ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ
ຫ້ອງວ່າການສຳນັກງານນາຍົກລັດຖະມົນຕີ ເລກທີ 885/ຫສນຍ
ນະຄອນຫຼວງວຽງຈັນ, ວັນທີ 28 ກໍລະກົດ 2021
ແຈ້ງການ
ຮຽນ: - ທ່ານ ລັດຖະມົນຕີ ກະຊວງອຸດສາຫະກຳ ແລະ ການຄ້າ ທີ່ນັບຖື.
- ທ່ານ ລັດຖະມົນຕີ ກະຊວງກະສິກໍາ ແລະ ປ່າໄມ້ ທີ່ນັບຖື.
- ທ່ານ ລັດຖະມົນຕີ ກະຊວງການເງິນ ທີ່ນັບຖື.
ເລື່ອງ: ທິດຊີ້ນຳກ່ຽວກັບການປັບປຸງນິຕິກຳ, ກົນໄກການປະຕິບັດ ແລະ ການເກັບລາຍຮັບຈາກໄມ້ ແລະ ຜະລິດຕະພັນຈາກໄມ້.
- ອີງຕາມດຳລັດ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 93/ນຍ, ລົງວັນທີ 03 ມີນາ 2017;
- ອີງຕາມການລາຍງານຂອງກະຊວງອຸດສາຫະກຳ ແລະ ການຄ້າ ຕໍ່ກອງປະຊຸມນາຍົກ-ຮອງນາຍົກລັດຖະມົນຕີ ໃນວັນທີ 20-21 ກໍລະກົດ 2021;
- ອີງຕາມການຕົກລົງ ແລະ ຊີ້ນຳຂອງປະຊຸມນາຍົກ-ຮອງນາຍົກລັດຖະມົນຕີ ໃນວັນທີ 20-21 ກໍລະກົດ 2021.
ຫ້ອງວ່າການສຳນັກງານນາຍົກລັດຖະມົນຕີ ຂໍຖືເປັນກຽວດແຈ້ງການຕົກລົງ ແລະ ຊີ້ນຳຂອງກອງປະຊຸມນາຍົກ-ຮອງນາຍົກລັດຖະມົນຕີ ມາຍັງທ່ານຊາບ ດັ່ງນີ້:
- ເຫັນດີໃຫ້ສົ່ງອອກຜະລິດຕະພັນ ທຸກຮູບແບບ (ປຸງແຕ່ງ ຫຼື ບໍ່ມີການປຸງແຕ່ງ) ຈາກໄມ້ປູກທຸກຊະນິດ ຕາມທີ່ໄດ້ກຳນົດໄວ້ໃນມາດຕາ 36 ຂອງກົດໝາຍປ່າໄມ້ (ສະບັບປັບປຸງ) ເລກທີ 64/ສພຊ, ລົງວັນທີ 13 ມິຖຸນາ 2019 ແລະ ດຳລັດວ່າດ້ວຍການສົ່ງເສີມການປູກໄມ້ເປັນສິນຄ້າ ເລກທີ 247/ລບ, ລົງວັນທີ 20 ສິງຫາ 2019 ແຕ່ໃຫ້ມີການກຳນົດໂກຕ້າສົ່ງອອກໃນແຕ່ລະປີ ບົນພື້ນຖານການອະນຸມັດຂອງລັດຖະບານ ແລະ ມີການຂື້ນທະບຽນສວນປູກ ຫຼື ໃບຢັ້ງຢືນສວນປູກ ຕາມລະບຽບການກ່ຽວຂ້ອງ.
- ສຳລັບໄມ້ປູກໃຫ້ໝາກທຸກຊະນິດ ເຊັ່ນ: ຕົ້ນມີ້, ຕົ້ນຂາມ, ຕົ້ນມ່ວງ ແລະ ຕົ້ນໄມ້ໃຫ້ໝາກ ຊະນິດອື່ນໆ ທີ່ປະຊາຊົນໄດ້ປູກ ແລະ ປົກປັກຮັກສາເປັນເວລາດົນນານ ທີ່ມີຈຸດປະສົງຕັດ ແລະ ສົ່ງອອກ ນັ້ນ, ໃຫ້ກະຊວງກະສິກຳ ແລະ ປ່າໄມ້ ຄົ້ນຄວ້າ ແລະ ອອກນິຕິກຳສະເພາະ ເພື່ອເປັນບ່ອນອີງໃນການຄຸ້ມຄອງ ແລະ ສົ່ງເສີມການປູກ ແລະ ການສົ່ງອອກ ໃນສະເພາະໜ້າ ແລະ ຍາວນານ.
- ເຫັນດີໃຫ້ເພີ່ມຂະໜາດໄມ້ ສຳລັບການສົ່ງອອກ 07 ລາຍການ ຄື:
- ໄມ້ປູພື້ນ ຊີ້ນດຽວ ເພີ່ມຂະໜາດຄວາມກວ້າງ ຈາກ 20 ຊມ ມາເປັນ 30 ຊມ;
- ໄມ້ແຜ່ນຮົ້ວ ເພີ່ມຂະໜາດຄວາມຍາວຈາກ 180 ຊມ ມາເປັນ 200 ຊມ;
- ໄມ້ວົງກົບ ປັບປຸງໃຫ້ສົ່ງອອກໄດ້ ໂດຍບໍ່ຜ່ານການປຸງແຕ່ງດ້ວຍການແລ່ນຮ່ອງບັງໃຍ, ແຕ່ຕ້ອງຜ່ານຂັ້ນຕອນ ຂອງການປຸງແຕ່ງເຊັ່ນ: ອົບ, ກົບລຽບ, ຕັດມຸມສາກຫົວວົງກົບ ຕົວຜູ້ ແລະ ຕົວແມ່ ທີ່ສາມາດປະກອບເປັນຊຸດ;
- ໄມ້ວົງກົບປ່ອງຢ້ຽມ ເພີ່ມຂະໜາດຄວາມໜາ ຈາກ 6 ຊມ ມາເປັນ 8 ຊມ;
- ໄມ້ວົງກົບປະຕູ ເພີ່ມຂະໜາດຄວາມໜາ ຈາກ 8 ຊມ ມາເປັນ 10 ຊມ;
- ໄມ້ລູກຕິ່ງ ຮູບຊົງສີ່ຫຼ່ຽມ ເພີ່ມຂະໜາດຄວາມໜາ ແລະ ຄວາມກວ້າງ ຈາກ (12x12) ຊມ ມາເປັນ (15x15) ຊມ;
- ໂຕະໜ້າມົນໄມ້ແຜ່ນດຽວສຳເລັດຮູບ ເພີ່ມຂະໜາດຄວາມໜາ ຈາກ 5 ຊມ ມາເປັນ 10 ຊມ.
- ເຫັນດີໃຫ້ເພີ່ມລາຍການຜະລິດຕະພັນໄມ້ ເພື່ອການສົ່ງອອກ ເຂົ້າໃໝ່ 02 ລາຍການຄື:
- ຜະລິດຕະພັນໄມ້ໂລງສົບສຳເລັບຮູບ;
- ຜະລິດຕະພັນໄມ້ ທີ່ເປັນຊີ້ນສ່ວນຂອງເຟີນີເຈີໄມ້ ພຽງຢ່າງດຽວ ກໍ່ສາມາດສົ່ງອອກໄດ້ ເຊັ່ນ: ສົ່ງອອກສະເພາະ ຂາໂຕະ, ຂາຕັ່ງ, ຂາຕຽງ ແລະ ອື່ນໆ ໂດຍບໍ່ຈຳເປັນຕ້ອງເປັນຊຸດເຟີນີເຈີ ສຳເລັດຮູບ. ແຕ່ທຸກຊີ້ນສ່ວນທີ່ໃຫ້ສົ່ງອອກ ຕ້ອງໄດ້ຜ່ານຂັ້ນຕອນຂອງການປຸງແຕ່ງ ດ້ວຍການກົບ, ຂັດ, ເຈາະຮູ ແລະ ຕັດຂະໜາດຕາມຮູບແບບຂອງຜະລິດຕະພັນໄມ້.
- ສຳລັບລາຍການຜະລິດຕະພັນຫວາຍ ແມ່ນອະນຸຍາດໃຫ້ສົ່ງອອກໄດ້ ທັງເຄິ່ງສຳເລັດຮູບ ແລະ ສຳເລັດຮູບ, ສ່ວນໄມ້ປ່ອງ ແມ່ນບໍ່ໄດ້ປັບປຸງຫຍັງ ໃຫ້ສົ່ງອອກໄດ້ໃນທຸກຮູບແບບ ທີ່ມີການປຸງແຕ່ງ ຫຼື ບໍ່ມີການປຸງແຕ່ງ ກໍໄດ້.
- ເຫັນດີໃຫ້ສົ່ງອອກໄມ້ຕົກຄ້າງຢູ່ທົ່ວປະເທດ ຈຳນວນ 258.117,36 (ສອງແສນຫ້າສິບແປດພັນໜຶ່ງຮ້ອຍສິບເຈັດ ຈຸດສາມສິບຫົົກ) ແມັດກ້ອນ ແລະ ມີໄມ້ຊັ່ງເປັນນ້ຳໜັກ 376,39 (ສາມຮ້ອຍເຈັດສິບຫົກ ຈຸດ ສາມສິບເກົ້າ) ໂຕນ ໂດຍໃຫ້ເກັບຄ່າຊັກພິເສດ ແລະ ຄ່າອື່ນໆທີ່ຕິດພັນ, ໂດຍມອບໃຫ້ກະຊວງອຸດສາຫະກຳ ແລະ ການຄ້າ ເປັນໃຈກາງສົມທົບກັບກະຊວງການເງິນ ແລະ ພາກສ່ວນກ່ຽວຂ້ອງ ລົງສົມທົບກັບອົງການປົກຄອງທ້ອງຖິ່ນ ຂື້ນບັນຊີໄມ້ຕົກຄ້າງທັງໝົດ ໃຫ້ລະອຽດ, ພ້ອມທັງເຮັດສັນຍາການມອບພັນທະ ທັງກຳນົດເວລາສົ່ງອອກ ໃຫ້ຊັດເຈນ ເພື່ອເປັນການລ້າງສາງໄມ້ຕົກຄ້າງທັງໝົດ ທີ່ມີໃນປັດຈຸບັນ ເພື່ອບໍ່ໃຫ້ມີຊ່ອງວ່າງສວຍໂອກາດ ຕັດໄມ້ມາເພີ່ມເຕີມອີກ.
- ເຫັນດີໃຫ້ເກັບຄ່າຊັກພິເສດ ສຳລັບການສົ່ງອອກຜະລິດຕະພັນໄມ້ເລື່ອຍແປຮູບ (ໄມ້ຕີຕັບ, ໄມ້ເລື່ອຍແປຮູບ ແລະ ໄມ້ຊ້ອຍ) ໃນອັດຕາ 30% ແລະ ຜະລິດຕະພັນໄມ້ເຄື່ອງສຳເລັດຮູບ ໃນອັດຕາ 15%.
ດັ່ງນັ້ນ, ຈຶ່ງແຈ້ງມາຍັງທ່ານ ເພື່ອຊາບ ແລະ ຈັດຕັ້ງປະຕິບັດຕາມເນື້ອໃນແຈ້ງການສະບັບນີ້ດ້ວຍ.
ລັດຖະມົນຕີ,
ຫົວໜ້າຫ້ອງວ່າການສຳນັກງານນາຍົກລັດຖະມົນຕີ
ຄໍາເຈນ ວົງໂພສີ
| # | ຫົວຂໍ້ | ດາວໂຫຼດ |
|---|---|---|
| 1 | ແຈ້ງການ ທິດຊີ້ນໍາກ່ຽວກັບການປັບປຸງນິຕິກໍາ, ກົນໄກການປະຕິບັດ ແລະ ການເກັບລາຍຮັບຈາກໄມ້ ແລະ ຜະລິດຕະພັນຈາກໄມ້, ເລກທີ 885/ຫສນຍ, ລົງວັນທີ 28 ກໍລະກົດ 2021 |  PDF |
ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.