ກະຊວງ ອຸດສາຫະກໍາ ແລະ ການຄ້າ ໄດ້ອອກ ຄໍາແນະນໍາ ກ່ຽວກັບການສົ່ງອອກຜະລິດຕະພັນໄມ້ທໍາມະຊາດໄປຕ່າງປະເທດ ເລກທີ 0332/ອຄ, ລົງວັນທີ 22 ມີນາ 2022. ການສົ່ງອອກຜະລິດຕະພັນໄມ້ທຳມະຊາດໄປຕ່າງປະເທດ ແມ່ນການສົ່ງອອກຜະລິດຕະພັນໄມ້ ທີ່ນໍາໃຊ້ວັດຖຸດິບຈາກປ່າທໍາມະຊາດ ເພື່ອປຸງແຕ່ງເປັນຜະລິດຕະພັນ ຕາມຂໍ້ຕົກລົງ ວ່າດ້ວຍການຮັບຮອງເອົາລາຍການຜະລິດຕະພັນໄມ້ເພື່ອສົ່ງອອກ ທີ່ກະຊວງອຸດສາຫະກໍາ ແລະ ການຄ້າ ໄດ້ຮັບຮອງ ແລະ ປະກາດໃຊ້ໃນແຕ່ລະໄລຍະ. ການກຳນົດຊະນິດໄມ້ ແມ່ນໃຫ້ຖືເອົາຕາມ ຂໍ້ຕົກລົງວ່າດ້ວຍການກຳນົດບັນຊີໄມ້ I, II, III ທີ່ ກະຊວງກະສິກຳ ແລະ ປ່າໄມ້ ໄດ້ຮັບຮອງ ແລະ ປະກາດໃຊ້ໃນແຕ່ລະໄລຍະ.
ຜູ້ທີ່ມີຈຸດປະສົງຢາກສົ່ງອອກຜະລິດຕະພັນໄມ້ທໍາມະຊາດ ຕ້ອງປະກອບເອກະສານ ຍື່ນຕໍ່ພະແນກອຸດສາຫະກຳ ແລະ ການຄ້າ ແຂວງ, ນະຄອນຫຼວງ ດັ່ງລາຍລະອຽດລຸ່ມນີ້:
ການປະກອບເອກະສານ
ຜູ້ທີ່ມີຈຸດປະສົງຢາກສົ່ງອອກຜະລິດຕະພັນໄມ້ທໍາມະຊາດ ຕ້ອງປະກອບເອກະສານ ຍື່ນຕໍ່ພະແນກອຸດສາຫະກຳ ແລະ ການຄ້າ ແຂວງ, ໂດຍມີເອກະສານປະກອບ ດັ່ງນີ້:
1) ຮ່າງໃບອະນຸຍາດສົ່ງອອກຜະລິດຕະພັນໄມ້ທຳມະຊາດ (ອຄ.01) ຕາມແບບພິມຂອງກົມການນໍາເຂົ້າ ແລະ ສົ່ງອອກ ທີ່ໄດ້ຕື່ມຂໍ້ມູນຄົບຖ້ວນແລ້ວ;
2) ຮ່າງຕາຕະລາງບັນຊີລາຍການໄມ້ທໍາມະຊາດ ຕາມແບບພິມຂອງກົມການນໍາເຂົ້າ ແລະ ສົ່ງອອກ ທີ່ໄດ້ຕື່ມຂໍ້ມູນຄົບຖ້ວນແລ້ວ;
3) ສຳເນົາໃບອະນຸຍາດດຳເນີນກິດຈະການຂອງຜູ້ສົ່ງອອກໄມ້ ທີ່ຍັງມີຜົນນຳໃຊ້ໄດ້ (ກໍລະນີທີ່ຍື່ນສະ ເໜີຄັ້ງທໍາອິດ ຫຼື ມີການປ່ຽນແປງ);
4) ສຳເນົາໃບຢັ້ງຢືນການມອບພັນທະອາກອນປະຈໍາປີ ທີ່ຍັງມີຜົນນຳໃຊ້ໄດ້ (ກໍລະນີທີ່ຍື່ນສະເໜີຄັ້ງ ທໍາອິດ ຫຼື ມີການປ່ຽນແປງ);
5) ສໍາເນົາໃບຢັ້ງຢືນຜະລິດຕະພັນໄມ້ທີ່ຜະລິດໄດ້ພາຍໃນໂຮງງານ ຈາກຂະແໜງອຸດສາຫະກຳ ແລະ ຫັດຖະກຳ (ກໍລະນີທີ່ຍື່ນສະເໜີຄັ້ງທໍາອິດ ຫຼື ມີການປ່ຽນແປງ);
6) ເອກະສານຢັ້ງຢືນແຫຼ່ງທີ່ມາຂອງໄມ້;
7) ເອກະສານຢັ້ງຢືນການມອບພັນທະຕ່າງໆ;
8) ເອກະສານຢັ້ງຢືນການຊື້-ຂາຍໄມ້ ກັບ ຜູ້ຊື້ຢູ່ຕ່າງປະເທດ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.