ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ
ກະຊວງ ໂຍທາທິການ ແລະ ຂົນສົ່ງ ເລກທີ 17582/ຍທຂ
ນະຄອນຫຼວງວຽງຈັນ, ວັນທີ 8 ສິງຫາ 2018
ຂໍ້ຕົກລົງ
ຂອງລັດຖະມົນຕີ
ວ່າດ້ວຍ ລະບຽບຄຸ້ມຄອງການຂໍອະນຸຍາດດໍາເນີນທຸລະກິດ ໃນຂະແໜງການ ໂຍທາທິການ ແລະ ຂົນສົ່ງ
- ອີງຕາມດໍາລັດວ່າດ້ວຍການຈັດຕັ້ງ ແລະ ເຄື່ອນໄຫວຂອງກະຊວງ ໂຍທາທິການ ແລະ ຂົນສົ່ງ ສະບັບເລກທີ 295/ຍທຂ, ລົງວັນທີ 04 ກັນຍາ 2017;
- ອີງຕາມກົດໝາຍຄຸ້ມຄອງວິສາຫະກິດ ສະບັບເລກທີ 46/ສພຊ, ລົງວັນທີ 26/12/2013 ແລະ ກົດໝາຍສົ່ງເສີມການລົງທຶນ ສະບັບເລກທີ 032/ສພຊ, ລົງວັນທີ 17/11/2016;
- ອີງຕາມຄໍາສັ່ງຂອງນາຍົກລັດຖະມົນຕີ ສະບັບເລກທີ 02/ນຍ, ລົງວັນທີ 01/02/2018;
- ອີງຕາມບົດແນະນໍາຂອງກະຊວງ ອຸດສາຫະກໍາ ແລະ ການຄ້າ ເລກທີ 0537/ອຄ.ກທຄວ, ລົງວັນທີ 04 ພຶດສະພາ 2018;
- ອີງຕາມການສະເໜີຂອງກົມແຜນການ ແລະ ການຮ່ວມມື ສະບັບເລກທີ 14116/ຍທຂ, ລົງວັນທີ 27 ມິຖຸນາ 2018.
ເພື່ອເປັນການສົ່ງເສີມຍົກລະດັບມາດຕະຖານການດໍາເນີນທຸລະກິດ ຂອງບັນດາວິສາຫະກິດ ແລະ ເພີ່ມທະວີການຄຸ້ມຄອງ ຫົວໜ່ວຍທຸລະກິດທີ່ນັບມື້ຂະຫຍາຍຕົວຫຼາຍຂຶ້ນ, ໂດຍແນໃສ່ການປະກອບສ່ວນຊ່ວຍພາກລັດໃນການຮັບໃຊ້ ແລະ ການບໍລິການປະຊາຊົນ ດ້ວຍຄວາມວ່ອງໄວຈິງໃຈ ແລະ ໂປ່ງໃສ, ສ້າງວຽກເຮັດງານທໍາ, ປະກອບສວ່ນການພັດທະນາເສດຖະກິດ ແລະ ສັງຄົມ, ສະໜັບສະໜູນການຈັດຕັ້ງປະຕິບັດນະໂຍບາຍ ແຜນພັດທະນາ ຂອງຂະແໜງການ ໂຍທາທິການ ແລະ ຂົນສົ່ງ ແຕ່ລະໄລຍະ, ກະຊວງໂຍທາທິການ ແລະ ຂົນສົ່ງ ອອກລະບຽບການ ວ່າດ້ວຍການຄຸ້ມຄອງການອອກໃບຂໍອະນຸຍາດດໍາເນີນທຸລະກິດ ໃນທົ່ວຂະແໜງການ ໂຍທາທິການ ແລະ ຂົນສົ່ງ ດັ່ງນີ້:
ໜວດທີ 1
ຫຼັກການລວມໃນການຄຸ້ມຄອງການຂໍອະນຸຍາດດໍາເນີນທຸລະກິດ
ມາດຕາ 1. ຫຼັກການລວມ
ທຸກໆການເຄື່ອນໄຫວດໍາເນີນທຸລະກິດ (ບຸກຄົນ ຫຼື ນິຕິບຸກຄົນ ລວມມີ: ຄົນລາວ, ຄົນຕ່າງປະເທດ, ຫຼື ບໍລິສັດຕ່າງປະເທດ) ທີ່ມີຈຸດປະສົງຢາກດໍາເນີນທຸລະກິດ ໃນຂົງເຂດໂຍທາທິການ ແລະ ຂົນສົ່ງຮັບຜິດຊອບ ຕາມການແບ່ງປະເພດທຸລະກິດ ການຈັດແບ່ງຂະແໜງອຸດສາຫະກໍາ ຂອງລາວ (Lao Standard Industrial Classifcation-LSIC), ຕ້ອງໄດ້ຂຶ້ນທະບຽນນໍາ ກະຊວງອຸດສາຫະກໍາ ແລະ ການຄ້າ ແລ້ວຈຶ່ງຂໍອະນຸຍາດດໍາເນີນທຸລະກິດ ທີ່ອອກໃຫ້ໂດຍຂະແໜງການ ໂຍທາທິການ ແລະ ຂົນສົ່ງ ຫຼື ອົງການຈັດຕັ້ງທີ່ໄດ້ຮັບສິດຢ່າງຖືກຕ້ອງຈາກ ກະຊວງ ໂຍທາທິການ ແລະ ຂົນສົ່ງ ຈຶ່ງສາມາດດໍາເນີນທຸລະກິດຖືກຕ້ອງຕາມກົດໝາຍ.
ໜວດທີ 2
ການອອກອະນຸຍາດດໍາເນີນທຸລະກິດ
ມາດຕາ 2. ການແບ່ງຂັ້ນຄຸ້ມຄອງ
ບັນດາກິດຈະການທີ່ຖືກຈັດແບ່ງປະເພດຢູ່ໃນ LSIC ປະກອບດ້ວຍ ທຸລະກິດທົ່ວໄປ (ທຸລະກິດບໍ່ຄວບຄຸມ) ແລະ ທຸລະກິດມີເງື່ອນໄຂ (ທຸລະກິດຄວບຄຸມ ຫຼື ທຸລະກິດສໍາປະທານ) ທີ່ຂະແໜງການ ແຜນການ ແລະ ການລົງທຶນຮັບຜິດຊອບນັ້ນ, ຕ້ອງໄດ້ຮັບອະນຸຍາດດໍາເນີນທຸລະກິດ ຈາກຂະແໜງການໂຍທາທິການ ແລະ ຂົນສົ່ງ ໂດຍມີການແບ່ງຂັ້ນຄຸ້ມຄອງ ດັ່ງນີ້:
- ກົມແຜນການ ແລະ ການຮ່ວມມື (ກະຊວງ ໂຍທາທິການ ແລະ ຂົນສົ່ງ)
ໜ່ວຍງານລົງທຶນປະຕູດຽວ, ກົມແຜນການ ແລະ ການຮ່ວມມື, ກະຊວງໂຍທາທິການ ແລະ ຂົນສົ່ງ ມີຄວາມຮັບຜິດຊອບຕໍ່ການຄົ້ນຄວ້າລົງລາຍເຊັນ ການອອກອະນຸຍາດ ແລະ ຄຸ້ມຄອງການດໍາເນີນທຸລະກິດຂະແໜງການ ໂຍທາທິການ ແລະ ຂົນສົ່ງ ໃນຂອບເຂດຄວາມຮັບຜິດຊອບຂອງກະຊວງໂຍທາທິການ ແລະ ຂົນສົ່ງ ຕາມກໍານົດເວລາດັ່ງນີ້: ທຸລະກິດທົ່ວໄປ (ທຸລະກິດບໍ່ຄວບຄຸມ) ແມ່ນອອກອະນຸຍາດດໍາເນີນທຸລະກິດພາຍໃນ 03 ວັນລັດຖະການ, ຖ້າເປັນທຸລະກິດມີເງື່ອນໄຂ (ທຸລະກິດຄວບຄຸມ) ຕ້ອງໄດ້ປະສານສົມທົບກັບກົມກ່ຽວຂ້ອງ ແລະ ລາຍງານເພື່ອຂໍທິດຊີ້ນໍາຈາກທ່ານ ລັດຖະມົນຕີ ແລະ ມີບົດບັນທຶກກອງປະຊຸມຈາກ ຄະນະ ຄລທ ຂັ້ນສູນກາງ ຈຶ່ງຈະອອກອະນຸຍາດດໍາເນີນທຸລະກິດ ພາຍໃນ 10 ວັນລັດຖະການ (ຕາມບົດແນະນໍາຂອງກະຊວງ ອຸດສາຫະກໍາ ແລະ ການຄ້າ ສະບັບເລກທີ 0537/ອຄ.ກທຄວ, ລົງວັນທີ 04 ພຶດສະພາ 2018).
- ພະແນກ ໂຍທາທິການ ແລະ ຂົນສົ່ງ ປະຈໍາແຂວງ, ນະຄອນຫຼວງ
ພະແນກ ໂຍທາທິການ ແລະ ຂົນສົ່ງ ແຂວງ, ນະຄອນຫຼວງ ມີຄວາມຮັບຜິດຊອບຕໍ່ການຄົ້ນຄວ້າການອອກອະນຸຍາດດໍາເນີນທຸລະກິດ ພາຍໃນແຂວງຂອງຕົນ. ໂດຍຖືກຕ້ອງ ແລະ ສອດຄ່ອງກັບລະບຽບການຂອງກະຊວງ ໂຍທາທິການ ແລະ ຂົນສົ່ງວາງອອກ, ໄດ້ກໍານົດເວລາດັ່ງນີ້: ທຸລະກິດທົ່ວໄປແມ່ນອອກອະນຸຍາດດໍາເນີນທຸລະກິດພາຍໃນ 03 ວັນລັດຖະການ, ຖ້າເປັນທຸລະກິດຄວບຄຸມແມ່ນຕ້ອງໄດ້ປະສານສົມທົບກັບກົມກ່ຽວຂ້ອງ ໂດຍມີບົດບັນທຶກກອງປະຊຸມຈາກ ຄະນະ ຄລທ ຂັ້ນແຂວງ ຈຶ່ງຈະອອກອະນຸຍາດດໍາເນີນທຸລະກິດພາຍໃນ 10 ວັນລັດຖະການ. ແລະ ຕ້ອງໄດ້ສະຫຼຸບຕີລາຄາ, ຂໍ້ມູນການອອກອະນຸຍາດດໍາເນີນທຸລະກິດຂອງແຂວງຕົນ ແລ້ວລາຍງານກະຊວງ ເປັນແຕ່ລະໄຕມາດ ແລະ ປີ ເພື່ອສະຫຼຸບ, ສັງລວມ ແລະ ນໍາໃຊ້ເຂົ້າໃນການວາງແຜນພັດທະນາ ແຕ່ລະໄລຍະ.
- ຫ້ອງການໂຍທາທິການ ແລະຂົນສົ່ງ ຂັ້ນເມືອງ
ຫ້ອງການໂຍທາທິການ ແລະ ຂົນສົ່ງຂັ້ນເມືອງມີຄວາມຮັບຜິດຊອບຕໍ່ການຄົ້ນຄວ້າ ການອອກອະນຸຍາດດໍາເນີນທຸລະກິດ ພາຍໃນເມືອງຂອງຕົນ ບົນພື້ນຖານອີງໃສ່ລະບຽບການຂອງກະຊວງໂຍທາທິການ ແລະ ຂົນສົ່ງວາງອອກ ແລະ ຕ້ອງໄດ້ສະຫຼຸບຕີລາຄາ, ຂໍ້ມູນການອອກອະນຸຍາດດໍາເນີນທຸລະກິດຂອງເມືອງຂອງຕົນ ແລ້ວລາຍງານແຂວງທີ່ຕົນຂຶ້ນກັບ ເປັນແຕ່ລະໄຕມາດ ແລະ ປີ.
ຫ້າມບໍ່ໃຫ້ວິສາຫະກິດໃດໜຶ່ງ ຂໍອອກອະນຸຍາດດໍາເນີນທຸລະກິດປະເພດດຽວກັນເປັນຫຼາຍໃບ, ຫຼາຍບ່ອນ. ຕ້ອງປະຕິບັດຕາມກົນໄກການແບ່ງຂັ້ນຄຸ້ມຄອງຢ່າງເຂັ້ມງວດ ຖ້າມີການກວດພົບຈະຖືກປັບໃໝ ຫຼື ຍົກເລີກການອອກອະນຸຍາດ.
ມາດຕາ 3 ເງື່ອນໄຂກ່ຽວກັບການຂໍອະນຸຍາດດໍາເນີນທຸລະກິດ
ເພື່ອກໍານົດເງື່ອນໄຂຂອງການດໍາເນີນທຸລະກິດຂອງ ບຸກຄົນ ຫຼື ນິຕິບຸກຄົນ ທີ່ຕ້ອງການຂໍອະນຸຍາດດໍາເນີນທຸລະກິດ ການຜະລິດ ຫຼື ການບໍລິການ ໃນຂະແໜງ ໂຍທາທິການ ແລະ ຂົນສົ່ງມີເງື່ອນໄຂດັ່ງນີ້:
- ກໍລະນີບຸກຄົນ: ຜູ້ສະເໜີຂໍອອກອະນຸຍາດດໍາເນີນທຸລະກິດ ຕ້ອງມີອາຍຸ 18 ປີຂຶ້ນໄປ, ມີທີ່ຢູ່ອາໃສຢູ່ໃນ ສປປ ລາວ, ບໍ່ເປັນບຸກຄົນລົ້ມລະລາຍ, ບໍ່ເຄີຍໄດ້ຮັບການຕັດສິນລົງໂທດ, ຜູ້ທີ່ຖືກສັ່ງໂຈະ ຫຼື ຍົກເລີກການອອກອະນຸຍາດດໍາເນີນທຸລະກິດມາກ່ອນ.
- ກໍລະນີນິຕິບຸກຄົນ: ຜູ້ສະເໜີຂໍອະນຸຍາດເປັນນິຕິບຸກຄົນ ໃນຮູບແບບບໍລິສັດ ຈໍາກັດ ຫຼື ບໍລິສັດມະຫາຊົນ, ຜູ້ຖືຫຸ້ນ, ອໍານວຍການບໍລິສັດ ຫຼື ຜູ້ຮັບມອບສິດ ຕ້ອງບໍ່ເຄີຍຖືກສັ່ງໂຈະ ຫຼື ຍົກເລີກການອອກອະນຸຍາດດໍາເນີນທຸລະກິດມາກ່ອນ.
- ດ້ານການເງິນ: ບຸກຄົນ ຫຼື ນິຕິບຸກຄົນພາຍໃນ ແລະ ຕ່າງປະເທດ ຕ້ອງມີຖານະການເງິນທີ່ໝັ້ນຄົງ ແລະ ພຽງພໍກັບຂະໜາດການດໍາເນີນທຸລະກິດຂອງຕົນ ຊັບສິນທັງໝົດທີ່ນໍາມາປະກອບເປັນທຶນຕ້ອງໄດ້ຮັບການຢັ້ງຢືນຄວາມຖືກຕ້ອງຈາກພາກສ່ວນທີ່ກ່ຽວຂ້ອງເສ່ຍກ່ອນ.
- ດ້ານເຕັກນິກວິຊາການ: ຜູ້ຂໍອະນຸຍາດກໍຄືຜູ້ອໍານວຍການຕ້ອງແມ່ນ ວິຊາການສະເພາະທາງທີ່ກ່ຽວຂ້ອງກັບທຸລະກິດ ທີ່ຕົນເອງຂໍອະນຸຍາດດໍາເນີນທຸລະກິດນັ້ນ ຫຼື ຕ້ອງມີພະນັກງານວິຊາການທີ່ຈົບວິຊາສະເພາະນັ້ນໆຢ່າງໜ້ອຍສອງຄົນຂຶ້ນໄປ ຫຼື ມີປະສົບການຕົວຈິງ ທີ່ມີການຮັບຮອງຈາກສະພາວິຊາທີ່ກ່ຽວຂ້ອງ.
- ທີ່ຕັ້ງສໍານັກງານ: ຕ້ອງມີສະຖານທີ່ຕັ້ງສໍານັກງານຢູ່ ສປປ ລາວ, ເປັນສະຖານທີ່ໆ ເໝາະສົມກັບຂະໜາດກິດຈະການ, ບໍ່ສ້າງຜົນກະທົບທີ່ບໍ່ດີຕໍ່ຂະພາບແວດລ້ອມ, ສັງຄົມ, ບຸກຄົນ ແລະ ສ່ວນລວມ.
- ຄ່າທໍານຽມ ແລະ ບໍລິການ: ໃນການອອກອະນຸຍາດດໍາເນີນທຸລະກິດ ແມ່ນໃຫ້ປະຕິບັດ ຕາມລະບຽບການ (ລັດຖະບັນຍັດວ່າດ້ວຍ ຄ່າທໍານຽມ ແລະ ບໍລິການ).
ມາດຕາ 4 ການປະກອບເອກະສານ
ຜູ້ທີ່ມີຈຸດປະສົງຂໍອະນຸຍາດດໍາເນີນທຸລະກິດ ຕ້ອງໄດ້ຍື່ນຄໍາຮ້ອງ ຢູ່ຂະແໜງອຸດສາຫະກໍາ ແລະ ການຄ້າ, ຂັ້ນເມືອງ, ຂັ້ນແຂວງ ແລະ ກົມທະບຽນ ແລະ ຄຸ້ມຄອງວິສາຫະກິດ, ກະຊວງອຸດສາຫະກໍາ ແລະ ການຄ້າ ເມື່ອເອກະສານຜ່ານການກວດກາຄວາມຖືກຕ້ອງ ແລະ ໄດ້ຮັບການຂຶ້ນທະບຽນວິສາຫະກິດຕາມກໍານົດເວລາແລ້ວ, ຕ້ອງໄດ້ປະກອບເອກະສານ ຄໍາຮ້ອງຂໍອະນຸຍາດດໍາເນີນທຸລະກິດຕໍ່ຂະແໜງການ ໂຍທາທິການ ແລະ ຂົນສົ່ງ ດັ່ງນີ້:
- ທະບຽນວິສາຫະກິດຈາກກະຊວງ ອຸດສາຫະກໍາ ແລະ ການຄ້າ ທີ່ພົວພັນເຖິງບັນດາກິດຈະການທີ່ຂຶ້ນກັບ ຂະແໜງການ ຍທຂ;
- ໃບຄໍາຮ້ອງຂໍອະນຸຍາດດໍາເນີນທຸລະກິດ ຫຼື ຂໍອະນຸຍາດລົງທຶນ;
- ແຜນການດໍາເນີນທຸລະກິດ, ການຜະລິດ ຫຼື ການບໍລິການ, ປະຫວັດຂອງຄະນະອໍານວຍການ ແລະ ວິຊາການ, ປະກາດສະນີຍະບັດຂອງຫົວໜ້າບໍລິສັດ ແລະ ວິຊາການກ່ຽວຂ້ອງ ກັບທຸລະກິດນັ້ນໆ, ບັນຊີຊັບສິມບັດຄົງທີ່,ໃບຢັ້ງຢືນເງິນຝາກຈາກທະນາຄານ, ໃບຢັ້ງຢືນກໍາມະສິດພາຫານະ ແລະ ອື່ນໆ;
- ບັດປະຈໍາຕົວ ຫຼືສໍາມະໂນຄົວ (ບຸກຄົນ ຫຼື ນິຕິບຸກຄົນ ພາຍໃນ), ພັດສະປອດ; ຫຼື ບັດພັກອາໃສຂອງຄົນຕ່າງດ້າວ (ບຸກຄົນ ຫຼື ນິຕິບຸກຄົນ ຕ່າງປະເທດ);
- ຮູບຜູ້ອໍານວຍການ 3x4 ຈໍານວ 2 ໃບ.
ມາດຕາ 5 ຂັ້ນຕອນການຄົ້ນຄ້ວາພິຈາລະນາອອກອະນຸຍາດດໍາເນີນທຸລະກິດ
ເມື່ອໄດ້ຮັບຄໍາຮ້ອງຄົບຖ້ວນ ຕາມມາດຕາ 3 ແລະ ມາດຕາ 4 ແລ້ວ ພາກສ່ວນຮັບຜິດຊອບຕ້ອງໄດ້ດໍາເນີນຕາມຂັ້ນຕອນພິຈາລະນາ ດັ່ງນີ້:
- ກວດກາລາຍລະອຽດ (ຊີວະປະຫວັດຂອງນັກລົງທຶນ, ວິຊາການ) ຕາມລະບຽບການຂອງທຸລະກິດທົ່ວໄປ (ທຸລະກິດບໍ່ຄວບຄຸມ), ທຸລະກິດມິເງື່ອນໄຂ (ທຸລະກິດຄວບຄຸມ ຫຼື ທຸລະກິດສໍາປະທານ), ເປັນການລົງທຶນຂອງນັກລົງທຶນພາຍໃນ ຫຼື ຕ່າງປະເທດ, ຖ້າເປັນການລົງທຶນຂອງຕ່າງປະເທດແມ່ນອີງໃສ່ ພັນທະການເຂົ້າເປັນສະມາຊິກ WTO ແລະ ASEAN, ລະບຽບການຄຸ້ມຄອງຄົນຕ່າງປະເທດ.
- ກວດກາເບິ່ງລາຍລະອຽດ ທີ່ຕັ້ງ, ຂະໜາດ, ລັກສະນະ ຫຼື ມາດຕະຖານການດໍາເນີນທຸລະກິດຕາມກົດໝາຍກ່ຽວຂ້ອງກັບປະເພດທຸລະກິດນັ້ນໆ.
- ກໍລະນີທຸລະກິດສໍາປະທານ ທີ່ມີລັກສະນະຂະໜາດໃຫຍ່, ໄລຍະສໍາປະທານຍາວນານເປັນຕົ້ນ (ຈະມີລະບຽບການສະເພາະ) ພາກສ່ວນຮັບຜິດຊອບອະນຸມັດ ຈະພິຈາລະນາ ແລະ ສະເໜີຜ່ານ ການຄົ້ນຄວ້າພິຈາລະນາ ແລະ ຢັ້ງຢືນຈາກພາກສ່ວນກ່ຽວຂ້ອງກ່ອນເຊັ່ນ: ສະພາສະຖາປະນິກ ແລະ ວິສະວະກອນ ກ່ອນ.
ມາດຕາ 6 ໃບອະນຸຍາດດໍາເນີນທຸລະກິດ
ໃບອະນຸຍາດດໍາເນີນທຸລະກິດ ຂອງຂະແໜງການໂຍທາທິການ ແລະ ຂົນສົ່ງແມ່ນເອກະສານຢັ້ງຢືນຄວາມຖືກຕ້ອງໃນການດໍາເນີນທຸລະກິດຂອງບຸກຄົນ ຫຼື ນິຕິບຸກຄົນ ທີ່ພາກລັດ ກໍຄືກະຊວງ ໂຍທາທິການ ແລະ ຂົນສົ່ງ, ອອກອະນຸຍາດໃຫ້ບຸກຄົນ ຫຼື ນິຕິບຸກຄົນ ໃນຂອບເຂດການອະນຸຍາດດໍາເນີນທຸລະກິດນັ້ນໆ, ໃບອະນຸຍາດດໍາເນີນທຸລະກິດປະກອບດ້ວຍ ລາຍລະອຽດດັ່ງນີ້:
- ຊື່ ກະຊວງໂຍທາທິການ ແລະ ຂົນສົ່ງ
- ຊື່ ວິສາຫະກິດທີ່ໄດ້ຮັບອະນຸຍາດ (ເປັນພາສາລາວ ແລະ ພາສາຕ່າງປະເທດ)
- ເລກລະຫັດວິສາຫະກິດ (ຖ້າມີ)
- ເລກປະຈໍາຕົວຜູ້ເສຍອາກອນ (ຖ້າມີ)
- ທີ່ຕັ້ງສໍານັກງານ
- ກິດຈະການທີ່ໄດ້ຮັບອະນຸຍາດດໍາເນີນທຸລະກິດ
- ອາຍຸນໍາໃຊ້ໃບອະນຸຍາດດໍາເນີນທຸລະກິດ
- ລະຫັດຜູ້ເສຍອາກອນ ຈາກຂະແໜງການເງິນ
ໃບອະນຸຍາດດໍາເນີນທຸລະກິດ ໃຫ້ໃຊ້ກັບທຸລະກິດທີ່ລະບຸຊື່ໄວ້ໃນໃບອະນຸຍາດດໍາເນີນທຸລະກິດເທົ່ານັ້ນ, ມີອາຍຸການນໍາໃຊ້ 01 ປີ ນັບແຕ່ມື້ໄດ້ຮັບອະນຸຍາດດໍາເນີນທຸລະກິດ ຫຼື ຖ້າເປັນການຕໍ່ໃບອະນຸຍາດ ໃຫ້ນັບຕໍ່ຈາກໃບອະນຸຍາດເກົ່າທີ່ໄດ້ຮັບອະນຸຍາດມາແລ້ວ.
ມາດຕາ 7 ການຕໍ່ໃບອະນຸຍາດດໍາເນີນທຸລະກິດ
ການຂໍຕໍ່ໃບອະນຸຍາດດໍາເນີນທຸລະກິດໃຫ້ຍື່ນຄໍາຮ້ອງ ຂໍຕໍ່ໃບອະນຸຍາດດໍາເນີນທຸລະກິດກ່ອນວັນທີ່ໃບອະນຸຍາດໝົດອາຍຸ ເມື່ອໄດ້ຍື່ນຄໍາຮ້ອງແລ້ວ ແມ່ນຜູ້ຍື່ນຄໍາຮ້ອງຢູ່ໃນຖານະຜູ້ໄດ້ຮັບອະນຸຍາດດໍາເນີນທຸລະກິດ ຈົນກວ່າຈະມີຄໍາເຫັນ ຈາກກະຊວງ ໂຍທາທິການ ແລະ ຂົນສົ່ງ, ພະແນກໂຍທາທິການແຂວງ, ນະຄອນຫຼວງ ແລະ ຫ້ອງການໂຍທາທິການ ແລະ ຂົນສົ່ງເມືອງ.
ຖ້າຜົນການຄົ້ນຄວ້າເຫັນວ່າ: ວິສາຫະກິດເຄື່ອນໄຫວຖືກຕ້ອງ ຕາມການອອກອະນຸຍາດໃຫ້, ຄະນະຮັບຜິດຊອບຈະເຫັນດີໃຫ້ຕໍ່ໃບອະນຸຍາດດໍາເນີນທຸລະກິດ. ແຕ່ຫາກຜົນການຄົ້ນຄວ້າພົບເຫັນການເຄື່ອນໄຫວທີ່ຜິດກັບການອອກໃບອະນຸຍາດໃຫ້. ຄະນະຮັບຜິດຊອບອອກອະນຸຍາດໃຫ້ແກ້ໄຂຕາມກໍານົດເວລາທີ່ແນ່ນອນ, ເມື່ອແກ້ໄຂແລ້ວ ຈຶ່ງຕໍ່ໃບອະນຸຍາດໃຫ້ໄດ້. ຫາກບໍ່ສາມາດແກ້ໄຂຕາມກໍານົດເວລາ ຄະນະຮັບຜິດຊອບຈະບໍ່ອະນຸຍາດໃຫ້ຕໍ່ອາຍຸໄດ້.
ໃນກໍລະນີ ໃບຄໍາຮ້ອງຂໍຕໍ່ໃບອະນຸຍາດບໍ່ທັນຕາມກໍານົດເວລາ ກ່ອນໃບອະນຸຍາດໝົດອາຍຸ, ແຕ່ວິສາຫະກິດໄດ້ຍື່ນພາຍໃນກໍານົດເວລາ 20 ວັນ ຫຼັງຈາກໃບອະນຸຍາດໝົດອາຍຸ ແມ່ນຖືວ່າຍື່ນຄໍາຮ້ອງພາຍໃນກໍານົດເວລາ ແລະ ການດໍາເນີນທຸລະກິດໃນໄລຍະເວລານັ້ນແມ່ນຖືວ່າເປັນການດໍາເນີນທີ່ໄດ້ຮັບອະນຸຍາດ ແຕ່ເມື່ອຄະນະຮັບຜິດຊອບ ອອກອະນຸຍາດໃຫ້ຕໍ່ໃບອະນຸຍາດ, ວິສາຫະກິດຕ້ອງເສຍຄ່າປັບໃໝ 20% ຂອງຄ່າທໍານຽມຕໍ່ໃບອະນຸຍາດ, ຖ້າກາຍກໍານົດ 20 ວັນ ຕ້ອງເລີ່ມຕົ້ນຂະບວນການຂໍອະນຸຍາດດໍາເນີນທຸລະກິດໃໝ່.
ມາດຕາ 8 ການໂອນໃບອະນຸຍາດດໍາເນີນທຸບະກິດ
ໃບອະນຸຍາດດໍາເນີນທຸລະກິດ ເປັນສິດສະເພາະຂອງຜູ້ທີ່ໄດ້ຮັບອະນຸຍາດເທົ່ານັ້ນ ເພາະການຂໍອະນຸຍາດຕ້ອງໄດ້ພິຈາລະນາເຖິງ ປະຫວັດ ແລະ ຄຸນລັກສະນະສະເພາະຂອງບຸກຄົນ, ແຕ່ກົດໝາຍວ່າດ້ວຍວິສາຫະກິດໄດ້ກໍານົດໃຫ້ມີການໂອນ (ມາດຕາ 30) ດັ່ງນັ້ນ, ຈຶ່ງອະນຸຍາດໃຫ້ມີການໂອນໃບອະນຸຍາດດໍາເນີນທຸລະກິດໃຫ້ບຸກຄົນທີ່ມີເງື່ອນໄຂຕາມ ມາດຕາ 5 ຂອງລະບຽບການສະບັບນີ້, ແຕ່ຕ້ອງໄດ້ຮັບອະນຸຍາດຈາກພາກສ່ວນທີ່ກ່ຽວຂ້ອງກ່ອນ. ດັ່ງນັ້ນ, ຖ້າຫາກຜູ້ຖືໃບອະນຸຍາດດໍາເນີນທຸລະກິດ ຕ້ອງການໂອນໃບອະນຸຍາດໃຫ້ຜູ້ໃດ, ແມ່ນສາມາດຍື່ນຄໍາຮ້ອງຕໍ່ພາກສ່ວນຮັບຜິດຊອບອະນຸຍາດນັ້ນ. ເຊິ່ງການກວດກາຜູ້ຖືກໂອນແມ່ນດໍາເນີນຕາມຂັ້ນຕອນຜູ້ຂໍອະນຸມັດໃໝ່ (ມາດຕາ: 7 ຂອງລະບຽບການສະບັບນີ້).
ຖ້າຫາກຄໍາຮ້ອງຂໍໂອນໃບອະນຸຍາດດໍາເນີນທຸລະກິດ ໄດ້ຮັບການອະນຸຍາດ ໃຫ້ພາກສ່ວນຮັບຜິດຊອບ ລະບຸຂໍ້ຄວາມທີ່ອະນຸຍາດໄວ້ດ້ານຫຼັງຂອງໃບອະນຸຍາດ ແລະ ແຈ້ງໃຫ້ ກະຊວງອຸດສາຫະກໍາ ແລະ ການຄ້າເພື່ອຊາບ.
ການໂອນໃບອະນຸຍາດໃນກໍລະນີຜູ້ໄດ້ຮັບອະນຸຍາດເສຍຊີວິດ, ຖ້າຫາກຍາດຕິພີ່ນ້ອງ ມີຈຸດປະສົງຢາກດໍາເນີນກິດຈະການຕໍ່ໄປ ໃຫ້ຍາດຕິພີ່ນ້ອງທີ່ມີເງື່ອນໄຂຕາມ (ມາດຕາ 7 ຂອງລະບຽບການສະບັບນີ້) ພາຍໃນກໍານົດເວລາ 90ວັນ (ເລີ່ມແຕ້ມື້ເສຍຊີວິດ), ແຕ່ຖ້າຫາກບໍ່ມາສະເໜີ ຕໍ່ການດໍາເນີນທຸລະກິດ ພາຍໃນ 90 ວັນດັ່ງກ່າວ ໃບອະນຸຍາດດໍາເນີນທຸລະກິດ ແມ່ນຈະສິ້ນສຸດລົງ.
ຖ້າຫາກຄໍາຮ້ອງຂໍໂອນໃບອະນຸຍາດດໍາເນີນທຸລະກິດ ໄດ້ຮັບການອະນຸຍາດ ໃຫ້ພາກສ່ວນຮັບຜິດຊອບ ລະບຸຂໍ້ຄວາມທີ່ອະນຸຍາດໄວ້ດ້ານຫຼັງຂອງໃບອະນຸຍາດ ແລະ ແຈ້ງໃຫ້ ກະຊວງອຸດສາຫະກໍາ ແລະ ການຄ້າເພື່ອຊາບ.
ມາດຕາ 9 ການຍຸບເລີກ ຫຼື ຢຸດເຊົາ
ວິສາຫະກິດທີ່ຕ້ອງການຫຍຸບເລີກ ຫຼື ຢຸດເຊົາ,ຈະຕ້ອງແຈ້ງໃຫ້ພາກສ່ວນຮັບຜິດຊອບອອກອະນຸຍາດກ່ອນພາຍໃນກໍານົດເວລາ 30ວັນ, ເມື່ອພາກສ່ວນຮັບຜິດຊອບອອກອະນຸຍາດໄດ້ຮັບການແຈ້ງຫຍຸບເລີກຂອງວິສາຫະກິດແລ້ວ ໃຫ້ພິຈາລະນາ ແລະ ມີຄໍາສັ່ງໃຫ້ຫຍຸບເລີກໄດ້ເວລາໃດ, ພາຍໃຕ້ເງື່ອນໄຂ ແລະ ວິທີການແນວໃດນັ້ນ,ໃຫ້ພິຈາລະນາເຖິງຜົນປະໂຫຍດ ສ່ວນໄດ້ ສ່ວນເສຍ ຂອງລູກຄ້າ ແລະ ຜູ້ໃຊ້ບໍລິການເປັນຫຼັກ ວິສາຫະກິດຕ້ອງໄດ້ລໍຖ້າການອະນຸມັດຂອງພາກສ່ວນຮັບຜິດຊອບອອກອະນຸຍາດໃຫ້ກ່ອນ.
ການອະນຸຍາດຫຍຸບເລີກກິດຈະການ ມອບໃຫ້ພາກສ່ວນຮັບຜິດຊອບອອກອະນຸຍາດນັ້ນເກັບຄືນໃບອະນຸຍາດທີ່ອອກໃຫ້ ພ້ອມໃບທະບຽນວິສາຫະກິດ ແລະ ແຈ້ງໃຫ້ກະຊວງ ອຸດສາຫະກໍາ ແລະ ການຄ້າຊາບ.
ມາດຕາ 10 ການຕົກເຮ່ຍເສຍຫາຍຂອງໃບອະນຸຍາດດໍາເນີນທຸລະກິດ
ໃນກໍລະນີໃບອະນຸຍາດດໍາເນີນທຸລະກິດຖືກຕົກເຮ່ຍເສຍຫາຍ ໃຫ້ວິສາຫະກິດຍື່ນຄໍາຮ້ອງ ຂໍຮັບໃບອະນຸຍາດດໍາເນີນທຸລະກິດພາຍໃນກໍານົດ 30ວັນ, ນັບແຕ່ວັນທີ່ຮັບຊາບວ່າໃບອະນຸຍາດຖືກຕົກເຮ່ຍເສຍຫາຍດັ່ງກວ່າ ເຊິ່ງຕ້ອງເສຍຄ່າທໍານຽມຕາມມູນຄ່າທີ່ກໍານົດ.
ມາດຕາ 11 ການເຄື່ອນໄຫວຂອງວິສາຫະກິດ ທີ່ຕ້ອງໄດ້ຂໍອະນຸຍາດ ຈາກພາກສ່ວນຂຶ້ນທະບຽນ
ການເຄື່ອນໄຫວຂອງວິສາຫະກິດ ທີ່ຕ້ອງໄດ້ຂໍອະນຸຍາດ ຈາກພາກສ່ວນຂຶ້ນທະບຽນວິສາຫະກິດກ່ອນມີດັ່ງນີ້:
- ປ່ຽນແປງປະເພດທຸລະກິດ (ມາດຕາ 13 ຂອງກົດໝາຍວ່າດ້ວຍວິສາຫະກິດ)
- ປ່ຽນແປງຮູບການຂອງວິສາຫະກິດ, ຜູ້ຖືຫຸ້ນ
- ປ່ຽນຊື່ວິສາຫະກິດ ແລະ ອື່ນໆ ຕາມກົດໝາຍວິສາຫະກິດກໍານົດ.
ມາດຕາ 12 ພັນທະໜ້າທີ່ຂອງວິສາຫະກິດ
ເພື່ອໃຫ້ວິສາຫະກິດ ມີມາດຕະຖານ, ສົ່ງເສີມ ແລະ ເພີ່ມທະວີການຄຸ້ມຄອງ ຈຶ່ງໄດ້ກໍານົດພັນທະໜ້າທີ່ຂອງວິສາຫະກິດໄວ້ ດັ່ງນີ້:
- ຕ້ອງໃຫ້ມີປ້າຍຊື່ວິສາຫະກິດ ຖ້າດໍາເນີນທຸລະກິດປະເພດໃດ ຕ້ອງມີຄໍາສັບນັ້ນໆ ໄວ້ດ້ານໜ້າ ຫຼື ດ້ານຫຼັງຂອງຊື່ (ລະບຽບການກ່ຽວກັບການຄຸ້ມຄອງປ້າຍ)
- ຕ້ອງໃຫ້ມີການສະແດງໃບອະນຸຍາດດໍາເນີນທຸລະກິດ ໄວ້ໃນທີ່ເປີດເຜີຍ ສັງເກດເຫັນໄດ້ງ່າຍ
- ມີລາຍລະອຽດ ບົດແນະນໍາ ຂອງສິນຄ້າ ແລະ ບໍລິການ
- ມີເອກະສານສະແດງລາຄາ ສິນຄ້າ ແລະ ຄ່າບໍລິການ
- ຈັດໃຫ້ມີແຜນຜັງ ແນະນໍາກ່ຽວກັບຄວາມປອດໄພໃຫ້ຜູ້ບໍລິໂລກ ແລະ ໃຊ້ການບໍລິການ
- ຮັກສາຄວາມສະອາດ, ອານາໄມ ຕາມລະບຽບສາທາລະນະສຸກວາງອອກ
- ຮັກສາຕຶກ, ອາຄານ ໃຫ້ໝັ້ນຄົງ ພ້ອມດ້ວຍລະບົບປ້ອງກັນອັກຄີໄພ ຕາມກົດໝາຍກໍ່ສ້າງ
- ຮັກສາສິ່ງແວດລ້ອມ ຕາມກົດໝາຍສິ່ງແວດລ້ອມກໍານົດໄວ້
- ສ້າງຄວາມສະດວກໃຫ້ແກ່ລູກຄ້າ ແລະ ຜູ້ໃຊ້ບໍລິການ.
ໝວດທີ 3
ການບໍລິຫານທຸລະກິດ
ມາດຕາ 13 ເຈົ້າຂອງກິດຈະການ
ລະບຽບການສະບັບນີ້ໄດ້ກໍານົດຫຼັກການ, ວິທີການ ແລະ ຂັ້ນຕອນ ໃນການບໍລິຫານທຸລະກິດ ຂອງວິສາຫະກິດ ໃນຂົງເຂດ ໂຍທາທິການ ແລະ ຂົນສົ່ງ, ພ້ອມດ້ວຍອໍານາດໜ້າທີ່ຂອງຜູ້ຂໍບໍລິຫານທຸລະກິດ ແລະ ຜູ້ຈັດການ (ມາດຕາ 33 ຂອງກົດໝາຍວ່າດ້ວຍວິສາຫະກິດ) ເພື່ອໃຫ້ການບໍລິຫານຈັດການທຸລະກິດ ມີຄວາມເປັນລະບຽບຮຽບຮ້ອຍຕາມກົດໝາຍກໍານົດ.
ມາດຕາ 14 ຜູ້ຈັດການ
ເຈົ້າຂອງທຸລະກິດ ແຕ່ງຕັ້ງຜູ້ຈັດການ 1 ທ່ານ ຫຼື ອາດຈະແຕ່ງຕັ້ງຕົນເອງເປັນຜູ້ຈັດການກໍໄດ້ ເຊິ່ງຜູ້ຈັດການຕ້ອງມີເອກະສານດັ່ງນີ້:
- ສໍາເນົາບັດປະຊາຊົນ
- ສໍາມະໂນຄົວ
- ຮູບຖ່າຍ 3 x 4 ຈໍານວນ 2 ໃບ
- ໃບແຈ້ງໂທດ
- ໜັງສືແຕ່ງຕັ້ງຈາກເຈົ້າຂອງກິດຈະການ
- ໃບກວດສຸຂະພາບ 1 ສະບັບ
ກໍລະນີຜູ້ຈັດການເປັນຄົນຕ່າງປະເທດ ໃຫ້ແຈ້ງສໍາເນົາພັດສະປອດ ພ້ອມດ້ວຍສໍາເນົາໃບອະນຸຍາດ ເຮັດວຽກ ເພື່ອເປັນຫຼັກການປະກອບການພິຈາລະນາ.
ເມື່ອພາກສ່ວນຮັບຜິດຊອບອອກອະນຸຍາດ ກວດກາຄວາມຖືກຕ້ອງຂອງເອກະສານແລ້ວຕ້ອງອອກໜັງສືຮັບຮອງ ເພື່ອເປັນຫຼັກຖານ ແລະ ແຈ້ງໃຫ້ຜູ້ຖືກແຕ່ງຕັ້ງຊາບ, ໃນກໍລະນີກວດພົບພາຍຫຼັງວ່າຜູ້ແຈ້ງໄດ້ແຈ້ງຂໍ້ມູນບໍ່ຖືກຕ້ອງ ໃຫ້ດໍາເນີນແກ້ໄຂໃຫ້ຖືກຕ້ອງ ແລະ ຄົບຖ້ວນພາຍໃນກໍານົດ 7ວັນ.
ໃນກໍລະນີ ຜູ້ຈັດການໄດ້ຮັບການແຕ່ງຕັ້ງຈາກເຈົ້າຂອງທຸລະກິດແລ້ວ ແລະ ໄດ້ຮັບແຈ້ງເປັນຜູ້ຈັດການຈາກຄະນະຮັບຜິດຊອບແລ້ວ ແຕ່ບໍ່ສາມາດປະຕິບັດໜ້າທີ່ໄດ້ ຫຼື ພົ້ນຈາກຕໍາແໜ່ງ ຈະຕ້ອງມີການແຕ່ງຕັ້ງຜູ້ຈັດການແທນ ຕາມເງື່ອນໄຂຂ້າງເທິງ ດັ່ງນີ້:
- ກໍລະນີຜູ້ຈັດການບໍ່ສາມາດປະຕິບັດໜ້າທີ່ກໍານົດ 7ວັນ ຫຼັງອອກໃບຮັບຮອງ ໃຫ້ເຈົ້າຂອງທຸລະກິດ ຫຼື ຜູ້ຈັດການມອບໝາຍໃຫ້ຜູ້ໃໝ່ປະຕິບັດແທນບໍ່ໃຫ້ກາຍ 30ວັນ ແລະໃຫ້ບຸກຄົນທີ່ຮັບຜິດຊອບແທນແຈ້ງໃຫ້ຜູ້ຮັບຜິດຊອບອອກທະບຽນພາຍໃນ 30ວັນ ນັບແຕ່ມື້ທີ່ໄປປະຕິບັດໜ້າທີ່ແທນ ໂດຍມີໜ້າທີ່ ແລະ ຄວາມຮັບຜິດຊອບຄືກັບຜູ້ຈັດການ.
- ກໍລະນີຜູ້ຈັດການພົ້ນຈາກໜ້າທີ່ ໃຫ້ເຈົ້າຂອງທຸລະກິດແຕ່ງຕັ້ງຜູ້ໃໝ່ເຮັດໜ້າທີ່ແທນ ແລະ ໃຫ້ຜູ້ຈັດການທີ່ໄດ້ຮັບໜ້າທີ່ໃໝ່ແຈ້ງໃຫ້ ຜູ້ຮັບຜິດຊອບອອກອະນຸຍາດ ຍົກເວັ້ນກໍລະນີຜູ້ຮັບຜິດຊອບໃໝ່ເຄີຍແຈ້ງເປັນຜູ້ຈັດການໄວ້ແລ້ວ ໃຫ້ເຈົ້າຂອງທຸລະກິດແຈ້ງການປ່ຽນແປງຜູ້ຈັດການ ຕາມລະບຽບ.
ມາດຕາ 15 ມາດຕະການຄວບຄຸມທຸລະກິດທີ່ຂຶ້ນກັບຂະແໜງ ໂຍທາທິການ ແລະ ຂົນສົ່ງ
ນອກຈາກຈຸດປະສົງສົ່ງເສີມ ແລະ ຄຸ້ມຄອງການດໍາເນີນທຸລະກິດໃນຂະແໜງ ໂຍທາທິການ ແລະ ຂົນສົ່ງແລ້ວ ກໍຍັງມີການຄວບຄຸມ ປະເພດກິດຈະການ ທີ່ຂັດກັບຄວາມເປັນລະບຽບຮຽບຮ້ອຍ ແລະ ວັດທະນະທໍາອັນດີງາມຂອງຊາດ ເຊິ່ງມີການດໍາເນີນງານດັ່ງນີ້:
ການສັ່ງຢຸດເຊົາກິດຈະການ ຫຼື ດໍາເນີນການແກ້ໄຂ ໂດຍຜູ້ອອກອະນຸຍາດດໍາເນີນ ທຸລະກິດສັ່ງໃຫ້ໂຈະກິດຈະການ ຫຼື ດໍາເນີນການແກ້ໄຂຕາມເຫັນສົມຄວນ ເມື່ອຜູ້ຮັບຜິດຊອບອອກອະນຸຍາດພົບເຫັນກໍລະນີດັ່ງນີ້:
- ຝ່າຝືນລະບຽບການສະບັບນີ້ ແລະ ກົດໝາຍກ່ຽວຂ້ອງ
- ບໍ່ປະຕິບັດຕາມຄໍາສັ່ງ ຫຼື ໜັງສືແຈ້ງເຕືອນ ຂອງຄະນະຮັບຜິດຊອບອອກອະນຸຍາດ
- ໃນກໍລະນີ ເຈົ້າຂອງທຸລະກິດ ຫຼື ຜູ້ຈັດການ ບໍ່ຢຸດການກະທໍາ ຫຼື ດໍາເນີນການແກ້ໄຂ ຕາມຄໍາສັ່ງຂອງຜູ້ອອກອະນຸຍາດ ໃຫ້ພາກສ່ວນຮັບຜິດຊອບອອກອະນຸຍາດ ເຮັດໜັງສືແຈ້ງໃຫ້ບຸກຄົນດັ່ງກ່າວໃນກໍານົດເວລາ 30 ວັນ.
ມາດຕາ 16 ການສັ່ງພັກໃບອະນຸຍາດ
ຖ້າບໍ່ມີການປະຕິບັດຕາມຄໍາສັ່ງ ຫຼື ແຈ້ງເຕືອນ, ຜູ້ຮັບຜິດຊອບອອກໃບອະນຸຍາດ ຈະອອກໜັງສືແຈ້ງເຕືອນໃຫ້ພັກເຊົາກິດຈະການຄັ້ງລະ 15 ວັນ, ບໍ່ໃຫ້ເກີດ 3ຄັ້ງ ຕໍ່ເຈົ້າຂອງທຸລະກິດ, ສໍາລັບຜູ້ຈັດການ ຜູ້ອອກອະນຸຍາດ ຈະແຈ້ງໃຫ້ປັບປຸງພາຍໃນກໍານົດ 30ວັນ. ຜູ້ທີ່ໄດ້ຮັບການສັ່ງຢຸດເຊົາກິດຈະການ ຫຼື ດໍາເນີນການແກ້ໄຂ ຈະບໍ່ສາມາດເຄື່ອນໄຫວທຸລະກິດໄດ້ໃນໄລຍະທີ່ຖືກສັ່ງພັກ.
ມາດຕາ 17 ການເພີກຖອນໃບອະນຸຍາດ
ຜູ້ອອກອະນຸຍາດດໍາເນີນທຸລະກິດມີສິດ ສັ່ງຖອນໃບອະນຸຍາດ ຫຼື ໃບແຈ້ງຮັບຮອງຜູ້ຈັດການ ແລ້ວແຕ່ລະກໍລະນີ ເມື່ອພົບເຫັນການກະທໍ່ຕໍ່ໄປນີ້:
- ເປັນຜູ້ຂາດເງື່ອນໄຂ ຕາມມາດຕາ: 3 ແລະ ມາດຕາ 4 ຂອງລະບຽບການສະບັບນີ້
- ເຄີຍຖືກສັ່ງພັກອະນຸຍາດດໍາເນີນທຸລະກິດມາແລ້ວ ຝ່າຝືນ ບໍ່ປະຕິບັດຕາມມາດຕາ 11 ຂອງລະບຽບການສະບັບນີ້.
ມາດຕາ 18 ການແຈ້ງຖອນອະນຸຍາດ
ໜັງສືແຈ້ງໂຈະໃບອະນຸຍາດ, ການຖອນໃບອະນຸຍາດດໍາເນີນທຸລະກິດ ຫຼື ໃບຮັບແຈ້ງເປັນຜູ້ຈັດການ ໃຫ້ສົ່ງເປັນລາຍລັກອັກສອນ ແລະ ມີການເຊັນຮັບເອົາເອກະສານຢ່າງດີ ຈາກພາກສ່ວນກ່ຽວຂ້ອງ, ເຈົ້າຂອງທຸລະກິດ ຫຼື ຜູ້ຈັດການຕາມແຕ່ລະກໍລະນີ ແລະ ຖືວ່າເຈົ້າຂອງວິສາຫະກິດຮັບຊາບແລ້ວພາຍໃນກໍານົດ 7ວັນ ນັບແຕ່ມື້ສົ່ງເອກະສານ, ຍົກເວັ້ນມີການພິສູດໄດ້ວ່າຜູ້ກ່ຽວບໍ່ໄດ້ຮັບເອກະສານ.
ຄໍາສັ່ງຖອນໃບອະນຸຍາດ ຫຼື ໃບຮັບແຈ້ງຜູ້ຈັດການ ເປັນຄໍາສັ່ງທາງການຂອງລັດ ດັ່ງນັ້ນເຈົ້າຂອງວິສາຫະກິດ ຫຼື ຜູ້ຈັດການ ສາມາດຍື່ນຄໍາຮ້ອງ ເພື່ອພິຈາລະນາແກ້ໄຂ ຕາມຄວາມເໝາະສົມ ຫຼື ຮ້ອງຟ້ອງຕໍ່ສານເພື່ອຕັດສິນ.
ໝວດທີ 4
ບົດບັນຍັດສຸດທ້າຍ
ມາດຕາ 19. ຜົນສັກສິດໃນການຈັດຕັ້ງປະຕິບັດ
ຂໍ້ຕົກລົງສະບັບນີ້ ມີຜົນສັກສິດ ແລະ ນໍາໃຊ້ໄດ້ນັບແຕ່ວັນລົງລາຍເຊັນ ເປັນຕົ້ນໄປ. ທຸກຂໍ້ກໍານົດ, ກົດລະບຽບທີ່ວາງອອກໃນເມື່ອກ່ອນ, ທີ່ຂັດກັບເນື້ອໃນຈິດໃຈ ຂອງລະບຽບສະບັບນີ້ຈະຖືກລົບລ້າງ.
ລັດຖະມົນຕີ
ດຣ. ບຸນຈັນ ສິນທະວົງ
| # | ຫົວຂໍ້ | ດາວໂຫຼດ |
|---|---|---|
| 1 | ຂໍ້ຕົກລົງຂອງ ລັັດຖະມົນຕີ ວ່າດ້ວຍລະບຽບຄຸ້ມຄອງການຂໍອະນຸຍາດດຳເນີນທຸລະກິດໃນຂະແໜງການໂຍທາທິການ ແລະ ຂົນສົ່ງ ສະບັບເລກທີ 17582/ຍທຂ, ລົງວັນທີ 8 ສິງຫາ 2018 |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.