ຕາມບົດລາຍງານແຜນພັດທະນາເສດຖະກິດ-ສັງຄົມ, ສົກປີ 2012-2013 ຂອງກະຊວງແຜນການ ແລະ ການລົງທຶນໄດ້ຮູ້ວ່າ: ຄາດຫມາຍຕົ້ນຕໍຂອງຂະແຫນງອຸດສາຫະກໍາ ແລະ ການຄ້າ ໃນສົກປີນີ້ແມ່ນຈະສູ້ຊົນເຮັດໃຫ້ມູນຄ່າການສົ່ງອອກ ແລະ ນໍາເຂົ້າຫມົດປີບັນລຸໄດ້ 4.370 ລ້ານໂດລາສະຫະລັດ, ໃນນີ້ ສະເພາະມູນຄ່າການສົ່ງອອກຈະສູ້ຊົນໃຫ້ໄດ້ 2.060 ລ້ານໂດລາສະຫະລັດ ແຕ່ການສົ່ງອອກຕົວຈິງໄດ້ພຽງແຕ່ 1,89 ຕື້ກວ່າໂດລາສະຫະລັດ ທຽບໃສ່ແຜນການຫລຸດ 7,84% ເຊິ່ງແຕກຕ່າງຈາກການນໍາເຂົ້າຫລາຍພໍສົມຄວນເນື່ອງຈາກວ່າໄດ້ມີການເພີ່ມຂຶ້ນຈາກແຜນ 21,85%, ສາເຫດແມ່ນຍ້ອນຄວາມຮຽກຮ້ອງຕ້ອງການດ້ານວັດຖຸດິບ, ອຸປະກອນ ແລະ ເຄື່ອງມືຮັບໃຊ້ການຜະລິດ, ການກໍ່ສ້າງ, ພາຫະນະ, ອາຍແກ໊ສ ແລະ ນ້ຳມັນເຊື້ອໄຟ ຢູ່ໃນບັນດາໂຄງການລົງທຶນຕ່າງໆຢູ່ພາຍໃນປະເທດມີການເພີ່ມຂຶ້ນ.
ສ່ວນການສົ່ງອອກບໍ່ບັນລຸຕາມແຜນ ສາເຫດມາຈາກປັດໄຈພາຍນອກໄດ້ກະທົບຕໍ່ສະພາບການຜະລິດພາຍໃນ ແລະ ການສົ່ງອອກ ເປັນຕົ້ນ: ບັນຫາຫນີ້ສິນຂອງປະເທດເອີຣົບ, ຄວາມບໍ່ສະຫງົບຢູ່ບາງປະເທດຕາເວັນອອກກາງ ແລະ ອາຟຣິກາເຫນືອ ແລະ ເຮັດໃຫ້ເກີດບັນຫາທາງດ້ານການເງິນ ສົ່ງຜົນກະທົບຕໍ່ການຜະລິດ ແລະ ການສົ່ງອອກ ຈິ່ງເຮັດໃຫ້ຕົວເລກການສົ່ງອອກສົກປີແລ້ວນີ້ໄດ້ພຽງແຕ່ 1.898,38 ລ້ານໂດລາສະຫະລັດ.
ການສົ່ງອອກທີ່ພົ້ນເດັ່ນກວ່າຫມູ່ຍັງແມ່ນແຮ່ທາດ ເຊິ່ງບັນລຸ 1.678,64 ລ້ານໂດລາສະຫະລັດ, ລື່ນຈາກແຜນທີ່ຕັ້ງໄວ້ 12%, ໃນນີ້ ໄດ້ຈາກການຂາຍແຮ່ຄໍາ 19,36 ໂຕນ, ທອງແດງ 82.999 ໂຕນ, ທອງແດງເຂັ້ມຂຸ້ນ 288.990 ໂຕນ, ຖ່ານຫີນລີກໄນ໌ 761.094 ໂຕນ, ຫີນກາວ 1 ລ້ານໂຕນ ແລະ ເກືອກາລີ 646.000 ໂຕນ.
ຢ່າງໃດກໍ່ຕາມການເພີ່ມຂຶ້ນຂອງບັນດາໂຮງງານອຸດສາຫະກໍາປຸງແຕ່ງ ແລະ ຫັດຖະກໍາໃນສົກປີຜ່ານມາຈະເປັນຜົນດີຕໍ່ພາກການສົ່ງອອກໃນອະນາຄົດ, ເຖິງແມ່ນວ່າ ຄວາມບໍ່ແນ່ນອນຂອງເສດຖະກິດໂລກເປັນຕົ້ນ ຄ່າຂອງເງິນຕາຕ່າງປະເທດ ອາດຈະສົ່ງຜົນກະທົບຕໍ່ການສົ່ງອອກກໍ່ຕາມ, ແຕ່ວ່າໃນຊຸມປີຕໍ່ຫນ້າສິນຄ້າລາວຈະໄຫລອອກສູ່ຕະຫລາດສາກົນຫລາຍຂຶ້ນ ແລະ ມູນຄ່າການສົ່ງອອກຈະສູງຂຶ້ນແນ່ນອນ.
ແຫລ່ງຂໍ້ມູນ:
ໜັງສືພິມເສດຖະກິດສັງຄົມ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.