ທ່ານ ສັນຕິພາບ ພົມວິຫານ ລັດຖະມົນຕີຊ່ວຍວ່າການກະຊວງການເງິນໄດ້ກ່າວວ່າ: ລະບົບການຈົດທະບຽນ ການຄໍ້າປະກັນດ້ວຍອະສັງຫາລິມະຊັບ ເປັນລະບົບທຳອິດຂອງ ສປປ ລາວ ທີ່ເຮັດໃຫ້ນັກທຸລະກິດ ແລະ ຜູ້ກູ້ຢືມສ່ວນບຸກຄົນສາມາດໃຊ້ອະສັງຫາລິມະຊັບເຊັ່ນ: ພາຫະນະ, ອຸປະກອນກົນຈັກ, ຜົນລະປູກ, ສັດລ້ຽງ ຫລື ລາຍຮັບທີ່ຈະໄດ້ຮັບໃນອະນາຄົດ ເປັນຫລັກຊັບຄໍ້າປະກັນໃນການກູ້ຢືມເງິນ ເຊິ່ງເປັນການຜັນຂະຫຍາຍໂອກາດການເຂົ້າເຖິງແຫລ່ງທຶນ ສຳຫລັບວິສາຫະກິດຈຸລະພາກ, ຂະໜາດນ້ອຍ ແລະ ກາງ ຈຳນວນຫລາຍທີ່ກວມເອົາ 90%ຂອງຂະແໜງການເອກະຊົນໃນ ສປປ ລາວ. ລະບົບດັ່ງກ່າວ ຈະໃຫ້ຄວາມກະຈ່າງແຈ້ງຕໍ່ຫລັກຊັບທີ່ນຳມາຄໍ້າປະກັນ ດ້ວຍການຄົ້ນຫາຂໍ້ມູນໃນລະບົບແຈ້ງຈົດທະບຽນວ່າ ຊັບສິນດັ່ງກ່າວຖືກນຳມາຄໍ້າປະກັນກ່ອນແລ້ວຫລືຍັງ, ວັນ ແລະ ເວລາທີ່ລະບຸໃນລະບົບການແຈ້ງຈົດທະບຽນ ຈະກຳນົດບູລິມະສິດໃນການໃຊ້ແທນໜີ້ສິນ, ຜູ້ຈົດທະບຽນກ່ອນຈະໄດ້ຮັບບູລິມະສິດໃນການໃຊ້ແທນໜີ້ສິນຕາມທີ່ກຳນົດໄວ້ໃນກົດໝາຍ. ພ້ອມນີ້ ຍັງຮັບປະກັນຄວາມສະດວກ, ວ່ອງໄວ ສາມາດແຈ້ງຈົດທະບຽນໄດ້ຢູ່ທຸກສະຖານທີ່ ແລະ ຮັບປະກັນຄວາມໂປ່ງໃສ ໃຫ້ແກ່ຜູ້ໃຊ້ບໍລິການຕື່ມອີກ.
ທ່ານລັດຖະມົນຕີຊ່ວຍວ່າການກະຊວງການເງິນຍັງໄດ້ສະແດງຄວາມເຊື່ອໝັ້ນວ່າ: ພາຍຫລັງທີ່ເປີດນຳໃຊ້ລະບົບດັ່ງກ່າວນີ້ແລ້ວ, ບັນດາທະນາຄານທຸລະກິດ, ສະຖານບັນການເງິນ, ບັນດາໂຮງຊວດຈຳຕ່າງໆ ຈະໃຫ້ຄວາມຮ່ວມມືໃນການຄຸ້ມຄອງ, ນຳໃຊ້ ແລະ ໝັ້ນໃຈໃນການປ່ອຍສິນເຊື່ອ ໂດຍການຮັບເອົາການຄໍ້າປະກັນດ້ວຍອະສັງຫາລິມະຊັບ ເຮັດໃຫ້ບຸກຄົນ, ນິຕິບຸກຄົນ ແລະ ຜູ້ປະກອບການສາມາດເຂົ້າເຖິງແຫລ່ງທຶນໄດ້ງ່າຍຂຶ້ນ ເຊິ່ງຈະເປັນໜໍ່ແໜງໃນການພັດທະນາ, ສ້າງເປັນວິສາຫະກິດຂະໜາດນ້ອຍ ແລະ ຂະໜາດກາງໃນອະນາຄົດ ທັງເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດ.
ຫ້ອງການຈົດທະບຽນການຄ້ຳປະກັນດ້ວຍສັງຫາລິມະຊັບ (ຫ້ອງການຈົດທະບຽນ) ໄດ້ຖືກສ້າງຕັ້ງຂຶ້ນ ໂດຍກະຊວງການເງິນ. ຫ້ອງການຈົດທະບຽນດ້ວຍສັງຫາລິມະຊັບ ດຳເນີນການຈົດທະບຽນດ້ວຍລະບົບ ຄອມພິວເຕີສູນກາງ ທີ່ໃຫ້ບໍລິການທົ່ວ ສປປ ລາວ. ຫ້ອງການຈົດທະບຽນ ອະນຸຍາດໃຫ້ບຸກຄົນ ແລະ ສະຖາບັນຕ່າງໆຈົດທະບຽນການຄ້ຳປະກັນຂອງຕົນ ໃນສັງຫາລິມະຊັບ (ຊັບສິນສ່ວນບຸກຄົນ, ພາຫະນະກົນຈັກ, ບັນຊີສິນຄ້າໃນສາງ, ຫນີ້ທີ່ຕ້ອງຮັບ, ຜົນຜະລິດ ແລະ ອື່ນໆ), ທ່ານສາມາດຊອກຫາລາຍລະອຽດເພີ່ມເຕີມຕາມເວັບໄຊທ໌ຂອງຫ້ອງການຈົດທະບຽນການຄ້ຳປະກັນດ້ວຍສັງຫາລິມະຊັບ (ຫ້ອງການຈົດທະບຽນ)ທີ່ http://www.mof.gov.la/str/
ແຫລ່ງຂໍ້ມູນ: ໜັງສືມພິມເສດຖະກິດການຄ້າ, ສະບັບວັນທີ 21 ພະຈິກ 2013
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.