ສາທາລະນະລັດ ປະຊາທິປະໄຕ ປະຊາຊົນລາວ

ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ

 

ກະຊວງກະສິກໍາ ແລະ ປ່າໄມ້

ເລກທີ 1146/ກປ

ນະຄອນຫຼວງວຽງຈັນ, ວັນທີ 20 ມີນາ 2024

 

ແຈ້ງການ

 

ເຖິງ:    - ຫ້ອງການ, ບັນດາກົມ, ສະຖາບັນ ອ້ອມຂ້າງກະຊວງກະສິກໍາ ແລະ ປ່າໄມ້;

- ພະແນກກະສິກໍາ ແລະ ປ່າໄມ້ ແຂວງ, ນະຄອນຫຼວງວຽງຈັນ ໃນຂອບເຂດ ທົ່ວປະເທດ.

ເລື່ອງ:   ການຂຶ້ນທະບຽນອາຫານສັດ ແລະ ຢາສັດຕະວະແພດ.

 

  • ອີງຕາມ ກົດຫມາຍ ວ່າດ້ວຍ ການລ້ຽງສັດ ແລະ ການສັດຕະວະແພດ (ສະບັບປັບປຸງ) ສະບັບເລກທີ 08/ສພຊ, ລົງ ວັນທີ 11 ພະຈິກ 2016;
  • ອີງຕາມ ດໍາລັດ ວ່າດ້ວຍ ອາຫານສັດ ສະບັບເລກທີ 02 /ລບ, ລົງວັນທີ 02 ມັງກອນ 2020;
  • ອີງຕາມ ດໍາລັດ ວ່າດ້ວຍ ຢາສັດຕະວະແພດ ສະບັບເລກທີ 199/ລບ, ລົງວັນທີ 13 ມີນາ 2020;
  • ອີງຕາມ ດໍາລັດ ຂອງນາຍົກລັດຖະມົນຕີ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງກະສິກໍາ ແລະ ປ່າໄມ້ ສະບັບເລກທີ 603/ນຍ, ລົງວັນທີ 15 ຕຸລາ 2021;
  • ອີງຕາມ ຫນັງສືສະເຫນີ ຂອງກົມລ້ຽງສັດ ແລະ ການປະມົງ ສະບັບເລກທີ 0698/ກລປ, ລົງວັນທີ 26 ກຸມພາ 2024;
  • ອີງຕາມ ການຄົ້ນຄວ້າ ແລະ ນໍາສະເຫນີ ຂອງຫ້ອງການກະຊວງກະສິກໍາ ແລະ ປ່າໄມ້ ຄັ້ງວັນທີ 29 ກຸມພາ 2024.

 

ກະຊວງກະສິກໍາ ແລະ ປ່າໄມ້ ຂໍຖືເປັນກຽດແຈ້ງມາຍັງທ່ານ ຊາບວ່າ: ໃນໄລຍະຜ່ານມາ ການຈັດຕັ້ງ ປະຕິບັດວຽກງານຄຸ້ມຄອງ ອາຫານສັດ ແລະ ຢາສັດຕະວະແພດ ຢູ່ ສປປ ລາວ ແມ່ນປະຕິບັດໄດ້ດີພໍສົມຄວນ ໂດຍສະເພາະວຽກງານ ຊຸກຍູ້ ສົ່ງເສີມການຜະລິດ ແລະ ນໍາໃຊ້ ອາຫານສັດ ແລະ ຢາສັດຕະວະແພດ ເຂົ້າໃນວຽກ ງານລ້ຽງສັດໄດ້ມີການຂະຫຍາຍຕົວ ແລະ ນັບມື້ນັບເພີ່ມຂື້ນ. ເພື່ອເປັນການຄຸ້ມຄອງການຜະລິດ, ນໍາເຂົ້າ, ຈໍາຫນ່າຍ ແລະ ການນໍາໃຊ້ອາຫານສັດ ແລະ ຢາສັດຕະວະແພດ ຢູ່ ສປປ ລາວ ມີຄຸນນະພາບ, ປອດໄພ ແລະ ໄດ້ ມາດຕະຖານ ບໍ່ສົ່ງຜົນກະທົບຕໍ່ສຸຂະພາບຂອງຄົນ, ສັດ ແລະ ສິ່ງແວດລ້ອມ ປະກອບສ່ວນເຂົ້າໃນແຜນງານຄໍ້າ ປະກັນສະບຽງອາຫານ ແລະ ຜະລິດເປັນສິນຄ້າ ໃຫ້ເພີ່ມຂຶ້ນທາງດ້ານປະລິມານ ແລະ ຄຸນນະພາບ ຕາມທິດກະສິ ກໍາສະອາດ, ສີຂຽວ ແລະ ຍືນຍົງ, ເຊື່ອມໂຍງກັບພາກພື້ນ ແລະ ສາກົນ ແລະ ເພື່ອໃຫ້ມີຄວາມເປັນເອກະພາບ ໃນ ການຄຸ້ມຄອງວຽກງານ ອາຫານສັດ ແລະ ຢາສັດຕະວະແພດ ໃນຂອບເຂດທົ່ວປະເທດ.

 

ລັດຖະມົນຕີ ກະຊວງກະສິກໍາ ແລະ ປ່າໄມ້ ອອກແຈ້ງການ:

 

1. ໃຫ້ຫ້ອງການ, ບັນດາກົມ, ສະຖາບັນ, ພະແນກກະສິກໍາ ແລະ ປ່າໄມ້ ແຂວງ, ນະຄອນຫຼວງວຽງຈັນ ປະສານ

ສົມທົບກັບ ພາກສ່ວນທີ່ກ່ຽວຂ້ອງ ຈັດຕັ້ງການໂຄສະນາເຜີຍແຜ່ ແຈ້ງການສະບັບນີ້ ແລະ ນິຕິກໍາອື່ນທີ່ກ່ຽວຂ້ອງ ໃຫ້ການຈັດຕັ້ງ ທັງພາກລັດ, ເອກະຊົນ ແລະ ຜູ້ປະກອບການ ໃນຂອບເຂດທົ່ວປະເທດ ຊາບ ກ່ຽວ ກັບ ຄວາມສໍາຄັນ ແລະ ຈໍາເປັນ ໃນການຂຶ້ນທະບຽນ ອາຫານສັດ ແລະ ຢາສັດຕະວະແພດ ທີ່ນໍາໃຊ້ໃນ ສປປ ລາວ;

2. ໃຫ້ພະແນກກະສິກໍາ ແລະ ປ່າໄມ້ ແຂວງ, ນະຄອນຫຼວງວຽງຈັນ ແຈ້ງການ ໃຫ້ບັນດາ ຜູ້ປະກອບການກ່ຽວ ກັບການຜະລິດ, ນໍາເຂົ້າ ແລະ ຈໍາຫນ່າຍ ອາຫານສັດ ແລະ ຢາສັດຕະວະແພດ ນໍາເອົາຜະລິດຕະພັນຂອງຕົນ ມາຂຶ້ນທະບຽນ ນໍາກົມລ້ຽງສັດ ແລະ ການປະມົງ ໃຫ້ສໍາເລັດກ່ອນ ວັນທີ 30 ມິຖຸນາ 2024;

3. ໃນກໍລະນີ ເຈົ້າຫນ້າທີ່ສັດຕະວະແພດ ປະຈໍາດ່ານ ຫາກພົບເຫັນ ຜູ້ນໍາເຂົ້າ ອາຫານສັດ ແລະ ຢາສັດຕະວະແພດ ໃຫ້ແນະນໍາໃຫ້ຜູ້ປະກອບການດັ່ງກ່າວ ນໍາເອົາຜະລິດຕະພັນຂອງຕົນ ມາຂຶ້ນທະບຽນ ນໍາກົມລ້ຽງສັດ ແລະ ການປະມົງກ່ອນ ຈຶ່ງນໍາໄປໃຊ້ ຫຼື ຈໍາຫນ່າຍ;

4. ໃຫ້ກົມລ້ຽງສັດ ແລະ ການປະມົງ ເປັນເຈົ້າການ ໃນການກວດກາຄຸນນະພາບ ແລະ ຄວາມປອດໄພ ຂອງ

ອາຫານສັດ ແລະ ຢາສັດຕະວະແພດ ທີ່ ຜະລິດ, ນໍາເຂົ້າ, ຈໍາຫນ່າຍ ແລະ ນໍາໃຊ້ ຢູ່ ສປປ ລາວ ພ້ອມທັງດໍາ ເນີນການຂຶ້ນທະບຽນ ຕາມຂັ້ນຕອນ ແລະ ລະບຽບການ;

5. ໃຫ້ກົມລ້ຽງສັດ ແລະ ການປະມົງ ເປັນເຈົ້າການ ປະສານສົມທົບກັບ ພະແນກກະສິກໍາ ແລະ ປ່າໄມ້ ແຂວງ, ນະຄອນຫຼວງວຽງຈັນ ແລະ ພາກສ່ວນທີ່ກ່ຽວຂ້ອງ ໃນການ ຕິດຕາມ, ກວດກາ ການຂຶ້ນທະບຽນ ອາຫານສັດ ແລະ ຢາສັດຕະວະແພດ ທີ່ ຜະລິດ, ນໍາເຂົ້າ, ຈໍາຫນ່າຍ ແລະ ນໍາໃຊ້ ຢູ່ ສປປ ລາວ ຢ່າງເປັນປົກກະຕິ;

6. ເມື່ອໄດ້ຮັບແຈ້ງການສະບັບນີ້ແລ້ວ ໃຫ້ທຸກພາກສ່ວນກ່ຽວຂ້ອງ ທັງ ສູນກາງ ແລະ ທ້ອງຖິ່ນ ຮີບຮ້ອນປະສານ ສົມທົບຊຶ່ງກັນ ແລະ ກັນ ເພື່ອຈັດຕັ້ງປະຕິບັດ ພ້ອມທັງສະຫຼຸບລາຍງານ ແລະ ຖອດຖອນບົດຮຽນ ໃນ ການຈັດຕັ້ງປະຕິບັດ ເປັນແຕ່ ລະໄລຍະ.

 

ດັ່ງນັ້ນ, ຈຶ່ງແຈ້ງມາຍັງທ່ານເພື່ອຊາບ ແລະ ປະຕິບັດຕາມແຈ້ງການສະບັບນີ້ຢ່າງເຂັ້ມງວດ.

 

ລັດຖະມົນຕີ

ປອ. ເພັດ ພົມພີພັກ

ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.