ການສຶກສາເວລາກວດປ່ອຍສິນຄ້າປີ 2020 ດໍາເນີນທ່າມກາງການແຜ່ລະບາດຂອງພະຍາດ COVID-19 ຊຶ່ງການແຜ່ລະບາດຂອງພະຍາດດັ່ງກ່າວ ໄດ້ສົ່ງຜົນກະທົບຕໍ່ເສດຖະກິດ-ສັງຄົມເປັນວົງກ້ວາງ. ການຄ້າຂ້າມແດນ ກໍໄດ້ຮັບຜົນກະທົບຢ່າງຫຼີກລ້ຽງບໍ່ໄດ້ ອັນເນື່ອງຈາກ ການນໍາໃຊ້ມາດຕະການຄວບຄຸມຫຼາຍດ້ານຢູ່ດ່ານຊາຍແດນ ເຮັດໃຫ້ການນໍາເຂົ້າ ແລະ ສົ່ງອອກສິນຄ້າຢູ່ບາງດ່ານຊາຍແດນຢຸດສະຫງັດ ແລະ ຢູ່ບາງດ່ານຊາຍແດນກໍມີປະລິມານ ຫຼຸດລົງຫຼາຍສົມຄວນ.
ແນວໃດກໍຕາມ, ໂດຍປະຕິບັດຕາມແຜນງານອໍານວຍຄວາມສະດວກແຫ່ງຊາດ 2017-2022, ສັນຍາວ່າດ້ວຍການອໍານວຍຄວາມສະດວກທາງດ້ານການຄ້າຂອງອົງການການຄ້າໂລກ ແລະ ແຜນງານເຊື່ອມໂຍງເສດຖະກິດອາຊຽນ, ກອງເລຂາຄະນະກຳມະການອໍານວຍຄວາມສະດວກທາງດ້ານການຄ້າ ໄດ້ນໍາໃຊ້ບຸກຄະລະກອນຂອງຂະແໜງການລັດ ທີ່ກ່ຽວຂ້ອງ ແລະ ທຶນສະ ໜັບສະໜຸນຂອງໂຄງການ LCT ເຂົ້າໃນການສຶກສາ TRS 2020. ການສຶກສາໃນຄັ້ງນີ້ ແມ່ນໄດ້ອີງໃສ່ ຄູ່ມື TRS ຂອງອົງການພາສີໂລກ ສົມທົບກັບປະສົບການຂອງການສຶກສາ TRS ຫຼາຍຄັ້ງຜ່ານມາ.
ຜ່ານການເກັບກໍາຂໍ້ມູນ, ການວິເຄາະ ແລະ ຕີລາຄາ ສາມາດສັງລວມຜົນການສຶກສາໂດຍສັງເຂບ ດັ່ງນີ້:
ການຕີລາຄາ:
ຜ່ານການເກັບກໍາ ແລະ ວິເຄາະຂໍ້ມູນຢ່າງລະອຽດ, ຄະນະຮັບຜິດຊອບ TRS ຕີລາຄາໄດ້ ຄື:
- ຂັ້ນຕອນການອອກອະນຸຍາດນໍາເຂົ້າ ແລະ ສົ່ງອອກສິນຄ້າ ຢູ່ບັນດາຂະແໜງການລັດແມ່ນມີຄວາມແຕກຕ່າງກັນ ແລະ ໃຊ້ເວລາແຕກຕ່າງກັນພໍສົມຄວນ. ສັງເກດເຫັນວ່າ ມີບາງຂະແໜງການໄດ້ປັບປຸງຂັ້ນຕອນ ໃຫ້ກະທັດຮັດ ແລະ ສາມາດອອກອະນຸຍາດໄດ້ວ່ອງໄວ. ຂະນະດຽວກັນ ກໍຍັງມີບາງຂະແໜງການ ທີ່ຍັງມີ ປະຕິບັດຂັ້ນຕອນທີ່ສັບສົນ ໂດຍສະເພາະແມ່ນຂັ້ນຕອນວຽກບໍລິຫານ ຈຶ່ງເຮັດໃຫ້ໃຊ້ເວລາຂ້ອນຂ້າງຫຼາຍໃນການອອກອະນຸຍາດ.
- ກົມການນໍາເຂົ້າ ແລະ ສົ່ງອອກ, ກະຊວງອຸດສາຫະກໍາ ແລະ ການຄ້າ ໄດ້ເລີ່ມນໍາໃຊ້ລະບົບ LNSW ເຂົ້າໃນການອອກອະນຸຍາດນໍາເຂົ້າພາຫະນະ ຄວບຄູ່ກັບການນໍາໃຊ້ລະບົບເອກະສານເປັນເຈ້ຍ ໃນການອອກອະນຸຍາດນໍາເຂົ້າ ແລະ ສົ່ງອອກສິນຄ້າປະເພດອື່ນ ເຊັ່ນ: ນໍ້າມັນເຊື້ອໄຟ, ເຂົ້າສານ ແລະ ຜະລິດຕະພັນໄມ້. ການອອກອະນຸຍາດດ້ວຍລະບົບເປັນເອກະສານເປັນເຈ້ຍ ໃຊ້ເວລາ ໂດຍສະເລ່ຍ 1 ວັນ 5 ຊົ່ວໂມງ 50 ນາທີ, ໃຊ້ເວລາຕໍ່າສຸດ 30 ນາທີ ແລະ ໃຊ້ເວລາສູງສຸດ 5 ວັນ 25 ນາທີ.
ການອອກອະນຸຍາດດ້ວຍລະບົບເອເລັກໂຕຣນິກ ຜ່ານລະບົບ LNSW ໃຊ້ເວລາສະເລ່ຍ 1 ວັນ 2 ຊົ່ວໂມງ 15 ນາທີ ຊຶ່ງໃຊ້ເວລາສັ້ນກວ່າການອອກອະນຸຍາດດ້ວຍລະບົບເອກະສານເປັນເຈ້ຍ ພຽງແຕ່ 1 ຊົ່ວໂມງ 33 ນາທີ. ເຫັນວ່າ ການນໍາໃຊ້ລະບົບເອເລັກໂຕຣນິກ ຍັງບໍ່ທັນບັນລຸໄດ້ວັດຖຸປະສົງດ້ານການເພີ່ມຄວາມວ່ອງໄວໃນການອອກອະນຸຍາດ. ສາເຫດຕົ້ນຕໍ ເນື່ອງຈາກລະບົບເຄືອຄ່າຍຂາດຄວາມສະຖຽນ, ມີບາງຂັ້ນຕອນບໍ່ຈໍາເປັນ ເຊັ່ນ: ຂັ້ນຕອນການກວດກາການຄິດໄລ່ຄ່າທໍານຽມ ຊຶ່ງໃຊ້ເວລາຫຼາຍສົມຄວນ.
- ກົມຂົນສົ່ງ, ກະຊວງໂຍທາທິການ ແລະ ຂົນສົ່ງ ກໍເລີ່ມນໍາໃຊ້ລະບົບ LNSW ເຂົ້າໃນການອອກໜັງສືຢັ້ງຢືນເຕັກນິກນໍາເຂົ້າພາຫະນະ ສໍາລັບພາຫະນະນໍາເຂົ້າຜ່ານດ່ານພາສີສາກົນຂົວມິດຕະພາບ 1. ສ່ວນການນໍາເຂົ້າພາຫະນະຢູ່ດ່ານອື່ນ ຍັງດໍາເນີນການອອກໜັງສືຢັ້ງຢືນດ້ວຍລະບົບເອກະສານເປັນເຈ້ຍ. ການອອກໜັງສືຢັ້ງຢືນ ຢູ່ກົມຂົນສົ່ງ ດ້ວຍລະບົບເປັນເອກະສານເປັນເຈ້ຍໃຊ້ເວລາ ໂດຍສະເລ່ຍ 1 ວັນ 12 ຊົ່ວໂມງ 8 ນາທີ, ໃຊ້ເວລາຕໍ່າສຸດ 23 ນາທີ ແລະ ໃຊ້ເວລາສູງສຸດ 6 ວັນ 3 ຊົ່ວໂມງ 55 ນາທີ. ສັງເກດເຫັນວ່າພະນັກງານບໍລິຫານ ໃຊ້ເວລາໃນການສົ່ງເອກະສານຈາກພະແນກວິຊາການໄປຫາຫົວໜ້າ ແລະ ຮອງຫົວໜ້າກົມ ແລະ ການເຂົ້າເລກທີຂາອອກ ແລະ ຈໍ້າກາ ມີຂັ້ນຕອນສັບສົນ ແລະ ໃຊ້ເວລາຫຼາຍ.
ການນໍາໃຊ້ດ້ວຍລະບົບ LNSW ໃຊ້ເວລາ ສະເລ່ຍ 1 ວັນ 16 ຊົ່ວໂມງ 22 ນາທີ ຊຶ່ງໃຊ້ເວລາຫຼາຍກວ່າການອອກໜັງສືຢັ້ງຢືນດ້ວຍລະບົບເອກະສານເປັນເຈ້ຍ 4 ຊົ່ວໂມງ 14 ນາທີ. ສັງເກດເຫັນວ່າ ລະບົບ LNSW ຍັງຂາດຄວາມສະຖຽນ, ຄໍາສັ່ງໃຊ້ງານໃນລະບົບຍັງບໍ່ທັນຄົບຖ້ວນ ແລະ ພະນັກງານບາງຄົນຍັງບໍ່ທັນສາມາດນໍາໃຊ້ລະບົບ ດັ່ງກ່າວໄດ້ຢ່າງຄ່ອງແຄ້ວ.
- ກົມຄຸ້ມຄອງບໍ່ແຮ່, ກະຊວງພະລັງງານ ແລະ ບໍ່ແຮ່ ໃຊ້ເວລາສະເລ່ຍໃນການອອກອະນຸຍາດສົ່ງອອກແຮ່ທາດ ແມ່ນ 23 ຊົ່ວໂມງ 42 ນາທີ, ໃຊ້ເວລາຕໍ່າສຸດ 2 ຊົ່ວໂມງ 12 ນາທີ ແລະ ໃຊ້ເວລາສູງສຸດ 2 ວັນ 18 ຊົ່ວໂມງ 59 ນາທີ. ສັງເກດເຫັນວ່າ ພາຍຫຼັງຄົ້ນຄວ້າດ້ານວິຊາການແລ້ວ, ການນໍາສົ່ງເອກະສານເຂົ້າຫ້ອງຫົວໜ້າ ຫຼື ຮອງ ຫົວໜ້າກົມແມ່ນໃຫ້ເວລາຫຼາຍ ຊຶ່ງກວມເອົາ 32% ຂອງເວລາທັງໝົດ ແລະ ຫຼາຍກວ່າເວລາທີ່ ຫົວໜ້າກົມພິຈາລະນາອະນຸມັດເຖິງ 2 ຊົ່ວໂມງກວ່າ. ຫົວໜ້າກົມ ແລະ ຮອງຫົວໜ້າກົມ ກໍໃຊ້ເວລາຫຼາຍສົມຄວນໃນການອະນຸມັດ.
- ກົມລ້ຽງສັດ ແລະ ການປະມົງ, ກະຊວງກະສິກໍາ ແລະ ປ່າໄມ້ ຍັງນໍາໃຊ້ລະບົບເອກະສານເປັນເຈ້ຍໃນການອອກອະນຸຍາດນໍາເຂົ້າ ແລະ ສົ່ງອອກ ສັດ ແລະ ຜະລິດຕະພັນສັດ ຊຶ່ງໃຊ້ເວລາ ໂດຍສະເລ່ຍ 4 ວັນ 9 ຊົ່ວໂມງ 35 ນາທີ, ໃຊ້ເວລາຕໍ່າສຸດ 2 ວັນ 30 ນາທີ ແລະ ໃຊ້ເວລາສູງສຸດ 6 ວັນ 23 ຊົ່ວໂມງ 55 ນາທີ. ສັງເກດເຫັນວ່າ ເອກະສານທີ່ຜ່ານຂັ້ນຕອນຂາເຂົ້າແລ້ວ ຕ້ອງໄດ້ສົ່ງໃຫ້ຫົວໜ້າ ຫຼື ຮອງຫົວໜ້າກົມມີຄໍາເຫັນຊີ້ນໍາໃຊ້ພະແນກວິຊາການ ຊຶ່ງຂັ້ນຕອນນີ້ໃຊ້ເວລາຫຼາຍສົມຄວນ. ຂັ້ນຕອນການເຂົ້າເລກທີຂາອອກ ແລະ ຈໍາກາໃສ່ເອກະສານ ກໍໃຊ້ເວລາເຊັ່ນກັນ.
- ກົມອາຫານ ແລະ ຢາ, ກະຊວງສາທາລະນະສຸກ ຍັງນໍາໃຊ້ລະບົບເອກະສານເປັນເຈ້ຍໃນການອອກອະນຸ ຍາດ ນໍາເຂົ້າຜະລິດຕະພັນປະເພດຢາປົວພະຍາດຄົນ, ອຸປະກອນຮັບໃຊ້ການແພດ ແລະ ອາຫານເສີມ ຊຶ່ງໃຊ້ເວ ລາ ສະເລ່ຍ 3 ວັນ 7 ຊົ່ວໂມງ 52 ນາທີ, ໃຊ້ເວລາຕໍ່າສຸດ 4 ຊົ່ວໂມງ 52 ນາທີ ແລະ ໃຊ້ເວລາສູງສຸດ 9 ວັນ 21 ຊົ່ວໂມງ. ສັງເກດເຫັນວ່າມີບາງຂັ້ນຕອນຍັງໃຊ້ເວລາຫຼາຍ ເຊັ່ນ: ການສົ່ງເອກະສານ ຈາກພະແນກວິຊາການໃຫ້ຫົວໜ້າ ແລະ ຮອງຫົວໜ້າກົມ, ການພິຈາລະນາເຊັນອະນຸມັດຂອງຫົວໜ້າ ແລະ ຮອງຫົວໜ້າກົມ ແລະ ການເຂົ້າເລກທີຂາອອກ ແລະ ຈໍ້າກາໃບອະນຸຍາດ.
- ກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ ຍັງນໍາໃຊ້ລະບົບເອກະສານເປັນເຈັ້ຍໃນການອອກອະນຸຍາດນໍາເຂົ້ານໍ້າມັນເຊື້ອໄຟ ຊຶ່ງໃຊ້ເວລາໂດຍສະເລ່ຍ 1 ວັນ 3 ຊົ່ວໂມງ 34 ນາທີ, ໃຊ້ເວລາຕໍ່າສຸດ 19 ຊົ່ວໂມງ 30 ນາທີ ແລະ ໃຊ້ເວລາສູງສຸດ 1 ວັນ 22 ຊົ່ວໂມງ 30 ນາທີ. ສັງເກດເຫັນວ່າ ຜູ້ປະກອບການຍື່ນເອກະສານໃຫ້ພະແນກວິຊາການເລີຍ ໂດຍບໍ່ຜ່ານຂາເຂົ້າ-ຂາອອກ ເຮັດໃຫ້ຂັ້ນຕອນສັ້ນເຂົ້າ ແຕ່ການສົ່ງເອກະສານໃຫ້ຫົວໜ້າ ຫຼື ຮອງຫົວໜ້າກົມ ໃຫ້ເວລາຫຼາຍທີ່ສຸດ ຊຶ່ງກວມເອົາ 42% ຂອງເວລາລວມ. ຂັ້ນຕອນການຊໍາລະຄ່າທໍານຽມ, ເຂົ້າເລກທີ ແລະ ຈໍ້າກາ ກໍໃຊ້ເວລາຫຼາຍສົມຄວນ ຊຶ່ງກວມເອົາ 24% ຂອງເວລາລວມ.
- ເວລາສະເລ່ຍໃນການກວດປ່ອຍສິນຄ້າຢູ່ດ່ານຊາຍແດນຫຼຸດລົງປະມານ 40% ຈາກ 8 ຊົ່ວໂມງ 10 ນາທີ ໃນປີ 2019 ມາເປັນ 5 ຊົ່ວໂມງ 7 ນາທີ 2020. ມີ 6 ດ່ານຊາຍແດນ ທີ່ສາມາດກວດປ່ອຍສິນຄ້າໄດ້ໄວຂຶ້ນ ແຕ່ຂະນະດຽວກັນກໍ່ມີ 4 ດ່ານຊາຍແດນ ທີ່ກວດປ່ອຍສິນຄ້າໄດ້ຊ້າລົງ ຄື: ດ່ານຂົວມິດຕະພາບ 2, ດ່ານນໍ້າເຫືອງ, ດ່ານນໍ້າພາວ ແລະ ດ່ານວັງເຕົ່າ.
| # | ຫົວຂໍ້ | ດາວໂຫຼດ |
|---|---|---|
| 1 | Report on Time Release Study 2020 of Lao PDR |  PDF |
| 2 | ບົດລາຍງານການສຶກສາເວລາກວດປ່ອຍສິນຄ້າ ຢູ່ ສປປ ລາວ ປີ 2020 |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.