ກອງປະຊຸມດັ່ງກ່າວ ຖືວ່າເປັນກອງປະຊຸມປະຈຳປີ ເພື່ອທົບທວນຄືນ ຄວາມຄືບໜ້າຂອງການຈັດຕັ້ງປະຕິບັດວຽກງານອຳນວຍຄວາມສະດວກທາງດ້ານການຄ້າ ຂອງ ສປປ ລາວ ແລະ ປະເມີນຜົນການຈັດຕັ້ງປະຕິບັດແຜນຍຸດທະສາດອຳນວຍຄວາມສະດວກທາງດ້ານການຄ້າ ໃນໄລຍະ 01 ປີ ຜ່ານມາ. ແລະ ກອງປະຊຸມຍັງໄດ້ມີການລາຍງານ ສະພາບການສະໜອງຂໍ້ມູນຂ່າວສານທາງດ້ານການຄ້າໃຫ້ແກ່ສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ, ປຶກສາຫາລື ກ່ຽວກັບ ແນວທາງການປັບປຸງກົນໄກການປະສານງານ ລະຫວ່າງ ກອງເລຂາອຳນວຍຄວາມສະດວກທາງດ້ານການຄ້າ ແລະ ພາກທຸລະກິດ.
ໃນໄລຍະ 01 ປີຜ່ານມາ ຂະແໜງການທີ່ປິ່ນອ້ອມວຽກງານອຳນວຍຄວາມສະດວກທາງດ້ານການຄ້າ ກໍ່ໄດ້ປະກອບ ສ່ວນເຂົ້າໃນການຈັດຕັ້ງຜັນຂະຫຍາຍ ຍຸດທະສາດອຳນວຍຄວາມສະດວກທາງດ້ານການຄ້າຢ່າງຕັ້ງໜ້າ ຊຶ່ງສະແດງ ອອກໃນຄວາມຄືບໜ້າຂອງບາງວຽກງານ ເຊັ່ນ : ການເສີມສ້າງ ຄວາມໂປ່ງໃສ ໂດຍສືບຕໍ່ປັບປຸງສູນຂໍ້ມູນຂ່າວສານ ທາງດ້ານການຄ້າຂອງ ສປປ ລາວ ໃຫ້ມີຄວາມຍືນຍົງ, ການຕິດຕັ້ງລະບົບແຈ້ງເສຍພາສີຜ່ານລະບົບ ASYCUDA ໃນຂອບເຂດທົ່ວປະເທດ ແລະ ມີແຜນຂະຫຍາຍການນຳໃຊ້ ລະບົບແຈ້ງພາສີປະຕູດຽວ (ASYCUDA) ຈາກ 11 ດ່ານ ເປັນ 12 ດ່ານ ໃນທັງໝົດ 23 ດ່ານ ທົ່ວປະເທດໃຫ້ສຳເລັດໃນປີ 2014ນີ້
ແລະ ບັນດາຂະແໜງການ ມີການປັບປຸງນິຕິກຳຂອງຕົນ ໃຫ້ສອດຄ່ອງກັບມາດຕະຖານສາກົນ ແລະ ມີການເຜີຍແຜ່ຂໍ້ມູນຂ່າວສານ ທາງດ້ານການຄ້າໃຫ້ທົ່ວເຖີງທັງຂັ້ນສູນກາງ ແລະ ທ້ອງຖິ່ນ ເພື່ອໃຫ້ພາກທຸລະກິດຮັບຊາບທົ່ວເຖີງ ແລະ ທັນກັບສະພາບການ.
ທ່ານປະທານຍັງໄດ້ກ່າວໃນທີ່ປະຊຸມວ່າ: ກອງປະຊຸມກອງເລຂາຄັ້ງທີ3 ໃນມື້ນີ້ຖືວ່າແມ່ນ ການທົບທວນແຜນ ຍຸດທະສາດ ຊຶ່ງເປັນບາດກ້າວອັນດີເພາະກອງເລຂາພວກເຮົາຈະບໍ່ຢຸດຢູ່ແຕ່ບ່ອນນີ້ ບາດກ້າວຕໍ່ໄປ ກອງເລຂາອຳນວຍຄວາມສະດວກທາງດ້ານການຄ້າ ຈະໄດ້ນຳເອົາບັນຫາທີ່ມີຢູ່ ເພື່ອຫາວິທີແກ້ໄຂ ແລະ ລາຍງານ ຕໍ່ລັດຖະບານ ເພື່ອໃຫ້ ພິຈາລະນາໃນຂັ້ນຕໍ່ໄປ. ບັນດາສະມາຊິກກອງເລຂາ ແລະ ບັນດາຈຸດປະສານງານທີ່ມີສ່ວນພົວພັນກັບ ກອງເລຂາຈະຕ້ອງສືບຕໍ່ປັບປຸງການປະສານງານໃຫ້ມີຄວາມກົມກຽວ ແລະ ເປັນເອກະພາບໃນການຈັດຕັ້ງປະຕິບັດແຜນຍຸດທະສາດທີ່ໄດ້ວາງອອກໃຫ້ປະກົດຜົນເປັນຈິງ. ນອກນັ້ນ, ອີກວຽກງານໜຶ່ງທີ່ສຳຄັນ ກໍ່ແມ່ນການປັບປຸງສາຍພົວພັນ ລະຫວ່າງ ກອງເລຂາອຳນວຍຄວາມສະດວກທາງດ້ານການຄ້າ ແລະ ພາກທຸລະກິດ ໂດຍການປັບປຸງຮູບແບບການປະສານງານກັນໃຫ້ດີຂື້ນ ເພື່ອສ້າງບາດກ້າວອັນສຳຄັນໃນການກ້າວໄປສູ່ AEC 2015.
ທີ່ປະຊຸມຍັງໄດ້ຕົກລົງເຫັນດີໃຫ້ກອງເລຂາອຳນວຍຄວາມສະດວກທາງດ້ານຄ້າ ກໍ່ຄືບັນດາສະມາຊິກກອງເລຂາ ຜູ້ທີ່ຖືກແຕ່ງຕັ້ງເປັນຈຸດປະສານງານໃນການສະໜອງຂໍ້ມູນ ສົມທົບກັບບັນດາພາກສ່ວນທີ່ກ່ຽວຂ້ອງ ເພື່ອກວດກາ ແລະ ອັບເດດ ຂໍ້ມູນ ເພື່ອເປັນເອກະພາບທາງດ້ານນິຕິກຳທີ່ໄດ້ປະກາດໃຊ້ຢ່າງເປັນທາງການແລ້ວ ແລະ ສາມາດເຜີຍແຜ່ໄດ້ ໃຫ້ແກ່ກອງເລຂາ ອຄ ເພື່ອເອົາລົງເຜີຍແຜ່ໃນສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ ເປັນແຕ່ລະໄລຍະ ໂດຍບໍ່ຈຳເປັນຕ້ອງເຮັດໃບສະເໜີຂໍຂໍ້ມູນເປັນລາຍລັກອັກສອນ ແລະ ການຄົ້ນຄວ້າຕື່ມ ກ່ຽວກັບ ຮູບແບບການແກ້ໄຂບັນຫາຫຍຸ້ງຍາກດ້ານທຸລະກິດ ໃຫ້ແກ່ພາກທຸລະກິດ ເພື່ອສ້າງຄວາມເປັນເອກະພາບ ລະຫວ່າງ ຂະແໜງການ ແລະ ການຕອບຂໍ້ຂ້ອງໃຈຂອງພາກທຸລະກິດ ເພື່ອສາມາດໄຈ້ແຍກ ບັນຫາທີ່ຕ້ອງໄດ້ລາຍງານຂໍທິດນຳລັດຖະບານ ແລະ ບັນຫາທີ່ຂະແໜງການສາມາດແກ້ໄຂໄດ້ເລີຍ.
ກອງປະຊຸມໄດ້ດຳເນີນໄປດ້ວຍບັນຍາກາດອັນຟົດຟື້ນ ຊື່ງສະແດງອອກໃນການປະກອບຄຳຄິດຄຳເຫັນ ຢ່າງກົງໄປກົງມາຂອງບັນດາຜູ້ເຂົ້າຮ່ວມ, ກໍ່ຄືສະມາຊິກກອງເລຂາອຳນວຍຄວາມສະດວກທາງດ້ານການຄ້າ ໂດຍເຮັດໃຫ້ກອງປະຊຸມດັ່ງກ່າວບັນລຸຕາມວັດຖຸປະສົງ ແລະ ລະດັບຄາດໝາຍທີ່ວາງໄວ້.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.