ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ
ທະນາຄານແຫ່ງ ສປປ ລາວ
ເລກທີ 461/ຄລຊ
ກົມຄຸ້ມຄອງລະບົບຊໍາລະສະສາງ
ນະຄອນຫຼວງວຽງຈັນ, ວັນທີ 17 ມິຖຸນາ 2021
ແຈ້ງການ
ເຖິງ: ພໍ່ແມ່ປະຊາຊົນ, ຊາວຄ້າຂາຍ, ພະນັກງານ, ທະຫານ ແລະ ຕໍາຫຼວດ ໃນຂອບເຂດທົ່ວປະເທດ.
ເລື່ອງ: ລາຍຊື່ ຜູ້ຄວບຄຸມລະບົບການຊຳລະທຸລະກຳຍ່ອຍ, ຜູ້ໃຫ້ບໍລິການຊຳລະ ທີ່ໄດ້ຮັບອະນຸຍາດຈາກ ທະນາຄານແຫ່ງ ສປປ ລາວ.
- ອີງຕາມກົດໝາຍວ່າດ້ວຍທະນາຄານແຫ່ງ ສປປ ລາວ ສະບັບເລກທີ 47/ສພຊ, ລົງວັນທີ 19 ມິຖຸນາ 2018;
- ອີງຕາມກົດໝາຍວ່າດ້ວຍລະບົບການຊຳລະ ສະບັບເລກທີ 32/ສພຊ, ລົງວັນທີ 07 ພະຈິກ 2017;
- ອີງຕາມຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງກົມຄຸ້ມຄອງລະບົບຊໍາລະສະສາງ ສະບັບເລກທີ 959/ທຫລ, ລົງວັນທີ 18 ກັນຍາ 2017;
- ອິງຕາມຂໍ້ຕົກລົງວ່າດ້ວຍການໃຫ້ບໍລິການຊຳລະ ສະບັບເລກທີ 288/ທຫລ, ລົງວັນທີ 17 ມີນາ 2020.
ກົມຄຸ້ມຄອງລະບົບຊຳລະສະສາງ (ຄລຊ) ທະນາຄານແຫ່ງ ສປປ ລາວ ຂໍຖືເປັນກຽດແຈ້ງມາຍັງ ພໍ່ແມ່ປະຊາຊົນ, ຊາວຄ້າຂາຍ, ພະນັກງານ, ທະຫານ ແລະ ຕຳຫຼວດ ໃນຂອບເຂດທົ່ວປະເທດ ຊາບວ່າ: ປັດຈຸບັນ ຄລຊ ໄດ້ເຫັນດີ ແລະ ອອກອະນຸຍາດໃຫ້ ທະນາຄານທຸລະກິດ, ສະຖາບັນການເງິນທີ່ບໍ່ແມ່ນທະນາຄານ ແລະ ນິຕິບຸກຄົນ ດຳເນີນທຸລະກິດເປັນຜູ້ຄວບຄຸມລະບົບການຊໍາລະທຸລະກໍາຍ່ອຍ ແລະ ຜູ້ໃຫ້ບໍລິການຊໍາລະ ຈຳນວນຫຼາຍແຫ່ງ ແລະ ຫຼາຍປະເພດການໃຫ້ບໍລິການຊຳລະ ທີ່ສາມາດເຄື່ອນໄຫວວຽກງານລະບົບການຊຳລະ ຢ່າງຖືກຕ້ອງຕາມລະບຽບກົດໝາຍຂອງ ສປປ ລາວ ຊຶ່ງມີລາຍລະອຽດດັ່ງນີ້:
1. ຜູ້ຄວບຄຸມລະບົບການຊໍາລະທຸລະກໍາຍ່ອຍ ຈໍານວນ 01 ແຫ່ງ (ນິຕິບຸກຄົນ);
2. ຜູ້ໃຫ້ບໍລິການຊຳລະ ປະກອບມີ 4 ປະເພດຄື:
2.1 ຜູ້ໃຫ້ບໍລິການ ບັດຊໍາລະ (Card Payment) ມີທັງໝົດ 19 ແຫ່ງ;
2.2 ຜູ້ໃຫ້ບໍລິການ ເງິນເອເລັກໂຕຣນິກ (Electronic Money) ມີທັງໝົດ 10 ແຫ່ງ (ທະນາຄານທຸລະກິດ 6 ແຫ່ງ ແລະ ນິຕິບຸກຄົນ 4 ແຫ່ງ);
2.3 ຜູ້ໃຫ້ບໍລິການ ຮັບຊຳລະທາງເອເລັກໂຕຣນິກ (Electronic Acceptance) ມີທັງໝົດ 39 ແຫ່ງ ຄື:
2.3.1 ຜູ້ໃຫ້ບໍລິການ ແກ່ຜູ້ຮັບຊຳລະ (Acquirer) ມີ 26 ແຫ່ງ (ທະນາຄານທຸລະກິດ 22 ແຫ່ງ ແລະ ນິຕິບຸກຄົນ 04 ແຫ່ງ), ຕົວຢ່າງ: ການຮັບຊຳລະຄ່າສິນຄ້າ ແລະ ບໍລິການ ດ້ວຍບັດເຄືອຄ່າຍສາກົນ (Card Schreme) ຫຼື ແອັບພລິເຄຊັນຂອງ Alipay, Wechat, Unionpay ແລະ ອື່ນໆ ຜ່ານຊ່ອງທາງເຄື່ອງຮັບຊຳລະ EDC/POS ຫຼື QR Code;
2.3.2 ຜູ້ໃຫ້ບໍລິການ ຮັບຊໍາລະແທນ (Bill Payment) ມີ 20 ແຫ່ງ (ທະນາຄານທຸລະກິດ 17 ແຫ່ງ ແລະ ນິຕິບຸກຄົນ 03 ແຫ່ງ), ຕົວຢ່າງ: ການຮັບຊຳລະຄ່າໄຟຟ້າ, ນໍ້າປະປາ, ພາສີທີ່ດິນ, ຄ່າທຳນຽມທາງ ແລະ ອື່ນໆ ຜ່ານປ່ອງບໍລິການທະນາຄານ ຫຼື ແອັບພລິເຄຊັນ.
2.4 ຜູ້ໃຫ້ບໍລິການ ໂອນເງິນທາງເອເລັກໂຕຣນິກ (Electronic Money Transfer) ມີທັງໝົດ 42 ແຫ່ງ (ທະນາຄານທຸລະກິດ 39 ແຫ່ງ ແລະ ນິຕິບຸກຄົນ 03 ແຫ່ງ).
ລາຍລະອຽດ ຊື່, ປະເພດການໃຫ້ບໍລິການຊຳລະ, ຜະລິດຕະພັນ, ຊ່ອງທາງ ແລະ ເຄື່ອງໝາຍການຄ້າ (ໂລໂກ້) ຂອງຜະລິດຕະພັນໄດ້ຄັດຕິດມາພ້ອມນີ້ ຫຼື ສາມາດກວດສອບເພີ່ມຕື່ມໄດ້ທີ່ www.bol.gov.la
ນອກນັ້ນ, ຂໍແຈ້ງມາຍັງທ່ານຊາບວ່າ ຄລຊ ເປັນຜູ້ຄຸ້ມຄອງວຽກງານລະບົບການຊຳລະຢ່າງລວມສູນໃນຂອບເຂດ ທົ່ວປະເທດ ມີສິດໃນການຄົ້ນຄວ້າພິຈາລະນາອອກອະນຸຍາດວຽກງານລະບົບການຊໍາລະຕາມທີ່ໄດ້ກຳນົດໄວ້ໃນມາດຕາ 51 ແລະ ປະຕິບັດມາດຕະການຕໍ່ຜູ້ລະເມີດຕາມ ມາດຕາ 57 ຂອງ ກົດໝາຍວ່າດ້ວຍລະບົບການຊຳລະ. ກໍລະນີພົບເຫັນ ທະນາຄານທຸລະກິດ, ສະຖາບັນການເງິນທີ່ບໍ່ແມ່ນທະນາຄານ ຫຼື ນິຕິບຸກຄົນ ໃຫ້ບໍລິການທີ່ ບໍ່ໄດ້ຮັບອະນຸຍາດ ກະລຸນາແຈ້ງ ຫຼື ຕິດຕໍ່ສອບຖາມຂໍ້ມູນເພີ່ມຕື່ມໄດ້ທີ່ ພະແນກນະໂຍບາຍລະບົບຊຳລະ ກົມຄຸ້ມຄອງລະບົບຊໍາລະສະສາງ ທະນາຄານແຫ່ງ ສປປ ລາວ ທີ່ເບີໂທລະສັບ: 021 253595-7 ເປັນຕົ້ນ:
1. ການອອກເຄື່ອງມືການຊຳລະທຸກປະເທດ ໂດຍບໍ່ໄດ້ຮັບອະນຸຍາດ;
2. ການດໍາເນີນການໃຫ້ບໍລິການຊຳລະທຸກຮູບແບບໂດຍບໍ່ໄດ້ຮັບອະນຸຍາດ;
3. ການແອບອ້າງ ຫຼື ໂຄສະນາ, ບິດເບືອນ ທີ່ສ້າງຜົນເສຍຫາຍຕໍ່ລະບົບການຊຳລະ ແລະ ຜູ້ໃຫ້ບໍລິການຊຳລະ ລວມທັງ ຜູ້ໃຊ້ບໍລິການໃນສັງຄົມ;
4. ການມີພຶດຕິກໍາອື່ນທີ່ເປັນການລະເມີດກົດໝາຍວ່າດ້ວຍລະບົບການຊຳລະ ສະບັບເລກທີ 32/ສພຊ, ລົງວັນທີ 07 ພະຈິກ 2017.
5. ການໃຫ້ບໍລິການຊຳລະ ທີ່ມີລັກສະນະແປກໃໝ່ ເຊັ່ນ: ຊຳລະດ້ວຍເງິນຄຣິບໂຕ (Cryptocurrency) ຫຼື ບໍ່ໄດ້ລະບຸ ໄວ້ໃນແຈ້ງການສະບັບນີ້.
ດັ່ງນັ້ນ, ຈຶ່ງແຈ້ງມາຍັງພໍ່ແມ່ປະຊາຊົນ, ຊາວຄ້າຂາຍ, ພະນັກງານ, ທະຫານ ແລະ ຕຳຫຼວດ ໃນຂອບເຂດທົ່ວປະເທດ ເພື່ອຊາບ ແລະ ຈົ່ງມີສະຕິ ບໍ່ໃຫ້ຫຼົງເຊື່ອຕໍ່ການໂຄສະນາຊວນເຊື່ອ ແລະ ໃຊ້ບໍລິການຂອງພາກສ່ວນອື່ນທີ່ບໍ່ໄດ້ຮັບອະນຸຍາດຈາກ ກົມຄຸ້ມຄອງລະບົບຊຳລະສະສາງ ທະນາຄານແຫ່ງ ສປປ ລາວ.
ຫົວໜ້າກົມ
ສຸລີສັກ ທຳນຸວົງ
| # | ຫົວຂໍ້ | ດາວໂຫຼດ |
|---|---|---|
| 1 | ແຈ້ງການ ກ່ຽວກັບ ລາຍຊື່ ຜູ້ຄວບຄຸມລະບົບການຊໍາລະທຸລະກໍາຍ່ອຍ, ຜູ້ໃຫ້ບໍລິການຊໍາລະ ທີ່ໄດ້ຮັບອະນຸຍາດຈາກ ທະນາຄານແຫ່ງ ສປປ ລາວ, ເລກທີ 461/ຄລຊ, ລົງວັນທີ 17 ມິຖຸນາ 2021. |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.