ຜະລິດຕະພັນອາຫານ ຕ້ອງໄດ້ຂື້ນທະບຽນ ແລະ ຕິດສະຫຼາກ ອຢ ກ່ອນວັນທີ 31 ທັນວາ 2024
ອີງຕາມ ແຈ້ງການ ສະບັບເລກທີ 2666/ຫອຄ, ລົງວັນທີ 09 ຕຸລາ 2024 ໃຫ້ໂຈະການນໍາເຂົ້າ ແລະ ຈໍາໜ່າຍ ຜະລິດຕະພັນອາຫານ ທີ່ບໍ່ໄດ້ແຈ້ງຂື້ນທະບຽນ ນໍາກົມອາຫານ ແລະ ຢາ ກະຊວງສາທາລະນະສຸກ ແລະ ບໍ່ໄດ້ພິມເລກທະບຽນ ອຢ ໃສ່ສະຫຼາກສິນຄ້າທີ່ເປັນພາສາລາວ ເປັນຕົ້ນ ແມ່ນ ຜະລິດຕະພັນນໍ້າດື່ມໃນພາຊະນະບັນຈຸປິດ, ເຄື່ອງດື່ມຊູກຳລັງ, ເຄື່ອງດື່ມປະສົມວິຕາມິນຕ່າງໆ, ອາຫານເສີມ ແລະ ປາແດກປຸງສຸກສຳເລັດຮູບ ນັບແຕ່ວັນທີ 1 ມັງກອນ 2025 ເປັນຕົ້ນໄປ.
ການພິມເລກທະບຽນ ອຢ ໃສ່ສະຫຼາກສິນຄ້າທີ່ເປັນພາສາລາວ ຕ້ອງດຳເນີນມາແຕ່ຕົ້ນທາງ (ຈາກໂຮງງານ) ແລະ ໃຫ້ເລີ່ມປະຕິບັດແຕ່ວັນທີ 1 ກໍລະກົດ 2025 ເປັນຕົ້ນໄປ. ໃນໄລຍະຂ້າມຜ່ານການຈັດຕັ້ງປະຕິບັດ ບໍລິສັດນຳເຂົ້າ ແລະ ສົ່ງອອກ, ຜູ້ຂາຍຍົກ-ຂາຍຍ່ອຍ ແລະ ຜູ້ຜະລິດພາຍໃນ ສາມາດພິມເປັນສະຕິກເກີ້ ຕິດໃສ່ຜະລິດຕະພັນໄດ້.
ໃຫ້ບັນດາ ບໍລິສັດນຳເຂົ້າ, ຮ້ານຂາຍຍົກ-ຂາຍຍ່ອຍ ແລະ ຜູ້ຜະລິດພາຍໃນ ຮີບຮ້ອນພົວພັນກັບກົມອາຫານ ແລະ ຢາ, ກະຊວງສາທາລະນະສຸກ ເພື່ອຂຶ້ນທະບຽນຜະລິດຕະພັນ ແລະ ພິມເລກທະບຽນ ອຢ ໃສ່ສະຫຼາກສິນຄ້າທີ່ເປັນພາສາລາວ ຕາມທີ່ໄດ້ກຳນົດໄວ້ໃນກົດໝາຍວ່າດ້ວຍອາຫານ ເລກທີ 33/ສພຊ, ລົງວັນທີ 24 ກໍລະກົດ 2013 ໃຫ້ສໍາເລັດກ່ອນວັນທີ 31 ທັນວາ 2024.
ບໍລິສັດນຳເຂົ້າ, ຮ້ານຂາຍຍົກ-ຂາຍຍ່ອຍ ແລະ ຜູ້ຜະລິດພາຍໃນ ທີ່ລະເມີດແຈ້ງການສະບັບນີ້ ຈະຖືກປະຕິບັດມາດຕະການປັບໄໝ, ຍຶດສິນຄ້າ ລວມໄປເຖິງການໂຈະ ຫຼື ຍົກເລີກສິດ ໃນການເປັນຜູ້ນຳເຂົ້າ, ຂາຍຍົກ-ຂາຍຍ່ອຍ ແລະ ຜະລິດ.
ລາຍລະອຽດເພີມເຕີມ ກະລຸນາສອບຖາມ ກົມອາຫານ ແລະ ຢາ ກະຊວງສາທາລະນະສຸກ ຕາມໂມງລັດຖະການ ໄດ້ທີ່ເບີໂທ: 021 214013 ຫຼຶ ເວັບໄຊທ໌: http://www.fdd.gov.la ແລະ http://www.fdd.gov.la/contactUs.php
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.