ທ່ານ ນາຍົກລັດຖະມົນຕີ ສະຫລຸບລວບລວມເອົາບັນຫາຈາກການສະແດງຄຳຄິດເຫັນຕໍ່ກອງປະຊຸມພົບປະລະຫວ່າງນາຍົກລັດຖະມົນຕີກັບພາກທຸລະກິດ.
ບັນດາຜູ້ດຳເນີນທຸລະກິດສະເໜີຕໍ່ລັດຖະບານໃຫ້ມີການແນະນຳຢ່າງລະອຽດກ່ຽວກັບນະໂຍບາຍທີ່ຕິດພັນກັບການນຳເຂົ້າ-ສົ່ງອອກ ເພື່ອເປັນການກະຕຸ້ນການດຳເນີນທຸລະກິດ, ພາກທຸລະກິດຍັງໄດ້ສະເໜີໃຫ້ສ້າງສິ່ງອໍານວຍຄວາມສະດວກ ເພື່ອສ້າງຄວາມງ່າຍດາຍໃຫ້ແກ່ການເຂົ້າຫາແຫລ່ງທຶນ, ຕະຫລາດ, ພະລັງງານ, ແລະ ກຳລັງແຮງງານ.
ກອງປະຊຸມພົບປະພາກທຸລະກິດຄັ້ງນີ້ ໄດ້ຮຽກຮ້ອງໃຫ້ພາກລັດ ອຳນວຍຄວາມສະດວກໃຫ້ແກ່ການດຳເນີນທຸລະກິດ ໂດຍນໍາໃຊ້ມາດຕະການ ກ່ຽວກັບ ຂັ້ນຕອນການອະນຸຍາດການດຳເນີນທຸລະກິດໃຫ້ມີຄວາມວ່ອງໄວ ແລະ ໂປ່ງໃສ ຂຶ້ນກ່ວາເກົ່າ .
ທຸລະກິດກໍ່ສ້າງເຄຫາສະຖານ ໄດ້ຮຽກຮ້ອງໃຫ້ລັດຖະບານຈ່າຍຄືນໜີ້ສິນ ທີ່ພວກເຂົາໄດ້ລົງທຶນກ່ອນໃນໂຄງການພັດທະນາຕ່າງໆ.
ທ່ານນາຍົກລັດຖະມົນໄດ້ກ່າວວ່າ ການຈ່າຍຄືນໜີ້ສິນດັ່ງກ່າວ ແມ່ນເປັນຫົວຂໍ້ຮີບດ່ວນທີ່ລັດຖະບານກຳລັງໃຫ້ຄວາມເອົາໃຈໃສ່, ທ່ານໃຫ້ຄຳໝັ້ນສັນຍາວ່າ ບັນຫາ ຄວາມຄິດເຫັນ ແລະ ຫົວຂໍ້ອື່ນໆ ທີ່ໄດ້ສະເໜີຕໍ່ກອງປະຊຸມໃນມື້ນີ້ ຈະໄດ້ຮັບການພິຈາລະນາຊອກຫາທາງອອກໃນການແກ້ໄຂ.
ທ່ານໄດ້ກ່າວເນັ້ນຕື່ມວ່າ “ຕາງໜ້າໃຫ້ລັດຖະບານ, ຂ້າພະເຈົ້າຂໍຮັບເອົາບັນຫາທັງໝົດເຫລົ່ານີ້ເປັນຄວາມຮັບຜິດຊອບຂອງລັດຖະບານ. ລັດຖະບານ ແລະ ອົງການປົກຄອງ ຈະເອົາໃຈໃສ່ໃນການແກ້ໄຂບັນຫາດັ່ງກ່າວຢ່າງຕັ້ງໜ້າ ແລະ ກົງໄປກົງມາ ເພື່ອເຮັດໃຫ້ບັນດາທຸລະກິດສາມາດດຳເນີນ ແລະ ພັດທະນາໄດ້ດີຂຶ້ນ”
ທ່ານນາຍົກລັດຖະມົນຕີແນະນຳໃຫ້ອຳນາດການປົກຄອງໃນທຸກຂັ້ນ ປະຕິບັດຢ່າງຮີບດ່ວນໃນການທົບທວນ ແລະ ປັບປຸງຂັ້ນຕອນ ເພື່ອສ້າງສິ່ງອຳນວຍທີ່ດີໃຫ້ແກ່ການລົງທຶນ ແລະ ການດຳເນີນທຸລະກິດ.
ທ່ານສະເໜີໃຫ້ອຳນາດການປົກຄອງພິຈາລະນາສະໜັບສະໜູນ ແລະ ອຳນວຍຄວາມສະດວກແກ່ພາກທຸລະກິດ ໃຫ້ກາຍເປັນຄວາມຮັບຜິດຊອບທາງດ້ານການເມືອງຂອງຂະແໜງການຕົນ.
ທ່ານນາຍົກລັດຖະມົນຕີ ໄດ້ເນັ້ນເຖິງຄວາມຈຳເປັນທີ່ພາກທຸລະກິດຂອງລາວ ຕ້ອງໄດ້ປັບປຸງປະສິດທິພາບຂອງທຸລະກິດຕົນ ເພື່ອກຽມຄວາມພ້ອມ ເຊື່ອມໂຍງເສດຖະກິດເຂົ້າສູ່ສາກົນແລະ ພາກພື້ນ ເຊັ່ນການເຊື່ອມໂຍງເຂົ້າສູ່ປະຊາຄົມເສດຖະກິດອາຊຽນໃນປີ 2015 ນີ້.
ທ່ານນາຍົກໄດ້ສະເໜີໃຫ້ສະພາການຄ້າ ແລະ ອຸດສາຫະກຳ ແຫ່ງຊາດ ປັບປຸງການການປະຕິບັດໜ້າທີ່ໃນການຊ່ວຍສະໜັບສະໜູນໃຫ້ບັນດາສະມາຊິກເພື່ອກຽມພ້ອມສຳລັບການເຊື່ອມໂຍງເສດຖະກິດດັ່ງກ່າວນີ້.
ທ່ານ ທອງສີງ ທຳມະວົງ ຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງ ຈົ່ງເຮັດວຽກຮ່ວມກັນ ຊອກຫາ ແລະ ຮັບປະກັນ ຕະຫລາດຈຳໜ່າຍຜະລິດຕະພັນຂອງລາວ ໃຫ້ສາມາດມີຕະຫລາດຮອງຮັບຢ່າງພຽງພໍ.
ແຫລ່ງຂໍ້ມູນ: ໜັງສືພິມວຽງຈັນທາມ໌ມ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.