ສ້າງຄວາມຊໍານານໃຫ້ ເຈົ້າໜ້າທີ ແລະ ບັນດາຫົວໜ່ວຍທຸລະກິດໃນການນໍາໃຊ້ລະບົບ ອີຊີໂອ ສະບັບປັບປຸງໃໝ່ລ້າສຸດ
ໃນລະຫວ່າງ ວັນທີ 5-6 ກັນຍາ 2024, ທີ່ໂຮງແຮມເມືອງແທງ, ນະຄອນຫຼວງວຽງຈັນ. ກົມການຄ້າຕ່າງປະເທດ (ກົມ ຄຕ), ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມຝຶກອົບຮົມ ກ່ຽວກັບການນຳໃຊ້ລະບົບອອກໃບຢັ້ງຢືນແຫຼ່ງກຳເນີດສິນຄ້າທາງເອເລັກໂຕຣນິກ ສະບັບປັບປຸງ (ເວີຊັນ 2). ເປັນປະທານໂດຍ ທ່ານ ພຸດສະຫວັນ ຂຸນຈັນທະ, ຮອງຫົວໜ້າກົມຄ້າຕ່າງປະເທດ, ພ້ອມດ້ວຍນັກສໍາມະນາກອນທັງໝົດ ປະມານ 70 ທ່ານ ທີ່ມາຈາກ ນະຄອນຫຼວງວຽງຈັນ ແລະ 6 ແຂວງພາກເໜືອ ແລະ ພາກກາງ.
ຫຼັງຈາກການເປີດຕົວຢ່າງເປັນທາງການຂອງລະບົບ e-CO ສະບັບປັບປຸງ ຫຼື ເວີຊັນ 2 ໃນວັນທີ 31 ກໍລະກົດ 2024 ຜ່ານມານັ້ນ. ກົມ ຄຕ ໄດ້ຮ່ວມມືກັບ ໂຄງການສ້າງສະພາບແວດລ້ອມທີ່ເອື້ອອໍານວຍໃຫ້ແກ່ພາກທຸລະກິດ ຂອງອົງການ USAID ຈັດຝຶກອົບຮົມໃຫ້ຫຼາຍແຂວງ ເຊັ່ນ: ນະຄອນຫລວງ, ແຂວງວຽງຈັນ, ແຂວງຫົວພັນ, ແຂວງຊຽງຂວາງ, ແຂວງໄຊຍະບູລີ, ແຂວງບໍລິຄຳໄຊ ແລະ ແຂວງຄຳມ່ວນ ເພື່ອຈຸດປະສົງຍົກລະດັບຄວາມຮູ້ຄວາມເຂົ້າໃຈໃນການ ຫັນເປັນທັນສະໄໝ ແລະ ມີການຈັດຕັ້ງປະຕິບັດທີ່ເປັນເອກະພາບກັນທັງພາກລັດ ແລະ ຫົວໜ່ວຍທຸລະກິດ ເພື່ອຄວາມສະດວກ, ວ່ອງໄວ ແລະ ແກ້ໄຂຊ່ອງຫວ່າງ ເວລາອອກໃບຢັ້ງຢືນແຫຼ່ງກຳເນີດສິນຄ້າ ທີ່ເຄີຍມີຄວາມຫຍຸ້ງຍາກ ແລະ ສັບສົນມານັ້ນໃຫ້ມີການປັບປຸງທີ່ດີຂື້ນໄປເລື້ອຍໆ.
ທ່ານປະທານ ໄດ້ກ່າວໃນພິທີເປີດວ່າ: "ການຝຶກອົບຮົມໃນຄັ້ງນີ້ແມ່ນມີຄວາມໝາຍຄວາມສໍາຄັນ ໃຫ້ແກ່ພາກລັດ ແລະ ບັນດາຫົວໜ່ວຍທຸລະກິດໃນຂອບເຂດທົ່ວປະເທດ ທີ່ຈະໄດ້ຮັບຜົນປະໂຫຍດອັນສູງຈາກລະບົບ e-CO ສະບັບປັບປຸງໃໝ່ ຫຼື ເວີຊັນ 2 ນີ້." ທ່ານປະທານຍັງກ່າວຕື່ມວ່າ ລະບົບ e-CO ເວີຊັນໃໝ່ນີ້ຍັງສາມາດສົ່ງເສີມ ແລະ ອໍານວຍຄວາມສະດວກໃຫ້ແກ່ການສົ່ງອອກ ແລະ ສົ່ງເສີມການພັດທະນາປັບປຸງສະພາບແວດລ້ອມໃນການດຳເນີນທຸ ລະກິດ ຢູ່ ສປປ ລາວ ໄດ້ຮັບຜົນດີເທົ່າທີ່ຄວນ. ຫຼັງຈາກນັ້ນ, ກົມ ຄຕ ກໍ່ໄດ້ມີແຜນຈະສືບຕໍ່ສ້າງຄວາມເຂັ້ມແຂງໃຫ້ແກ່ເຈົ້າໜ້າທີລັດ ແລະ ຫົວໜ່ວຍທີ່ກ່ຽວຂ້ອງ ຢູ່ ແຂວງຈໍາປາສັກ ແລະ ແຂວງອຸດົມໄຊ ອີກດ້ວຍ.
ພ້ອມດຽວກັນນັ້ນ, ສໍາມະນາກອນ ກໍ່ໄດ້ນໍາສະເໜີ ແລະ ບັນຍາຍ ຄວາມຮູ້ທີ່ໜ້າສົນໃຈດ້ານອື່ນໆທີ່ກ່ຽວຂ້ອງກັບ ລະບົບ e-CO, ການອອກໃບຢັ້ງຢືນ, ກອບກົດໝາຍ ສໍາລັບກົດລະບຽບຂອງແຫຼ່ງກໍາເນີດສິນຄ້າ ທີ່ໄດ້ຮັບສິດທິພິເສດ, ອົງປະກອບຂອງລະບົບ, ແລະ ຄໍາແນະນໍາ ກ່ຽວກັບຜົນປະໂຫຍດຈາກກົດລະບຽບຂອງແຫຼ່ງກໍາເນີດທີ່ມີສິດທິພິເສດພາຍໃຕ້ຂໍ້ຕົກລົງທາງການຄ້າສອງຝ່າຍໃນປະຈຸບັນ.
ສໍາລັບພາກສ່ວນຜູ້ປະກອບການໃດທີ່ສົນໃຈໃນການອອກໃບຢັ້ງຢືນແຫຼ່ງກໍາເນີດສິນຄ້າທີ່ໄດ້ຮັບສິດທິພິເສດສາມາດສອບຖາມລາຍລະອຽດເພີ່ມຕື່ມໄດ້ທີ່ ພະແນກຄຸ້ມຄອງແຫຼ່ງກຳເນີດສິນຄ້າ, ກົມການຄ້າຕ່າງປະເທດ, ກະຊວງອຸດສາຫະກຳ ແລະ ການຄ້າ ເບີໂທ: 021 450 255 ຫຼື ສຶກສາຂໍ້ມູນໄດ້ທີ່ເວັບໄຊທ໌ https://ecolao.gov.la/
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.