ພາຍຫຼັງທີ່ ສປປ ລາວ ໄດ້ເຂົ້າເປັນສາມະຊິກອົງການການຄ້າໂລກຢ່າງສົມບູນໃນຕົ້ນປີ 2013 ເປັນຕົ້ນມາ ສປປ ລາວ ກໍມີພັນທະໃນ ການລົບລ້າງບັນດາມາດຕະການທີ່ບໍ່ຈຳເປັນ ທີ່ສ້າງຂໍ້ຈຳກັດທາງດ້ານການຄ້າເທື່ອລະກ້າວ. ສປປ ລາວ ຕ້ອງໄດ້ຈັດ ແຈງ ບັນດາ ມາດຕະການທາງດ້ານການຄ້າທີ່ບໍ່ແມ່ນພາສີ ໃຫ້ມີຄວາມງ່າຍດາຍ ແລະ ສອດຄ່ອງກັບລະບຽບການຂອງສາກົນ. ເຊິ່ງໃນທາງກົງກັນ ກໍຈະປະກອບສ່ວນປັບປຸງສະພາບແວດລ້ອມທາງດ້ານການຄ້າຂອງ ສປປ ລາວ ໃຫ້ເອື້ອອຳນວຍ ຕໍ່ຜູ້ດຳ ເນີນທຸລະກິດການຄ້າຫຼາຍຂື້ນ. ສະນັ້ນ, ການທົບທວນຄືນກ່ຽວກັບ ມາດຕະການທາງດ້ານການຄ້າທີ່ບໍ່ແມ່ນພາສີ ຈຶ່ງຖືວ່າເປັນວຽກບູລິມະສິດໜຶ່ງຂອງລັດຖະບານລາວ ທີ່ຕ້ອງໄດ້ຮັບການເອົາໃຈໃສ່ ຍ້ອນວຽກງານດັ່ງກ່າວນີ້ ເປັນວຽກງານໜຶ່ງທີ່ຕິດພັນກັບຫຼາຍຂະແໜງການ. ພ້ອມນີ້, ກໍຮຽກຮ້ອງ ໃຫ້ຂະແໜງການທີ່ກ່ຽວຂ້ອງ ແລະ ຂະແໜງການທີ່ເຮັດວຽກປິ່ນອ້ອມກັບວຽກງານການຄ້າ ມີການປະສານງານຮ່ວມມືກັນຢ່າງຫ້າວຫັນ ແລະ ກົມ ກຽວ ເພື່ອພ້ອມກັນຄົ້ນຄ້ວາວິໄຈບັນດາມາດຕະການ, ນິຕິກຳ ທີ່ແຕ່ລະຂະແໜງການວາງອອກ ໃຫ້ສາມາດບັນລຸຕາມຈຸດປະສົງທີ່ກ່າວມາກໍ່ຄື ຮັບປະກັນບໍ່ໃຫ້ມາດຕະການທີ່ຖືກນຳໃຊ້ຢູ່ ກາຍເປັນສິ່ງກີດຂວາງຕໍ່ກັບການຄ້າ ທັງນີ້ກໍເພື່ອສ້າງສິ່ງອຳນວຍຄວາມສະດວກໃຫ້ແກ່ການເຄື່ອນຍ້າຍສິນຄ້າ ໃຫ້ສາມາດດຳເນີນໄປໄດ້ຢ່າງສະດວກແລະ ວ່ອງໄວ.
ເຖິງແມ່ນວ່າ ວຽກງານທົບທວນມາດຕະການທາງດ້ານການຄ້າທີ່ບໍ່ແມ່ນພາສີ ຫຼື NTMs ແມ່ນວຽກງານໃໝ່ ແລະ ມີຄວາມທ້າທາຍ ແຕ່ກໍ່ໄດ້ຮັບການຮ່ວມມືຈາກຂະແໜງການທີ່ກ່ຽວຂ້ອງເປັນຢ່າງດີ. ປະຈຸບັນ, ຂະແໜງການທີ່ກ່ຽວ ຂ້ອງໄດ້ແຕ່ງຕັ້ງຈຸດປະສານ ງານເພື່ອເຂົ້າຮ່ວມເປັນໜ່ວຍງານເຮັດວຽກຍ່ອຍ ເພື່ອທົບທວນຄືນມາດຕະການດ້ານການຄ້າທີ່ບໍ່ແມ່ນພາສີ ຫຼື NRS. ໂດຍເຫັນໄດ້ເຖິງຄວາມໝາຍຄວາມສຳຄັນຂອງວຽກງານດັ່ງກ່າວ, ກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ ໄດ້ເປີດການຝຶກອົບຮົມ ເພື່ອສ້າງຄວາມເຂົ້າໃຈ ກ່ຽວກັບ ບັນດາມາດຕະ ການທາງດ້ານການຄ້າທີ່ບໍ່ແມ່ນພາສີ (NTMs) ເລັ່ງໃສ່ເສີມສ້າງຄວາມອາດສາມາດກ່ຽວກັບວຽກງານ NTMs ໃຫ້ແກ່ຈຸດປະສານງານ NTMs ທີ່ໄດ້ຮັບການແຕ່ງຕັ້ງຈາກຂະແໜງການທີ່ເຮັດວຽກປິ່ນອ້ອມວຽກງານການຄ້າ, ໂດຍສະ ເພາະ ເພື່ອຮັບປະກັນການທົບທວນຄືນມາດຕະການທາງດ້ານການຄ້າທີ່ບໍ່ແມ່ນພາສີ ໃຫ້ໄດ້ຮັບປະສິດທິຜົນສູງສຸດ. ການຝຶກອົບຮົມຄັ້ງນີ້ໄດ້ໂອກາດດີທີ່ທ່ານ José-Daniel Reyes, ຊ່ຽວຊານ NTMs ຈາກທະນາຄານໂລກ ມາຖ່າຍທອດຄວາມຮູ້ກ່ຽວ ກັບຫລັກການ ແລະ ວິທີການປະເມີນ NTMs ພ້ອມທັງ ແບ່ງປັນບົດຮຽນຂອງຫຼາຍປະເທດໃນການທົບທວນ NTMs. ນອກຈາກນັ້ນ, ທີມງານທົບທວນມາດຕະການ NTMs ທີ່ປະຈຳຢູ່ ກົມການນຳເຂົ້າ ແລະ ສົ່ງອອກ ຍັງໄດ້ນຳສະເໜີຜົນຂອງການເກັບ ກຳມາດຕະການ ດ້ານການຄ້າທີ່ບໍ່ແມ່ນພາສີເບື້ອງຕົ້ນ ພາຍຫຼັງທີ່ໄດ້ເຮັດວຽກຮ່ວມກັບບັນດາຈຸດປະສານງານໃນການສັງລວມຂໍ້ມູນດັ່ງກ່າວນີ້ມາໄດ້ໄລຍະໜຶ່ງແລ້ວ.
ບັນດາ NTMs ທີ່ສັງລວມໄດ້ ຈະໄດ້ເອົາລົງໃນຖານຂໍ້ມູນຂອງສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ (Lao PDR Trade Portal) ໂດຍອອກແບບໃຫ້ສາມາດຄົ້ນຫາໄດ້ຢ່າງງ່າຍດາຍ. ຄວາມພະຍາຍາມທັງໝົດນີ້, ເປັນຂໍ້ລິເລີ່ມອັນສຳຄັນຂອງ ສປປ ລາວ ໃນການສ້າງຄວາມໂປ່ງໃສ ໂດຍການເຜີຍແຜ່ຂໍ້ມູນຂ່າວສານທີ່ຈຳເປັນທັງໝົດກ່ຽວກັບການຄ້າ ໃຫ້ສາທາລະນະຊົນ ພ້ອມນັ້ນ ຍັງເປັນການຈັດຕັ້ງປະຕິບັດພັນທະຂອງ ສປປ ລາວ ໃນຂອບອາຊຽນ ກ່ຽວກັບການແຈ້ງຂໍ້ມູນ NTMs ຊຶ່ງຈະເປັນບາດ ກ້າວອັນ ສຳຄັນ ຂອງການສ້າງສູນຂໍ້ມູນຂ່າວສານທາງດ້ານການຄ້າແຫ່ງຊາດ (National Trade Repository) ພາຍໃຕ້ສັນຍາ ATIGA.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.