ໃນລະຫວ່າງວັນທີ 08 ຫາ 09 ມິຖຸນາ 2022 ທີ່ຫ້ອງປະຊຸມຂອງ ໂຮງແຮມພອຍໄພລິນ ແຂວງໄຊຍະບູລີ, ກົມການນຳເຂົ້າ ແລະ ສົ່ງອອກ (ກົມ ຂອ), ກະຊວງອຸດສາຫະກຳ ແລະ ການຄ້າ ໄດ້ຈັດຝຶກອົບຮົມສ້າງຖານຄວາມຮູ້ດ້ານວິຊາການ ໃຫ້ກັບພາກທຸລະກິດ ກ່ຽວກັບ ວຽກງານອຳນວຍຄວາມສະດວກທາງດ້ານການຄ້າ ແລະ ການອອກໃບຢັ້ງຢືນແຫຼ່ງກໍາເນີດສິນຄ້າຜ່ານທາງລະບົບເອເລັກໂຕຣນິກ (e-CO) ໃຫ້ແກ່ເຈົ້າໜ້າທີ່ຂອງ ພະແນກອຸດສາຫະກຳ ແລະ ການຄ້າ, ສະພາການຄ້າ ແລະ ອຸດສາຫະກຳ ແລະ ຜູ້ປະກອບການຈຳນວນໜຶ່ງພາຍໃນແຂວງໄຊຍະບູລີ. ຊຸດຝຶກອົບຮົມຄັ້ງນີ້ ໄດ້ດຳເນີນພາຍໃຕ້ການເປັນປະທານຮ່ວມຂອງ ທ່ານ ພຸດສະຫວັນ ຂຸນຈັນທະ ຮອງຫົວໜ້າ ກົມ ຂອ ແລະ ທ່ານ ສອນສະຫວັນ ຈັນທະວົງ ຮອງຫົວໜ້າພະແນກອຸດສາຫະກຳ ແລະ ການຄ້າ ແຂວງໄຊຍະບູລີ ໂດຍມີຜູ້ເຂົ້າຮ່ວມທັງໝົດ ຈຳນວນ 41 ທ່ານ.
ຈຸດປະສົງຂອງກອງປະຊຸມ ເພື່ອເຜີຍແຜ່ຄວາມຮູ້ພື້ນຖານກ່ຽວກັບວຽກງານອໍານວຍຄວາມສະດວກທາງດ້ານການຄ້າ ແລະ ຄຳແນະນໍາ ກ່ຽວກັບ ການຈັດຕັ້ງຜັນຂະຫຍາຍບາງເນື້ອໃນຂອງຄຳສັ່ງ ເລກທີ 12/ນຍ ວ່າດ້ວຍການອໍານວຍຄວາມສະດວກ ໃຫ້ແກ່ການນໍາເຂົ້າ-ສົ່ງອອກ, ການນໍາເຂົ້າຊົ່ວຄາວ, ການຜ່ານແດນ ແລະ ການເຄື່ອນຍ້າຍສິນຄ້າຢູ່ ສປປລາວ ເລກທີ 005/ຄອຄສ, ລົງວັນທີ 08 ເມສາ 2022. ພ້ອມດຽວກັນນັ້ນ, ຍັງໄດ້ຝຶກອົມຮົມສ້າງຖານຄວາມຮູ້ດ້ານວິຊາການ ກ່ຽວກັບ ລະບົບບໍລິການອອກໃບຢັ້ງຢືນແຫຼ່ງກຳເນີດສິນຄ້າຜ່ານທາງລະບົບເອເລັກໂຕຣນິກ (e-CO). E-CO ແມ່ນລະບົບການອອກໃບຢັ້ງຢືນແຫຼ່ງກໍາເນີດສິນຄ້າຜ່ານທາງ ອີເລັກໂຕນິກ, ຈຸດເດັ່ນຂອງລະບົບດັ່ງກ່າວ ຫຼຸດຜ່ອນເວລາ ແລະ ຄ່າໃຊ້ຈ່າຍ ໂດຍລວມແລ້ວ ມັນເປັນສ່ວນໜຶ່ງຂອງວຽກງານອຳນວຍຄວາມສະດວກທາງດ້ານການຄ້າ ເປັນຕົ້ນແມ່ນ ການຕັດຂອດຂັ້ນຕອນໃນການປະກອບເອກະສານ, ປະຢັດເວລາ ແລະ ຕົ້ນທຶນໃຫ້ແກ່ຜູ້ປະກອບການຂອງ ສປປ ລາວ ທີ່ນຳໃຊ້ສິດທິພິເສດທາງການຄ້າ.
ນອກຈາກນັ້ນ, ນັກວິທະຍາກອນຜູ້ຕາງໜ້າຈາກ ກົມອາຫານ ແລະ ຢາ, ກະຊວງສາທາລະນະສຸກ ໄດ້ນໍາສະເໜີກ່ຽວກັບເງື່ອນໄຂ ແລະ ມາດຕະຖານ ໃນການອອກໃບຢັ້ງຢືນ (Good Manufacturing Practice: GMP) ຫຼື ການດຳເນີນການຜະລິດທີ່ດີສໍາລັບພືດ ແລະ ໝາກໄມ້ ທີ່ຈະສົ່ງອອກໄປປະເທດໄທ ຊຶ່ງເປັນຫົວຂໍ້ທີ່ຫຼາຍຫົວໜ່ວຍທຸລະກິດສົ່ງອອກສິນຄ້າກະສິກຳຢູ່ຫຼາຍແຂວງຂອງປະເທດລາວໃຫ້ຄວາມສົນໃຈຫຼາຍໃນປະຈຸບັນ.
ປະຈຸບັນ, ໄດ້ມີ 12 ຫ້ອງການຈາກທັງໝົດ 40 ຫ້ອງການໃນທົ່ວປະເທດທີ່ໄດ້ນໍາໃຊ້ລະບົບ e-CO ເຊິ່ງໃນປີ 2022 ແມ່ນໄດ້ມີ 5 ແຂວງທີ່ໄດ້ຮັບການຝຶກອົບຮົມ ໄດ້ແກ່: ພະແນກອຸດສາຫະກຳ ແລະ ການຄ້າແຂວງຄຳມ່ວນ (01 ກຸມພາ 2022), ພະແນກອຸດສາຫະກຳ ແລະ ການຄ້າແຂວງສາລະວັນ (03 ພຶດສະພາ 2022), ພະແນກອຸດສາຫະກຳ ແລະ ການຄ້າແຂວງອຸດົມໄຊ (01 ມິຖຸນາ 2022), ສະພະແນກ ການຄ້າ ແລະ ອຸດສາຫະກຳ ແຂວງອຸດົມໄຊ (01 ມິຖຸນາ 2022), ພະແນກອຸດສາຫະກຳ ແລະ ການຄ້າແຂວງຫຼວງນ້ຳທາ (01 ມິຖຸນາ 2022) ແລະ ສະພະແນກ ການຄ້າ ແລະ ອຸດສາຫະກຳ ແຂວງຫຼວງນ້ຳທາ (01 ມິຖຸນາ 2022), ອີງຕາມແຜນຂອງກົມ ຂອ ແມ່ນຈະສືບຕໍ່ມອບສິດນໍາໃຊ້ລະບົບ e-CO ໃຫ້ແກ່ຫ້ອງການເຈົ້າໜ້າທີ່ອອກໃບຢັ້ງຢືນແຫຼ່ງກໍາເນີດສິນຄ້າໃຫ້ໄດ້ຢ່າງໜ້ອຍ 20 ຫ້ອງການພາຍໃນປີ 2022, ຊຶ່ງພະແນກອຸດສາຫະກໍາ ແລະ ການຄ້າ ແລະ ສະພາການຄ້າ ແລະ ອຸດສາຫະກໍາ ແຂວງໄຊຍະບູລີ ເລີ່ມນຳໃຊ້ລະບົບດັ່ງກ່າວໃນວັນທີ 01 ກໍລະກົດ 2022 ເປັນຕົ້ນໄປ.
ສຳລັບພາກສ່ວນໃດທີ່ສົນໃຈ ກ່ຽວກັບ ວຽກງານການຢັ້ງຢືນແຫຼ່ງກຳເນີດສິນຄ້າທີ່ໄດ້ຮັບສິດທິພິເສດ ສາມາດສອບຖາມລາຍລະອຽດເພີ່ມຕື່ມໄດ້ທີ່ ພະແນກຄຸ້ມຄອງແຫຼ່ງກຳເນີດສິນຄ້າ, ກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ ເບີໂທ: 021 450 255 ແລະ ສາມາດເຂົ້າໄປສຶກສາຂໍ້ມູນໄດ້ທີ່ເວັບໄຊທ໌: www.laotradeportal.gov.la, www.ecolao.gov.la.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.