ໂດຍປະຕິບັດຕາມເນື້ອໃນບົດບັນທຶກກອງປະຊຸມການຮ່ວມມືພັດທະນາການຄ້າຊາຍແດນ ລາວ-ຫວຽດນາມ ຄັ້ງທີ XI ແລະ ແຜນການຮ່ວມມື ລະຫວ່າງ ສອງກະຊວງອຸດສາຫະກຳ ແລະ ການຄ້າ ລາວ-ຫວຽດນາມ ປະຈໍາປີ 2022, ໃນວັນທີ 11 ເມສາ 2022, ທີ່ໂຮງແຮມ ຄລາວພລາຊາ, ນະຄອນຫຼວງວຽງຈັນ, ກະຊວງອຸດສາຫະກຳ ແລະ ການຄ້າ ລາວ ໄດ້ເປັນເຈົ້າພາບຈັດກອງປະຊຸມການຮ່ວມມືພັດທະນາການຄ້າຊາຍແດນ ລາວ-ຫວຽດນາມ ຄັ້ງທີ XII ຂຶ້ນ ໂດຍການເປັນປະທານຮ່ວມ ຂອງທ່ານ ປອ ຄໍາແພງ ໄຊສົມແພງ, ກໍາມະການສູນກາງພັກ, ລັດຖະມົນຕີກະຊວງອຸດສາຫະກໍາ ແລະ ການຄ້າ ແລະ ທ່ານ ຫງວຽນ ຮົງ ຢຽນ, ກໍາມະການສູນກາງພັກ, ລັດຖະມົນຕີກະຊວງອຸດສາຫະກຳ ແລະ ການຄ້າ ສສ ຫວຽດນາມ. ກອງປະຊຸມຄັ້ງນີ້ ມີຜູ້ແທນຂັ້ນສູງຂອງສອງກະຊວງອຸດສາຫະກຳ ແລະ ການຄ້າ, ທ່ານ ເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ ຫວຽດນາມ, ບັນດາການນໍາຂອງແຂວງທີ່ມີຊາຍແດນຕິດຈອດລາວ-ຫວຽດນາມ, ນັກທຸລະກິດ ແລະ ພາກສ່ວນທີ່ກ່ຽວຂ້ອງຂອງສອງປະເທດເຂົ້າຮ່ວມ.
ກອງປະຊຸມການຮ່ວມມືພັດທະນາການຄ້າຊາຍແດນ ລາວ - ຫວຽດນາມ ແມ່ນຈະໄດ້ຈັດຂຶ້ນໃນທຸກໆສອງປີ ໂດຍຜັດປ່ຽນກັນເປັນເຈົ້າພາບ, ຄັ້ງລ່າສຸດຄືຄັ້ງທີ XI ແມ່ນຝ່າຍຫວຽດນາມເປັນເຈົ້າພາບ ຊຶ່ງໄດ້ຈັດຂຶ້ນໃນລະຫວ່າງວັນທີ 26-28 ກັນຍາ 2018 ທີ່ ແຂວງ ກວາງບິງ ສສ ຫວຽດນາມ, ແລະ ກອງປະຊຸມຄັ້ງທີ XII ນີ້ ທີ່ເປັນຜຽນຂອງ ສປປ ລາວ ເປັນເຈົ້າພາບ ຕາມແຜນການແມ່ນຈະຈັດໃນປີ 2020 ແຕ່ຍ້ອນສະພາບການແຜ່ລະບາດຂອງພະຍາດໂຄວິດ-19 ໄດ້ເຮັດໃຫ້ການຈັດກອງປະຊຸມດັ່ງກ່າວ ລ່າຊ້າມາຮອດປີ 2022.
ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອຕີລາຄາຄືນສະພາບການຮ່ວມມືພັດທະນາການຄ້າຊາຍແດນໃນໄລຍະຜ່ານມາ ແລະ ຮ່ວມກັນປຶກສາຫາລືຊອກຫາມາດຕະການແກ້ໄຂຂໍ້ຫຍຸ້ງຍາກຕ່າງໆທີ່ເກີດຂຶ້ນ ພ້ອມທັງຮ່ວມກັນວາງແຜນການຮ່ວມມືໃນຕໍ່ໜ້າ ເພື່ອໃຫ້ວຽກງານການຄ້າເວົ້າລວມ, ເວົ້າສະເພາະແມ່ນການຄ້າຊາຍແດນ ສາມາດປະກອບສ່ວນເຂົ້າໃນການປະຕິບັດເປົ້າໝາຍການຮ່ວມມືຮອບດ້ານຂອງສອງຊາດ ໂດຍສະເພາະແມ່ນເປົ້າໝາຍການຮ່ວມມືທາງດ້ານເສດຖະກິດ ທີ່ສອງລັດຖະບານໄດ້ກຳນົດໄວ້ ໃນກອງປະຊຸມຂອງຄະນະກໍາມະທິການຮ່ວມມືທະວິພາຄີ ຄັ້ງທີ 44 ທີ່ນະຄອນຫຼວງຮ່າໂນ້ຍ ໃນວັນທີ 10 ມັງກອນ 2022, ສັນຍາການຮ່ວມມື 5 ປີ 2021-2025 ແລະ ຂໍ້ຕົກລົງ ວ່າດ້ວຍຍຸດທະສາດການຮ່ວມມື 10 ປີ 2021-2030 ຂອງສອງລັດຖະບານ. ພ້ອມດຽວກັນນີ້, ກອງປະຊຸມ ຄັ້ງນີ້ ເປັນກິດຈະກໍາໜຶ່ງ ໃນການປະກອບສ່ວນເຂົ້າໃນການສະເຫຼີມສະຫຼອງປີສາມັກຄີມິດຕະພາບ ສອງວັນປະຫວັດ ສາດຂອງສອງຊາດ ຄື: ວັນສ້າງຕັ້ງສາຍພົວພັນການທູດ ລະຫວ່າງ ລາວ-ຫວຽດນາມ ຄົບຮອບ 60 ປີ (5/9/1962-5/9/2022) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ (18/7/1977-18/7/2022).
ທັງສອງຝ່າຍລາວ-ຫວຽດນາມ ໄດ້ເຫັນດີເປັນເອກະພາບຕໍ່ກັບເນື້ອໃນບົດລາຍງານຂອງກະຊວງອຸດສາຫະກໍາ ແລະ ການຄ້າ ຂອງ ສປປ ລາວ ກ່ຽວກັບຜົນການຈັດຕັ້ງປະຕິບັດວຽກງານການຄ້າຊາຍແດນ ລາວ-ຫວຽດນາມ ໃນໄລຍະຜ່ານມາ ພ້ອມທັງການຕີລາຄາຂໍ້ສະດວກ, ຂໍ້ຫຍຸ້ງຍາກ ຕະຫຼອດເຖິງແນວທາງ ແລະ ແຜນການຮ່ວມມືພັດທະນາການຄ້າຊາຍແດນ ໃນຕໍ່ໜ້າ. ສໍາລັບຜົນຂອງກອງປະຊຸມ ໄດ້ສະຫຼຸບໄດ້ດັ່ງນີ້:
- ໃນໄລຍະຜ່ານມາ, ເຖິງແມ່ນວ່າທັງສອງປະເທດ ພົບບັນຫາຫຍຸ້ງຍາກໃນຫຼາຍດ້ານ ໂດຍສະເພາະການລະບາດຂອງພະຍາດໂຄວິດ-19 ແລະ ໄພທໍາມະຊາດ, ແຕ່ຍ້ອນທັງສອງລັດຖະບານ ໄດ້ມີແນວທາງການແກ້ໄຂບັນຫາທີ່ທັນຕໍ່ສະພາບການ ແລະ ເວລາ, ນໍາໃຊ້ບັນດາມາດຕະການທີ່ມີປະສິດທິພາບ ເພື່ອແກ້ໄຂບັນຫາ ເຮັດໃຫ້ສາມາດແກ້ໄຂບັນຫາເສດຖະກິດ-ສັງຄົມ ແລະ ຮັບປະກັນໄດ້ວຽກງານການປ້ອງກັນ ແລະ ສະກັດກັ້ນການແຜ່ລະບາດ ຂອງເຊື້ອພະຍາດໂຄວິດ-19 ເຮັດໃຫ້ມູນຄ່າການຄ້າສອງຝ່າຍ ໃນປີ 2021 ສາມາດບັນລຸໄດ້ຫຼາຍກວ່າ 1,37 ຕື້ໂດລາສະຫະລັດ ເພີ່ມຂຶ້ນ 33,32% ທຽບໃສ່ປີ 2020 ເຊິ່ງເປັນມູນຄ່າການຄ້າສອງຝ່າຍສູງສຸດໃນຮອບ 10 ປີ.
- ສອງຝ່າຍ ລາວ-ຫວຽດນາມ ເຫັນດີຮ່ວມກັນຄົ້ນຄວ້າ ແລະ ປັບປຸງເນື້ອໃນ ຂອງສັນຍາການຄ້າ ແລະ ສັນຍາ ການຄ້າຊາຍແດນການຄ້າ ທີ່ໄດ້ໃນລົງນາມໃນປີ 2015 ແລະ ຂໍ້ຕົກລົງ ຮ່າໂນຍ 2007 ກ່ຽວກັບການອໍານວຍຄວາມສະດວກໃຫ້ແກ່ຄົນ, ສິນຄ້າ ແລະ ພາຫະນະ ເຂົ້າ-ອອກ ຜ່ານດ່ານຊາຍແດນ ຂອງສອງປະເທດ ໃຫ້ແທດເໝາະກັບສະພາບການຕົວຈິງ ກໍຄືໃຫ້ສອດຄ່ອງກັບເນື້ອໃນຂອງສັນຍາການຮ່ວມມື 5 ປີ 2021-2025 ແລະ ຂໍ້ຕົກລົງ ວ່າດ້ວຍຍຸດທະສາດການຮ່ວມມື 10 ປີ 2021-2030 ຂອງສອງລັດຖະບານ.
- ສອງຝ່າຍ ສ້າງເງື່ອນໄຂອໍານວຍຄວາມສະດວກໃຫ້ແກ່ການເຂົ້າເຖິງຕະຫຼາດຂອງກັນ ແລະ ກັນ ຂອງສິນຄ້າປະເພດຕ່າງໆ ໂດຍສະເພາະແມ່ນສິນຄ້າປະເພດກະສິກຳ.
- ໂດຍລວມແລ້ວ, ການຈັດຕັ້ງປະຕິບັດວຽກງານການຄ້າ ກໍ່ຄືວຽກງານການຄ້າຊາຍແດນ ເຫັນວ່າ ມີດ້ານດີ. ຫຼາຍດ້ານ, ແຕ່ກໍປາສະຈາກບໍ່ໄດ້ບາງຂໍ້ຫຍຸ້ງຍາກ ແລະ ຈໍາກັດ ຊຶ່ງທັງສອງຝ່າຍ ລາວ-ຫວຽດນາມ ຕ້ອງໄດ້ສືບຕໍ່ປະສານສົມທົບກັນ ຄົ້ນຄວ້າ, ປັບປຸງ ແລະ ຍົກລະດັບກົນໄກຮ່ວມມືຕ່າງໆທີ່ມີຢູ່ ລະຫວ່າງສອງຝ່າຍ ເພື່ອກໍານົດເປັນມາດຕະການແກ້ໄຂ ຢ່າງເໝາະສົມ.
- ສໍາລັບກອງປະຊຸມການຮ່ວມມືພັດທະນາການຄ້າຊາຍແດນ ລາວ-ຫວຽດນາມ ຄັ້ງຕໍ່ໄປ (ຄັ້ງທີ XIII) ຈະຈັດຂຶ້ນໃນປີ 2024 ທີ່ ສສ ຫວຽດນາມ. ສໍາລັບວັນເວລາ ແລະ ສະຖານທີ່ໃນການຈັດກອງປະຊຸມຢ່າງເປັນທາງການ ແມ່ນຝ່າຍເຈົ້າພາບຈະເປັນຜູ້ກຳນົດ ແລະ ແຈ້ງໃຫ້ກັນຊາບຕາມພາຍຫຼັງ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.