ລະບຽບການຄຸ້ມຄອງນໍາເຂົ້າ-ສົ່ງອອກສາລີລ້ຽງສັດ ໃນ ສປປ ລາວ
- ກົດໝາຍວ່າດ້ວຍການປ້ອງກັນພືດ ສະບັບເລກທີ 06/ສພຊ, ລົງວັນທີ 9/12/2008;
- ດໍາລັດແນະນໍາປະຕິບັດ ກົດໝາຍວ່າດ້ວຍການປ້ອງກັນພືດ ເລກທີ 229/ລບ, ລົງວັນທີ 31/5/2012;
- ບົດແນະນໍາຂອງຫົວໜ້າກົມປູກຝັງ ກ່ຽວກັບຫຼັກການ ແລະ ວິທີການໃນການອອກໃບຢັ້ງຢືນສຸຂານາໄມພືດ ສະບັບເລກທີ 1077/ກປຝ, ລົງວັນທີ 30/09/2010.
ຂັ້ນຕອນການນໍາເຂົ້າ:
ບຸກຄົນ ຫຼື ການຈັດຕັ້ງທີ່ຕ້ອງການນໍາເຂົ້າສາລີມາໃນ ສປປ ລາວ ຕ້ອງຍື່ນສະເໜີຂໍອະນຸຍາດນໍາເຂົ້າ ຈາກກົມປູກຝັງກ່ອນລ່ວງໜ້າ 1 ອາທິດ ໂດຍປະກອບເອກະສານຄັດຕິດດັ່ງລຸ່ມນີ້:
- ໃບສະເໜີຂໍອະນຸຍາດນໍາເຂົ້າ;
- ສໍາເນົາໃບອະນຸຍາດດໍາເນີນທຸລະກິດດ້ານກະສິກໍາ ແລະ ປ່າໄມ້ ຈາກຂະແໜງການກະສິກໍາ ແລະ ປ່າໄມ້;
- ສໍາເນົາໃບທະບຽນດໍາເນີນທຸລະກິດຈາກຂະແໜງອຸດສາຫະກໍາ ແລະ ການຄ້າ.
- ໃບຢັ້ງຢືນສຸຂານາໄມພືດ (Phytosanitary Certificate) (ຈາກປະເທດສົ່ງອອກ);
- ໃບແຈ້ງລາຍການສິນຄ້າ ແລະ ໃບແຈ້ງລາຄາ.
ພາຍຫຼັງໄດ້ຮັບໃບອະນຸຍາດນໍາເຂົ້າແລ້ວ, ໃນເວລານໍາເຂົ້າຕົວຈິງຂອງສິນຄ້າ ຕ້ອງນໍາເຂົ້າຜ່ານດ່ານເຂົ້າ-ອອກ ທີ່ອົງການຄຸ້ມຄອງວຽກງານປ້ອງກັນພືດ ກໍານົດໃຫ້ເທົ່ານັ້ນ ໂດຍແຈ້ງຕໍ່ເຈົ້າໜ້າທີ່ປ້ອງກັນພືດປະຈໍາດ່ານ ເພື່ອຂໍຮັບການກວດກາສັດຕູພືດຕາມລະບຽບກົດໝາຍ ກ່ອນດໍາເນີນການແຈ້ງພາສີໃນຂັ້ນຕອນຕໍ່ໄປ.
ຂັ້ນຕອນການສົ່ງອອກ:
ຜູ້ສົ່ງອອກຕ້ອງສະເໜີຂໍໃບຢັ້ງຢືນສຸຂານາໄມພືດ ຈາກພະແນກກະສິກໍາ ແລະ ປ່າໄມ້ແຂວງ, ນະຄອນທີ່ມີດ່ານສົ່ງອອກສາລີ ຫຼື ແຂວງໃກ້ຄຽງ ທີ່ໄດ້ຮັບສິດໃນການອອກໃບຢັ້ງຢືນສຸຂານາໄມພືດ ຈາກກົມປູກຝັງມີຄື: ພະແນກກະສິກໍາ ແລະ ປ່າໄມ້ ແຂວງຫຼວງນໍ້າທາ, ບໍ່ແກ້ວ, ໄຊຍະບູລີ, ນະຄອນຫຼວງ, ບໍລິຄໍາໄຊ, ຄໍາມ່ວນ, ສະຫວັນນະເຂດ, ຈໍາປາສັກ ແລະ ອັດຕະປື, ໂດຍປະກອບມີເອກະສານຄັດຕິດດັ່ງລຸ່ມນີ້:
- ໃບສະເໜີຂໍຢັ້ງຢືນສຸຂານາໄມພືດ;
- ໃບອະນຸຍາດນໍາເຂົ້າ (ອອກໃຫ້ໂດຍສໍານັກງານຄວບຄຸມວັດສະດຸການກະເສດ, ກົມວິຊາການກະເສດ ຫຼື ດ່ານກວດພືດຂອງປະເທດໄທ);
- ໃບຢັ້ງຢືນກວດກາສັດຕູພືດ (ອອກໃຫ້ໂດຍຂະແໜງປູກຝັງແຂວງ, ນະຄອນບ່ອນທີ່ເປັນແຫຼ່ງຜະລິດຕະພັນພືດສົ່ງອອກ);
- ໃບແຈ້ງລາຍການສິນຄ້າ ແລະ ໃບແຈ້ງລາຄາ.
ທ່ານສາມາດເບິ່ງຂໍ້ມູນເພີ່ມເຕີມ ເພື່ອຊາບລາຍລະອຽດກ່ຽວກັບເນື້ອທີ່ການປູກສາລີ ໃນທົ່ວປະເທດ ແລະ ການສົ່ງອອກສາລີຂອງລາວໄປປະເທດໄທ ສໍາລັບປີ 2011;
| # | ຫົວຂໍ້ | ດາວໂຫຼດ |
|---|---|---|
| 1 | Notice on the paperwork and the procedure for the import-export of solid maize in Lao PDR |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.