ທ່ານ ດຣ. ນາມ ວິຍະເກດ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ໃຫ້ສຳພາດຕໍ່ສື່ມວນຊົນ ໃນໂອກາດເຂົ້າຮ່ວມກອງປະຊຸມລັດຖະບານ ປະຈຳສົກປີ 2012-2013 ລະຫວ່າງວັນທີ 16-20 ກັນຍາ 2013 ທີ່ນະຄອນຫລວງວຽງຈັນວ່າ: ປະຈຸບັນ ກຳລັງດຳເນີນການເລືອກສິນຄ້າເພື່ອສົ່ງອອກ ເຊິ່ງສ່ວນໃຫຍ່ແມ່ນຢູ່ໃນຂົງເຂດກະຊວງກະສິກຳ-ປ່າໄມ້ ແລະ ຕ້ອງໄດ້ສົ່ງເສີມໃຫ້ໄດ້ມາດຕະຖານສາກົນເຊັ່ນ: ເຂົ້າກິນພວກເຮົາສາມາດຜະລິດໄດ້ ແລະ ເຫຼືອກິນ ສົ່ງອອກຂາຍໄດ້ ແຕ່ຈະໃຫ້ສົ່ງຂາຍເປັນພັນໂຕນ ບໍ່ສາມາດເຮັດໄດ້ ປັດຈຸບັນ ກະຊວງກະສິກຳ-ປ່າໄມ້ ກໍພວມຄົ້ນຄວ້າວ່າຈະເລືອກເອົາແນວພັນເຂົ້າແບບໃດ ໃຫ້ເປັນມາດຖານດຽວ ແລ້ວສົ່ງເສີມໃຫ້ເປັນສິນຄ້າແທ້ ຮັບປະກັນໃຫ້ໄດ້ທັງຄຸນນະພາບ ແລະ ລາຄາ ປະເທດເຮົາບໍ່ມີທາງອອກສູ່ທະເລ ຕົ້ນທຶນການຜະລິດ ແລະ ການຂົນສົ່ງ ຈຶ່ງບໍ່ສາມາດແຂ່ງຂັນກັບປະເທດອື່ນໄດ້ ດັ່ງນັ້ນ ຈະຜະລິດເຂົ້າກິນຕ້ອງຄຳນຶງເຖິງຫຼາຍປັດໃຈ ໂດຍຕ້ອງມີແນວພັນເຂົ້າທີ່ມີຄຸນນະພາບສູງກວ່າປະເທດໃກ້ຄຽງ ຈຶ່ງຈະສາມາດແຂ່ງຂັນໄດ້.
ທ່ານ ດຣ. ນາມ ວິຍະເກດ ຍັງອະທິບາຍເຖິງການສົ່ງເສີມການຜະລິດເປັນສິນຄ້າຂອງປະຊາຊົນວ່າ: “ຫຼາຍທ້ອງຖິ່ນມີຂະບວນການຜະລິດເປັນສິນຄ້າ ແຕ່ຂັ້ນຕອນໃນການເຄື່ອນຍ້າຍ ຍັງພົບບັນຫາຫຼາຍຢ່າງທີ່ກາຍເປັນໂຕເພີ່ມມູນຄ່າໃຫ້ສິນຄ້າ ເຮັດໃຫ້ລາຄາສູງຂຶ້ນຕົ້ນທຶນການຜະລິດສູງຂຶ້ນ ຈຶ່ງບໍ່ສາມາດແຂ່ງຂັນກັບປະເທດອື່ນໄດ້ ແລະ ຜູ້ຜະລິດກໍໄດ້ຮັບຜົນປະໂຫຍດໜ້ອຍທີ່ສຸດ ຍ້ອນໄປຕົກເຮ່ຍເສຍຫາຍໃນຂອດຂອງການຂົນສົ່ງ ກວດກາ ຢຶດ ແລະ ການເພີ່ມຕື່ມ ຕາມແນວທາງນະໂຍບາຍ ແມ່ນຢາກສົ່ງເສີມໃຫ້ປະຊາຊົນທຳການຜະລິດ ແຕ່ເຈົ້າໜ້າທີ່ ທີ່ປະຕິບັດວຽກງານໃນການກວດກາ ຫຼື ຢຶດນັ້ນບໍ່ເຂົ້າໃຈ ກາຍເປັນການຈຳກັດດ້ານການຜະລິດ ເມື່ອເສຍຜົນປະໂຫຍດ ປະຊາຊົນກໍບໍ່ສືບຕໍ່ ເມື່ອບໍ່ມີລາຍຮັບປະຊາຊົນ ກໍຢູ່ໃນຄວາມທຸກຍາກ ສະນັ້ນ ຈະຕ້ອງໄດ້ແກ້ໄຂບັນຫານີ້ຢ່າງຈິງຈັງ ບໍ່ສ້າງຄວາມຫຍຸ້ງຍາກໃຫ້ປະຊາຊົນ ແລະ ຕ້ອງເຫັນໃຈ ເພາະເປັນການລົງທຶນຂະໜາດນ້ອຍ ບໍ່ຄວນເກັບອາກອນ ຫຼື ຄ່າຕ່າງໆອີກ ເພື່ອສ້າງຄວາມກະຕືລືລົ້ນໃຫ້ເຂົາເຈົ້າດຳເນີນການຜະລິດເປັນສິນຄ້າ ເພາະເປົ້າໝາຍຂອງພວກເຮົາແມ່ນການລຶບລ້າງຄວາມທຸກຍາກຂອງປະຊາຊົນ, ຢ່າງໃດກໍຕາມ ພວກເຮົາໄດ້ດຳເນີນການປະສານງານໄປຍັງແຕ່ລະແຂວງ ເຊິ່ງກໍເຫັນວ່າການກວດກາຫຼາຍຂັ້ນຕອນຢູ່ຫຼາຍທ້ອງຖິ່ນໄດ້ຫລຸດຜ່ອນລົງເທື່ອລະກ້າວ.
ແຫລ່ງຂ່າວ: ໜັງສືພິມວຽງຈັນໃໝ່ສະບັບວັນທີ 20 ກັນຍາ 2013
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.