ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ
ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ເລກທີ 590/ປທສ.
ນະຄອນຫຼວງວຽງຈັນ, ວັນທີ 18 ມີນາ 2016
ຂໍ້ຕົກລົງ
ວ່າດ້ວຍ ການອະນຸຍາດດໍາເນີນກິດຈະການສູນກາງຂໍ້ມູນຂ່າວສານຜ່ານອິນເຕີເນັດ
- ອີງຕາມ ກົດໝາຍວ່າດ້ວຍ ການໂທລະຄົມມະນາຄົມ (ສະບັບປັບປຸງ) ສະບັບເລກທີ 09/ສພຊ, ລົງວັນທີ 21 ທັນວາ 2011;
- ອີງຕາມ ກົດໝາຍວ່າດ້ວຍ ການສົ່ງເສີມການລົງທຶນ ສະບັບເລກທີ 02/ສພຊ, ລົງວັນທີ 08 ກໍລະກົດ 2009;
- ອີງຕາມ ດໍາລັດຂອງນາຍົກລັດຖະມົນຕີວ່າດ້ວຍ ການຈັດຕັ້ງ ແລະ ເຄື່ອນໄຫວ ຂອງກະຊວງໄປສະນີ, ໂທລະຄົມມະນາຄົມ ແລະ ການສື່ສານ ສະບັບເລກທີ 303/ນຍ, ລົງວັນທີ 26 ກັນຍາ 2011.
ລັດຖະມົນຕີວ່າການ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ອອກຂໍ້ຕົກລົງ:
ໜວດທີ 1
ບົດບັນຍັດທົ່ວໄປ
ມາດຕາ 1. ຈຸດປະສົງ
ຂໍ້ຕົກລົງສະບັບນີ້ ກໍານົດຫຼັກການ, ລະບຽບການ ແລະ ມາດຕະການ ກ່ຽວກັບການອະນຸຍາດດໍາເນີນກິດຈະການສູນກາງຂໍ້ມູນຂ່າວສານຜ່ານອິນເຕີເນັດ ເພື່ອເປັນການຄຸ້ມຄອງ, ສົ່ງເສີມການດໍາເນີນກິດຈະການ ແລະ ພັດທະນາໂຄງລ່າງພື້ນຖານໄອຊີທີ ໃຫ້ມີຄວາມເປັນລະບຽບ, ເອກະພາບ, ມີມາດຕະຖານ ແລະ ຄຸນນະພາບແນ່ໃສ່ຮັບປະກັນວຽກງານການນໍາໃຊ້ ແລະ ໃຫ້ບໍລິການດ້ານຂໍ້ມູນຂ່າວສານ ຜ່ານລະບົບເຄືອຂ່າຍອິນເຕີເນັດໃຫ້ມີຄວາມສະດວກ, ວ່ອງໄວ ແລະ ປອດໄພ ປະກອບສ່ວນເຂົ້າໃນການພັດທະນາເສດຖະກິດສັງຄົມຂອງຊາດ.
ມາດຕາ 2. ການອະນຸຍາດດໍາເນີນກິດຈະການ ສູນກາງຂໍ້ມູນຂ່າວສານຜ່ານອິນເຕີເນັດ
ການອະນຸຍາດດໍາເນີນກິດຈະການສູນກາງຂໍ້ມູນຂ່າວສານຜ່ານອິນເຕີເນັດ ແມ່ນການອະນຸຍາດໃຫ້ບຸກຄົນ ຫຼື ນິຕິບຸກຄົນ ດໍາເນີນກິດຈະການ ເຊົ່າພື້ນທີ່ຕິດຕັ້ງອຸປະກອນ, ເຊົ່າບ່ອນວາງເຄື່ອງເຊີເວີ, ເຊົ່າໃຊ້ເຊີເວີ, ເຊົ່າພື້ນທີ່ເຊີເວີ, ເຊົ່າໃຊ້ຊອບແວຣ, ເຊົ່າໃຊ້ຖານຂໍ້ມູນ ແລະ ອື່ນໆ ໃຫ້ແກ່ບຸກຄົນ, ນິຕິບຸກຄົນ ແລະ ອົງການຈັດຕັ້ງ.
ມາດຕາ 3. ການອະທິບາຍຄໍາສັບ
ຄໍາສັບທີ່ນໍາໃຊ້ໃນຂໍ້ຕົກລົງສະບັບນີ້ ມີຄວາມໝາຍ ດັ່ງນີ້:
- ສູນກາງຂໍ້ມູນຂ່າວສານຜ່ານອິນເຕີເນັດ ໝາຍເຖິງ ລະບົບລວມສູນໂຄງລາງພື້ນຖານເຕັກນິກທີ່ປະກອບມີລະບົບອຸປະກອນທີ່ຈໍາເປັນ ເພື່ອສະໜອງບໍລິການ ເຊົ່າພື້ນທີ່ຕິດຕັ້ງອຸປະກອນ, ເຊົ່າບ່ອນວາງເຄື່ອງເຊີເວີ, ເຊົ່າໃຊ້ເຊີເວີ, ເຊົ່າພື້ນທີ່ເຊີເວີ, ເຊົ່າໃຊ້ຊອບແວຣ, ເຊົ່າໃຊ້ຖານຂໍ້ມູນ ແລະ ອື່ນໆ;
- ເຊີເວີ (Server) ໝາຍເຖິງ ຊຸດຄອມພິວເຕີຄວາມໄວສູງທີ່ໃຊ້ໄວ້ເຮັດວຽກສະເພາະ ເພື່ອໃຫ້ບໍລິການຫຼາຍຢ່າງໄດ້ພ້ອມໆກັນ ແລະ ເຮັດວຽກຕະຫຼອດ 24 ຊົ່ວໂມງໄດ້.
- ມາດຕະຖານ TIA-942 ໝາຍເຖິງ ມາດຕະຖານກ່ຽວກັບການສ້າງສູນກາງຂໍ້ມູນຂ່າວສານຜ່ານອິນເຕີເນັດທີ່ນິຍົມນໍາໃຊ້ເປັນບ່ອນອີງ ຊຶ່ງເນັ້ນໃສ່ ລາຍລະອຽດສະຖານທີ່, ໂຄງສ້າງອາຄານ, ຫ້ອງ, ລະບົບໄຟຟ້າ, ລະບົບຄວາມເຢັນ-ຄວາມຊຸ່ມ, ລະບົບເດີນສາຍໄຟຟ້າ-ສາຍຂໍ້ມູນ, ລະບົບຄວາມປອດໄພເຂົ້າ-ອອກ, ກ້ອງວົງຈອນປິດ, ລະບົບເຕືອນໄພ-ປ້ອງກັນໄພ, ກາໝາຍ, ລະບົບເກັບຂໍ້ມູນຫຼັກ-ສໍາຮອງ, ລະບົບກູ້ຄືນຂໍ້ມູນ ແລະ ອື່ນໆ ໂດຍແບ່ງອອກເປັນ 4 ລະດັບ Tier ຄື: Tier 1, Tier 2, Tier 3, ແລະ Tier 4 (Tier ແມ່ນລະດັບຄວາມສາມາດຂອງລະບົບ).
ມາດຕາ 4. ຂອບເຂດການນໍາໃຊ້
ຂໍ້ຕົກລົງສະບັບນີ້ ນໍາໃຊ້ສໍາລັບ ບຸກຄົນ ຫຼື ນິຕິບຸກຄົນ ທີ່ໃຫ້ບໍລິການສູນກາງຂໍ້ມູນຂ່າວສານຜ່ານອິນເຕີເນັດ ຢູ່ພາຍໃນ ສປປ ລາວ.
ໜວດທີ 2
ການອອກອະນຸຍາດ
ມາດຕາ 5. ໃບອະນຸຍາດດໍາເນີນກິດຈະການສູນກາງຂໍ້ມູນຂ່າວສານຜ່ານອິນເຕີເນັດ
ໃບອະນຸຍາດດໍາເນີນກິດຈະການສູນກາງຂໍ້ມູນຂ່າວສານຜ່ານອິນເຕີເນັດ ມີ 3 ແບບ ດັ່ງນີ້:
ແບບທີ 1: ແມ່ນໃບອະນຸຍາດສໍາລັບຜູ່ບໍລິການສູນກາງຂໍ້ມູນຂ່າວສານຜ່ານອິນເຕີເນັດ ຂະໜາດໃຫຍ່ ທີ່ມີອາຄານສະຖານທີ່ເປັນຂອງຕົນເອງ;
ແບບທີ 2: ແມ່ນໃບອະນຸຍາດສໍາລັບຜູ່ບໍລິການສູນກາງຂໍ້ມູນຂ່າວສານຜ່ານອິນເຕີເນັດ ຂະໜາດກາງ ທີ່ບໍ່ມີອາຄານເປັນຂອງຕົນເອງ ແຕ່ມີຫ້ອງເປັນຂອງຕົນເອງ;
ແບບທີ 3: ແມ່ນໃບອະນຸຍາດສໍາລັບຜູ່ບໍລິການສູນກາງຂໍ້ມູນຂ່າວສານຜ່ານອິນເຕີເນັດ ທີ່ໃຊ້ພື້ນທີ່ໃນຫ້ອງສູນກາງຂໍ້ມູນຂ່າວສານ ຂອງຜູ່ອື່ນ.
ມາດຕາ 6. ອາຍຸໃບອະນຸຍາດ
ອາຍຸໃບອະນຸຍາດດໍາເນີນກິດຈະການສູນກາງຂໍ້ມູນຂ່າວສານຜ່ານອິນເຕີເນັດ ແບ່ງເປັນ 2 ໄລຍະ ຄື:
- ໄລຍະທີ 1: ອອກໃບອະນຸຍາດຊົ່ວຄາວ ຊຶ່ງແຕ່ລະແບບມີອາຍຸ 01 ປີ;
- ໄລຍະທີ 2: ອອກໃບອະນຸຍາດສົມບູນ ຊຶ່ງແຕ່ລະແບບມີອາຍຸ ດັ່ງນີ້:
- ໃບອະນຸຍາດແບບທີ 1 ມີອາຍຸນໍາໃຊ້ 05 ປີ;
- ໃບອະນຸຍາດແບບທີ 2 ມີອາຍຸນໍາໃຊ້ 03 ປີ;
- ໃບອະນຸຍາດແບບທີ 3 ມີອາຍຸນໍາໃຊ້ 02 ປີ;
ມາດຕາ 7. ການຂໍອະນຸຍາດ
ບຸກຄົນ ຫຼື ນິຕິບຸກຄົນ ທີ່ຕ້ອງການດໍາເນີນກິດຈະການ ສູນກາງຂໍ້ມູນຂ່າວສານ ຜ່ານອິນເຕີເນັດ ຕ້ອງຂໍໃບອະນຸຍາດ ນໍາຂະແໜງໄປສະນີ, ໂທລະຄົມມະນາຄົມ ແລະ ການສື່ສານ (ປທສ).
ຜູ່ຂໍໃບອະນຸຍາດດໍາເນີນກິດຈະການສູນກາງຂໍ້ມູນຂ່າວສານຜ່ານອິນເຕີເນັດ ຕ້ອງປະກອບເອກະສານຄົບຖ້ວນ ຕາມທີ່ຂະແໜງ ປທສ ກໍານົດໄວ້ ຄື:
- ໃບຄໍາຮ້ອງ;
- ບັດປະຈໍາຕົວ/ໜັງສືຜ່ານແດນ;
- ຊີວະປະຫວັດຜູ່ບໍລິຫານ ແລະ ວິຊາການເຕັກນິກ;
- ໃບທະບຽນວິສາຫະກິດ;
- ບົດວິພາກເສດຖະກິດ ແລະ ແຜນຜັງເຕັກນິກ;
- ໃບຢັ້ງຢືນສະຖານະການເງິນ ຈາກທະນາຄານໃນ ສປປ ລາວ;
- ສັນຍາເຊົ່າເຄືອຂ່າຍ, ໂຄງລ່າງພື້ນຖານ ແລະ ອື່ນໆ;
- ເອກະສານອື່ນໆ ຕາມທີ່ຂະແໜງ ປທສ ກໍານົດ.
ໃນກໍລະນີໃຫ້ຜູ່ອື່ນມາຂໍອະນຸຍາດແທນ ຕ້ອງມີເອກະສານມອບສິດ ແລະ ເອກະສານທີ່ກ່ຽວຂ້ອງຢ່າງຄົບຖ້ວນ.
ມາດຕາ 8. ເງືອນໄຂພິຈາລະນາ ອອກໃບອະນຸຍາດ
ເງື່ອນໄຂໃນການພິຈາລະນາອອກໃບອະນຸຍາດ ດໍາເນີນກິດຈະການສູນຂໍ້ມູນຂ່າວສານຜ່ານອິນເຕີເນັດມີດັ່ງນີ້:
- ຕ້ອງປະກອບເອກະສານ ຄົບຖ້ວນ ແລະ ຖືກຕ້ອງ ຕາມການກໍານົດໃນມາດຕາ 7;
- ຕ້ອງມີວິຊາການທີ່ກ່ຽວຂ້ອງ ຕາມການກໍານົດຂອງຂະແໜງ ປທສ;
- ໃນກໍລະນີມີການນໍາໃຊ້ຊັບພະຍາກອນໂທລະຄົມມະນາຄົມ ຕ້ອງມີໃບອະນຸຍາດຈາກຂະແໜງ ປທສ;
- ຕ້ອງບໍ່ຢູ່ໃນຊ່ວງໄລຍະຖືກອາຍັດຊັບສິນ, ຢູ່ໃນຂະບວນການລົ້ມລະລາຍ ຫຼື ຖືກສານຕັດສິນເປັນຜູ່ລົ້ມລະລາຍ ຕາມກົດໝາຍຂອງ ສປປ ລາວ;
- ປະຕິບັດຕາມເງື່ອນໄຂອື່ນທີ່ຂະແໜງ ປສທ ກໍານົດໃຫ້.
ມາດຕາ 9. ໄລຍະເວລາພິຈາລະນາອອກໃບອະນຸຍາດ
ຂະແໜງ ປທສ ຈະພິຈາລະນາອອກໃບອະນຸຍາດ ຕາມໄລຍະເວລາຂອງແຕ່ລະປະເພດ ດັ່ງລຸ່ມນີ້:
- ການອອກໃບອະນຸຍາດໃໝ່ :
- ໃບອະນຸຍາດແບບ 1 ໃຊ້ເວລາພິຈາລະນາພາຍໃນ 30 ວັນລັດຖະການ;
- ໃບອະນຸຍາດແບບ 2 ໃຊ້ເວລາພິຈາລະນາພາຍໃນ 20 ວັນລັດຖະການ;
- ໃບອະນຸຍາດແບບ 3 ໃຊ້ເວລາພິຈາລະນາພາຍໃນ 15 ວັນລັດຖະການ;
- ການຕໍ່ໃບອະນຸຍາດ :
- ໃບອະນຸຍາດແບບ 1 ໃຊ້ເວລາພິຈາລະນາພາຍໃນ 15 ວັນລັດຖະການ;
- ໃບອະນຸຍາດແບບ 2 ໃຊ້ເວລາພິຈາລະນາພາຍໃນ 10 ວັນລັດຖະການ;
- ໃບອະນຸຍາດແບບ 3 ໃຊ້ເວລາພິຈາລະນາພາຍໃນ 05 ວັນລັດຖະການ;
ໃນກໍລະນີເອກະສານຂອງຜູ້ຮ້ອງຂໍບໍ່ຄົບຖ້ວນ, ບໍ່ຖືກຕ້ອງ ຫຼື ບໍ່ມີເງື່ອນໄຂພຽງພໍທີ່ຈະໄດ້ຮັບອະນຸຍາດຂະແໜງ ປທສ ຈະແຈ້ງໃຫ້ຜູ່່ຮ້ອງຂໍຊາບ ພາຍໃນ 05 ວັນລັດຖະການ.
ມາດຕາ 10. ການພິຈາລະນາອອກໃບອະນຸຍາດສົມບູນ
ຂະແໜງ ປທສ ຈະພິຈາລະນາອອກໃບອະນຸຍາດສົມບູນ ໃຫ້ແກ່ຜູ່ຮ້ອງຂໍທີ່ມີໃບອະນຸຍາດຊົ່ວຄາວແລ້ວ ແລະ ສາມາດປະຕິບັດໄດ້ຢ່າງໜ້ອຍ 60% ຂອງແຜນດໍາເນີນກິດຈະການ.
ມາດຕາ 11. ການຕໍ່ອາຍຸໃບອະນຸຍາດ
ການຕໍ່ອາຍຸໃບອະນຸຍາດດໍາເນີນກິດຈະການສູນກາງຂໍ້ມູນຂ່າວສານຜ່ານອິນເຕີເນັດ ຕ້ອງຍື່ນໃບຄໍາຮ້ອງຂໍຕໍ່ ກ່ອນວັນໝົດອາຍຸຢ່າງໜ້ອຍ 30 ວັນ ແລະ ຕ້ອງມີເງື່ອນໄຂດັ່ງນີ້:
- ຕ້ອງປະກອບເອກະສານຢ່າງຄົບຖ້ວນ ຕາມທີ່ຂະແໜງ ປທສ ກໍານົດໄວ້;
- ຕ້ອງມີໃບຢັ້ງຢືນການເສຍອາກອນຄົບຖ້ວນຈາກພາກສ່ວນທີ່ກ່ຽວຂ້ອງ;
- ຖ້າມີການນໍາໃຊ້ຊັບພະຍາກອນໂທລະຄົມມະນາຄົມ ຕ້ອງມີໜັງສືຢັ້ງຢືນການຊໍາລະຄ່າທໍານຽມ ແລະ ຄ່າບໍລິການ;
- ຜູ້ໄດ້ຮັບໃບອະນຸຍາດຊົ່ວຄາວແລ້ວ ຖ້າຫາກບໍ່ສາມາດປະຕິບັດໄດ້ 60% ຂອງແຜນການໃນປີທໍາອິດ ສາມາດຕໍ່ໃບອະນຸຍາດຊົ່ວຄາວໄດ້ອີກພຽງ 01 ຄັ້ງເທົ່ານັ້ນ ໂດຍຕ້ອງແຈ້ງເຫດຜົນເປັນລາຍລັກອັກສອນຕໍ່ຂະແໜງ ປທສ ພິຈາລະນາ.
ມາດຕາ 12. ການຂໍປ່ຽນແປງ, ໂຈະ ຫຼື ຍຸບເລີກ
ຜູ່ໃຫ້ບໍລິການສູນກາງຂໍ້ມູນຂ່າວສານຜ່ານອິນເຕີເນັດ ທີ່ຕ້ອງການປ່ຽນແປງເນື້ອໃນ, ໂຈະ ຫຼື ຍຸບເລີກໃບອະນຸຍາດດໍາເນີນກິດຈະການຂອງຕົນ ຕ້ອງໄດ້ຂໍອະນຸຍາດຈາກຂະແໜງ ປທສ ກ່ອນ ໂດຍມີການສະເໜີພ້ອມຊີ້ແຈງເຫດຜົນ ຢ່າງເປັນລາຍລັກອັກສອນ.
ມາດຕາ 13. ຂອບເຂດ ການໃຫ້ບໍລິການຂອງໃບອະນຸຍາດ
ບຸກຄົນ ຫຼື ນິຕິບຸກຄົນ ທີ່ຂໍອະນຸຍາດໃຫ້ບໍລິການສູນກາງຂໍ້ມູນຂ່າວສານຜ່ານອິນເຕີເນັດ ສາມາດເລືອກເອົາປະເພດບໍລິການຂອງຕົນ ທີ່ກໍານົດໄວ້ໃນເອກະສານຂັດຕິດ.
ຜູ່ໃຫ້ບໍລິການສູນກາງຂໍ້ມູນຂ່າວສານຜ່ານອິນເຕີເນັດທີ່ໄດ້ຮັບໃບອະນຸຍາດ ສາມາດໃຫ້ບໍລິການຕາມປະເພດການບໍລິການທີ່ລະບຸໄວ້ ໃນໃບອະນຸຍາດດໍາເນີນກິດຈະການຂອງຕົນເທົ່ານັ້ນ.
ໜວດທີ 3
ມາດຕະຖານເຕັກນິກ ແລະ ຄວາມປອດໄພ
ມາດຕາ 14. ມາດຕະຖານ ສະຖານທີ່
- ມາດຕະຖານ ທີ່ຕັ້ງ
ສູນກາງຂໍ້ມູນຂ່າວສານຜ່ານອິນເຕີເນັດ ຕ້ອງຕັ້ງຢູ່ໃນສະຖານທີ່ເໝາະສົມ, ບໍ່ແອອັດ, ຮັບປະກັນລົດດັບເພີງ ເຂົ້າ-ອອກ ໄດ້ງ່າຍ.
- ມາດຕະຖານ ອາຄານ
ໂຄງສ້າງອາຄານ ຂອງສູນກາງຂໍ້ມູນຂ່າວສານຜ່ານອິນເຕີເນັດ ຕ້ອງມີຝາອາຄານໜາຢ່າງໜ້ອຍ 20 ຊັງຕີແມັດ, ມີລະບົບປ້ອງກັນໄຟໃໝ້ ແລະ ອື່ນໆ ຕາມມາດຕະຖານ TIA-942 ຫຼື ທຽບເທົ່າ.
- ມາດຕະຖານຫ້ອງ
- ສູນກາງຂໍ້ມູນຂ່າວສານຜ່ານອິນເຕີເນັດ ຕ້ອງມີລະບົບໄຟຟ້າຫຼັກ-ສໍາຮອງ, ລະບົບຄວາມເຢັນ-ຄວາມຊຸ່ມ, ລະບົບລະບາຍອາກາດ, ລະບົບເດີນສາຍໄຟຟ້າ-ສາຍຂໍ້ມູນ, ລະບົບຖ້ານໃສ່ເຊີເວີ, ກາໝາຍ ແລະ ອື່ນໆ ຖືກຕ້ອງຕາມລະດັບມາດຕະຖານ TIA-942 ຫຼື ທຽບເທົ່າ;
- ພື້ນທີ່ຫ້ອງ ຕ້ອງສາມາດຮອງຮັບນໍ້າໜັກໄດ້ບໍ່ຕໍ່າກວ່າ 800 ກິໂລກຼາມ/ຕາແມັດ;
- ຜູ່ໃຫ້ບໍລິການ ຕ້ອງແຈ້ງບອກຊື່ມາດຕະຖານທີ່ຕົນເອງໃຊ້ ແລະ ກໍານົດລະດັບມາດຕະຖານຂອງຕົນ ເຊັ່ນ: Tier 1, Tier 2, Tier 3, ແລະ Tier 4 ຂອງສູນກາງຂໍ້ມູນຂ່າວສານຜ່ານອິນເຕີເນັດ.
ມາດຕາ 15. ມາດຕະຖານເຕັກນິກ
- ການເຊື່ອມຕໍ່ເຄືອຂ່າຍ
ຜູ່ດໍາເນີນກິດຈະການ ສູນກາງຂໍ້ມູນຂ່າວສານຜ່ານອິນເຕີເນັດ ຕ້ອງເຊື່ອມຕໍ່ຫາສູນອິນເຕີເນັດແຫ່ງຊາດໂດຍກົງ ຫຼື ຜ່ານຜູ້ໃຫ້ບໍລິການອິນເຕີເນັດ ເພື່ອສະດວກໃນການເຊື່ອມຕໍ່ກັບເຄືອຂ່າຍອື່ນ.
- ການເກັບຂໍ້ມູນ
- ຜູ່ໄດ້ຮັບໃບອະນຸຍາດ ຕ້ອງມີອຸປະກອນຕິດຕາມ ແລະ ເກັບກໍາຂໍ້ມູນທັງໝົດ ຂອງລູກຄ້າໂດຍອຸປະກອນດັ່ງກ່າວ ຕ້ອງຮັບປະກັນໃຫ້ສາມາດບັນທຶກຂໍ້ມູນ ໄດ້ຢ່າງສະໝໍ່າສະເໝີ, ຖືກຕ້ອງ ແລະ ເຊື່ອຖືໄດ້ ຕາມມາດຕະຖານທີ່ກະຊວງ ປທສ ກໍານົດໄວ້ ໃນແຕ່ລະໄລຍະ;
- ຕ້ອງມີລະບົບເກັບຂໍ້ມູນສໍາຮອງ ທີ່ຢູ່ໃນສະຖານະພ້ອມໃຊ້ງານ ເມື່ອລະບົບເກັບຂໍ້ມູນຫຼັກເກີດຂໍ້ຂັດຂ້ອງ ໃນທຸກກໍລະນີ.
- ອຸປະກອນ
- ອຸປະກອນທີ່ໃຊ້ໃນການບໍລິການສູນກາງຂໍ້ມູນຂ່າວສານຜ່ານອິນເຕີເນັດ ຕ້ອງຖືກຕ້ອງຕາມມາດຕະຖານເຕັກນິກ ໂດຍຜ່ານການກວດສອບ ແລະ ຮັບຮອງມາດຕະຖານ ຕາມທີ່ກະຊວງ ປທສ ກໍານົດ;
- ຜູ່ໄດ້ຮັບໃບອະນຸຍາດ ຕ້ອງບໍາລຸງຮັກສາ, ສ້ອມແປງ ແລະ ປັບປຸງ ເຄືອຂ່າຍອິນເຕີເນັດ ແລະ ອຸປະກອນຂອງຕົນ ໃຫ້ຢູ່ສະພາບທີ່ສາມາດໃຊ້ງານ ແລະ ໃຫ້ບໍລິການໄດ້ຢ່າງປົກກະຕິ ແລະ ຕ້ອງສໍາຮອງເຄື່ອງ ແລະ ອຸປະກອນທີ່ຈໍາເປັນ ເພື່ອສາມາດໃຫ້ບໍລິການໄດ້ຢ່າງມີຄຸນນະພາບ ພ້ອມທັງປະຕິບັດຕາມຂໍ້ຕົກລົງ, ຄໍາແນະນໍາ ແລະ ແຈ້ງການທີ່ກ່ຽວຂ້ອງ ຂອງກະຊວງ ປທສ;
- ອຸປະກອນທັງໝົດ ທີ່ປະກອບເຂົ້າເປັນລະບົບການໃຫ້ບໍລິການ ຕ້ອງຕັ້ງຢູ່ໃນ ສປປ ລາວ;
- ລະບົບອຸປະກອນຕ້ອງປະຢັດພະລັງງານ ແລະ ຮັບປະກັນ ບໍ່ສ້າງມົນລະຜິດທາງອາກາດ ແລະ ສຽງລົບກວນ ຕາມລະບຽບການກ່ຽວຂ້ອງ.
- ແຜນຜັງເຄືອຂ່າຍສູນກາງຂໍ້ມູນຂ່າວສານຜ່ານອິນເຕີເນັດ
ຜູ່ໄດ້ຮັບໃບອະນຸຍາດ ຕ້ອງເຮັດແຜນການຕິດຕັ້ງເຄືອຂ່າຍອຸປະກອນຕ່າງໆ ພາຍໃນສູນກາງຂໍ້ມູນຂ່າວສານຜ່ານອິນເຕີເນັດ ລວມເຖິງລະບົບປະຕິບັດການຕ່າງໆທີ່ກ່ຽວຂ້ອງ ໃຫ້ສອດຄ່ອງກັບເຕັກໂນໂລຊີ ແລະ ມາດຕະຖານ ທີ່ກະຊວງ ປທສ ກໍານົດໄວ້ແຕ່ລະໄລຍະ.
- ການປັບປຸງ ແລະ ຂະຫຍາຍ ລະບົບເຄືອຂ່າຍສູນກາງຂໍ້ມູນຂ່າວສານຜ່ານອິນເຕີເນັດ
ການປັບປຸງ ແລະ ຂະຫຍາຍລະບົບເຄືອຂ່າຍສູນກາງຂໍ້ມູນຂ່າວສານຜ່ານອິນເຕີເນັດເພີ່ມເຕີມ ເຊິ່ງອາດເຮັດໃຫ້ເກີດຜົນກະທົບຕໍ່ຜູ່ຊົມໃຊ້, ຜູ່ໄດ້ຮັບໃບອະນຸຍາດຕ້ອງແຈ້ງໃຫ້ກະຊວງ ປທສ ຮັບຊາບກ່ອນລ່ວງໜ້າ ແລະ ຕ້ອງຫາວິທີທາງໃຫ້ແກ່ຜູ່ຊົມໃຊ້ຂອງຕົນ ສາມາດນໍາໃຊ້ໄດ້ປົກກະຕິ ຈຶ່ງສາມາດດໍາເນີນການປັບປຸງລະບົບເຄືອຂ່າຍ.
ມາດຕາ 16. ມາດຕະຖານດ້ານຄວາມປອດໄພ
ຜູ່ໃຫ້ບໍລິການສູນກາງຂໍ້ມູນຂ່າວສານຜ່ານອິນເຕີເນັດ ຕ້ອງປະຕິບັດມາດຕະຖານຄວາມປອດໄພ ດັ່ງນີ້:
- ຕ້ອງມີລະບຽບການລະອຽດ ໃນການຄຸ້ມຄອງ, ການບໍາລຸງຮັກສາ ແລະ ລະບົບແກ້ໄຂບັນຫາສຸກເສີນຕ່າງໆ;
- ຕ້ອງມີລະບົບຄວາມປອດໄພເຂົ້າ-ອອກ, ລະບົບກ້ອງວົງຈອນປິດ ແລະ ລະບົບຕິດຕາມການເຮັດວຽກຂອງເຄື່ອງ;
- ຕ້ອງມີລະບົບເຕືອນໄພ ແລະ ລະບົບປ້ອງກັນໄຟໃໝ້;
- ຕ້ອງມີວິທີການທີ່ເໝາະສົມ ແລະ ທັນການ ເພື່ອຮັບປະກັນວ່າຂໍ້ມູນທັງໝົດຂອງຜູ້ໃຊ້ບໍລິການ ມີຄວາມປອດໄພ ແລະ ໄດ້ຮັບການປ້ອງກັນເປັນຢ່າງດີ;
- ຕ້ອງມີລະບົບປ້ອງກັນການໂຈມຕີ (Firewall, Anti-DDOS ແລະ ອື່ນໆ) ທັງຈາກພາຍນອກ ແລະ ພາຍໃນ ເພື່ອຮັບປະກັນຂໍ້ມູນຂອງຜູ່ໃຊ້ບໍລິການ;
- ຕ້ອງມີລະບົບກັ່ນຕອງ ຂໍ້ມູນເຂົ້າ-ອອກ (Filtering) ເພື່ອປ້ອງກັນ ການນໍາໃຊ້ສູນຂໍ້ມູນຂ່າວສານ ເປັນບ່ອນກະທໍາຄວາມຜິດ ຫຼຶ ໂຈມຕີຜູ່ອື່ນ.
ໝວດທີ 4
ສິດ ແລະ ພັນທະ ຂອງຜູ່ໃຫ້ບໍລິການ ແລະ ຜູ່ໃຊ້ບໍລິການ ສູນກາງຂໍ້ມູນຂ່າວສານຜ່ານອິນເຕີເນັດ
ມາດຕາ 17. ສິດ ແລະ ພັນທະ ຂອງຜູ່ໃຫ້ບໍລິການ
ຜູ່ໃຫ້ບໍລິການສູນກາງຂໍ້ມູນຂ່າວສານຜ່ານອິນເຕີເນັດ ມີສິດ ແລະ ພັນທະ ດັ່ງນີ້:
- ສະເໜີຂໍຕໍ່, ປ່ຽນແປງ, ໂຈະ ແລະ ຍຸບເລີກ ການດໍາເນີນກິດຈະການຂອງຕົນ;
- ໂຈະການບໍລິການຕໍ່ຜູ່ໃຊ້ບໍລິການ ເມື່ອຜູ່ໃຊ້ບໍລິການລະເມີດສັນຍາ ຫຼື ມິພຶດຕິກໍາທີ່ອາດສົ່ງຜົນກະທົບທາງລົບຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ;
- ປະຕິບັດຕາມລະບຽບການຂອງ ກະຊວງ ປທສ ກ່ຽວກັບການເຊື່ອມຕໍ່ເຄືອຂ່າຍຢູ່ພາຍໃນ ແລະ ອອກສູ່ຕ່າງປະເທດ;
- ເຄົາລົບສິດ ແລະ ເກັບຮັກສາຂໍ້ມູນສ່ວນຕົວຂອງຜູ່ໃຊ້ບໍລິການ ໂດຍຕ້ອງມີລະບຽບການ ແລະ ລະບົບເຕັກນິກ ເພື່ອຮັກສາຂໍ້ມູນສ່ວນຕົວຂອງຜູ່ໃຊ້ບໍລິການ;
- ບໍ່ເປີດເຜີຍຂໍ້ມູນສ່ວນຕົວຂອງຜູ່ໃຊ້ບໍລິການ ຍົກເວັ້ນມີການສະເໜີຂອງອົງການຈັດຕັ້ງລັດທີ່ມີສິດອໍານາດກ່ຽວຂ້ອງ;
- ມີເວັບໄຊເປັນຂອງຕົນເອງ ເພື່ອເປັນບ່ອນແຈ້ງຂໍ້ມູນຂ່າວສານຕ່າງໆແກ່ຜູ້ຊົມໃຊ້ ເປັນຕົ້ນ: ລາຄາ ປະເພດບໍລິການ ແລະ ຕ້ອງຮັບປະກັນຂໍ້ມູນ ໃຫ້ຖືກຕ້ອງກັບການບໍລິການຕົວຈິງໃນແຕ່ລະໄລຍະ;
- ຮັບປະກັນການໃຫ້ບໍລິການຢ່າງມີຄຸນນະພາບ ແລະ ຖືກຕ້ອງຕາມທີ່ໄດ້ແຈ້ງໃນເວັບໄຊ;
- ມີມາດຕະການ ໃນການແກ້ໄຂບັນຫາ ແລະ ຂໍ້ຂັດຂ້ອງທາງດ້ານເຕັກນິກ ໃຫ້ຜູ່ຊົມໃຊ້ໂດຍຕ້ອງແຈ້ງຜ່ານເວັບໄຊຂອງຕົນ ແລະ ລະບຸໃນສັນຍາການໃຫ້ບໍລິການແກ່ຜູ່ຊົມໃຊ້ຢ່າງຊັດເຈນ;
- ລາຍງານກ່ຽວກັບ ການໃຫ້ບໍລິການສູນກາງຂໍ້ມູນຂ່າວສານຜ່ານອິນເຕີເນັດຂອງຕົນ ຕາມການກໍານົດຂອງຂະແໜງ ປທສ ຢ່າງເປັນປົກກະຕິ;
- ຢູ່ພາຍໃຕ້ການຄຸ້ມຄອງ ແລະ ກວດກາ ຂອງຂະແໜງ ປທສ;
- ມອບພັນທະໃຫ້ລັດຕາມລະບຽບກົດໝາຍ;
- ປະຕິບັດສິດ ແລະ ພັນທະອື່ນ ຕາມທີ່ກໍານົດໄວ້ໃນລະບຽບກົດໝາຍ.
ມາດຕາ 18. ສິດ ແລະ ພັນທະຂອງຜູ່ໃຊ້ບໍລິການ
ຜູ່ໃຊ້ບໍລິການສູນກາງຂໍ້ມູນຂ່າວສານຜ່ານອິນເຕີເນັດ ມີສິດ ແລະ ພັນທະ ດັ່ງນີ້
- ໄດ້ຮັບການບໍລິການທີ່ມີຄຸນນະພາບ, ສະດວກ, ວ່ອງໄວ ແລະ ປອດໄພ;
- ທວງຖາມ ແລະ ຮ້ອງຟ້ອງຜູ່ໃຫ້ບໍລິການຕາມຂັ້ນຕອນຂອງຂະບວນການຍຸຕິທໍາ ເພື່ອໃຫ້ຄວາມເປັນທໍາຕໍ່ການສະໜອງບໍລິການແກ່ຜູ່ຊົມໃຊ້;
- ສະເໜີຕໍ່ອົງການຄຸ້ມຄອງ ແລະ ກວດກາ ກ່ຽວກັບ ຄຸນນະພາບການບໍລິການ, ມາດຕະຖານເຕັກນິກ ແລະ ຄ່າບໍລິການຕ່າງໆຂອງຜູ້ໃຫ້ບໍລິການສູນກາງຂໍ້ມູນຂ່າວສານຜ່ານອິນເຕີເນັດ;
- ຮັບຜິດຊອບຕໍ່ຂໍ້ມູນຂ່າວສານຂອງຕົນ ຊຶ່ງອາດເປັນຜົນກະທົບຕໍ່ບຸກຄົນ, ນິຕິບຸກຄົນ, ການຈັດຕັ້ງ ແລະ ສັງຄົມ ທີ່ເປັນການລະເມີດ ຕໍ່ລະບຽບກົດໝາຍ;
- ຈ່າຍຄ່າບໍລິການຕາມລະບຽບການ;
- ປະຕິບັດສິດ ແລະ ພັນທະອື່ນ ຕາມທີ່ກໍານົດໄວ້ໃນລະບຽບກົດໝາຍ.
ໝວດທີ 5
ຄ່າທໍານຽມ ແລະ ຄ່າບໍລິການ
ມາດຕາ 19. ຄ່າທໍານຽມ ແລະ ຄ່າບໍລິການ
ຄ່າທໍານຽມ ແລະ ຄ່າບໍລິການໃນການອອກໃບອະນຸຍາດດໍາເນີນກິດຈະການສູນກາງຂໍ້ມູນຂ່າວສານຜ່ານອິນເຕີເນັດ ແມ່ນໃຫ້ປະຕິບັດຕາມທີ່ໄດ້ກໍານົດໄວ້ໃນລະບຽບການສະເພາະກ່ຽວກັບຄ່າທໍານຽມ ແລະ ຄ່າບໍລິການທີ່ປະກາດໃຊ້ໃນແຕ່ລະໄລຍະ.
ໝວດທີ 6
ຂໍ້ຫ້າມ
ມາດຕາ 20. ຂໍ້ຫ້າມທົ່ວໄປ
ຫ້າມຜູ່ໃຫ້ບໍລິການສູນກາງຂໍ້ມູນຂ່າວສານຜ່ານອິນເຕີເນັດ ດໍາເນີນການຕໍ່ໄປນີ້:
- ດໍາເນີນກິດຈະການໂດຍບໍ່ໄດ້ຮັບອະນຸຍາດຈາກຂະແໜງ ປທສ;
- ນໍາໃບອະນຸຍາດໃຫ້ຜູ່ອື່ນນໍາໃຊ້, ເຊົ່າ ຫຼື ໂອນ;
- ໃຫ້ບໍລິການນອກເໜືອຈາກ ປະເພດການໃຫ້ບໍລິການ, ແບບໃບອະນຸຍາດ ຫຼື ຂອບເຂດມາດຕະຖານເຕັກນິກທີ່ກໍານົດໄວ້;
- ເຊື່ອມຕໍ່ເຄືອຂ່າຍ ໂດຍບໍ່ໄດ້ຮັບອະນຸຍາດ;
- ໂຄສະນາໃສ່ຮ້າຍປ້າຍສີຜູ່ໃຫ້ບໍລິການສູນກາງຂໍ້ມູນຂ່າວສານຜ່ານອິນເຕີເນັດ ລາຍອື່ນ;
- ການເຄື່ອນໄຫວຕ່າງໆ ທີ່ຂັດຕໍ່ຂໍ້ຕົກລົງສະບັບນີ້ ຫຼື ລະບຽບການອື່ນ ທີ່ກ່ຽວຂ້ອງ;
- ຜູກຂາດ ຫຼື ກີດກັນ ຜູ່ໃຫ້ບໍລິການລາຍໃໝ່;
- ອຸດໜູນ, ຄອບງໍາ ຫຼື ໃຊ້ອໍານາດການຕະຫຼາດທີ່ບໍ່ເປັນທໍາຕໍ່ຜູ່ປະກອບການລາຍຍ່ອຍ.
ມາດຕາ 21. ຂໍ້ຫ້າມສໍາລັບພະນັກງານຄຸ້ມຄອງ
ຫ້າມພະນັກງານຄຸ້ມຄອງ ການດໍາເນີນກິດຈະການສູນກາງຂໍ້ມູນຂ່າວສານຜ່ານອິນເຕີເນັດ ມີພຶດຕິກໍາດັ່ງນີ້:
- ກົດໜ່ວງ, ຖ່ວງດຶງ ແລະ ປອມແປງເອກະສານກ່ຽວກັບການໃຫ້ບໍລິການສູນກາງຂໍ້ມູນຂ່າວສານຜ່ານອິນເຕີເນັດ;
- ສວຍໃຊ້ໜ້າທີ່ຕໍາແໜ່ງ ເພື່ອຫາຜົນປະໂຫຍດສ່ວນຕົວກັບຜູ່ໃຫ້ບໍລິການສູນກາງຂໍ້ມູນຂ່າວສານຜ່ານອິນເຕີເນັດ;
- ເປີດເຜີຍຂໍ້ມູນລັບ ຂອງຜູ່ໃຫ້ບໍລິການ;
- ມີພຶດຕິກໍາອື່ນທີ່ລະເມີດລະບຽບກົດໝາຍ.
ໝວດທີ 7
ມາດຕະການຕໍ່ຜູ່ລະເມີດ
ມາດຕາ 22. ມາດຕະການຕໍ່ຜູ້ລະເມີດ
ບຸກຄົນ ຫຼື ນິຕິບຸກຄົນ ທີ່ໄດ້ລະເມີດຕໍ່ຂໍ້ຕົກລົງສະບັບນີ້ ຈະຖືກສຶກສາອົບຮົມ, ປັບໃໝ, ໂຈະ ຫຼື ຖອນ ໃບອະນຸຍາດດໍາເນີນກິດຈະການສູນກາງຂໍ້ມູນຂ່າວສານຜ່ານອິນເຕີເນັດ ແລ້ວແຕ່ກໍລະນີເບົາ ຫຼື ໜັກ ລວມທັງໃຊ້ແທນຄ່າເສຍຫາຍທີ່ຕົນໄດ້ກໍ່ຂຶ້ນ.
ມາດຕາ 23. ມາດຕະການສຶກສາອົບຮົມ
ບຸກຄົນ ຫຼື ນິຕິບຸກຄົນ ທີ່ລະເມີດຂໍ້ຕົກລົງສະບັບນີ້ ຈະຖືກສຶກສາອົບຮົມ, ກ່າວເຕືອນໃນກໍລະນີດັ່ງນີ້:
- ພະນັກງານຂອງລັດທີ່ເຮັດວຽກຄຸ້ມຄອງ ບໍ່ໃຫ້ຄວາມສະດວກ, ຊັກຊ້າ, ກົດໜ່ວງທ່ວງດຶງໃນການພິຈາລະນາຄໍາຮ້ອງຂໍອະນຸຍາດ ໂດຍບໍ່ມີເຫດຜົນ, ໃຊ້ມາລະຍາດ ແລະ ຄໍາເວົ້າທີ່ບໍ່ເໝາະສົມ;
- ຜູ່ໃຫ້ບໍລິການສູນກາງຂໍ້ມູນຂ່າວສານຜ່ານອິນເຕີເນັດ ບໍ່ໃຫ້ຄວາມສະດວກແກ່ຜູ້ຊົມໃຊ້ ຫຼື ລະເມີດຂໍ້ຫ້າມໃນສະຖານເບົາ.
ມາດຕາ 24. ມາດຕະການປັບໃໝ
ບຸກຄົນ ຫຼື ນິຕິບຸກຄົນ ທີ່ລະເມີດຂໍ້ຕົກລົງສະບັບນີ້ ຈະຖືກປັບໃໝ ດັ່ງນີ້:
- ດໍາເນີນກິດຈະການໂດຍບໍ່ໄດ້ຮັບອະນຸຍາດຈາກກະຊວງ ປທສ ຈະຖືກປັບໃໝ 50,000,000 ກີບ;
- ນໍາໃບອະນຸຍາດໃຫ້ຜູ່ອື່ນນຳໃຊ້, ເຊົ່າ ຫຼື ໂອນ ຈະຖືກປັບໃໝ 20,000,000 ກີບ;
- ໃຫ້ບໍລິການນອກເໜືອ ປະເພດການໃຫ້ບໍລິການ ຫຼື ຂອບເຂດພື້ນທີ່ ທີ່ໄດ້ຮັບອະນຸຍາດ ຈະຖືກປັບໃໝ 10,000,000 ກີບ;
- ຂະຫຍາຍສູນກາງຂໍ້ມູນຂ່າວສານຜ່ານອິນເຕີເນັດ ຫຼື ເຊື່ອມຕໍ່ເຄືອຂ່າຍ ໂດຍບໍ່ໄດ້ຮັບອະນຸຍາດຈະຖືກປັບໃໝ 20,000,000 ກີບ;
- ໂຄສະນາໃສ່ຮ້າຍປ້າຍສີຜູ່ໃຫ້ບໍລິການອື່ນ ຈະຖືກປັບໃໝ 5,000,000 ກີບ;
- ບໍ່ສະໜອງຂໍ້ມູນການເຊື່ອມຕໍ່ເຄືອຂ່າຍ ແລະ ສັນຍາການເຊື່ອມຕໍ່ເຄືອຂ່າຍ ໃຫ້ຄົບຖ້ວນ ແລະ ຖືກຕ້ອງ ຕໍ່ຂະແໜງ ປທສ ຈະຖືກປັບໃໝ 10,000,000 ກີບ;
- ບໍ່ບັກທຶກຂໍ້ມູນການນໍາໃຊ້ ແລະ ລາຍງານຕໍ່ຂະແໜງ ປທສ ຕາມທີ່ໄດ້ກໍານົດໄວ້ ຈະຖືກປັບໃໝ 10,000,000 ກີບ;
- ປັບປຸງ ແລະ ຂະຫຍາຍເພີ່ມເຕີມ ສູນກາງຂໍ້ມູນຂ່າວສານຜ່ານອິນເຕີເນັດ ເຊິ່ງອາດເຮັດ ໃຫ້ເກີດຜົນກະທົບຕໍ່ຜູ້ຊົມໃຊ້ ໂດຍບໍ່ແຈ້ງໃຫ້ຂະແໜງ ປທສ ຮັບຊາບກ່ອນລ່ວງໜ້າ ຈະຖືກປັບໃໝ 10,000,000 ກີບ;
- ບໍ່ເລີ່ມດໍາເນີນການພາຍໃນ 01 ປີ ຫຼື ບໍ່ສາມາດປະຕິບັດໃຫ້ໄດ້ຕາມແຜນຢ່າງໜ້ອຍ 60% ຂອງແຜນການແຕ່ລະປີ ຈະຖືກປັບໃໝ 20,000,000 ກີບ;
- ເປີດເຜີຍຂໍ້ມູນສ່ວນຕົວຂອງຜູ່ໃຊ້ບໍລິການ ໂດຍບໍ່ໄດ້ຮັບອະນຸຍາດຈາກເຈົ້າຂອງ ຈະຖືກປັບໃໝ 20,000,000 ກີບ;
- ຜູ່ໃຫ້ບໍລິການສູນກາງຂໍ້ມູນຂ່າວສານຜ່ານອິນເຕີເນັດ ໃຫ້ບໍລິການ ບໍ່ຖືກຕ້ອງຕາມທີ່ໄດ້ສັນຍາ ຫຼື ຕາມທີ່ໄດ້ແຈ້ງຕໍ່ຜູ່ຊົມໃຊ້ ຜ່ານສື່ຕ່າງໆ ຈະຖືກປັບໃໝ 20,000,000 ກີບ;
- ຕໍ່ໃບອະນຸຍາດດໍາເນີນກິດຈະການຊ້າກ່ອນກໍານົດ 30 ວັນ ຈະຖືກປັບໃໝ 20,000,000 ກີບ.
ມາດຕາ 25. ມາດຕະການໂຈະ ແລະ ຖອນໃບອະນຸຍາດ
ຂະແໜງ ປທສ ຈະພິຈາລະນາໂຈະໃບອະນຸຍາດດໍາເນີນກິດຈະການສູນກາງຂໍ້ມູນຂ່າວສານຜ່ານອິນເຕີເນັດ ໃນກໍລະນີ ດັ່ງລຸ່ມນີ້:
- ບໍລິການບໍ່ຖືກຕ້ອງຕາມທີ່ໄດ້ລະບຸໄວ້ໃນໃບອະນຸຍາດ;
- ປອມແປງ ຫຼື ສະໜອງຂໍ້ມູນ ທີ່ບໍ່ຖືກຕ້ອງຕາມການກໍານົດຂອງຂະແໜງ ປທສ;
- ບໍ່ຊໍາລະຄ່ານໍາໃຊ້ຊັບພະຍາກອນໂທລະຄົມມະນາຄົມ;
- ບໍ່ຕໍ່ອາຍຸໃບອະນຸຍາດ ຕາມທີ່ໄດ້ລະບຸໃນຂໍ້ຕົກລົງສະບັບນີ້;
- ເກັບຄ່າບໍລິການບໍ່ຖືກຕ້ອງຕາມລະບຽບກົດໝາຍທີ່ກໍານົດໄວ້;
- ບໍ່ຊໍາລະຄ່າທໍານຽມ, ຄ່າບໍລິການ ຫຼື ອາກອນ ໃຫ້ລັດ ຕາມລະບຽບການ;
- ຖືກປັບໃໝຕາມມາດຕາ 24 ຂອງຂໍ້ຕົກລົງສະບັບນີ້ ຈໍານວນ 02 ຄັ້ງ;
- ລະເມີດລະບຽບກົດໝາຍອື່ນທີ່ກ່ຽວຂ້ອງ.
ຂະແໜງ ປທສ ຈະພິຈາລະນາຖອນໃບອະນຸຍາດດໍາເນີນກິດຈະການສູນກາງຂໍ້ມູນຂ່າວສານຜ່ານອິກເຕີເນັດ ໃນກໍລະນີ ດັ່ງລຸ່ມນີ້:
- ຖືກໂຈະໃບອະນຸຍາດ ແຕ່ບໍ່ມີການປັບປຸງຕາມເງື່ອນໄຂທີ່ຂະແໜງ ປທສ ກໍານົດ;
- ນໍາໃບອະນຸຍາດໃຫ້ຜູ່ອື່ນນໍາໃຊ້, ເຊົ່າ ຫຼື ໂອນ ໂດຍບໍ່ໄດ້ຮັບອະນຸຍາດ;
- ບໍ່ດໍາເນີນການພາຍໃນ 01 ປິ ພາຍຫຼັງໄດ້ຕໍ່ໃບອະນຸຍາດຊົ່ວຄາວແລ້ວ;
- ຖືກປັບໃໝ ຕາມມາດຕາ 24 ຂອງຂໍ້ຕົກລົງສະບັບນີ້ ຈໍານວນ 03 ຄັ້ງ;
- ລະເມີດລະບຽບກົດໝາຍອື່ນທີ່ກ່ຽວຂ້ອງ.
ໝວດທີ 8
ບົດບັນຍັດສຸດທ້າຍ
ມາດຕາ 26. ການຈັດຕັ້ງປະຕິບັດ
ມອບໃຫ້ກົມເຕັກໂນໂລຊີຂໍ້ມູນຂ່າວສານ, ກະຊວງ ປທສ ສົມທົບກັບພາກສ່ວນອື່ນທີ່ກ່ຽວຂ້ອງຈັດຕັ້ງປະຕິບັດຂໍ້ຕົກລົງສະບັບນີ້ ຢ່າງເຂັ້ມງວດ.
ມາດຕາ 27. ຜົນສັກສິດ
ຂໍ້ຕົກລົງສະບັບນີ້ ມີຜົນສັກສິດນັບແຕ່ມື້ລົງລາຍເຊັນ ແລະ ພາຍຫຼັງທີ່ໄດ້ລົງໃນຈົດໝາຍເຫດທາງລັດຖະການ ສິບຫ້າ ວັນ.
ລັດຖະມົນຕີວ່າການ
ກະຊວງໄປສະນີ, ໂທລະຄົມມະນາຄົມ ແລະ ການສື່ສານ
ຫຽມ ພົມມະຈັນ
| # | ຫົວຂໍ້ | ດາວໂຫຼດ |
|---|---|---|
| 1 | ຂໍ້ຕົກລົງ ວ່າດ້ວຍ ການອະນຸຍາດດຳເນີນກິດຈະການສູນກາງຂໍ້ມູນຂ່າວສານ ຜ່ານອິນເຕີເນັດ ສະບັບເລກທີ 590/ປທສ, ລົງວັນທີ 18 ມີນາ 2016 |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.