເລິກ ຄົ້ນຄວ້າ ຫຼື ນໍາພາ-ຊີ້ນໍາວຽກງານດ້ານຕ່າງໆດັ່ງລຸ່ມນີ້:
- ຄະນະກໍາມະການວຽກງານຄຸ້ມຄອງບໍລິຫານ;
- ຄະນະກໍາມະການກວດກາພາຍໃນ;
- ຄະນະກໍາມະການວຽກງານຄຸ້ມຄອງຄວາມສ່ຽງ;
- ຄະນະກໍາມະການວຽກງານຈັດຫາຜູ້ບໍລິຫານ ແລະ ກໍານົດຄ່າຕອບແທນ;
- ຄະນະກໍາມະການວຽກງານບໍລິຫານບໍລິສັດທີ່ດີ (Corporate Governance).
ຄະນະກໍາມະການດ້ານອື່ນໆ ຕາມເງື່ອນໄຂ, ຄວາມຈໍາເປັນ ແລະ ເໝາະສົມ. ແຕ່ລະຄະນະກໍາມະການປະກອບມີສະມາຊິກສະພາບໍລິຫານ ສາມ ຫາ ຫ້າ ຄົນ. ໃນກໍລະນີ ທີ່ບໍ່ພຽງພໍ ສາມາດເອົາຄະນະອໍານວຍການ ຫຼື ວ່າຈ້າງກໍາມະການອິດສະຫຼະ ມາຈາກພາຍນອກ ເພື່ອປະກອບເຂົາໃນຄະນະກໍາມະການຕ່າງໆໄດ້ ຊຶ່ງແຕ່ລະຄະນະມີສະມາຊິກສະພາບໍລິຫານເປັນຫົວໜ້າຄະນະ, ຄະນະອໍານວຍການເປັນຮອງ, ສະມາຊິກສະພາບໍລິຫານ ຫຼື ກໍາມະການຜູ້ໜຶ່ງສາມາດສັງກັດຢູ່ຫຼາຍຄະນະກໍາມະການ ແຕ່ສາມາດເປັນຫົວໜ້າຄະນະໄດ້ພຽງຄະນະດຽວ.
ມາດຕາ 15 ໜ້າທີ່ ຂອງຄະນະກໍາມະການວຽກງານຄຸ້ມຄອງບໍລິຫານ
ຄະນະກໍາມະການວຽກງານຄຸ້ມຄອງບໍລິຫານ ມີໜ້າທີ່ ດັ່ງນີ້:
- ຄົ້ນຄວ້າສ້າງວິໄສທັດ, ແຜນຍຸດທະສາດ, ນະໂຍບາຍ, ເປົ້າໝາຍ ແລະ ແຜນການດໍາເນີນທຸລະກິດລວມທັງວິທີການແບ່ງປັນເງິນປັນຜົນ ເພື່ອສະເໜີຕໍ່ປະທານສະພາບໍລິຫານ ແລະ ກອງປະຊຸມຜູ້ຖືຮຸ້ນພິຈາລະນາຮັບຮອງ;
- ຕິດຕາມ, ກວດກາ ການຈັດຕັ້ງປະຕິບັດນະໂຍບາຍ ແລະ ນິຕິກໍາຕ່າງໆ ທີ່ໄດ້ກໍານົດໄວ້ ໃຫ້ບັນລຸຕາມຈຸດປະສົງ ເປົ້າໝາຍຂອງວິສາຫະກິດ ຢ່າງມີປະສິດທິພາບ.
- ຄົ້ນຄວ້າ ພິຈາລະນາ ວິເຄາະວິໄຈບັນຫາຕ່າງໆໃນວຽກງານບໍລິຫານ ທີ່ຈະນໍາສະເໜີຕໍ່ປະທານສະພາບໍລິຫານ ເພື່ອພິຈາລະນາອະນຸມັດ.
- ພິຈາລະນາການນໍາສະເໜີແຜນການໃຊ້ຈ່າຍງົບປະມານ ເພື່ອຮັບໃຊ້ວຽກລິຫານການດໍາເນີນງານປະຈໍາວັນ, ການຈັດຊື້ ຈັດຈ້າງ ຫຼື ເຊົ່າ-ເຊົ່າຊື້ ແລະ ການລົງທຶນຂອງລັດວິສາຫະກິດ ຕາມຂອບເຂດສິດຂອງຕົນ ໃນຈໍານວນວົງເງິນທີ່ໄດ້ກໍານົດ;
- ຊີ້ນໍາຄະນະອໍານວຍການຄົ້ນຄວ້າ ແລະ ປະກອບຄໍາເຫັນ ຕໍ່ຮ່າງສັນຍາຮ່ວມທຶນ, ສັນຍາເຊົ່າ ແລະ ຮ່າງສັນຍາຕ່າງໆ ລວມທັງກົດລະບຽບພາຍໃນວິສາຫະກິດລັດລົງທຶນ; ການກູ້ ຫຼື ການຂໍສິນເຊື່ອກັບ ສະຖາບັນການເງິນເພື່ອສະເໜີຕໍ່ປະທານສະພາບໍລິຫານ ແລະ ກອງປະຊຸມຜູ້ຖືຮຸ້ນພິຈາລະນາຮັບຮອງ ເພື່ອນໍາສະເໜີຕໍ່ສະຖາບັນການເງິນຄົ້ນຄວ້າ ພິຈາລະນາອະນຸມັດ;
- ພິຈາລະນາຮັບຮອງເອົາສັນຍາປະເພດຕ່າງໆ ຕາມການສະເໜີຂອງຄະນະອໍານວຍການ;
- ຄົ້ນຄວ້າສ້າງແຜນການລົງທຶນປະຈໍາປີ, ການເພີ່ມທຶນ ຫຼື ການຫຼຸດທຶນ, ການຄວບຄຸມ, ການສ້າງຕັ້ງ, ການຍຸບເລີກວິສາຫະກິດ ຫຼື ສາຂາ, ໜ່ວຍບໍລິການ ແລະ ຫ້ອງການຜູ້ຕາງໜ້າ ຂອງລັດວິສາຫະກິດ ທັງພາຍໃນ ແລະ ຕ່າງປະເທດ. ການຊື້-ຂາຍໂອນຮູ້ ຫຼື ກິດຈະການທັງໝົດ ຫຼື ບາງສ່ວນ, ກໍານົດການປະກອບທຶນ ແລະ ອັດຕາສ່ວນທາງການເງິນທີ່ສໍາຄັນເພື່ອສະເໜີປະທານສະພາບໍລິຫານ ແລະ ກອງປະຊຸມຜູ້ຖືຮຸ້ນພິຈາລະນາຮັບຮອງ;
- ປະຕິບັດໜ້າທີ່ອື່ນຕາມການມອບໝາຍ ຂອງສະພາບໍລິຫານ.
ມາດຕາ 16 ໜ້າທີ່ຂອງຄະນະກໍາມະການຄຸ້ມຄອງຄວາມສ່ຽງ
- ຄົ້ນຄວ້າ ພິຈາລະນາ ວິເຄາະວິໄຈ ເພື່ອລະບຸຄວາມສ່ຽງ ແລະ ແຫຼ່ງທີ່ມາຂອງຄວາມສ່ຽງໂດຍລວມຂອງວິສາຫະກິດ ຊຶ່ງກວມເອົາຄວາມສ່ຽງປະເພດຕ່າງໆ ໂດຍຈັດລໍາດັບຄວາມສໍາຄັນຂອງຄວາມສ່ຽງ ເປັນຕົ້ນ: ຄວາມສ່ຽງດ້ານການເງິນ, ຄວາມສ່ຽງດ້ານການລົງທຶນ, ດ້ານໂລຈີດສະຕິກ, ການຕະຫຼາດ ແລະ ຄວາມສ່ຽງອື່ນໆ ທີ່ມີຜົນກະທົບຕໍ່ວິສາຫະກິດ ແລະ ອື່ນໆ ເພື່ອນໍາສະເໜີຕໍ່ປະທານສະພາບໍລິຫານພິຈາລະນາຮັບຮອງ;
- ຄົ້ນຄວ້າ ກໍານົດຍຸດທະສາດ ນະໂຍບາຍ ແລະ ລະບຽບຫຼັກການບໍລິຫານຄວາມສ່ຽງຂອງວິສາຫະກິດໃຫ້ສອດຄ່ອງກັບ ບັນດາຄວາມສ່ຽງທີ່ໄດ້ລະບຸ;
- ຄຸ້ມຄອງບໍລິຫານ ແລະ ຈັດການຄວາມສ່ຽງນການດໍາເນີນທຸລະກິດໃຫ້ມີປະສິດທິຜົນ ແລະ ຄວບຄຸມປະລິມານຄວາມສ່ຽງຂອງວິສາຫະກິດໃຫ້ຢູ່ໃລະດັບທີ່ເໝາະສົມ;
- ກໍານົດມາດຕະການທີ່ຈະໃຊ້ໃນການຈັດການຄວາມສ່ຽງໃຫ້ເໝາະສົມກັບສະພາບການປະຈຸບັນ;
- ປະຕິບັດໜ້າທີ່ອື່ນຕາມການມອບໝາຍ ຂອງສະພາບໍລິຫານ.
ມາດຕາ 17 ໜ້າທີ່ຂອງຄະນະກໍາມະການກວດສອບພາຍໃນ
- ຕິດຕາມ, ກວດກາ ການເຄື່ອນໄຫວ ດໍານີນທຸລະກິດ ໂດຍຕິດພັນກັບ ການປະຕິບັດສິດ, ໜ້າທີ່ ແລະ ຄວາມຮັບຜິດຊອບ ຂອງສະພາບໍລິຫານ, ຄະນະອໍານວຍການ, ຜູ້ກວດສອບບັນຊີ, ທີ່ປຶກສາ ແລະ ພະນັກງານຂອງລັດວິສາຫະກິດໃຫ້ດໍາເນີນໄປຢ່າງມີປະສິດທິພາບ, ບັນລຸຈຸດປະສົງ-ເປົ້າໝາຍຂອງລັດວິສາຫະກິດ;
- ຕິດຕາມ, ກວດກາການວາງແຜນຜັງ, ຂອບຂ່າຍລະບົບການຖືບັນຊີ-ການເງິນ, ການເຄື່ອນໄຫວທາງດ້ານບັນຊີ-ການເງິນເພື່ອຮັບປະກັນໃຫ້ມີການຈັດຕັ້ງປະຕິບັດ ໂດຍສອດຄ່ອງກັບມາດຕະຖານການບັນຊີ ທີ່ກົດໝາຍ ແລະ ລະບຽບການກໍານົດ, ມີການລາຍງານທາງການເງິນຢ່າງຖືກຕ້ອງ, ຄົບຖ້ວນພຽງພໍ ແລະ ສາມາດເປີດເຜີຍໄດ້;
- ກວດກາລັດວິສາຫະກິດເພື່ອຮັບປະກັນໃຫ້ມີລະບົບການຄວບຄຸມ ແລະ ກວດສອບພາຍໃນທີ່ເໝາະສົມ ແລະ ມີປະສິດທິພາບ;
- ຕິດຕາມ, ກວດກາເພື່ອຮັບປະກັນໃຫ້ປະຕິບັດກົດໝາຍ ແລະ ລະບຽບການທີ່ກ່ຽວຂ້ອງຕ່າງໆ, ຫຼັກການບໍລິຫານບໍລິສັດທີ່ດີ, ຈັນຍາບັນ, ຈັນຍາທໍາ ແລະ ຄວາມໂປ່ງໃສໃນການເຄື່ອນໄຫວດໍາເນີນທຸລະກິດຂອງລັດວິສາຫະກິດ ເປັນຕົ້ນ: ກົດໝາຍວ່າດ້ວຍສາຫະກິດ, ກົດໝາຍ, ລະບຽບການອື່ນທີ່ກ່ຽວຂ້ອງ ແລະ ຄໍາແນະນໍາະບັບນີ້; ປະຕິບັດພັນທະດ້ານພາສີ, ອາກອນ, ການໃຊ້ຈ່າຍບໍລິຫານ, ເງິນເດືອນ-ຄ່າແຮງງານ, ເງິນນະໂຍບາຍ, ເງິນອຸດໜູນແລະ ອື່ນໆ;
- ຕິດຕາມ, ກວດກາ ການຈັດຕັ້ງປະຕິບັດມະຕິ ກອງປະຊຸມສະພາບໍລິຫານ, ກອງປະຊຸມຜູ້ຖືຮຸ້ນ, ຄໍາສັ່ງ ແລະ ຂໍ້ຕົກລົງຂອງສະພາບໍລິຫານ;
- ພິຈາລະນາບັນຫາທີ່ພົວພັນ ຫຼື ອາດມີຄວາມຂັດແຍ່ງດ້ານຜົນປະໂຫຍດ ໃຫ້ສອດຄ່ອງກັບກົດໝາຍ ແລະ ລະບຽບການ;
- ປະຕິບັດໜ້າທີ່ອື່ນຕາມການມອບໝາຍ ຂອງສະພາບໍລິຫານ.
ມາດຕາ 18 ໜ້າທີ່ຂອງຄະນະກໍາມະການວຽກງານຈັດຫາຜູ້ບໍລິຫານ ແລະ ກໍານົດຄ່າຕອແທນ
ຄະນະກໍາມະການວຽກງານຈັດຫາ ແລະ ກໍານົດຄ່າຕອບແທນ ມີສິດ ແລະ ໜ້າທີ່ເປັນຕົ້ນດັ່ງນີ້:
- ຄົ້ນຄວ້າ ພິຈາລະນາ, ກໍານົດນະໂຍບາຍ, ຫຼັກການ ວິທີການ ໃນການຄັດເລືອກສະມາຊິກສະພາບໍລິຫານ, ຄະນະອໍານວຍການ, ຜູ້ກວດສອບບັນຊີ, ທີ່ປຶກສາ ແລະ ລວມທັງດໍາເນີນການສັນຫາ, ຄັດເລືອກເອົາບຸກຄົນດັ່ງກ່າວ ແລະ ສະເໜີຊື່ຜູ້ທີ່ມີຄຸນວຸນທິເໝາະສົມ ຕາມມາດຕະຖານ ແລະ ເງື່ອນໄຂທີ່ກໍານົດໄວ້ໂດຍຄໍານຶງເຖິງຄວາມຮູ້, ຄວາມສາມາດ, ປະສົບການ ແລະ ມີປະຫວັດທີ່ດີ ເປັນຫຼັກ ເພື່ອນໍາສະເໜີຕໍ່ກອງປະຊຸມຜູ້ຖືຮຸ້ນ ພິຈາລະນາແຕ່ງຕັ້ງ,
- ຄົ້ນຄວ້າ ພິຈາລະນາ, ທົບທວນ ນະໂຍບາຍ ແລະ ລະບຽບຫຼັກການກ່ຽວກັບການກໍານົດຄ່າຕອບແທນ ແລະ ຜົນປະໂຫຍດອື່ນ ໃຫ້ສອດຄ່ອງກັບກົດໝາຍ ແລະ ລະບຽບການກ່ຽວຂ້ອງກໍານົດ ໃຫ້ສະມາຊິກສະພາບໍລິຫານ, ຄະນະອໍານວຍການ, ຊ່ຽວຊານ ທີ່ປຶກສາ ແລະ ພະນັກງານ ເພື່ອສະເໜີຕໍ່ກອງປະຊຸມສະພາບໍລິຫານ ແລະ ກອງປະຊຸມຜູ້ຖືຮຸ້ນ ພິຈາລະນາຮັບຮອງ ແລະ ໃຫ້ມີການທົບທວນທຸກປີ;
- ຄົ້ນຄວ້າສ້າງແຜນເບີກຈ່າຍເງິນເດືອນ, ເງິນອຸດໜູນ, ເງິນນະໂຍບາຍ, ເງິນບໍລິຫານ, ເບ້ຍປະຊຸມ, ບໍາເນັດປະຈໍາປີ ຂອງສະພາບໍລິຫານ, ຄະນະອໍານວຍການ, ພະນັກງານ-ກໍາມະກອນ, ຄ່າຈ້າງຜູ້ກວດສອບບັນຊີ ແລະ ທີ່ປຶກສາໃຫ້ສອດຄ່ອງຕາມກົດໝາຍ ແລະ ລະບຽບກນກໍານົດເພື່ອສະເໜີຕໍ່ກອງປະຊຸມຜູ້ຖືຮຸ້ນພິຈາລະນາຮັບຮອງ.
- ປະຕິບັດໜ້າທີ່ອື່ນຕາມການມອບໝາຍ ຂອງສະພາບໍລິຫານ.
ມາດຕາ 19 ໜ້າທີ່ຂອງຄະນະກໍາມະການວຽກງານການບໍລິຫານໍລິສັດທີ່ດີ
ຄົນຄວ້າ, ກໍານົດຮ່າງນະໂຍບາຍ ແລະ ລະບຽບຫຼັກການກ່ຽວກັບ ຫຼັກການບໍລິຫານບໍລິສັດທີ່ດີ (Corporate Governance Policy) ຂອງວິສາຫະກິດໃຫ້ສອດຄ່ອງກັບກົດໝາຍ ແລະ ລະບຽບການທີ່່ກ່ຽວຂ້ອງເປັນຕົ້ນ: ນິຕິກໍາ ແລະ ລະບຽບຫຼັກການ ທີ່ສໍານັກງານຄະນະກໍາມະການຄຸ້ມຄອງຫຼັກຊັບ, ຕະຫຼາດຫຼັກຊັບ, ກະຊວງການເງິນ ແລະ ກະຊວງກ່ຽວຂ້ອງ ໄດ້ກໍານົດ ລວມທັງແນວທາງ ແລະ ຫຼັກການບໍລິຫານກິດຈະການທີ່ດີ ຕາມມາດຕະຖານສາກົນ ເພື່ອນໍາສະເໜີຕໍ່ກອງປະຊຸມຜູ້ຖືຮຸ້ນ ພິຈາລະນາຮັບຮອງ ດັ່ງນີ້:
- ຄຸ້ມຄອງ ແລະ ຊຸກຍູ້ ສົ່ງເສີມ ສະມາຊິກສະພາບໍລິຫານ ແລະ ຄະນະອໍານວການ ໃນການປະຕິບັດໜາທີ່ວຽກງານ ແລະ ຄວາມຮັບຜິດຊອບຂອງຕົນ ຕາມຂອບ ແລະ ລະບຽບຫຼັກການຂອງນະໂຍບາຍການບໍລິຫານບໍລິສັດທີ່ດີ ຢ່າງເຂັມງວດ;
- ພິຈາລະນາ ທົບທວນ ແລະ ປັບປຸງນະໂຍບາຍ, ລະບຽບຫຼັກການບໍລິຫານບໍລິສັດທີ່ດີ ຢ່າງເປັນປົກກະຕິ ຢ່າງໜ້ອຍ ໜຶ່ງຄັ້ງຕໍ່ປີ ເພື່ອໃຫ້ທັນສະໄໝ ແລະ ສອດຄ່ອງກັບແນວທາງຂອງພັກ ແລະ ປະຕິບັດຕາມາດຕະຖານສາກົນ;
- ຕິດຕາມ ແລະ ປະເມີນຜົນການປະຕິບັດໜ້າທີ່ຂອງສະມາຊິກສະພາບໍລິຫານ ແລະ ຄະນະອໍານວຍການ ຕາມແນວທາງການປະຕິບັດທີ່ດີ ທີ່ໄດ້ກໍານົດໄວ້ໃນນະໂຍບາຍ ແລະ ລະບຽບຫຼັກການ ການລິຫານບໍລິສັດທີ່ດີຂອງວິສາຫະກິດ ຢ່າງເປັນປົກກະຕິ ຢ່າງໜ້ອຍປີລະຄັ້ງ;
- ປະຕິບັດວຽງານອື່ນ ຕາມການມອບໝາຍ.
ມາດຕາ 20 ການເລືອກຕັ້ງ ຫຼື ປົດຕໍາແໜ່ງ ແລະ ການປ່ຽນແທນສະມາຊິກສະພາບໍລິຫານ
ສະມາຊິກສະພາບໍລິຫານ ເມື່ອຄົບອາຍຸການ ສາມປີ, ກະຊວງການເງິນ ຫຼື ກອງປະຊຸມຜູ້ຖືຮຸ້ນ (ໃນກໍລະນີລັດວິສາຫະກິດຮ່ວມທຶນ ກັບ ພາກສ່ວນອື່ນ) ເປັນຜູ້ພິຈາລະນາແຕ່ງຕັ້ງ ຫຼື ປົດຕໍາແໜ່ງສະມາຊິກສະພາບໍລິຫານ ສະມາຊິກສະພາບໍລິຫານຊຸດເກົ່າສາມາດໄດ້ຮັບການພິຈາລະນາແຕ່ງຕັ້ງ ຄືນໃໝ່ໄດ້ອີກໜຶ່ງສະໄໜ ຖ້າມີຜົນການດໍາເນີນງານທີ່ດີ ແຕ່ການແຕ່ງຕັ້ງຄືນໃໝ່ນີ້ ຄວນຜ່ານຂັ້ນຕອນການປະເມີນຜົນງານ ໂດຍກະຊວງການເງິນ (ໃນກໍລະນີຂອງລັດວິສາຫະກິດທີ່ລັດຖືຮຸ້ນຮ້ອຍສວນຮ້ອຍ) ຫຼື ໂດຍກອງປະຊຸມຜູ້ຖືຮຸ້ນ ( ໃນກໍລະນີຂອງລັດວິສາຫະກິດຮ່ວມທຶນກັບພາກສ່ວນອື່ນ).
ສໍາລັບສະມາຊິກສະພາບໍລິຫານທີ່ມາຈາກລັດ ແມ່ນກະຊວງການເງິນເປັນຜູ້ແຕ່ງຕັ້ງ ຫຼື ປົດ ຕໍາແໜ່ງ ສະມາຊິກສະພາບໍລິຫານ ແມ່ນປັນຜູ້ຕາງໜ້າໃຫ້ລັດຖະບານ ຫຼື ອາດເປັນທັງຜູ້ຕາງໜ້າຂະແໜງການທີ່ລັດວິສາຫະກິດນັ້ນຂຶ້ນກັບ.
ບຸກຄົນໜຶ່ງ ສາມາດຖືກແຕ່ງຕັ້ງໃຫ້ເປັນສະມາຊິກ ຫຼື ກໍາມະການສະພາບໍລິຫານຂອງລັດວິສາຫະກິດໄດ້ບໍ່ເກີນ ສາມ ວິສາຫະກິດ ແລະ ບໍ່ແມ່ນວິສາຫະກິດທີ່ເຄື່ອນໄຫວດໍານີນທຸລະກິດ ທີ່ມີລັກສະນະຄ້າຍຄືກັນ.
ສະມາຊິກສະພາບໍລິຫານຈະຖືກປົດໃນກໍລະນີໃດໜຶ່ງ ດັ່ງນີ້:
- ບໍ່ສາມາດປະຕິບັດໜ້າທີ່ສໍາເລັດຕາມທີ່ໄດ້ຮັບມອບໝາຍ ຫຼື ດໍາເນີນທຸລະກິດຂາດປະສິດທິພາບ 2 ປີ ລຽນຕິດ ໂດຍບໍ່ມີເຫດຜົນຢັ້ງຢືນພຽງພໍ ກ່ຽວກັບສາເຫດຂອງການຂາດທຶນດັ່ງກ່າວ;
- ບໍ່ມີຄວາມຮັບຜິດຊອບໃນການປະຕິບັດໜ້າທີ່ ຫຼື ສວຍໃຊ້ອໍານາດໜ້າທີ່ເພື່ອສ້າງຜົນປະໂຫຍດໃຫ້ແກ່ຕົນເອງ, ຍາດພີ່ນ້ອງ ຫຼື ໃຫ້ແກ່ຄົນອື່ນ, ລາຍງານບໍ່ຖືກຄວາມຈິງກ່ຽວກັບວຽກງານທີ່ຢູ່ໃນຄວາມຮັບຜິດຊອບຂອງຕົນ;
- ຖືກສານຕັດສິນລົງໂທດຕັດອິດສະຫຼະພາບ;
- ມີບັນຫາທາງດ້ານສຸຂະພາບທີ່ພາໃຫ້ບໍ່ສມາດປະຕິບັດໜ້າທີ່ ຫຼື ເສຍຊີວິດ;
- ຕາມການຕົກລົງຂອງກະຊວງການເງິນ ຫຼື ຜູ້ຖືຮຸ້ນ.
ເມື່ອສະມາຊິກສະພາບໍລິຫານຖືກປົດຕໍາແໜ່ງຕາມກໍລະນີຂ້າງເທິງນີ້ ກະຊວງການເງິນ (ຫຼື ໃນກໍລະນີຂອງລັດວິສາຫະກິດທີ່ລັດຮ່ວມທຶນ ກັບ ພາກ່ວນອື່ນ ແມ່ນກອງປະຊຸມຜູ້ຖືຮຸ້ນ) ພິຈາລະນາແຕ່ງຕັ້ງສະມາຊິກສະພາບໍລິຫານຜູ້ໃໝ່ປ່ຽນແທນ. ສໍາລັບສະມາຊິກສະພາບໍລິຫານທີ່ມາຈາກພາກລັດ ແມ່ນລັດຖະມົນຕີກະຊວງການເງິນເປັນຜູ້ແຕ່ງຕັ້ງ.
ມາດຕາ 21 ພາລະບົດບາດຂອງສະພາບໍລິຫານໃນໄລຍະດໍາເນີນຂະບວນກນປະຕິຮູບລັດວິສາຫະກິດ
ໃນກໍລະນີທີ່ລັດຖະບານ ມີແຜນການປັບປຸງໂຄງສ້າງ, ການຫັນ ຫຼື ການປະຕິຮູບລັດວິສາຫະກິດໄປສູ່ຮູບການອື່ນ, ລັດຖະບານອາດຈະແຕ່ງຕັ້ງສະພາບໍລິຫານ ແລະ ຄະນະອໍານວຍການຊົ່ວຄາວໃນໄລຍະຂ້າມຜ່ານດັ່ງກ່າວ, ລັດຖະບານຈະກໍານົດບັນດາໜ້າວຽກສໍາລັບສະພາບໍລິຫານໃນໄລຍະຂ້າມຜ່ານໜຶ່ງຈະລະບຸຈຸດປະສົງຂອງກາຫັນວິສາຫະກິດໄປສູ່ຮູບການໃດໜຶ່ງ. ສັນຍາການວ່າຈ້າງ ແລະ ນະໂຍບາຄ່າຕອບແທນ ຂອງສະມາຊິກສະພາບໍລິຫານຜູ້ປະຈໍາການ ແລະ ຄະນະອໍານວຍການຊົ່ວຄາວຈະຕ້ອງໄດ້ຖືກກໍານົດຢ່າງຈະແຈ້ງ.
ມາດຕາ 22 ການາງແຜນານກໍ່ສ້າງຜູ້ບໍລິຫານສືບທອດ
ເມື່ອຄົບກໍານົດວາລະແລ້ວ, ສະມາຊິກສະພາບໍລິຫານ ຈະຕ້ອງໄດ້ຖືກປ່ຽນແທນ ຊຶ່ງແມ່ນວຽກຂອງສະພາບໍລິຫານໃນການຄົ້ນຄວ້າພັດທະນາແຜນການກໍ່ສ້າງຜູ້ບໍລິຫານ ສືບທອດ ໂດຍການດໍາເນີນການຈັດຝຶກອົບຮົມໃຫ້ສະມາຊິກສະພາບໍລິຫານ, ຄະນະອໍານວຍການ ແລະ ພະນັກງານຫຼັກແຫຼ່ງ ຂອງລັດວິສາຫະກິດ.
ຄວນມີການພັດທະນາບັນຊີລາຍຊື່ຜູ້ສະໝັກ ເພື່ອຄັດເລືອກເອົາສະມາຊິກສະພາບໍລິຫານ ຈາກພາຍໃນ ແລະ ພາຍນອກ. ການຄັດເລືອກຮອບສຸດທ້າຍຈະພິິຈາລະນາເອົາຜູ້ສະໝັກທີ່ມີມາດຕະຖານ ແລະ ເງື່ອນໄຂ ຄົບຖ້ວນທີ່ສຸດ ເພື່ອນໍາພາລັດວິສາຫະກິດໃຫ້ບັນລຸເປົ້າໝາຍ ໃນໄລຍະຍາວທີ່ສະພາບໍລິຫານກໍ່ຄືຜູ້ຖືຮຸ້ນ ຫຼື ລັດຖະບານໄດ້ກໍານົດ.
ມາດຕາ 23 ເງິນເດືອນ, ເບ້ຍປະຊຸມ ແລະ ເງິນບໍາເນັດຂອງສະພາບໍລິຫານ
ລັດວິສາຫະກິດ ຕ້ອງກໍານົດຊີ້ວັດປະສິດທິຜົນການດໍາເນີນງານ ເພື່ອປະເມີນຜົນ ຫຼື ວັດແທກການປະຕິບັດງານຂອງສະພາບໍລິຫານ ແລະ ຜູ້ອໍານວຍການ ຊຶ່ງແມ່ນຄະນະກໍາມະການກວດສອບພາຍໃນ ຂອງສະພາບໍລິຫານເປັນຜູ້ກໍານົດ, ຜູ້ອໍານວຍການເປັນຜູ້ານົດຕົວຊີ້ວັດປະສິດທິຜົນການດໍາເນີນງານ ຂອງຄະນະອໍານວຍການ, ຄະນະອໍານວຍການ ເປັນຜູ້ກໍານົດຕົວຊີ້ວັດປະສິດທິຜົນການດໍາເນີນງານຂອງພະນັກງານ-ກໍາມະກອນ ໂດຍອີງຕາມພາລະບົດບາດ, ສິດ, ໜ້າທີ່ ຫຼື ຕໍາແໜ່ງ ແລະ ແຜນວຽກປະຈໍາປີຂອງແຕ່ລະບຸກຄົນ.
ສໍາລັບຕົວຊີ້ວັດປະສິດທິຜົນການດໍາເນີນງານຂອງລັດວິສາຫກິດ ແມ່ນຂະແໜງການເງິນເປັນເຈົ້າການສົມທົບກັບຂະແໜງການກ່ຽວຂ້ອງ ແລະ ວິສາຫະກິດນັ້ນກໍານົດເປັນ ສອງ ປະເພດ ຄື:
- ຕົວຊີ້ວັດປະສິດທິຜົນສະເພາະດ້ານ ແມ່ນການກໍານົດນໍາໃຊ້ສະເພາະວິສາຫະກິດໃດໜຶ່ງຕມຂະແໜງການທີ່ວິສາຫະກິດດໍາເນີນທຸລະກິດ;
- ຕົວຊີ້ວັດປະສິດທິຜົນທົ່ວໄປແມ່ນການກໍານົດນໍາໃຊ້ໄດ້ທົ່ວໄປຂອງທຸກຫົວໜ່ວຍວິສາຫະກິດ ເພື່ອປະເມີນປະສິດທິຜົນການດໍາເນີນທຸລະກິດ ໂດຍອີງຕາມອັດຕາສ່ວນດ້ານການເງິນເປັນຕົວວັດແທກ ເປັນຕົ້ນ: ກໍາໄລສຸດທິພາຍຫຼັງຫັກອາກອນໃນຮູບແບບອັດຕາສ່ວນຮ້ອຍຂອງລາຍຮັບ, ກໍາໄລສຸດທິກ່ອນ ລະ ຫຼັງຫັກອາກອນ ໃນຮູບແບບອັດຕາສ່ວນຮ້ອຍຂອງທຶນຜູ້ຖືຮຸ້ນ, ກໍາໄລສຸດທິກ່ອນ ແລະ ຫຼັງຫັກອາກອນໃນຮູບແບບອັດຕາສ່ວນຮ້ອຍຂອບຊັບສົມບັດຄົງທີ່ ແລະ ບັນດາຕົວວັດແທກອື່ນທີ່ກ່ຽວຂ້ອງ.
(ການກໍານົດຕົວຊີ້ວັດປະສິດທິຜົນການດໍາເນີນງານຂອງລັດວິສາຫະກິດ ມີລະບຽບການສະເພາະ).
ມາດຕາ 25 ກາແຕ່ງຕັ້ງຜູ້ຕາງໜ້າຜູ້ຖືຮຸ້ນ
ຜູ້ຖືຮຸ້ນແຕ່ລະຝ່າຍແຕ່ງຕັ້ງຜູ້ຕາງໜ້າຂອງຕົນ ເພື່ອເປັນຕົວແທນໃນການ ນໍາພາ-ຊີ້ນໍາ, ຕິດຕາມ, ກວດກາກນປະຕິບັດວຽກງານຂອງສະພາບໍລິຫານ;
ກະຊວງການເງິນເປັນຜູ້ແຕ່ງຕັ້ງ ຫຼື ປົດຕໍາແໜ່ງ ຜູ້ຕາງໜ້າຜູ້ຖືຮຸ້ນພາກລັດ ໃນກໍລະນີ ເປັນລັດວິສາຫະກິດຮ່ວມທຶນ ກັບ ພາກສ່ວນອື່ນ);
ເມື່ອຄົບອາຍຸກນສາມປີ ກະຊວງການເງິນເປັນຜູ້ພິຈາລະນາແຕ່ງຕັ້ງ ຫຼື ປົດຕໍາແໜ່ງຜູ້ຕາງໜ້າຜູ້ຖືຮຸ້ນຂອງພາກລັດ. ຜູ້ຕາງໜ້າຜູ້ຖືຮຸ້ນພາກລັດສາມາດໄດ້ຮັບການພິຈາລະນາແຕ່ງຕັ້ງຄືນໃໝ່ໄດ້ອີກໜຶ່ງສະໃໝ ຖ້າມີຜົນງານທີ່ດີ, ແຕ່ການແຕ່ງຕັ້ງຄືນໃໝ່ນີ້ຄວນຜ່ານການປະເມີນຜົນງານ;
ພະນັກງານ ລັດຖະກອນ ທີ່ຈະຖືກແຕ່ງຕັ້ງໄປເປັນ ຜູ້ຕາງໜ້າຜູ້ຖືຮຸ້ນຕ້ອງມີຕໍາແໜ່ງລັດບໍລິຫານ ປະເພດ 3 ຂຶ້ນໄປ.
ມາດຕາ 26 ກອປະຊຸມຜູ້ຖືຮຸ້ນ
ກອງປະຊຸມຜູ້ຖືກຮຸ້ນຂອງລັດວິສາຫະກິດຮ່ວມທຶນ ກັບພາກສ່ວນອື່ນ ທີ່ລັດຖືຮຸ້ນຫຼາຍກວ່າຫ້າສິບສ່ວນຮ້ອຍ ຫາ ເກົ້າສິບສ່ວນຮ້ອຍ ແມ່ນການຈັດຕັ້ງສູງສຸດຂອງໂຄງປະກອບການຈັດຕັ້ງ ຂອງລັດວິສາຫະກິດ ທີ່ລັດຮ່ວມທຶນກັບພາກສ່ວນອື່ນ ຊຶ່ງປະກອບດ້ວຍຜູ້ຕາງໜ້າຜູ້ຖືຮຸ້ນພາກລັດ ແລະ ຜູ້ຖືຮຸ້ນຈາກພາກສ່ວນອື່ນ ເຂົ້າຮ່ວມ;
ກອງປະຊຸມຜູ້ຖືຮຸ້ນ ເປັນເວທີ ທີ່ສໍາຄັນທີ່ຜູ້ຖືຮຸ້ນຈະໄດ້ມີໂອກາດ ປຶກສາຫາລື, ແລກປ່ຽນ ແລະ ຕັ້ງຄໍາຖາມຕໍ່ສະພາບໍລິຫານກ່ຽວກັບຜົນການຈັດຕັ້ງປະຕິບັດແຜນຍຸດທະສາດ, ແຜນທຸລະກິດໃນປີທີ່ຜ່ານມາ ແລະ ຮັບຮອງເອົາແຜນໃໝ່ໃນຕໍ່ໜ້າ;
ກອງປະຊຸມຜູ້ຖືຮຸ້ນ ຕ້ອງໄດ້ມີມະຕິ ແລະ ຈະມີຄຸນຄ່າໃຊ້ໄດ້ກໍຕໍ່ເມື່ອທີສຽງຂອງຜູ້ຖືຮຸ້ນ ຫຼື ຜູ້ຕາງໜ້າຜູ້ຖືຮຸ້ນຢ່າງໜ້ອຍ ສອງສ່ວນສາມ ຂອງຜູ້ເຂົ້າຮ່ວມກອງປະຊຸມ ຊຶ່ງມີຢ່າງໜອຍ ແປດສິບສ່ວນຮ້ອຍ ຂອງຈໍານວນຮຸ້ນທີ່ຖອກລ້ວທັງໝົດ.
ກອງປະຊຸມຜູ້ຖືຮຸ້ນຈັດປີລະຄັ້ງ ຫຼື ຫຼາຍກວ່ານັນໂດຍອີງຕາມກົດລະບຽບຂອງວິສາຫະກິດ ຊຶ່ງເອີ້ນວ່າກອງປະຊຸມສາມັນ ແລະ ຖ້າມີຄວາມຈໍາເປັນຕ້ອງການຈັດປະຊຸມແບບດ່ວນກະທັນຫັນ ກໍຈະຖືເປັນກອງປະຊຸມແບບວິສາມັນ.
ມາດຕາ 27 ໜ້າທີ່ຂອງກອງປະຊຸມຜູ້ຖືຮຸ້ນ
- ພິຈາລະນາຮັບຮອງເອົາແຜນຍຸດທະສາດ, ແຜນການດໍາເນີນທຸລະກິດ, ແຜນງົບປະມານ ແລະ ແຜນການລົງທຶນປະຈໍາປີ ພ້ອມທັງຮັບຮອງເອົາວິທີການແບ່ງປັນເງິນປັນຜົນທ້າຍປີ;
- ພິຈາລະນາຮັບຮອງ ຫຼື ປັບປຸງ ສັນຍາຮ່ວມທຶນ, ສັນຍາສ້າງຕັ້ງ ຫຼື ກົດລະບຽບຂອງວິສາຫະກິດ;
- ພິຈາລະນາຮັບອງເອົາບົດສະຫຼຸບລາຍງານກ່ຽວກັບຜົນການດໍາເນີນທຸລະກິດ, ບົດລາຍງານການເງິນ ແລະ ບົດລາຍງານຜົນການກວດສອບປະຈໍາປີ;
- ພິຈາລະນາຮັບຮອງເອົາແຜນການເພີ່ມທຶນ ຫຼື ການຫຼຸດທຶນ, ການຄວບ, ການສ້າງຕັ້ງ, ການຍຸບເລີກວິສາຫະກິດ, ສາຂາ ຫຼື ໜ່ວຍງານ;
- ພິຈາລະນາຮັບຮອງເອົາ ການຊື້, ຂາຍ, ໂອນຮຸ້ນ ຫຼື ກິດຈະການທັງໝົດ ຫຼື ບາງສ່ວນ, ກໍານົດການປະກອບທຶນ ແລະ ອັດຕາສ່ວນທາງການເງິນທີ່ສໍາຄັນ;
- ພິຈາລະນາຮັບຮອງເອົາແຫຼ່ງທຶນຕາມການສະເໜີຂອງສະພາບໍລິຫານ;
- ພິຈາລະນາຮັບຮອງແຜນເບີກຈ່າຍບໍາເນັດປະຈໍາປີ, ເບ້ຍປະຊຸມ, ເງິນເດືອນຂອງສະພາບໍລິຫານສໍາລັບຜູ້ປະຈໍາການ, ຄະນະອໍານວຍການ, ຄ່າຈ້າງຜູ້ກວດສອບບັນຊີ, ເງິນໃຊ້ຈ່າຍບໍລິຫານ, ເງິນເດືອນ, ເງິນອຸດໜູນ ແລະ ນະໂຍບາຍຂອງພະນັກງານ ຕາມການສະເໜີຂອງສະພາບໍລິຫານ;
- ເລືອກຕັ້ງ ຫຼື ປົດຕໍາແໜ່ງສະພາບໍລິຫານ ແລະ ຄະນະກໍາມະການຂອງສະພາບໍລິຫານ (ຖ້າມີ), ຄະນະອໍານວຍການ, ຜູ້ກວດສອບບັນຊີ ແລະ ການວ່າຈ້າງຊ່ຽວຊານ ເພື່ອຊ່ວຍໃຫ້ຄໍາປຶກສາ ແນະນໍາດ້ານຕ່າງໆ;
- ປະຕິບັດໜ້າທີ່ອື່ນ ຕາມກົດໝາຍ ແລະ ລະບຽບການ.
ມາດຕາ 28 ສາມາຊິກສະພາບໍລິຫານຂັ້ນສູນກາງຄຸ້ມຄອງ:
ການແບ່ງຂັ້ນຄຸ້ມຄອງສະພາບໍລິຫານລັດວິສາຫະກິດ ລະຫວ່າງ ສູນກາງ ແລະ ທ້ອງຖິ່ນ ແມ່ນໃຫ້ແບ່ງຕາມການແບ່ງຂັ້ນຄຸ້ມຄອງລັດວິສາຫະກິດ ລະຫວ່າງ ສູນກາງ ແລະ ທ້ອງຖິ່ນ ດັ່ງນີ້:
- ສະພາບໍລິຫານ ລັດວິສາຫະກິດຂະໜາດໃຫຍ່ ທີ່ມີທີ່ຕັ້ງໃນຂອບເຂດທົ່ວປະເທດ, ຂະໜາດກາງ ແລະ ນ້ອຍ ທີ່ຖືກສ້າງຂຶ້ນໂດຍຂະແໜງການຢູ່ສູນກາງ ແລະ ມີທີ່ຕັ້ງສໍານັກງານໃຫຍ່ຢູ່ ນະຄອນຫຼວງວຽງຈັນ ແມ່ນມອບໃຫ້ກະຊວງການເງິນ ແລະ ຂະແໜງການທີ່ກ່ຽວຂ້ອງຄຸ້ມຄອງ;
ການແຕ່ງຕັ້ງຜູ້ຕາງໜ້າຜູ້ຖືຮຸ້ນ, ປະທານ, ຮອງປະທານ ແລະ ກໍາມະການສະພາບໍລິຫານ ຜູ້ປະຈໍາການ ແລະ ບໍ່ປະຈໍາການ, ຄະນະອໍານວຍການ ຂອງຝ່າຍລັດປະຈໍາຢູ່ລັດວິສາຫະກິດຂະໜາດໃຫຍ່ນັ້ນແມ່ນລັດຖະມົນຕີກະຊວງການເງິນເປັນຜູ້ແຕ່ງຕັ້ງ ຕາມການສະເໜີຂອງຂະແໜງການທີ່ກ່ຽວຂ້ອງ ແລະ ຜ່ານການພິຈາລນາເຫັນດີຈາກຄະນະຈັດຕັ້ງສູນກາງພັກ.
- ສະພາບໍລິຫານ ລັດວິສາຫະກິດ ຂະໜາດນ້ອຍ ແລະ ກາງ ທີ່ຖືກສ້າງຂຶ້ນໂດຍອົງການປົກຄອງທ້ອງຖິ່ນ ແລະ ມີທີ່ຕັ້ງຢູ່ທ້ອງຖິ່ນ ແມ່ນມອບໃຫ້ອໍານາດການປົກຄອງທ້ອງຖິ່ນຄຸ້ມຄອງ;
ການແຕ່ງຕັ້ງຜູ້ຕາງໜ້າຜູ້ຖືຮຸ້ນ, ປະທານ, ຮອງປະທານ ແລະ ກໍາມະການສະພາບໍລິຫານຜູ້ປະຈໍາການ ແລະ ບໍ່ປະຈໍາການ, ຄະນະອໍານວຍການ ຂອງພາກລັດ ປະຈໍາຢູ່ ລັດວິສາຫະກິດຂະໜາດນ້ອຍ ແລະ ກາງ ແມ່ນລັດຖະມົນຕີກະຊວງການເງິນ ຫຼື ເຈົ້າຄອງນະຄອນຫຼວງ, ເຈົ້າແຂວງບ່ອນທີ່ວິສາຫະກິດຂຶ້ນກັບເປັນຜູ້ພິຈາລະນາຕົກລົງແຕ່ງຕັ້ງ, ຍົກຍ້າຍ ຫຼື ປົດຕໍາແໜ່ງຕາມການຄົ້ນຄວ້ານໍາສະເໜີຂອງກົມຄຸ້ມຄອງວສາຫະກິດລັດລົງທຶນ ແລະ ການປະກັນໄພ (ກະຊວງການເງິນ) ຫຼື ຕາມການຄົ້ນຄວ້ານໍາສະເໜີຂອງຫົວໜ້າພະແນກການເງິນ ແລະ ພະແນກການທີ່ກ່ຽວຂ້ອງຢູ່ທ້ອງຖິ່ນ.
ໃນກໍລະນີ ທີ່ພະນັກງານທີ່ມີຕໍາແໜ່ງບໍລິຫານປະເພດ 2 (ຫົວໜ້າກົມ ແລະ ທຽບເທົ່າກົມ) ຂຶ້ນໄປທີ່ເປັນພະນັກງານຂັ້ນສູນກາງຄຸ້ມຄອງ ທີ່ຈະຖືກແຕ່ງຕັ້ງເປັນຜູ້ຕາງໜ້າຜູ້ຖືຮຸ້ນ, ປະທານ, ຮອງປະທານ ແລະ ຜູ້ອໍານວຍການໃຫຍ່ ຂອງລັດວິສາຫະກິດ ໃຫ້ອີງຕາມມະຕິກົມການເມືອງສູນກາງພັກ ສະບັບເລກທີ 031/ກມສພ, ລົງວັນທີ 3 ມັງກອນ 2018 ວ່າດ້ວຍວຽກງານຄຸ້ມຄອງພະນັກງານ, ກະຊວງການເງິນເປັນເຈົ້າການປະສານສົມທົບກັບຂະແໜງການກ່ຽວຂ້ອງ ແລະ ເປັນຜູ້ຄົ້ນຄວ້ານໍາສະເໜີເຖິງຄະນະຈັດຕັ້ງສູນກາງພັກ ເພື່ອພິຈາລະນາ. ພາຍຫຼັງໄດ້ມີແຈ້ງການເຫັນດີຂອງຄະນະຈັດຕັ້ງສູນກາງພັກແລ້ວ, ກະຊວງການເງິນ ຈຶ່ງຄົ້ນຄວ້າອອກຂໍ້ຕົກລົງຂອງລັດຖະມົນຕີແຕ່ງຕັ້ງ ຫຼື ປົດຕໍາແໜ່ງຕາມລະບຽບການ. ຈາກນັ້ນ ຈຶ່ງໃຫ້ສະພາບໍລິຫານເປັນຜູ້ຮັບຮອງໃນກອງປະຊຸມສະພາບໍລິຫານ ຂອງລັດວິສາຫະກິດ.
ໃນກໍລະນີ ລັດວິສາຫະກິດວ່າຈ້າງບຸກຄົນພາຍນອກທີ່ເປັນຜູ້ຊ່ຽວຊານສະເພາະດ້ານ ມາເປັນຜູ້ອໍານວຍການລັດວິສາຫະກິດ, ປະທານສະພາບໍລິຫານສາມາດນໍາສະເໜີເຖິງກະຊວງການເງິນເພື່ອພິຈາລະນາຮັບຮອງການແຕ່ງຕັ້ງ ຫຼື ປົດຕໍາແໜ່ງຕາມລະບຽບການ.
ມາດຕາ 29 ໜ້າທີ່ຂອງກະຊວງການເງິນ
- ເປັນເຈົ້າການ ປະສານສົມທົບກັບຂະແໜງການກ່ຽວຂ້ອງ ແລະ ຜູ້ຮ່ວມທຶນຄົ້ນຄວ້າ ແລະ ຮັບຮອງເນື້ອໃນສັນຍາຮ່ວມທຶນ, ຮ່າງກົດລະບຽບພາຍໃນຂອງລັດວິສາຫະກິດ.
- ຄົ້ນຄວ້າ ພິຈາລະນາການແຕ່ງຕັ້ງ ຫຼື ປົດຕໍາແໜ່ງ ຜູ້ຕາງໜ້າຜູ້ຖືຮຸ້ນຂອງລັດ, ປະທານ, ຮອງປະທານສະພາບໍລິຫານ ແລະ ຄະນະອໍານວຍການ ຂອງລັດວິສາຫະກິດຈາກພາກລັດ ຕາມການສະເໜີຂອງຂະແໜງການກ່ຽວຂ້ອງ;
- ຄຸ້ມຄອງ, ຕິດຕາມ, ກວດກາ, ກວດສອບ ປະເມີນຜົນ-ຈັດປະເພດການເຄື່ອນໄຫວດໍາເນີນທຸລະກິດຂອງລັດວິສາຫະກິດ ກໍຄືຂອງສະພາບໍລິຫານ ແລະ ຄະນະອໍານວຍການ ລັດວິສາຫະກິດ;
- ກໍານົດຕົວຊີ້ວັດປະສິດທິຜົນການດໍາເນີນງານຂອງລັດວິສາຫະກິດລັດລົງທຶນ;
- ປະຕິບັດໜ້າທີ່ອື່ນໆ ຕາມພາລະບົດບາດ ແລະ ຕາມການມອບໝາຍ ຂອງລັດຖບານ.
ມາດຕາ 30 ໜ້າທີ່ຂອງຂະແໜງການກ່ຽວຂ້ອງ ແລະ ອົງການປົກຄອງທ້ອງຖິ່ນ
ຂະແໜງການທີ່ກ່ຽວຂ້ອງ ແລະ ອົງການປົກຄອງທ້ອງຖິ່ນ ມີສິດ ແລະ ໜ້າທີ່ ໃນການຊຸກຍູ້, ສົ່ງເສີມ, ກໍານົດພາລະກິດ, ຈຸດປະສົງ ແລະ ທິດທາງຂອງທຸລະກິດ ຂອງລັດວິສາຫະກິດ, ຄຸ້ມຄອງ ແລະ ຕິດຕາມ, ກວດກາການປະຕິບັດໜ້າທີ່ ຂອງສະມາຊິກສະພາບໍລິຫານໃນລັດວິສາຫະກິດ ທີ່ຂະແໜງການຕົນໄດ້ນໍາສົ່ງໄປປະຕິບັດງານ ໂດຍປະສານສົມທົບກັບຂະແໜງການເງິນ ຕາມພາລະບົດບາດ ແລະ ຂອບເຂດຄວາມຮັບຜິດຊອບຂອງຕົນ.
ມາດຕາ 31 ມາດຕະການຕໍ່ຜູ້ລະເມີດ
ຫາກສະມາຊິກສະພາບໍລິຫານລະເມີດກົດໝາຍ, ຄໍາແນະນໍາສະບັບນີ້ ແລະ ລະບຽບການທີ່ກ່ີຽວຂ້ອງອື່ນໆ ໃນການນໍາພາ-ຊີ້ນໍາ ເຄື່ອນໄຫວດໍາເນີນທຸລະກິດ ເກີນຂອບເຂດສິດ, ໜ້າທີ່ ແລະ ຄວາມຮັບຜິດຊອບຂອງຕົນ ຊຶ່ງສ້າງຄວາມເສຍຫາຍໃຫ້ແກ່ວິສາຫະກິດຈະຕ້ອງຖືກພິຈາລະນາໃຫ້ຢຸດຕິການປະຕິບັດໜ້າທີ່ເປັນສະມາຊິກສະພາບໍລິຫານຂອງວິສາຫະກິດດັ່ງກ່າວ ແລະ ພ້ອມທັງຮັບຜິດຊອບຕາມແຕ່ລະກໍລະນີດັ່ງນີ້:
- ເສຍຫາຍເກີນໜຶ່ງລ້ານກີບຂຶ້ນໄປຮອດສິບລ້ານກີບຈະຖືກສຶກສາອົບຮົມ ແລະ ໃຊ້ແທນຄືນ;
- ເສຍຫາຍເກີນສິບລ້ານກີບຂຶ້ນໄປຮອດໜຶ່ງຮ້ອຍລ້ານກີບຈະຖືກຂຽນໃບສໍາຫຼວດ ແລະ ຈະຖືກປັບໄໝ ສິບສ່ວນຮ້ອຍຂອງມູນຄ່າເສຍຫາຍຕົວຈິງ, ຖືກລົງວິໄນດ້ວຍການໂຈະ ຫຼື ພັກວຽກລັດຖະການເປັນໄລຍະເວລາໜຶ່ງປີ ພ້ອມທັງໃຊ້ແທນຄືນ;
- ເສຍຫາຍເກີນໜຶ່ງຮ້ອຍລ້ານກີບ ຂຶ້ນໄປ ຈະຖືກປັບໄໝຊາວສ່ວນຮ້ອຍຂອງມູນຄ່າເສຍຫາຍຕົວຈິງ, ຖືກລົງວິໄນດ້ວຍການປົດອອກຈາກການເປັນສະມາຊິກພັກ ຫຼື ສະມາຊິກຂອງການຈັດຕັ້ງທີ່ຜູ້ກ່ຽວສັງກັດ ຖືກລົງໂທດທາງອາຍາຕາມແຕ່ລະກໍລະນີເບົາ ຫຼື ໜັກ ພ້ອມທັງໃຊ້ແທນຄືນຄ່າເສຍຫາຍທາງແພ່ງ.
ມາດຕາ 32 ການຈັດຕັ້ງປະຕິບັດ
ຜູ້ຕາງໜ້າຜູ້ຖືຮຸ້ນ, ສະມາຊິກສະພາບໍລິຫານ, ຄະນະອໍານວຍການຂອງລັດວິສາຫະກິດ, ກະຊວງການເງິນ, ບັນດາກະຊວງທີ່ກ່ຽວຂ້ອງ, ກົມຈັດຕັ້ງ ແລະ ພະນັກງານກະຊວງການເງິນ, ກົມຄຸ້ມຄອງວິສາຫະກິດລັດລົງທຶນ ແລະ ການປະກັນໄພ ກະຊວງການເງິນ, ບັນດາວິສາຫະກິດປະສົມ ແລະ ທຸກພາກສ່ວນທີ່ກ່ຽວຂ້ອງຈົ່ງຮັບຮູ້ ແລະ ພ້ອມກັນປະຕິບັດຕາມຄໍາແນະນໍາສະບັບນີ້ໃຫ້ໄ້ດ້ຮັບຜົນດີ.
ມາດຕາ 33 ຜົນສັກສິດ
ຄໍາແນະນໍາສະບັບນີ້ ມີຜົນສັກສິດນັບແຕ່ມື້ລົງລາຍເຊັນ ແລະ ພາຍຫຼັງໄດ້ລົງໃນຈົດໝາຍເຫດທາງລັດຖະການສິບຫ້າວັນ, ທຸກການປັບປຸງ ແລະ ການປ່ຽນແປງບັນດາເນື້ອໃນຂອງຄໍາແນະນໍາສະບັບນີ້ຕ້ອງໄດ້ຮັບການເຫັນດີໂດຍລັດຖະມົນຕີກະຊວງການເງິນກ
ແຈ້ງການ, ຂໍ້ຕົກລົງ ແລະ ຄໍາແນະນໍາໃດ ທີ່ຂັດກັບຄໍາແນະນໍາສະບັບນີ້ ລ້ວນແຕ່ຖືກຍົກເລີກ.
ລັດຖະມົນຕີ ກະຊວງການເງິນ
ສົມດີ ດວງດີ
| # | ຫົວຂໍ້ | ດາວໂຫຼດ |
|---|---|---|
| 1 | ຄໍາແນະນໍາວ່າດ້ວຍສະພາບໍລິຫານ ລັດວິສາຫະກິດ ສະບັບເລກທີ 2526/ກງ, ລົງວັນທີ 28 ກັນຍາ 2020 |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.