ໃນວັນທີ 03-04 ພຶດສະພາ 2012 ກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ ໄດ້ສຳເລັດການຈັດກອງປະຊຸມສຳມະນາເຜີຍແຜ່ແຜນຍຸດທະສາດການອໍານວຍຄວາມສະດວກທາງດ້ານການຄ້າ ຂອງ ສປປ ລາວ ໄລຍະປີ 2011-2015 ແລະ ປືກສາຫາລື ກ່ຽວກັບ ແຜນປະຕິບັດງານຂອງຍຸດທະສາດດັ່ງກ່າວ ສຳລັບສົກປີ 2012-2013 ໃຫ້ແກ່ 06 ແຂວງພາກເໜືອ (ແຂວງຜົ້ງສາລີ, ແຂວງຫຼວງນ້ຳທາ, ແຂວງຫົວພັນ, ແຂວງບໍ່ແກ້ວ, ແຂວງອຸດົມໄຊ ແລະ ແຂວງຫຼວງພະບາງ) ທີ່ຫ້ອງປະຊຸມ ຂອງ ພະແນກກະສິກຳ ແລະ ປ່າໄມ້ ແຂວງຫຼວງພະບາງ ເຊິ່ງມີຜູ້ເຂົ້າຮ່ວມລວມທັງໝົດ 120 ທ່ານ ທີ່ຕາງໜ້າໃຫ້ແກ່ທັງພາກລັດ (ພະແນກອຸດສາຫະກຳ ແລະ ການຄ້າແຂວງ, ຫ້ອງວ່າການແຂວງ, ພະແນກໂຍທາທິການ ແລະ ຂົນສົ່ງ, ພາສີເຂດ, ພະແນກສາທາລະນະສຸກ, ພະແນກກະສິກຳ ແລະ ປ່າໄມ້ແຂວງ, ພະແນກແຜນການ ແລະ ການລົງທຶນແຂວງ) ແລະ ພາກເອກະຊົນ (ສະພາການຄ້າ ແລະ ອຸດສາຫະກຳແຂວງ ແລະ ພາກທຸລະກິດນຳເຂົ້າ ແລະ ສົ່ງອອກ). ຊຶ່ງໄລຍະຜ່ານມາແມ່ນໄດ້ສໍາເລັດການຈັດກອງປະຊຸມໃນຫົວຂໍ້ດັ່ງກ່າວ ໃຫ້ແກ່ບັນດາແຂວງພາກກາງ ແລະ ພາກໃຕ້ ເປັນທີ່ຮຽບຮ້ອຍແລ້ວ. ກອງປະຊຸມໃນຄັ້ງນີ້ໄດ້ຮັບກຽດເປັນປະທານໂດຍ ທ່ານ ນາງ ເຂັມມະນີ ພົນເສນາ, ລັດຖະມົນຕີຊ່ວຍວ່າການ ກະຊວງອຸດສາຫະກຳ ແລະ ການຄ້າ ແລະ ທ່ານ ຄຳດົວ ເຢີຍປົວເຮີວ່າງ ຮອງເຈົ້າແຂວງ ແຂວງຫຼວງພະບາງ,
ກອງປະຊຸມດັ່ງກ່າວ ແນໃສ່ເຜີຍແຜ່ເນື້ອໃນຂອງຍຸດທະສາດການອຳນວຍຄວາມສະດວກທາງດ້ານການຄ້າ ຂອງ ສປປ ລາວ ໄລຍະປີ 2011-2015 ທີ່ໄດ້ຖືກຮັບຮອງຢ່າງເປັນທາງການຈາກລັດຖະບານ ອີງຕາມດຳລັດເລກທີ 213/ລບ ລົງວັນທີ 18 ກໍລະກົດ 2011 ເພື່ອສ້າງຄວາມເຂົ້າໃຈຕໍ່ກັບເນື້ອໃນຂອງຍຸດທະສາດດັ່ງກ່າວ ເພື່ອເຮັດໃຫ້ຂັ້ນຕອນການຄ້າມີຄວາມກະທັດຮັດ, ງ່າຍດາຍ, ໂປ່ງໃສ, ສະດວກວ່ອງໄວ ແລະ ກົມກຽວກັນຢ່າງເປັນລະບົບ ແລະ ໄດ້ມາດຕະຖານສາກົນ. ສິ່ງສຳຄັນທີ່ສຸດແມ່ນເພື່ອຈັດຕັ້ງຜັນຂະຫຍາຍຜົນກອງປະຊຸມໃຫຍ່ຄັ້ງທີ IX ຂອງພັກ, 04 ໜ້າທີ່ບຸກທະລຸ ໂດຍສະເພາະແມ່ນແຜນບຸກທະລຸ ເພື່ອແກ້ໄຂລະບອບລະບຽບທີ່ຍັງກົດໜ່ວງອັດຕາການຂະຫຍາຍຕົວຂອງພາກທຸລະກິດ.
ນອກນັ້ນ, ຍັງມີການເປີດເວທີປຶກສາຫາລື ແລະ ລະດົມຄວາມຄິດຕໍ່ກັບເນື້ອໃນຂອງຍຸດທະສາດ ເພື່ອສ້າງແຜນປະຕິບັດງານລະອຽດຂອງແຜນຍຸດທະສາດການອຳນວຍຄວາມສະດວກທາງດ້ານການຄ້າ ສໍາລັບສົກປີ 2012-2013. ກອງປະຊຸມໄດ້ຮັບຟັງການປະກອບຄຳເຫັນຈາກທັງພາກລັດ ແລະ ທຸລະກິດ ຢ່າງກົງໄປກົງມາ. ທ່ານຜູ້ແທນກອງປະຊຸມໄດ້ສະເໜີໃຫ້ຍົກສູງຄວາມຮັບຜິດຊອບຂອງພະນັກງານວິຊາການ ໃນການຈັດຕັ້ງປະຕິບັດບັນດານິຕິກຳໃຫ້ມີຄວາມເຂົ້າໃຈຢ່າງເຖິງຖອງ. ພ້ອມນັ້ນ, ກໍ່ສະເໜີໃຫ້ຂັ້ນສູງກາງແລະ ທ້ອງຖິ່ນ ມີຄວາມເປັນເອກະພາບກັນຫຼາຍຂັ້ນ ໃນການຈັດຕັ້ງປະຕິບັດລະບຽບການ ແລະ ນິຕິກຳ ແລະ ມີຄວາມປະສົງຢາກໃຫ້ພາກລັດມີແນວຄິດເປັນຜູ້ຮັບໃຊ້/ຜູ້ໃຫ້ບໍລິການທີ່ດີ. ນອກນັ້ນ, ເພື່ອຍົກສູງປະສິດຕິພາບຂອງພາກທຸລະກິດ ພາກລັດຄວນມີການເຜີຍແຜ່, ຈັດພີມ ບົດແນະນຳວິທີການດຳເນີນຂັ້ນຕອນເອກະສານຕ່າງໆ ໃຫ້ຫຼາຍຂຶ້ນ.
ພ້ອນນັ້ນ, ຍັງມີການເຜີຍແຜ່ລະບຽບການນຳເຂົ້າ ແລະ ສົ່ງອອກ ທີ່ໄດ້ປັບປຸງ ແລະ ອອກມາໃໝ່ ເປັນຕົ້ນແມ່ນດຳລັດວ່າດ້ວຍການນຳເຂົ້າ ແລະ ສົ່ງອອກສິນຄ້າ ສະບັບເລກທີ 114/ລບ, ລົງວັນທີ 06 ເມສາ 2011; ແຈ້ງການວ່າດ້ວຍລາຍການສິນຄ້າທີ່ຕ້ອງຂໍອະນຸຍາດນຳເຂົ້າ ແລະ ສົ່ງອອກ ແບບອັດຕະໂນມັດ ແລະ ແບບບໍ່ອັດຕະໂນມັດ ສະບັບປັບປຸງໃໝ່; ແລະ ຂໍ້ຕົກລົງວ່າດ້ວຍການມອບສິດ ໃຫ້ສະພາການຄ້າ ແລະ ອຸດສາຫະກຳ ແຫ່ງຊາດລາວ ອອກ ແລະ ຄຸ້ມຄອງໃບຢັ້ງ ຢືນແຫຼ່ງກຳເນີດສິນຄ້າ ປະເພດທີ່ໄດ້ຮັບສິດທິພິເສດທາງດ້ານການຄ້າ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.