ຊາວສວນຢາງພາລາບ້ານຫາດຍາວກຸ່ມສະຫະກອນຢາງພາລາແຫ່ງທຳອິດຂອງປະເທດ ປີນີ້ຜ່ານໄປພຽງ 5 ເດືອນປະຕິບັດລາຍຮັບໄດ້ແລ້ວ 2 ຕື້ກວ່າກີບ ຈາກການຂາຍນ້ຳຢາງ 200 ກວ່າໂຕນ ເຖິງວ່າລາຄາຈະຂຶ້ນ-ລົງ ເປັນໄລຍະກໍ່ຕາມ. ທ່ານ ບຸນມີ ລີຈົງກ່ວນ ຮອງຫົວຫນ້າກຸ່ມສະຫະກອນຢາງພາລາ ບ້ານຫາດຍາວ ເມືອງຫລວງນ້ຳທາ ເປີດເຜີຍເມື່ອວັນທີ 23 ກໍລະກົດ 2013 ວ່າ: ບ້ານຂອງຕົນມີ 208 ຫລັງຄາເຮືອນ ພົນລະເມືອງ 1.547 ຄົນ ຍິງ 719 ຄົນ, ເລີ່ມປູກຢາງພາລາແຕ່ປີ 1992 ມາເຖິງ ປະຈຸບັນ ມີເນື້ອທີ່ປູກຢາງພາລາ 900 ກວ່າເຮັກຕາ ມີຕົ້ນຢາງພາລາ 416.000 ຕົ້ນ ແລະ ໄດ້ປາດຢາງແລ້ວ 334 ເຮັກຕາ ກວມເອົາ 37,02%, ສົກປີ 2011-2012 ຊາວສວນຢາງພາລາ ບ້ານຫາດຍາວມີລາຍຮັບຈາກການຂາຍນ້ຳຢາງພາລາ 9,6 ຕື້ກວ່າກີບ ສະເລ່ຍໃສ່ຫົວຄົນໄດ້ 6,2 ລ້ານກວ່າກີບຕໍ່ຄົນຕໍ່ປີ.
ສຳລັບປີ 2013 ນີ້ ເລີ່ມປາດຢາງມາແຕ່ຕົ້ນເດືອນມີນາ ເຖິງ ເດືອນກໍລະກົດນີ້ ຊາວສວນໄດ້ນ້ຳຢາງ 246 ກວ່າ ໂຕນ ເຊິ່ງຢາງທັງໝົດໄດ້ສົ່ງອອກຂາຍໄປຍັງຕະຫລາດ ສປ ຈີນ, ຈຳນວນ 3 ຊຸດ ໃນນັ້ນ ຊຸດທີຫນຶ່ງມີ 72 ໂຕນ ລາຄາ 8.500 ກີບ/ກິໂລ, ຊຸດທີສອງ 78 ໂຕນ ລາຄາ 9.187 ກີບ/ກິໂລ ແລະ ຊຸດທີສາມລາຄາ 8.250 ກີບ/ກິໂລ.
ຢ່າງໃດກໍ່ຕາມ ທ່ານຮອງຫົວຫນ້າກຸ່ມສະຫະກອນກ່າວວ່າ: ປີນີ້ລາຄາຢາງພາລາມີການເຫນັງຕີງ ແລະ ຕົກຕ່ຳລົງ ຖ້າທຽບໃສ່ປີຜ່ານມາສາເຫດເກີດຈາກຫລາຍປັດໄຈ ແຕ່ອັນຕົ້ນຕໍແມ່ນຍ້ອນຊາວສວນຢາງຈຳນວນຫນຶ່ງຂາຍແບບຊະຊາຍບໍ່ຄຳນຶງເຖິງລະບຽບຫລັກການທີ່ໄດ້ກຳນົດໄວ້.
ຕໍ່ບັນຫາລາຄາຢາງຕົກຕ່ຳ ທ່ານ ພອນໄຊ ຈັນທະສອນ ຫົວຫນ້າພະແນກອຸດສາຫະກຳ ແລະ ການຄ້າແຂວງ ຫລວງນ້ຳທາກ່າວວ່າ: ສົກປີ 2012-2013 ນີ້ ສະພາບການຊື້-ຂາຍຢາງພາລາມີລາຄາຕົກຕໍ່າຖ້າທຽບໃສ່ປີຜ່ານມາ, ປີນີ້ພະແນກອຸດສາຫະກຳ ແລະ ການຄ້າໄດ້ສ້າງນິຕິກຳຫັນເຂົ້າສູ່ລະບຽບການຢ່າງເຂັ້ມງວດ, ມີກົນໄກຄຸ້ມຄອງຈາກພາກລັດ ແຕ່ກໍ່ບໍ່ສາມາດຮັກສາລາຄາຢາງໃຫ້ເທົ່າເດີມໄວ້ໄດ້ ເນື່ອງຈາກຫລາຍປັດໄຈ ໂດຍສະເພາະລາຄາຢາງຕາມທ້ອງຕະຫລາດໃນ ສປ ຈີນ ເຊິ່ງເປັນຕະຫລາດສົ່ງອອກຫລັກຂອງແຂວງຫລວງນໍ້າທາ ມີການ ເໜັງຕີງ ຈຶ່ງສົ່ງຜົນກະທົບຕໍ່ລາຄາຢາງພາລາແຂວງ. ດັ່ງນັ້ນ ຈິ່ງຮຽກຮ້ອງມາຍັງຊາວສວນຢາງພາລາຈົ່ງຈັດຕັ້ງເປັນກຸ່ມການຜະລິດສົ່ງອອກຜະລິດຕະພັນ ເພື່ອເປັນເອກະພາບໃນການປັບລາຄາ ແລະ ສະກັດກັ້ນຈາກພໍ່ຄ້າທີ່ເກັບຊື້ ໂດຍບໍ່ມີທະບຽນການເກັບຊື້ ທຸກພາກສ່ວນຈະໄດ້ເປັນເຈົ້າການຕໍ່ຕ້ານປາກົດການຫຍໍ້ທໍ້ຕ່າງໆ ເພື່ອເຮັດໃຫ້ລາຄາຢາງພາລາຄົງທີ່ ແລະ ດີຂຶ້ນ.
ແຫລ່ງຂໍ້ມູນ: ໜັງສືພິມເສດຫະກິດ-ສັງຄົມ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.