ກະຊວງ ອຸດສາຫະກຳ ແລະ ການຄ້າ ຊ່ວຍເຫຼືອຜູ້ປະສົບໄພນໍ້າຖ້ວມຢູ່ແຂວງຫຼວງນໍ້າທາ
ໃນວັນທີ 15 ກັນຍາ 2024 ທີ່ຫ້ອງວ່າການແຂວງຫລວງນໍ້າທາ, ກະຊວງອຸດສາຫະກຳ ແລະ ການຄ້າ ໄດ້ມີພິທີມອບ-ຮັບເຄື່ອງຊ່ວຍເຫລືອ. ໃຫ້ກຽດມອບໂດຍ ທ່ານ ບຸນເຖີງ ດວງສະຫວັນ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ພ້ອມຄະນະ ແລະ ເປັນກຽດຮັບໂດຍ ທ່ານ ອ່ອນຈັນ ຄຳພາວົງ ຮອງເຈົ້າແຂວງຫລວງນໍ້າທາ.
ຄະນະຈາກກະຊວງອຸດສາຫະກຳ ແລະ ການຄ້າ ນຳໂດຍ ທ່ານ ບຸນເຖີງ ດວງສະຫວັນ ໄດ້ນຳເອົາເຄື່ອງຊ່ວຍເຫລືອ ຊຶ່ງປະກອບດ້ວຍ ເງິນສົດຈຳນວນ 137,500,000 ກີບ ແລະ ວັດຖຸປັດໃຈ (ເຂົ້າສານ, ນົມແອນລິນ, ປາແດກ, ນ້ຳອັດລົມ, ເຂົ້າໝົມ, ໝີ່ສຳເລັດຮູບ, ປາກະປ໋ອງ, ເຄື່ອງນຸ່ງຫົ່ມ ແລະ ອື່ນໆ) ມູນຄ່າ 73,932,500 ກີບ ມາມອບໃຫ້ແກ່ແຂວງຫລວງນໍ້າທາ ເພື່ອນຳໄປຊ່ວຍເຫລືອພໍ່ແມ່ປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມໃນຕົ້ນເດືອນກັນຍາຜ່ານມານີ້.
ໃນໂອກາດດັ່ງກ່າວ ທ່ານ ຮອງເຈົ້າແຂວງ ກໍ່ໄດ້ສະແດງຄວາມຊົມເຊີຍ ແລະ ຂອບໃຈຕໍ່ການລະດົມນ້ຳໃຈ ເພື່ອມາຊ່ວຍເຫລືອປະຊາຊົນທີ່ໄດ້ຮັບຜົນກະທົບຈາກໄພທຳມະຊາດທີ່ຮ້າຍແຮງໃນຄັ້ງນີ້. ເຊິ່ງເປັນການປະກອບສ່ວນອັນສຳຄັນຕໍ່ການພັດທະນາແຂວງຫລວງນໍ້າທາ ແນໃສ່ເຮັດໃຫ້ການດຳລົງຊີວິດຂອງປະຊາຊົນທີ່ໄດ້ຮັບຜົນກະທົບກັບຄືນສູ້ສະພາບປົກກະຕິໂດຍໄວ.
ແຫຼ່ງຂໍ້ມູນຂ່າວສານ: ກະຊວງ ອຸດສາຫະກໍາ ແລະ ການຄ້າ: https://www.moic.gov.la/?p=13611
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.