ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ
ກະຊວງການເງີນ
ເລກທີ 2268 /ກງ
ນະຄອນຫຼວງວຽງຈັນ, ວັນທີ 27 ກໍລະກົດ 2023
ແຈ້ງການ
ເຖິງ: - ຫົວໜ້າກົມພາສີ;
- ຫົວໜ້າພາສີປະຈໍາແຂວງຈໍາປາສັກ;
- ຜູ້ອໍານວຍການ ບໍລິສັດ ທ່າບົກວັງເຕົ່າ ຈໍາກັດຜູ້ດຽວ.
ເລື່ອງ: ການປະຕິບັດລະບຽບການທາງພາສີ ຢູ່ທ່າບົກວັງເຕົ່າ.
- ອີງຕາມ ກົດໝາຍວ່າດ້ວຍພາສີ ສະບັບເລກທີ 81/ສພຊ, ລົງວັນທີ 29 ມິຖຸນາ 2020;
- ອີງຕາມ ດຳລັດວ່າດ້ວຍທ່າບົກ ສະບັບເລກທີ 513/ລບ, ລົງວັນທີ 04 ສິງຫາ 2021;
- ອີງຕາມ ດຳລັດນາຍົກລັດຖະມົນຕີວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງການເງີນ ສະບັບເລກທີ 600/ນຍ, ລົງວັນທີ 14 ຕຸລາ 2021;
- ອີງຕາມ ຄຳສັ່ງຂອງນາຍົກລັດຖະມົນຕີ ວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ ສະບັບເລກທີ 18/ນຍ, ລົງວັນທີ 16 ກັນຍາ 2021;
- ອີງຕາມ ໃບສະເໜີຂອງກົມພາສີ ສະບັບເລກທີ 06629/ກພສ, ລົງວັນທີ 26 ກໍລະກົດ 2023.
ເພື່ອຍົກສຸງປະສິດທິພາບໃນການຈັດຕັ້ງປະຕິບັດກົດໝາຍວ່າດ້ວຍພາສີ, ກົດໝາຍ ແລະ ລະບຽບການອື່ນທີ່ກ່ຽວຂ້ອງ, ຮັບປະກັນການຄຸ້ມຄອງ ແລະ ຈັດເກັບລາຍຮັບງົບປະມານຢ່າງລວມສູນ, ຫຼຸດຜ່ອນຂັ້ນຕອນການແຈ້ງພາສີ ໃຫ້ກະທັດຮັດງ່າຍດາຍ ແນໃສ່ເພີ່ມທະວີການອຳນວຍຄວາມສະດວກທາງດ້ານພາສີ ແລະ ການຄ້າ, ຮັບປະກັນ ການຈັດຕັ້ງປະຕິບັດສົນທິສັນຍາສາກົນ ທີ່ ສປປ ລາວ ເຂົ້າເປັນພາຄີ ໂດຍສະເພາະແມ່ນ ສົນທິສັນຍາວ່າດ້ວຍທ່າບົກ ຂອງຄະນະກຳມະທິການ ອົງການສະຫະປະຊາຊາດດ້ານເສດຖະກິດ ແລະ ສັງຄົມ ປະຈຳພາກພື້ນອາຊີ- ປາຊີຟິກ (UNESCAP Intergovernmental Agreement on Dry Port) ໃຫ້ມີປະສິດທິຜົນ.
ລັດຖະມົນຕີ ກະຊວງການເງີນ ອອກແຈ້ງການ ດັ່ງນີ້:
- ສິນຄ້ານໍາເຂົ້າ-ສົ່ງອອກ ແລະ ຜ່ານແດນ ຢູ່ ດ່ານພາສີສາກົນວັງເຕົ່າ ຕ້ອງດໍາເນີນການແຈ້ງພາສີໂດຍສັງເຂບ ແລະ ແຈ້ງພາສີເປັນລາຍລະອຽດ ພ້ອມທັງ ຊໍາລະຄ່າພາສີ-ອາກອນ, ຄ່າທຳນຽມຕ່າງໆ ຜ່ານລະບົບເອເລັກໂຕຣນິກຂອງກົມພາສີ ແລະ ດຳເນີນການກວດປ່ອຍສິນຄ້າ ຢູ່ທ່າບົກວັງເຕົ່າ ແບບລວມສູນຈຸດດຽວ ຕາມຫຼັກການບໍລິຫານຄວາມສ່ຽງ ທີ່ກົດໝາຍ ແລະ ລະບຽບການກຳນົດ ຢ່າງເຂັ້ມງວດ, ພາຍໃຕ້ການຄຸ້ມຄອງຂອງລັດຖະການພາສີ;
- ການນຳເຂົ້າ-ສົ່ງອອກ ສິນຄ້າ ຂອງຜູ້ປະກອບການມາດຕະຖານເອອີໂອ ໃຫ້ດຳເນີນຂັ້ນຕອນການແຈ້ງພາສີ ແລະ ການກວດປ່ອຍສິນຄ້າ ຕາມກົນໄກການອຳນວຍຄວາມສະດວກ ທີ່ໄດ້ກຳນົດໄວ້ໃນກົດ ໝາຍ ແລະ ລະບຽບການ.
- ມອບໃຫ້ ກົມພາສີ ປັບປຸງກົງຈັກການຈັດຕັ້ງ ໂດຍສັບຊ້ອນເຈົ້າໜ້າທີ່ພາສີ ໄປປະຈຳການຢູ່ທ່າບົກວັງເຕົ່າ ເພື່ອດຳເນີນການກວດກາຂໍ້ມູນດ້ານເອກະສານການແຈ້ງພາສີ, ກວດກາສິນຄ້າຕົວຈິງ ແລະ ກວດປ່ອຍສິນຄ້າ ຕາມຂອບເຂດສິດ ແລະ ຄວາມຮັບຜິດຊອບຂອງຕົນ;
- ມອບໃຫ້ ບໍລິສັດ ທ່າບົກວັງເຕົ່າ ຈຳກັດຜູ້ດຽວ ພັດທະນາລະບົບເອເລັກໂຕຣນິກ ເຂົ້າໃນການຄຸ້ມຄອງສາງສິນຄ້າ ແລະ ເຊື່ອມໂຍງເຂົ້າກັບລະບົບເອເລັກໂຕຣນິກ ຂອງຂະແໜງພາສີ ເພື່ອຮັບປະກັນການຄຸ້ມຄອງ ການນຳສິນຄ້າເຂົ້າ-ອອກສາງ ໃຫ້ມີຄວາມຮັດກຸມ, ປ້ອງກັນບໍ່ໃຫ້ມີຊ່ອງຫວ່າງໃນການຫຼົບຫຼີກພາສີທຸກຮູບແບບ ແລະ ໃຫ້ຈັດສັນຊ່ອງທາງບໍລິການສະເພາະແກ່ຜູ້ປະກອບການມາດຕະຖານເອອີໂອ ເພື່ອອຳນວຍຄວາມສະດວກໃຫ້ສອດຄ່ອງຕາມກົດໝາຍ ແລະ ລະບຽບການ;
- ແຈ້ງການສະບັບນີ້ ມີຜົນສັກສິດຈັດຕັ້ງປະຕິບັດ ນັບແຕ່ວັນທີ 01 ສິງຫາ 2023 ເປັນຕົ້ນໄປ, ລະບຽບການໃດທີ່ມີເນື້ອໃນຂັດກັບແຈ້ງການສະບັບນີ້ ລ້ວນແຕ່ຖືກລົບລ້າງ.
ດັ່ງນັ້ນ, ຈຶ່ງແຈ້ງມາເພື່ອຊາບ ແລະ ພ້ອມກັນຈັດຕັ້ງປະຕິບັດຢ່າງເຂັ້ມງວດ
ລັດຖະມົນຕີ
ສັນຕິພາບ ພົມວິຫານ
| # | ຫົວຂໍ້ | ດາວໂຫຼດ |
|---|---|---|
| 1 | ແຈ້ງການ ການປະຕິບັດລະບຽບການທາງພາສີ ຢູ່ທ່າບົກວັງເຕົ່າ, ເລກທີ 2268/ກງ, ລົງວັນທີ 27 ກໍລະກົດ 2023. |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.