ຣາຊະອານາຈັກເລໂຊໂທ, ເປັນປະເທດທີ່ບໍ່ມີທາງອອກສູ່ທະເລ ມີຊາຍແດນຕິດກັບປະເທດອາເມລິກາໃຕ້ ມີເນື້ອທີ່ 30,000 ກີໂລຕາແມັດ ແລະ ມີພົນລະເມືອງຫລາຍກວ່າ 2 ລ້ານຄົນ, ໄດ້ຮັບທຶນສະໜັບສະໜູນຈາກທະນາຄານໂລກ ໂດຍຜ່ານກອງທຶນອຳນວຍຄວາມສະດວກທາງດ້ານການຄ້າ ເພື່ອສ້າງສູນຂໍ້ມູນຂ່າວສານທາງດ້ານການຄ້າ ໂດຍນຳໃຊ້ source code ຂອງ ສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ. ເນື່ອງຈາກວ່າ ສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ ໄດ້ຖືກອອກແບບໃຫ້ສະດວກ ແລະ ງ່າຍດາຍ ໃນການນຳໃຊ້, ແລະ ການຄົ້ນຫາຂໍ້ມູນດ້ານການຄ້າແມ່ນສາມາດເຮັດໄດ້ໃນຫຼາກຫຼາຍຮູບແບບ ຈຶ່ງສາມາດກາຍເປັນແບບແຜນອັນດີໃຫ້ແກ່ການພັດທະນາ ເວັບໄຊທ໌ສູນຂໍ້ມູນຂ່າວສານທາງດ້ານການຄ້າຂອງເລໂຊໂທ. ສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ ເປີດນຳໃຊ້ຢ່າງເປັນທາງການ ໃນເດືອນມີຖຸນາ 2012 ແລະ ໄດ້ຊ່ວຍໃຫ້ ສປປ ລາວ ບັນລຸສັນຍາວ່າດ້ວຍການສ້າງຄວາມໂປ່ງໃສ ເຊິ່ງເປັນສິ່ງຈຳເປັນໃນການເຂົ້າເປັນສະມາຊິກອົງການການຄ້າໂລກ ຫຼື WTO ໃນເດືອນ ກຸມພາ 2013.
ກະຊວງການຄ້າ ແລະ ອຸດສາຫະກຳ ຣາຊະອານາຈັກເລໂຊໂທ ໄດ້ສະເໜີຂໍນຳໃຊ້ source code ຂອງສູນຂໍ້ມູນຂ່າວສານ ທາງດ້ານ ການຄ້າຂອງ ສປປ ລາວ ຈາກ ກະຊວງອຸດສາຫະກຳ ແລະ ການຄ້າລາວ ເພື່ອສ້າງສູນຂໍ້ມູນຂ່າວສານທາງດ້ານການຄ້າຂອງເລໂຊໂທ. ນັ້ນໄດ້ກາຍເປັນນິມິດໝາຍອັນດີ ຂອງການຮ່ວມມືແລກປ່ຽນດ້ານວິຊາສະເພາະລະ ຫວ່າງຂະແໜງອຸດສາຫະກຳ ແລະ ການຄ້າ ຂອງສອງປະເທດ. ເພື່ອສືບຕໍ່ເນື້ອໃນຈິດໃຈດັ່ງກ່າວ, ຣາຊະອານາຈັກເລໂຊໂທ ແລະ ສປປ ລາວ ໄດ້ເຊັນບົດບັນທຶກຊ່ວຍຈຳຮ່ວມກັນ ວ່າດ້ວຍການອະນຸຍາດໃຫ້ຣາຊະອານາຈັກເລໂຊໂທນຳໃຊ້ source code ຂອງສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ ເພື່ອນຳໄປພັດທະນາສ້າງສູນຂໍ້ມູນຂ່າວສານທາງດ້ານການຄ້າຂອງເລໂຊໂທ.
ພາຍຫລັງທີ່ ສປປ ລາວ ໄດ້ເປີດໄຟຂຽວ ອະນຸຍາດໃຫ້ນຳໃຊ້ source code ຂອງ ສູນຂໍ້ມູນຂ່າວສານທາງດ້ານການຄ້າ ຣາຊະອານາຈັກ ເລໂຊໂທ ກໍ່ໄດ້ສຳເລັດການສ້າງສູນຂໍ້ມູນຂ່າວສານທາງດ້ານການຄ້າຂອງຕົນ ແລະ ໄດ້ເປີດນຳໃຊ້ຢ່າງເປັນທາງການໃນວັນທີ 26 ມີນາ 2014. ນັ້ນກໍເປັນການສ້າງມາດຕະຖານໃຫມ່ໃນອາຟຮິກາ ເພື່ອເປັນການອຳນວຍຄວາມສະດວກໃຫ້ແກ່ຊຸມຊົນການຄ້າ ໃຫ້ສາມາດ ເຂົ້າຫາ ຂໍ້ມູນທີ່ເຊື່ອຖືໄດ້, ຂໍ້ມູນໃຫມ່ໆທີ່ໄດ້ອັບເດດ ແລະ ທັນກັບສະພາບການ. ປະຈຸບັນ ຖືວ່າ ເລໂຊໂທ ເປັນປະເທດທຳອິດ ຂອງອາຟຣິກກາ ທີ່ມີສູນຂໍ້ມູນຂ່າວສານທາງດ້ານການຄ້າ.
ແຫລ່ງຂໍ້ມູນ: ເວັບໄຊສູນຂໍ້ມູນຂ່າວສານທາງດ້ານການຄ້າເລໂຊໂທ ແລະ ເວັບໄຊທະນາຄານໂລກ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.