ດ່ານລະໄລ ໄດ້ຮັບການຍົກລະດັບ ຈາກດ່ານທ້ອງຖິ່ນມາເປັນດ່ານສາກົນ ເຊິ່ງໄດ້ກາຍເປັນດ່ານສາກົນແຫ່ງທຳອິດຂອງ ແຂວງສາລະວັນ ແລະ ເປັນດ່ານອັນດັບທີ 08 ຂອງ ສປປ ລາວ ທີ່ເຊື່ອມຈອດກັບ ສສ. ຫວຽດນາມ. ໃນພິທີການເປີດດ່ານສາກົນຄັ້ງນີ້ ໃຫ້ກຽດເປັນປະທານຮ່ວມຂອງ ທ່ານ ດຣ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ຟາມ ບິ່ງ ມິງ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ແຫ່ງ ສສ ຫວຽດນາມ. ໃນການຍົກລະດັບດ່ານດັ່ງກ່າວນີ້ ສອງຊາດ ລາວ-ຫວຽດນາມ ກໍ່ຍັງໄດ້ເຮັດວຽກງານປັກຫຼັກໝາຍຊາຍແດນຮ່ວມກັນ ເພື່ອເຮັດໃຫ້ເສັ້ນຊາຍແດນຂອງສອງປະເທດມີຄວາມຈະແຈ້ງ ແລະ ຊັດເຈນ. ການຍົກລະດັບ ດ່ານລະໄລ ຂື້ນເປັນດ່ານສາກົນຈະເປັນການຊຸກຍູ້ ໃຫ້ແກ່ການພັດທະນາເສດຖະກິດ-ສັງຄົມ ລະຫວ່າງ ແຂວງສາລະວັນ ແລະ ແຂວງກວາງຈິ ໃຫ້ມີການຂະຫຍາຍຕົວຫຼາຍຂື້ນກວ່າເກົ່າ ເຊັ່ນ: ສົ່ງເສີມການທ່ອງທ່ຽວ, ການຜະລິດເປັນສິນຄ້າ, ການຂົນສົ່ງໂດຍສານ, ການບໍລິການ, ການນຳເຂົ້າ ແລະ ສົ່ງອອກ ເພີ່ມຂື້ນ ແລະ ຈະຊ່ວຍດຶງດູດນັກລົງທຶນຈາກ ຫວຽດນາມ-ໄທ ເຂົ້າມາລົງທຶນໃນ ສປປ ລາວ ໂດຍສະເພາະຈະເປັນການລົງທຶນດ້ານກະສິກຳ. ການເປີດດ່ານດັ່ງກ່າວບໍ່ພຽງແຕ່ຈະຊ່ວຍພັດທະນາເສດຖະກິດ-ສັງຄົມ ຂອງ ແຂວງສະລະວັນ ຂອງ ສປປ ລາວ ກັບ ແຂວງກວາງຈິ ຂອງ ສສ ຫວຽດນາມ ເທົ່ານັ້ນ ແຕ່ຍັງຈະຊ່ວຍໃຫ້ການພົວພັນຮ່ວມມື ສະເພາະດ້ານເສດຖະກິດ-ການຄ້າ ຂອງ 03 ຊາດ ລາວ-ໄທ-ຫວຽດນາມ ນັບມື້ນັບຫຼາຍຂື້ນ. ເຊິ່ງຄາດວ່າແຂວງສາລະວັນ ຈະກາຍເປັນທາງຜ່ານໃຫ້ແກ່ ແຂວງກວາງຈິ (ຫວຽດນາມ) ແລະ ຈັງຫວັດອຸບົນຣາດຊະທານີ (ໄທ) ເພື່ອນຳສິນຄ້າຜ່ານແດນ-ຂາອອກຕໍ່ ແລະ ເປັນບ່ອນຜະລິດວັດຖຸດິບໃຫ້ແກ່ອຸດສາຫະກຳ ຂອງ ໄທ-ຫວຽດນາມ ເຊັ່ນ: ຢາງພາລາ, ມັນຕົ້ນ ແລະ ອື່ນໆ. ນອກນັ້ນ ດ່ານຊາຍແດນສາກົນລະໄລ ຍັງຈະກາຍເປັນດ່ານທີ່ຮັບໃຊ້ແຜນພັດພັດທະນາເສດຖະກິດ-ສັງຄົມ ຂອງແລວທາງເສດຖະກິດຕາເວັນອອກ-ຕາເວັນຕົກ, ການເຊື່ອມຕໍ່ຂອງອາຊຽນ ແລະ ໂຄງການເຊື່ອມໂຍງຂອງພູມີພາກ ແລະ ສາກົນ.
ແຫຼ່ງຂໍ້ມູນ: ໜັງສືພິມເສດຖະກິດ-ການຄ້າ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.